علاقات زائفة

البارت السادس والستون

علاقة مجنونة انتهت

تعارف جنوني
علاقة جنونية
رغبة جنونية
حب جنوني
غيرة جنونية
حياة جنونية
وحتى الفراق كان جنوني

رجل مجنون احب بجنون امرأة لاتقل جنون عنه ..

دارت بنا الأيام وكأنما دار الزمان قرونآ
انفصالي كان تحريرآ حقيقيآ
كتحرير العبيد وعدم بيعهم بالاسواق..
بدأت مباراة وانتهت بالفوز لصالحي
لكن هناك مباراة اخرى على وشك أن تبدأ
يجب ان اتخذ وضعية الرامي او الهداف
لكي اربح هذه المباراه يجب ان استعين
بمدرب جيد وذكي يقودني الى بر الامان لا اطمع بالفوز بقدر التعادل ...

رجعت والطريق كلة اني افكر بنظرتة اللي جان يباوعلي بيها بالمحكمه نفس النظرة جان ينظرلي بيها من ارتكب خطأ ويلومني محبة بيه مو بغض ، نظرته جانت كفيله بأن تعيشني بدوامه أعجز عن الخروج منها ، زرعت بداخلي وجع ما اتصور اله علاج ،

صار لازم اشفى من صميم ومن حبه ومن غضبه ومن جنونه ومن رعونيته،

اعرف نفسي راح اضل ادور على ذيج النظرة اللي من جنت افز بليل لو احلم بكابوس خصوصا بدايه مرضي ، جانت نظرته المتعاطفة ويه حالتي كفيله بأن تعيشني بسلام ابدي ،لو ايده اللي جان يربت بيها على قلبي ويحاول يهديني ، اخ شنو انسى حتى انسى ،

اكو كلام بداخلي ما اكدر احجيه لأي احد ، اصلا ما اتجرأ امرره من قلبي الى لساني ، ماعندي هيج جرأة واحجي بصميم كدام احد لان ما احصل اله الملامه ،

بالمحكمه من وكفت كباله ، صار عندي تضارب بالافكار والمشاعر عشت بين لحضات ضعف ولحضات قوه كلبي بجة دم على نظرته وندمه والمه وعقلي كارهة ويلوم بيه لان متعاطفة وياه ،

لهذا تنازلت بسرعه ماردت انطيه مجال يبرر ويتمسك اكثر لان بلحظة والله لحظة جانت كفيله بأن اتراجع عن قراري واركض احضنه ،

لزمت راسي وضغطته بيدي حيل احسه راح ينفجر اعتقد ضغطي ارتفع ، فصلت عن الدنيا ومنظره مجاي يروح من بالي احمرار عينه ، ورجفة صوته من طلكني وهو غضبان و ايده و شفايفه ترجف جان يحاول يسيطر بس اعرفه شلون جان منهار ويحاول يثبت هو ممتأثر غرورة ميخليه يتنازل ويتوسل اكثر ،

كل مره جنت انهزم منه بلحضات الغضب ويلحكني يا أما يأنبني ويأذيني بكلامه ودائما يثبت بنهايه النقاش هو الصح واني الخطأ ويششكني بنفسي يا اما يحضني ويكلي خلص انسي الصار وعدي ،

اليوم انهزمت حتى منتظرته يطلع من القاعه واشوف غضبه لو اسمع العتب مالته تعاتبنه بالعيون واكتفينه وعتب جان سريع ،

وصلنه لنهايه الصفحه وجان لازم نطوي الكتاب ونخليه على رف الذكريات واللي يمر من يمه ويحب يتصفح بيه ياخذ المفيد ويتعلم من الاخطاء المرينه بيها ، لكن بكل صفحه من صفحات روايتي ، اكو ثقل بالحنجره من واحد يقره لان هذا الثقل هو الغصه مالتي طلعت من القلب و وصلت للقارئ ،

هاي الغصه هيه عباره عن كلمات تقرأوها لكني عشتها كمواقف بحذافيرها ،

خطأت هواي وروايتي جانت متعبه نوعآ ما بيها هواي اخطاء وهاي الاخطاء كبيره لدرجه تخليني ما اكدر اسامح نفسي عليها ، اكو خطأ عن خطأ يفرق واني خطأي فاق التوقعات خطأي تحول الى ذنب وبعد ذلك تحول الى هاجس نرجسي لدى شريك حياتي ، استحوذ على قلبي ومشاعري وحتى افكاري ، خلاني انقاد اله حتى لو كان هو خطأ واني الصح ، في النهايه انه الحب ياساده ..
الحب الذي يعمي العيون عن القلوب ..
الحب الذي نتنازل به عن الكرامات ونتجاوز كل المسافات .
انه المرض الذي لا يمكن الشفاء منه ..
ننتظر علاج الايام وليتها تكون كافيه لشفاء روح عانت ما عانت من الألم ....

_________

حسن : وين صافنه بت عمي وردتي..

جنت مرجيه راسي على الجامه وعيوني على الشارع اباوع عشوائي مو بتركيز وبالي مو يمهم جنت فاصله عنهم وبس اني ودموعي نتعاتب .

بنان : صافنه بضيم كلبي حسوني..

حسن : ابوج نزل وكال بنان نامي وارتاحي والله موجود ، وانتي ولا يمج .

رفعت عيني وباوعتله بالمرايا الاماميه ..

بنان : ما ادري بابا صاعد ويانه ولا ادري اني صاعده وياك شلون هيج انقسمنه وين الولد وبابا وين راح..

