علاقات زائفة

البارت الخامس والثلاثون

عمر

انه يا سالفة تهمني
اذا مو انت تاليها

حور

مرت ليالٍ عجاف وانا اعاني من ابشع انواع الظلم والاضطهاد الجسدي والفكري والنفسي ، افكار متشتتة شعور بالكره والايثار ، يكاد يلازمني طيلة عمري ،فكرتُ بأنني طيلة حياتي لم احظى بوقت جيد وممتع لنفسي ، بتُ ابحث عن فرصة عن بصيص أمل ينتشلني من قذارات أهلي ، فجأة ظهر الحب في حياتي ظننتُ بأنني عندما عرفتهُ قد لامستُ السماء بيدي ،قلت ها قد جاء منقذي ، هذا هو بطلي الخارق ،
اسميتهُ هكذا بسبب افعالهُ الرجوليه النابعة من اعماقهُ وموافقه تشهد له بذلك ، لكن فجأة وبدون مقدمات هبطتُ من السماء السابعة لأرتطم بسابع أرض ، وادفن ، هل سمعتم يومآ الاحلام تدفن ، الروح تدفن ، انا كنت اعلم دومآ ان الجسد عندما تخرج منهُ الروح هو يدفن ، لكن لأول مرة اتعرف على روح تدفن بسابع أرض، هكذا روحي دفنت ، السبب كان اهلي وليس بطلي ،
واخيرآ تيقنتُ بأنني لستٌ بحاجة لأمي لكي تنقذني من ضياعي ، لستُ بحاجة لأبي لكي يربتُ بحنية على كتفي ، لستُ بحاجة لأخي كي يحميني من ذئاب البشر السائبة ، تركتهم والتجأتُ للغريب الذي، جمعتني به الصدفة، يا اجمل الصدفة حينما تأتي على هيئة بشر......

أحببتُ منقذي ۔۔۔
________________❤

صميم : بركبتك اذا صار بيها شي ومحمد افنيك ياعمر لان البنيه انه جبتها وما مستعد اتحمل خطيتها ..

عمر : معليك انه رايد ارجعها

صميم : تخبلت شلون تريد ترجعها غير يذبحوها .

عمر : والله لا اطلعها من بيتهم واخذها مرفوعه راس
مو انه الاخذ بنيه واشرد بيها ، جدام العالم اصيح بصوت هاي مرتي واخذتها ...

صميم : يكتلوك ويكتلوها لك عمر لتتهور ..

عمر : كلت اخذهه من نصهم يعني اخذهة واله اشوف الذل بعيونهم ...

صميم : ول عمر ارحمني تراك فينتو لحضي ..

عمر : كلت كلمة وما تتثنة اردها يعني اردها ..

صميم : وشلون ترجع تاخذها منهم ، مو من الفجر ليحد ما وصلنه تراقب بيتهم وتأكدت طلعو كلهم يلا كدرنه نروح ، هساع شلون نطلعها اكيد حسو بغيابها ول بويه اسمعني اول نوبه بحياتك طاوعني ..

اباوع عليهم صميم مفرفح وعمر الشرار يطلع من عينه وثنينهم واحد اعند من الثاني ...

عمر : انه ياما وياما طاوعتك ومشيت وراك هساع اجه الدور انت تمشي وراي ، انه ما اخذ مره اضل طول عمري خايف من الفضيحه تلوحها وتلوحني على ابو اخذها وشرد بيها ، يفصلوها من العشيره وتضل طول عمرها عار على اهلها ، وشنو ذنب اطفالي باجر عكبه دنيا دارت بينه واضطر ارد لبغداد ، يصيرون شباب ويتعيرون با امهم وابوهم ، اخذها من عيونه فد بالحك....

صميم : عجل اجي وياك ..

__

حور

اسمعهم يحجون وبالي كله يم ضافر لان مهزوم شلون اذا عرف اكيد راح يرجع للبيت ومتوعدلي بالشر ، رحت على عمر ...

صميم : يا بنات روحو جوة خلهم براحتهم وانه نازل منتضرك برة عمر ..

عمر : ماشي يابه ماشي ..

تقربت عليه تعبانه اريد اوكع من طولي بس لازم احاجيه افهمه اللي راح يسويه يضرني ويضره..

حور : عمر .

عمر : يروحلج فدوة عمر كولي تحجي ..

