علاقات زائفة

البارت الواحد والاربعون

حسن

تجين نعقد صفقة؟؟
اني احجيلج عن جروحي
وتضحكين ويطيب كل ألم بيه
___

مدري شكالي وطبيت
وأهلي استغربو لوني

______

حور

شباقي مني
وانت كلشي البيه اخذته
منين ما باوعلي انت
______

عمر

حي
فد ميت من الشوك

______

صميم
اريدنك
طبع كاروك
من يبعد يرد بساع اريدنك

______

بنان
افرح واماشي الناس حك دنيتي تريد
بس ما يطفي الضيم سبعين الف عيد

________

حور

من اني وصغيرة اخاف من السعادة ، من افرح اخلي ايدي على كلبي ، لان اعرف راح الجم ..

من حبيت عمر وتزوجته ، حسيت بشعور ساحق من السعادة والبهجة ، كلت والله ياحور انتي بنعيم ..
الايام القليله اللي قضيتها ويه عمر ، حسيت بس اني وهو بهاي الدنيا بحيث الكل اختفى ، ميهمني اي احد ولا يأثر بيه كلام غير كلامه ، الى ان اجه اليوم اللي فقدت بيه نفسي وعرف عمر حقيقتي اللي هو فهمها يعني حقيقة زائفة
اني حقيقتي مو هيج اني انظلمت وتأذيت وانغدرت حالي حاله هو هم شنو ذنبه اول زواج اله وينصدم بعروسته مو باكر ..

اصر عليه احجي بس من باوعت لعيونه حسيت شنو اكول مراح يصدكني ، جان عباره عن بركان من الغضب الهائج ، لهذا التزمت الهدوء والصمت ، احنه اغلبيه البشر من نسمع موقف لأي انسان مر بيه او حادثه صارتله بسرعه نكول ليش محجه ليش سكت ، هو لو عايش موقفي وشايف بعينه مستحيل راح يكدر يحجي ..
مرات الحقيقة تأزم الامور وتصعبها اكثر من ما هيه صعبه...

اني من خلال كلامه ويايه عرفت مراح يصدكني ومو بعيده يتهمني بالكذب ، ما الومه بالنهايه هو رجل شرقي دمه حار على عرضه ، مغلق التفكير من هذه الناحيه ..

اوووف كل ما اكول هاهيه ارتاحيت وعدلت الدنيا كفوف ميزانها ، ترجع اشباح الماضي تطاردني ، الماضي مالتي شاق ومعقد ..وتضل الذكريات تجيني على شكل ومضات ، وتخنكني وتضيق عليه وسع هذه الكون ..

اشعر بأني في زجاجة ، احتاج ليد تمتد لي عن طريق الخطأ ، فترميها ارضآ لتنكسر وتخرج روحي مرفرفه كما كنتُ قبل ايام ..

_______

حور : راح ترجعني لأهلي ؟؟

عمر : عليش.

حور : حتى يكتلوني ..

عمر : عليش ادزج لأهلج الكدامج مو رجال ، هو يغسل عارو بيدو ..

انقهرت من كلمتة عبالك ضربني بكلبي تقربت منه وكعدت كباله بالكاع وهو على الجرباية ، خليت ايدي على ركباته،،،، رجله ترجف وشفايفة تنفض غضب .

حور : هسه صرت عار ليش عمر ، هاي عود انت تحبني وهيج تحجي لو متحبني شتسوي ..

نتر ايدي حيل من رجله ،،كز على اسنانة وكال ..

عمر : واذا احبج اتقبل خطيئتج هاا لو اتغاضة عن كذبج ، انه كتلج من الاول اكره ما اكره الكذب ...

حور : والله العظيم ما اعرف شلون هيج صار بيه .

دار وجها ...

كمت رحت وكفت يم ميز المرايا كام واجه وكف كبالي يهدد ...

عمر : استغفر الله العظيم ، ربي صبرني دخيلك وما ارتكب بيها جريمة، ولججججججججج وين اكو وحده ******* وماتعرف بنفسها هااااااا وييييين جيبيلج جاهل عمرو خمس سنوات مايصدك جذبتج يولي لو تحجين الصدك لو ..

اختنك مكدر يكمل ضرب ايده بميز التواليت تفلشت المرايا لان جنت واكفه قريب منها ، طلع بره الغرفه ..

ضليت صافنه لا بيه ابجي لا بيه اسكت ، بس  الأعرفه بيه صرخه لو طلعتها تهز جبال ...

كمت اتذكر الحجي مال عصام ..

اريدج ، تعجبيني ، ليش متنطيني مجال ..

سديت اذني وصرختتتتت كااافي
اسكت كاااافي ، على صوتي فات عمر ..

عمر : شكووو شبيج ..

يحجي ويايه واني ساده اذني واصرخ ..

حور : والله مظلومه اني عمر صدكني ، ماعرف شلون هيج صار بيه ماعرف .

