رواية ظلمات الغيهب
بقلمي أساور حسين
الحلقة _1_
كان قلبي يخفق بقوة
لست بخير لكني اقاوم
اسفة لنفسي
لقد افقدتها نوافذها وابوابها
غدت جدرانا .
زهـراء ..
بغداد /الساعة 9:00الصبح
بكل هدوء نزلت جدر البرياني الكبير ؏ ميز الطعام المتوسط المتطبخ
وست الحبايب كعدت ؏ كرسي بتعب تنطي الأوامر واني انفذ
بدون اي ملل او كلل ، ابتسمت واني اشيل صواني التقديم الراح
يوصلن سفري الطلبية عرس .
زهراء:-خمسين ماعون كلتي .
ام زهراء:- اي بعد امج وقبلها كطعي اليمون شرائح ارفاع
وحضري صناديك الببسي حتى يترتب وما يطلع منه قصور .
زهراء:- صار يا بعد عيوني الاثنين .
ابتسمت وخدودها صارن حمر دائمًا وابدا امي خجوله وراح تظل نفس
ما هِـيِّ اقل الكلمات تأثر بيها ، او بالأصح هذا طبع جنس حواء
حنان ، عطف ، تركيبتنه غريبه ابسط الامور تفرحنه وهذا اجمل شيء بيننا واقل الكلام والمواقف تحز بدا لنه وتبقي ثقب بقلبنا صعب ننسى .
كعدت بعد ماسويت ڪُـل خطواتها ، وكعدت اصب وارتب
بكل دقه ونظام وترتيب ونظافه .
زهراء:-يمه البرياني مالتج يفوز ، شلون تسوي هيج طيب .
باوعتلي بنظرات وكأنها تتصل بعاطفتها وذكرياتها القديمة
ام زهراء:- امي الله يرحمها جنت اجيها ابجي بسبب اهل ابوج
لان ما اعرف اطبخ وسودة علية امي بكل مرة اروحلها تعلمني طبخه
وانه اكتبها حتى اخاف انسى ارجع عليها .
زهراء:- زين ليش ترحين تبجي يضربوج جانوا .
جرت حسرة شكت گلبـي بيها وهمست بصوت خافت :- يمه زهوره مرات الحجي يأذي المقابل اكثر من الضرب ، خلي انضرب عندي اهون من ما يسمعوني كلمه هل ضلت عمرها كله ادك بكلبي .
زهراء:- أبويه شنو دوره من ڪُـل هذا .
ام زهراء:- ابوج لا بي ينطي بيه ولا يكدر ينطي بأهله
وهم اعذره بس هو ما وكف وياي ، دومًا يفشلني كدامهم حتى يسكتون
وما يكبرون السالفة ، تالي تعلموا عليه وسوني مدمغة حجي وخدامة
وشردوني بيج وانتِ عمرج سنة ونص اووف يايمة بليله ضلمه طلعت بيج وروحي تلوب .
زهراء:- ابويه ما حاول يرجعج ؟
ام زهراء:- ما قبلت وهو بسرعة طلك ، واهلي ما خلوني ابقه
مطلكه فترة سنة وزوجوني العمج ابو نصر ، كالولي مرته ميته
اخذته وربيت ولده وهم امانة الله وانتِ شهدتي ما قصروا ويانا
وخاصه هو اعتبرج بنته ويا ويله اليحجي وياج كلمة يلزمه يكتله كبالج
حتى تسكتين تالي ياخذج يشتريلج وينومج بحضنه .
زهراء:- الله يرحمة عوضني ؏ ابوي الما بيوم كلف نفسه وسأل علية.
فركت ايدها وهمست بتعب واضح ؏ ملامح وجهها
ام زهراء:- بس اخخ ولده ما صانوا التعب ورباتي
بس راح الغالي شفتي شلون تغيروا وما رحموا بحالنا وهل شمرونا
وبطلوا حتى يسألون وهاي احنه عشنا وياهم عمر لا يوم ولا يومين
زهراء:- يمه هم غرب ما نلومهم ، لومي اخوتج البعد كسرتج
وفاة زوجج خلوج خدامه النسوانهم ، والله الهل ساعة يا يمه مصدومة شلون
اقتنعوا وانطونه فلوس دبرنا بيهن حالنا .
ام زهراء:- ربج ما يترك عبدا يمه الشكر لله وحده
واله ابن ادم ما منه فايدة.