يباوعلي نضره كلها حب وخوف وقلق، اول مره اشوف نضرات خوف بعيون انسان عليه ، عدا صديقاتي.....

حور : شوف اللي سويته اليه قبل ولحد هاي اللحظة ما انساه طول حياتي ، بس اللي راح تسويه هسه ، يهدم كل البنيته وتعبت بيه ، بطلقه وحده ينهون حياتي ومو بعيده ينهون حياتك انت هم ، متعرفهم شنو من بشر ...

اجه لزم ايدي وايده ترجف عيونه مدمعه ، شكله الرجولي ويه دمعاته ، عبالك لوحه مرسومه لبطل من ابطال الحروب ...هيبه ورزن ، بالمختصر الشخصيه اللي جنت اتمناها واللي ابالي وتعجبني هيه عمر ...

ضربات كلبي بدت تعله ، اول مرة ولد يلزم ايدي ، شعور كأنما مرت صعقة كهربائية بجسمي ، شلتني عن الحركة باوعت لايده شلون حاضنه ايدي دمعت ...

رفعت عيني شفته يباوعلي وحاني راسه صفح ..

همست

حور : شبيك ؟

عمر : ايدج ناعمه تخبل ودافيه وترفه ...

ضحكت ...

عمر : تعاي كعدي بعد اهلي وطوايفي ..

كعدت وهو هم كعد ولازم ايدي ..

ابتسم وكال ....

عمر : شايفه رجفه ايدي هاي ..

اشرت براسي اي ، بتعب ...

عمر : هذا كلبي جاي يرجف ، اول نوبه بحياتي الزم ايد بنيه ومو اي بنيه لبوه مهرة شوصفج شحجي كل الكلام جدامج راح وتبخر فد خلي ابالج شغله ، اخذج من عيونهم شلون ماجبتج اليوم ، اجيبج مرفوعه راس وتطلعين منهم وانتي صاحبه حك ، لأذلهم ومحمد ، لأخليهم حت من المنطقة يشيلون لان مالهم عين يباوعون بعيون العالم ، اريدج تصيرين سبعه صدكيني ما اخليج هواي يمهم مجرد انزلج بالباب دقايق واخذج تمام ابويه انتي ..

هزيت راسي بخوف ...

عمر : ما شفتج بيوم بهالضعف ، عليش حبيتج واستقتلت عليج ، حبيت قوتج وصلابتج ، قوة شخصيتج ، حوريتي وينها ماجاي اشوفها ...

حور : قتلوها حوريتك انتهت ، مضل شي مسووه بيها ..

عمر : اخذلج حكج منهم ومربع هم ، وكولي كال عمر وبعمرهم ما يشوفون اضفر منج ..
يلا نكوم حت نلحك نروح لديرتنه ...

حور : شلون اروح لأهلك بهيج حال منو يكول يتقبلوني..

عمر : ساعتها انه هم يتبرون مني واخذج ونطلع ..

ابتسمت ..

كرصني من خدي واخذ راسي لحضنه ...

عمر : بالله عليج ما تحجين وياه خل يهدة ...

وخرت وباوعتله ..

حور : منو ؟؟ عقجت حاجبي وحجيتها ..

هذا ، اشرلي على كلبه ، لزم ايدي وخلاها عليه ..

عمر : شوفيه جاي يرجف عليج ..

ضحكت ...

عمر : يلا نروح ..

حور : يلا ...

كمت وصاح على بنان وروند ..

عمر : يا بنات رايحين ..

طلعن يركضن بنان الخشم احمر والعيون دم وروند وجها مليان خوف اجني حضنني وبجينه تلاثتنه ، لو شكد ما اوصف صداقتنه ما انطي حقها ، اكبر واعمق من كل وصف ....

عمر : ول ياب عروس لا تبجونها ...

هو حجه هيج لو زاد البجي مالتنه ...

اجه لزمني من ايدي ..

عمر : يلا الحبيبة امشينه ...

لزمت ايده وكلي فخر ب الانسان اللي ارتبطت بيه ، صح الطريقه خطأ ولازم ما اسوي هيج ، لكن اهلي ما خلولي خيار ثاني ، تعذبت هواي تعرضت، لأشياء مخزيه للأسف ، وعندي الغريب اهوون منهم لهذا حسيته اماني ومأمني من بعد ربي ...

