🌙حسناء القايد🌙
👑oumaima mega 👑
⚡171⚡
حسناء : حبلة ؟ شكون قال هاد الكلام ؟
شافية : ويلييي ا لالة يامس (لبارح )قلتي ليماك تتشهاي الثريد كون قلتيها ليا ا لالة كون راه عملتو ليك من الصبحية بلاما تعدبي ختك معاك ....حسناء عاد تفكرت يامس و شنو كانت ترمي مها بكلامها ...و هي تشد من راسها : القاسمية
شافية تطل عليها : مالك ا لالة ؟
حسناء طلعت تشوف فيها : انا ا شافية محبلاش و مكين من هاد الكلام والو ...و حسناء فحالا شدتها تزنيكة حيت هي معملت مع سيد القايد والو كيف غتكون حبلة
شافية : ناريي الالة و انا لي كنت فرحانة و مقاداني فرحة شديت لساني على القصر غا بالكشايف (تنهدت ) والله يالالة تمنيت كون كنتي حبلة من سيد القايد ...حسناء ولات غتدور في عويناتها حيت هادشي لجالسة تقول فيه شافية راه حشومة هي باقا بنت كيف غتولي حبلة :احم صافي اشافية تعالي نفطرو ...و ناضت من مقامها مشات لمخيدات و جلست تمايا ...و كان قبالتها فطور تاع الحابلات زييين و عامر ...جلست حداها شافية تونسها كيف ديما بالكلام ...و حسناء تجوبها و خطرة خطرة تقول شافية شي كلام يحشمها و يخلي وجهها حابة تخشيه في لرض .... تكملت فطورها على راحتها
حسناء تنهدت : بغيت نشم الهوا ا شافية
شافية : غتطلعي لسطح ا لالة تاني
حسناء : لا هاد الخطرة غنزل لتحت ...و ناضت جمعت لوقفة و ناضت معاها شافية تجهزها و توجد ليها قفطان زيين و تعاونها في لباس داخلي حيت متتعرفش حسناء تقادو...عاد لبستها حطة زينة جديدة و طوق تاع الدهب عامر في عنقها و شعرها عاودت فتلاتو ليها و بخرتو ...و كحلت ليها عيونها و عكرت ليها شفايفها ...عطرتها من راسها لرجليها تمن كفوف يديها تعطرو ....عاد خرجو من جناح الطاووس غادا تمشا حسناء و خديدمها من وراها و كتبان عاطية لعين و الشوفة وسط داك القصر لعريض و العامر ...و دارو نازلين من الدروج ...و هي تلمح حسناء معاد ولد فخر الدين الكبير ...جالس و حاط يديه على خدودو و باينة فيه مهموم
حسناء غير لمحاتو وقفت : معاد (معاد ناض وقف تقول كان تيساينها حسناء تبشرت ليه ) اش تتعمل هنايا
معاد متلبك : مرت با صباح الخير
حسناء : صباح الخير (شافت بايلا معاد ماشي عوايدو هادي و هي تعجب ) معاد واش راك بخير (معاد بغا يدوي و ليني واقفة شافية و تا حسناء فهمت اش كين و دارت عند شافية ) شافية غير سيري انا غنكمل وحدي
شافية : واخا الالة ...و هبطت مشات
معاد : معرفتش ا مرت با واش نقول ليك هاد الكلام و حاس بايلا غنتي لي قادة تعاونيني
حسناء حطت يديها فوق كتفو : قول اولدي اش كين؟
معاد هبط الراس و جلس في درج و حسناء جلست في جنبو : خالتي شروق
حسناء غاسمعت حسها قلبت وجهها : شنو عملت تاني ديك بليسة (ابليسة مرت شيطان ) يكما ضرباتك
معاد حرك ليها غا راسو : حصلتني انرسم و خدات لي الورقة و داتها لبااا
حسناء : و علاه مال الرسم حراام ولا عيب ؟
معاد : لا و ليني (تردد ينطق في لول مي في تالي لاحها في رجا الله ) كانت فيها درية (حسناء عاد فهمت اش كين و هزت حواجبها و سرقتها تبسيمة و معاد كمل كلامو ) تتقرا معايا وهي وحدة من الفرانسيس
حسناء زادت خرجت الشوفة و سقساتو : واش نتا تتقرا مع الفرانسيس ...
