تقى_السامرائي
غمضت عيني واحتلني النوم..
جان يجرجر بيه وصعدني سياره ، مكدرت اتحرك تعبت من السكوت حجيت وعيطت
- وين توديني شتريد مني ،شسالفتك ماتحجي اخرس يو شني..
- دهر صابج ،شمالج ماتسكتين
صوته جان جهوري وكأني سامعته قبل .،
وكف السياره ونزل فتح ايدي بس عيوني بعدها مغمضه ،بحركه سريعه ضربته راشدي على عينه ودفرته على بطنه وفتحت الشال من عيني ..
بالكوه كدرت افتح عيني لان جانت مشدوده بقوه ،
ما لحكت انهزم منه لزم ايدي ودارني عليه نصدمت
عطت بي واني اضربه على صدره .
- لك يا ساقط يامنحط تبيع بلدك ياعار ، لك تخليهم يمدون ايدهم على مره تف على وجهك ياخسيس يانكس ..
لزم ايدي وخضني بطريقه مرعبه كلش ..
صحيت على صوت دلوف ودلال ..
- لج كومي عاد ،ليوم خطوبتج كومي
نهظت بأنزعاج وحجيت
- شجابج انتي ،اوكفي ياخطوبه
هزت ايدها دلال وكالت
-هنيالها لأمي اي ولله
هزيت راسي وصحت
-يوووو نسيت
كعدت على حيلي ولميت شعري عاينت على دلال وكلتلها
- من شوكت نايمه
- يووو من زمان
لميت الفراش ورحت غسلت وجهي صاحتني دلوف
-تعاي تريكي مساع جتي عمتي سماح تكول خل تحضر غده وتكول كثري منه يجوز يجون عل غده
هزيت راسي وحجيت
-ماشي حاضر
كعدت على الريوك واكلت من كل كلبي كلش جنت جوعانه بعدين درت وجهي على دلوف و سألتها
-وين دعيه
-مساع جتي بس راحت للبيت دتجيب غراضنه لان رح نبقه هنا
يا يمه شكد فرحت حسيت اكو أحد يحبني ويهتم لأمري ، كعدنه سويه ناكل جتي دعاء كعدت واكلت ويانه كامن البنات وحده نضفت الحوش وحده غسلت هدوم وحده مسحت البيت اني رحت حضرت الغده جان برياني وتشريب ولبن وطرشي وسمج شوي 3سمجايات حرت شسوي..
خلصت وكمت سبحت وجتي دلال حفت وجهي
شكلي تغير هوايه ،صارت ساعه ب12ظهر كمت لبست دشداشتي خيطتها بيدي وظفرت شعري
وكفت على المرايه وخليت الكحله والحمره السحريه
جتي دعاء خلت من الحمره على خدودي حتى تصير حمره صارت ونص جان تندك الباب كلبي صار طبل من التوتر وخوف وتردد ، تصرفت وكأنما ماكو شي
سلمت عليهم بس خواته وامه مدري شبيهن يسلمن من ورا خشومهن مهتميت المهم اني مرتاحه رحت صبيت الغده وحضرت السفره وكعدنه ناكل وحجه ابو فاقد
- عاشت ايدج يابنتي ماقصرتي
بلعت اللكمه وكلت
- عافيات عمي هني ومري
حجت اخت فاقد الصغيره ساريه
- ها يابه هو اكل قابل معجزه
خزرها عمي ونزلت رأسها اكلت هم طنشتها سكتت فاقد مامهتم ولا حجه شي ضل ساكت يأكل ويدحك بوجهي ..
خلصنه غده وحضرت الكهوه والجاي وكليجه وبقلاوه ودهينه بخرت الديوانيه وهمه خلصو وكعدو جانت عمه سماح ورجلها وبنها الصغير سامي ..
اجه الشيخ وتم العقد حسيت بخوفه وتردد بس حاولت اسيطر على مشاعري المتضاربه وكملت اليوم عادي..
بس تفاجأة من تسرعهم عمتي تكول الاسبوع الجاي العرس هم سكتت كلت لنفسي مو هذا الي تريدي يايسر أرضي بالديصير لان انته كلتيها تحبي ف سكتي احسنلج ..
الليل كله مانمت تراكم عليه الشغل خبزت وسقيت الزرع وحضرت البن ولكيمر الصبح دلوف تروح تبيعه وخيطت دشاديش العالم خلصت منهم ..
ضليت كاعده لصبح ماريد انام واحلم كعدت اقرأ قرآن وصليت لهيت روحي بكلشي لحد ما صارت 6صبح ماتحملت نمت من التعب..
غمضت عيني اخذتني النومه وكعدت على حلم
بصدام وهو يعيط من التعذيب فزيت مخروعه وعركانه عاينت للساعه ب12لظهر كمت وحجيت
- يبوصخام شكد نايمه
صفطت الفراش وطلعت ملابس ورحت سبحت طلعت لكيت دلال تصب غده بس ماشافتني وكفت مشطت شعري واسمعها تحجي ويا دعيه وتكول
-مقهوره على يسر مااكدر اكول الها فاقد جان يتحرش ب سميه بنت ام سهير
صفنت على كلامها شدتحجي هاي وكانو شي يمنعني اصدك الحجي مدري شصارلي مااعرف مثل الفاقده عن الوعي ..
فتت للمطبخ غيرت الموضوع دعاء وحاولو يلهوني
حتى مااسئل عن شي ، جنت اريد انهي كلشي بعد السمعته بس تذكرت حارث ..
مستحيل أتخلى عن تحديي اله ،معرفت ان رح اتندم
على قراري هذا او رح يصير عكس الي جنت احلم بي ...
صيام مقبول يبنوات💞
لاتنسون التصويت 👍💋
رائيكم يهمني يحلوات 😊💚