شلت الجدر وكمت واني اهمس وفحطانه من الشغل والحجي
الدار بيني وبينها :- ونعم بالله يمة .
غسلت ايدي وسحبت التلفون من رف التلفزيون
ودكيت رقم ابو التوصيل يجي ياخذهن يوصلهم
البيت العالم .
سلمت علية وكتله :- خلصت عمو تعال اخذ الطلبيات .
-صار يا بعد عمج جيتكم .
سديته منه وطلعتهن بره من دك هورن لفيت راسي بشال
وفتحت الباب انطي اثنين اثنين الى ان انملت السيارة الحمدلله
وراح ، تنفست بثقل مسحت كصتي بردان دشداشتي ودخلت
باوعت الـ امي تتلوه من الوجع بس ما تريد تحجي وتحسسني بألمها
همست واني أبعد نظراتي عنها :-رايحة اسبح وارتاح ساعة
يمه اذا اجه عمو ابو حسن اخذي منه فلوس الطلبيه .
هزت براسها وباوعت ؏ تلفزيون .
دخلت للحمام ملابسي بيدي
حايره القهر ياكل بروحي حسيت بالمسؤولية
وكسران الظهر بعز شبابي
ما اعرف شلون كملت سبح سرحت شعري ورحت
فرشتلي فراش نمت اريد وجع ضهري يختفي
خايفة من المستقبل اني خايفه من الخوف نفسه
مرعوبه من مرض امي ، شلون اذا صار بيها شي شلون
هل فكرة دمرتني ، اذا صار بيها شي فعلا ادمر بدونها
بقيت احوس بفراشي عسى ولعل تغمضلي عين وانام ساعة
بس بأت محاولاتي بالفشل ، طلعت من الغرفة للمطبخ
فتحت الثلاجه قطعتلي قطعة كيك باقي من طلبيه
كعدت اكل بيها ومحروك گلبـي شلون سويتها
حلوة وذبيت عليها فلوس وتعب وجهد تالي ادك عليهم
يلغون الطلب بكل برود يخلوني اكعد ادك والطم ؏ وجهي
وعلى حضي المصخم .
اكل بيها بحقد هيج مال وحدة مضروبه بوري معدل
غسلت الماعون ورحت كعدت ويا امي ؏ تلفزيون شويه واباوعلها غافيه
غطيتها وطفيت التلفزيون ، اجه ابو حسن سلمني الفلوس
تشكرت منه ودخلت للبيت فرحانه ، لالا فرحانه شنو شويه واطير
اليوم اكدر اخذ امي للدكتور واطمأن ؏ وضعها
بهل فلوس اكدر اشتري علاج امي واخلصها من الألم
ضميتهن ؏ گلبـي ودخلت خليتهن بالجنطه وطلعت
اباوع ؏ ساعة .
ما صدكت صارت بـ اربعة العصر رحت الـ امي واني مبدله وملابسها بيدي
أشرتلها بيدي بكل ثقه هل مره :- يلاا بدون اعتراض تبدلين وكدامي ؏ دكتور .
ام زهراء:- جابهن الفلوس .
زهراء:- اي جنتي نايمه يلا يايمه دكومي مو شلعتي الكلبي
راح نتأخر ؏ دكتور .
ام زهراء :- انتِ تعبانه ومكسور ضهرج بالشغل واجي بساعة وحدة
اخلصهن اني واضيع تعبج .
رفعتلها حاحبي وصحت :- تضيع وكت هل مره دكومي لا اهج .
ضحكت وهي تكرصني من ايدي
كامت بدلت وطلعنا من البيت اي طلعت وكعت بس مو مو عثرت لحضات واكوم منها لا وكعت عمر ما كانت بالحسبان .
اي هنا وكعت ، هنا اسرت نفسي بحبه
هنا امتلك گلبـي وعقلي وكل حواسي
هنا وكعت وكلبي الأولى مرة احس يخفق بصورةً
جنونيه ما تخيلت بيوم هيج يصير وياي
تثاقلت انفاسي بلحضة ما تلاكت عيوني بعيونه
حسيته بنظرة صوبني بلعنة حبه المجنون
ودخلني بضلماته .
مرر عيونه وحاجبه مرفوع بكل دقه
وايده تحركت ببطء طبكت باب سيارته
وسرعان ما بعد عيونه من عيوني
وانطاني ضهره وكأنه ما شاف احد
للحضات جمدت بمكاني اول مرة اشوفه
واول مره يعجبني شخص ، وشخصية شخص
بس اعرف ما راح أكدر اوصله او امتلكه بيوم
واصير قريبه علية ، لان بنظرة وحده
اميز الفرق الشاسع بيناتنا .
