علاقات زائفة

البارت الرابع والاربعون

حسن

واكول اصبر واذب البير جوة السر

انا من الرجال الفقيرين حظ ، ياليت جيبي فقير ولا حظي ، منين ما التفت متعوب متأذي ..

الفقر مو عيب ، والرجل بطبيعته الكونيه ، كلشي يتحمل ، من تعب من مصايب من فقر الحال ، لكن من توصل الشغله لكلبه ميتحمل ، الرجل بطبيعته كتوم وميفرغ اللي بكلبه عكس المرأة ، تبجي ساعه وترتاح ، اله هو شلون يرتاح ،صعبه كلش صعبه من الرجال يبجي
واذا شفتو رجال بجه ، معناها همومه فاقت الجبال..

كل مرة احاول بيها انسى وأتأقلم واتعود على الفراك واكول الحمد لله شويه هانت ، ترجعلي بنان من جديد وتظهر بحياتي، وارجع اني اتأمل واحلم وادعي واتمنى ، وانذر وارد فشلان بنذوري ...

كل مرة يضربنه صميم ضربه اقوه من القبلها ، انسان غدار ميواجه ، اخر ضربه ضربني بيها شلت حالي شل ، لا بيه اكللهم عوفوها اريدها كرامتي متسمح ، ولا الشي السمعته هين ، واكدر انساه ، مرات افكر من هيه جانت تبجي بالخطوبه وجنت اسألها ليش تبجين ،،،،تكلي الصارلي شي اصعب من الخيال كلشي توقعت ، اله هاي الشغله ما اجتي على بالي ، يعني توقعت مصورها مهددها بشي مخوفها ، بس هيج شغله جبيره مجتي على بالي ، لان بنان اني مربيها على ايدي واعرفها كلش زين مؤدبه فطيره كلب ...

اه ه ه اللي كتلني شلون هيج كدرت تسوي ، يمكن لو حاجيتلي بوقتها ، مستحيل اتقبلها بحياتي ، ممكن اساعدها بس اتقبلها لا ، لان ماكو رجال بالدنيا كلها يحب وحده ، وتسوي مثل هذا الفعل ، ويرجع يلمها بحضنه ، معناها ماعنده كرامه ، لان اللي ارتبطت بيه لو معايفها ومستمر وياها جان مرجعتلي ، ولا لجأت الي ، اذن اني جنت شي ثانوي بحياتها ، مثل اطار الصورة ، يحميها من الكسر بس محد بحاله الكل عينهم تجي على الصورة  ..

هواي قهر بكلبي وهواي امنيات ، ومن ضمن هاي الامنيات انسى واتعود واعيش حياتي  ، بس شلون انسى وهيه لجأتلي حتى اساعدها ، شفت رقمها على شاشه موبايلي ، عقلي يكلي احضرها خلي تولي اذتك هواي هم ترجع تسامحها ، كلبي يجاوبه ، يكله اسكت اسكت ، انت شمدريك اني شصار بيه من بعدها ، اني عطشان ومحتاج لصوتها يروي ضمأي ، ومثل كل مرة اتوب وما اتوب ، توبتي من يم بنان ابد مو نصوحه ، هله بالغلط الاعيشه وياج .....

جريت حسرة وكلت الو.

حسن : الو ..

بنان

سمعت صوته والعبره والشهكة بصدري متروح اريد اجاوبه ما اكدر ..

حسن : بنان تسمعيني ..

بنان : اسمعك ..

جريت نفس ..

حسن : شلونج يا من بعدج ما عرفت شلوني .

بنان : فدوة لتزيدها عليه تره تعبانه كلش ..

حسن : ما الومج بس ارجع واكلج الصار من ايدج بنت العم ..

بنان : اخ خ خ خ كل يوم اعض اصابعي العشره ندم وما تطفى نار كلبي ، شسوي حسن ..

حسن : من اي ناحيه شتسوين مافهمت ..

بنان : اريد اخلص منه شلون اريد اهلي يسامحوني اريدك انت تسامحني ، والله انظلمت وهو اذاني هواي وجنت غبره وما افهم جنت نايمه وهسه صحيت ..

حسن : مرات من نحلم حلم نتمنى منكعد منه هلكد ماحلو ، بس للأسف بسرعه نكعد ونرجع نام علمود نكمل الحلم ، وللأسف منحلم مثله يجي حلم جديد ، بس الكابوس شكد ما نريد نصحى منه منصحى لان هو كابوس ويخنك ويضيق الصدر، وهذا حالي وحالج ثنينه عايشين بكابوس ، بنان صميم عباره عن جاثوم ، وراح يخنكج ويأذيج ويمكن حتى ميخليج ترجعين تنامين وتحلمين حالج حال البشر اتعوذي منه واصبري على ما ربج يفرجها عليج ..

