علاقات زائفة

البارت الرابع والستون

لعبة الموت والحياة

تقول لي امي منذ الصغر ، يا بنان خافي الله في الناس احبي الناس ساعدي الناس، لكن ولا مرة نبهتني وعلمتني اخاف الله في نفسي ،تعلمت ان اخاف الله كثيرآ بمن حولي ، لكني لا اخاف الاجرام بحق نفسي ، بسبب هذا الاجرام ، حولت حياتي من بسيطه وسهله وجميله الى حياة معقدة وعاشرت اناس اجبرتني على العيش بأسلوب ونمط مريب.

تقدمت بهذه الحياة بجرأة شديده وقسوة قلب عسى ان اجد في النهاية ما يسعدني ، حاربت نفسي ب انواع الاسلحة المدمرة لكي لا اعود خطوة الى الخلف واتقدم واتوغل اكثر بهذه الحياة ، فعلت كل الاخطاء سواء بعمد او دون عمد ،،،الغفران والتسامح والتغاضى للأسف هذه اخطاء في بعض العلاقات ، فعلت اشياء اسقطتني في ورطة كبيرة لم اكن اتوقع يوما ما بأن سقوطي سيكون مريب..

حاولت كثيرا خلق السعاده التى حلمت بها لكي لا اشعر ولا اتذوق شعور الفشل لكني لم اعرف بأن الحياة تسقطنا في شر النوايا ، لم اكن اعلم بأن احلامي الكبيرة اكبر من مقاس تفكيرهم المحدود ، اسقطتني احلامي في حفرة ،بتُ احاول النهوض مرارآ وتكرارآ لكن دون جدوى استسلمت ، واتت الخسائر متتالية لتهذب مطامعنا وبالتالي رضخت للواقع مجبره ولست مخيرة ..

من أنا وما معنى اسمي ورسمي ..
ومن أنتم ؟
وما معنى الاستقرار النفسي ؟
انا مرضت بعلة لا علاج لها لا طبيب يداوي علتي ولا مصح يرد لي عقلي ، انا بحاجه الى علاج نفسي ، توتر يصاحبهُ رجفة عارمه في جسدي المتعب المنهك ، بتُ اتناول العقاقير لتهدأت روعه نفسي ، اني ارى الحياة و الموت امامي مجتمعان بعقد متفق عليه من قبل شخص حكم على حياتي بالحزن المؤبد ، اليوم عمري ٢٦ عامآ صغيرة نوعآ ما على كمية هذا الحزن والمصاب ، كنت دوما اتمنى واحلم بالارتباط برجل كأبي محافظ منفتح عقليآ متزن ويخاف الله بي ، كنت اخاف الخوض في تجربه الزواج مع رجل عقلهُ منغلق ورجعي رجل جاهل ، خفت ان يعاملني بعنف كنت اخشى على نفسي وعلى اطفالي في المستقبل من هكذا اب ، خفت ان يكبرو ولا يستطيعون التفاخر به ، كنت اسأل نفسي كيف لي العيش مع هكذا رجل تحت سقف واحد ، كنت اموت خوفا من الارتباط بمثل هذا الرجل ، وارتبطت وعشت وتأقلمت واحببتُ وتغاظيت ، بالنهاية تمادى معي بالخذلان والكسران وكسر الخواطر وووووو الخ

انا تعاهد مع نفس الأ اخذل من احب ، فلماذا تم خذلاني ..

بنان

_______________________

من تخربطت كعد بابا فوك راسي يبجي دمرتني دموعه كرهت نفسي اكثر من ما كارهتها هسه حقدت على صميم اضعاف كمت اتمنى ترجع صحتي بسرعه علمود اتخلص منه ، من بعد ما صحيت اخذت علاجي وصعدت مددت ، اصعب شعور من تحسين نفسج انتي ضيفة ثقيلة بيت اهلج ، همه ما محسسيني ومستحيل بيوم يحسسوني بس اني هيج كمت احس لان تعبتهم هواي وتأذو هواي بسببي ..

نمت كعدت ثاني يوم نزلت جوة رحت بالهول لكيت بابا كاعد..

بنان : صباح الخير بابا .

سالم : ياخير هذا واني منايم من وراج الليل كله كاعد وافكر بيج وباللي راح يصيرلج انتي وبناتج ..