عمر : هذا حجيج ما يعبر عليه ، و ما يأثر ، خسرتي عمر ، خسرتيه وللأبد ، وهاا خاف عبالج ارجعج لأهلج لا اذا ما خليتج تتندمين على الساعه الفكرتي بيها تستغفليني انه ما اتسمى عمر ...

حور : زين عندي حل ..

باوعلي مستغرب ..

عمر : اطربيني شنو بله ..

حور : اخذني لدكتوره وتكشف عليه بلكت اني طبيعتي هيج هواي سامعه بنات .... قاطعني .

عمر : ول حور لا تجننيني هاي سوالف البرا***** والتبريرات لا تحجينها كال دكتورة كال ، اخذ عرضي وافتر بيه ...

حور : شسوي لعد شلون اثبتلك اني مالي ذنب ولا اعرف شلون هيج صار ..

عمر : انه اعرف بطريقتي ومنا لذيج الساعه وجهج ماريد اشوفو ، لا تجين يمي ولا اوصلج ، من هاي اللحظه اعتبري عمر مات بالنسبه الج اذا عرفت الشي اللي انتي ضامتو عليه ..

حور : اني مصره اروح دكتورة وياك ويه عمتي اروح واذا متاخذني اروح وحدي ومتمنعني لان اني هم من حقي اعرف وساعتها والقران احجيلك كلشي يخص حياتي تمام..

باوعلي صفن بوجهي وطولت صفنته جر حسره وطلع ...

الليل كله مر مثل الزهر عليه عيوني ما اخذت نوم ابد ..
عمر ما اجه للغرفه ولا وصل ، اجتي بلاسم اخذتله ملابس وكالت راح يطلع للشغل ، نزلت اركض غسلت وجهي وسمعت صوته بغرفه الحجيه ، ركضت سويتله ريوك وحضرته ، اخذت وديته اله بالغرفه ، جبت طبله خليتها كباله وخليت الصينيه عليها ، توني التفتت اطلع سمعت صوت تكسر من اندار والكاه شامرالصينيه بالكاع ومتطشر الاكل والمواعين متكسره دمعت عيني ، هذا مو عمر اللي اعرفه تحول من شخص طيب وحنون ومحتويني الى شخص قاسي وعصبي ومطايقني ..

الحجيه : ليش يمه مو هاي نعمه الله ..

سكت مجاوبها ، طلع واني رحت الم بالكزاز ، اريد التهي حتى ما ابجي ويبين عليه والحجيه تنتبه ، رغم متأكده سامعه الصوت والعرك مالتنه مال البارحه لان البيت صغير لو واحد عطس فوك الجوة يسمعه ، بس هيه محبت تحرجني وعرفت طبعها متدخل ، ارتاحيت شويه من هاي الناحيه، التهيت بين عمتي والشغل ، بس بالي مشغول على عمر ، مرت الساعات ثكيله وقاسيه عليه، لليل عمر ماكو يتصلون عليه مغلق تخبلنه وين راح وين اختفى . كاعدين كلنه بالهول ، والكل يتصل حارث بلاسم بكر اجه امه خابرته ، طلعو دورو عليه محد يعرف عنه شي ولا شافيه ، اخر شي اجه ابالي صميم كلت اكيد يمه ..

حور: حارث تعرف صميم صديق عمر .

حارث : شلون ما اعرفه احنه رابين سوه ..

حور : خابره احتمال يمه لان همه علاقتهم قويه ..

حارث : فاتتني والله هسه اخابره..

اتصل على صميم دكتين ورد ..

حارث : شلونك يابه شلون صحتك ، الحمدلله كلنا بخير سؤال يالحبيب ، فد عمر يمك تعرف عنو شي جهازو مغلق من الصبح لسه ، اهاا شعندو بغداد لا ماندري ولا كال ، ها هيه عاشت ايدك في امان الله ..

بكر : هاا طلع رايح لبغداد

حارث : يكول عندو شغل هناك ومخابرو لصميم حت يروح يمو ، فد صميم عايف بيتو وهساع هنا بالرمادي .

همه يحجون واني كلبي كام يدك طبول خوف على عمر بس لا رايح لأهلي والله يكتلوه ميخلوه عايش تخبلت ضليت ابجي واهله يهدأوون بيه ، يكلولي هو على طول ينزل لبغداد على شنو خايفه ،حقهم ميعرفون شنو الصاير ..

_________________

روند

حددنه موعد المهر وطلعت اشتري فساتين ، بالطريق بنان نفسيتها تعبت وحيل تأذينه عليها كامت تبجي ، من رجعناها للبيت ، خابرت قسور وحجيتله على حاله بنان ، كلش انقهر عليهم كال حرامات صميم زلمه حوك ليش هيج ، مكدرت اتعمق وياه بالتفاصيل اكتفيت بكلمه ماكو نصيب ..

