🌙حسناء القايد🌙
👑oumaima mega 👑
⚡176⚡
فخر الدين علا الشوفة و نطق و تكلم و غطا عليها : لقاتهم حسناء و جابتهم لك
سلطانة خطفت السوارت من يدين حسناء : جاك الخير ابنتي كنت عطيتهم لبنتي فردوس تلعب بيهم و يمكن طيحتهم ....رمات كلمة زينة غير قبالت ولدها ... و حسناء هزت الشوفة مخرجاها في القايد ...مضناتوس غيغطي عليهاا و يعلي شانها ماشي ينقص منها وو يقول عليها بلي سرقت من خزام لالة سلطانة ...قلبها تيضرب في كاشوشها و عينيها كلاتو بيهم ... و نزلت شوفة حادرة راس و سرقت شفايفها تبسيمة ...و سلطانة قرمت على سوارت بين يديها و طلع و تنزل في حسناء من تحت العين
فخر الدين : الحاجة (قفزها من مكانها هو كيدوي و معلي الغوباشة ) عطيها مفتاح جناحيي
سلطانة جاتها كي صفعة على خدهااا واش سمعتو مزية و لا غاريح ضربو ودنيها حيت عمر ولدها عملها ولا عطا لشي وحدة من نساه ساروت جناحو ...حسناء تاهيا تاهيا جبدت عويناتها و تتشوف غا من لتحت تفكراتو فاش قالها اش حبت و بغات غير تقولها ليه هو يلبي ليها اش بغات ...و هادشي غير مازيد مخلي قلبها تيرفرفر و يطير
فخر الدين شاف سكاتها و عاود نطق معلي الحاجب : الحاجة ؟
الحاجة شدتها فحال السخفة ووجهها تخطف : ااه ساروت ؟ هه واخا ...هبطت عينيها على سوارت يديها و هي كترعد .. و بدات تلوي و تخرج مفتاح جناح سيد القايد هاااكااا مدهب و كبيير ....حتى حيداتو و مداتو لحسناء ومطرطقة في حسناء شوفتها المشرارة و من بين سنانها نطقت : هاكي ابنتي ....حسناء هزت فيه العين و شافت غا شوفتها فيها خوفتها ...هزت يديها و خدات من عندها ساروت ...و سلطانة بزز تطلقاتو ليها
فخر الدين قاد الخواطر و صفا النية هو يتكلم : خليت ليكم الراحة دابا
سلطانة : الله يرضي عليك اولدي ...هز غا بيدو سلام رجال الحرار ...و دار بسلاهمو لي ضارب تالرض و مشا غادي خارج من قصرووو ....و هي تلوي سلطانة عينيها على حسناء كيف لفعة المعكربة ...حسناء خلعتها بدوك شوفات و حدرت راس تاني ..معرفت اش جرالها و شوفاتها مامرييحينها .... و هي تلمح بنص عينيها صبية مخبيين ورا الحيط ..و كيطلو عليها
🌙حسناء القايد🌙
👑oumaima mega 👑
⚡177⚡
دار ليها معاد من ورا الحيط بيدو اش عملت في رسمة لي رسم ...و ردت عليه حسناء غا بحاجبها بايلا تاحد معاق و تاحد مساق لا خبار الرسمة لا خبار الفرنسسية ... سلطانة شافتها فين رامية لعين ...و دورت تاهيا راسها و هما يبانو ليها حفايدها كيهدرو بالهمس و الغمز مع هاد بنت العجيج ...غير عرفها معاد متعطلش و خرج يتجااارااا ماجي لعندها و تبعوه خواتو فردوس و فاطمة زهراء
معاد مداهاش في حناه من وراه و عينو غا على مرا بااه لي واقفة و متبسمة ليه قرب ليها و عنقها من حزامها و زير عليها : لهلا يخطيك علينا ا مرت بااا ....سلطانة بركت غير تتفرج و طاح في بالها العجب اش قرب حفايدها لهاد لفعة ...و لي غيزيد يقتلها و يطعن قلبها ...هي فاش جات و تا فاطمة زهراء عنقت حسناء و مع الطفلة باقا صبية و صغيرة هزت عوييناتها في حسناء : واش نقد نقولييك يماااا
