انا كنت واعده بالمناقشه دي من زمان وعارفه انها اتأخرت معلش بس انشغلت آخر فتره.. ❤
بدايةً كدا وحشتوني طبعاً وحقيقي شكراً من كل قلبي لكل كلمه قولتوها فرحتني وحقيقي كلامكم كلو فوق راسي وشهاده اعتز بيها تسلمولي كلكم.❤
في المناقشه دي هكلم فيها معاكم علي شويه حاجات مهمه وهجاوب علي كل الاسئله الي اتكررت كتير وانا وعد اني هجاوب عليها كلها اخر الروايه..
………………………
_عشق امير الجان..
الروايه دي كانت target بالنسبالي والحمدلله شايفه اني قدرت احققه بفضل ربي سبحانه وتعالي ومن كرمه عليا انو قدرني و وفقني لكتابه الروايه دي.. الروايه دي كانت متعبه جداً عن الروايه الاولي "خيوط الشمس" لأني طبعاً كنت بشتغل علي نفسي ان المستوي يتحسن عن الاول لان مفيش حد هيبدأ من فوق ومش بتكسف من بدايتي ابداً لاني واخداها دافع ان ابقا احسن ولغايه دلوقتي مش شايفه اني وصلت للاحسن ده وانشالله بتمني من ربنا يوفقني واقدر اكون عند حسن ظنكم وابقا في يوم من الكتاب الي كتابتهم بتنول اعجابكم وتفيدكم حتي ولو بالقليل وتكون سبب في رسم البسمه علي وشكم ولو حتي للحظه واحده.. ❤
…………………………
_الاســــئله الي وعد بإجابتها..
سـ1: المعلومات المذكوره في الروايه فعلاً حقيقه؟!! وايه مصدرها؟!.. وهل موثوق منه ولا لا؟!..
جـ: المعلومات الصحيحه في الروايه.. هي الي كنت بذكر في اخر الفصول انها صحيحه ومثبته لكن مننساش ان الروايه في جزء منها كبير مزخرف بالخيال و الفانتازيا .. اما بقا عن المصدر فأنا قولت وهقول تاني.. انا من النوع الي بحب القراءة بكل أنواعها الحمدلله وطبعا كتب العلوم وبالاخص الخاصه بالعالم ده او بالمعني الاصح ما خلف الحجاب الحاجز.. الكتب دي من نوعي المفضل الي بحتاج معاها ورقه قلم وبسجل كل معلومه تفيدني عشان كدا ليا نوته مخصصه للمعلومات زي كدا واكتر كمان وفي مختلف المجالات " زي علم الطاقه " والي ذكرت منه جزء في الروايه..
ومش بس علي الكتب انما انا بحب استغل الفرص..
يعني لما بقابل اي حد متخصص في مجال معين من العلوم مش بسيبه غير لما اكرهه في عيشته. 😂💔
وبالفعل في كذا شخص " بدون ذكر اسماء " اتقابلت معاهم بالصدفه ولكن جت بفايده الحمدلله.. وكانو فاهمين في العلوم دي اوي وقدرت اتأكد منهم من صحه المعلومات وكمان استفاد منهم في بعض المعلومات المقبوله انها تتنشر لكن طبعا مينفعش كل التفاصيل تتنشر او حتي يزيد الكلام فيها وانا رعيت ده لسلامتكم طبعاً يعني متخافوش من قراءة الروايه.. 😉❤
لو حابين تعرفوا اكتر في علم الطاقه اهتموا بمتابعة دكتور احمد عميره والقراءه لدكتور ابراهيم الفقي ومن كتبه " الطاقه البشريه و الطريق الي القمه ".
لو حابين الروايات الي ليها علاقه بالعالم الأخر وفيها معلومات كتير " عن الجفر والكابلا "
والكتب الدينيه " عالم الجن والشياطين للأشقر "
انا حبيت احط الكتب والناس الي سهل اوي تعرف منهم المعلومات الي في الروايه وانا مكنتش حابه احط اسماء كتب عشان محدش يقول اني بشجع الناس تقرأ في الموضوع ده، بس اكتشفت ان الموضوع مهم عشان محدش ييجي يقول دي بتألف من دماغها.
سـ2: هل احداث الروايه دي ممكن تحصل في الحقيقة؟!..
جـ: فكره الروايه. الاساسيه وهي " الجن العاشق" ايوا فعلاً بتحصل و حقيقه ملموسه وبنشوفها كتير في نماذج بتتكرر كتير.. طيب فكره ان بشري يقدر يشوف الجن ويتكلم معاهم ويكون لا ساحر ولا دجال واليعوذ بالله.. ايوا بردو عادي وبتحصل بس مش بتكون في ايدينا ولا بإختيارنا ده بيكون بإرادتهم هما انهم يظهروا لك ، لكن حب واحداث خياليه زي الروايه لا طبعا الروايه خياليه والجن العاشق بيبقا مؤذي وربنا ما يكتب لحد انه يشوف اي حاجه وحشه.