بنان : اعرف أذيتكم هواي بس ان شاءالله هاي الاخيره واخلص ...

جر حسرة وكال .

سالم : ان شاءالله هسه على شنو ناويه..

بنان : اريد اتطلك وب اسرع وقت وكون من اول جلسه حتى ما اضطر اشوفه يوميه ..

سالم : وصيت غسان يشوفلنه محامي زين ويمشي بيها.

بنان : اي فدوة بابا كلش تعبت .

سالم : الله كريم تهون ، زين وبناتج مافكرتي بيهن.

بنان : اخذهن لان الحضانه من حقي..

سالم : اخ اني ما كاسر ضهري غير ذني البنات اله اني من زمان ساحبج منه من يوم رجعتج لهنا بس شفتج تضحكين ومرتاحه وابوهن فرحان بيهن محبيت اكسر فرحتكم وعفتج اله اني جنت ناويله نيه ثانيه .

بنان : بابا اني من رحت منا صارت هواي امور تأذيت بيها ، بيت جده حيل اذوني عماته وعمومته ، يعني اكعد بعركه وانام بعركه وهو الوحيد اللي وكفلي ودافعلي ، صح اذاني هواي وداس ابطني هواي بس عنده مواقف تشفعله وتخلي بكلبي رحمه اتجاها لهذا شفتني اضحك وفرحانه بيه وبالبنات ومن بنينه البيت لو تشوفه شلون متلهف على الشيله اصلا اني ميعجبني اطلع من عيالي هلكد ما زينين ويحبوني ومداريني ، بس هو دك رجل اله نطلع واريد بناتي يتربن صح وعلى ايدنه ، بابا فجأه وبدون مقدمات يكعد الصبح ميطيقني ولا يباوع بوجهي عبالك خنزير كدامه مو زوجته ، والله بابا اكثر شي حز بنفسي من رجع من دوامه ورحت تلكيته بسته بخده مثل كل مره ، يدفعني ويكلي والله لعبتيها لنفسي ، فوك الحر والضوجه مال ازدحام ارجع الكاج بوجهي، حاربني بكل انواع الحقاره ، استعمل كل اسلحه الاهانه بحقي بحيث هسه لو يخيرني اموت لو ارجعله اني اختار الموت والله ..

تقرب حضني وكام يمسد بشعري..

سالم : اعتبري الموضوع انتهى وانسيه خليه وره ضهرج وتكمل شغلتج ونبدي نراجع طبيب زين هم علمود القرحه نشوف معدتج شلونها وهم سالفه الضغط اللي مخوفتني ليش هيج معلك وماكاعد ينزل ..

سكتت خليت راسي بحضنه وغفيت مع العلم توني كاعده من النوم ، بابا حضنه امان من كل خوف ..

_____________

مسرة

كاعدين ومرتاحين وكلنا الحمدلله حياتنه بدت تستقر وجراح كمل كل شغلات السويت اللي سواه لروند اللي اذانه المشاكل بيت حمايه ما هدت ،

نحاول نتدخل انه وجراح فد منشوف وجه منهم لا صميم ينطي وجه واحد يسألو ولا بنان كل ما نسألها تسكت وتفوت ،

بنان من النوع الحموله تتحمل كلشي ،اله توصل مرحله صعبه يلا تنفجر لو تتمرض تعلمنه عليها ،

الصراحه حمايه صعب ومدلل وشايف نفسو هوواي فد بنان كدرت تغيرو هواي وصار بيتوتي من بعد ما جان سهر وملاهي وسوالف مكسره،

تعب الكل اولها زوجتو واخرها بناتو اللي صفن بلا ام ، واب اربع وعشرين ساعه طالع ..انه وجراح استلمناهن..

صارت هواي مشاكل ومن ضمن هاي المشاكل زعل حماتي زها اللي زادت الطين بله بجيتها، سامعين جانت عايزه والتمت ، زوجها تزوج عليها لان تأخرت يلا حبلت بالطفل الثاني ، شهرين متزوج وهيه متدري بيه اكتشفته وبنفس الوقت طلعت هيه هم حامل متعاركه و غلطانه على زوجها جابها عمي زعلانه لان هيه ماخذه ابن عمي .