المهم ، هو كلي نأجل المهر لحد ما ترتاح بت عمج خطيه انتي تفرحين وهيه مكسوره ، اني هم أيدته بقراره وفرحت لان عندي رجال متفهم وكلبه حنون اتجاه الناس ، مو اناني ..
_________

بنان

مرت الايام عليه ب اصعب مايكون جذب الانسان ينسى الحب الاول ، لا ينسى ولا يتغير مكانته بلكلب ، صح كانت تجربتي ويه صميم قاسيه ، لكن عنده جوانب هواي حلوة ، وما اكدر انساها ، مثل ماعندي خانه للذكريات السيئه عندي مقابيلها خانه للذكريات الحلوة ، واني عشت وياه بالحلوة والمرة ، بس على كوله ابو المثل ، اشرب مر واكل المر ولا تعاشر مر ، للأسف صميم عشرته مره ..

هيج كضيت ايامي تجي ايام اضحك على مواقف مرت بينه واتمناها تنعاد وايام ابجي من مواقف اتمنى تنمحي من الذاكره ، الى ان اجه يوم واندكت الباب فتحتها ماما ، وفاتت ، صاحت بابا كلتله اكو ولد يريدك بالباب ، طلع بابا وره ربع ساعه رجع يفور من الاعصاب سألناه شكو ..

سالم : هذا صديق صميم ، دازه جابلج غراضج كلها بجنط ، وهاي الجنطه بيها فلوس يكول مال سيارتج اللي باعها ، وغراض البيت قسم ناطيهن وقسم بايعهن ومسلم المفتاح لأبو البيت وراجع للرمادي ..

هنا اني العبره لزمتني هذا بيتي اني رتبته واني اختاريت شغلات بيه جديده ضفتها فوك الاثاث القديم كلش كلبي تعلق بهذا البيت عكس الشقه لان مو على ايدي هو واهله جهزوها ، كلش صعبه بيت تبنيه بتعب وقهر وتالي ينهدم على راسك بيوم وليله واللي هدمه شريك حياتك، لزمت عده ، لان اقاربنه اكلو وجهي عيب وميصير وطلعي بس للضروره ، انجبيت وكعدت ، مرت الايام وخلصت العده ، بين سوالف نسوان اخوتي وبين اخواني اللي طيبو كل جرح بيه ، لكن مشفيت مجرد ضربه صغيره ترجع تنفتح كل هاي الجروح وتجري دم ..

زينه زوجه سيف صارت حامل وسوينالها ذيج الحفله التخبل ، لان صارلهم سنه ونص من متزوجين وما نرزقو هسه يلا...

__________

روند

خلصت العده مال بنان وحددنه موعد المهر
جنت كلش فرحانه طلعنه اني وياه وماما اشترينه الذهب واشترالي بدله مقبل أأجر ، والملابس والمكياج وباقي السوالف نطاني فلوس كال انتو بكيفكم اشترو اني مو مال فره ، تدوخني سوالف النسوان وعقلي يطير اذا انتضر وحده تشتري ، انتو اشترو وطلعوني عسما يوميه ماعندي اشكال ..

كملنه كلشي واجه يوم المهر كعدت الصبح سبحت ورحت للصالون ، ماما خلتلي لفات بالعلاكه الي ول بنان لان مشتهينه نتريك، اخذنه حسوني ، وصلنه ورجع للبيت يحضر ويه بابا للكعده مال رياجيل ، لان ماعندي بس هذا الاخ ويسوه الف من اخوه حور ، اللي فرحتي مكامله بسببها لا هيه تكدر تجي ولا رونق ملتهيه بزوجها الله يعينها تخابرنه وتبجي ، تكول لا بيه اعوفه يكسر خاطري ولا بيه استمر لان راح اتخبل واصير مثله ..

بين تفكيري وضوجتي ، كالت ام الصالون خلصت ، باوعت على المرايا تغيررر فضيع طلعت اجنن ، وبنونه هم سوت مكياج وشعرهة طلعت تملخ ...

كملنه خابرنه على حسن رجعنه للبيت طول الطريق عيني عليه شلون يباوع ل بنان بالمرايا ويصبصب عرك ، عرفت عجبته ، اويلي على كلبك شلون متحمل ومتحجي ...

اول ما دخلت هلهلن ماما وعمه اسماء والبنات واقاربنه كلهم جايين ، صعدت لبست ونزلت ، علكو ديجي والبنات يركصون ، وبنونه هم ، حسيتهة شويه شويه بدت ترجع للحياه ، اني بدلتي نفش بسيط لونها زيتوني وبنان ثوب ، احمر قاتم حيل راقيات طلعنه ، ساعه واجوي عيالي وقسور ، صعدوني البنات لبست السيت الابيض ونزلت عقدلنه السيد ، كلت نعم والهلاهل تركع ، والجكليت فوك راسي ، ،كومني البنات صعدت بدلت ، سألتني بنان على قمر ليش مجايه ، كتلها حسن مقبل اعزمها لان ميستلطفها ...

نزلت كعدت بالكوشه اللي اني والبنات سويناها بمساعده حسوني ...