حسن : عمر رجع ويه غسان وابوج اجه ويانه وصلته للمحل ..

باوعت طبك السيارة والتفتلي..

حسن : نزلي صعدي يمي.

بنان : مالي خلك عوفني فدوة .

حسن : بنوش نزلي كتلج..

ضحكت فتحت الباب ونزلت صعدت ليكدام..

التفتت عليه جان يباوعلي مبتسم..

حسن : ليش ضحكتي..

بنان : من كلت بنوش معناها رجعت حسوني القديم وانت حلفت مترجعلي ..

حسن : وين اكدر تشوفيني احلف واهوبز واتحلف ،بس خلي اشوفج واكعه بفلاونزة مو بشده ، وشوفي كلبي شلون يكوم يرجف عليج..

بنان : قصدك مو كد كلمتك..

حسن : بس بكرهج مو كد كلمتي والباقي مجربتني انتي ميحتاج اسولفلج..

بنان : والنعم منك ومن افعالك صدك اللي عنده مثلك ميخاف من الدنيا والله انت وسيوفي نفس الشي مرات اكول اخاف توأم ...

حسن : سكتي وخليها سيف بكلشي مثلي ومشلوع كلب، هم راد اختي وجان ينوح عليها بس تكبرت عليه ومانطته مجال ، عود ليش اللي يحبكم من كل كلبه تتكبرون عليه وليش اللي يتكبر ويأذيكم تحبوه .

بنان : وين اكو هيج منو كلك ..

حسن : تصرفاتج هسه والبجي مالتج من طلعنه الصبح لحد الان ..

بنان : حسن اكو هواي اشياء انت متعرفها لهذا متحس بيه حتى لو حجيت ، اكو مواقف متنسي بالنسبه للي يعيشها بس اللي يسمعها يبسطها ويسهلها هواي..

حسن : اكثر واحد اني احس بيج واكثر واحد فاهمج لأن اللي جاي تمرين بيه هسه اني مريت بيه ولحد الان كاعد اعاني ..

بنان : لحالك والله هيج كاعد تسوي ، بابه تزوج وانسى متكلي شجلبت بيه وهو اني شضال بيه حتى احب وانحب.

حسن : شعليج انتي اني رايدج على خرابج وعود ارممج شويه شويه.

بنان : وجروحي المفتوحه شلون ترممها.

حسن : اروفها الج لو اعرف اشلع وصل من كلبي واسد جروحج بيها بس يرادلنه وكت.

جريت حسرة وما احس اله رطوبه تنزل على حلكي من امد ايدي دم ..

التفتت لحسن، جان يسوق وعينه ليكدام.

بنان : حسوني كلينس فدوه ..

التفتلي شاف الدم انخبص كام ميعرف شيسوي.

بنان : على كيفك شبيك .

حسن : خرب بس لا تصيرين مثل ذاك اليوم وين احير بيج .

مدلي كلينس من جيبه لان ماعنده بالسياره سديت خشمي ورفعت راسي ليفوك.

مد ايده فتح الجكمجه وطلع علاكه مال ادويه ..

فتح الكبسول وخلاه بيدي ،مشينه مسافه و طبك يم ابو اسواق جاب بطلين مي وكلينس فتح بابا السيارة ومديت وجهي خارجها غسلت وجهي وفتح البطل الثاني كلي شربي علاجج..

شربته ونطيته البطل ، ..

بنان : منين جبت علاجي..

حسن : عمه اسماء كالت اخذه وياك خاف تتخربط انطيهياه ودير بالك عليها..

بنان : ها خطيه..

وره شويه شفته يشرب مي من نفس البطل اللي شربت منه ..

بنان: ليش متلعب نفسك من تشرب ورة واحد

حسن : منو كلج نفسي متلعب..

بنان : لعد شلون شربت من البطل الي شربت منه قبلك

حسن : الوحيده انتي متلعب نفسي منج.

بنان : شلون ولك اني بناتي اذا عافن اكل لو شربن بكلاص ما اشرب وراهن ولا اكل وهنه شكد عزيزات على كلبي واحبهن.

حسن : انتي تختلفين من جنه صغار واني وياج ناكل بنفس الماعون شكد تخوطين وتخربطين واكل وياج امج تكول عوفها وتعال اصبلك وحدك جديد واكل واني ما اقبل، ياما وياما اكلت نستلتج الباقيه لو لفتج اللي تعوفيها ، ومن كبرنه كمتي تمسحين الاخضر واليابس لهذا مشفتيني اكل وراج هههه ..

بنان : والله حسوني انت غريب.

حسن : بحبج اي والله غريب واعترف.

بنان : شنو اخبار دعاء.

حسن : يادعاء هاي.

بنان : هههه هسه صارت يادعاء يمعود مو على اساس عندك مشروع خطوبه..

حسن : وانتي خليتي على حالي حال ، كل ما اكوم واكول ياالله تجين تضربيني وارجع اوكع..

بنان : والله لحالك هيج مسوي بنفسك هذا مو سيف تزوج ويضحك وفرحان بزوجته وابنه واصلا ولا مبين عليه يحبها لروند.

حسن : هذا حبه على كبر مو من هو وصغير اني احبج من جان عمرج خمس سنوات.

بنان : شلون قهر قهرك ، يعني فوك ضيمي زيدني ضيم.

حسن: ليش ازيدج ضيم شمسوي قابل.