نزلنه ولكينه صميم واكف ، خطيه وجها شصاير بيه هسه يلا انتبهت عليه ..

حور : حمد لله على سلامتك ، عسه ايدهم بالكسر شلون هيج مأذيك ..

صميم : انه رجال اتحمل فد اويلي عليج انتي شلون تحملتي كل هذا ..

عمر : جبناء لانهم نسوان وكدرتهم على النسوان ، وشيمتهم الغدر ..

صميم : يلا يابه امشينه حت ارجع تراني ميت تعب ..

عمر : يلا

صعدنه بالسيارة واني مخليت ايه ماقريتهة هلمرة من الخوف والتوتر ، كلهن نسيتهن بس شويه شويه بديت اتذكر ....

عمر
نضرات عيونها شتت افكاري كلها ، اريد اجمع ، اتذكر شنو اريد اسوي ماكو كلشي طار من بالي ،من لزمت ايدها حسيت بحراره سرت بجسمي كله حسيت بتشنجها خليت ايدها بيدي وهيه تحجي واني اباوعلها اشتعلنه ثنينه ، جنه عباره عن كتله مشاعر واحاسيس بحيث من الانفعال والمشاعر اللي انتابتنه حسيت ايدنه تبللت ماعرف من حرارة حبي ولهفتي لو من حرارتهة وخجلها رفعت ايدي يم خشمي اريد اشتم عطر تعرق ايدها وادوخ بيه، اريد اسيطر على نفسي ما احضنها وادخلها بنص كلبي ، ضليت اراقبها ، شلون ممصدك هاي حور وصارت الي ....

حور

وصلنه لبيت اهلي جان بابنه مفتوح وهوسه جوة اصوات عاليه وصوت ماما تبجي ..

التفتلي عمر باوعلي بنظرة كلها ثقه يطمني انو ما اخاف ..

صميم : جنهم ملتمين شلون تنزل هساع ...

عمر : لحضه .

طلع موبايله واتصل ...

عمر : ها يابه وين صرت ، يلا خمس دقايق واخليها تفوت ، ماشي منتضرك ..

صميم : شنو الفلم بمنو اتصلت ..

عمر: هساع تفهم ..

صميم : شنو هو لغز متتحجه ...

عمر : ليش هالاعصاب انتظر وشوف صاحبك شنو يسوي بالشرذمه ذول ...

دك تليفون عمر جاوب ، ونزل من السياره فتحلي الباب ونزلني ..

عمر : انتظري بالطرمه لا تفوتين جوة اول ما تندك الباب اطلعي وصيحي بصوت ياناس لحكوني ، تمام فد كون محد يلاحظ وجودج حت لا يأذونج ...

هزيت راسي ب اي

باوعلي بنضرات كلها لهفه وحب ..

عمر : يلا مريتي فوتي ...

فتت ورجلي ترجف يمكن اذا شفت واحد منهم طلع اموت بمكاني انتهي ...

مرت عشر دقايق اقل ماعرف المهم اندكت الباب وطلعت بس المشكله مكدرت اصرخ صوتي ميطلع من الخوف ، طلعت والكى سيارات شرطة اربعه ، و وياهم ضابط واكف يم صميم وعمر ...

رحت مشيت سريع يمهم وصلت وطلع ضافر وبابا ومؤيد و ولد عمي وزيد ، شافوني هجمو عليه ، جرني عمر خلاني وراه وحجه ..

عمر : سيدي هاي مرتي وانه رايدها ، صار زعل بينه وجبتها لأهلها ترتاح ، تصالحنه انه وهيه ب اتصال ، وكالت تعال اخذني اجيت اخذها واتفاجأ اهلها يردون يطلكونها مني ويزوجونها لابن عمتها ورفضت ، شوف شنو مسوين بيها ، انه اقدم شكوة عليهم بضربهم لزوجتي وهيه هم تريد تشتكي ..

اجه الضابط وكف يمي ..

قسور : احجي ولا تخافين احنه وزوجج وياج ، منو بيهم ضربج ...

اشرت عليهم ..

قسور : بيهم احد معين لو كلهم ..

حور : كلهم ...

القو القبض عليهم بتهمه الاعتداء و الضرب ...

صار صياح وعياط بالشارع الدنيا التمت علينه والكل تسأل شكو ...

المهم افتهمت الناس انو اني متزوجه وزوجي يريد يرجعني وهمه ميقبلون ...