شويه وفات قسور ، شنو من جمال واناقه ورزن ، عيون الاقارب اكلته اكل واني اقره ايات مال حسد ، صح هو مو كلش حلو يعني ملامحه عاديه يشبه اي ولد بس طوله وضخامته هيه اللي محليته وناطيته جاذبيه ..

اجه كعد يمي ، محجينه شي غير النضرات اخر شي كال ...

قسور : مبروك ..

روند : ليش تحجيها بخزره ..

قسور : الضابط ميصير يضحك ..

روند : اي عفيه ، اكلك ..

قسور : هااا

روند : خاف ياخذون ويانه صور اريدك متضحك .

قسور : ليش بله .

روند : حتى تبين ملامحك حاده ، ورزن وكذا ..

قسور : شلون تخليني اطمس راسها بنص الكيكه
شنو قصدج اني خفيف ولج ..

يبووو صار عصبي ..

روند : لك يابه ثكيل والنعم منك واني الممنونه بس لتوكفلي على الحجايه ..

قسور : ماشي هاي لان مهرج اليوم راح اعديها..

روند : شو مهري وانت.

قسور : يبوو روند مهرنه يلا ، شكد تدققين ..

ضحكت ، جابو الذهب لبسني واني لبسته حلقته ..

وكلني كيك واني هم وكلته ، كومونه ركصنه اني وياه هو مسيطر واني خجلانه ...

ماعرف بحكم شغله او لان متزوج قبل ، حسيته حيل مرتاح ...

خلصت الحفله والكل طلع ضلينه اني وياه ..

تقرب يمي، وصار قريب كلش ، ابتسمت ودنكت هو تنهد
اخذ الكلاص اللي جان على الطبله ، كلي شربي منه .

روند : ماريد توني شربت ..

همس

قسور : لخاطري ..

اخذته ارتشفت منه شويه ، رجع اخذه من ايدي وشرب من نفس المكان اللي اني شربت منه ..

ضحكت .

روند : عود شنو معنى هاي حركتك ..

قسور : معناها حبيتج من كل كلبي وصرنه واحد ..

روند : ممممم

رفعت ايدي خليتها فوك شفتي وضحكت كتله .

روند : احبك ولك ..

هو هم قلد حركتي خله ايده على حلكه وكال .

قسور : احبج ولج

تقرب اكثر وهمس احبج ، مرر اصابع ايده على وجهي ونزل على ركبتي وباسني ..

روند : هاي شنو.

قسور : شنو حبيبي ..

روند : يمعود شو كبل دخلنه بالعميق...

قسور : شتريدين لعد شسوي ؟؟

روند : غير بالاول نتعرف يلا اخذ عليك تاخذ عليه ..

قسور : لعد صارلنه كم شهر شنسوي نفلس باكله شو انتي مدري شلونج .

روند : ها يعني هسه احنه متعرفين بما فيه الكفايه ..

قسور : اي وعلي ابو الحسن ..

روند : سلام الله عليك ابو الحسنين مقصر من طلبتك منه .

ضحك من كل كلبه ..

روند : ليش تضحك بله ..

خصرت ايدي وحجيتها ...

قسور : ولج اول مره اسمع بنيه تطلب ولد من امام اني اللي اعرفه هو ينخي ويزور ويطلبها من الله ومن اهل بيته ، وحتى اذا سوتها البنيه متحجي تسكت تبيع ثكل..

روند : والله اني هيج ماعندي شي مخفي اللي بكلبي على لساني ماعندي لف ودوران ودغش..يلا هسه نرجع لموضوعنه .

حجيتها وغمضت عيني علمود يبوسني ، شو هذا متحرك ولا تقرب فتحت عيني لكيته احمر صاير من الضحك بس يضحك كتم بدون صوت ، ضجت ، عقجت حاجبي وكتله ..

روند : شبيك ليش تضحك هيه هاي الرومانسيه مالتك .

قسور : بعلي انتي تصنيف بالله ماشايف ولا راح اشوف مره مثلج..

روند : اي حبيبي اني مموجوده بس بالقصص وبعدين وين الغريب اذا قدمتلك عرض محبه ..

قسور : يعني انتي هيج بحياتج ماعندج حل وسط ..

روند : من ياناحيه قصدك ..

قسور : بكلشي،عندج هسه اول ما بستج كلتي ميصير ونتعود وره دقايق ولج حتى ساعه ما مرت غمضتي ومديتي حلكج ..

روند : والله حيره ، اني اللي اعرفه وقاريته البطله الجريئه هيه اللي تنحب وتاخذ كلب الرجال شو اني شسوي وياك يطلع عكس مدري حضي منحوس ..

قسور : هههههه لج بالنبي هلكد ما انتي تصنيف احسج صاحبي بالمركز ، حتى ماحس بيج انوثه وتغريني هاج شوفيني ابرد من الثلج..

صفنت عليه وخليت ايدي جوه حنجي وجريت حسره ..

عيونه لمعت وتقرب مني وكال ..

قسور : هاي الحسرة ذبيتيها عليه ..

روند : لا ،،،،،،،، حجيتها ولعبت حواجبي .

قسور : لعد المن ..