بنان : حسن كافي تتعلق بوهم اني وهممممم اني خيال اني سراب اني كذبه بحياتك افهم لتتعلق ولا تعلقني بيك لان نهايتنه مو سوه وراح تكون موجعه الي والك ، الك لان تحبني ومتعلق بيه ورجعت تحلم ، والي لان اني امري موبيدي اني مصيري مرتبط بناتي ، اذا في يوم من الايام خيروني بينك وبين بناتي اختار بناتي لهذا اكلك حسن انهي كلشي قبل لا تبديه .

حسن : ما اكدر ولا راح احاول وانتظر للنهايه هو اساسا اني ميت بالحالتين ..

بنان : اسم الله عليك ليش هيج تحجي .

حسن : والله لعد جذب انتي انانيه قبل جانت الحجه مالتج صميم وحبج اله وتعلقج هسه طلعن بناتج..

بنان : تريد اكذب عليك اني ما احب اللف والدوران واللعب تحت الطاولات ، اني صريحه و واضحه من اول يوم عرفت بيك عندك مشاعر اتجاهي ، كتلك اني حبيتك وتصرفت وياك كأخ مجنت اتصور ولا اتخيل بيوم من الايام حسن يحبني هيج حب بخبال ..

حسن : عوفي هسه كلشي لتحجين ولتحركين كلبي عوفيهة للزمن.

بنان : انصحك تتزوج وتستقر لان شغلتي مطوله ومعروجه..

حسن : واني نفسي اطول واحب امشي بطريق معروج اذا وياج..

بنان : براحتك اللي عليه كلته حتى باجر عكبه ميوكع عليه ذنب ..

حجيتها وتجيت راسي على الكشن وغمضت ماكو دقايق وكال انزلي وصلنه..

باوعت واكفين باب بيتنه نزلت حسيت بدوخه كلش قويه ، مدلي ايده ..

حسن : اعينج.

بنان : لا شويه وانزل .

انتضرت دقايق وكمت مشيت على كيفي احس الدنيا كلها شايلتها على ضهري من الثكل ، دكيت الباب وحسن دك الجرص ، فتحته زينه وتلكتني بالهلاهل بوستني واني ابجي ، اجتي ماما ورانيه وروند اللي يبارك واللي يواسي واللي يدعيلي بالعوض ، دخلت كبل صعدت فوك نزعت ملابس ومددت ، صفنت على السكف ، عيوني اريدها تبطل دمع ماكو ، اندكت الباب دخلت روند اجتي وحشكت نفسها بصفي تبوس وتمسح بعيوني ..

روند : الله يعوضج بالاحسن حبيبتي ليش تبجين والله ميستاهل..

جاوبتها بصوت ضعيف ومخنوك.

بنان : اصعب شي بالحياه من ترجعين لنقطة الصفر ، وتخسرين كلشي ، زوجي بناتي بيتي حياتي ضحكتي فرحتي كلشي راح مني كلشي انتهى..

روند : اذا تحبيه ليش منطيتيه فرصه يصحح الخطأ..

بنان : نطيته هواي فرص وخلص رصيدي بعد ماعندي قوة انطي وانخذل .

روند : زين اني سامعه هواي ازواجهن يخونون ويضربون وشرب وعربده واشكال والوان ويمكن حتى يتزوجون وزوجته تسامح وترجع وتضل تحبه انتي ليش مو هيج.

رفعت راسي وباوعتلها.

بنان : روند هاي بس بالقصص ترجع الزوجه وتعيش طبيعي وكأنما ماكو شي ، تره بالحياه ماكو قانون اشطب واكتب من جديد اللي انكسر بينه مستحيل يتصلح شتحجين انتي الواقع غير والقصص غير افهمي .

روند : والله مو قصص هواي اكو بنات هيج.

بنان : واني هم جنت من ضمن ذني البنات الي تدوس على كرامتها وتخنك احساسها وتموت غيرتها في سبيل متخسر اللي تحبه ، وشنو جانت النتجيه روند مو جابها بنص بيتي لج بهاي عيوني شفتها مصلخه وهو يباوعلها نفس نضراته اللي جان يباوعلي بيها بلهفه ، كم قمر هيج مباوعلها وكم قمر نايم وياها وخاني ..

روند : والله صعبه ، الله يساعدج اني حجيت هيج لان شفتج تبجين عبالي ندمانه وتردين ترجعيله..

بنان : ابجي مو ندم على طلاكي لا ابجي لان اكو فد حزن غريب بداخلي ، ماعرف هو حزن لو حنين لذيج الايام الحلوة اللي عشتها وياه ، لو رغبه بالبجي وبس ..

روند : احجيلي كلشي وابجي فرغي اللي بكلبي لتضمين بداخلج وتتأذين ..

بنان : صدكيني ماعندي لا رغبه بالكلام ولا حتى بالتنفس ، اريد احس اني انسانه وعايشه بالدنيا مو مجرد قطعه اثاث بيت صميم شوكت ميعجبه يجي يلمعها وشوكت ما يضوج منها يغلفها بالجريده ويضمها بالخزن وبعدين من يعجبه ويحن للأثاث القديم يطلعها ويعرضها يتفرج عليها ، اريد اصدك اني بعمر ال ٢٦ مو ٩٦ ، اني شخت فجأه وكبرت فجأه ونضجت بموقف ، وعيت بصدمه ، وتخليت بخيانه ، عفت كلشي غالي وتركته وره ضهري ردت احضة بعافيتي واخر خيط من عقلي لان فقدتهم لو لا لطف الله بيه ..