اعتقلوهم الشرطه عدا بابا ما اخذوه ، تعب وكعد بالكاع ، لان انفضخو بالمنطقه وهو كلشي ولا كلام الناس يتخبل احد يسيء اله ولسمعته ....
انسان ريائي بمعنى الكلمه ..

لزم ايدي عمر وصعدني بسيارة صميم وهمه صعدو ، باوعت لامي وابويه واكفين وعينهم على السيارة وعليه ، امي نضراتها خوف وندم ، والدي ، نضراته حقد وانتقام ....

مشت السيارة واني عيني عليهم وعلى بيتنه مو سلهة عليه هيج اطلع من اهلي وبهاي الطريقه ، هاي دنيا منو يكول عمر يضل زين ويايه طول العمر ، منو يكول اني مو مجرد رغبه اله واذا اخذني وشبع رغبته يتركني ، شلون باجر عكبه اذا سوة شي معجبني ، شلون اوكف بوجها واكله لا هذا غلط وميعجبني، لابد يجي يوم واتعاير با أهلي وبطريقه زواجي منه وشلون طلعت منهم ، كل هاي الافكار اجتي ابالي واحنه متجهين لبيت بنان ..

وصلنه نزلت ونزلو الولد ، اجه عمر لزمني وصعدنه فوك ..

اول مدخلت حضنوني البنات يبجون ممصدكين رجعت ورونق هم جايه ...
طلبت افوت انام لان تعبانه وجسمي خامل ...

نزعت جبتي والحجاب وطلب من بنان تبلغ صميم ميدخل للغرفه ، غطتني وطلعت ..

نمت بهدوء اول مرة بحياتي انام وبالي مرتاح
انام ومخايفه احد يتحرش بيه ....

_________________

بنان

شكد ما فرحانه بحور وسلامتها ، بكد الفرح خايفه من اهلها ليغدرون بالولد ، نامت وطلعت بلغت صميم ميدخل للغرفه كال ماعندي شي خليها تاخذ راحتها الولد كعدو بالهول والبنات بالمطبخ ...

رحت يمهم سويت نسكافيه للبنات وللولد ...

وكعدنه نسولف فرحانين بالانجاز اللي سويناه
مو شي سهل طلعنه صديقتنه من حلك الموت وجمعناها بحبيبها ...

دك جرص الشقة فتحه صميم ورحب بالضيف الجاي ..

رونق : منو اجه ؟؟

روند : هذا صوت الحب ..

بنان : ههههه اي الحب هذا ..

رونق : الله يسعدكم حياتي ..

روند : شكرا ربي يفرحج ويعوضج خير ...

جريت حسره ..

رونق: ما اضن راح اشوف الخير ..

روند : كولي ياالله يمعوده ليش تتفاولين ..

رونق : مو قصة اتفاول بس سنان مراح يخليني بحالي وسكوته هذا وراه شي وشي جبير هم ..

روند : ليش متطلبين الطلاق ..

رونق : وين يقبل يطلك شبيج ..

روند : رفعي دعوه عليه وخلعيه ..

رونق: ومنين اجيب فلوس هو الحفاظات والحليب مال بنتي لو مو هو يدز الفلوس كفيلج الله ميدبرن..

بنان : اني انطيج بس خلصي منه وعود بعدين رجعيلي الفلوس من تشتغلين ..

رونق : بنونه تعرفين بطبعي صار سنين ليش تعيدين الحجي ..

بنان : غير علمودج اني ياعيني

رونق : الله يحفظج ويحفظلج راعي بيتج ام كلب الطيب ...

بنان: امين ويحفظكم ويسعدكم بنات ..

شلت الصينيه وصحت على صميم ياخذها ...

اجه اخذها ..ودزلي بوسه بالهوة ..

صميم : لكفيها ..

بنان : ههههه لكفتها ..

سايرته واخذت البوسه من الهوه وخليتها على خدي هههه مجنون صميم ....

لهناك واسمعهم يحجون بينهم ..

صميم : لا ياخونه متفقين انت وقسور ..

عمر : وانت الشاهد ..

صميم : هينه يابه انه كلشي ما ادري ومتفقين ومدسترينها مو ..

عمر : عليش ندوخك وانت تعبان ...

صميم : ما انساها الك عمر ..

عمر : اعوضك بشي ثاني ..

