علاقات زائفة

البارت الواحد والثلاثون

هنة اليوجعني هووواي على ياهو المنهن نعاتب

________________😔

هل القلب يسرق ؟؟؟

سؤال عادة ما يطرح عند فقد شيء ثمين لكن هل سألتم يومآ عن قلوبكم التى سرقت ومن قبل من ؟؟

هل السارق جيد ويستحق الفوز به للأبد ، ام العكس

اذا كان العكس فلابد من استعادة قلبك المسروق

لكي تحتفظ به لانه ثمين لاتدع سراق القلوب يستولون

عليه بدافع الحب !!!

لانه سوف يتم اللعب به ورميه عند الانتهاء او الضجر منه...

حافظو على اشيائكم الثمينه ف اذا ذهبت لن تعود

واذا كسرت لن تتصلح ......

اذا كسر القلب سوف تتغير اعدادات شخصك يتحول

شخصك القديم الذي يمتاز بالحب  المفعم والسعاده

والموده التى يكنها للأخرين لان اعتاد على الوثوق بالجميع

الى شخص سيء مملوء بالحقد والكره لانه تعرض الى

خيبات من قبل السارق ..

ممكن ان تكون

خيانه!!!!

كسر!!!

غدر !!!!

أذية !!!

لذلك احذر السررررراق ....

______________/

عمر : حور اريد احجي وياج ضروري ..

حور: بعدين عمر عندي محاضره ..

عمر : والعندي اهم من محاضرتج ..

حور : احجي اسمعك ..

عمر : انه تخرجت وصفيت شغلي هنا وراد لديرتي فد كلبي عليج شون راح اعوفج وهم يضل بالي ..

صفنت شجاوبه ؟؟

حور : مبروك تخرجك ، وهذا الطبيعي ترجع لأهلك ، واني ماعليه شي مثل ما داومت ذيج السنين اكمل هاي السنه ..

عمر : اعرف سبعه ولو خليتج بنص الف زلمه ماخاف فد انه ماكدر ابعد ، خاف اروح منا تزوجين منا ..

حور : ههههه خاف عبالك الخطابه واكفيلي سرة ، ترة الناس متتقرب لبيت ابو ضافر يعرفوه مينطي بنية يعني لتخاف أمن ، تروح وترجع تلكاني بمكاني متحركت ..

عمر : انه تقربت ..

صفنت بوجها ..

حور: شلون يعني مفهمت ؟؟؟؟حجيتها وصوتي رجف

عمر : انه سويت شغلة واريد اكلج عليها ، يمكن غلطت اتسرعت ، تصرفي جان بدافع حب بالله الكريم ، فد ردة فعل والدج عجبتنه ...

حور : عمررر شسويت احجي ترة رجلي مكاعد تحملني ..

عمر : رحت انه وعمي لابوج لشغله ووو..

قاطعته .

حور : شنووو عمر شسويت ، خاف حجيت بالموضوع وعرف بيك ويايه بالجامعه ..

هز راسه ب اي ..

حور : تتشاقة مو ؟؟؟

هز راسه لا ،بس نضراته كلها خوف وقلق من يباوعلي ..

درت وجهي عنه ولزمت راسي مشيت ما اريد انفعل ويطلع صوتي والطلاب تنتبه سرعت بالمشي ودمي يغلي ، اسمعه ورايه يصيح حوري ، حوريتي ،
وصلت مكان شبه فارغ من الطلاب ..
انداريت عليه ورفعت اصبعي بوجها اهدد ..

حور : اسمعني اذا تأذيت لو انحرمت من دراستي بسببك ادمرك ، وخلي ابالك على السويته لو تموت مراح اقبل بيك بعد ...

عمر : افهمج ..

حور: شتفهمني ، شتفهمني ، انت ضيعتني حرفيآ، اني انتهيت، بسبب حبك المريض ، كتلك اني ما افيدك وصارلي سنين احارب وحدي في سبيل احضى بشهادتي وما اتزوج غصب ، واليوم انت خربت كلشي وهدمت الاول والتالي فوك راسي ، بسبب لحضه طيش منك .

عمر : طيش حبي الج تعبريه طيش ؟؟؟

تقرب ، حسيته صار عصبي ،مهتميت استرسلت بكلامي .

حور : لمن اكلك اني مافيدك واهلي صعبين وابتعد وتجي انت تسوي العكس شتسميها ، شوف كل اللي راح يصيرلي بسببك ، وخطيتي بركبتك ..

عمر : حوريتي

عطت

حور : بسسسسسسس عوفني ، اشوف حل لمصيبتي ..

كعدت وايدي ترجف اريد اسيطر على اعصابي ما اكدر ، دك تليفوني طلعته عصام ، زاد خوفي اكثر ، سويته صامت خلصت الدكه ، ابويه دك ، من بعده ضافر ..

شمرت الجهاز وخليت ايدي على وجهي وبجيت بحركه ..

كعد كبالي بالكاع وخله ايده على راسه ..

سمعته يهمس ..

عمر : غبي غبي ..ويضرب على راسه ..

خلصت الدكه مال موبايل اندزت رساله ..

💬

رجعي بر****** ام الرجوله ، اليوم كتلتج على ايدي ..

...

شوفته الرساله ..قراها وكام لحيله ..

عمر : هذا منو ابوج ..

حور : عصام اخويه ..

عمر : فنه يلزم شعره منج اكسرو ومحمد ..

جريت موبايلي منه حيل وعطت ..

حور : شتكسر بطران وخر من وجهي واياك توصلي هاي اذا داومت بعد ..

حجيتها وبجيت ..

عمر : اسف ..

حور : شيفيد اسفك ، ضيعتني بكلمه منك ،ضاع مستقبلي ،
الامام علي عليه السلام يكول ( ليت رقبتي كرقبة البعير, كي ازن الكلام قبل النطق به } ..

وحضرتك ضيعتي بزله لسان ..

راد يحجي عفته ومشيت بس ما اعرف وين اروح والموبايل ثولني وزاد توتري ....

____________

رونق

جنه كاعدين اني وبنان وروند وقمر اني مو كلش اعرفها فحبيت اتعرف عليها ...

رونق : قمورة احجيلنه عنج ولو البنات يعرفوج بس اني ملحكت عليج هواي ...

قمر : راح احجيلج قصتي وقصه اهلي كلهم

روند : يبو راح ترجعينه للقهر مو كوه نسيت

رونق : احجي الله عليج ..

بنان : تموتين على اللطم ، البيج مكافي وتدورين قصص ...

رونق : معليج احجي قموره ..

قمر : ههههه راح احجيلج وانتو سدو اذنكم لان سامعيها ...

اني مواليد ٩٢ سابقه اقراني بسنه لان سجلت قبلهم اجيت بدايه سنه وسجلت ويه اهل ال ٩١ ..

عائلتي تتكون من خمس بنات و٣ ولد
اني الاخت الاصغر بينهم بزر الكعده مثل ميكولون هههه ..