معاد حرك ليها راسو بايه : دابا خالتي شروق دات الورقة خشاتها تحت دفة ديال جناح باا و انا عارف لا عرفها با غيستفسر عليها و غتقولو خالتي شروق بايلا انا مولاها و و با مغيعجبو حال و غياخد من خاطرو في جيهتي
حسناء دورتها في راسها و عضت شنايفها عندو الحق في هاد الكلام : دابا شنو المعمول؟
معاد : معرفتش شنو نعمل انا غتبعت خالتي شروق تالاحتها تحت الدفة
حسناء بدات تخمم ؟ واش كين سيد القايد في جناحو دابا
معاد : لا هو تيفطر مع حناا (جدة) دابا
حسناء : و علاش ممشاتش تعطيها لو في وقيت الفطور
معاد : متقدش حيت با متيبغي لي قطع عليه فطورو و لا يصدعو بكلامو
حسناء تتقلب في عويناتها بتخمام : امممم غيكون جناح سيد القايد مسورت ؟
معاد حرك ليها راسها بااه : حيت نمنوع يقرب شي حد من جناح با و لا يدوز من حداه
حسناء :و شكون لي عندو سوارت الجناح واش عرشية ؟
معاد : لا حنااا (جداااتي ) هي لي عندها السوارت ...حسناء رجعت بلور هي تتخاف من ديك سلطانة طلعت هي لي في يديها القفولة : الله ياربي اش غنعملو الله يعطي لديك شروق غير شي مصيبة تفكنا منها (معاد نزل راس و هي تنوضو حسناء ) نوض دابا بانت ليا فشي حاجة نعملها غتمشي دابا و تجيب فاطمة الزهراء و فردوس عندي لجناح يلاه سربي معندنا وقت ...معاد تيسمع لكلامها متعطلش مشا يتجارا قبالت عينيها ...و حسناء دارت رجعت لجناحها ...دخلت فيه و خلات الدفة تاعو مفتوحة لدراري ...و بدات تمشي و تجي و بدا تيدخل معاها الخوف حيت هادشي لي تدير فيها مصيبة و كبيرة تقدر طيحها فشحال من حاجة حيت تال سيد القايد و ديك لالة سلطانة لي ميتلعبش قبالتهم ...و ليني الصبي طلب منها المعاونة و هي متقدش تردها في وجهو ورجعت رفعت كفوفها لسما تدعي في ديك شروق ياخد فيها الحق على هاد الفعايل تاو الفاع
معاد
🌙حسناء القايد🌙
👑oumaima mega 👑
⚡172⚡
وحد شوية تا جاو الصبية معاد و فردوس و فاطمة الزهراء قبل ميدخلو تما تدقو في الدفة عاد دخلوو ...غير سلمت عليهم و جلستهم في المخيدات و بدات تحاجي عليهم
حسناء تتحاول تفهم في البنيات اش كين : نتوما عارفين اش واقع لخوكم و محتاجة لمعاونة تاعكم ؟ غتعونونا ياك (حركو ليها راسهم بايه و معاد غا واقف على عصب رجليه و حسناء شدت من كتيفات فردوس ) بغيتك تجيبي لي سوارت من عند حناااك غتلقايها في السرة ديالها و ليني متقولي ليها حاجة
فردوس تبسمت : كوني هانية ا مرت بااا نجيبها ليك
حسناء رتاحت شوية : واخا سيري جيبهم و حضي لا تعيق و تفيق بيك
فردوس حركت ليها براسها لا ...و خلات حسناء و معاد واقف ليهم الخوف في حلقهم بالاخص حسناء لي خاشية مناخرها في حاطة ماشي تاعها ...مهيم فردوس نزلت لتحت تتجارا و مشات لصالون لالة سلطانة ...غا وصلت لبابو و من ورا خواميه طلت كيف المشيشة على حناها لي جالسة مربعة رجليها و لابسة حطة زينة وتتكب في اتاي ...و السي فخر الدين جالس حداها كيف السلطان و متكي على دراع وحدة و شاد كاس تاع اتاي و ديما هو مطلع الشوكة ...سلطانة قشعت حفيدتها تطل عليها و ميلت راسها دغيا تبسمت : فردوس كبيدتي دخلي دخلي ...فردوس غير سمعت ندهة تاع جداها ليها و مشات لعندهم بتبشيرة ...فخر الدين عزازين عندو ولادو لدرجة غشافها فك رباط الغوباشة و تبشر