ضحكو وحسيت بفرحتهم ...

بنان : اسمعهم وطايرة من الفرح يفدوة شلون نسبان عدنه ، والله اني وصديقاتي محضوضات ربي ديم الفرحه علينه واسعدنه دوووم ....

حور غافيه رايحه بسابع نومه حسيت واحد يمي ، نسيت اني وين ونسيت خلصت من اهلي هاهيه ، كل ضني اللي يمي عصام ضليت مغمضه عيني مثل كل مرة اشوفه شيسوي ، بعدين يلا اكعد واكوم اعيط عليه ، بس هلمرة مو لمسات مثل عصام لا ، ايد حنينه تربت على راسي وتمسد بشعري رخه جسمي ، وطمأنيت فتحت عيني والكه عمر متمدد بصفي ومبتسم ، رديتله الابتسامه بس بتعب ...

همس ..

عمر : حمدلله على سلامتج ..

حور : الله يسلمك ..

عمر : صار الفجر هم يلا نروح لبيتنه ، لو متردين تجين وياي ...

كمز كلبي احس روحي بحلم ممصدكه اني صدك راح اخلص ممصدكه بعد مياخذني مؤيد..

كمت وعدلت كعدتي وارتاجيت على الجناح مال الجربايه ..

حور : اجي وياك لو لأخر الدنيا ..

عمر : حوري تره انه فقير ورجال على كد حالي ..

حور : فقير فلوس وغني ب اخلاق ، وهذا كافي بالنسبه اليه ...

عمر : جيبي فارغ..

حور : وكلبك مليان بحبي ..

عمر : راح تتعبين وياي ..

حور : احارب وياك ونشق طريقنه سوة ..

عمر : ابوي صعب..

حور : اتحمله لخاطرك واعتبره ابويه ..

عمر : احبج ..

حور : اني هم ..

حضني قوي وبجيت فرفحت بحضنه اريد اطب بكلبه هلكد ما فرحانه ممصدكه خلصني من عصام والله حلم اني بحلم ياناس ....

همس ...

عمر : شمسوي جوه ربي ونطاج الي ...

حور : اكيد بار بوالديك ..

عمر : صح لليوم ممسمعهم حجايه باطله ...

حور : وهذا ربك جازاك ..

عمر : حوريتي ..

حور : همم ..

عمر : سولفي لتسكتين اريد اسمع صوتك ، رايد يدغدغ مسامعي ....

تقربت من اذنه وهمست ..

حور: شنو احجيلك ياروح حوريتك ..

وخرت باوعتله عيونه ذبلانه ونفسه تخربط ...

عدل كعدته وتحمحم ..

عمر : يلا نروح ..

حور : يلا ماعندي شي ، صدك بنان وصميم وين شكد عيب اني نمت بغرفتهم ...

عمر : بليل راحو لبيت اهلها وهناك باتو ..

حور : والله عيب ..

عمر : ماكو عيب صميم اخوي وبنان اختج يلا حبيبتي كومي ..

كمت فتت للحمام غسلت وطلعت بدلت سمعت صوت حركه بالمطبخ رحت لكيته يحضر بالريوك ..

انتبه لجيتي التفت

عمر : تعاي اكلي سويتلج ريوك ..

حور : ليش تعبت نفسك ما اشتهي ..

عمر : ما اتحرك منا لهنا اذا ما تاكلين يولو طريقنه طويل ..

حور : ماشي راح اكل لخاطرك ..

كعدت وهو هم كعد مديت ايدي اكل انتبه لمعصمي شافه ازرك ، ذب الصمونه من ايده وسحب ايدي ..
حجه مصدوم ..

عمر : هاي شنو ؟؟؟

دنكت على ايدي ودمعت عيني ..

حور : هذا عصام جا.... سكتت..

عمر : احجي حوريه لتخافين حبيبتي كليلي شمسويلج هذا الكلب ..

حور : جان يشد ايدي بحبل ساعات كامله ومرات يشد حلكي علمود ما اصيح وصوتي يطلع ..

كام يبلع بريكه وصار اعصاب محجه شي اكتفى بهز راسه بعدم رضى ...

جر نفس طويل وكال ..

عمر : امشي يلا خلي نروح ماضل وكت .

حور : ماعندي شي..

قفل الباب ونزلنه ، تمشينه لبيت اهل بنان
علمود ينطيهم المفتاح ..

