علاقات زائفة

البارت السادس والعشرون

الحب يتحمل الموت و البعد أكثر مما يتحمل الشك و الخيانة..

الشك هو الصديق الحميم للارواح الضعيفة
______💔

صميم : يعني قرارج نهائي ،مصرة عليه ..

بنان : نهائي وما اتراجع ابد ..

صميم : يجرالج ، عندي شغله اكملها ، وامشي ب اجرائات الطلاق ، خاف عبالج انه ما اريد اطلكج بسبب المؤخر، حقج كله يوصلج ، وانه الممنون ...

بنان : كلشي ما اريد منك واني وبابا اتفقنه اتنازل عن كلشي مقابل تطلكني ..

صميم : هيج كارهتني بحيث تتنازلين عن حقج مقابل طلاكج مني ..

بنان : اتنازل عن حياتي هم ، بس كون اخلص منك ..

حسيته انقهر حيل وعيونه دمعت ، كال ...

صميم : احجيلج عني اول ، وبعدين اسوي اللي ترديه .

بنان : اي شي تحجيه ميغير من رأيي لتعب نفسك ..

صميم : اسوي اللي تحبينه فد سمعيني اخر مره ..

بنان : احجي اسمعك بس اختصر لان تعبانه ...

دنك راسه ، ابستم وكال ..

صميم : والله وكت ، انتي جنتي تطلبين احجي وما ترضين اسكت ،وتخابريني اجيج نص الليل حت تشوفيني وهساع تردين اختصر ..

دمعت عيوني انقهرت ..

بنان : انت كلت جنتي ، يعني ماضي وانتهى ...

صميم : على العموم ، اختصرلج ..

جر نفس طويل وقرب الكرسي يمي وبده يحجي ...

بمجتمعنه ، اهل الغربيه بالخصوص ، من يولد اول مولود ذكر ، والثاني هم ذكر ، يصير مجيئه كمجيء الملوك ، الكل تحتفل بيه والعزايم والذبايح كأنما ،شو منو جاي الهم مو مجرد طفل صغير عمره ميتعده ساعات ،

ولدت ملك وكبرت ملك بوسط عائلتي ، كل طلباتي مستجابه ، اذا غلطت ما اتعاقب ، ولا اتحمل مسؤوليه ، دائما والدي هو اللي شايل عني مسؤوليات اللي المفروض اني اسويها ، وشنو اريد يجيني

، دائما جنت اسمع من خواتي من جنه صغار ، صميم صاحب الحظ الاكبر بينه ، اخذ محبة امنه وابونه وهو الوحيد اللي مدلل حت اكثر من جراح ،

شنو جنت اسويه يكلولي صح ، حت لو جنت غلطان ، ما اتذكر فد يوم تعاقبت على سوء بدر مني ، او كسرت حاجه الهم وصرخو بوجهي ،

جنت مشاغب عنودي وقيادي ، احب اتحكم ب أصدقائي ، جنه دائما نلعب لعبت الملك والجلاد على طول جنت انه الملك وانه الجلاد ما العب اذا مو هيج ، ما فد يوم اهلي حسسوني انو انه غلط ،

او عنادي مو طبيعي وهذا راح يأثر على مستقبلي من اكبر ، ابويه وامي ، ساهمو ب افساد حياتي ، غذوني بكل الصفات اللي هسه كاعد يضوجون مني من اتصرفها ،

مثلا ارفض طلب لابويه ، ما اقبل اشتغل هناك بديرتنه ، او ما اتزوج وحده من ابناء عمومتي ، على الرغم هو اللي ركب هاي الشخصيه وغذاها ،

ولدت على الفطره ، ممكن جيناتي جانت بيها صفات القياده ، او العناد ، فد ابوي هو اللي غذه هاي الصفتين بيه وخلاها تكبر ، كبرت تمردت على ابويه ما اقبل يقودني او يوجهني ، ولا ارضى واحد يشاركني بشي احبو ، احب اللي الي يضل الي وحدي ..

ابوي مشاف عيوبي من جنت صغير ، ومجان يكره تصرفاتي ، بالعكس جان يشجعني ، ومن جراح يحاسبني يوكف بوجهو ويكلو معليك بيه انه اربيه ، مادام راسي يشم الهوى خله يتدلل ، ...