جفلت ؏ صوت امي وهي تصيح بأسمي
باوعتلها بضياع والافكار تضارب بعقلي
وخيالي الحقير وييين راح وين وداني
وجنى ؏ حياتي .
زهراء:- اسفة يمه .
ام زهراء:- شبيج ولج صابج الثول .
زهراء:- اول مره .
ضحكت وهي تفر بيدها وادردم عليه كأي ام عراقية :-يماااي جيل هل وكت
تخوفن عمي ما تنكدرن .
زهراء:-الله وكيلج اكثر جيل مضلوم هو جيل هل وكت بزمنكم
جنتوا لا شال لا ضييم ، اله احنه مخنوكات مسلوبات من اقل
متطلبات حياتنا وساكتات .
ام زهراء:- يمتى ساكتات الساناتجن الدلاله ما تلحكه .
زهراء:- اذا فقيرات واذا امهات السان ما نخلص من حجيكم مضلومات بالحالتين .
ضليت امشي واسولف وتفكيري ڪُـل شويه يروح
عند ذاك الشخص ، نظراته ما تروح من بالي
عيونه وعمقها طوله وجسمه شخصيته ونظافته
غصب عني افكر بيهن .
رجعت للواقع واني ادخل عيادة الدكتور كعدت امي
ورحت سجلت اسمها ورحت كعدت يمها
نسولف من نتقابل اني وياها ونحجي عبالك اول مره نشاوف
احب حجيها وتحب سوالفي تكلي احسج عجوز ومكابلتني
ما محسستها بضعفي وقلة حيلتي ما خليتها شوف داخلي
شكثر هش ويخاف من فقدانها ومن المستقبل كله .
دخلنا للدكتور جيك وضعها وكتبلها ؏ تحاليل
سويتهن الها ورجعت للدكتور :-عندها ضغط حاد ودهون .
كتبلها العلاج وبقيت اسأل بيه عن اكلها وشنو المفيد الها
حتى ما يرتفع الضغط وأكدلي الراحة النفسية جدا مهمه .
شتريت العلاج وما بقه وياي غير فلوس الرجعه
اشوف امي شلون تباوعلي مقهوره ؏ تعبي
الضاع بنظرها ، واني لو بيدي انطيها روُحـي
بس تصير زينه وما شوفها تتأذه كبالي .
بس بعد ڪُـل ضيق فرج ارددها وأمن بيها
وفعلا من تضيق وياي وتشد الدنيا عداوتها
ربي يفرجها وتجيني طلبيه وهل مره
عيد ميلاد وطالبين خمس وعشرين ماعون سفري مشكل
بديت بالامل والترتيب من الفجر امي كعدت وياي
كملت صلاتها وانطيتها تلف وياي كبه وبورك
للظهر خلصت لف ، انسحنت روُحـي من الجوع اخذت استراحه
وكليت ماعون كبه وبورك وجاي وزلاطة اكلنه شويه
ورجعت كملت شغلي للعصر كملت ورتبتهم بالمواعين
انصلت ؏ ابو حسن ما طول غير مسافة الطريق
ضميت شعري بشالي وطلعت وجهي ما غاسته
يطرد النعمه بكد ما صار اسود من التعب
دك الهورن ويا دكته تعالت الأصوات وصياح
الزلم رج شارعنا رج ، ذبيت المواعين من ايدي
ونزلت الزرف الباب بقيت اباوع وكلبي دكاته تقرأ
الف ، وسعت عيوني وانه اشوفه كدامي
هاي ثاني مره اشوفه بيها بس هل مره مختلف عن القبلها
اختلاف جذري .
عيونه الغامضه متحوله حمره وموسعهم وكأنه
روحه راح تطلع منهم .
عروك ايده وركبته واضحات بشكل مخيف
مقابيله شخص يجي بعمره واحد ماسك
الثاني من قميصه والاثنين يتصارخون بس
كل واحد بيهم يحجي كلام مختلف .
لحضات وكعوا اثنينهم بالكاع واحد يضرب بالثاني بوكسات
متتالية بدون توقف صرخ بي صررخه زرف گلبـي بيها
-لك طعنتني حاسبك اخووي تضربني بضهري ليشششش ..
- خليني افهمك الموضوع غيهب والله مو مثل ما متصور .