بدة التحريك مالتها بنان راحت منا وهيه تحجي وتزن براس صميم على ابو انت صح ومسويت الغلط ، ولا تخاف من الله ولا تتعض واللي يسمعها جايه يمنه سياحه مو علمود زواج رجلها ودكت رجل اول ماتجيب تتطلك وتحرمه من اطفاله ، بس شنسوي للي ميخاف من الله ، زادت المشاكل بين جراح وصميم ، وصلت للضرب بينهم وناس متحجي ويه ناس عمي رجال مريض وكع بنصهم ميعرف شنو يسوي ..

الى ان اجتي روند وعرفت بالصدفه بسالفه قمر ، تفاجأت وانهارت ، حقها فد تجاوزت علينه هواي وجرحت جراح هواي ، بيوم الي طلعت من البيت جراح نوالها مو خوش نيه ، حجيت وياه وتوسلت بيه كال ابد اله اربيها شلون هيج تحجي وياي وتطول لسانها بدون ما تفهم .

رأييه جان بالموضوع....

جراح: لو شما تحجين وشما تبررين ما تقنعيني برده فعلها وتستاهل الضرب ولو ما ضايج من صميم ومن الجلبه اللي وياه ، وماردت اهينها اكثر كان سحلتها سحل واخليها تصيح التوبه ..

مسرة : حقها اخوك اللي سواه جبير ومؤذي.

جراح : وانه شكو ابوي شكو تخبطنه وياه مو عيب بعدين انه طردت قمر وطردت صميم وره ما طلعت ومن جابها انه ما جنت موجود ومن سألت ابوي كال جنت اجيب زرع ساعه اللي اجت قمر للبيت بعد عليش هيج تتصرف ..

مسرة : شمدريها عبالها كلكم مثل صميم ، بعدها جديده متعرفكم .

جراح : وعليش تاخذنه بذنبو ، بنت عمها عاشت وياي سنين وتعرفني معقوله ما حاجيتلها وبعدين انبياء الله اللي همه انبياء بعد اكو اكثر من هيج جانن ازواجهم عاصيات وابنائهم هم منهم النبي نوح عليه السلام ابنو وزوجتو عصاه ، النبي لوط كذلك زوجتو ..

ول مسره كل بيت بيه الصالح والطالح ، اذا انبياء الله مرو بهيج اختبار كيف احنه البشر..

مسرة : حقك والله بس روند خوش روند لتعوفها .

جراح : اعرف شلون اربيها واخليها تعرف شلون تحجي وي الاكبر منها انه اتخبل من الرعنه وام لسان وهي الصفتين حاويتهن، هاي مو بنان شافت وحده بفراشها ، ماسوت سوايتها ، فوكاها يحجيلي ويكلي موتتني من بجت يكول جنت اتصور تغلط تضربني تتجسر فد عاتبتني بهدوء وادب ، وانه ندمان جراح شلون بيه وضل ينوح على زوجتو ، وهاي لا يمها السالفه لا كرباها اجت عيطت وصيحت وهانت الزلم وطلعت ، اذا سكتت وعديتها معناها انه مو رجال ..

مسرة : حشاك يابه فد على كيفك فدوه اروحلك .

جراح : يصير خير ، باعي صدك خاف انسى السويت مال روند ممنوع تفوت بيه زها ، خاف تكلج انام بيه انه وابني على ما يتزوج جراح ، لتنطين المفتاح كليلهة يم جراح ..

مسرة : ماشي ..

مرت يومين اجه جراح يفور من الاعصاب ركض فوك لصميم كعده وكبت العيطه بينهم ..

جراح: بدال ما تروح وتعتذر مستمر بمقالاتك الطايح حضها ، بله شنو الفايده منهن فهمني عليش هيج تكتب اذا انت رايدها روح وحاجيها عليش مستمر بسوالفك الطايح حضها يول مرتك بعدها على ذمتك اكيد تاخذ على روحها ، عوفك من مرتك اكو واحد يكتب ويعترف بنفسو هو جذاب لك انه ما شايف هيج بشر شلون تأمن بيك بعد شلووووون ..

على صياح جراح صعد عمي ..

موسى : شكو يايابه مو راح اموت انه من وراكم هو انتو فد هالاثنين عندي وعالين كلبي عل..

جراح : حجي لا تجمع لخاطر هو محمد ابنك عال كلبي بكثر ما عال كلبك تعال شوف شنو كاتب اقره .

