علاقات زائفة

البارت الخامس والستون

بنان تكول

عالحب گتلك البي تضحية يعيش
خذت رايي وسمعته وبية ضحيت

وشفت حفل افتتاح جروحي للناس
وشفتك من بعيد بروحي گصيت

انا بلا وعي من اطيتك الروح
وعقل ماجان عندي وهسة فزيت

ما جذب واگلك باجر انساك
عفتني وذكريات هوايه خليت

اذا كل حايط البي اسمك يطيح
على هـالحالة لازم نهدم البيت

انا الباني السفينة ومو مثل نوح
صعدتك اوبالطوفان ظليت

وجبت عشب الخلود اطيتك اياه
وگلت احمل الفشلة وخالي رديت

فده من يـﻨﭽفي يگولون عالماي
وفدوة شلون اگلك ماتبديت

انا شفتك ثلج بحلوگ شمات
معقولة بحلگهم ما حتريت

ماگتلي الرواية اخرها مبتور
جا بأول مشاهد مانشديت

علي محسوب سر وانته مگيول
وعلى ازغر اعدائك ما انظميت

ما عندك عذر ينگال للناس
يمي ومن حجيهم؟ ما افتكيت

لهسه اكل بصبعي الاشرت بي
عليك وبي الف نيشان خليت

انة ظهري احترف طعنات العزاز
وگمت اعرف اديهم لو اندجيت

بلا شوف واگلهم ها منو فلان
بس انته عكسهم ماتسميت

________________________

الجان واعدني بوطن
هدملي بيتي وراح

___________

من حجه هيج كمت ارجف بس سيطرت كلت لازم افكر بعقل هلمرة واني اللي راح استفزة واعامله بالمثل ...

بنان : هسه شنو تريد ؟؟

صميم : ترجعين وياي ..

بنان : ارجع بس كلي شنو راح تسويلي وشنو وعودك هلمرة.

صميم : اللي يعجبج واللي تتمنيه والله والله قسم بذات الله من انتي بعيده عليه اموت واريدج فد من ترحين وانه ابتعد الوب ، والله حاير ليش هيج جاي يصير بيه بنان فدوة فهميني ..

حجاها واختنك بعبرته...

بنان : هسه معلينه بالحجي هذا مو وكته ، فهمني شنو بعد تسوي لان هذا اللي حجيته ميكفي علمود ارجعلك..

كام وكف اجه يمي..

صميم : باعي على لسانج اللي تكوليه يتنفذ واطلع مو رجال اذا خلفت وياج..

بنان : وسالفه الصور والتشهير هاي شنو فلمها ، شلون تريد تشوه سمعتي..

صميم : ماعندي غير حل عقلي وكف ومجاي اكدر افكر صح .

بنان : يعني حتى لو شي يمس رجولتك ويهين كرامتك تسويه، شنو تحس من تشهر بعرضك كدام الزلم ..

صميم : انتي جبرتيني .

بنان : لا انت جبرتنه وانت خليتنه بهذا الوضع وبهذا الموقف وانت الغدرت وانت اللي ضيعتني وبهذلت بناتي كلشي اعوج صار بسببك.انت الملام الأول والأخير..

صميم : يعني افهم من كلامج ماكو رجعه..

هزيت براسي اي..

صميم : والبنات انسيهم .

بنان : شو شوفني الصور اللي تريد تركبهن ..

صفن بوجهي ..

صميم : ليش؟؟

بنان : حتى اختار وحده حلوة وها صدك تذكرت عندي صور اني وحسن من جنت بنيه ماخذين سلفيات سوه انطياك ليش تركب صور وتتعب وبعدين تنكشف كذبتك وتتفشل...

بهت بوجهي ميكدر يحجي بعد ولا ينطق بحرف .

بنان : راح اصيح البنيه وتنهي كلشي والحضانه اللي لان اني امهن وانت روح كمل اللعب ويه بناتك قمورة وغيرها..

صميم : احبج بنان..

رفعت كتفي وسويت حركه بحلكي بمعني وشسويلك..

طلعت لكيت جراح وعمي واكفين ابتسمت الهم ودورت على غسان وحسن لكيت حسن واكف ليغاد بس غسان مموجود ...

رحت عليه ..

بنان : حسن

جان مدنك على موبايله شافني رفع راسه ضم الموبايل بجيبه واجه بأتجاهي ..