بنان : كاعد يأذيني ويجبرني على شغلات ما اتحملها ..

حسن : مثل شنو؟؟؟

بنان : مو كلشي اكدر احجيلك ، كل اللي اكدر اكوله الك كاعد يتفنن بعذابي ، يستمتع من يسمع البجي مالتي بليل ، حسن اني كاعد اموت بطيء..

حسن : شبيدي عليج فهميني لا اهلج يريدوج ولا اهلي ، ولا اني ، بس اكو واحد يريدج بعده ومتعلق بيج..

بنان : منو ؟؟  حجيتها وبجيت تصورت راح يكلي ابوج ..

حسن : كلبي الاعمى الوحيد ينوح عليج ..

بنان : اني غبيه وفرطت بيك وبكلبك ، ليش هيج سويت ما ادري المشكله القاهرني انت حبك من النوع الخالد حبك مقدس ، لو بس يرجع بيه الزمن قبل سنتين اوف ياحسن كلبي مورم ...

جر حسره وكال ..

حسن : انتي على الاقل حبيتي وتزوجتي ومجنت على بالج اويلي عليه اني ، من يوم يومي اتمناج وانتضرج..

بنان : عوفك من الحجي بعد ميفيد فدوة لتزيد همي كاعد اخذ جزاتي واتعاقب كلش زين ، اريد أسالك محد من اهلي سأل عليه مجابو طاريي محن كلبهم ، همه شلونهم فدوة سولفلي ..

حسن : محد حن عليج وكل ما ينذكر اسمج عمي يتعب لهذا الكل يتجنب يجيب طاريج وكلهم زينين بس مو بخير ، تعبو من وراج ، اولهم عمي نام مستشفى وضغطة يوميه معلك والكل حاير بوضعه الصحي يعني انتي اخر اهتماماتهم ..

بنان : حتى انت ..

ضحك جان يكول..

حسن : ومن يمته يهمج حسن وبشنوا يحس وشصاير بيه ، لو اكعد اعاتبج صدك ابجيج دم بس ساكت وضامها بكلبي والضمه توجع .

بنان : مو ذنبي والله مو ذنبي ..

حسن : ذنبج وله مو ذنبج النتيجة وحده كسرتيني..

بنان : اني هم انكسرت وكسرني صميم ، تعرف شلون يعاملني برود ويحرك دمي ويتقصد بأذيتي ..

حسن : لان بسهولة حصلج لهذا هيج كاعد يسوي بيج .

بنان : شلون يعني ؟؟؟

حسن : الرجال تمر عليه اشكال نسوان عشرات بل مئات الحلوه والموحلوه والمؤدبه والشريفه والعكس ، من ذني كلهن ياهو التبقه اباله ومستحيل ينساها ،المرأة الصعبه الحارب ومكدر يحصلها ، ومينسى المرأه الجانت بين ايده ومحافظ عليها وضاعت منه بسبب اهماله وسوء تصرفاته ، الرجال اذا ردتيه مينساج اقهريه ...واتمنى وصلتج الفكره صح ..

بنان : هاي جزاتي حبيته وجنت طوع امره وتغيرت علموده وحتى تحجبت بعد شسوي كلي وفوك كل هذا اذاني .

حسن : شوفي اذا شخص غريب دخل حياتج وراد يغيرج المفروض متقبلين ، ليش لان اليحبج يحب شخصج انتي يحب عيوبج قبل مميزاتج ، اذا اجه ولكاج سافره او عنيده او لحوحه اوووو الخ ، ابقي مثل ما انتي ويحبج بكل صفاتج ليش تغيرتي ...اني كرجال اذا حبيت بنيه احبها على الاشياء والصفات الشفتهة بيها اول مره، ليش عجبتني وجذبت انتباهي غير علمود صفاتها وشكلها ، اصلا اني ما اسمح لنفسي اغيرها اني هذا طبعي بقيه الولد شنو ماعرف...

بنان : يعني الاعرفه البنيه من تصير سهله ولينه ، راح يحبها زوجها ويتعلق بيها ..