روند.: انت مو كلت احسج ضابط ويايه ، خيالي اخذني للمركز وتخيلت نفسي بنص نعمه الله يابه فلا اطلع من المركز ولا الفي بالبيت ..

قسور : تدرين شلون اني رايح ، ومنا لحد ما يرجع عقلج براسج يلا تخابرين وافكر لو اجي لو لا خلي يفيدوج الضباط ..

روند : عززة ليش صرت عصبي هو اني شكلت ..

جريته من ايده لان راد يطلع نترها مني حيل .
خزرني وكال ..

قسور : هلمرة حجيتيها بششششششششقه مره لخ اضربج راشدي وجهج اطيره ادبسززز ..

روند : عود صدك يعني شقه كلبته عركه ..

لزمني من متوني حيل ..

قسور : الشقه وحد والرعونيه والتمني للرياجيل وحد كاعده تتشهين براسي وكدام عيني كلبه ،الكدامج رجال لو ديوث فهميني ۔

روند : اسفه ومتتكرر .

قسور : لعبت نفسي منج والله وهاا ثقتي بيج تراجعت واي كلمه اسمعها عليج منا وجاي اصدك وبدون دليل..

عاف وطلع ..

فاتت ماما ، طيحت حضي رزلتني رزاله تسوه عمري طلعت سامعه الحجي كله ..

واسبوع حاضرني من كل مكان ....

_____________

حسن

صار دوري احجي عن نفسي ، اسمي حسن احمد
العمر ٣٠ سنه خريج كلية الهندسه ..
تعينت مهندس نفط ب احد مصافي بغداد ..

من اني وصغير شاغول واحب اعتمد على نفسي
ابد ميعجبني امد ايدي واخذ من احد فلوس او اي شي ثاني ، عزيز نفس بشكل ، اللي اريده احصله بتعب وهاي جبت حياتي تعب بتعب ، صح والدي ممقصر ويايه ، لكن ميلحك على سوالف البيت ومتطلباته الكثيره ، اشتغلت ودرست بنفس الوقت ، دخلت كليتي اللي جانت حلم من احلام حياتي والحمد لله حققتهة ..
اني شاب متوسط الشكل يعني لا فائق الجمال ولا محلو ، هذا الشاب العزيز النفس ذلها لاجل بنت عمه حبها حب عذري فطري ، انزرعت من هيه وصغيره بنص كلبه ، ضل يزكي بيها الى ان كبرت وتفتحت وصارت مثل الورده ضل سنين قريب يمها ويتمنى يشتمها ، وبنفس الوقت يخاف لا تخلص ريحتها ، ضل محافظ عليها علمود من يقتطفها تضل بيها ريحتها ، تأمل وحلم هوواي انو راح ينجمع بهاي الورده ، وبيوم من الايام تعين هذا الشاب والتهى عن وردته ، قصر وياها من ناحيه روحتها ورجعتها من الدوام لان هو هم طلع تعينه ، واشتغل شفتين في سبيل يحصل راتب ازيد علمود ياخذ وردته ويعيشها بنفس مستوى اللي هيه عايشته ، وبيوم رجع هذا الشاب من العمل وينصدم بخبر هزه هز وبالاصح دمره ، وردته اجه مستطرق غريب واقتطفها ، ضل الشاب يلوب ، شلون خاف يشمها وتخلص ريحتها خاف مايسكيها وتذبل ، عاش ايام صعبه متنوصف من بعد ما اخذو وردته وعافوله الشوك مالتها حتى الشوك مالتها اختضنه بحيث مزق نياط قلبه ، وبيوم سمع خبر انو الورده ذبلانه وراح تموت ، انتفض قلب هذا الشاب وركض الها نسى جروحه ونسى كلشي صارله ، راد يسكيها بأي طريقه علمود يرجعها للحياه ، بده بدموعه يسكيها ، ضل يبجي على بجيها تأذه عليها وانشلع كلبه هوواي..
وبيوم
جان راجع من العمل ، لكاها تبجي بهدوء وسكينه مثل عادتها ، ضل صافن عليها صح ذبلانه لكن نفس جمالها المعتاد ، هذا الشاب جانت النار مطفيه بكلبه وصايره رماد ، من شاف رجعت وردته ، رجعت اشتعلت هاي النار بكلبه وتحولت لحريق ، مشى الها ب اريحيه عجيبه تشبه اريحيه البرزخ من الموتى ينتضرون يوم الحساب ، تقرب الها راد يلمسها لكه بيها نار اشد اظراما من نار غضب هذا الشاب ....

يريد يضمها بنص كلبه ويطبع قبل على كافه وجهة ورقبتها ،قبلات حانيه ربما تكون اشبه بلدغه العقرب ،حتى يشبع جنونه ،،، من شده الاشتياق وتتجرع القبل منه بألم ساكن ، لا تنتفض ولا تتردد بل تبقى صامته مبتسمه متأوهه هذه احلامي وهذه اقصى مراحل امنياتي المستحيله ....