كبرت ، بده يطلب مني اساعده بشغله ، رفضت ، رادني اكون ساعده الايمن والابن اللي يتفاخر بيه جدام الناس ، فد انه جنت ارفض ،
ملتهي اتعرف على بنيه واترك القديمه ، مثلي مثل اي شاب يحب يلعب ويتسلى ويقضي وقت ،
واكيد انه ما جابر وحده تحجي وياي ، ولا شايل الها سلاح ، وغصب اجيبهم لا من نضره تجيني ، بالبدايه جانت علاقاتي متتجاوز تليفونات ، كبرت كمت اريد اكثر ، المكالمه ماكاعد تشبعني ، او ترضي غريزتي الرجوليه ، دخلت جامعه ،

وتعرفت على طالبه بقسمي ، بسرعه ذبت ميانه وياي ، انعجبت بشكلي او شخصيتي او فلوسي ما اعرف

المهم ، نطتني مجال هواي وخلتني اتمادى وياها بالعلاقه الى ان طلبت مني نعيش علاقه كاملة وفعلا اخذتها لمكان ،
وهذه جانت اول علاقه عاطفيه حقيقه اعيشها ،

حبيت الفكره ، استمرت علاقتنه اشهر ، جنت ماخذ راحتي وياها ، متغار ولا تدور ورايه ارتاحيت الها حيل

، اتشاقه ويه بنات غيرها عادي عدها وطبيعي ، جنت اسألها معقوله متغارين عليه، تكلي اني اكدر افصل بين الحب والصداقه ،
والبيني وبينك حب ، وذني مجرد صداقه ، حبيتها ، وحبيت بساطه تفكيرها وتحررها ،

جانت مختلفه عن البنات ، با افكارها وعاداتها وتحررها ، عشقت اختلافها ، بس مع هذا من جانت تطلب مني زواج امقت الفكره واستبعدها واكلها نضل هيج افضل ، وهي جانت توافق بدون نقاش ، متعبني ..

بنان : كافي عفيه اسكت لعبت نفسي انقرفت منها ومنك اسكت صميم لتحجي بعد لتكمل ...

صميم : استمرت علاقاتي وجنت اجيب البنيه بكل سهوله ، وهيه تطلب مني علاقه ، وتطلب تطلع وياي ،

الى ان صادفتج ، عبالي مثلهن اكدر اجيبج بكل سهوله ، فد طلعتي تختلفين ، بكلشي ، تراهنت عليج ، انو اخذج واوكعج ، جنتي متنهزين ، كبرتي بعيني وتمسكت بيج اكثر ،

بديت اطاردج من مكان لمكان اريد فد احصلج بأي طريقه ، عسما بالدم ، هلكد ماعرفت بنات فقدت الثقه بيهن، وانتي رجعتي بيه الثقه ، بجنس حواء ، لهذا جنت لا اشك بيج ولا احاسبج ، لان عندي ثقه بيج انتي شنو ، انطيتج مطلق الحريه بيت اهلج و ويه صديقاتج ، مقيدتج بأي شي ، ....

وجنت مرتاح ومترهي ، واكول الي ومتصير لغيري، خصوصا من جنتي تكولين احبك وما اكدر اعيش بدونك تملكني الغرور ، شفت نفسي عليج ، كل ما تبجين عليه من نتعارك ونزعل ، انه جنت افرح احس انو حبيبتي صدك تحبني ومتكدر بدوني عشت شعور ،غريب اول مره احسو ،

اللي جنت اعرفهن قبلج مجرد تنتهي العلاقه تروح ، بس انتي تمسكج بيه وحبج الي اول مره اعيشو ، لهذا خفت من كلتي ننهي ، توقعت من اغيب عنج ترجعيلي ،

وخفت اكثر وزاد خوفي من عمي خابرني وكلي تعال طلك تخبلت ، الليل يمر عليه ، سم ، ما اكدر انام ادخن وكمت اشرب ،
اول مره بحياتي اشرب بسببج ، عزت نفسي منعتني اخابرج واعتذر ، ردتج انتي تبادرين وترجعيلي ،