موسى : وانه وين اشوف حت عيوني عمت من وره صميم بطلت اقره وبطلت اشوف تلفزيون هاي فد نايم حت شغلي عايفو ..

جراح : انه اقرالك عليش تحير اسمع واحكم ،صايرلي نزار قباني ..

صميم : اساسا هذا المقال اقتبست فكرتو من قصيده لنزار عجبتني وكتبت مقال يشبهة عليش تستهزء.

جراح : انت وياه نفس الصفات سبحان الله نزار هم زير نساء ، لهذا مقتدي بيه ..

موسى : احجيلي شكاتب بله ..

جراح : يكول استاذ صميم ..

(انا رحلة سوداء في موجك الدافئ أغلي باعماق حبك العارم ،مقالاتي لم تكتب لها، حروفي جوفاء فارغة ،أستلميها ومزقيها ، كاذبآ كنتُ أنا ، حبي لها دعوة ادعيها ، أنني أكتب لهوآ مازحآ فلا تصدقي بما جاء فيها، لا تصدقي ياصغيرتي بمهووس مريض يمشي في سبات ليل اسود مظلم بظلام حالك..

عانقيني ومزقي رسالاتي وافنيها او ادفنيها ،وحذاري حذاري ان تقعي في شركي المخبوء تحت حروف كلماتي وكتاباتي وافكاري وكذلك وعودي ..

،كتاباتي واحاسيس السكران واحده ،

، انا اكتب بشرودي وهو يتكلم بشروودهُ، اعرفتي الآن ما معنى حدودي هيه حاجات من وعودي .. ارجوكِ لاتستلميها او مزقيها، والعنيني والعنيها )

الكاتب المبدع ابنك العزيز صميم موسى قحطان ..

شكبر اسمه راح انجلط حجي شوفلي حل ..

موسى : هذا كلام هذا انت شوكت ناوي توب ، احنه حايرين شلون نروح نواجه اهلها ونرجع بنتهم بيا عين نروحلهم والله ما ادري وانت جاي تشعر وتكتب..

هنا صميم انهارت اعصابو يمكن جان متحمل وساكت الى ان انفجر ، صار يصيح ويبجي ، اول نوبه اشوفو يبجي ..

صميم : غلطت انه غلطت الله اكبر يعني الله يسامح هيه عليش ما تسامحني هاا واصلا انه هذا الكلام لو تدقق بيه تعرف شنو جاي اقصد قاصد حبي لقمر مزيف وكاذب وحت كتاباتي القديمه كاذبه جانت افهموني ...

جراح : شلون تسامحك وانت جايب وحده بفراشها شلووون فهمني ومو اي وحده ،اكثر وحده تأذت منها .

صميم : روح جيب الموبايل منهم واقره بعينك اذا انه ناطيها مجال بالله ماعرف شلون فرت عقلي وجبتها ..

جراح : طفل انت جاهل وتفر عقلك ولك انت رجااااال وعيب تبجي عيب ، لو بيك تصلح غلطك وتوووب لو تروح تطلكها وترجعلها بناتها على الاقل تتذكر منك شغله زينه..

صميم : بناتي ما انطيهن ، تريد ترجع تربيهن وانه اطلع من البيت وحت اسافر بره البلد فد ما اطلكها تحلم..

موسى : مو بكيفك اذا رادو طلاك تطلك لان مصير اخوك مرهون بردات فعلك ..

صميم : لو تحترك الدنيا ما اتنازل عنها وعن بناتي .

جراح : كوم غسل وكافي بجي ، دومك تكسر الدنيا وتعالو لزكولي ..

اجت زها على الصوت وتريد تحجي وتصف وي صميم ضربها جراح وطلعت تبجي ، عمي كال تستاهل هواي تمادت ..

عفنه صميم وطلعنه وصوت البجي ماله عبالك مرة وتنحب كسر خاطرنه بكثر ما كسر ظهورنه بسالفتو الاخيرة..

__________________________

روند

مرت الايام واني لا راسلت جراح ولا هو بادر ثنينه مغلسين .. اني ضايجه منهم وهو اكيد ضايج من تصرفي اللي مرات من اتذكر افشل ومرات اكول لا حل بيهم هيج سويت يستاهلون ، مشكلتي اندفاعيه واتصرف بجنون وقت اللي اتأذه ماعرف اعبر عن البداخلي بهدوء وكلمات مناسبه لا اجفص ..