حسن : ها طولتي..

بنان : اكو شغله صارت وجبيره هم .

حسن : ياستار شكو..

بنان : يكلي لو تتنازلين عن البنات لو ادمج صورج انتي وحسن وارفق محادثاتكم واشوفها للقاضي واخذ البنات منج..

حسن :  تنازلي بنان.

بنان : انت شكاعد تحجي حسن شبيك ..

حسن : باعي هذا ماعنده غيره على عرضه وكلشي توقعي لتستبعدين اي شي منه مادامه انحصر بالزاويه راح يسوي اي شي ، كام يتخبط ..

بنان : مستحيل يسويها بس يهدد..

حسن : بنان اللي شهر بيج كدامنه ميشهر بيج كدام القاضي ولج هذا بايع ومخلص وعبالج تنتهتي هيج لا الصور راح تنعرض على خبراء ويشوفوها صحيحه لو تركيب وبهاي الحاله ميضل واحد ميتفرج عليج وتنفضحين بالزايد..

بنان : شلون لعد حسن بناتي ما اكدر..

حسن : يومين بالزايد تلاثه يمل منهن هو هذا حمل مسؤليه شبيج انتي.

بنان : بس اذا صارت اله الحضانه بعد كلشي ما اكدر اسوي اله بموافقته وارح يتعبني ويذلني ازيد.

حسن : بنان اقتلعي من جذورة واخلصي لج هذا مرض خبيث اذا ضليتي وياه راح يتفشى بجسمج وينهي حياتج كلها..

بنان : ماعرف تعبت والله ..

حسن : باعي لترجفين كدامه ثبتي وصيري قويه لتبينين ضعفج ولتخافين وكدام القاضي احجي كلشي لتسكتين..

بنان : حتى على تهديده هسه ..

حسن : اي طبعا على كلشي احجي ..

بنان : خوش ..

لزم ايدي ومشينه طلع صميم من الغرفه شاف حسن لازمني ، هد عليه راد يضربه اجاه جراح لزمه .

صميم : لك هدني هاي بعدها على ذمتي وشوفها شلون لازمته..

حسن بالعناد شدد لزمته على ايدي وضحك..

صميم : عيش الدور شويه واتعلق واعرف شلون اسحب البلاط من جواك اذا ما خليتك تبجي دم ما اتسمى صميم ...

ضحكنه اني وحسن مستهزئين بيه بس ضربنه ضربه يعني شكد ما عدنه دهاء ومكر منكدر نوصل قطره لتفكيره ولا نتوقع اللي راح يسويه ..دخلنه للقاضي وكفنه اني وياه واحد كبال الثاني ، سألنه القاضي عده اسئله ومنها شنو السبب الرئيسي اللي وصلكم لهذا الحال ..

صميم : انه ماعندي شي مرتي واحبها وبناتي احبهن ومداريهن صح غلطت اعترف تعرفت على بنت وحسيت بغلطي وعفتها وجيت اطلب السماح وهيه قافله..

يحجي بكل اريحيه ومبتسم يعني يعرف القضيه محسومه لصالحه وربحان بيها واني اللي راح اطلع خسرانه بكل الاحوال بس مجنت اعرف شنو عنده دليل غير الصور يقدمه للقاضي ويطعن بصحه كلامي ..

بنان : هواي غدرني وتكررت الخيانات اكثر من مره واذاني وشهر بيه شوه سمعتي وختمها اخر شي هنا يهدنني يدمج صوري ويه صور ابن عمي ويقدمها لحضرتكم حتى ياخذ حضانه البنات مني..

القاضي تعاطف ويايه وصار ضد صميم حتى حجه بحديه وياه وكلت انحسمت الامور لصالحي ، لو ما حركته الاخيره اللي سواها فاجئني وصدمني.

باوعتله لكيته يباوعلي وضحك بمكر ..رجع التفت للقاضي..

صميم : سيدي ماكو هيج شي زوجتي تتخايل..

_ منو يكول تتخايل احتمال كلامها صحيح..

صميم : ومنو يكول اتهامها الي صحيح وين الادله اللي تثبت صحه كلامها عدها شهود تسجيل صوتي مثلا صور اي شي يثبت خيانتي او انه مهددها..

بنان : عندي محادثاث الك وصور البنيه اللي خنتني وياها.

صميم : هيه جانت تدز وانه حاضرها اكثر من مره والمحادثات تشهد..