اخوتي ثنين كليات والجبير مبطل مكمل منتسب بالجيش ، بس ماعليهم اعتماد ، كلشي براس امي
عيشتنه صعبه كلش من توفى والدي، او بالاحرى من انقتل صارت المسؤوليه براس ماما كلها ، تعبت وبدت تشكي من ضيقه العشيه لان صعبه ، واخويه حاير يلم ويصرف على كشخته والنسوان ، خواتي اللي اكبر مني يا قسمه التجيهم موزينه لو متزوج لو مطلك ، بسبب المنطقة الجنه كاعدين بيها قبل جانت شعبيه وتعبانه ، بسبب ضيق الحال كامت ماما ونطت اختي الوسطانيه لواحد متزوج ، بالتاجي ، هاي اختي عانت ما عانت بسبب ضرتها ، شوفتها الويل والمر ، اختي خريجه ومتعينه ، صار عدها اطفال ثنين ، زوجها كاعد بلبيت ، فتخليهم يمه ، اكثر من مرة تجي ، تلكاهم لو مجويتهم بديهم لو زراك بجسمهم ، فشكت بزوجته هيج تسوي بيهم لان هيه تجي لبيتها من تروح اختي للدوام حتى تسوي ريوك لزوج اختي ، اضطرت تودي الجهاال للحضانه ، تكول اول اسبوع فرحانين ، من بعدها كامو يتخبلون بس اتوجه بيهم للحضانه ، تكول مرة وكفت اتسنط ، واسمع صريخم ، تكول فتت واشوف المربيه شابعتهم كتل ، تكول طبيت ملختها من شعرها نهيتها بيدي واخذت جهالي وطلعت ، راجعه للبيت لاكيه زوجها ومرته بفراشها تكول جزت نفسي منه ومن بيتي ، اخذت جهالها ورجعت لأهلي ضلت ايام واجه زوجها باس الايادي ورجعها بس بيت بعيد عن ضرتها بمنطقه ثانيه واخذت اجازة خمس سنوات علمود اطفالها ، بهاي الخمس سنوات شافت الويل ، زوجها حيل اذاها هيه تغار عليه كلش بحيث من يرجع تشم بهدومه خاف بيه عطر نسائي غريب ومره لكفت حمرة على قميصه لو تخبلت ، دك ولطم واجتي زعلانه لبيت اهلي بس بسبب ضروفنه ماما ترجعها من اول ما يجي زوجها ...

روند : احجيلها قصه اختج الخ هاي زينه بس ذيج مأسات ...

قمر : اووف ، هاي اختي الاصغر من الجبيره تزوجت من جان بابا عايش يعني اول ثنين زوجهن بابا الجبيرة اخذت واحد زنكين كلش ومرته ميته بس جبير بالعمر ...

رونق : هاي خواتج كلهن نازلات على ضره...

قمر: حضهن بعد ، اختي الثانيه الاصغر من الجبيرة
هاي حبت واحد سني ، ماتت عليه بس بابا مقبل ينطيها اله ، لان عمامي عارضو زواجهم ، هيه من حبها اله سوت وياه علاقه كامله وصارت حامل ، بابا خاف من الفضيحه ، كتلها كتله زينه ، وزوجها للي تحبه بس تبرة منها وكللهة اذا متت لتحضرين دفنتي ، ابد متهنت ، هم عنده علاقات وسوالف مكسره هواي ، وتالي انضم لتنظيم القاعده جنه مندري بيه ، اختي بالصدفه اكتشفته ، جانت تكلب بتليفونه وشافت ، رسائل يهدد ناس وداز صوتيات مال اولادهم ، وكاتب هذا الصوت متسمعوه بعد اذا متتبرعون للتنظيم ...

بوكتها  لان تحبه ومرادت تخرب بيتها ، وهم بابا متبري منها ف اضطرت تسكت ..

رونق : هاي اللي تبيع اهلها لأجل واحد ميسوه ، تستاهل لتزعلين مني ..

قمر : لا ليش ازعل ، هيه هم اخذت جزاتها ومات بابا ومراضي عليها ...

رونق : كملي عفيه شصار بعدين الفضول موتني ..

رونق : طش سيطه بالمنطقه، لان ترقه وصار امير بالتنظيم ، تكول مرة كعدنه الصبح هو واكف يغسل بالمرايا واني لازمتله الخاولي ...

بنان : اي مو يستاهل الارهابي ...

رونق : استغفر الله لج كملي اختج فورت دمي ..

قمر : اي تكول عيني على المرايا كاعد اباوعله شوكت يكمل تكول ما احس اله ايد تسد حلكي ، ومددوني بالكاع ، وحجي بالانكليزي كلشي ما افتهم والليزرات علينه متوجهة ، ثنين جتفو زوجي وخلوه يكعد على ركباته وايده وره راسه ، فتشو البيت فوك جوة ، كلهم سود ،يخوفون وضخمين ..

رونق : ذوله الامريكان مو ..

قمر : اي ، تكول اخذوه سحل ، وضلت هيه تربي بجهالها ال ٣ خلفت منه بنات ٢ و ولد ، تكول تحملت المر بغيابه بسبب اهله وحماها جان يتحرش بيها ، تالي ما اعرف شلون طلع ورة ٣ سنوات ، نطو فلوس جماعته ، و واسطات طلعوه ، تكول انسجن بسجن بوكه ، هناك شكو ارهابي جبير عاشره ، بحيث غاسلين دماغه غسل ، فهي فرحانه بيه وسوت حفله شكبرها على سلامته ، تكول بليل كعدت شفته شايل واير ويريد يخنكني ، متوسله بيه وبايسه رجله حتى يعوفها ، كاعدين الجهال على صوت البجي مالتها، تالي عايفها وطالع ، ثاني يوم اخذها لصريفها كعدها بيها ، تكول الكاع مليانه فضلات حيوانات ، شمرها وكللها بليل اجيج ، تكول سمعته يخابر يكللهم هسه اخلص عليها ،
طلعت متوسله بيه وحاجيه وياه ليش هيج تسوي شنو الغيرك ،يكللها ، سمعت اللي يكتل شيعه يدخل الجنه وانتو كفره وعبده قبور ...

بايسه رجله ومحلفته بالعشره البينهم ، واكعتله دخيل دم يلا عافها ، بس كللها ارجع للبيت لا الكاج ولا الكى جهالج ، هيه اخذت جهالها واجتي النه ...

بابا تخبل بالبدايه رفضها وطردها بس من سمع بيها هيج زوجها تراجع ولمها هيه وجهالها بس ميحجي وياها ولا راضي عنها ...

رونق : هذا الحجي قبل شكد وزوجها هسه وين ..

قمر : تقريب ب ٢٠٠٥ ما اتذكر بالضبط بس قبل الطائفيه
وزوجها هسه تاجر جبير بدبي ...

بنان : طبعآ يصير تاجر بدم الناس الفقرة..