روند: والله ماعرف شنو اكلج ولا اكدر اعبر بكلام يوصف وجعج اللي مريتي بيه.

بنان : ماكو وصف يكفي احساسج من زوجج ، تعرفين بيه ربط اسمه بأسم وحده غيرج ، شاف مفاتنها ، وضع لمسته برحمها ، اخذها لحضنه داعبها غمرها بحنانه وحبه ، هذا يكفي يعيشج ألم عمر كامل ويمكن يحتاج عمر فوك عمرج يلا عود تنسين او تتناسين ..

روند : حبيبتي الله يمسح على كلبج وتنسين ويبرد نارج ..

بنان : تخيلي تقرين محادثه لزوجج او منشور او اي شي اني صميم جان ينزلها على شكل مقالات والشغلات الجريئه ينزلها بوست بصفحته ، الناس عدهم عادي هاي كتاباته لان هو كاتب ويكتب كلشي الحزن والفرح والحب والجرأة وانتي تعرفين يقصد بيه وحده ثانيه مو انتي ، لان هو متغير وياج واختلافه جذري.

روند : شنو كاتب ؟؟

بنان : كاتب ، عندما رأيتك اليوم سرت بداخلي لسعه تشبه الصعقه الكهربائيه ، اثارت رجولتي وشعرت بشفتي ترتجف وتجف وحتى ريقي تبخر ، اصابني الضعف والجفاف ، عطرك اخذ اخر ذره من عقلي ، واصاب قلبي وانتشر بجسدي عانقيني وقبليني ومن بعدها امضي ..

روند : وهاي حافضتها

بنان : كل يوم اقراها كل يوم اتأذه نفس اذيتي اول مره من قريتها...

روند : اكلج هذا قهر شلون جنتي عايشه وياه..

بنان : حضي هيج شسويله وقسمتي جانت عوجه..

روند : بس هو صارحج كلج اني هيج انتي ليش قبلتي..

بنان : غبره عبالي اكدر اصلحه عبالي راح يسوي شغلات بالخفاء ومن يشوف دلالي اله وحبي راح يخجل من نفسه ويترك معبالي راح يتمادة ويسوي كلشي بالعلن وراح يحاربني من يغلط بدال ما يعتذر..

روند : شلون يعني يحاربج بدل الاعتذار مفهمت.

بنان : من رحت منا وعشت ابيتهم سنه كامله اني ما احجي وياه ولا معبرته ، من يشوفني اتشاقه ويه اهله واسولف يردها اليه يفتح كام ويه بنات كبالي ويتغزل بيهن وووو هواي لو احجي للصبح متخلص سوالفه..

روند : انسيه لعد هاهيه لتفكرين ولا يجي على عبالج.

بنان : ان شاءالله بس يرادلي وكت جذب اكلج انسى اليوم لو باجر ..

روند : حقج اللي تحب من كلبها وتخلص من كلبها صعب تنسى وتتأقلم بسهوله ، زين سؤال تحبيه بعدج لو كرهتيه ..

بنان : كرهته..
حجيتها ومسحت دموع عيني اللي ما راضيه تنشف..

روند : اكيد..

بنان : اكيد.

روند : شنو اكثر شي خلاج تكرهين صميم لان هيه افعاله هواي اكيد اكو شي اثر بيج عدا الخيانه ..

بنان : كرهته لان عيشني شعور الغيرة من امرأة ثانيه ، وهذا الاحساس يخليج تفقدين الثقه بنفسج اولا والثقه بحواليج..واذا خلص التحقيق طفي الضوه اريد انام ساعه واكعد اسبح ..

روند : ماشي ارتاحي تعبتج..

طلعت واني خليت راسي على المخده وغمضت عيني وفكري كله يم بناتي شلون اكلن شلون نامن منو يمهن ، صح مسره متقصر ولا عمتي بس يبقون مو مثل امهن .

روند

نزلت جوه وكعدت يم البنات الكل ضايج والوجوه مغيمه ، من تصير شغله بشخص نحبه او عايش ويانه كلنه نتأثر ونحزن لحزنه ومنرتاح اذا منطلعه من اللي هو بيه ...

صارت ساعه اربعه اجوي الولد وعمو سالم صبينه الغده ورحت صحت حسن وماما حتى يتغدون ويانه بطلب من عمه اسماء ، ماما اعتذرت كالت راسي يوجعني وتغديت اجه بس حسن ..سألته على بابا كال بالمحل تغده وطلع ..

اجينه لبيت عمي تغدينه وصبينه جاي اباوع على بنان صفنه تاخذها وصفنه تجيبها رحت كعدت يمها ..

روند : هاج تشربين.

بنان : تعرفيني مو صلح ويه الجاي..

روند : ليش صافنه ..

بنان : حلمت بيه..

روند : بصميم .

بنان : اي..

روند : عادي لان ابالج وتفكرين بيه.

بنان : لا بس جان وضعه تعبان وحيايه ملفوفه عليه يريد يكوم ميكدر ..

روند : ياستار ياربي ..

بنان : خايفه عليه وعلى البنات خاف يصير بيهم شي..

روند : لا ميصير شي .

كاعد نحجي وفات بابا يصيح روند وينج نذله.

حسن خله استكانه على الطبله وكامله .

حسن : خير حجي ياستار ..

احمد : وين الخير وانت واختك مفشليني.

سالم : كول ياالله واكعد نتفاهم ليش تصيح وعصبي موزين عليك ..

احمد : شتفاهم ابو غسان ، ليش روند خلت براسي عقل ، لج بابا انتي شوكت تكبرين وتحسبين حساب لتصرفاتج وتحترمين شيبات ابوج..