نفسيتي تعبت كلش لان حبيت جراح وتعودت عليه مو سهله انهي كلشي وكأنما ماكو شي خصوصا من بديت اقارن بينه وبين قسور وشفت شكد فرق بينهم من كل النواحي خصوصا من ناحيه الشخصيه شخصيه جراح فدشي كارثي ...

طلبت اجازه ٣ ايام حتى ارتاح شويه خلصت وداومت اني نسيت جراح وصاني البس حجاب وحتى كلي غيري كل ملابسج .. اني بالبدايه ضجت بس بعدين من حجه ويايه قنعت ، ضليت البس يوم ويوم ما البس شويه شويه تعودت ..

خلصت الاجازه بدلت من لبسي القديم والله مو قصدي اضوجه او شي بس نسيت وحتى الحجاب نسيت البسه . اخذت جنطتي والسويج وطلعت ، فتحت باب السيارة توني اريد اصعد انجريت من ايدي حيل باوعت جراح ، ركع باب السياره وسحبني من ايدي ودخلنه لبيتنه ، التفت عليه وحجه من بين اسنانه .. وعاقج الوجه ..

جراح: حجابج وينو؟؟

روند : نسيت .

جراح : نسيتي ؟؟

حجاها وهز راسه متحلف..

جراح: وين رايحه.

روند : وين يعني للدوام .

جراح : من احاجيج جاوبي عدل وبدون نتر لا اكسرج..

روند : شتكسر انت واخوك ماخذين العالم فلاحه ملاجة صدك جذب عبالك تخوفني عود..

جراح : يعني متخافين مو؟؟

بده يعصب اكثر يمكن شويه لاخ ويدخلني بالحايط بس مدري ليش ماخاف منه ماعرف يمكن لان اعرف بيه يحبني هواي ، قسور جنت ارجف خوف اذا صار موقف بينه لان يزعل وطبعه نحس حيل ، جراح حنين عليه كلش بس يمكن بعدني ممجربه قسوته لهذا اخذت الموضوع برود وتصرفت بتمرد وهذا جان اكبر غلط مني وصدك ذلني ذل مثل ما وعدني ...

روند : مو خوف وانما احترام ..

جراح : وين احترامج وانتي لسانج شطوله بيت اهلي وماحترمتي وجودي ولا اهلي وفوك هذا ماعتذرتي ..

روند : وليش اتعذر وانت نسيت شلون ضربتني..

جراح : لانج برعه وصاحبه لسان وما تحترمين لج انه رجلج ،،،
ممكن اكول تمون واعديها انه زوجها وتتعلم شويه شويه، فد اهانتج لأبوي شلوون اعديها الج ..

روند : من الاخير تريد تستمر ويايه براحتك متريد كلمن يروح بدربه فضت راحت عليمن خابص الدنيا.

حجيتها ونفضت ايدي ..

دفعني حيل انركعت بالباب مال شارع حتى راسي تأذه.

جراح : وهيج سهله عندج عادي يعني نتعاوف..

روند : ما اكو اسهل منها ..

جراح : تعودتي يوميه تجربين واحد وتنامين بحضنو وتعوفيه تجربين الثاني وهم ماعجبج الثالث يجي قابل قحط زلم..

صدك اختنكت من هيج حجه ومتت قهر حاولت ما ابجي بس مكدرت ..حجيت وارجف.

روند : عيب عليك هيج تحجي اني عرضك شنو فرقك عن اخوك لعد هو هم يعير بزوجته ويشهر بيها ..

ضرب الباب الورايه فززني..

جراح : من عندج عادي تعوفيني وتنهين كلشي شمعناته كلامج وشنو تتوقعين يكون ردي هااا ، هسا صرت انه موخوش ..

روند : جراح وخر خنكتني .

جراح : لج احجي عدل تراج طلعتيها من ماعونها ..

كمت ابجي واصيح انت متحبني انت جذاب انت اخذتني برغبه وهسه طلعت على حقيقتك .

لزم فكي حيل وعصره حجه مخنزر ..

جراح : صوتج تراني بالكوه كاضب نفسي وما مأذيج لا تخليني افين حضج .

روند : شتفين اللي سويتوه بينه قليل انت واخوك وهسه جاي تحاسبني علمود كلمتين والله انتو العايلين بينه وروح اسأل الدنيا كلها هسه يكلولكم انتو الغلط والحق كله ويانه..