قمر : اي والله ، لهذا ياحبيبتي كل يوم ماما تريد تبطلني بسبب ضعف الحال والمعيشه ، ولو مو بنان تساعدني الله ينطيها و واكفه ويايه جان اني من الاول كاعده وصلت مرحله ثالثه بفضلها ..

بنان : شنو هالحجي يمعوده الناس للناس ..

قمر : والله فضلج ما انساه لو تردين عيوني اشلعها الج ، شلون اجازيج ما اعرف..

رونق : ورده بنونه ، زين سؤال شعجب اختج الزنكينه متساعدكم واختج الثانيه عدها راتب ...

قمر : الجبيره زوجها بخيل يعني على كد اكل ولبس هو يطلع وياها ويصرف هم على الكد يعني مو بتبذير ومينطي فلوس بيدها ..

اختي الموظفه كعدت ايجار وهيه تدفعه من راتبها وزوجها عليه المعيشه ..وقبلها جانت ماخذه اجازة خمس سنوات..

والخ اجتي هيه وجهالها وماما حارت بيهم ...

رونق : خطيه الله يساعدكم

قمر : الحمدلله على كل حال ..

بنان : يستاهل الحمد ..

روند : بنات اكو واحد متقدملي بس يريد ابطل من الدوام ..

رونق : ابتعدي عنه الف متر ، هذا معقد ، وشكاك ومريض ، دراستج ثم دراستج بشرفج عوفي الزواج هاي اني كدامج شحصلت غير القهر ...

بنان : ههههه متعقده الاخت ..

رونق : اي والله سنان عقدني ..

روند : الله يساعدج ، بس ميتفوت ولجن حلووو..

قمر : خرب بحضي ادري واذا حلو مو الف مره كتلج دراستج اهم ..

روند : عيوني وفوك هذا ضابط ...

بنان: معليكم بيها تحجي عشره بالشهر منو يخليها تتزوج عمي لو حسن ...

رونق : اي والله نسيت وفوكاها انتي الوحيده الهم ..

روند : اليوم راح يجي للكليه ويحجي ويايه ...

بنان : ولج روند هاي شوكت شفتيه وتواعدتي وياه ..

روند : اول البارحه ، كلي راح اجي اشوفج ونتعرف اكثر...

بنان : ومنيله رقمج ..

روند : هاي شبيج غير امه واخته صار ٣ مرات يجون يخطبوني ، واجه وشفته وبابا تعرف عليه ، وهو كايل لاخته تنطيني رقمه حتى احجي وياه ، وكلت لماما يلا حاجيته ، شنو ترديني اخذ ركي عمياوي ، غير على السجين ..

بنان : والله لو مو على السجين هم ما ينحزر، حبيبتي بالعشره كلشي يبين بالبدايه كلهم ملائكه يصيرون سأليني اني ..

رونق : والله صميم ورده مال الله اصلا اني من البدايه حبيته ، وتعاي اكلج منو من الولد مملعب وماعنده علاقات قبل الزواج ، شو يحبج ومدللج حمدي الله وشكريه ..

بنان : حامدته وشاكرته، بس كاعد اكلج لو تموت متحزرة اله تعاشره ..

روند : الاخت اخذت دور الشيخه حور في النصح والتقوى ...

بنان : لا والله مو قصه ماخذه دور حور ، بس اللي مريت بيه ماريدج تمرين انتي هم ...

روند : على العموم هو اليوم يجي واحجي وياه ، واشوف واذا قنع اكمل اقبل بيه ماقنع ابطل ..

رونق : اصبري هيه بس سنه ضلتلج ، شبيج مدوده ..

روند : شوف منو تحجي ، لو مو انتي تزوجتي اول وحده وحتى دراستج عفتيها ..

رونق : غير ضعف حالنه جبرني اتزوج لو حالتنه زينه والله لو الف من سنان يدكون بابي ما اقبل ...

روند : شنو الفايده رجعتي لاهلج وفوكاها وياج بنيه..

رونق : هو ليش اكلج لتغلطين غلطتي ...

بنان : متحسون حور طولت محاضرتيش هاي ...

رونق : خاف ماخذيهم ثنين طبك ...

بنان : ماعرف كاعد اخابر مترد ..

رونق : احتمال صامت ..

بنان : اروح اشوفها وين ..

كمت امشي وادور عليها هووسه والطلاب كلها بالسنتر
ورة ربع ساعه فراره جان الكاها كاعده وعمر واكف يمها رحتلهم ....

_______

عمر : احلفج بالله ورسوله ، تسمعيني ، لتحكمين عليه ، الج ساعه تحجين وانه ساكت ،فينتي حضي واستاهل كلشي حجيتيه فد سمعيني ..

حور : وخررر من وجهي كتلك ، ماريد اشوفك ولا اسمع صوتك ، كرهتك ، صوتك كام ينرفزني ابتعد لا اصيح صوت الم الطلاب عليك واطلع من الجامعه بفضيحه ..

عمر : كافي رجيف مو راح تموتين ...

حور : انت وصلتني لهذا الحال ، كتلك اتركني ، انت متعرف اني شلون عايشه، اني مو حالي حال البنات ترجع لبيتها ترتاح ، لا اني اقاتل بلبيت ، تعرضت لانواع الاضطهاد النفسي والجسدي ، اني مو بينه عاديه ، اني كوم مأساة ، اني داخلي فارغ مابيه روح، عايشه يومي جفيان شر ، اريد يخلص وبس ، انت متعرف شنو عشت وشنو تعرضتله ، وحذرتك ومسمعتني ولا اخذت بكلامي انت دمرتني ، راح اشوف الويلات منهم بسببك...

عيونه دمعت وجهة صار دم احسه راح ينفجر ...
حجه بس مخنوك

عمر : اذا صار شي عليج انه اموووت ما استحمل ..

حور : لعد موت من هسه ..

غطه وجها وكام يفرك بيه راح ليغاد وره شويه اجه يمسح بعيونه ...

عمر : امشي ..

حور : وين ؟؟؟

عمر : نروح لأهلج واطلبج منهم وما اطلع اله ماخذج ..

حور : هههه استغفر الله والله ضحكتني ، لك بابا اني عندي ست اخوان تعرف شكد سته ..

طلعت اصابعي وكمت احسبله ..

وابويه سابعهم ، وابن عمتي اللي هو خطيبي اكيد راح يدزون عليه ، وهو شايفك ويعرفك بالاسم ، صارو ثمانيه ، ولد عمي ، هم وانت احسب بيد منو سلمتني وشنو راح يسوون بيه وشنو راح اشوف منهم ..

عمر :اعرف عندج هالكثر فد كلهم نسوان مامحسوبين على الزلم ، اللي يتقوى على مرة ضعيفه هذا لا تحسبينو زلمه ،،، شسوي ياالله اول نوبه بحياتي احس نفسي عاجز وما اكدر اسوي شي ...

حور: شتسوي بعد ، عود اقره الفاتحه على روحي اذا متت وعيش بعذاب الضمير طول عمرك ..