حسن : اكو فرق هواي ، اني مكاعد اكلج اذيه لو تصالفي وياه لا بالعكس انتي عملتي با اصلج بس الاريد اوصله الج من خلال معرفتي البسيطه بطبيعه زوجج وحسب الحجيتيه اليه بعد طلاكج ، استنتجت  صميم من النوع  ميحب البنيه الضعيفه وتصير مثل اللعابه بين ايده وشنو يكللها تكله اي وهو شاف ضعفج واستقوى عليج ،لهذا يتركج بكل فرصه لان انتي ضعيفه وحرمج من هواي امور وقبلتي ودستي على كرامتج هواي في سبيل ترضيه وشاف ماعندج رأيي ولا قرار يخص حياتكم ويخون بكيفه وترجعيله ، فتركج ، وارجع واكلج الرجال مينسى اثنين بحياته ، المرأة الصعب يحصلها والمرأة الما كدر يحصلها والمرأة اللي تقهره مثل حالتي اني ، مستحيل اكدر انساج .كلشي صعب وبعيد عن العين يتمناه الكلب والعقل وكل جوارح الانسان ..

بنان : والله صح كلامك كله  ...

حسن : بنون .

بنان : نعم

حسن : يطيب شما كبر جرحك ، حزن فتره وترد تضحك...

بجيت وكمت اشهك بعدين كتله..

بنان : حسن فدوة اروحلك ما اعرف اتصرف اريدك تصيرلي سند لتعتبرني بنان بنت عمك وانت حبيتها وغدرتك ، اريد تعتبرني روند اختك وساعدني ..

حسن : احجيلي المواقف واني اساعدج ..

_______________________

flash back
يلا نرجع لقبل سنة .....

جراح: ليش اللي عنده مثل رجلج يشوف الخير

بنان : ليش شنو سوه صميم ..

جراح : من وصلتج لحور رجعت للبيت كلت اخليج براحتج ومن تتصلين اجي ، انه جنت ناوي اخليج اكثر فد من اجه وعرفج طالعه وهو مايدري سوه هوسه وحرك البيت الاغبر ..

بنان : اووف شلون جراح اخوك مراح يخليني ارتاح .

جراح : ولا احنه راح نرتاح ، المصيبه مايتوب اله اكتله وخايف لا بيوم اعصب واخلي طلقه براسو ، من صغره شالع كلبي ومدلل، اجي احاسبو ،اريد اعلمو الصح من الغلط، الكه ابوي بوجهي ، واكف بضهرو مثل السيف ، لا تحجي وياه ولا تحاسبو عوفوو، اللي يشوف ابوي بذاك الوكت يكول محروم البزرة ، ولحد اليوم  توني تعاركت وياه ، كتله صوجك انت وصلتو لهذا الحال وخليتو يتمرد علينه  ويركب راسو...

بنان : المشكله هو مدمن للعادات اللي هو تعود عليها وكبر وشاب على هالشي ، بصعوبه نخليه يقلع عن افعاله او يتراجع او يتغير ، الانسحاب افضل الي ولا اكمل ويه اخوك واعيش باقي حياتي ضيم وقهر ..

جراح : انه استغربت استعجالو على موضوع الزواج وشلون جان فرحان ، كتلو يابه هذا زواج وبنيه واهلها وكذا مو لعبه من لعباتك لا تورطنه ، انت دوم تكلي الزواج قفص وسجن وانه ما انحبس ، عجل شغيرك بيوم وليله لا تستعجل فكر زين ، ودك رجل اله الاسبوع الجاي المشيه وهاي شوفة عينج افعالو التفشل  ...

بنان : والله لو احجيلك شلون سايسته وشلون وياه وياه بكل خطوة تصفن وتكول معقوله هلكد متحمله مزاجيته الطفوليه وساكته اضربلك مثل ،،،،

مرات من اشوفه مضطرب وعصبي ، اعوفه يهدأ ارجع احجي وياه بعدين، ما اعرف من شنو هيج صار لو شنو الموضوع اللي خله  اعصابه ترجف ، انعزل عنه اروح لمكان ثاني افكر وارتب الكلام يلا احجي وياه لان بكل كلمه يخلي ان بيها متقيده وياه واحسب حساب لكل كلمه اكولها اله خاف يفهمني خطأ، مرات من اشوفه هيج اسأله شبيك ينتر ويصير عصبي وتلحين وخبلتيني ، من كمت اتركه يكلي ها لا تسألين شبيه مابيه حقج ملتهيه ، خبلني والله تجي ايام ابجي دم من وراه ...

جراح : الله يعينج ويعينه عليه ،كومي يابه ننزل ..