بنان : سيدي والله شفته بعيني يخوني وبنص بيتي و ويه صديقتي.

صميم : تتخايل وهيه اساسا مريضه .

_ شلون يعني مريضه فهمني.

باوعت طلع اوراق من الجنطة مالته اللي ياخذها للجريده ..وقدمهن للقاضي..

_ شنو ذني الاوراق؟؟

حجاها القاضي وعينه على صميم

صميم : هاي تقارير تثبت صحه كلامي بأن زوجتي تتخيل وبيوم من الايام فقدت عقلها لمده ٣ اشهر متواصله مصار هواي يعني هاي التواريخ يمك ،وكامت تتخيل اشياء ما صايرة منها انه ماموجود وتكول شفتو واكف لو نايم يمي وهيج اشياء وبيدي ماخذها ل ٣ اطباء نفسسسين وهاي يمك كل التقارير والكشفيات ونسخه من كلامها للطبيب النفسي اخذت نسخه منه عرضتها على طبيب مختص بهذا المجال خارج البلد .

هنا اني شنو صدمتي بيه شنو وكف شعر راسي شنو ردت ابجي شنو ضغطي صعد يعني ضربني ضربه ، اضرب بعد من سالفه الصور ، هنا ثبت بالادله اني مخبله وغير مؤهله اكون ام واربي بناتي..

صميم طلب تأجيل الجلسه علمود افكر ..

صميم : اطلب تأجيل الجلسه لوقت ثاني لان زوجتي تمر بأزمه صحيه وكاعد تتصرف تصرفات خارجه عن ارادتها..

وفعلا القاضي أجل الجلسه ، اجه صميم وكف يمي يضحك مد ايده يعني تفضلي طلعي حتى اطلع وراج..هنا شنو ردت املخه وكلبي ميبرد..

طلعت ارجف وهو طلع ورايه اجوي حسن وغسان  ..
وهو راح يم اهله ، ماعرف شنو حاجاهم اجوي يمي جراح وعمي وصميم طلع من المحكمه..

جراح : شنو صار عليش تأجلت الجلسه..

بنان : اسأل اخوك الشيطان هو يحجيلك ..

كعدت بعد ما اكدر اوكف .

كمت ارجف يريدون يفهمون مني الصار مكدرت احجي اخر شي كومني غسان مشيت وياه بلا وعي ...

وصلنه للسيارة صعدت وهمه ضلو برة يحجون ويه جراح وعمي . ورة شويه صعدو يمكن بس واحد يحجي وياهم ينفجرون ، بس غسان ميدري شنو السبب  وليش تأجلت كل شويه يسألني ومن يشوفني ساكته يكوم يفشر عليه وهاي اول مره غسان يتلفظ بهيج الفاظ ويايه كلش يحترمنه اني وخواتي بس الضاهر طفح الكيل عنده ، ورة شويه اجاني مسج مفتحته مالي واهس ورة شويه اجاني اتصال باوعت حسن ، رفعت راسي باوعتله بالمرايا الصفح يأشر براسه وبيده الموبايل رافعه يعني شوفي شنو دزيت.

فتحت الموبايل كاتب..

💬

كلشي لتحجين كدامهم اله اني افهم وخصوصا السالفه التخص حضانه البنات..

💬

ليش ما احجي غير لازم يفتهمون.

💬

سمعي كلامي ولو مرة وحده انتي متدرين عمي البارحه شنو كال من جنه كاعدين.

💬

شنو كال ؟؟

💬

كال اذا السالفه وصلت للبنات اني امنع الطلاك لان بناتها بناتي ما اخليهن يربن جوة ايد زوجه الاب ، حجينه وياه كلناله شلون ترجعها قابل ، كال من خلفت ثنين شنو تتوقع اخليها تعوفهن وتجي وحدها ذني امانه اي شي يصير الهن كلنا نشيل ذنبهن اولهن اني لان طاوعتكم وقبلت اريح بنتي على حساب ذني البنات ، ومنا ابوج متعلق بيهن والله ميخليج تطلكين.

💬

حسن بس اني ما اكدر اعيش بدون بناتي اموت والله ، راح اضطر ارجعله علمود البنات..