عمر : اش كافي احلفج بالله لا تحجيها ما اتحمل ..

باوعتله وكمت ابجي ...

بنان

وصلت يمهم شو ذوله حالتهم مدري شلونها عمر يرجف حور تبجي تخبلت ركضتلهم ...

عيوني تباوعلهم بقلق ...

بنان : هاي شصاير احجولي

ثنينهم صافنين عليه تخبلت ...

بنان : تحجون لو شلون شصاير وهذا حالكم ؟؟؟

رحت لحور اهز بيها ..

بنان : حوري احجي مو كلبي وكع ..

حور : شحجي انتهيت ..

بنان : يعني شنو ؟؟؟

حور : سأليه هو يجاوبج ..

التفتت لعمر

بنان : شسويتلها عمر احجي ..

صافن ويجر حسرات ويشرب بالجكاير ، هسه لو بس اعرف الربط وين بين الانفعال والجكارة اني ارتاح ...

نفخ الدخان وشمر الجكارة طفاها بحذائه ..

عمر : خطبتها والظاهر انلاصت ...

بنان : يعني انت رحت ..

اشر براسه اي ..

بنان : عزززة بعيني ان شاءالله ، شوداك متكلي ..

عمر : شمدريني همه ناس همج ومتخاف الله ، كلت يفرحون لان ولد جاي يخطب بنتهم على سنه الله ورسوله ، اول ما فتت تلكوني وعادي عبالهم جاي اشتري منهم سيارة ، من فتح عمي الموضوع انكلب حالهم والتمو عليه ، مدري منين كامو يطلعولي ، وتعال منين تعرفها ومنو كلك عليها ...

بنان : عزه عزه وتالي شصار..

عمر : واحد منهم ضربني هذا شايفو ابيتكم بيوم الانفجار الضاهر عرفني وكللهم بالسالفه و شلون هديت عليه بيومها .

اباوع على حور صافنه عليه وتنود تروح وترجع هيه وكاعده ، عيونها دم ومليانه خوف تاكل با اضافرها ...

بنان : وتالي ..

عمر : ضربني رجعتلو الضربه التمو عليه وناس ضربت ناس وهاي جيتي منهم ..

حور كامت تضرب على رجلها ...

حور : يلا بله وفوك كل هذا يكلي شمسوي واسف خرب بحضج حور وين ما كعد ..

بنان : امشي يمي للبيت لترجعين لبيتكم ..

حور : شلون اجي وياج وليون اضل،،، راجعه هسه ..

عمر : حوريتي ماعوفج ، لو اعرف موتي على ايديهم تصير ..

حور : الي ساعه احجي وياه ميفهمني ، بنان حاجيه خاف اني كاعد احجي بغير لغتنه ..

كمت وعفتهم هو وبنان ...

يعني شيريد يسوي يكتلوه بطلقه وحده ، واني الحكه ، والسبب جريمه شرف ، لا قانون يحاسب ولا عدنه دوله اللي تدور وراهم ...

سمعت بنان تصيح ورايه ..

بنان : حور انتضري ولج حورررر ..

وكفت والدنيا كلها طالعه من عيني اللي يحجي ويايه انفجر بيه ..

حور : هاا بنان شتريدين مني ..

بنان : وين رايحه ..

حور : اويلي للبيت ..

بنان : انتضري خلي نفكر شنسوي ..

حور : شتفكرين متكليلي خلي اروح واخلص ،هيه براسي براسي..

بنان : خاف يأذوج ..

حور : لا يطبطبون عليه ويكلولي بارك الله بيج ، وج حتى لو ابويه راد يسكت عني عصام راح يشعللهة لان هاي فرصته ...

بنان : راح اتخبل والله ، تدرين شلون اجي وياج ..

حور : وين تجين لخاطر الله ، عندج رجال انتي عبالج بعدج بنيه وبكيفج كعدي وسكتي ، توصليني لو اروح وحدي ..

بنان : امشي اوصلج ...

طلعنه ، رحنه للكراج صعدنه السيارة ومشيت على كيفي لان اعصابي متوتره خاف اسوي حادث ، والله الخوف العد حور انتقل بيه عبالك اني اللي واكعه بمصيبه مو هيه ...

حور : اختنكت فتحي الجام ..

بنان : مو عالكه تبريد .

مجاوبتني فتحتلها الجام وطفيته ، جان بدايه شهر العاشر بس حارة بعدها ...

خطيه وجها كله انكلب ، صارت زركه كلش خفت عليها ..

صار ازدحام وكفنه ودكيت على صميم ابلغه اروح ويه حور ....

اليوم اكثر من مرة اتصلت بيه ودزيت رسائل مجاوبني، قررت ازعل عليه لان مطنشني ، بس رجعت اتصلت بسبب حور ...

صميم : الو ها بنان متكليلي شبيج عندي اجتماع ثبرتيني ثبر ..

بنان : على كيفك ليش تصيح ، خابرتك حتى ابلغك رايحه ويه حور لبيتهم عدهم مشكله ..

صميم: وانتي شكو ، صايرتلي حلاله مشاكل ،متروحين

بنان : صميم شلون ما اروح المشكله صارت بسبب عمر ..

صميم : وعمر شعليه ..

بنان: غير خطبها ، وابوها واخوانها عرفو هو وياها بالكليه ..

صميم : اي وترحين شتسوين توكفين وجه بوجه وياهم ، مرتي تعارك زلم ، كعدي وسكتي بوجهج للبيت ...

بنان : صميم اروح يعني اروح .

صميم : عتبي بيتهم وشوفي شلون رجلج تتكسر انه هساع راجع للبيت الكاج كدامي واذا صار العكس ، لتلوميني ب راح  اسويه ...

وسده بوجهي ..

حور: كتلج جيتج مالها داعي على شنو سويتي مشكله بينكم ،وزوجج حقه، انتي حتى لو كايله لاخوانج لابوج هم ميقبلون متأكده ، رجعي وطيبي خاطره...

بنان : معليج بيه خلي يزعل شيسوي يسوي ، خلينه بمشكلتج وشلون نحلها ..

انفتح الازدحام واخيرا وصلت حور نزلت وكلبي نزل وياها ، خفت عليها خوف بعمري مخايفته ، اكثر من شغله حملي وشكد صعبه ومجنت اعرف يرجع صميم ويتزوجني لو يغدر بيه ويعوفني بنص الطريق وحدي ، بس خوفي اقل من هسه ..

ضليت واكفه باب بيتهم بالنص ساعه انتضر اذا اسمع صوت عياط انزل ، بس مسمعت شي ، توني ردت احرك واشوف عمر واكف قريب على بيتهم دكيتله هورن اشر بيده يعني روحي .....

هذا شديسوي بروحه وبحور ، شلون ورطه ياربي ، رجعت للبيت سيارة صميم مموجوده ، معناها بعده مجاي ، فتت للبيت كبل للحمام سبحت وبدلت وكعدت الوب حتى نسيت اسوي غده ، من التوتر والقلق ، صارت ٣ ونص انفتح باب الشقه فات صميم وجها ميكصه السيف ...

