The Paramount Code (The Odd Ones, Book 1)

004. A Turbulent Combination

Pagkatapos samahan ang pinsan na si Kevin sa building ng mga nasa junior high school, diniretso na ni Jacob ang daan papunta sa InterID Building. Habang naglalakad, nadaanan niya sa tapat ng main library ang dalawang babaeng tila nagtatalo. Wala naman sana siyang pakialam sa mga ito, pero napansin niyang ang isa sa kanila ay ang babaeng nakabangga sa kanya noong araw ng placement exam. Hindi niya basta makakalimutan ang mukha nito, kaya hindi niya mapigilang mapatigil sa kinatatayuan habang pinapanood ang dalawa.

Kahit hindi niya naririnig ang pinag-uusapan ng dalawa dahil sa distansya mula sa mga ito, pansin niyang tila nadedehado at mangiyak-ngiyak na ang babaeng nakabangga sa kanya noon. Hindi ito makasagot at bahagya pa itong sinasaktan ng mas maliit na babaeng kausap nito. Hindi nagtagal ay sumagot ang babaeng tila maiiyak na dala ng emosyon, kaya itinulak ito ng kausap niya bago tuluyang umalis.

Nanlaki ang mga mata ni Jacob nang makitang bumagsak ang babae sa lupa kaya agad siyang tumakbo palapit dito para tulungan itong makatayo.

"Okay ka lang ba?" tanong ni Jacob sa babae, "Hindi ka ba nasugatan?"

"Okay lang ako –" Naputol ang pagsasalita ng babae na tila naalala na kung saan niya unang nakita si Jacob. Agad itong yumuko at tinanggal ang alikabok na dumikit sa uniporme nito. "Huwag mo na akong intindihin... Umalis ka na."

Napangiti si Jacob habang pinagmamasdan ang kaharap. "Wala man lang 'thank you'? Technically, we're not strangers anymore kasi nagkita na tayo noong placement exam." He then reached out his hand to her, "Ako nga pala si Jacob."

Hindi sumagot ang babae na nakatayo pa rin at nakayuko sa harap niya. Alam ni Jacob na nahihiya at naaalangan ito sa kanya, pero hindi niya mapigilan ang sarili na kausapin ito. Naaaliw kasi siya sa ipinapakita nitong pag-uugali. Sinilip niya na lamang ang nakasulat sa name plate ng kaharap.

"Ahh... Leia Selene Thompson, Naturalist Intelligence Division." Jacob chuckled before placing his hands inside his pockets, "Hi, Leia. Nice to meet you. Thompson ang apelyido mo, so ibig sabihin may lahi ka... Anong nationality ng tatay mo?"

Agad na tinakpan ni Leia ang name plate, bago mabilis na naglakad palayo. Mabilis namang sumunod sa kanya si Jacob na madali lamang siyang nasabayan sa paglalakad.

"Katabi ng VLID ang building ninyo, hindi ba?" tanong niya rito.

Hindi nito sinagot ang tanong niya, at sa halip ay sinagot siya nito ng isa ring tanong. "T-transferee ka ba? Hindi ka nakasuot ng uniform noong placement exam eh..."

Tumango si Jacob, at bahagyang nakahinga nang maluwag dahil kinausap na siya ng babae. "Oo. Medyo awkward nga sa pakiramdam eh. Sana lang hindi mainit ang mga dugo ninyo sa mga transferees na kagaya ko."

"H-hindi naman..." She still sounded meek, but still trying to keep on with the conversation, "Wala namang ganun dito."

Tumango-tango si Jacob, na pinipigilan ang pagngiti dahil sa patuloy na pagkausap sa kanya ni Leia, "Pwede ba akong magtanong?"

"Ano 'yun?"

"Bakit palagi kang nakayuko?"

Leia seemed a little startled, but still averted her eyes from him as they walked. "N-naiilang kasi ako dahil sa height ko..."

"Gaano ka ba katangkad?"

"Uh..." Bahagyang nag-alangan si Leia, pero sinagot pa rin nito ang tanong niya, "170 centimeters."

Napatigil si Jacob sa paglalakad, dahilan para bahagyang mapahiya si Leia dahil iniisip niyang nagulat at nailang ang lalaki sa laki niya.

Tumaas ang isang kilay ng lalaki, at ipinatong ang kamay nito sa ulo niya. Pagkatapos ay unti-unting inilapit ni Jacob ang kamay sa sarili niya hanggang sa tumama ito sa bandang itaas ng ilong niya. Doon napagtanto ni Leia na kinukumpara pala ng lalaki ang mga height nilang dalawa.