سلطانة طلقت ليها يدها : اجي ا كبيدتي عنديي ...فردوس مشات لعندها و تخشات تحت باط جداها
سلطانة : قوليليا ا كبيدتي تاخدي حليوة ....دارت ليها براسها لا ...فخر الدين غير تيشوف في بنيتو و داير تبسيمة جنب ...فردوس مع كبيبرة شوية و عويرفة تهيا ...بدات تنبش و تهبش في عويناتها تقلب على سوارت تقشعتهم في حزام حناها
فردوس نعتت بصبعها لسوارت : حنااا(جدا) شنو هادو
سلطانة حيدت السوارت من حزامها تضحك : هادو ابنتي السوارت تاع القصر كلو فاش تكبري غيولي عندك فحالهم
فردوس مدت يدها ليهم : ياااه ا حنا هما كثارين بزاف ...ضحك سيد القايد ...و سلطانة تهيا و عطاتها السوارت في يديها باش تحسبهم و تشوفهم
سلطانة دارت غا بنص شوفة عند فخر الدين بان ليها حاط الكاس و عينو على بنتو يتبشر ليها و هي تنهد : كول اولدي دابا يبرد الكاس في يدك
فخر الدين : واخا ا الحاجة
سلطانة جاتها وجيبة تجبد معاه الحديث و بدات تمسكن و تمكن : ايوا ولدي بديت نحس فحالا مبقيتش معمرة ليك العين و ممرتاحش معايا
فخر الدين ربط الغوباشة : اش تتقولي ا الحاجة ؟
سلطانة : غير حيت شفتك يامس مفطرتيش معايا و تشوشت (ايوا هنا فاش بدات سلطانة الكلام نسات بايلا عطات لحفيدتها السوارت ...و فردوس بانت ليها الوجيببة جمعت سوارت في يديها صغيرة باش ميتقرقبوش و بشويش تسلتت من حداهم و تمشات على صبعان رجليها )
فخر الدين : كان فطوري مع حسناء يامس و بلاما تشطني ولا تشوشي نتي عارفة مقامك عندي ميعلا عليه مقام و نتي هي كلشي (فردوس غا وصلت لدفة و محس بيها حد تما فين هربت تجارا بسوارت )
سلطانة عاد ريحت قلبها و تبسمت و عجبها مقامها : و انا غا قلت ا وليدي معنيت بيها تحاجة ...و فخر الدين كان تيتحدث معاها و يجاوبها بينما كمل لكاس في يدو
فردوس
🌙حسناء القايد🌙
👑oumaima mega 👑
⚡173⚡
~~~~~~~~~~~~في جناح الطاووس بحرا وصلت فردوس و في يديها السوارت ...حسناء فرحت بيها و هنا جا دورها هي
حسناء : دابا غتوروني طريق جناح سيد القايد
معاد : و لا حصلونا ا مرت با
حسناء ديرا روحها في يد ربي سبحانه : ولا عليك غير خليها عليا تالحصلت نسلك راسي و لا نشوف اش نعمل دابا وروني الجناح ... هي هاديك مشاو معاها و على خطاها ...خرجو من جناح الطاووس غاديين مقدمينها ...و هي شادة في يدين فاطمة الزهراء و غادا و قلبها يضرب يضرب و تدور يمين و تدور شمال لا تلمحها عرشية و لا شي وحدة ....تا وصلو لجيهة لخرى ...فين كين جناح سيد القايد غير القواس لي تما تقول هنا تخرجني سكرت الموت ...حسناء غا مطلعة الشوفة في داك المنيظير المرة الفايتة كانو جابوها بالغصب باش تعشا مع سيد القايد ...و مشافت ما ريت و ليني دابا عاد سرحت عويناتها ...تقربو لوحد السطوان في الدورة كبييير و عرييض ....و وقفو بعيد عليه تما كان الباب المدهب الكبيييير ...حسناء منين هزت الشوفة محطتهاا تتشوف داكشي فحال الخرافة