لكن وردتي هي القريبه البعيده ....

_____

جاي من الدوام وتعبان واتفاجئ ب بنان بحديقتنه
حيل صار ٣ اشهر مشايفها ، فرحت كلش واخذتني رجلي الها ...

حسن : هلو بنون هاي شنو تبجين ولج..

هزت راسها ب اي ..

رحت كعدت يمها اتندت ليغاد مني ...
كلت ميخالف اهم شي هيه مرتاحه ..
قبل جان قربنه غير شكل ، يمكن هسه لان عرفت مشاعري اتجاها كامت تتجبجب مني و تتقيد ...

اباوعلها ذبلانه وجوة عيونها محوفره وسوود...سألتها

حسن : شنو مجاي تنامين ..

هزت براسها لا..

حسن : ليش ؟؟

بنان : برأيك الصارلي قليل ..

جريت نفس طويل بضوجه وقهر كتلها ..

حسن : راح احجيلج شغله بس لتاخذيها بغير قصد ..

بنان : احجي حسن احجي عادي اتقبل ..

حسن :اسأله سؤال ، شلون تعرفين الانسان الي انتي مرتبطه بيه يحبج؟؟؟

بنان : شلون

حسن : اني اكلج شلون ،باعي الشخص اللي انتي تقتربين منه خطوة هو لازم يبادر ويقترب منج خطوتين ، اذا ضجتي وعصبتي وزعلتي وابتعدتي عنه ، هو يتقرب منج لحتى يرضيج ، واذا غبتي عنه بسبب ظروف مجهوله او مثل هسه صارلج ٣ اشهر مسأل عنج ولا حاول يتصل ، المفروض يبادر ويجي ويسأل بالقليل يتصل او يدزلج مسج ، اذا اخطأتي يعاتبج مو يغلط ويضربج ويهينج ويعوفج ايام ميحجي وياج ، ومهما يصير بينكم ميتحمل فراكج ولو ساعه وحده ، واذا هو خطأ بحقج يواجهج ميتهزم ،ويحاول يصلح خطأه ، واذا انتي خطأتي بحقه بقصد او بدون قصد واجيتي تعتذرين المفروض يقبل اعتذارج وفوكاها ابتسامه ،شريك حياتج المفروض من تغيبين عنه يحس بنقص ، ليش سموه شريك لان نصفج الثاني هو واذا غبتي عنه تاه وتأذه لان لو يملك الدنيا كلهة راح يحس بقيمتج وبوجودج يمه ، واهم نقطه من اللي ذكرتهن ، يشتاقلج لو الف وحده يمه لو كاعد بوسط جيش من النساء ، واهم شي بعلاقتج وياه ، يعاملج بحب كل ميشوفج كأنما شايفج اول مره من حيث اللهفه والاشتياق ، والاهم يحافظ عليج ويخاف ويرجف من خسارتج ، كأنما انتي الوحيده بهذا العالم وماكو غيرج ، اللي يحب ميعترف بالنهايات ولا يخوضها بتاتآ ، لان المفروض يزداد محبته الج كل يوم بدل ما تنقص مثل البدايات ....

حسن : تدرين جنت اتمنى اموت ولا اعيش بلا حضنج واضل طول العمر بعازه حبج ...هو شلون كدر هيج يفرط بيج مادري ...

كامت تبجي وتشهك خبلتني ، شلون اطيب خاطرها حرت والله ..

حسن : لج بنوش هيه فترة ويطيب الجرح وتنسين
والله ميستاهل دموعج ، لتبجين اشك اهدومي ..
بس رفعي راسج باعيني ، اسألج سؤال هو يستاهل البجي ..

هزت راسها لا ..

حسن : لعد عليمن مسويه بروحج هيج وكالبتها مناحه ، بنون فدوة والله كلبي يوجعني ، كافي عاد ، كومي نصعد يم روند ننصب عليها ، عود هيه مخطوبه وكذا هههه هااا تكومين ..

بنان

دمرني بحجيه يحجي واكول امداج ياغبره جنتي تريدين تعيشين علاقة حب يلا تتزوجين وعفتي الذهب اللي جان يمج ومحاوطج طول عمره ، استاهل كلشي صارلي من ايدي المفروض من اول ما كالي اني هيج وهيج ونطاني فرصه عشر ايام اعوفه بيها ، جان عفته وهو اصلا كرامته فوك كلشي وشايف روحه جان ملح عليه ولا توسل بس اخ كله الصوج بيه دليته بصواب كلبي وشاف روحه عليه وداسني ...

بنان : حسن اني ما ابجي على صميم ..

عقج حاجبه وهمس ..

حسن : عليمن لعد ؟؟؟

بنان : عليك ..

شنو صار بيه من كلتله هيج ، ابتسم ابتسامه ، من تزوجت لحد الان مشايفتها على وجهه لا والله من انخطبت ...اباوع شفته ترجف والعيون دمعت ..
يريد يحجي ميكدر ...

بنان : شبيك ؟؟

حسن : ممصدك والله ، عليج الله تحجين صدك لو تتشاقين ..

