အဘွားကိုလိုက်ပို့ပေးပြီးတော့ ကျွန်းကြီးရဲ့ဈေးတန်းထဲကလမ်းဘေးဆိုင်တစ်ဆိုင်မှာ နေးတို့မနက်စာ,စားဖြစ်ကြသည်။ ဒုဥက္ကဌလိုဘီလီယံနဲ့ချီပြီးချမ်းသာတဲ့သူဌေးလောင်းက လမ်းဘေးဆိုင်မှာ အဆင်ပြေပြေစားသောက်နေနိုင်တာမြင်ရတော့ နေးစိတ်ထဲက မသိမသာလေးစားမိသေးသည်။
" အန်တီ... ကိုယ့်ကိုနောက်တစ်ပွဲလောက် "
ရှမ်းခေါက်ဆွဲတစ်ပွဲကုန်လို့ နောက်တစ်ပွဲထပ်ယူဖို့ပြင်နေတဲ့ဒုဥက္ကဌကို နေးစားနေရင်းကနေ မော့ကြည့်မိသည်။
" ပေပွကုန်ပြီ... ကလေးလား.. ဟက်! "
ခေါက်ဆွဲမျှင်ကို တူနဲ့ညှပ်ပြီးပါးစပ်ထဲထည့်နေရင်းက မော့ကြည့်လာတဲ့နေးလက်ျာက မူကြိုကလေးလေးနဲ့တူနေသည်။ နှုတ်ခမ်းနားတစ်ဝိုက်မှာ ပေကျန်နေတဲ့ဆီတို့ကို တစ်ရှူးနဲ့သုတ်ပေးမိတော့ မျက်တောင်တဖြတ်ဖြတ်ခတ်ရင်း နောက်ယို့သွားသည်။
" ရ. ရတယ်... ကိုယ့်ဘာသာကိုယ်သုတ်ယူပါမယ် "
" မရှက်ပါနဲ့ လူလေးရယ်... ဒီကျွန်းကိုက ဟန်းနီးမွန်းထွက်တဲ့စုံတွဲတွေလာလည်တာများလို့ အရီးတို့ကရိုးနေပြီ... ပြီးတော့ လူလေးကမိန်းကလေးတွေရှုံးအောင်လှနေတဲ့ဟာကို မင်းယောက်ျားက တုန်နေအောင်ချစ်တာ မဆန်းပါဘူးကွယ် "
" ဗျာ!!... အဟွတ်... အဟွတ်... ကျွန်တော်တို့က... "
" သူကအဲ့လိုပဲ အရှက်အကြောက်အရမ်းကြီးတယ် "
" အမလေး... မရှက်နဲ့... မရှက်နဲ့... "
ဆိုင်ရှင်အဒေါ်ကြီးက ပြောချင်ရာပြောပြီး အနောက်ထဲဝင်သွားသည်။ ဘေးမှာရှိနေတဲ့ဒုဥက္ကဌကို အံကြိတ်ကာ မျက်မှောင်ကြုတ်ပြီးကြည့်မိတော့ နေးကိုကြည့်မနေပေမယ့် ပါးချိုင့်တစ်ဖက်ပေါ်လွင်အောင် ပြုံးလျက်။
စားသောက်ပြီးတော့ ရိုးရာအလှတွေများပြားလှတဲ့မာဝေနီကျွန်းဘက်ကို ခရီးဆက်ဖို့ပြင်သည်။
" မာဝေနီကျွန်းဘက်ကိုသွားမယ့်မော်တော်လားမသိ "
" ဟုတ်တယ်ဗျာ့... ဘယ်နှစ်ယောက်စီးမှာလဲ "
မော်တော်ဆိပ်မှာရပ်ထားတဲ့ မော်တော်တွေကိုတွေ့တော့ မော်တော်မောင်းသူဖြစ်ပုံရတဲ့လူကို သိလိုရာမေးပြီး နေး အနောက်ကို လှည့်ကြည့်လိုက်သည်။ မျက်နှာက ပြုံးတုံ့တုံ့နဲ့ အနားကိုရောက်လာတဲ့ ဒုဥက္ကဌကိုကြည့်ရင်း နေးနှာခေါင်းရှုံ့လိုက်သည်။
YOU ARE READING
My Beautiful SPOUSE
General Fictionဆက္ကဘုံလျှန် (Sakka Bxon Hlxan) နေးလက်ျာ (Nayy Lattyar) (own creation) Starting Date ••• 24/9/2021 Ending Date •••