كمت اراقبج من بعيد لبعيد بدون متحسين ، سواء بالدوام او بيتكم ، سكنت شارعكم رايح راجع ،اتمنى ادك الباب وافوت احضنج واكسر ضلوعج ،
هلكد ما مشتاقلج ، ومن شفتج كاعده تقرين ويمج شباب وصديقاتج والضحكه ماليه وجهج ، وفرحانه هنا جانت القاضيه بالنسبه الي ،

كلت هذا هو نستك وصرت ماضي ، اشوف حماسج شلون تحجين وياهم وانه تزداد غيرتي وحقدي عليج ، جنت واثق تمام الثقه انو انتي مستحيل تيشيلني من داخلج وتنسيني ،
او تنسين سوالفي وياج وحجينه ، وماكو واحد يكدر يثير اهتمامج غيري ، من شفتج عادي متأقلمه بدوني ومرتاحه ضجت ، تخبلت ، اجيت وعاتبتج ، تمنيت تكليلي اشتاقيتلك لو تحجين ويايه بلهفه جنت منتظر منج غير كلامج اللي سمعتو منج ...

من شفت برودج بالكلام وصدج الي ، حسيت الدم صعد براسي صرت اغلي دفرت الكرسي وكمت ،

حت ما اسوي مصيبه ، نفسي بده يخنكني ، التشيرت اللابسه احسه جبل على صدري عضلاتي بدت تتشنج ،

كعدت على الرصيف ، ركض عمر جابلي مي غسلت وجهي وشربت اريد اتنفس ما اكدر اختنكت ،

هنا ايقنت انو انه احبج اكثر شي بالدنيا وخفت ترحين مني ، عمر يحجي وياي وانه ساكت اريد هدوء كمت ما اتحمل اصوات الطلاب ،ولا حت عمر ،

كمت امشي سريع وصلت للسياره صعدت بيها اريد اسوق ما اكدر ايدي ترجف ، ضليت افتر بالشوارع مثل المخبل ردت اندعم اكثر من مرة ،

وزاد خبالي من ابوج خابرني بليل وكال تعال حت ننهي ، هنا ساعه غضب ، فكرت أأذيج فد جانت فكره وبس ، كلت اجيبج واحجي وياج ، اخذتج وياي ، وانه كلبي واجعني حسيت بديت اخسرج اكثر ، كل مجالي كاعد اذبح علاقتنه ،

عفتج بالهول وفتت نمت خفت عليج من نفسي ، خفت يعميني الغضب واسوي شي اندم عليه ، خفت أأذيج ، طلعت من الغرفه لكيتج نايمه ، اخذت السويج وسديت باب الشقه ونزلت صعدت بسيارتي افتر اريد اهدء اريد طريقه احجي وياج بيهة واقنعج نستمر ، وماحسيت اله وانه واكف كبال محلات الشرب ، نزلت اشتريت ورجعت للسياره ، شربت لحد ما كلت بس ، واجيتج وصار اللي صار ، تخبلت ، جنت ما واعي ، فد ما ردت اعترفلج انه مو بوعي ، ردت اردلج الاذيه بأذيه اكبر منها ، رجعتج للبيت ورجعت للرمادي ، اريد انسه الصار ، عذاب الضمير دمرني ، لا انام لا اكل لا اتحمل احد، نفسي ما طايقها ، ولحد الان انه متأذي ، انه غلطان واعتذر سامحيني ....

بنان : عذرك اقبح من فعلك ، للأسف اللي حجيته هسه ، زاد كرهي الك ما نقص ، واذا تحبني طلكني ، اريد ارتاح وصدكني ، ما راح اتزوج غيرك حتى خاف تكول تتزوج وتعوفني وتروح تحب ، ابشرك انت قتلت بداخلي هواي اشياء ،من ضمنها الحب والثقه ...

صميم : تردين اطلكج ..

بنان : ايي

صميم : اخر كلام ..

بنان : وما اتراجع ..

صميم : بنان انتي طالك ...

بجينه سوه ، اني وهو ، كمت ارجف ، زين ليش مو اني اللي ردت هالشي ليش بجيت .. كمت طلعت امشي سريع ، وطلع ورايه يصيح بنان اوكفي اوصلج ، مسمعته طلعت ، بسرعه وصعدت سيارتي ، مشيت وباوعت عليه بالمرايا ، وكف وخال ايده على راسه ...