💬
بنان صدكيني اني اجيبهن الج وحجيت ويه جراح وهو هم كال اني اجيبلها البنات بس خلي تعدي فتره وتهدأ الامور ، هسه هو متمسك بيهن لان يريدج اذا تنازلتي بعد ما عنده ورقه يهددج بيها بس البنات وعندي فكره الج افهمج عليها بلبيت واحجي ويه القاضي قبل لا يجي صميم نفوتله..

💬

شنو الشغله.

💬

نرجع وافهمج عليها المهم هسه تكولين هو طالب بالتأجيل لان يريد يرجعني وبس لتحجين كلام ثاني خصوصا سالفه الصور ، اخوتج يموتوه وهو ميستاهل يضيعون نفسهم علموده شفتي شنو سوو بيه من سمعو بسالفه الرهن راد يموت بيدهم اله شويه..

💬

هايه راح اسمع كلامك هلمرة ونشوف تاليتها..

💬

عفيه عليج سباعيه..

رجعنه للبيت والدم يفور براسي اريد اهدأ ما اكدر ، اول ما دخلت الكل يسأل ويستفسر وحسن عينه عليه ومرات يحجي بشفايفه على كيف يكلي مثل ما اتفقنه..

واهز براسي اي  ..

بسبب الموقف الصار وتهديداته وصدمتي بيه وبسوالفه وخوفي من خسارة بناتي ،وضغط اهلي عليه علمود احجي الصار ،، تخربطت اوضاعي كلها ، خشمي طك دم عبالك بوري وانفتح ، معدتي كامت تحركني هاجت عليه ، كمت اتقيء دم ، تخربطت عليهم ، اسمع ماما تعيط بنان ماتت ماتت بنان انتهت بنتي ، ولكم ليش تزوع دم ليش..

البيت دخل بحاله استنفار ، همه مشايفيني من تمرضت وشلون جنت اتقيء لهذا انصدمو عبالهم بيه شي  ، اني وكعت لان دخت بس اسمع وما اكدر احجي اي شي وراها فقدت كل الحواس ، ما اعرف منو غسلي ومنو وقف نزف الدم اللي ينزل من خشمي ومنو شالني واخذني للمستشفى محسيت اله بروده بالغرفه وثلجت كعدت جفوني ثكال كوه افتحهن وعيوني نار راسي يموتني واون من وجع معدتي كلها التمت عليه ، باوعت اني وين ، غرفه صغيره وبيها كراسي ثنين واحد ماما كاعده عليه والثاني زينه زوجه سيف ، بالجهة الثانيه اكو استاند مال مغذي ، انتهبت ماما عليه واجتي يمي تسألني بخوف شلون صرت..

بنان : راسي ماما راسي يموتني ...

اسماء : ربج ستر ولطف يا امي جان رحتي من ايدي.

بنان : شنو الصار..

اسماء : الصار عوفيه لتفكرين بعد بأي شي فكري بصحتج وبس فكري بابوج اللي راح ينجلط متخربط بالغرفه اللي بصفج لج ماما تعبنه وراح نموت ..

بجيت متحملت الصار بأهلي هواي كله بسببي كل الصار بسبب طيش مراهقه واختيار خطأ ، دفعت الثمن غالي وبعد وبعد راح ادفع ميجوز مني صميم اله يشوف اسمي مكتوب على قبر من قبور النجف يلا يحس على نفسه وعلى السواه بيه..

للعصر اجه الدكتور شاف حالتي وكتبلي خروج بس ضل يوصي عليه هواي وكتبلي قائمه مال علاج شكبرها .

طلعنه من المستشفى اني وبابا وماما وزينه وسيف رجعت للبيت لكيتهم منزلين جربايتي بالاستقبال .

بنان : ليش هنا منزليها اريد اصعد انام فوك ..

اسماء : لا هنا تنامين كبال عيوني ما اكدر اصعدلج كل شويه ..

بنان : مابيه شي امي لتضخمين الامور ..

اسماء : سكتي بله مابيها شي وصلت للموت و٣ ايام نايمه مستشفى وفاقده متدري بالدنيا شكو وتكول لتضخمين الامور.