-كلشي صار كدام عيني شنو تفهمني بعد .
طلعو اخوته وياهم ابو ورجال يشبه الولد الـ يتعارك ويا تقريبًا
بقوا يدفعون بيهم ويحاولون يتملصون واحد من الثاني
بس اثنينهم اجسامهم ضخمه واحدهم ما يسكت .
ضليت اكل بروحي اكل وكل ضربه
توكع ؏ وجهه العشكته طلقة وتصوب گلبـي
تمنيت هل ضرب بيه مو بي
لو ما عيب اطلع واسحبه من بينهم
دك الباب ابو حسن والهوسة مستمره
طلعت امي والجوارين كلها ؏ صوتهم
وصاروا فرجًا بين الناس
ابو غيهب:- لك بابا كافي فووتوا جوه نتفاهم .
غيهب :- تريد ادخل واحد قذر البيتي لا والله تحرم دخلته ؏
هل بيت وجهه بعد ما اريد اشوفه خلي يولي منا
- هِـيِّ سوت هيج .
هجم عليه ضربه بوكس وكعه بالكاع
ضل يرافس:- لا تجيب طاريها كدامي والله اموتكم اثنينكم والله بس صبرولي .
دنك عليه شاله الرجال ومشى بي للباب صرخ غيهب بعلو صوته
وبكل حركة قلب :- وصللها كلامي راح ابقه ُ ؏ــمري كله كابوس
بحياتها وموتها ؏ ايدي مثل ما موتتني تموت مثلي واكثر
بس توكع بأيدي ويصييييييير خييير .
التفتت عليه ابتسم نص ابتسامه وصاح :- اذا تلمحها اذا .
رجع هجم بس كلهم اعترضوا طريقه بس اصواتهم علت اكثر واكثر
الى ان دفعهم منه وطلع بيتنا مقابيل بيتهم اني واكفه بيدي مواعين انطيهم العمو ابو حسن ويا ما طلع صدت عيني بعينه خزرني وصعد سيارتة وطلع بكل سرعته .
كملت ويا عمو ابو حسن ودخلت للبيت روُحـي تلوب
ما اكدر حتى اكعد ، هوواي مصدومة من نفسي
شنو هل تعلق الصار عندي وهو مرتين شفته بيهم
ليش الهل درجه حبيته وجذبني احسه امتلكني فرد مره
حتى التعب نسيته بالعاده بعد ما اخلص
انام ما كدرت عيوني رافضه تغمضلها جفن
اطالب بشوفته .
خليت امي تنام وتسللت للباب حتى اشوف سيارة
عسى ولعل يرجع ، بسس ماكو رجعت فتت
وخيبة الامل تعتلي وجهي
ومر اليوم واليومين والثالث واني
؏ نفس المنهج اطلع ڪُـل ساعة للباب
بس اريد اكحل عيني بشوفته واريح گلبـي
واطمأن علية بس اختفى .
شلون بيه وين اروح ، اريد طريقة توصلني اخبارة
شكو بيها لو تصير كامرات بطن بيتهم وافتحهم
بيتنا واشوف اوضاعهم .
كله احلام وصعب تحقيقها
بكد ما مشوقه اشوفف
زاد غموضه بعيوني وخوفي منا
بس طغى ؏ ڪُـل هذا فضولي
اريد اكتشف شنو هل انسان وبشنو تأذه ومنو غدره .
وبعد مرور شهر احس سنه
كدرت اشوف سيارتة روُحـي طارت
ورفرفت اجناحاتي عليه
شيوديني عليكم .
ماكدرت اشوفه ابد وكل ما اطلع لو سيارته موجوده
لو سيارته طالعه وما لحكت اشوفه من طلع
الى ان بيوم صادف امي تطبخ ڪُـل ما تصير عدها
البابا ابو نصر ثواب ابد ما نستى ولليوم تحبه وتذكره
بالزين لان هو والنعم الزوج الوفي والحنون .
كملت ورتبت كلشي بيدها
واني رحت بدلت وزعتهم ؏
جوارين القريبين علينا ورجلي الصلفه
مو اني لالا رجلي مدري عقلي تسحبن
من شفت سيارته بالباب عدلت نفسي
زين ومشيت دكيت الباب مره ومرتين وتلاثه
الى ان انفتح وصار كبالي بطوله وبهيبته ونظراته يمررها ؏ طولي بكل ثقه بدون ما يحرك راسه .......
يتبع ....