راح للغرفه كبل اخذ منشفه وفات سبح وصاح ..

صميم : جاي تعبان متسألين متسمم لا ..

بنان : والله مسويت غده ..

صميم : ليش شوكت رجعتي ..

بنان : شبيك تصيح هسه اسوي نواشف ..

صميم : شوكت رجعتي جاوبيني ..

بنان : قبل ساعه ..

صميم : ومعرفتي تسوين غده ، شنو جنتي تسوين ، هاي بعدنه بسم الله والغده كلو من بره ، اسبوع انه اجيب وياي واليوم الصبح كلتي لتجيب انه اسوي وينو غداج ..شلون نسوان مال تالي وكت ...

بنان : من ترد على رسائلي ومكالماتي ذاك الوكت اني اصير من النسوان اللي تعجبك ..

صميم : ترة ذبحتيني برسائلج ، ادري يارساله بيهن المهمه حت اعوف شغلي والناس واجاوب ، يوميا الف رساله دازه ، انه تريكت ، قريت ، دخلت محاضره لتخابر سويته صامت ،انت وين انه وي صديقاتي بالنادي تذكرت كعداتنه واشتاقيت ، رجعت للبيت سبحت بدلت نضفت ،تفاصيل ممله ومبالغ بيها ، ثرثرة مالها داعي مرات من عندي وكت اجاوب من ماعندي اقراها وابتسم فد مو معناها انه متجاهلج لو ماحبج الف مره عاتبتي وفهمتج ، يا بت الناس انه اختنك لا هواي تراسلين وين صرت وشوكت ترجع وشجاي تسوي..

بنان : لعد بالخطوبه شو جنت للفجر تخابر وتراسل ومتمل وانت تسألني شنو دتسوين ، هسه صارت تفاصيلي ممله بالنسبه الك ...

كمت ابجي ..اجه تقرب يمي ..كعد بصفي ..وحضني ..

صميم : انه تعبان وشغلي هواي وجنت ما اعرفج وحاب اتعرف عليج وتعرفت وخلصنه  ، هساع ماله داعي ، كل شويه دازه بالله الكريم اختنكت ، مرات افرح واضحك على سوالفج ومرات تلحين هواي خصوصا من اتأخر بالرد ، ها بالك مو وياي يمك وحده حلوه ، وانه ابو ابوي مشتعل من التعب ...

بنان : بعد لا ادز ولا اتصل ، وخليني اكوم اسوي غده ..

صميم : كعدي راح اخابر يجيبون اكل ..

طلع موبايله واتصل ، وصه دجاج على التمن ، وره نص ساعه اندك الباب نزل جاب الاكل وصعد ..

صميم : كومي حبيبتي حضريلنه الصينيه ..

كمت بملل جبت الصينيه والخواشيك وخليت الاكل بيها وخليته على الطبله وفتحته كمت ذبيت الاكياس ورجعت هو ياكل واني اخوط بالاكل مالي نفس ..

صميم : يولو ما تاكلين ..

بنان : ما اشتهي بالي يم حور ..

صميم : خابرت عمر يكول سنطه وبيتهم محد دخل بعد ما دخلت حور.

بنان : اي بعدهم بالشغل هسه يرجعون ...

صميم : لتخافين مايسوون شي اصعبها يبطلونها ويكعدونها بلبيت ..

بنان : وليش هاي هينه عندك ..

صميم : انه شكو ، اهلها هيج تفكيرهم متحجر ...

الحمدلله ، رايح انام ساعه وكعديني ..

بنان : تمام ..

كمت شلت الاكل وديته بالمطبخ ، ركضت على تليفوني دكيت على حور متجاوب ، دزيتلها مسج ..

💬

فدوة رحتلج كتبيلي اول بأول ، ادري مو وكتي ، بس راح اتخبل والله طمنيني عليج ...

انتضرت ماكو مردتلي ، ضليت الوب اروح واجي ولازمه الموبايل عسى ولعل ترد ...

___________

روند

جنت كاعده ودك تليفوني قسور ..

قريت الاسم وابتسمت ، جاوبت ..

روند : الو هلو قسور ..

قسور : هلو روند شلونج ..

روند : زينه الحمدلله وانت ..

قسور : زين ، اني جيت ودخلت للجامعه وين الكاج ..

روند : اوصفلي مكانك اني اجيك ..

وصفلي سديته ورحت امشي ويايه قمر ..

قمر : شبيج ايدج عركت وتعصرين بيدي شكو هههه..

روند: ولج خايفه اول مرة اشوفه ونكعد وحدنه حايره شنو احجي وياه ...

قمر : خايفه اممم لعد منو الها ساعه تتغزل بيه امي ..

روند : اش سكتي ذاك اجه ..

يمه  هو شافنه واجي يمشي ، لابس الزي الزيتوني ، والنضارات والحذاء والحزام جوزيات ، والمسدس صفح والطلاب كلها عينهم عليه ..

روند : وج كاعد تشوفين نعمه الله شلون تمشي على الكاع ..

قمر : هاي شلون دخلوه للجامعه وعنده سلاح اني سامعه ميصير..

روند : دسكتي هيه دوله وماكو وهذا ضابط يعني هو الدوله ..

قمر : مخبله والله باعي اني راح اروح وانتي ضيعي بحبج لتضيعيني وياج .

اجه ونزع النضاره وكال السلام عليكم ..

عبالك كلي احبج ، وجهي صار احمر وخجلت ودنكت راسي ، جاوبته قمر ...

قسور : نكعد هنا لو وين تحبون ..

روند : بكيفك ..

قمر : اخذو راحتكم اروح اني عندي محاضره ..

اغمز الها اريد ماكو راحت تركض..

قسور : شبيج خايفه ..

روند : اني

قسور : اي ، حجاها وضحك ..

روند : لا بس توتر لان اول مرة احجي وياك ..

قسور : ويارب مو اخر مره ...

مشينه ودخلنه للنادي كعدنه ..

ماعرف منين كامو يجون الولد اللي يشتغلون بالنادي ..

سيدي وسيدي ، قسور يحجي وياهم بتواضع وحتى من يسلمون يوكفلهم ، ابد ماعنده تكبر ...

راحو رجع كعد

قسور : شنو تاكلين ؟؟

اخ هو اللي يشوفك يريد اكل بعد ..

باوعلي وضحك دار وجها رجع باوعلي ..

روند : شبيك تضحك ..

قسور : نضراتج ..

روند : شبيهن ..

قسور : مابيهن هههههه..

يبو فشلت هيج مبين عليه امداج روند ..

قسور : نحجي بالمهم لو نخلصها نضرات شتكولين ؟؟

روند : هااا اي اي نحجي بالمهم ...