______________

روند

بيوم اللي راحت بيه بنان للمحكمه جنت بيت عمي ، اني والبنات نسولف ونشتغل للظهر اجوي بس الوجوه مكلوبه الكل صاير اعصاب وبنان عيونها حمر دم  نسألها تجاوب رؤوس اقلام الكل ضغط عليها بالاسئلة يردون يعرفون صميم شنو سوه وشكال للقاضي وكدر يأجل الجلسه كالت عادي كدر يأجل لان كله اريدها واحبها ، غسان مقنع بكلامها ضل يحجي وياها هواي على ما خشمها نزف دم كمت عليها سديت خشمها بيدي ورانيه زوجه غسان راحت جابت كلينس سدينه خشمها هلمرة الدم كام يطلع من حلكها تخبلنه ، عمه اسماء تلطم الولد انثبرو ثبر عمو سالم يلوب عليها ويدك على راسه ويصيح راحت بنتي وانتهت ..

اخر شي شالها سيف وطلعو يتراكضون وياهم زينه وعمه اسماء و ضلينه احنه بلبيت اني يمي الجهال ، ورانيه التهت تسوي اكل وتدزلهم للمستشفى ...

اني يومين مداومت بسبب اللي صار ل بنان بليل خابرتني صديقتي كالت اذا متداومين باجر راح يجيبون وحده بمكانج لان عدنه شغل هواي ومكاعد نكدر نسد بمكانج اكثر من هيج ..

دزيت رساله لجراح كلت حتى ليكول كسرت كلامي يعني من باب الأدب وهم اعمل ب اصلي واريد اشوف وين توصل وياه.

💬

هلو شلونك اني باجر لازم اداوم لان خابروني وراح يبطلوني محتاجين كادر ..

انتضرت ساعه و٢ و٣ مجاوبني رجعت دزيت..

💬

جراح باجر اداوم مو تسويلي مشكله نطيتك خبر تره.

هم مجاوبني دزيت ثالث مره ..

جان يدز ..

💬

دوام ماكو...

💬

ليش فهمني

💬

بكيفي .

💬

ماكو بكيفك والله اداوم.

💬

جربي وشوفي..

💬

تدري خليتني اتندم لان وافقت عليك

💬

مشكلتج .

💬

صدك والله

💬

روحي نامي عندي شغل..

💬

لتستفزني جراح كتلك اداوم باجر يعني اداوم.

💬

وانه كتلج جربي وشوفي الخبال على اصولو..

💬

ماشي ..

سديته وكمت حضرت ملابسي ، بليل اجه حسن من المستشفى وروحه طافره ، ماما تلكته تعد وتصف على عيال بنان وعلى قسمتي من جراح ..

حسن : يمه تعبان مو وكتج .

جنان : انت ليش ما منعت زواجها ليش صفيت وياها و ويه ابوك مو جيت وحاجيتك كتلك بنان مشلوعه كلب اني ما اجازف وانطي وحيدتي لاخوه وفوكاها متزوج تعال كابلني وفهمني شنو مميزاته شو شهادته مخلص سادس اعدادي ، شغله مو ذاك الشي متزوج وراح يكعدها ويه اهله وفوكاها ضرتها وياها بنفس البيت ، كل يوم اموت قهر اني من اشوف حال بنان واتخيل روند تصير مثلها.

حسن : جراح خوش رجال شعليج بصميم لو تشوفين اليوم شلون حجه عليه ، حتى كال اني ما عندي اخ ومعليه بيه وفشلنه كدامكم وكومه اعتذر ..

جنان : طبعا هيج يكول يداري امورة لان ماخذ ورده من عدنه لو يضل طول عمره يروح لمكه مشي ويرجع ويدك نذورة ميحصل مثل روند ..

حسن : يمه خفي علينه هالله الله بالناس واذا فقير غير الدنيا دارت بيهم ، جان عايش بنص الخير صدك جذب بعد منحجي على الناس ماطول احنه هذا تفكيرنه ، فرضي افترت الدنيا بينه وصار حالنه مثلهم وردت اخطب بنيه مينطوني لان امي هيج جانت تفكر ..

جنان : شيجيبه عليك انت شهاده وخلقه واخلاق ومتعين براتب يحلم بيه كل شاب وسيارتك جواك وبيت ابوك شكبره.

حسن : هو هم جان يركب ارقى السيارات ولبسه كله مرتب وبيتهم جان مدري كم متر حسب حجي بنتج وبنان ، واهله ناس زينين يمه كافي هذا حجيج يبط الكلب..

جنان : وخر من خلقتي موتتني انت واختك لو بس اعرف حظكم بيا خيس طايح جان ارتاحيت..