حسن : هسه غير نفهم شكو ..

احمد : انت تسكت اخر واحد تحجي ماعندك اب تجي تستشيره متعرف تربي اختك وتعلمها الصح والي سوته غلط لو تروح على الرجال تهد عليه وتهدد وتهوبز فوك غلط اختك.

حسن : هااا جراح جاييك وشاكيلك.

احمد : اي اجاني وياريت ما اجاني تفشلت ماعرف وين اخلي راسي من فشلتي .

سالم : غير نفهم الصار اول وبعدين ننطي الحق لصاحب الحق والغلطان نربيه تعال اكعد واحجيلي..

كعد بابا واني افرك بيدي اخاف من بابا كلش ..
رغم حنين بس ساعه اللي يصير عصبي ميشوف كدامه..

جابتله عمه اسماء مي شرب وجر نفس خزرني والتفت على عمو سالم..

احمد : شوف اجاني الولد قبل ساعه وكال يابه انتو خوش ناس واكبر واحد يتمنى يناسبكم ، بس اللي صار ما اكدر ابلعه ولا اكدر اتغاضى واكمل ويه بنتك اجيت اشكيلك منها وفوك غلطها معتذرت تدز اخوها يهدد ويصيح ويسد الخط بوجهي.

احمد : فهمني وحده وحده لان راسي افتر اكعد تفضل.

جراح : زاد فضلك حجي ، انه ترددت بجيتي وضليت افكر جم يوم يلا قررت وقراري محسوم مابيه رجعه.

احمد : كلي الاسباب واني انطيك الحق غير اشوف بنتي شنو سوت.

جراح: عمي اخويه اعوج وانه ادري بيه وانت تدري وبيت اخوك يدرون صح لو انه غلطان.

احمد : حشاك من الغلط وكلامك صح.

جراح : رحمه لذاك الاب الطيب ، زين من اخوي اعوج وتعرفون بيه عندو مكسرات عليش شلتو بنتكم ونطيتوها الي..

احمد : لان انت زلمه واخو خيتك وهواي افعال شفناها الك تشهدلك..

جراح : ممنون عمي ممنون ، عجل من انه هيج والفرق واضح بيني وبين اخوي مثل وضوح الشمس ، يصير بنتك تجي لبيتي بدون ما تفتهم شصار وشنو جرى ، تعد وتصف وترعد علي وعلى ابوي وعلى اخوي ، سولفت سوالف ما تنكال ،..

احمد : شكالت يعني فهمني ..

جراح : انه كله ميهمني فد حجايه اللي دكت بكلبي وماجاي اكدر انساها من تكول احتمال قمر لافت على جراح وعلى ابوه هم وضحكت عليهم ، يصير عمي هذا كلام بنيه متربايه ومن اجي اريد اعلمها الصح واشد عليها تروح تشكيني لاخوها ويخابرني يهدد ويغلط افهمو مثل ماجاي افهمك يجلبلي بحجايه انه صح حجيتها ما غلطان بيها من تجي تكلي انهي كلشي وابطل ، كتلها شنو لعبه يوميه ويه زلمه شكل ، حجايه التنكال واي رجال هسا تسألو ابدالي يحجيها..

احمد : ماعرف شكلك والله فاجأتني.

جراح : انه العليه سويته ردت اعلمها الصح من الغلط وردت افهمها حدودها واكو خطوط ما لازم تتعداها الرجال رجال والحرمه حرمه ، فد هيه اختصرت كل هذا وراحت دخلت اخوها وانه هيج مره مترهملي ..

احمد : انت روح ارتاح واني اخليها تعتذر غصبن عنها .

جراح : ماريد اعتذارها ولا اريدها توصلني..

احمد : ارتاح ابني جم يوم ونرجع نسولف بالشغله.

تفهم الولد الموقف وراح ، اني اللي كاتلني انتي شعليج ترحين تهدين على الناس بنت الكلب انعل ابوج لابو تربيتج السكط ..

سالم : ليش هيج روند هاي سالفه تسوينها وانت بابا حسن بدال ما تعلمها وتفهمها وتخليها تعتذر من زوجها هيج تساندها وتوكف وياها على الغلط ، جراح خوش ولد ، شكد وكف ويه بنان بمرضتها وكم مره اجاني علمود اسامحها ويرجع العلاقه وكف بوجه اخوه وتعب هواي بذيج الفتره ليش تنسون بسرعه .

حسن ساكت ومدنك واني كمت ابجي ..

احمد : زواج تتزوجين غصبن عنج واعتذار تعتذرين من الولد واذا شكالي منج ضهرج اكسره ..

حسن : متعتذر مسوت شي غلط ..

احمد : اطلع انت منها وعوفها اني اربيها .

عفتهم ورحت لبيتنه صعدت فوك كمت ابجي ، وره ساعه اجه بابا وكف فوك راسي .

احمد : خابريه كدامي واعتذري منه يلا..

روند : ميرد عليه..

احمد : من سوالفج وصلافتج ميرد ، يلا خابري لا ضهرج اكسره..

بابا يصيح بعلو صوته وماما واكفه باب الغرفه تباوع علينه ، بهيج مواقف محد يتدخل الرأي الاول والاخير لبابا.

لزمت موبايلي دكيت عليه ميرد ..

روند : ميجاوب.

احمد : رجعي خابري مره ثانيه وثالثه وعشره الى ان تكليلي صلحت غلطتي يلا ذيج الساعه افكر اسامحج لو لا..