جراح : يواش يواش ، عليش تقارنيني ب اخوي انه شكو من انعل شيب اهلو ، هو ريحتو فايحه من الاول وبنت عمج تدري وسكتت لانها تحبو ، عليمن هاللغوه الزايده منج ..

روند : والله مو لغوه انتو نفس الشي ..

جراح : منو انتو المن تقصدين .

روند : انت واخوك..

جراح : انه واخوي ، يلا احنه نفس الشي شرايده وين تردين توصلين.

روند : ننهي كلشي .

جراح: تمام انهي من يمج وانه ما اطلك و دوام ماكو سياقه ماكو طلعه من البيت ماكو ، ومحمد اكسرج ، شفتي شلون اليوم واكفلج من الصبح باب البيت اتفرغلج ماعندي شي حت محلي خليت عامل بيه واريد اشوف شلون كلامي ينكسر يامره تكسرو ..

روند : الدوام معليه ، شنو تبطلني بكيفك قابل.. والله ادوام ..

اجه خنكني من ركبتي ..

جراح: عجل بكيف منو هااا بكيف منو .

دفعت ايده حيل وحجيت ..

روند : ماطول بعدني بيت ابويه هو اللي يحكمني مو انت ..

جراح : كلش زين ، انه طالع وساعه عشره رايح لدوامج واذا لكيتج مداومه ومحمد اسحلج من شعرج جدامهم وعود كولي ساعتها تزوجت همجي مخبل اناني متخلف رجعي براحتج انه حرمه تكف بوجهي وتخلي راسها براسي ، من انعل نامسوها ...

روند : اداوم والله وخلي ابالك اليوم احجي لبابا وانهي كلشي .

جراح : كتلج انهي براحتج فد تضلين على ذمتي طول عمرج.

روند : اخلعك شنو صعبه ..

من حجيت هيج حسيت نطيتهيا بالعظم ..

لم حلكه بوضعيه اسف لان اختارني او مصدوم بيه هيج فسرت حركته ..

حجه بصوت خشن وحدي ..

جراح : خلي ابالج حت لو عفتج راح اضل محفور هنا وهنا ..

اشر على راسي وكلبي ...

محد يكدر يأثر بيج مثل ما أثر بيج جراح ومحد يحبج بكدو ومحد يسعدج مثل ما جان ناوي يسعدج ،

ولو تموتين مترجعين الو ولا يلمج بحضنو ولو اشوفج ب اخر نفس ما حن ولا اريدج بعد ،

وهااا طلاك ما اطلك خليج معلكه لا تطولين السمى ولا الكاع ،
واكرر عليج للمرة الألف طلعه من البيت ماكو دوام ماكو واذا لمحتج ادفنج بنفس المكان اللي اشوفج بيه جربي تعانديني وتطلعين عن شوري وشوفي شسوي .

بوقتها نسولف بالافعال لان انتي متحبين الكلام ..

عافني وطلع ضليت ابجي دخلت جوة لكيت ماما كاعده وسامعه كلشي هزت ايدها وكالت ، هذا اختيارج انتي وانتي تتحملين كلشي .عفتها وصعدت فوك ما اعرف ابجي الطم شسوي احس نفسي ضعت...

__________

بنان

بدينه ب اجرائات الطلاق وكلشي حسب الاصول ، بابا خابر ابو صميم علمود نحلها بشكل ودي ونخلص ب اسرع وقت ، تحدد موعد الجلسة يوم الاحد و السبت العصر اندكت الباب جنه كاعدين كلنا بالهول طلع اكرم فتح الباب رجع كال اهل صميم بالباب ، كام بابا دخلهم للأستقبال ، وره ربع ساعه صاحني لبست حجاب ودخلت سلمت على عمي وعمتي وجراح ..

صار حجي هواي ولوم وعتب بابا مقهور منهم شلون يستقبلون هيج وحده ابيتهم ويسلموها بناتي..

موسى : والله وداعت نضر عيني ماعندي علم ، اجت روند وانه جيت قبلها بعشر دقايق ، مثل ما هيه تفاجأت بشوفتها انه هم تفاجأت ، وبعدها طردتها وطردت ابني، انه ماراضي بفعله و هو غلطان ومتندم ويريد يرجع البنيه والله مالي عين اطلبها منكم لان ابني ما يستاهل ونذل فد البنات تبهذلن وماجاي يقبل نجيبهن لأمهن ..