نزلت وهو صف السيارة جان الباب مال بيت عيالي مفتوح اول مدخلت لكيته بالحديقه ، واكف ويدخن ، شافني ضيق نضرته واجه يمشي بهدوء ..وصل يمي ..

صميم : وين جنتي ؟؟؟

بنان : يم حور ..

صميم : وانه عندي خبر لا ..

بنان : مبين من رده فعلك ماعندك خبر ..

كتفت ايدي وحجيت مستهزئة ..

صميم : ومن سمحلج تطلعين.

بنان : اني حرة نفسي بكيفي وين ما اروح اروح ، عود من اصير زوجتك ذاك الوكت تحكم بيه ..

صميم : هااا حره نفسج ومو زوجتي ، شرايج ارجعج زوجتي وهسا وبلا عقد شيخ ، وهذا خشمج اكسرو ..

مخنزر ويحجي ، فات جراح ..

جراح: هيووو شبيك ، عوف البنيه يزي كونه موتتنه ..

صميم : انت عليش تتدخل بحياتي وزوجتي ، ترضه انه اخذ زوجتك وافرفر بيها بدون علمك ..

جراح : اول شي هي مو زوجتك ، والشي الثاني انه اختلف عنك لا تقارن ..

صميم : عجل كلمن عليه بنفسو وبعائلتو ، هلمرة حذرت مرة ثانيه ، اكسر رجلها اذا عتبت باب البيت وانه ماعندي علم ..

جراح : ذيج الساعه تلكاني بوجهك .

صميم : انه كلت حجايتي كصاد حجايتك ، لا تلومني بعدين ، لان ساعتها لا انت ولا الاكبر منك يوكفون بوجهي ..

تقدم جراح راد يضربه وكفت بينهم ...اتوسل بجراح يعوفه ...

هو يصيح وصميم يصيح ..

جراح : لك انت سكط من يوم يومك شالعو لكلبي وعالو فد مو صوجك صوج ابوك..

بنان : فدوة عوفه الله يخليك ..

صميم : صعدي فوك انتي وحسابج بعدين ، اروح بشغله وارجع ، انه الج..

طلع وركع باب الشارع حيل ..

التفتت لجراح ، يرجف من الاعصاب ..

بنان : اعتذر منك اني امسحها بوجهي .

جراح : والله عمي احنه نعتذر منج على هاي الزيجه الكشرة مو انتي ، فوتي يابه ارتاحي ..

جر نفس طويل وطلع ..

دخلت للمطبخ لكيت مسره واكفه وايدها على خدها صافنه علينه ..

مسرة : حبيبه هذا رجلج شكلبو ، مو جنتو مثل السم على العسل ..

بنان : سكتي وخليها تفرعن عليه موتني والله ..

مسرة : انت متعرفينه هذا طبعو من اول ، حت عمي راد ياخذولي من اخواتي ولا وحده رضت عبن نعرفو ، مدلل وشايف روحو  ، وهو وبس ..

بنان : حبيته حتى لو جنت اعرف طبعه هم جان استمريت بس متوقعت يغدر بيه هيج ...

مسرة : احجيلي شلون تعارفتو وشلون حبيتو بعض..

جريت حسره وكعدت على الكرسي وهيه هم جرت كرسي وكعدت ..

بنان : بنيه بدايه عمرها ممجربه الحب قبل ولا اعرفه شنو ، صادفته لصميم بموقف مو حلو وصارت عركه بسيطه ، صديقتي ضاجت وحبت ترجعله الاهانه ، من هذا الموقف خلاني اباله ، تراهن يجيبني للطريق ،

جريت حسرة .. واسترسلت ،

حياتي جانت هادئة اقتحمها غفل دخلي بشكل غريب ، بحيث اثار فضولي وبكل مره يحاول يلفت بيها انتباهي اله ..

مسرة : شلون يعني جان شيسوي ..