احنه ونمشي سألته ..

حور : عمر شلون راح نروح ونعوف صميم وحده هنا ..

عمر : ماعليه شي ..

حور : شلون ماعليه واهلي هسه زاد حقدهم اضعاف عليكم ..

عمر : اول شي نصهم بالحبس ، الشي الثاني صميم فد يلكى بيت يشيل بغير منطقه للأمان اكثر وراح ياخذ اجازة من دوامو ...

حور : حيرة والله .

عمر : وينها الحيرة شو ما شايفها انه ..

حور : راح يتبهذلون بسببنه ..

عمر : ول عليش تسمووو اصدقاء شوكت تبين خوتهم غير بالمواقف الصعبه ، انه خوما رايده فد للضحك والونسه انه رايده لمثل هيج يوم ..

حور : والنعم منه صميم رجال وابن رجال ، شكد متندمه لان جنت احجي عليه ..

عمر : هاي بعد صارت منا وجاي لا تحكمين على الناس شي بيش ...

وصلنه خابر صميم ، وره شويه طلع مبدل وبيده سويج سيارته وطلعت وراه بنان ، اجتي بوستني واني حضنتها حيل ...

عمر : وين رايح من الصبح ..

صميم : وياك ..

عمر : شعندك وياي ..

صميم : عجل ياهو اليوصلك ..

عمر : عمي انه اخذ نفرات منا عليش شالع كلبك ..

صميم : ما بالحيف انه موجود واخليك تتبهذل انت وزوجتك ..

ضحك عمر ..

صميم : حاجيلك نكته يول ..

عمر : لا فد استغربت ..

صميم : من شنو ..

عمر : كلمه انت وزوجتك ، بالله مامصدك ...

صميم : يووو كل شوي راح يذكرني ماصدك وماصدك ، صدك بويه صدك ..

عمر : حقك انت حصلت اللي حبها كلبك بسهوله ، قابل مثلي ايام ما نايم مساهر كبال بيتهم خاف يسوولهة شي ...

صميم : امشي ، هساع تتفرعن علي بنان وتعال شيخلصني على ماتحبني وما قاتلت ...

بنان : تره كاعد اسمع بس مغلسه بمزاجي ..

صميم : اروحله فدوة لابو المزاج ...

صعدنه اني وبنان ليوره وعمر ليكدام وصميم يسوق ..
كل ما اباوع لوجه صميم كلبي ينعصر لان تأذه بسببي ..

_________

روند ..

من بعد هاي الاحداث الصارت كلها والتعب عم الهدوء ب ارجاء المنزل والحمدلله كلشي رجع لمكانه الصحيح ..

اله حسن اخ اخ ، اربع وعشرين ساعه فكره شارد اللي يشوفه يكول شايل هموم بكد الجبال فوك ضهره اجيته جان كاعد على الكرسي وخال عكوس ايده على ركباته وجكارته بحلكه متفاركه من يوم اللي نخطبت بنان لهذا يومنه صار مدمن ، اربع وعشرين ساعه يدخن ، وهلمرة كام يشرب اركيله وماما وبابا تخبلو يخافون عليه ، وهو ماكو ميسمعلهم ....

رحت كعدت يمه ، اصلا منتبه اني موجوده ضل على صفنته ..

روند : حسوني شبيك تتصفن ، وين حيويتك مال قبل وين ضحكتك الحلوة ليش حارمنه منها والله اشتاقيت لحسوني القديم ، ترة ماعدنه غيرك ..

طفه الجكارة بالنفاضه ونفخ الدخان وكال .

حسن : اني هم هوواي اشتاقيت لحسن القديم ، صدكيني يوميه ادور عليه وماجاي الكاه ...

روند : احنه ليش سمونه انسان ، لان ننسى ، مهما كان الشي جبير وصعب لابد يجي يوم وننساه ..

حسن : شكد تحبين قسور ..

روند : هااا ..

حسن : جاوبيني شكد تحبيه .

روند : سمعتك اني من اول مرة بس تفاجأت بسؤالك ممتوقعه تسألني هيج سؤال ..

حسن : سألت لان ، اعرف تحبيه لو ما حابته وما راغبته جان رفضتيه مو صح ..

روند : صح ..

حسن : تتحملين يتزوج وحده ثانيه ويكعد قريب عليج بنفس الفرع ..