سالم : حجي مالكم بنيه يمي وباجر كلشي ينتهي اني غلطي الجبير من زوجتها وهيه بعدها صغيره بس ابنكم الله يسلمه اخذني بلسانه وماعرف شلون قنعني وهسه حتى لو يسحرني هم ما ارجعها ...

جراح حجه وعمي وعمتي وبابا نفس حجايته سألني عمي شنو رأيي كتلهم صميم انتهى من حياتي..

راحو من بعد حجي ساعتين ونص همه يقنعون بينه ..

بليل توني اريد اغفى واجاني اشعار على الفايبر من رقم غريب فتحته رابط اغنيه ..(اسمها غريبه الناس لوائل جسار)

وراها كاتب

💬

لج بنان شنو سالفه الطلاك انتي كل عقلج اطلكج كل عقلج اعوفج والله اذيتج اعرف ومالي عين اطلب السماح هلمره ، فد صدكيني عرفت غلطتي وحجمها رجعيلي مو لخاطري لخاطر بناتج ، بنان جاي اموت والله العظيم ماعرف شبيه متدمر والله حبيبتي ..

مجاوبته اكتفيت بالحضر ومسحت المسج ، ما اريد اتأثر واتراجع عن قراري ابد .

كل شويه وحده من البنات تفتح الباب وتحاجيني عبالهم كاعد ابجي لان باجر موعد طلاكي ويخافون لا ضغطي يرتفع...

يشوفوني مابيه شي يطلعون ، الى ان نمت بعد محسيت اذا اجه احد او لا ، ثاني يوم كعدت الصبح حسيت براحه عجيبه اول مره احس بهيج احساس ، جنت اتصور صعب ومراح اكدر بس ماعرف شنو اللي صارلي بحيث اني تعجبت من نفسي شلون كمت سبحت وتأنقت ب اجمل الملابس العندي ومكياج وصبغ اضافر والعطر بيوم العقد مالتي مهتميت بنفسي هيج..

نزلت والضحكه شاكه حلكي الكل تفاجئ بيه يمكن عبالهم راح انزللهم بالاسود وابجي ممتوقعين هيج رده فعلي بهالبرود..

سالم : شلونج بابه خوما تعبانه ضايجه.

بنان : صدكني ب احسن حال .

غسان : يلا يابه اذا كملتي امشي نروح .

بنان : ماعندي شي .

طلعنه اني وغسان ، صعدت بالسياره طلع حسن من بيتهم توجه على سيارتنه .

غسان : نزلي كعدي ليورة.

بنان : ليش ؟؟

غسان : حسن يجي ويانه..

توني اريد احجي فتح الباب حسن باوعلي مبتسم عبالك رايحين نعقد اني وياه هو هم كاشخ والعطر مالته يدك بالخشم..نزلت وصرت كباله..

حسن : صباح الجمال كله على كيفج يابه كل وحده تطلك هيج تصير حلوة..

دك هورن غسان وصاح..

غسان : فضونه شتحجون صارلكم ساعه متكلولي.

صعدت وحسن هم صعد..

حسن : جاي اسألها على بناتها مو بت عمي..

بنان : اي ابن عمي صح كلامك.

ضحك الطريق كله يباوعلي بالجامه الاماميه واني مغلسه وصلنه للمحكمه جانت الساعه ثمانيه وثلث ولا انسى هذا الوقت ولا تاريخ هذا اليوم..

طبك السيارة ونزلنه مشينه سوه دخلنه للمحكمه وانتضرنه جيه صميم ، ساعه ونص يلا شرف ، هو وجراح وابوه ..

شافني انصدم بهت ممتوقع راح يشوفني هيج واني قابلته ب ابتسامه عريضه ..

جراح وعمو تسالمو ويه غسان وحسن ، وصميم على صفحه واكف ، اجه سرانه ودخلنه يم الباحثه الاجتماعيه ،سألتنه هواي و حجت ويانه هواي ، كالت فكرو زين خطيه مادام عدكم اطفال ..

بنان : تقبلين انتي يوميه زوجج يخونج وتضلين وياه

صميم : ما خاينج انه انتي مريضه بالشك..