بنان : مثلا يصعد لشعبتي ، يكتب بدفتري اشعار ويخليلي وردة ويرش عليها من عطره الخاص، لو يكتبلي على السبورة احبج ، استمتعت بهاي الشغلات اللي جان يسويها ،حسيت روحي عايشه بداخل روايه من الروايات ، حبه جان بمثابه كنز ثمين الي ، احتفظت ب ابسط التفاصيل اللي جان يسيويها الي ، او يهديها ، انعجبت بشكله وهيأته اسلوبه ، وحبيت مطاردته الي ، فرض شخصيته عليه من الاول ، وللأسف محى شخصيتي وجنت فرحانه بهذا الشي انو هو رجال القوي واني الانثى الضعيفه اللي تتخبة جوة جناحه ، بكد ما جنت اكره التقيد ، واكره واحد يتسلط عليه وعلى حياتي واكره شي اسمه عادات وتقاليد ، بس من صميم حبيتهم ، تغيرت علمودة
عشقت سلطته عليه حبيت تكبره وغروره بنفسه ،يمكن تكولين مخبله ، بس اني هيج ، جان من يحجي ويايه بالموبايل اسرح بصوته احب اسمعه اريده يحجي وماريده يسكت ابد ، حبيت نبره صوته ، كمت اقره رسائله بصوته مو صوتي ، كل مره اشوفه جان كلبي يطلع ويركض يحضنه احب عصبيته ومزاجيته ، احبه من يضحك ، حبيته بكل فصوله ، بصيفه وشتائه بخريفه وربيعه ، جان يكذب عليه واتغاضى واسوي نفسي ماسمعت حتى ما اخسره ، هواي ذليت نفسي وهنت كرامتي وللأسف بالنهايه سوه اللي يريده ..

مسرة : اوووف هاي شكد تحبيه عجل انتي ما كارهتو مستحيل ..

اشرت براسي لا ..

مسرة : مبينه اووف الله يساعدج ويصبر كلبج ويهديه عليج ..

بنان : اني ما اكره مو من طبعي الكره ، اني للأسف عدوي اعرف بيه يكرهني وما اكدر اكرها ، عاد حبيبي وجان بينه عشره، بس مع ذلك مستحيل ارجعله ،اني هنا فتره يهدأ الوضع وارجع لبيت اهلي ..

مسرة : ان شاءالله وكل احنه وياج ، لانج طيبه وحبابه وما تستاهلين الصارج ..

بنان : فدوة لكلبج ، اروح ابدل وانزل نبلش بالعشى ..

مسرة : عليش تعبين روحج انه اسوي متعلمه ..

بنان : لا خير في يد لا تعمل ، هههه ..

مسرة : عجل تعالي هههه..

صعدت فوك سبحت وبدلت ، ونزلت ..
لكيتها تكشر باذنجان ..

بنان : شنو راح تسوين ..

مسرة : ملفوف باذنجان و وياه كباب بيت ، وكبب وزلاطه ..

بنان : هذا هو نعمه ..

جرت حسرة واستمرت تكشر ..

بنان : شبيج ليش من اجيت لحد الان انتي حزينه وضايجه ،جنتي بس تضحكين من اروح لحد ما ارجع الضحكه متفارك وجهج ..

مسرة : مو هو اكثر انسان حزين ومتأذي ، تلكيه يضحك ، علمود ينسى المه يخفف جرحه ، من تشوفيه تكولين نياله هذا لا هم ولا غم وسعيد والله سبحانه وتعالى كلشي رازقه ، فد ما يعلم بالمضموم اله المهموم ..

بنان : اكدر اساعدج بشي احجيلي ما اقصر..

مسرة : محد يكدر يساعدني فد رب العباد ..

بنان : والنعم بالله ، اني ابالي ، سالفه الاطفال صح ..

هزت براسها ب اي ودمعت عينها ، بهاي الاثناء فات جراح شافها تبجي لو تخبل عليها ، اجاها ركض حتى نسى اني موجودة ، وكف كبالها ويحاجيها بلهفه ...

جراح : ول حبي شبلاج عليش تبجين ، شنو المكدر خاطرج ..

يحجي وعيونه كلها قلق ..

مسرة : اريد اصير ام وافرحك .

جراح : رجعنه كتلج انه ماريد جاهل انتي عندي بنيتي ومرتي وحبيبتي وصاحبتي ، يول انه ابنج مكافي ..

ضحكت وعيونها مليانه دموع ، حضنها حيل احسه يريد يدخلها بكلبه .

رغم الموقف الكدامي حزين ، بس شكد فرحت الهم وبنفس الوقت تمنيت زوجي مثل جراح ، جريت حسرة وكمت طلعت بالطرمه ، علمود ما احرجهم ، التفتت باوعتهم من الشباك شفته باس ايدها وراسها ، نيالج شكد يحبج لعد وصابر عليج بدون اطفال صارلكم سبع سنوات ،غيره واحد اول سنه ويضل يتحجج عليها ويسمم عيشتها ، دعيت من كل كلبي يديمهم سوه ويملي حضنهم اطفال، لان يستاهلون ، واكيد اطفالهم راح يربون بجو اسري مليان حنيه ..