قسور: ههههه زين يابه زين ، اعرفج عن نفسي ، اعرف اهلي عرفوج عليه بس احب احجي اني عن نفسي حتى اي سؤال يعجبج تسألين سألي لا تترددين ..

روند : اي ...

قسور : اني الابن الجبير لاهلي ، مواليد ٨٣ متزوج سابقآ ومتفقنه صار انفصال وكلمن راح لدربه ، هيه تزوجت واني التهيت بعملي ومجان عاجبني اكرر التجربه وتفشل انتضرت ونطيت فرصه لنفسي
اشوف مشاعري اتجاه طليقتي انتهت بعدها يلا ارتبط مرة ثانيه واكيد لازم اختار صح هلمرة ومن شفتج ...

ابتسمت وخليت ايدي جوة حنجي ، هو سكت وابتسم على الواهس ...

قسور : اكمل لو شلون ترة حركتي عشيرتي ...

روند : شمسويه والله كاعد استمع ...

قسور : ياويلي يايابه تستمع سامعين ياناس اذا تستمع وهيج اذا حجت شلون ..

روند : كمل عليك الله شنو صار من شفتني وشوكت اول مرة ...

قسور : جانت عندي شغله بمنطقتكم ، اكو حادث صار اذا سمعتي بيه ، خطف طفل وجان الخاطف جيرانهم ...

رجع ضحك ...

روند : هسه ليش تضحك مو الموضوع مهم واني مركزة وياك والله ...

قسور : اخ لو عندي مرايه واشوفج ، عليمن مرايه جيبي موبايلج واصورج وانتي شوفي شكلج راح تضحكين لو لا . .

روند : اني هذا طبعي من اركز ويه واحد اندمج خصوصا اذا جان الموضوع مهم ..

قسور : احم ، ياويلي نيالك قسور لو كلها هيج تندمج لو بلا ..

روند : كمل عفيه شصار..

قسور : لجحتج اول مره ، جنتي ويه امج طالعه راجعه ما اعرف المهم شفتكم قريب من بيتكم وعرفت مكان سكنج ...

روند : زين ..

قسور : بروح اهلج لتباوعين تره خربطتي سلسله افكاري كلها ..

روند : راح اغمض يلا كمل ..

غمضت ، وهذا ساكت فتحت عيني وانصدم ، شلون مركز والنضرات ياويلي ...

ارتبكت وضحكت .

روند : ترة انت هم نضراتك ...

قسور : شبيهن ..

حجاها وغمز ..

روند : احسن شي نغمض ونحجي لو نرجع للموبايل احسن هنا كلمتين مكاعد تطلع ...

قسور : اكملج ..

كلت بكلبي عساك لا سكتت كمل كمل من فدوة رحت لهالصوت ...

قسور : جنت اشوفج كل يوم مثل التعودت ، كمل التحقيق ورجعنه ، صرت اشتاق اشوفج ، كمت ما احس بنفسي اله فريت السيارة وطبكتها ابابكم ...

روند : وهاي عايف شغلك وتجي تكابل بيتنه ..

قسور : لا طبعا من عندي فراغ اجي اكحل نضري وارجع ..

روند : عوفك من هذا كله وخلي نحجي جد..

قسور : الي ساعه احجي ، شجنت انكت ..

روند : لا القصد من كلامي ، سالفه دوامي ليش تريد تبطلني شنو السبب واني مرحله ثالثه حرامات ...

قسور : اني عندج اكفيج وادللج وما اخليج تحتاجين شي وبعدين تخرجتي وين تتوضفين خصوصآ قسمج ماكو الكم تعيين ، لهذا من رأيي تختصرين التعب وتكعدين بيتج ، تنتضرين زوجج من يجي ، يلكاج كباله مثل الورده المفتحه خوما اجي الكاج نايمه جفي على وجهج من التعب ...

روند: بس اني حابه اكمل ، مو علمود وظيفه علمود نفسي وحرامات تعبي صار سنين ادرس تالي هيج يروح..

قسور: هذا اخر كلام .

روند : اي اخر كلام تريدني تخليني اكمل دراستي ومن بعدها نتزوج متريد براحتك ...

قسور : هذا هو افكر وانتي هم فكري بالكلته الج ويصير خير ، هسه اغديج هنا لو نروح غير مكان شتحبين ..

روند : اكلت ويه البنات قبل لتجي ، وهاي نزلت عصاير يكفي ...

قسور: اروح اني تحتاجين شي ..

روند : سلامتك ..

قسور : مع السلامه ..

روند : الله وياك ، احم ...

كام وكمت وكفت ، مشه ليغاد وكعدت اراقبه ، لبس النضارة ويمشي ياويلي....

شكد عيب هسه يكول شكد زاحفه ،، هسه غير لو اثكل خرب ....

دكت عليه قمر كمت رحتلها وضلت تستفسر وتسأل حجيتلها وخربت ضحك عليه ...

روند : اوكفي بنان وين حور ..

قمر : ما اعرف بس شفت رونق كالت اكمل استنساخ والحكم ...

روند : خلي اخابر على بنان اشوفهن وين ..

دكيت جاوبت..

بنان : ها روند

روند : وينكم بالجامعه لو بالكراج ..

بنان : يوو نسيت اخابر اني توني وصلت حور للبيت ورجعت نسيت ابلغكم ..

روند : خوما صاير شي وياكم ضل بالي ..

بنان : اي والله صاير وشي جبير هم ..

روند : احجي يمعوده متت بدمي  .

بنان : عمر خطب حور واهلها عرفو وياه بالجامعه وعصام متعرف عليه لان متعاركين بيتنه ، وعبالهم علاقه بينهم ...

روند: يبو شلون مصيبه سدي ، جايتج للبيت ...

قمر : هاي وينها ..

حجيتلها وخابرت على رونق هم اجتي وعرفت وبوجهنا  رحنه لبيت بنان بس نطينه خبر لأهلنه انو راح نتأخر ...

وصلنه لبنان وحال الضيم حالها كعدنه كلنه وننتضر خبر من حور يطمنه على وضعها وانو هيه بخير...

________

حور

اول موصلت للبيت هدوء كلشي ماكو ماما وسهى بالهول كاعد يشربون جاي لان هنه يتغدن قبلنه احنه نتأخر كل واحد رجعته شكل ، سلمت وصعدت فوك بدلت وفتت سبحت وتوضيت وكعدت اصلي ، ذبيت حمولي على رب العالمين هو الوحيد الكادر يخلصني من الشرذمه العندي ...

كملت صلاه وشلت السجاده ومددت اريد انام ميته نعس بس من الخوف ما اكدر ...

ضليت كاعده ومنتضره شوكت يجون اريد اخلص ...

صاحت ماما عليه علمود انزل اتغده كتلها ما اشتهي ..

للمغرب اجوي صعدولي كبل

ابويه وضافر وعصام ، ٣ مجرمين حيوانات بهيئة بشر ..