اسوق وعيوني مليانه دموع ، كل شويه واريد ادعم السياره ، كوه وصلت طبكت ونزلت ،دكيت الباب ،طلعت ماما ، بيدها الموبايل ومبينه خايفه ، خطيه يمكن عليه ..

اسماء : وين وليتي من الصبح ، وادك عليج متجاوبين ..

بنان : رحت للدوام عبالي اكدر ارجع اداوم كالو ميصير..

اسماء: وليش باجيه ..

بنان : لان شفت جماعتي ، وراح يصعدون واني اتأخر سنه ..

اسماء: شكد كتلج رجعي عاندتي وهذا راسج اليابس اوف منه ..

بنان : ماما لتلوميني تره نفسيتي زفت ..

اسماء : دروحي بدلي وتريكي ، الجاي حار ، طلعي جبن تردين بيض كيفج ،حتى نروح للسوك ..

بنان : شعدنه بالسوك ..

اسماء : اريد اغير البردات ، وابدل مفارش التخم .

بنان : وليش شبيهن وتغيريهن حلوات ..

اسماء : اريد كلشي جديد على زواج غسان ..

بنان : ليش خطبتوله البنيه اللي رادها ..

اسماء : اي رحنه ذاك الاسبوع ، وصعدتلج جنتي نايمه ..

بنان :اي همزين خطيه ، اكلج ماما اريد انام مابيه اطلع ..

اسماء : شجاج ويه النوم متكليلي ، تجين يعني تجين ،اربع وعشرين ساعه نايمه ، اطب اطلع الكاج على نومتج ..

بنان : غير مريضه ..

اسماء : امي انتي مو مريضه مرض ، انتي نفسيتج تعبانه ، يرادلج تغير جو ،اطلعي ويه صديقاتج ، هذا دوامج العفتيه جان مهون عليج ، مخلصه نص وكتج بيه ، تجين تعبانه تنامين جفي ، تقرين وترجعين تنامين ، خربتي حياتج كلها ..

بنان : ابدل واجي وياج ..

اسماء: شفتي حجي صح ،كمتي تغيرين مواضيع ، تريكي يلا اخذج ...

رحت بدلت لبست صايه وغسلت وجهي ونزلت ،ردت اكل نفسي كلبت ، عفت ورحت للهول لكيت ماما تلبس بالجواريب مالتها ..

اسماء : اكلتي ..

بنان : اي اكلت ..

اسماء: يلا لعد امشي .

طفينه الكهربائيات وقفلنه وطلعنه للسوك ، الجو بارد كلش ، لابسه خفيف رجفت ...

وصلنه للسوك افترينه وصلنه لابو البردات الوان هواي وموديلات وماما كل شويه هذا مو لو ذاك احلا واني مركزة وياها ، الى ان الالوان كلها صارت بعيني اسود وابيض وطب وكعت من طولي ...

محسيت اله على ايد ماما تطبطب على وجهي وتبجي اسمع شهكاتها ،فتحت عيني منيمتني بحضنها ، وابو المحل واكف وبيده بطل مي ، خلاه بيد امي غسلتلي ، وكمت كعدت ، هلمرة نفسي لعبت ، اشرت الهم ، ركض ابو المحل جاب سله مهملات ، تقيئت بيها ، لحد ما ارتاحيت ، غسلت وكمت امشي على كيف ، ماما اعتذرت من ابو المحل ، وطلعنه اخذنه تكسي ورجعنه للبيت ...

اسماء : اله العصر اخذج اشوف شبيج ما اضل انتضر لحد متموتين ..

بنان : ماما اني تعبانه ، ولان متريكت زين دخت ، كلشي مابيه ..

اسماء: لج بنان يايوم طلعنه وانتي واكعه عليه ، شو نفتر السوك عشر مرات ومثل الصل ميطكج عرج ...

بنان : نفسيتي تعبانه ومأثره عليه ..

اسماء : اذا على طلاكج من صميم اني احاجي ابوج ورجعيله شو انتي عفتيه منا ، وكعتي منا ، اذا تحبيه انطيه فرصه ياماما ، لتسديها بوجها ..