رحت ورة البيت كعدت يم الزرع وتجيت راسي على الحايط وافكر ب اهلي وبحالهم ، اخابر على البنات محد يشيله ماعرف مانعيهم حتى يعاقبوني لو همه ميريدون يحجون ويايه ، ورة ساعه تقريبا صار العشا وصاحتني مسرة متدري بيه وين كاعده بس تصيح بنان وين صرتي صار العشا ..

كمت نفضت ملابسي ودخلت جوة لكيتها تنقل بالاكل ساعدتها ، واسمع عمي يحجي ويه صميم يكله صبينه الاكل ، ماعرف شنو جاوبه ، بس عمي كله لتتأخر هواي وسده ..

كعدنه ناكل واني بالي يمه وين راح ، يعني ليش جابني وليش هيج كاعد يسوي راح يخبلني والله، وصلت مرحله اذا سمعت بطاريه معدتي تكلب ، مكاعد اطيق وجوده ، كملنه عشى ورفعنه السفره غسلنه المواعين ونظفنه البيت والمطبخ ، عيالي بيهم عاده التنظيف مرتين ورة الغده و وره العشى رغم ماعدنه اطفال اتوصخ والبيت يلمع بس عمتي هذا طبعها وكلنه نتساعد حتى هيه هم ويانه ماعدها تفريق بين بنيه وجنه اذا تريد تحاسبنه كلنه مو ناس وناس كلش تخاف الله ،لهذا احبها اني ..

كملت كلشي سبحت وصعدت مشطت شعري ، رطبت جسمي ، وتعطرت ، رحت طفيت الضوه وعلكت التلفزيون ، وتمددت ، كمت اتفرج واندمجت ويه الفلم ، مادري بنفسي نمت ، فزيت على صميم يدحس نفسه ورايه ، كعدت مخروعه وعلكت التيبلام ، غمض عينه تعبير عن انزعاجه من الضوه...

كمت وكفت ، وهو نضراته تتفحص كل جزء بجسمي .
رحت لبست الروب ورجعت حجيت وياه ..

بنان : شعندك هنا ..

صميم : هههههههه ، ضحك بكهكهة ..

بنان : محجيت نكته كتلك شعندك هنا ..

صميم : ناسيه هاي غرفتي ..

بنان : زين لعد اني طالعه وانت اشبع بيها .

اخذت مخده وردت اطلع ، كام ركض كدامي وسد الطريق عليه ...

صميم : اذا عتبتي الباب اكسرج ..

بنان : انت شبيك بس تكسر ، متزوجه كصاب اني وما ادري بروحي ، شو وخر خليني اولي انخمد نعسانه .

صميم : مكانج يم رجلج واذا خالفتي تعرفين شلون اتخبل عليج ماله داعي اشرح ..

بنان : تخبل شتسوي سوي خايفه منك اني .

صميم : تعوذي من الشيطان ورجعي نامي بفراشج .

بنان : ههههه اول مره شيطان يطلب من الناس تتعوذ منه ..

صميم : جنتي تموتين على لمساته والهمس ماله ، اذكرج لو نسيتي ..

بنان : لا مناسيه ، جنت بمعصيه وتبت ...

صميم : هسا صار حبي معصيه ..

بنان : وكبيرة من الكبائر ..

صميم : باجر نروح نعقد وارجعج على ذمتي ..

بنان : ماروح منا لهنا ، تحلم اخطي خطوة وياك خارج البيت ولا ارجعلك ولا اسمحلك تلمس شعري مني ..

صميم : يول لازم عاجبج الحرام ..

حجاها ويتقرب مني ..

بنان : الحرام يمك وبس ، الله يبعدني عن المحرمات وعنك وعن امثالك ، اطلع بره لا اصيح صوت الم اهلك عليك ..

جر نفس وحجه ..

صميم : عليش وصلتينه لهاي المواصيل ..

بنان : مو اني انت وصلتنه لهنا ب افعالك وتصرفاتك ..

صميم : انه لو انتي وانانيتج ، تخابرج زها تكلج مريض ونايم بالفراش وانتي ماهزج شي بنان انتي لوعه كلبي انتي حلم سنواتي الضاعت مني ، احبج والله ...
بشنو تريدين احلفلج بهاي الثلاث اشهر اللي هجرتيني بيها حسيت روحي شخت فجأة عبالك صرت كهل عجوز ،كبرت بفراكج قرن والله ياحبيبتي ،هاج شوفي شعري شيب من قهرج ، واللوعه اللي عفتيني بيها ، انه اعمى جنت وهسا صحيت ....