ضلت ماما تدردم ، شفتها دخلت لغرفتها نزلت على حسن جان يبدل..

شافني وكال ..

حسن : خير اكو مصيبه جديده تره تعبان وامج تلكتني من الباب.

روند : حسوني اريد اسولفلك وانت احكم ..

حسن : شصاير خير.

روند : شوف تتذكر من رحت لبيت اهل جراح من بنان خابرتك .

حسن : اي .

عقج وجها رحت عدلت حواجبه بيدي وجريت حلكه حتى يبتسم وخر ايدي ونتر .

حسن : شنو هالتصرفات تره تعبان احجي شصاير.

روند : اذا تعصب ما احجي .

حسن : مبينه سالفه تعبانه لو جفصه من جفصاتج الثكيله.

روند : باوع من رحت __________ حجيتله كلشي صار بيت اهل جراح ومن ضربني ومن اجه الصبح وكلي ماكو دوام واخر شي اسلوبه ويايه بالرسائل..

حسن : ماشي طلعي بره واني اتصرف.

روند : شنو راح تسوي .

حسن : معليج بس انام ساعه راسي راح ينفجر صار يومين منايم وراها اكلج شنو سويت..

طلعت وسديت الباب كعدت بالهول اكلب بالقنوات واهز برجلي بتوتر اريد اشوف شنو راح يسوي حسن وهم اخاف من رده فعل جراح ..

ماكو نص ساعه واسمع حسن يصيح كمت ركضت ودخلت الغرفه شفته يخابر ويهدد عرفت ويه جراح..

حسن : من الاخير ماعندك مره يمي ، جرب وشوف ، لا ما اهدد جاي احذرك لا انت ولا اخوك عدكم نسوان يمنه ، لو تجيب الدنيا كلها اختي ما انطيها ، لو روحها تصير بيك ، اي بكيفي عسى ما تتزوج عشره ارجع اطلكها اذا جان مو ادمي ..

اباوع حسن يفور ويرجف ، اخر شي عاط بصوت حتى اني خفت اول مره اشوف حسن هيج بعمري مشايفته عصبي.

حسن : اييي حتى تعرف حدودك زين وتتعلم شلون تحجي ويه اختي ، مو انت اللي تكللها يوميه بحضن واحد ومحمد اللي تحلف بيه اجي للبيت واكسرك ، اني صوجي قدرتك، اي بكيفي وباجر تداوم واريد اشوف شلون تتعرضلهة ، واذا عاقد عليها بابه لو مو عاقد لو متزوجها  وخالها بنص بيتك وتأذيها وتمس كرامتها لو تنزل دمعه من عينها اجي اخذها منك وعمرك متشوف اظفر منها ..

ضل يصيح وتالي سده بوجه جراح ..

حسن : باعي تفصخين لو روحج بيه فهمتي .

روند : ما اكدر ..

اجه لزمني من متوني حيل وعصر متني..

حسن : شنو شكلتي عيدي ماسمعت..

روند : ما اكدر ابطل هلمرة..

حسن : ليش صاير شي بينكم ..

حجاها وباوعلي بشك..

روند : وين راح بالك اكيد لا بس تعلقت بيه وهم اكو سبب ثاني  ..

حسن : يا طلابه السودة ، اكلج ذوله شنو عدهم سحر ، وهيج مأثرين بيجن انتي وبنت عمج ، ساحلات روحجن سحل.

روند : اني مو مثل بنان اختلف.

حسن : شلون بله فهميني..

روند : لتصيح حسن افهمك ، باوع من سوه غلط مسكتتله ومن راد يبطلني اجيت وكتلك عليه هم مسكتت ، بنان لا جان شنو يسوي بيها صميم تسكت ، وانت شفت بعينك يعني قسور ضليت وياه فتره وطبيت وطلعت والناس والكرايب كلها عرفت انخطبت وتالي فسخت وجراح هم ، خطوبه ومهر وطبه وطلعه وانحسب عليه زواج يعني اللي يريد يخطبني ويروح للمحكمه ويشوف اني مرتين عاقده ومتطلكه منو اله نفس ياخذني .

حسن : لعد خليه يتأدب لتنطيه عين ديري بالج اذا ما سحل روحه ويعتذر مترجعين وياه عسمى تضلين سنين بيت ابوج شعندج قابل.

روند : هاهيه حسون ..

حسن: اذا سمعت متصله ازعل ..