معاد : هادا هو امرت با
حسناء سرطت ريقها و بدا يتنادم معاها الحال و ليني غير منين تتشوف وجوه هاد الصبية تيضرها خاطرها الحاصول للله يعطي لديك شروق ا غبارة تغبرها ...ولات غتفرك في يدييها و تدور عويناتها : المهيم انا غنمشي نقلب عليها و نتوما غير تسمعو حس الغاشي ندهو عليا باش نهرب
معاد : واخا امرت با ....تبسمت ليهم غا بالكشيفة و مشات وحدها كملت في داك السطوان تاع الملوك ...غادا و متتسمعش خطاويها توصلت لباب و جبدت السوارت من حزامها و بدات تقلب على اينا ساروت من بينهم تاع هاد الدفة ...تا طاحت فيه و دارت عند صبية فرحانة و تبسمت ليهم و هما كانو تيطلو عليها و ردو ليها تبسيمة ...و هي دارت و جمعت النفس و فتحت الباب تاع الجناح ...و ضربتها ريحة سيد القايد مع وجهها ...كانت الوريقة تحت من دفة و مع فتحت الباب الوريقة مزالا لاصقة لتحت ...دخلت حسناء تمشى ماعندها وقت تمنظر في هاد الجناح ياربي تخرج من هنا سالمة غانمة ...و بدات ترمي عويناتها لرض و تقلب على الورقة ...دخلت تال لداخل فين كينين صنادق تقلب عليها
الصبية على برا كانو حاضيين لغاشي ...فردوس دورت راسها من جيهة لخرى ...و هنا درية فحالا دربتها تصرفيقة فاش شافت باهااا ماجي لديك الجيهة
فردوس : ب ب با ...معاد دار و هنا كانت صدمتو تهوا وحتى فاطمة الزهراء تخشات في جلايل فردوس تال باهم لي ميقدرو يعملو والو ...فردوس جرت فاطمة الزهراء و هربت ...معاد لي بقا واقف معرف ميعمل و كيف ينده على حسناء حيت باه غيسمع صوتو ...بان ليه فخر الدين علاين يوصل تما و غيشوفو ... معرف اش يعمل هو يدور يهرب من تمااا
~~~~~~~حسناء لداخل مزال غتنقب على ديك الوريقة تدورت راسها و لقات شوية منها تحت الدفة ... ضحكت على راسها شوف فين كانت و شوف هي فين تتفتش ...مشات و جبدتها من تحت الدفة و حلتها كانت مرسومة فيها بنية عويناتها خوضر و شعر زعر تقول تاع بصح ماشي مرسومة .. و هي تبدا حسناء تطوي فيها بشوية بشوية صافي كملت شغالها ....و هي توقف مشوبرة و جبدت عوينتها و تتصلغا لشي خطاويي على برااا مسموعين و متوازنين و ماجيين قاصدين الدفة ...و ماشي خطاوي تاع الصبية و لا ديال الخدم هادو خطاوي تاع الناس الكبار ....يتبع
🚨🚨🚨🚨🚨🚨🚨🚨🚨
ايوا ايوا حريرة حسناء هنا حريرة اش غدير و اش غتعمل ..... مشات فيها و هادا الله ... و عاد ليوم الحويج لي جاية هايليي هايليي اش تابعكم يا بنات دار الكبيرة و دوزو بخييير و عنداكو تنساو التفاغل ديالكم و التعاليق ديالكم