بنان : ماريده بعد ..

اسماء: ليش موتي نفسج لعد ، كومي اصحي كافي عاد ، ذني خواتج متخبلات ، خطيه ماما عقدتيهن ..

بنان : والله حتى نسيت عندي خوات ،وينهن هسه ..

اسماء: وين يعني غير بالمدرسه ..
خطيه حسرة عليهن يصعدلج وعطتي بيهن راح يتعقدن...

بنان : اليوم اطيب خاطرهن والتفت الهن واشوف شنو محتاجات ..

اسماء: الله يطيب خاطرج ياماما .

بنان : فدوة لعيونج امي حبيبتي ..

مرت كم يوم وبلشت سوالف الخطوبه والتجهيز لزوجه غسان كلنه طايرين بيهم ، اخونه الكبير راح يتزوج وياخذ اللي يحبها كلبه ، اكو احلا من هيج ...

تحدد موعد المهر ورحنه ، كملت الحفله وجانت كلش حلوة واهلها ناس بسطاء اللي جان معرقل الخطوبه عمها لان همه من غير طائفه ، بس غسان معافها استقتل واخذها ،، جانت الفرحه بعيونهم ، يريد ياكلها هلكد ما فرحان ، حاضنها وكاعد ، يابه كوم لبسها ميقبل يكلهم ما اريد اهدها عوفوني مصدكت اخذتها ، كوة ماما وام العروس كوموهم لبسها وبعدين وكلها كيك وهيه وكلته ، كلوله حبها ولك حبها ولتخاف من امها ، وغسان مصدك يبوس وراجع ليوره الى ان ، صاحت امها كافي عوف بنتي ، ترة نبطل ، الكل ضحك ، خلصت الحفله وطلعنه هو ضل يمهم ، زوجته كلش حلوة ونازكه ، اسمها رانية ...

رجعنه للبيت كلنا بسياره سيف ، الطريق كله عالك اغاني ويركص ، خبلنه ههههههه لو يطلع من الجامه وبابا يعيط عليه ولك راح تدعمنه ، وهو يكله حجي كبرت وصاير كلبك رجيج تخاف بسرعه ، يندار على امي يكللهة حجيه كبر بدليه ، بواحد جديد ، ويخلي بابه يكمز تونسه كلش ، رجعنه للبيت واقاربنه كلمن راح لبيته ..

ماكو اسبوعين وتحدد موعد العرس لان كلشي كامل ، وثنينهم متخرجين وماكو شي يمنع زواجهم ، قبل بيوم من الحنه ، ماما رادت اطلع وياهم اشتري ملابس مقبلت ، كتلها البس العندي ، صعدت ، طلعت فستان ذهبي وبيه ابيض، حلو لا بأس بيه ، نزلته شوفته لماما ضحكت ..

بنان : شنو محلو ..

اسماء : لا حلو..

بنان : ليش ضحكتي ..

اسماء: اول تالي بنان تلبس شي لابسته وشايفيها بيه تعجبت ..

بنان : ماما هيه حنه ولد ، وهنا بلبيت يعني ماكو داعي اروح واشتري لو بيدي اضل بهدوم البيت ..

اسماء : تغييرج مخوفني يا امي ، هاي فرحه اخوج شكبرها ، بس انتي كاسرتها ...

بنان : ماما يعني الانسان ميمر بضرف يتغير يتمرض يضوج ، خوما تردين طول وكتي اضحك ومفرفشه ..

اسماء : لان احنه متعلمين على ضحكتج ، يايوم الضحكه فاركت وجهج ، جبتي عمرج ضحك وسوالفج تخبل ، الى ان عرفتي صميم ، غيرج وبهذل احوالج كلها ..

بنان : هسه صميم شعليه اني تعبانه ..

اسماء : امي المرة تزهر بحب حبيبها ، اكو رياجيل ، ياخذون المرة ، هلكد ما يدللوها ويحبوها ومريحيها ، تشوفيها تنطيها اصغر من عمرها بعشر سنوات ، واكو العكس ياخذها منا تشيب منا ، البنيه مثل النبته ، اذا ما اخذها فلاح ويعرف للزرع ، يذبلها وتموت ، لان ميعرف شلون يزكيها ..