باوعتله وهزيت ايدي ..

بنان : انت كل عقلك جاي تحجي ويه ذيج بنان القشمر اللي تغفى على صوتك وتموت اذا متحاجيها ، صميم انت تعرف حجم خسارتي لو لا ، تعرف اني خسرت اهل ، مو لعبه انكسرت ، وتروح تشتريلي غيرها وتراضيني بيها ،بسببك وبسبب رعونتيك وبسبب اندفاعاتك الطفوليه خسرتني اهلي ، واللي صارلك واللي راح يصيرلك من ايدك وعساك ابو زايد ، وياربي تشعل بيك نار مثل نار كلبي ويعوضني عنك بالخير ويخلفك بالتلف ..

تقرب ولزمني من وجهي وعصره ، كز على اسنانه وحجه ..

صميم : زين ، سمعتج انه ، اجه دورج تسمعيني ، نوم بره هاي الغرفه ماكو ، تنامين يمي ، عقد اعقد عليج وارجعج على ذمتي ، واله اندمج على كل حجايه حجيتها ، عبالج انسى ، كلها انحفرت هنا ..

يحجي ويأشر على راسه ..

دفعت ايده مني وحجيت .

بنان : اعرفك مكار وحقود ومتنسى واني تقصدت اكلك هذا الكلام واخليك تسمعه مني انت وصاحي مو سكران ، حتى تعوفني وتجوز مني ..

صميم : ماعوفج لو يجي اكبر واحد ، وبعنادج حت لو ماريدج حت لو اتزوج انتي على ذمتي ، واخليج خدامه الي ولجهالي ، وكولي كال صميم ..

بنان : شتسوي سوي ميهمني ..

صميم : نامي هنا وحسج ما سمعوو ..

راح مدد على القنفه واني رجعت نمت على الجربايه ، بس شنو اطحن بروحي طحن اكبت بكلبي احس روحي راح تطلع فد يوم ...

____________________________

روند
كاعده اكلب بالفيس اجاني اشعار رساله ، موجوده بطلب المراسلات ..

فتحتها ، حساب مبين جديد ، خال صورة مال شيوخ ، اني ابتسمت لا اراديآ ، كلت هذا يعرف احبهم واجه عليه ، ضحكت وعفته مجاوبت لان داز بس👍 ...

كمت اشتغلت والتهيت عن جهازي بليل ، دخلت على الرسائل والكاه دازلي ..

💬

اريدج تكونين هادئة وتطلعين لمكان هادئ وتتنفسين بعمق وغمضي ..

،،، ضحكت كلت هذا شبيه خبل ..

دزيت ..

💬

هاي شبيك شنو حضرتك روحاني ؟؟

💬

انه اسوي تخاطر وعاجبني اسويه وياج ..

💬

ههههه اعرفك تعرفني والله يالله

💬

ممكن انتي ماتعرفيني فد انه اعرفج زين ..

💬

اكلك عفيه مالي خلك هاي السوالف تره

💬

هاي شبيج انطيني فرصه ..

💬

وين كاعدين بمدرسه والله بطران هاك بلوك انت والتخاطر مالك ..

نطيته بلوك ، وصورت سكرينات للمحادثات ودزيتهن لكروب مال جامعته احنه خمس بنات ، اني وقمر وبعد ٣ ، بيومها اشتغل التصنيف للصبح بحيث عيوني دمعت من الضحك، بس الصار الصبح ، اراسل قسور ميرد ادك ميجاوب لو ينطيني مشغول ، عفته كلت هو يرجع يراسلني ، وضليت هيج يومين لا دز ولا هو يجاوبني ..

_______________

حور

الايام تمر ثكيله عليه تعبتني ، والاكثر اشتياقي لعمر جاي يزيد يوم بعد يوم ، اللي قهرني ولا مره كللهم اريد احاجيها من يتصل ،،
ماعرف يعاقبني لو يعاقب نفسه اعرف بيه هو هم يشتاقلي بس يكابر ، لا يكابر شنو اصلا عمر مو هيج طبعه ابد ..

وبيوم سمعت هوسه وصياح جوة هبطت عبالي عمر بيه شي نزلت مثل المخبله اركض ، واشوف عمي واكف ويهدد وعمتي وحارث يهدأوون بيه شافني وهجم عليه ..