وبده التحقيق ويايه ، منو هذا ومنين تعرفيه وشكد صارلج وياه،  احجي... يجيني راشدي لو دفره منهم وكعت بالكاع ، وهمه يحققون ، ميصدكون باللي اكوله،

حور : حجيت الكم الصدك تصدكون كيفكم متصدكون هم كيفكم ..

هنا اني لا بجيت ولا توسلت ، بس شعور الكره طاغي علينه ، همه يكرهوني واني ابادلهم نفس الشعور ويمكن اضعاف منه ، سحبو تلفوني مني تفتيش من هذا الزين شافو مابيه شي غلقه عصام وخلاه بجيبه ...

ضافر : دوام ماكو بعد وتضلين هنا مثل الجلبه على ما ياخذج مؤيد ونخلص هاي اذا قبل بيج بعد الفضيحه الصارت اليوم ...

حجي ولغوه هوواي واني اكتفيت بالسكوت لان اعرفهم ميرحمون واعرف راح يبطلوني ، يعني شي متوقعته ليش ارادد واتعارك واتأذه وبالتالي الخاسر الوحيد اني ...

مرت ٣ ايام ورحت على سهى طلبت اتصل منها على بنان اطمنها مابيه شي لان خطيه بالها يمي اعرفها هسه ممرتاحه وكاضيتها بجي ...

اتصلت ردت ..

بنان : الو منو؟؟

حور : هلو بنونه اني حور ..

بنان : خرب اهلج ماتو ان شاء الله متكليلي وينج مو قطره دم مضلتلي من الخوف والرعبه عليج كلت كتلوج هاهيه ..

حور : ليضل بالج ماكو شي عدت الحمدلله بس اخذيلي اجازة بلكت يقبل رئيس القسم كليله حاله وفاه عدها..
ومن اجي اني احجي وياه ،بلكت اسبوع والله يهديهم وارجع اداوم ، وباعي تليفوني عدهم لتدزون اي شي وصي البنات ، خصوصا صوركم بالكروب لتدزوها تره عصام فاتحه عنده..

بنان : واكول شنو نكتب يطلع يمنه انتي قاريته وتخبلنه ليش متردين علينه، همزين محجينه شي بس سألنه عليج..

حور : اي الحمدلله يلا حبيبتي اروح خاف يأذون سهى اذا عرفو اني متصله منها ..

بنان : الله وياج ، ربي يحميج وترجعيلنه ..

حور : امين يلا بنونه اروح ادعيلي انتي والبنات وخلي خاله تدعيلي امانه تعرفين ماعندي ام وتدعي بكلب محروك ، اريد امج تدعيلي لان الله يسمع لدعاء الامهات..

بنان : بجيتيني ولج انعل زيدون لابو لمياء وانعل كل اهلج ...

حور : صايره مثل رجلج لسانج زفر ..

بنان : من حركه كلبي عليج ٣ ايام منايمه اني وكاضيتها تطنكر على صميم ...

حور : لتأثرين سلبي على بيتج معليج مني هلمرة تخرب حياتج ...

بنان : امانه الله ورسوله حوري .

حور : هههه راح اقاتل شبيج ...

بنان : والله العدو اشرف من اهلج..

حور : يلا حبي اروح ..

بنان : الله وياج ..

راحت وكلبي عليها متت خوف ...

مرت عشر ايام كضيتها بين غياب وبين دوام بسبب خوفي على حور ولان بدايه سنه مو كلش يحاسبون ..

وبيوم داومت ومن طلعنه اني والبنات افترينه على المحلات وعجبني اخذ جريده صارلي هواي مقاريه مقالات صميم  من تزوجنه لحد الان مقريتله ولا مقال ...

اخذت جرايد مال اخر ٣ ايام ورجعنه للسيارة ، طبعا نزلنه من الخط واخذت البنات ويايه نروح ونرجع سوه كلش تونسنه بس كسرت فرحتنه حور ، نخلص الطريق ضوجه وساكتين عكس اول ايام الضحك مالتنه والشقه حتى مرات اتوسل بيهن يسكتن لان اكوم ما اشوف طريقي هلكد ما عيوني تدمع من ضحك ...

وصلت البنات كل وحده لبيتها وخابرت صميم ..

بنان : الو حبيبي ..

صميم : هله بنونتي شلونج اشتاقيتلج ول ياب ..

بنان : اني هم حبي راح اروح لأهلي انت تتأخر مو..

صميم : اي اتأخر اليوم ، خوماكوشي ضل بالي ..

بنان : لا والله ماكو بس نفسيآ تعبانه..

صميم : ممممم يراد اعدلج نفسيتج بليل ...

حجاها ويضحك.

بنان : على اساس مقصر انت ماخذ حقك وزايد..

صميم : علمودج انه ..

بنان : يسلم مودك عيني ، يلا راح اروح حبي لان واكفه بالباب ..

صميم : تمام سلميلنه ..

بنان : يوصيل الله يسلمك ..

دخلت الكل فرح بجيتي اله ماما بعدها وجها ثكيل عليه كوه تنطيني خدها ابوسه ..

زينه : يلا ولج تعاي تغدي ..

بنان : اجيت بس ابدل..

اسماء: تراكسودج بغرفتي البنات غسلنه الج ..

بنان : عاشت ايدج وايد البنات ..

طلعت صارت بوجهي مرت غسان بطنها واصله لخشمها ..

بنان : يافدوه شوكت تجيبين صايره بطه ..

رانيه : شسوي ابن اخوج مجلب ميرضه يطلع ..

بنان : حقه اذا عنده هيج ام حنينه شلون يعوفها ويطلع ..

رانيه : يوم الج ولزينه ويترس حضنكم جهال ..

بنان : اني ماريد هسه اكمل يلا ..

رانيه : بعدلج سنتين ولج شعجب يصبر زوجج..

بنان : يصبر يصبر معليج احنه متفقين  ..

رانيه : الله يسعدكم ..

بنان : يسعد الجميع حياتي ..

رانيه : يلا بدلي حتى تتغدين ..

بنان : هو رايحه ابدل ..

رحت ابدل وادعي لسيوفي وزينه يصير عدهم طفل خطيه ثنينهن مابيهم شي بس مكاعد يصير ...

اجه بابا والولد تغدينه وسولفنه شويه غيرت جو ..

عفتهم يشربون جاي واني صعدت انام ، اخذت الجرايد وياي ...

زينه: كثري جرايد بنون حتى امسح الجام فدوة خلصت اخر وجبه ..

بنان : كون يسمعج صميم تمسحين بتعبه الجام..

زينه : خلي يطير رجلج هم بطران خوش عايش جو ، اقراله مرات خوش يجذب ..

بنان : امداج هههههه لعد سيوفي ميغازلج ..

زينه : وين ياحسره ازيد شي يكلي اليوم طالعه حلوة لان خليت مكياج ، ولج بس بالبدايه يصبغ بيه هسه كمت اني اتغزل واركض وراه ..

بنان : والله عاد سيوفي يسوه واحد يركض وراه ويتغزل بيه ..