سـ3: هل ممكن فعلاً جن يتلبس بشكل بني ادم؟
جـ: عادي جداً يقدروا يتلبسوا في هيئه بشر وبيبقوا من اجمل البشر كمان لانهم بيختاروا هيئه يكون شكلها مقبول للناس وبعيداً كل البعد ان حد يشك فيهم لكن في ناس ساعات بتلاحظ ده وبتحصل كتير وعن تجربه.. بس دول بيبقوا قريبين من ربنا وقادرين يحصنوا نفسهم عشان كدا بيحسوا ان فيه حاجه غلط او انه مش مرتاح لما يشوف الشخص ده.. واكيد حصلت لحد فيكم انه يشوف حد وممكن يشوف عنيه عيون قطه او كلها لون واحد سواء اسود او ابيض... او يشوف حد قلبه يتقبض جامد ويحس ان في ملامحه او نبره صوته حاجه غريبه..
واحب اعرفكم ان دي مش تهيؤات...
انتو فعلاً الي شوفته ده حقيقه وفي ساعتها حاولوا تذكروا الله و سوره الصمد والمعوزتين وآيه الكرسي ما تتمنعش يجماعه، ودايماً مش بس لما يحصل حاجه يعني ياريت نعملهم زي ورد يومي كدا نبدأ بيهم يومنا وننهي بيهم يومنا وصدقوني احسن وامان ليكم.. ❤
وياريت يا جماعه نحفظ كلنا " بسم الله الرحمن الرحيم الذي لا يضر مع اسمه شئ لا في الارض ولا في السماء وهو العزيز العليم.. اللهم تحصنت بذي العزه والملكوت.. اللهم اني تحصنت بكلمات الله التمات.. ربي إن مسني الضر وانت ارحم الراحمين"
حاجات بسيطه وسهله لكن اثرها عظيم فعلاً.. ❤
سـ4: هو ممكن فعلاً جن يتجوز من بشر؟!..
إمكان الزواج بين الإنس والجن، قد أثبت بقوله تعالى لإبليس : (وشاركهم في الأموال والأولاد)
سورة الإسراء " 64 "
الجن ممكن يتلبس في جسد البشري ويتجوز الشخص فعلاً ومنغير ما يعرف كمان لكن ده مش بدافع الحب ولا الكلام الخيالي زي الي في الروايه ده بيبقا عشان يستمتع بجسده وممكن يهيئ للبشري انه تزوج من هيئه بشريه بس طبعا كل ده غلط وحرام والزواج بين الجن والإنس إثم كبير " احنا بنتكلم في الحقيقه الي بنعيشها " الروايه خياليه لأن مفيش جن بيتحول لبشري كامل زي ما حصل في الروايه.
الروايه مجرد روايه فانتازيا زي افلام الفانتازيا الي بنشوفها وبنبقا عارفين ان كل ده خيال و وهم لكن مش القصد منها ابدا التشجيع علي القراءه في العالم الاخر او مناقشه فكره حرام، الزواج حصل وقت ما سيمرائيل كان بيتحول لبشري كامل وده اساسا مستحيل يحصل.
سـ 5: هو ممكن جن وانس يخلفوا؟!..
جـ : مستحيل.
بصوا يجماعه نهايه الروايه " المنطقيـــه" نهايه مأساويه طبعاً وده مش محبب ليا لأني شايفه ان عالم الروايات ده هو العالم الخاص بينا الي بنفصل فيه من عالمنا الواقعي ومن همومه ومشاغله وبنحب نعيش لحظات حلوه مع ابطال الروايه فلو الروايه نكد ومأساه ده هيبقا شئ محزن جداً ومش لطيف ومش محبب طبعاً وبالتالي لازم نطعم الروايه بالخيال الذي لا يتعارض بردو مع قدراتنا العقليه يعني مش هطلعه اتجوزوا علي المريخ يعني..!!
لكن احداث نقدر نتقبلها وبالتالي الاجابه هي لا ده مش بيحصل بس مع تسلسل احداث الروايه اطلقنا العنان لنفسنا شويه نعيش احداث تفصلنا عن عالمنا شويه ..❤
سـ6: امتي الجزء الثاني؟!.
جـ: الجزء التاني بأذن الله هعلن عنه قبل نشره لكن مش هيبقي في الفترة دي خالص.. لأني لاحظت ان طلبكم الدايم في اني انزل الروايه زياده عن ثلاث ايام في الاسبوع وده طبعاً هيحتاج ان الاجزاء تكون جاهزه لدعم النشر المتسلسل.. وبأذن الله ناويه اعمل ده واني لما اخلصها كلها او حتي جزء كبير منها هبدأ انزلها.. ❤
سـ7: هل الجزء التاني تكمله ام قصه جديده؟!..
جـ: احب اقول للناس الي مش من انصار الاجزاء التانيه للروايات.. اني انا كمان مكنتش من انصار ان يبقا في جزء تاني لأني بخاف يكون ممل ويبوظ الروايه.. لكن انا احب اطمنكم اني مخدتش القرار ده الا بعد لما اتأكد الحمدلله ان الجزء التاني لا يقل تشويقاً او غموض عن الجزء الاول ورغم وجود معظم الابطال اكيد لكن هيبقي وكأنه قصه مختلفه تماماً ليها تشويقها الخاص بأذن الله.. ❤
……………………
يارب اكون قدرت اجاوب علي كل اسألتكم وشكراً لكل الدعم حقيقي وياريت محدش يتردد خالص لو عايز يقول حاجه يقولها لأن كلامكم ونقدكم سواء سلبي او ايجابي اكيد هيفدني ومشكورين عليه كمان.. ❤