سب وغلط وفشار مينلبس عليه ثوب ..

حور : ليش الغلط فهمني وحده وحده ..

جسار : انه عايف هنا خمس ملايين ، ورجعت ناقصات مليون وربع منو غيرج ماخذهن ، سنين احنه نحط فلوس مطشرات شو ما نقصن ليش هسا ...

صفنت بوجهه مصدومه ..

حور : شتقصد ، خاف عبالك اني ماخذتهن ..

جسار : اي انتي خايف منج انه ..

حارث : يابه عيب هذا الحجي ، احترام لعمر مايجوز تتهم مرتو بتهم باطله  .

جسار : ما باطله ، هيه ماغيرها لو تطلع الفلوس هسا لو متضل بلبيت ...

الحجيه : حارث خابر اخوك خله يرجع هذا ابوك مايفك ياخه منها ..

حارث : هسا اخابره .

جسار : خابرووو خايف منو انه ..

كام يصيح ..

اسمع حارث يحجي ويه عمر يكله ..
تعال واكعد يم مرتك ابوك عرف انت ماكو بلبيت واستغل الوضع....

حجت الحجيه ..

الحجيه : كومي يوم صعدي لغرفتج لبين ما يرد زلمتج ..

جسار : ما تصعد ، هساع تطلع الفلوس لا اطرها طر بمحمد ..

حور : تايهتلك اني وتورني ور مدري طررني والله ياربي مضل عليه بس الشاخطين ..

جسار : عليمن بنت الكلب انعل تربيتج لابو الخلفج .

حور : سب بيه للصبح وداعتك ما انغث بس جفيني شرك ، لان انت وابويه نفس العملة ..

جسار : منين من يازباله ابني جابج ولفاج ...

حور : نفس الزباله اللي انت اجيت منها ..

وعفته وصعدت ، ضليت ادردم ، انعل ابوك لابو التسكتلك كافي عاد بزعت ..

قفلت بابي وكعدت والله بس  يرجع عمر اله اسويله هوسه خلي يسطبر ...عايفني يم واحد خبل وشاخط بنص عقل ، يريد يبليني ، الخايس لك انت ربع دينار ماكو بجيبك منيلك خمس ملايين ابو الوصخ ..

افتر بغرفتي وادردم وكلبي ميبرد ...

مرت كم ساعه واني دمي يغلي ..

لهناك واسمع صوت عمر اجه ....

_______

رونق

سنان: عوفيها كتلج اني اكمل غسل الطرمه ..

رونق : ترة خنكتني شو تسكيف وسكفتها وهوى الله وحارمني منه شتريد يعني مني ، عوفني تره اهج منك ومن الدنيا كلها..

اخذ الصونده من ايدي وشمرها بالكاع وحضني ..

سنان : اغار عليج من الثوب اللابسته والله ، حبابه لتلبسين تراكات بلبيت ولا ملابس قصيره ، لبسي دشاديش وردان ...

دفعته حيل ..

رونق : ههههه صدك تحجي لو تتشاقه .

سنان : لا صدك احجي وهذا اللبس بعد ماريد اشوفج بيه ..

رونق : بابه بيتي هذا والبس اللي يعجبني شدخلك انت هم حاره وسمط وهم تريدني اتكمط بالهدوم ، سنان زودتها ترة وصبري خلص ، على ساعه واعوفلك الجمل بما حمل ، واهج ، اني شنو اللي مبقيني يمك غير ضميري اللي يوجعني عليك ، لو غيري وحده متبقالك دقيقه ...

لزمني من متوني وكام يهز بيه قوي ..

سنان : اي كولي اريد اتطلك منك واشوف واحد ثاني واتزوجه ، مافيدج مو ، شفتي نفسج عليه لان اني صرت انسان عاجز ..

نترت ايدي منه وبجيت ..

رونق : ولك انت كرهتني بالزلم كلها، اني اتزوج بعد امداني ، ولك سنان موتتني انت، كل عمري ٢٥ سنه شفت قهر وضيم وياك كبرني سبعين سنه ، لو تعوفني اروح لاهلي ، لو تجر عدل ويايه وهذا اخر كلام عندي ..

عفته ورحت دخلت للحمام ، فتحت الدوش ودخلت بهدومي ابجي واشهك ...ضليت ساعه تقريبا ..
كملت لبست البرنص ولفيت شعري بالخاولي وصعدت فوك حتى ابدل وانصدم بمنظر وكف شعري راسي ..

يتبع ....

حسن👇