زينه : اخوج غير وتمدحين بيه..

بنان : لا والله بس صدك يستاهل ، يلا ولج اروح انام قبل لا يجي صميم ..

زينه: يلا نامي عيني انتي وجرايدج .

بنان : كاتلج كتل الجرايد...

صعدت واضحك على سوالفها ...

مددت على جربايتي القديمه ، جانت راحتي الكاها بهاي الغرفه ، هسه لا تعودت على مكاني بيتي احس هنا ماكدر انام شلون تعويد  ، ومن عفت بيت اهلي وتزوجت اخذت مخدتي ويايه يلا كدرت انام هسه شلون اجيبها واجي ...

لزمت الجريده وكعدت اكلب بيها وادور على المقالات ..

لكيته ههههه..

( امرأتي ثرثارتي فاحشة الانوثة ، احببتُ أمرأة متطرفة الانوثة ترهق رجولتي تبعثر كياني احيانآ تتعبني وكثيرآ تسعدني ، شاجرتها بسبب ثرثارها اليومي ، فقاطعتني وعوقبتُ على فعلتي بأفطامي من حديثها ، ف اصابني الجفاف يا سيدتي مزقني الفقد لاني تعودتُ على رسائلكِ ويومياتكِ تركتني بلا تفاصيل ، لاني قلتُ لكِ بأنكِ بالغتي في وصف يومك لي غضبتي وكابرتي وساد العناد بيننا اشتقتُ لتفاصيلكِ عودي وحدثيني عنها ، لانني لا اقوى على الاعتذار منكِ كما يعتذر الناس ، لقنتيني درسآ جيدآ واعدكِ بعدم التكرار انتِ واضحه جدآ وعفويه كوني هكذا دوما ولا يلوث نقائكِ عتابي لكِ)

الكاتب
صميم موسى قحطان ..

ضحكت ولزمت تليفوني ودزيتله ..

💬

تغديت بيت اهلي بس مكانك خالي وراح انام .

دز
💬

هههههههه احبج .

💬

ليش ضحكت

💬

لان رجعتي ..

💬

حتى تحس بالنعمه اللي انت بيها ، من اهتم بيك تكول خنكتيني ...

💬

ول ياب راضي فد لا تحرميني منج ، كل ما تجيني رساله افرح ويضربني الغرور عبالي منج واتفشل من تطلعين مو انتي .

💬

مممممم يلا راح انام ..

💬

نوم العافيه ساعه واجي..

💬

هله بيك دير بالك من تسوق ..

💬

اعشكج

دزيتله بوسه ونمت ...

______________

روند

كاعده اني وحسن واريد افاتحه بموضوع قمر لان حسيت بيها كلش تحبه وتعلقت بيه وهواي تسألني عليه ، كلت بلكت يخطبها وهيه حلوة وحبابه..

روند : حسوني .

حسن : روند سوك ماروح منصور ما اوصل لابو السوبر ماركت لو يطلع جدج من كبره ما اطلع ..

روند : ههههه شبيك كبيت هو اني شنو كلت ..

حسن : كلتي حسوني ..

روند : مو زين ادلعك ..

حسن : لا موزين هاي تترتب وراها هواي امور وخساير فلوس ..

روند : باوع صديقتي تخبل وتجنن واخلاق وكلشي بيها حلو ..

حسن : الله يخليها لأهلهة اني شكو ...

روند : مو اريدك تشوفها ..

حسن : وليش اشوفها ..

روند.: وشبيك عصبي ، لعد متخطب تضل طول عمرك هيج ..

حسن : سدي الموضوع احسن ..

روند : بس..

قاطعني ..

حسن :صايره فد نوب لحوحه مينكعد وياج ..

عافني وكام ، شبيه هذا هسه اني شكلت....

_____________

حور

عمر اجه اكثر من مرة واسمعهم يكولون شلون ضاربيه وبابا تافل بوجها ومطرده كلش قهرني...

كاعده وحايره بهمي واتذكر الماضي مالتي شنو عشت وشنو شفت ، بهاي الايام الراحت شفت انواع التنمر والاذيه منهم مرات الضرب اهون من الكلام الجارح يخلي بيك اثر مينتهي طول العمر يضل ملازمك ...

خلوني اعتزل الناس دائرتي ضيقه علاقاتي معدوده وقليله ، اشك بكل واحد يريد يقدملي الحب والمساعده ، كوكبي صغير خالي من البشر يوميه اعاتب نفسي بسبب اعتزالي للناس وعدم ثقتي بيهم بس هذا الشي يرجع لسبب نشأتي الغلط...

طول عمري اتظاهر بالقوة واني اقوة من كل المخاوف اللي تصادفني ، بس من يجي الليل وابقي وحدي بغرفتي الباردة الخاليه من المشاعر والاحاسيس فارغه مثل دواخلي ، تطلع الطفله البداخلي اللي متكدر تنام بسهوله اذا ميجيها ضرب من التفكير يوصل بيها مرات لحد الجنون ، اكوم اتخيل اصوات خطوات عصام لغرفتي وافز مرعوبه واركض للقفل والكاه مقفول واضل الهث من التعب وانتضر ساعات اتوسل بعيوني يلا اكدر انام مره ثانيه ، مرات من اطلع للدوام او اشوف ناس غربه مو كلش اخاف منهم مو مثل خوفي من اهلي ...

الناس الغربه بالنسبه الي اقل رعب من ناس قريبين عليه وهمه ينهشون بلحمي واني بينهم ....

الرعب لا يأتي من البعيد  بل من القريب المترصد الذي اعلمتهُ بكل مخاوفك ضنآ منك انه سوف يحميك من الوحوش ومن الزمن ........

وبيوم كاعده وصعدولي اخوتي الاربعه وابويه وحامين حيل ويحجون بزود وتهديد ..

اللي شايل حزام واللي جايب سجينه واللي محضر ايده حتى يضرب والاب نافخ نفسه عنده زلم راح يتولون بنته الضعيفه ....

ضافر : لبسي حجاب ونزلي كدامي بسرعه ..

اني هم لبست حجاب وجبه ونزلت ...

والكه عمي الجبير ، ومؤيد وابوه واخوته

و ولد عمامي اربعه وعمي الصغير ...

كعدت وعمي بده يحجي بدون مقدمات .

عبارات العقد مؤيد كال نعم ..

فرصته هاي هم اخذني بتوسل من اهلي وهم يكسر خشمي عود اني عار ويستر عليه مسوي فضل براسي ...

السكير ..

وصل الي عمو ..

حور بنت زيدون هل تقبلين الزواج من مؤيد راضي على مهر معجلهُ عشر ملايين دينار عراقي ومأخرهُ خمسه عشر مليون عراقي أن قبلتي التزويج فقولي نعم انت وكيلي ....

باوعت بالوجوه الكل تريد تاكلني ، ومترقبين الحرف مني حتى ينهشون لحمي ..

باوعتلهم وكلبي مليان خوف ..

وكلت ....

يتبع ....