روند : عود اكلك اذا اتصلت تعرفني ما اضم شي عليك حتى لو جان غلط..

حسن : شحدج تضمين اكسرج..

روند : كلها تسويها اله انت بورده مضاربني ..

حسن : لان الورده تنشم متنضرب بورده مثلها..

رحت حضنته شكد ماجنت ضايجه ومقهوره وخايفه الحجي وياه طمني ..

روند : فدوة راحتلك اختك

حسن : حبيبتي ..

ضلينه نسولف لحد ما طلع راح للمستشفى ، ورجع بليل ، ثاني يوم داومت والحمدلله متعرضلي جراح ، رجعت الضهر نمت ساعه وصاحتني ماما كالت طلعت بنان من المستشفى امشي نروحلهم ، نزلت ورحنه ، اباوعلها هاي شصاير بيها تخوف عبالك مغيريها ضليت اسأل وانصدم ، من يكلولي صار بيها ضغط مزمن والقرحه مالتها زايده..

روند : زين ليش زادت هيه مو تعالجت منها..

اسماء : من القهر تزيد كال الطبيب لازم متنقهر ابد..

روند : استغفر الله ربي واتوب اليه ..

اسماء : لج يمه بطلي وانهي هالزواجه تره مصيرج مثل هاي النايمه وبس عينها تفتر علينه ولج بنتي راحت انتهت ،يجيني الدكتور يكلي حجيه لازم تتبهرز ، كتله شلون تتبهرز وهيه اصلا اكلها كله بهريز عايشه على الشوربات والفاكهة وتشويلها لحمه شويه صدر دجاج ، يكلي تتبهرز من الدهون واللحم تقلله والملح نهائيا متخلون ب اكلها ، ياناس شابه بعدها تنحرم من الاكلات الطيبه اخ اخ صميم شسويت بينه..

كامت تحجي وتعظ ب اصبعهة.

ضلينه كاعدين وره ساعه ماما راحت واني ضليت يم بنان ، بتت يمها للصبح ، كمت اروح للدوام وارجع يمها ..

_______________

حور

حور : عموري حبيبي..

عمر : من كلتي عموري عندج شي طلعيلي بالنظيف حوريتي .

حور : هله هله من كلت حوريتي يعني رجعت عمور القديم .

جر نفس بحسره وكال..

عمر : اعرف اذيتج هواي ويايه وتحملتي فوك طاقتج هم قله حال وهم حزني اللي طول على الوالده ، وهم
بعدي عنكم ...

حور : وين ابتعدت هو ويانه بلبيت وبعدين اذا ما اتحملك منو يتحملك .

حجيتها وكزكزت على اسناني وكرصته من خشمه..

هو ضحك..

عمر : يمه راح تاكلني..

حور : والله اني راح اكلك لان انت صاير تغلس هههه.

عمر : جنت تعبان والله وهم ضايج لان ماعندي شغل .

حور : وهسه تعينت بعد ماعندك حجه..

عمر : هو هذا هم تعين شركه اهليه ومامضمونه ياساعه يشحتوني..

حور : نعمه اهم شي عندك وراد وخلصت من العماله..

عمر : فدوه للقنوعه والله لو ما وكفتج وياي جان انه ميت من القهر شكثر حملتيني وتغاضيتي وشلتينه انه واختي بالصلوات ومايوم بزعتي لو اشتكيتي ..

حور : ماطول اني هيج حبابه وهيج داريتك اريد تطفي فضولي..

عمر : هههههه يلا تعاي..

راح ليغاد وسوالي مجال..

حور : لا حبيبي ماحزرت مو هذا قصدي ..

عمر : عجل ؟؟

حور: اريد تتصل بقسور

بده يعصب..

عمر : شعندج ..

حور : اريد اعرف قمر شنو جانت تحجيله بله شغلتها ويه صميم عرفناها ضلت بس سالفه قسور تحفر بكلبي.

عمر : صدك تحجين تردين اخابر الولد واكله تعال شعندك ويه قمر ، هذا حجي بله..

حور : عليك الله انت بس سولفله على سالفه صميم وهسه هو يحجيلك..

ضاج وتنرفز اخر شي كال الله كريم عود افكر بيها واشوف شلون احجي وياه بطريقه ما احسسه كاعد اتدخل بخصوصياته..

رحت كرصته من خده..

حور : تروحلك فدوة حور واهلها..