جنان : شدعوه ابو حسن ، شصار هسه يدوس عليها بالزايد

احمد : معليج انتي بنتج غلطانه والغلط راكبها من ساسها لراسها..

رجعت خابرت هم ميرد..

طلعو بابا وماما نزلو جوة ..

دزيت مسج..

💬

اعتذر اذا ضوجتك وياريت تقبل اعتذاري وكافي زعل لان طولنه هواي ، واشتاقيتلك..

مفتحها ايام ادز وين يلا يشوفها وميجاوب صدك ذلني مثل ما كال ، بابا يضغط عليه وحاربني اخذ مني سويج السياره على كد الدوام وبعد ممنوع اطلع ، وبيت عمي ميقبل اروحله وحذر ماما اذا وصلت يكسر رجلي ، هذا بابا من يضوج من شي يشد على البيت كله..

___________

حور

كاعده اسبح زيودي وسمعت صوت عمر اجه.

عمر : حور وينج.

حور : هاحبيبي الله يساعدك هياتني اسبح زيود

اجه وكف باوعلنه وضحك.

عمر : نياله لزيود على هيج ام حلوة تسبحه ، متسبحين ابوه والله صارله هواي ممجلوف زين.

حور : صوجك جنت اجلفك اني وبعدين كمت تطلع بساع تكول مستعجل.

عمر : كملي وتعاي احاجيج.

حور : اكو شي شو مو على بعضك.

عمر : جنت يم قسور وبعدها مريت لصميم كملي وتعاي.

حور : خلصت روح وجايه وراك..

كملت لزيودي بدلتله وطلعته من الحمام وسبحت على السريع وطلعت انشف بشعري بالخاولي ، واصيح عمر ويينك.

عمر : هنا تعاي..

رحت لكيته بالمطبخ يسوي جاي..

حور : جان انتضرت اني اسويلك

عمر : ماكو فرق كعدي اسولفلج.

حور : اي احجيلي ..

عمر : باعي من يوم اللي كلتلي على قسور ، وشفت وضعيه صميم وشلون تأذه من طلك بنان كلت لازم اوكع على العله ، مهما يكون هذا صاحبي وعندو وكفات حلوة وياي ، من يوكع اصير نذل واعوفو .

حور : اي والله وكفات صميم هواي لو مو هو جان مكدرت تعالج امك الله يرحمها ولا كدرت تسويلها فاتحه وجان هسه احنه كاعدين بالشارع ، بس مع هذا رغم زيناته ويه العالم بس مأذي اهل بيته وهمه اهم من الغربه لازم يداريهم الهم اكثر..

عمر : سمعي يابه يجيج الحجي.

حور: يله احجي..

عمر : من طلعنه من المحكمه صعدت وي غسان على اساس ارجع وياه ، بعدين باوعت وضع صميم مو طبيعي نزلت ورحت صعدت وياه كتلو انه اسوق وانت ارتاح ، لان يرجف و اعصابو تالفه..

اول ماصعدنه وهذا يدهك ويبجي تكولين طفل ، يصيح اريدها انه شلون طلكتها والله الصارلي عبالك حلم ..

يحجي وكلبو محروك ، رجعتو للبيت نزلت واخذت تكسي رجعت لدوامي ، ضليت اجيبها منا اوديها منا اجتي ابالي سالفه قسور خابرتو..

عمر : هله ابو القساور شلونك يابه..

قسور : لك هله عموري حبيبي مشتاقلك وعلي..

عمر : تشتاقلك العافيه انه بعد مشتاقلك..

قسور: وين ما وين سولفلي..

عمر : بهالدنيا صارت هواي سوالف عود بعدين احجيلك فد رايد اشوفك شلون و وين وشوكت..

قسور : شلون وين تعال لبيتنه تندله وشوكت ، نزلتي عكب باجر..

عمر : هذا هو عكب باجر نلتقي..

قسور: حبيبي عموري هله بيك..

عمر: اخذ راحتك يابه ..

قسور: هله..

رحتله اليوم ..من بعد السلام وحجي هواي حجيتلو سالفه صميم..
ضحك
عمر : يول نكته حاجي وتضحك..

قسور: لا مو نكته بس سالفه قمر شكد ***** شلون وصلت شجابها على صميم ..

عمر : تعينت بالجريده اللي هو يشتغل بيها ، وضلت تحاول وياه ويصدها بعدين نتفاجئ يريد يتزوجها فوك بنان..

قسور: اعذره سحورتهن قويه..

عمر: منو قصدك

قسور: هيه قمر امها اكبر سحارة ..

عمر: لا بربك..

قسور: اي بالله ، مو دكت الناقصه ويايه ورحت نبشت جدها السابع بس حرامات جانو شايلين غير لو عندي عنوانها الجديد اله اشيلهم من البيت، لك دعاره وسحر وكلشي تحب تلكاه عدهم..

عمر: اعوذ بالله زين شنو السوته الك وخلتك تدور وراها وكلبك محروك..