بنان : الله يعوضني خير، جربت الحب وفشلت لو متزوجه تقليدي هواي احسلي ..

اسماء : هاي هسه اجتي المسميات ، تقليدي وحب ، جنه قبل اول منشوف الرجال واهلنه نطوه كلمه موافقين حبيناه ونخلص اله طول العمر ، بس هسه شلون وكت ، اذا متحب البنيه تضل تلعب وره رجلهة والله شنو اخذته تقليدي ومجربت الحب ، الله يكفينا الشر ، ويحفظج انتي وخواتج من دروب السوء ..

بنان : امين ..

راحت ماما وكلت بكلبي ، اجاني درب السوء ومشيت بيه وطيح حضي بنتج ،تقشمرت ...

اجه يوم الحنه بدلت وشسورت شعري وخليت مكياج ، صح ضعفانه بس حلوه ..

نزلت جوة اقاربنه كلهم موجودين ، دك وركص ، صار موعد العشا عشينه العالم واني مابيه حيل اوكف خاله كرسي وكاعده ، خالتي انتبهت عليه ،هيه من النوع كلش ضحوكه ومتحسب حساب لحجيها هيج تذبها للحجايه متكول خاف تجرح المقابل او تسببله مشكله ...

_ ولج بنونه جنج شايله ..

بنان : شنو يعني شايله ..

_ حامل ..

بنان : هاي شبيج خاله تزوجت اني حتى احبل ..

_ والله شكلج حامل ..

اجتي ماما وشاركتها الحديث....

اسماء: شلج بهالحجي ليروح احد يسمعج وتصيرلنه سالفه ويخرب عرس الولد ..

_ دشوفيهة وجها ، وحالتها ، تمشي وتنام ، كل شويه الكاها متمدده بمكان ، هاج ذني بناتنه ذبن لحم وهيه من يمته وجاي تكعد بعرس ..

اسماء: مابيها شي مريضه جانت ..

_ تذكرني بحبالتي والله اني هم هيج اصير ...

بنان : خاله يعني منين يجي الحمل واني فسخت ، شبيج ...

ضلت تسأل ليش ومليش ماما حجتلها واني كمت رحت للأستقبال، خلصت الحنه ودخلو الولد ويهوسون لغسان

خالاتي كامن يهوسن يوم الك سيوفي يوم الك سيوفي ..

عماتي كامن يصيحن يوم الك حسوني يوم الك حسوني ..

حسن ضحك وكال ..

حسن : شفايتلي كلها تزوجت واني بعدني ..

جاوبته عمتي الجبيره ..

_ لك حسوني بس أشر من باجر ازوجك ..

حسن : عمه مأشر وحاجز بس هيه تقبل هسه اتزوج قبل غسان ..

كلهم ضحكو وكالو ها حسوني منيه ..

حسن : وحده ماخذه كلبي كاعده يمكم ، هيه تعرف نفسها ..

اقاربنه محد يدري حسن رايدني ، بس اهلي وبيت عمي ..
لهذا الكل شك انو وحده من البنات وضاعت عليهم السالفه ...

خلصت الحنه ردت اصعد ابدل صعدت اول بايه صاحني حسن التفتت ..

حسن : بنان .

بنان : ها حسن ..

حسن : يوم النه ..

بنان : هههه والله ياحسن انت عايش بحلم ..

حسن : ليش حلم ؟؟

عقج وجها وتبدلت ابتسامته بضوجه ...

بنان : حسوني اني ما افيدك والله انت تستاهل احسن مني وكلتها الك اول منخطبت..

حسن : واذا كتلج ما اريد الاحسن ، اني رايدج بكل عيوبج قبل زيناتج ...

بنان : راح تتعب .

حسن : مو شغلج ، انت بس وافقي ..

بنان : الله كريم خليها لوكتها ..

حسن : بنان لتغدريني ..

بنان : شلون يعني اغدرك مفهمت ..

حسن : يعني خاف الج نيه ترجعين لصميم ..

بنان : لا صميم راح وانتهى بالنسبه الي صفحه وطويتها ..