بنان : والله وداعه بابا احجي صدك ، واني من فتره اقارن بين اهتمامك بيه وبين تصرفات صميم لهذا كمت اتمرد عليه وانتفض ..

دك تليفوني اجتي عينه على الشاشه ، رفعت الجهاز شوفته الاسم ، قمر ، ماعرف ليش حبيت ابررله انو اللي اتصل مو صميم ...

حسن : لا العفو ردي اني راح ادخل ابدل ملابسي وصبيلنه نتغده سوة ..

بنان : تمام ..

راح واني رديت على قمر ..

بنان : هلو قمورة ..

قمر : هله بحياتي شلونج اخبارج ..

بنان : زينه واخباري نفسها..

قمر : خابرتج علمود نطلع والله ضايجه وطاكه روحي شنو رأيج نغير جو ..

بنان : شوكت؟؟

قمر : اليوم اذا تحبين .

بنان : ماعرف اشوف وقتي واردلج خبر ، روند تدري .

قمر : بلغتها وكالت تكول لقسور اذا قبل تروح .

بنان : ها زين لعد ..

قمر : هسه شنو اي لو لا ..

بنان : اخابرج ابلغج .

قمر : انتضرج ..

بنان : اوك باي .

قمر : الله وياج ..

راحت ، واني كمت حميت الغده عمه جنان مسويه مقلوبه ، رحت حضرت زلاطه وخضورات ولبن بين ميحمى الاكل ، كملت كلشي رحت للجدر لكيت الاكل حار طفيت الطباخ وصبيت ..

مديت راسي من يم باب المطبخ وصحت على حسن ..
كال جيت ..

خليت الاكل على الميز وكعدت انتضره ..

اجه مبتسم ، كعد ولزم خاشوكته ياكل وعيونه تلمع فرح ..

بنان : شبيك ؟؟

حسن : اول مرة اتغده بواهس .

بنان : صدك والله .

حسن : وداعتج جان الاكل بحلكي زهر وماله طعم ..

بنان : اووف ياحسن شكد تأذيت بسببي ..

حسن : يهون دامج رجعتي .

بنان : احب ابتسامتك الله عليك لتطفيها ابد ..

حسن : اذا انتي موجوده بحياتي حتى لو بس اباوعلج ، نضره وحده كفيله تخليني مرتاح وفرحان طول اليوم ..

بنان : تغده ابو نضرات الاكل برد

حسن : وداعتج اللكمه الوحدة وياج تشبعني اسبوع كامل ..

بنان : بالعافيه هههههه..

حسن : شنو اتصلت بيج قمر .

بنان : اي .

حسن : شتريد منج ، والله ممرتاحلها ..

بنان : ليش والله فطيره وعلى نياتها ..

حسن : والله ماكو غيرج فطيرة ، ولج زحفت عليه زحف ، فيس واتسب على الخط ، احضرها من مكان تطلعلي بمكان ثاني .

بنان : غير تحبك ليش متنطيها مجال..

حسن : خلي تولي مو تدري اني احبج من زمان ومالي نفس بأي بنيه ..

بنان : هلووو حتى لقمر حاجيلها .

حسن : هو اني لو بت عمج مخاله شي مخارطته الها ، بحيث حجتلي تفاصيل مسويها اني بغيابج وكفت شعر راسي ..

بنان : هاي شنو ، شعجب روند كلشي تحجيلها .

حسن : هيه تكلي اني ليش حبيتك وتعلقت بيك لان تحب بنان حبيت حبك الها ..

بنان : ياااا ..

حسن : بنون

بنان : ها حسوني .

حسن : صيريلي لبوه واصيرلج اسد اكسر ظهره اليوصلج ..

بنان : هههههه يمه صارت بيها اسود ولبوات ..

حسن : ماريدج ضعيفه اريد تصيرين قويه احتمي بيج وانتي تحتمين بيه ..

بنان : ان شاءالله بس كون تعدي عليه سلامات ويطلكني محكمه واخلص ..

حسن : يطلك غصبن ما عليه من شنو خايفه انتي؟؟

بنان : حسن متعرف صميم بكدي ، الله ليراويك مكره وخداعه .

حسن : دخلي يولي والله نافخته على الفاضي

بنان : انت هيج تكول لو معاشره جان ايدتني كلامي .

حسن : معليج منه ، هسه شنو تردون تطلعون اليوم.

بنان : اي والله اريد اغير جو.

حسن : اني اوصلكم بس خاف هاي وياكم اللزكه .

ضحكت .

بنان : هيه ام الفكره واستحي اكللها لا

حسن : توني اكول لبوه واسد وحظ مصخم تالي بعدج استحي وافشل ..

بنان : هذا طبعي شسوي .

حسن : غيريه ميعجب .

بنان : اهاا هاي من يمته وجاي شغله بيه متعجبك

حسن : منا ورايح اي شي ميعجبني واعرف بيه مضره الج انصحج واخليج تغيريه ، تره مو كل البنات بنان ولا كل الولد حسن ، افهمي .