قسور: شوف هيه ضلت تتلوكلي من جنت اروح لروند للجامعه ،

ومرة رحت جانت بس هيه وروند داخله محاضره ، وبدت تحجي عن نفسها واذا تحب اجيبلك اخبار عن روند اني حاضره ،

بوكتها ضحكت عليها مستهزء، مجاوبتها لبستها ، مرت الايام واجاني مسج على الماسنجر من افتحه صور محادثات بين روند و ولد خال صوره مال شيخ ، وكاتب فاعل خير ،

خابرت روند وصارت مشكله بينه كتلها ليش تردين على رسائل شخص غريب ومن هالحجي ،

بعدها كامت تتوددلي واني لابسها ولا يمي تخبلت مني ، اخر شي دزتلي صور مال كروب والحجي اذاني حيل صح بوقتها جان شقه بينهم بس اني غيرتي شالتني متحملت حتى لو شقه ،

خابرتها كتلها اريد اتأكد الصور من حساب روند مو كذب ، تواعدنه واجتي صعدت ويايه شوفتي الكروب تأكدت من الموضوع ونطتني علبه نساتل صغيره بيها تقريبآ اربع قطع هيج شي ،

ضميتها ورجعت للبيت نطيتها لاختي الصغيره اكلت منها وابني هم اكل قطعه لان اني ما احب الحلاه كلش ،

ياعمر تعال شوف اللي صار ب أبني وب اختي تخربطت احوالهم تكرم بس يتقيئون لا مستشفى خليت لا دكتور ، هلمرة صارو سهال ابني عيونه كامت تنكلب ليفوك تخبلت ،
امي كلش وهواسيه بهيج شغلات كالت خاف هذا عمل شو من جبت الكوكو هيج صار بحالهم،

ضحكت على عقل امي وماصدكت ، امي ضلت تسأل بعد نسوان ويموتن على هاي السوالف وكامن يدلنها من وحده لوحده تالي صفت على مره بالحصوة بيتهم ،

تخبلت كتلها كل عقلج اخذهم لهناك هو اني شغلتي الم السحره والمشعوذين مو اروحلهم، اصرت تروح ، اخذتها ، وشهر يوميه رايحين راجعين عفت دوامي والدنيا كلها على ما وكعنه على العله وطلعت بنت الكلب مسويه سحر بالحلاه اللي دزته ،

تحلفت وكلت اله اضيعهن مثل ما رادن يضيع ابني واختي ، رحت للمنطقه القديمه ، كالو شالو قبل فتره ،

والناس كلها نفس الحجايه،سحارات وسمعتهن موزينه ، ضليت اسأل اكثر دلوني على بيت عمهم رحتله استقبلني الرجال احسن استقبال كعدت وحجيتله سالفتي ضحك ،

كال يابه احنه متبرين منهم من زمان لا الام شريفه ولا البنات واخويه جذب ما ميت هج منهن وسافر عاف حاله وماله وطلع بطرك روحه لان الناس اكلت وجها بسبب سمعتهن الزفت راح هناك تزوج بنيه عراقيه وخلف منها بنيه و ولد ، وهنه من يسألوهن عن ابوهن يكولن مات ، وخواتها كلهن ماخذات رياجيل من نسوانهم .والله على ما اقول شهيد..

قسور : والله ياحجي فريت راسي معقوله اكو هيج بشر متخاف الله..

_ شتحجي يابه كله تشتغل سحر اسود وتسخير جن اعوذ بالله ، ودفن بالمقابر ياما وياما الناس تجي تشكي منهن لان تسوي سحر لاولادهم ويفقدون عقلهم يجوني يتوسلون بيه علمود اروح احاجيها تفك السحر عنهن واني نفس حجايتي ويه الكل ، احنه متبرين منهم ، واخر شي اجه شاب قبل كم يوم هم سأل على بيتهم كتله شايلين منا واليوم انت..

عمر : خاف صميم سأل عنهم ..

قسور: ماعرف الله اعلم..

عمر: الحمد لله على سلامه ابنك واختي سلامي للوالده الله يطول بعمرهة اللي تلاحكت الهم ، فد بنان هم هيج صار بيها واتوقع من قمر..

قسور: يا خطيه والله اني احبها حبابه ونفس اطباع روند ،،، اخ لو ما قمر بنت الكلب جان اني متزوج ومستقر..

عمر: مو نصيبك البنيه انخطبت وراحت لحال سبيلها يعوضك بالاحسن..

قسور: ما اعتقد الكى الاحسن خسرت وخسارتي جبيرة..

عمر: هذا هم درس تتعلم متأمن بياهو الجان ومتفرط باللي تحبه بسهوله..

قسور : والله صحيح ، امانه سلملي على اختي حور والبنات والله مشتاقلهم كلش ومشتاق للمه مالتهن من جنت اروح للدوام..

عمر: يوصل سلامك اترخص اني تعبتك..

قسور: بالعكس حبيبي عموري عيدها بداعه الخوه..

عمر: اجي والله تدلل..

طلعت منه وبوجهي لبيت صميم ..

دكيت الباب طلعلي ابوه سألت عليه كلولي نايم فوك ، اصعدله استحيت اصعد فد الحجي كلي ماكو احد البنات طالعات.

صعدت والكاه نايم ، كعدته ، كعد الوجه اصفر العيون محوفره وحال الضيم حاله ، الغرفه كلها جكاير وشرب ..

عمر : ادري فوك متصلح الموقف تكعد تسوي هيج بروحك بدال ما تلتجئ لرب العالمين يحل مصيبتك ويحنن كلب زوجتك عليك ، تروح تسوي منكر وتزيد غضبه فوك ماهو غضبان ، فوك طياح حضك وصخامك تجي تزيدها بالشرب والنوم هذا حل ، بناتك وين تدري عنهن متدري اكيد انطيهن لأمهن مو ماتت حرام عليك..

كعد ويجر بخشمه مثل المنشول .