حسن : خير ان شاءالله ، اخذي راحتج ...

جر حسره وخله ايده بجيوبه وضل واكف ، عفته وصعدت ، ضليت افكر بحجي خالتي خاف صدك اني حامل ، اني لحد الان بشك ، ممتأكده لان بالسادس بسبب الحاله النفسيه هم اتخربطت عندي لهذا مأمنه نوعآ ما ، بس لعبان النفس ومن تخربطت وحجي خالتي كلها زيدت الشكوك عندي ، وقررت بس تصيرلي فرصه اروح احلل واشوف ...

صار عرس غسان ، وزفيناهم ، للفندق ورجعنه البيت هوسه مابيه اشتغل ، الزم شغله واروح انام ، انتبهت عليه ماما ، رجع الشك بكلبها ، وتريد تاخذني للدكتوره تشوف شبيه ..

مر كم يوم ، جنه كاعدين على الغده حجه سيف ..

سيف : رانيه شلونها زينه ..

رانيه : منين تعرفها لزينه هههه ..

سيف : اخ الله هو كل زينه زينه، ولج تخبل ..

سالم : ولك منو هاي احجي ..

رانيه : بت خالتي عمو ..

غسان : واشوفك كتلت نفسك توديهن للصالون وترجعهن ، وغسان روح زين واسبح انت عريس اني اتكفل بهاي الشغلات اثاريك عندك مصلحه ..

سيف : اي والله اني شفتها بالمهر لو دخت ...

غسان : ولك وين شفتها ..

سيف : جنت عطشان ، وردت مي ، رحت للمطبخ ، واشوفلك شعر عبالك ليل ، كتلها يابنيه بلكت كلاص مي ، اندارت وكلتلي اتدلل ، لو حتى العطش راح ..

سالم : والله لو هيج اللي يعطش لو بلا ..

كرم : ها حجي زحفنه ..

ضحكو كلهم ، وبابا كال اذا تريدها نمشي عليها ..

رانيه : بس عمو هيه طالبه سادس ..

سيف : تكمل يمي معليج ..

غسان : لا يا حقير ههههه ..

سيف : احسن شي سويته بحياتك من تزوجت سويتلي فضل ما انساه الك ...

غسان : هههههه يلا نكول مبروك بس منو يكول هيه تقبل بيك ..

سيف : تقبل معليك هههههههه ..

سالم : مدسترها ..

سيف : شلون لعد ...

كلش فرحت لسيف وبنفس الوقت انقهرت على حوري هو رادها ، حرامات تروح منه ..اووف ...

ماكو اسبوع وخطبناها وبسرعه اهلها وافقو ، مو مثل غسان تأذينه يلا ..

وصار العرس وصرنه خمس بنات بلبيت اني وخواتي ونسوان اخوتي ، ويه ماما نصير سته ، بابا مكيف ، يطب ويطلع ، محمل اشكال الوان النه ، مرات من ميجيب البنات يكلوله ها عمو اليوم نسيتنه ، خطيه يروح يجيب ويجي ، وماما دللتهن دلال ....

__________

رونق

مر شهر على زعلتي بيت اهلي سنان لا خابر ولا وصل ..

صاحني بابا رحتله ..

رونق : نعم بابا ..

حاتم : بنتي اذا مترديه حتى ننهي كلشي ونخلص منه ومن شره ..

رونق : اي بابا ما اريده واريد اتطلك ..

علياء: وشلون تطلكين وانتي حامل ،لازم تجيبين يلا ..

حاتم : مضل شي هسه انتي شكد عليج بنيتي ..

رونق : نهايه شهر السابع ..

حاتم : يلا مضل شي وتكومين بالسلامه وتجيبيلنه مثلج قمر ...

رونق : ان شاءالله بابا ..

مرت الايام وحملي متعب كلش ، ثكيله صرت وحركه بمعدتي اسأل ماما تكلي هذا شعر الطفل يسوي حموضه ..

امشي واكرط ثلج شنو اشوف كبالي بيه بروده اكله ، اريد تبرد معدتي احسها نار ...

وبيوم كاعده العصر اجتني رساله ، فتحتها من سنان ..