بنان : بهاي صدك مو كل الولد حسن ..

حسن : فدوة لهاي الضحكه وانعل ابو لليبجيج اريد اشوف هذا يا كوا******...

بنان : يا هههههه صاير تفشر عيني عينك .

حسن : بس على صميم مسموح مو بله .

بنان : لتجيب طاريه عفيه ، راح احضر ملابسي واكويهن للعصر ..

حسن : راح انام نص ساعه وكعديني علمود الحك اسبح وابدل ..

بنان : اهاااا والله تغيرت حسون .

حسن : ليش ولج شايفتني معفن اسبح بس بالاعياد

بنان : منو بالدوام من جان يوصلني يجي بنفس تشيرته مال الليل وممغسل .

حسن : يابه جنه صغار ومنفهم بهاي الامور ولازم نعدل نفسنه حتى نعجب عبالنه ننحب على الفطرة ..

بنان : بسمار هذا مو ؟؟

حسن : لا مو بسمار هاي حقيقه ، بنان انتي عجبج المظهر مال صميم وانغريتي بيه لهذا تغاضيتي عن كل عيوبه وخيسته ..

بنان : حسوني اروح احضر ملابسي انت اليوم متسكت ، متكلي منين تنطفي .

حسن : ضلي لتسمعين كلام ..

ضحكت ، شلت المواعين غسلتهن ورحت للبيت حضرت ملابسي توني بديت اكوي دك موبايلي ، طفيت الاوتي وتوجهت للميز باوعت هاي زها اخت صميم والله كلبي وكع عبالك هو اللي متصل ..تردد اجاوب بعدين كلت عيب منها ، رديت عليها .

بنان : الو هلو زها ..

زها : هلو حبيبتي شلونج..

بنان : الحمدلله

من بعد سلام واستفسار عن حالي وصحتي فتحت موضوعنه اني وصميم حجت هواي وبررت لاخوها تالي كالت ..

زها : والله متأذي عليج واربع وعشرين ساعه عصبي خبلنه ، يريدج بس يكابر ..

بنان : كذاب لا يريدني ولا هم يحزنون ، لان انجبر يطلكني اعتبرها كسره خشم اله .

زها : لا غلطانه ، صميم انه اعرفو يحبج ويتمنى ترجعيلو ، فدوة اخوي مريض .

بنان : اخوج مريض من زمان هسه يلا عرفتي .

زها : لا مريض طريح الفراش والله يلوب عليج .

بنان : شتريدين اخابره اني واتوسل علمود يدوسني بالزايد لو شنو لان حجيج مو منطقي ومكاعد افهم عليج ..

زها : باعي اخر مره اطلب منج تخابريه واذا رجع سوه وياج سوالفه نفسها ذاك الوكت اني وكل اهلي نوكف بوجها..

بنان : احلفج بالله ، اذا انتي بمكاني وزوجج ،
لعوب ويسهر بليل بره البيت ومرات يجيج شارب ويغلط بأسم وحده غيرج ، ومن اعاتبه يكلي شاب ومن حقي وانطيني مساحه من الحريه لا تضيقين عليه ، سايرته ومشيت وياه ودست على نفسي واتغاضيت عن سيئاته كلها ، ومن تسأليه هم تخوني بيوم يحلف يحبج وملتزم بالوعد اللي قطعه الج ب ان هو ميخون ، ويكون وفي لدرجه متخليه يقترب من اي بنيه غيرج وانت تحلفيه بالله ميغدرج وميسويها بيج وعلى طول تكليله الله يعاقبك على خيانتك الي اذا جانت بعلمي او بدون علمي وما اسامحك ولا ابريك الذمه ، ويحلف ومرات يتعارك هو ميسويها، وتالي طلع يروحلي شقق ، اني اعرف اخوج جذاب ويجذب هواي عليه ومستغفلني بس صوج بكلبي الاغبر يحبه ويسامحه على طول ، لهنا وكافي ما اكدر انطي من صحتي بعد ولا عندي حيل لهبطات اخوج ..

زها : هذا اخر كلام ..

بنان : اي وما اتراجع .

زها : عجل لتلومين صميم باللي راح يسويه .

بنان : ايده وما مدت ، اله مطلق الحريه يسوي اللي يعجبه واكو هواي حياطين يركع راسه بيها وما ارجعله ..

زها : عيب الغلط بنان ..

بنان : العيب السواه اخوج بيه والافضع من العيب كاعده تبرريله الزنا مالته ، حبيبتي اني ما افيدكم وتطلكت ولزمت عده ، ضلت المحكمه فقط ، اذا ميجي يطلك بابا يخليلي محامي ويرفعلي قضيه ويطلكني غيابي...

زها : هاهيه براحتج فد تحضري لرد صميم ..

يتبع ...

البارت اطول من قطار الصين العظيم
لعيون الغاليات..

تمتعو بهدوء هذا البارت ليأتيكم البارت المليء بالاعاصير 🥺☹