عمر : اسم الله عليج بس اهلج اي خلي يرحولي فدوه بس انتي لا ههههههه..

ضلينه نسولف وبعدين اندمجنه ورحنه بعالمنه اللي صار اشهر ممنسجمين هيج..

_____________

بنان

حالتي بدت تتحسن شويه وكدرت اوكف على رجلي ، رجعنه حركنه الدعوه مال طلاق و٣ مرات تتحدد الجلسه ونروح وهو ما يحضر..

اخر شي بابا خابر على ابوه كله هاي اخر مره اذا ما اجه اجمع عشيرتنه وانتو جيبو عشيرتكم وتفضلو يمنه بنتي راح تموت من وره ابنكم،

بليل جنت كاعده بالاستقبال واجه حسن يمي ، علمود نتفق شنو راح احجي ، تونه نسولف اجتي روند..

حسن : طلعي .

روند : ليش بله.

حسن : موضوع خاص مو مال جهال..

روند : هاا من المواضيع الزينه روند طلعي بس بالمشاكل والعراك روند تعاي جيتي.

بنان : ههههه منو كلج هدي عليهم .

حسن : ههههه مخبله هاي.

روند : يلا عيني اخذو راحتكم راح اسد الباب لج بنان عود احجيلي اخويه شعده وياج..

حسن : شعندي وياها لج طلعي يلا..

طلعت وسديت الباب ورجعت لبيتنه..

بنان

ثاني يوم رحنه للمحكمه اني وبابا وغسان وحسن وعمر هم اجه ، كال حتى اكدر أأثر عليه بسالفه البنات بلكت يخجل مني ويتنازل عن الحضانه ، اول ما وصلنه طلبت من الباحثه ادخل للقاضي احجي وياه قبل الموعد، حسب الاتفاق البيني وبين حسن..

دخلت على القاضي كالت ربع ساعه وادخلج ، وره شويه كالت فوتي..

دخلت سلمت عليه وبديت احجيله..

بنان : سيدي اني راح اتنازل عن اطفالي لان هذا شرطه الوحيد بس اطلب منك طلب من بنت لأبوها..

_ شنو طلبج.

بنان : اريد بناتي ٣ ايام بالاسبوع ويباتون يمي وباقي الايام يمه لان والله ما اتحمل اموت بحسرتي ، واساسا اني مريضه هاي تقاريري الطبيه ، عندي قرحه وضغط وميصير انقهر واني كاعد اموت على شوفه بناتي وهو حارمني حتى اسمع صوتهن في سبيل يضغط عليه ارجع واني ما اريد ارجعله..

_ هاهيه الج ٣ ايام واله اربعه تدللي.

بنان : شكرا الله يوفقك يارب..

ضحك وطلعت فرحانه ، سولفت لحسن هو هم ارتاح ..

حسن : حتى الاربع ايام هم راح تصير الج انطيه صبر شهر ويمل.

بنان : الله يسمع منك..

ورة شويه اجه صميم والمحامي ،ودخلنه للقاضي ..

من بعد كلام هواي تنازلت عن الحاضر وعن الغايب وعن بناتي ، مردت لا ادله يقدم ولا تطول السالفه اكثر من هيج ، اخر شي القاضي كله باوع عليها وارمي اليمين .

باوعلي واني هم باوعت عليه ، عيونه جانت مدمعه وحمر مبين باجي ، ومتندم بكد شعر راسه ، عكس اول جلسه جان مسيطر بيها..

صميم : بنان انتي طالق .

همستله ..

بنان : صميم طلكني بالثلاث حتى احرم عليك .

هز راسه ب لا وطلع ..

طلعت كتلهم كلشي انتهى وبجيت ، بجيت مو عليه على العشره وعلى عمري الضاع وعلى صحتي اللي راحت وعلى الثمن الغالي الي دفعته ..

حسن : تمام هاهيه صفحه وطويناها

هزيت براسي اي ..

بنان : بس اكو شغله ..

حسن : وهي..

بنان : طلكني طلاك رجعي.

حسن : وشنو يعني .

بنان : يعني ممكن يرجعني بأي وقت .

حسن: يحلم بعد امشي معليج بيه.

بابا جان يسمعنه هز راسه مراضي لان تنازلت عن البنات ضاج مني كلش ..

وهاي رابع علاقة انتهت!!!!!!!!!!

يتبع