سلطانة بلا هواها غوتت تاقفزت كلشي : عرشيااااا (لشي دار لعندها و صبية خافو و رجعت تبسمت ليهم ) اجو ا وليداتي عند حناكم ...و جاو لعندها و حضنتهم و طلع عينها كيف البارود في مرت ولدها ...مغتسمح لحتى شي وحدة تاخد مكانها و لا تزعزع مقامها ولات تنفخ و تفش ...حسناء خوفوها شوفاتها فيها كتطل عليها غا من تحت العين و ضاربة الساكتة ...شافية من بعيد قشعت لالها و جات ووقف ورا حسناء ترافقها كيف ضلها
جات عرشية تتجرااا ووقفت قبالت لالها سلطانة حانية و محنية : هاني ا لالة
سلطانة كتنطق و تكلم و عينيها على حسناء : بغيتكم توجدو لغدا لسيدكم انا غندوز هاد صبحية مع حفايدي و مبغيت تا حد يصدعني ولا يزعجني
فردوس هزت عويناتها في حناها : صبحية كاملة احنا
سلطانة نزلت راسها ليها و تبسمت ليها : كااملة ابنيتي و غنعملوو اش تحبو و تبغيو يلاه اجو معايا ...و ضربت في حسناء خلاتها تما و جرت حفايدها معاها ترجع تخليهم رايميين غا ليها (منجادبين ليها ) و متجي توحدة تقلبهم عليها ...عرشية غا سمعت اش قالت لالها و رجعت فحالتها ...و حسناء بقات واقفة تما و علات راسها و هزت حجبانها و تدور في عينيها ...فحالا تتخمم فشي حاجة
شافية طلت عليها من وراها : لالة ؟ فاش تتخمي ؟
حسناء بلاما دور عندها : لقيتيني تنفكر انا من نهار جيت لهنا ما حطيت يدي في الما لا في شقا لا في طياب و انا لي عارفة بلي المرا الحرا خاصها تتطيب لل لل لل ( تعقد ليها لسانها و مقدرت تكمل كلامها و حشمت و خجلت )
شافية تبسمت و نطقت : تتطيب لرااجلهااا
حسناء حمارو خدودها و توردو مجوبت با بايه لا بلا : انا غ غ غير قلت زعمة مكندير والو غا جالسة و مبندرة نهار و مطال بغيت تانا ن ن نطيب و نشقا كيف البنيات
شافية تنهدت و طلقتها بلسان الفصيح : بغيتي ا لالة تطيبي لسيد القايد ( حسناء طلعت غير عويناتها فيها و حركت ليها برويسها باايه ) و تبعيني ا لالة نوريك الكوزينة ...و دارت شافية غادا قبالتها و معليا راسها و ضحكة سارقاها ...و حسناء مشات تابعاها و يديها فركتهم فريك فريك ...تقول منعرف اش غتعمل حيت ماشي ساهل عليها اول خطرة غطيب لسيد القايد
🌙حسناء القايد🌙
👑oumaima mega 👑
⚡178⚡
~~~~~~~~~~ في الكوزينة لي كانت كبييرة و عريضة تلييق بمقام قصر سيدي فخر غلدين ...كانو الخدم و العبيد كثاارين و معمرين المكان ...و لواني (الاواني ) تاع الطين و الفخار غا مدفكين و الخيورات و ديال دنيا و دين كلها مجموعة تما ...كين من البنيات لي تتعجن ...و كين لي تتغسل ...و كل وحدة و ملاهية في شغالهااا ...تادخلت لالة حسناء من الدفة ديال الكوزينة لي كانت كبييرة و مقوسة و مدهبة ...و هي كتمشى داخلة ليها كيف القمرة الضاوية كتمشى و تنخوى في المشية بلباسها زيين ...و زينها الفتان ...دخلت كتشوف الكوزينة و مبهورة في كبرها و عرضها ...و في جنبها شافية ممفرقاهاش ...كان كلشي حاضي شغالو و تاحد ما كيشوف اش حداه ...و هي تعلي شافية يدياتها لسما ...و صفقت غااا تصفيقة ...كلشي هز راسو و دار لجيهتها ...غير لمحو لالهم حسناء و ناضو جمعو جلايلهم ووقفتهم ...و تصافو و حدروو الراس ...و كين لي تيقول اش تتعمل هادي هنا ..حيت عمر شي وحدة من المقام الكبير مشافوها جات لكوزينة
