حي العاشقين

بارت5

تقى_السامرائي

كعدت تعشيت وياهم وهنه يسولفن هاي حبلت هاي تزوجت بأختصار غيبه ونميمه بأحتراف الى أن عطت بيهن

- بسكم عاد شكد حجيتن بس تجن البيت ينترس ذنوب كافي عاد

سكتن الحمدلله خلصنه اكل كمت غسلت مواعين وصبيت الجاي كعدت بالحوش ادحك عل سما ونجومها التلمع والهلال الجو جان حلو كلش
يفتح النفس للكعده ..

جتي دلوف كابلتني وكالت

- يسر ، اهجس روحي تعبانه مثل الظهري مكسور
شلت مسؤليه وانه الي محد شال مسؤليتي ..

دنكت رأسها بتعب سحبت شعرها الأحمر الي جانت كل ما ينزل لونه تصبغه أحمر تكول ناصر يحبه هيج
وحجيت

- دلوف احس بيج ولله يشهد وادري شكد تعبتي
من عمرج 14سنه وانتي مشلوع كلبج

نزلت دمعتها وحجت

- البنات كبرن يا يسر وكل وحده صارت بطولي والناس ماترحمهن تسمعهم بهل حجي الماصخ

- الناس تكضي عمرها كله بالحجي بس هذا ما يعني ان الحياه وكفت لا طبعا مثل ماعشتي عمرج كويه علميهن عل كوايه الناس تحجي على فلان وعلان ومايعاينون أرواحهم متروسين ذنوب وأخطاء احنه مامسويها، كل ما يأذوج اقوى أكثر لاترديهم باجر عكبه الله يردهم ..

سكتت وباست راسي وكالت

- صح اني أكبر منج بسنه بس بيج البله ولله

فريت ضفيرتي الي واصله لفخذي وكلت

- شعبالج بويه ، يلا انقشعي نامي

دارت وجها عليه وكالت

- ترا البنات نامن على جربايتج

- عجل نام يمهن الجربايه جبيره كلش تكفي

- يلا تصبحين على خير

-تلاكين الخير

حطيت راسي عل مخده وكلت

-يارب بدون أحلام يارب

غمضت عيني واسمع صوت سوالف فتحت عيني
لكيتهن كاعدات يسولفن كمت يمهن وحجيت

- تنوموني حت تسولفن

ضحكن بصوت عالي

-وصمخ طنت أذني

حجت دعيه

- دلال تريد تكول النه شي

خليت أيدي جوه خدي وكلت

- احجي شكو

ضلت تحمحم

-تحجين لو شلون

-اي رح احجي ، اني احب حازم

ضحكنه بخجل عبالك احنه الي دنحجي مو هيه
حجيت اني

-وهو

-ميدري عن هوى داري أصلا

- اتناسي احسن