💬

اشتاقيتلج، والله البيت ميسوه بلياج رجعيلي اريدج انتي وبنتي ، شلون تجي للدنيا واني وياج كلمن بيت ،رونق لتصيرين انانيه فكري بنتج ، حرام عليج تحرميها من ابوها...

كتبتله

💬

اني مو انانيه انت اناني ومريض ، تشك حتى با اضافرك خبلتني كلشي سويته ويايه وكلت عادي كبري عقلج مو مال ترجعين لأبوج وفوكاها وياج طفل ، وتحملت وسكتت ، وانت تزيد متقل ، لا بنومتي مرتاحه لا بكعدتي حبستني ست اشهر باب الشارع مشايفته واكول ميخالف صبري يتغير وكعدت وحاجيتك وانت نفسك متغيرت ، تالي تتهمني ويه اخوك وفوك قهري اسمعك تكللهم مقصره ويايه ولان حاسبتها تريد تعوف البيت ، واهلك صدكوك ، وهمه يعرفون بيك مريض، بس خطيتي بركبت امك اللي اجتي ودكت صدر من حجت بيك وطيرتك ، وطلعت متسوه ، عوفني سنان خليني ارجع لحياتي ولدوامي واربي بنتي صح ..

💬
رونق اني مريض اتفق ، بس اتعالج والله راح اروح اطباء واعالج نفسي بس لتعوفيني ، نذليت عكبج ..

💬

تعالج واثبتلي انت تشافيت وذاك الوكت النه غير كلام ..

💬

رونق طلعه ماكو تره اخبلج لا عبالج بيت اهلج وبكيفج تره كلشي ادري ..

💬

ها توك تكول اريد اتعالج ، انت متصيرلك جارة اني مافيدك ، انت مرضك نفسي واني مو طبيبه حتى اعالج

💬

عبالج بسهوله تتطلكين ، والله اخذ بنتي وبعمرج متشوفيها ..

💬

اذن بيناتنه المحاكم هيه الفصل ..

💬

زين رونق ، زين ..

عفته مجاوبته دخلت نمت حتى ما افكر لان تعبت

______________

بنان
مر شهر وقررت اروح احلل لان هم ما اجتني ...

رحت حللت اكو مختبر قريب علينه ، كلولي انتضري ، انتضرت ، وره ربع ساعه ، صاحو اسمي ..رحت

بنان : ها عفيه بشري ..

_ مبروك حامل ..

شنو انصدمت ، عبالك واحد وكفخني على راسي ...

مصدكت كلت جوز متوهمين ، رحت لدكتوره نسائيه ، حجزت ولزمت سرة ...

دخلت الها من بعد ما سألت واستفسرت ،
كلتلي تفضلي نامي هنا نمت اخذتلي سونر ..

_ هذا كيس الطفل ، والنبض زين ، هسه عليج شهرين ..

شهكت ، وبجيت ...

_ ليش ماما تبجين شنو متريدين اطفال غيرج يتمنى ..

بنان : بعدنه عرسان وعندي دوام لهذا ما اريد هسه ...

_ كولي ياالله حبيبتي ميصير هيج تسوين ...

مجاوبتها طلعت امشي وعقلي سارح شسوي هسه شلون مصيبه هاي ، شنو اكول لاهلي ...

رجعت للبيت مبينت اكو شي ، اخذت تلفوني اتصلت على صميم مغلق ، خابرت اخته ، كالت مسافر ومنعرف شوكت يرجع ، لان رايح بعثه دازيه بالدوام ...

شسوي هسه ، ضليت الوب ، قررت ثاني يوم اداوم واروح لعمر يشوفلي حل ....

ضليت كاعده وافكر اول مطلع الصبح بدلت ورحت للدوام، دكيت على عمر دلاني مكانه طلبت اشوفه وحده ، كلي تمام ....

رحت للمكان اللي هو موجود بيه اول مشفته ركضت عليه ..بدون مقدمات كتله

بنان : عمر الحكني ، فدوة داخله
على الله وعليك انت الوحيد التكدر تخلصني من الاني بيه ...

باوعلي مستغرب وبنفس الوقت مخترع كال

عمر : شكو ..

بنان :اني ضعت انتهت حياتي

يتبع ........