شافية كتغنج و تدلل في الهدرة و تقلي السم لما يتقلى : ليوووم لالة حسناء مرات سيدي بغات هي لي تطيب الغدا و تبين على حنت يديها ماعليكم غير تخدمو عليها و تجيبو ليها اش بغات تال عند رجليها ...دازت صفعة وحدة على العبدات ... هادي عمرها كانت و لا وقعت ...فاخيتة لوور كتسمع و تصلغاا ...و تسلتت بين العبدات تاخرجت تجارا توصل الهدرة ...حسناء دورات عويناتها ...تشوف شنو خاصها و تمشات بشوية و جلست على وحد الطامبوري تماا ...و جابت قصرية تاع الفخار قبالتها حطاتهاا ...و كتفكر و تخمم شنو تقدر تعمل و تيدير ....حتى دخلت عرشية تجااارااا و تقلب بجهالة يمين و شمال و حداها فاخيتة ...حتى لمحتها عرشية جالسة زينة و ضاوية و عاطية لعين بين الخدم
عرشية : لالة اش تتعملي هنا
حسناء ناضت من مقامها و تبسمت ليها : غير بغيت نطيب انا هاد الخطرة و نعاون لبنيات لي هنا
عرشية : لا لالة كين لخدم لي يطيبو و يجيبو تال عندك
حسناء : غا خليني ا دادا عرشية انا بغيت نحط يدي في شي حاجة منبقاشة جالسة مبندرة من نهار جيت لهنا ...عرشية مقدرت تزيد كلمة فوق كلمتها اش غتعمل دابا لالة سلطانة لا عرفت بهادشي مغيعجبها حال ...حيت هي لي مكلفة بالماكلة و شراب هنا ...و ليني تاهدي لالها و متقدرش تمنعها و هي تهز يديها مسكينة بقلت حيلة : و لي بغيتي ا لالة و لي بان ليك عاونوو لالاكم و متخليوها تقلب على تاحاجة بيديها جيبو كلشي لعند رجليها ....و بغات تمشي تغبر من تما
حسناء : بلاتي ا دادا عرشية ( حسناء ترىددت و تزنكت وولات غتلوي بعينيها ) اممم نن شنو كيبغي سيد القايد قصدي اش يبغي ياكل
عرشية حادرة راس : سيدي تايكل كلشي خاص غا يكون داكشي متول و فيه البنة خليت ليك راحة الالة .... و دارت خرجت من الكوزينة و تبعتها فاخيتة ...و شافية قشعت فاختة تبعت عرشية و هي تمشي من وراهم ...و حسناء بقات حاصلة تما شني غتعمل دابا ...بغات غير راس الخيط ...مالها وصلت تال هاديي و تصمقلت تقول عمرها طيبت
~~~~~~عرشية كانت غادا ماشية و غادا معاها فخيتة توسوس ليها : دادا عرشية لالة سلطانة مغيعجبها حال ولا بد تسيق الخبار و تعرف اش جاريي هناا ...عرشية حايرة معرف ما تعمل و هو يجي صوت من وراها كان تاع شافية : لااا ا دادا عرشية ( وقفت عرشية و فخيتة و دارو لعندها و شافية ماجية لعندهم ) لا عرفتها لالة سلطانة مغتخلي لالة حسناء تعمل والو و هي بغات غير طيب لسيدي شحاال تتقنط وحدها في جناح طاووس متحرميش ليها فرحتها و تكسري خاطرها عافاك ا دادا عرشية ...عرشة كانت مقصحة شوفة و تتخمم في هادشي و هي تعلي صوتها : سيرو نتي و هي تقديو شغالكم انا عارفة اش غنعمل ...و دارت تمشات غادا فحالاتها ... و فاختة دارت في شافية شوفة تاع السم و شافية ... هزتها بشوفة من ساسها لراسها و دارت فحالتها تترغب و تطلب ...مصاااب دادا عرشية متقول للالة سلطانة والو
💥💥💥بنات حد هنا براكة كنت غا نزيدكم غير عيييت شوية
....كنت وصلكم حتى لاجزاء شاخضة الرمان و داكشي هههه و ليني عييت شوية نهاري ليوم كان طويل ...من حد حسناء كتقرب تسالي و هي تتشعل ماغديش تقدرو تغمضو عويناتكم