بنان : انت دائما تكلي انتي مريضه لو تشككني بعقلي وتكلي تشافي لو ادعي الله يشافيج من مرضج واني شنو جنت اكلك ، اكلك الله يشافيك من مرض الخيانه حتى اني اتشافى من مرض الشك ، وجنت اكلك صميم جوز كافي تكلي انتي خانكتني بالشك ومناطيتني حريتي نطيتك حريتك وعفتك تالي شسويت بيه شنو جنيت من وراك غير الخيانه وغدر ..

صميم : والله ماسويتلهة شي ما خاينج واصلا ماعندي شي وياها غير الرسائل..

بنان : تبقى الخيانه قبيحه ومتتجمل ، ويبقى طعمها مر لو سقيتها بحلاوة الدنيا كلها تضل زهر .

حجت الباحثه .

_ والله مبين عليكم واحد يحب الثاني لهذا واحد محروك كلبه على الثاني ، راح اتركم احجو براحتكم وبعدين صيحوني.

بنان : ما يحتاج فدوة اني نهيت كلشي..

صميم : شكرا لاقتراحج ست وسمحتيلنه بهذا الحيز لان محتاجينه..

ابتسمتله وطلعت..

بنان : شبيك انت يعني بيا لغه احجي وياك وتعوفني .

صميم : ماعوفج .

بنان : هاي انانيه تره.

صميم : اعتبريها مثل ما تعتبريها..

بنان : غصبن عليك تطلكني هسه ادخل للقاضي واحجيله كلشي.

صميم : سويها واشوفج النذاله على اصولها..

بنان : عاد انت معروف بيها وافعالك تشهدلك ميحتاج تحجي بس عندي فضول اعرف شتسوي .

صميم : هوواي اشياء اندمج عليها ..

بنان : انت شتريد مني اني كرهتك ومستحيل يجمعني وياك سقف واحد بغرفه وحده.

صميم : رجعي لبناتج مو الي.

بنان : وليش اربط نفسي بيك طول العمر بعدني صغيره والحياه كدامي شنو شفت منك اني حتى اعيش على ذكراك ههههه.

اخذ قلم من على الميز وكام يفر بيه ويحجي .

صميم : ليش تردين تطلكين حت تتزوجين..

بنان : هههه يسأل ويجاوب روحه ، شعليك بيه بابا اتطلك اموت اتزوج ادرس شلك دخل فد شويه تصير رجال غريب..

صميم : كل عقلج اخليج تحبين وتتزوجين واحد غيري وتنامين بحضنو ويدفيج مثل ما جان صدري يدفيج..

بنان : هههههه عود كاعد تذكرني حتى احن انت متدري شلون كمت اشمئز منك من اتذكر ولو اموت ما ارجع احبك مثل قبل ..

صميم : كلتيها قبل وخلفتي بالوعد.

بنان : جنت ثوله.

صميم : وهسه وبعد

بنان : لك انت شكد قبيح ، راح اطلع اصيح البنيه وغصبن عليك تنهي كلشي كافي عاد.

حجيتها بحديه..

صميم : عجل تنازلي عن حضانه البنات واطلكج..

بنان : لو اموت مستحيل اسويها..

صميم: اخذهن منج وحت احرمج من شوفتهن..

بنان : متكدر

صميم : كلشي اكدر

بنان : جذاب وبس بوخه ، حجيتها وتوجهت للباب اريد اطلع صاحني .

صميم : تعاي اشوفج شي قبل لترحين..

بنان : شنو ؟؟ عقجت حاجبتي وحجيتها.

صميم : تعاي تقربي ما راح اكلج..

رحت يمه طلع موبايله الثاني لان هو عنده ثنين ، ودخل على الاستوديو طلع صوري اللي جنت ادزهن اله يعني بدون حجاب لو لبس كيمونه وهيج شغلات ..

باوعتله.وحجيت بحديه.

بنان : وشنو يعني صوري شتريد تسوي بيهن.

صميم : شوفي هذا البرنامج ، فد ادمج صورتين ، انتي وحسوني وارفق وياهن المحادثات مالتكم ، تنسين بناتج حت شوف ما تشوفينهن..

بنان : يعني تسقط ب اخلاقي بالمحكمه وتخليني غير مؤهله لتربيه بناتي ، لك انت شنو من بشر انت شكد عار .

صميم : عجل تنازلي عن البنات لو ترجعين وياي للبيت..

يتبع...