روند : لا اموت غير ..

حسن : تتحملين تشوفيه يضحك لوحده غيرج ويبجي ويخاف ويرجف عليها ...

روند : لا ما اتحمل .

حجيتها واختنكت مجرد سمعت متحملت عاد اعيش هذا الشعور ..

حسن : من تربين طير وتعيشين وياه ما اكلج سنين شهر واحد وتداريه وتوكليه ويوميه تباوعيله وتنتظريه يكبر ،،،كبر الطير وفرحتي بيه ، وفجأه يطير منج ، وتلكيه يم واحد ثاني وهو كام يربيه ، ومن ترحين تردين ترجعيه يرفض يجي وياج وينكر مداراتج اله ، تتحملين وهو مجرد حيوان ..

روند : لا انقهر ..

حسن : شلون تردين انسى بنان وما احترك ، اللي يكتلني طول فتره غياب زوجها اني هنا نايم الليل كله واسمع بجيها والون على رجلها ، رغم هو مخطوف حسدته تمنيت اني ابداله ويحترك كلبها عليه ، بس تدرين شنو الضوجني اكثر وخلاني اكره نفسي..

روند : شنو

حسن : تمنيت صميم ميرجع ...

روند : لا حسوني اسم الله عليه خطيه شاب بعده واهله وبنان انتهو عليه وحتى احنه ..

حسن : ليش كتلج كرهت نفسي ، لان تمنيت الموت لأنسان في سبيل احصل اللي عنده ، شوفي اخوج لأي مرحله واصل من العجز ...
اني انسان عاجز وما اكدر اكمل حياتي ، سبحان الله عبالك وكفت لحد يوم خطبتها ،،،حياتي كلتلي استوب حسن ماكدر اكمل وياك كمل وحدك ...

روند: كلشي بيدينه ، احنه نكدر نحطم نفسنه ونكدر ننهضها ، بس انت عاجبك هيج تضل اتعب نفسك واتعبنه وياك، وبنان عايشه حياتها وسعيده ...

حسن: والله اتمنالها تنسعد ، بس مو وياه ..

روند : شطلعت هاي حسن راح تتمرض والله كافي فدوة ..

ضحك مستهزء

حسن : اتمرض ، اني كاعد احتضر ومحد حاس بيه ..

كام يبجي ...

اختنكت عفته وكمت متحملت اخويه يبجي ويتأذه ومابيدي شي اسويه غير الدعاء اله بالصبر ....

رحت لغرفتي وكلبي محروك بنار على اخويه ...

_________

بنان

الطريق طويل تعبت لان بليل منمت زين مكاني متغير وصميم يون من الم راسه خطيه متت قهر عليه..

الطريق كله عمر خبصني عينج على مرتي عدلي راسها ديري بالج عليها ..

لان نامت الطريق كله ...

اني اضحك ، يحجي من كل كلبه ...

______________

رونق

الحمدلله تطمنت على حوري وعلى صميم رجع ل بنان ..

جنت كاعده واصفط بملابس علياء صاحتني ماما ..

علياء: رونق ماما تعالي ويه خواتج خلي نفض البيت .

رونق : اي ماما نازله بس اكمل الملابس ...

كملت ونزلت وبلشنه بلبيت تنظيف مخلينه شي نزلنه البردات وعزلنه الكاونترات ، طلع نظيف ويلهث ، هاي كل نهايه اسبوع ماما تسوي حمله على البيت لان طيله ايام الاسبوع احنه دوام وصح انظف بس على السريع مو بدقه ، دراستنه صعبه ، واكثر الحمل على ماما ..

كاعد اشتغل وملتهيه اندكت الباب طلعت ماما فتحتها ورجعت ..

علياء: ماما واحد بالباب يكول اني موظف من المحكمة وعندي ورقه جايبها لرونق حاتم ، اريدها توقع عليها ..

رونق : ورقتيش هاي..

طلعت ..

رونق : تفضل اخويه ..

_ اختي وقعي هنا بلا زحمه عليج ..

اني من ثولي ما اعرف فطارية غباء. عبالي لازم اوقع يلا اقراها ..

المهم لزمت القلم وقعت ، واخذ هو نسخه ونطاني الثانيه من ادخل للبيت واقراها ..

انصدم ، سنان طالبني لبيت الطاعة ...

يتبع ......

الفديو من حور لعمر