صميم : حلمت بيها عمر انام علمود احلم بيها ، هيج بنان صارت حلم بالنسه اليه وحلم صعب يتحقق.

عمر : انت هيج دائما تضيعها وترجع تنوح عليها ايام واشهر ، يا اخي اذا تحبها عليش تأذيها مو حرام عليك ليش عبالك هيه مرتاحه والله خطيه.

صميم : وداعت بناتي اللي هنه اعز شي على كلبي من بعد بنان ، ما اعرف بنت الكلب شلون لعبت بعقلي ، والله خلتني اكره بنان وكمت اشوفها جلبه مو مره.
اريد فد اطلع من البيت صرت احس هدومي ثكال عليه ، احس كلبي يريد يطلع والله بدوامي واتعارك حت رادو يفصلوني..

عمر : وفوك سوالفك هاي تنشر ستوريات كلها ايحاءات +18 وتحرك بدمها مو انت هم اعوج لتزعل مني.

صميم : انه كاتب والكاتب يتطرق لكل الأمور يعني اله اقصد قمر لو غيرها اكتب لاي موقف يصير كبالي مرات اسمع قصيده لشاعر واحب احولها لمقال واذكر جواها مقتبسه من القصيده الفلانيه للشاعر الفلاني ، يعني اجرمت برأييك هذا مو سبب حت تعوفني.

عمر : وسالفه قمر من جبتها لبيتها وهو جديد وكسرت فرحتها هاي هم مقال ومن حقك تكتبه لان انت كاتب.

صميم : ما اعرف شلون جبتها ، والله انه تبت من يوم اللي رجعتها على ذمتي بيت جدي ماخنتها لا بنظره ولا بحجايه ولا حت رسائل وهاي الكلبه قمر ضلت سنه تحوم عليه وماناطيها مجال مو جنت احجيلك..

عمر : شوف صميم احجيلك سالفه..

صميم : كول

عمر : اكو حرامي يبوك والكل يعرف بيه هذا حرامي يعني مشتهر بالمنطقه ، هذا الحرامي قرر يتوب وفعلا تاب وكتب لافته على بيته انه تبت الناس ماصدكته ،فد كالو بلكت صدك الله يهديه ولو ابو طبع مايجوز من طبعو ، راح يوم واجه يوم هذا الحرامي احتاج عمليه لابنو ، وراح يتداين من ابو محل اقاربو ، هذا ابو المحل نذل استغل الموقف وصاح بعلو صوتو هذا باكني ، للأسف الناس كلها صدكت ب ابو المحل واتهمو الحرامي ، المغزى من هاي القصه انت صح تبت ومشيت عدل فد اخر موقف هدملك كلشي بنيته وي بنان والكل صدك انت خنت وظلمت .

صميم : شسوي هسه وارجعها كلي..

عمر : لتسوي ولا ترجعها البنيه وصلت للموت ٣ ايام نايمه مستشفى شمدرك انت.

صميم : ما اكدر اعوفها والله ما اكدر ول عمر جاي اموت..

عمر : عوفها للزمن هو كفيل يداوي جروحها وبلكت بناتك يكونن سبب برجعتكم ..

جر حسرة وسكت ..

ضليت احجي وياه اخر شي كام يتقيء كله اسود عبالك كير لعبت نفسي ، عبالنه من الشرب ، فد امه تكول لا هذا صارله فتره هيج يتقيء ماده لونها اسود..

حور : مصدومه شحجي شكول يعني صدك اكو هيج قذاره شكد وكفتلها بنان وساعدتها تالي هيج هدمتها وهدمت بيتها شنو استفادت هسه..

عمر : عبالها تتزوجه كلتلج صميم فلوس وتمشي بالكاع متدري حاله تدهور وموذاك الصميم ابو الفلوس هو على كد الراتب ، دعوفيه بنت الكلب..

حور : وديني ل بنان خلي احجي وياها وهم اشوفها.

عمر : بدلي واخذج .

بدلت ورحنه سلمت على اهلها بعدين صعدنه فوك وحجيتلها كلشي ..

بنان : شوفي حور مسحور ما مسحور مو شغلي ولا اريد اصلا اسمع بهاي السالفه من يوم يومه هو هيج مو هسه ، ثاني شي هو مو يبجي وانما يتباجه لان متعود كلشي يحصله بسهوله ممتعلم ، شي ينأخذ منه غصب ، مره حجتلي مسرة تكول جنه نلعب احنه وصغار اذا ضاع منه شي يتخبل ويبجي اله نلكاه اله ويرجع يكسره نكله ليش خبصتنه وردته وتالي كسرته، يكول اني من اضوج منه اشمره بس اضوج هو يضيع مني ، فهمتي القصد هذا صميم..

حور: اني ما اكلج رجعي ابد ولا اكلج هو زين تعرفين رأيي بيه من الاول ، بس بنان هو صارحج وكلج اني اعوج وانتي عبالج الاعوج ينعدل ، لو بيج عفتيه من الاول لو تحملتي وصبرتي علمود بناتج ، اني الومج قبل لا الومه ، انتي الغلطانه الاولى وخسارتج جبيرة..

يتبع....

كمْ خابَ ظني.. بمنْ اهديتهُ ثقتي
فأجبرتني ..على هِجرانِهُ التهمُ

كمْ صِرتُ جسراً.. لمنْ احببتهُ فمشى
على ضلوعي.. وكمْ زلّتْ به قدمُ

فداسَ قلبي ..وكانَ القلبُ منزلهُ
فما وفائى لخلٍ ..مالهُ قيمُ