🌙حسناء القايد🌙
👑oumaima mega 👑
⚡153⚡
محمد من صدمتوو ...و صدا اسمها لي زعزع ليه وداانوو و هرس ليه قلبو ...لسانو تعقد في مكانوو ....و كيف طرشة جاتو على خدوو ...ناض على وقفتووو معليي صووتووو على يمااه : اش تتقولي ا يما اش هااااد الكلاام
لالة زوبيدة هزت فيه عينها و حجبانها قوييصحة مع راسها : هاولي مالك ا ولد كرشي نتا لي سقستيني هانا جوبتك (تنهدت ولاحتها في الصدمة ) هاد الخبار كيف طرشتك دابا طرشتنا قبلك انا والحومة (محمد مبقا عارف فين يصد الخبار جاتو فحال الدهشة و تخلطت عليه مع الغرام لي تيحرق ليه في قلبو و زبيدة كملت الكلام ) كيف شوفة عينيك خرجت عروس من دار الحداد لي كنا تنقولو عليه المنحوس لدار المخزن ...مبغا يكمل سماع هاد الخبار ...دار بلاهواه مشا طالع في الدرج ... خطوا توالا خطواا ...زبيدة معرفت مالو و لا اش جرالوو ...منين رجع من المقاومة و هو مبدل عليها ...رجعت تكسكس في كسكسو و تقول هادا حال ولاد اليوم ....اما سي محمد طلع لسطح و مشا صاد لجيهة الصور و عينو على سطح لي كانت تتطل منو حسناء عليه كيف جاهل ...تيقلب على ضلها ولا غا على ريحتها و نسمتها تما...و ليني ملقا غير البرد و الريح بلاصتها مكين ليها لا حس لا مس ...متقبلهاش ولا حطها في عقلو ....زير بيديه على حافة الصور ...و نزل الراس تيتغدد و نار شاعلة في قلبو ...قالت لو غتساينو واعداتو بلي مغيمسها لا انس لا جن من غيرو هو ...خلاتو تامشا لمقاومة و جاها عريس فضل و خير منوو ...و خلاتو هو و ختارت سيدهم القايد ... حيت عندو الجاه والمال وهو ميكساب ميعلام و مشا رما راسو للنار المقاومة غير على ودها ....علا عينيه حمرة كيف الجمر ....و عروقو بينين منها حوومر ...مرضا بهادشي متقبلوو حس بشمتة ضرباتوو ...ولا غا الحقد عامي ليه عينو ...من جيهتها و قبالتو صورتها تتحرق و تاكلها نار في خيالو
~~~~~~~~~~~~~~ نرجعو دابا لقصر سيد القايد ....ديك الجلسة في السطح لي نسيم تيحوم بيها و يدور ....جالس سيد القايد كيف السلطان مربع رجليه على ديك الجلسة و حاط يدو على فخضو ...و حداه حريمو و سلطانة قلبو ...لالة حسناء شادة اللوح بيد و حاطاه فوق حزتها و ريشة الحبر بيدها الثانية و مزيرة عليها و مموالفاش تشدها بيديها ...كتبت حرف السين معوج شوية
فخر الدين عينو على لوحها هز فيها النظرة و سقساها : اشمن حرف هاداا ؟
حسناء على نيتها هزت فيه الشوفة و ترمش بعويناتها الكوحل : حرف الحاا ....تبشر سيد القايد نص تبشيرة على وجهو و نطق بين شفايفو و مال عند ودانها بين خصايل سالفها : هادا حرف السين ...حسناء ردت الشوفة في لوحها تشوف في داك الحرف ... تغالط ليها مع حرف الحا ...خاصها تعقل عليه و تلصقو في راسها ...حول عينو سيدهم لعرشية : هزي هاد اللوح والريش ....مردوش على كلامو و لا هزو عيونهم فيه ...تقدمت عرشية و خدات من عند حسناء للوح ...و الحبر
فخر الدين نظر بشوفتو ليها : مزال غنكملو وليني قبل نفطرو بعدا ...حسناء ردت عليه غا براسها ااه و جمعت يديها عندها ... و بحرا غتجي عرشية باش تشد البراد و تعمر الكاس دالبلار لسيدها ...حتى نقزت وهزت حسناء عويناتها و نطقت بصويتها : غا خليه ا دادا عرشية انا غنكب كيسان تاع اتاي ...صدمو كلامها و خلاتو يرجع شوفتو ببشارة فيها
عرشية جمعت يديها : واخا ا لالة ...و تساخرت بللور ...و ناضت حسناء بجلايلها كيف الحرير و كلها جواهر و مقامها عالي ...و جلست فوق الطبوري قبالة الصينية ...و بانت عليها مرت سيد القايد بسالفها الكثيف و خيط ريح لي كيضوي فجبهتها وشاد ليها شعرها من وراها ...و سيد القايد عاد حلات ليه الجلسة و تريحية و تكا على دراعو مكالي بيها جلستو كيف السلطان ...مطلع رجل و مسرح لخرى ...و عينو غير عليها ...دار بيدو للعبدات يمشيو من تما ...و عينو غير على لالهم شكون قال سيد القايد داك لي حاط على قلبو حجرة ...غيوقع في غرام بنت الحداد
🌙حسناء القايد🌙
👑oumaima mega 👑
⚡154⚡
عرشية قشعاتو من تحت العين و حدرت راس ...و دارت العبدات دارت ليهم بيديها يزيدو قبالتها ...و تمشاو بصوانيهم مع الدورة دسطح و وقفو مصافين ...ميغبرو ميمشيو حتى يخرج سيدهم من تماا ....بقات حسناء جالسة فوق طابوري و داكشي بالقاعيدة...هزت البراد من يديه ...و طلعت لبراد تال فوق ...تكتب اتاي خاصها تكب كبة زينة لسيد لقايد ...تاكتبان الرزة تاعو و حبست دازت الكاسها هي ...و عينيها كبار مكحلة تسرق منو غاشوفة و ترجع تردها قبالتها خجلانة ...و هو تنخوى على الجلسة ...و و عينو متبشرة في زينها و في حطتها و في عفستها ... كيف تتكب في كاسو و دارت كبت ليها في كاسها ...و حاسة بشوفتو كيف النسر مقابلها و ممحيدش عينو عليها حتى قربت تمرك في موضعها ...قبل متهز لكاس في يديها ...علا يدو لسالفها و خدا خصلة من شعرها ...و هي غا تسرق شوفة من تحت العين و ربي لي عالم بقلبها ... عينو كيف نسر كيتحسس رطوبية شعرها بين صبعانو ... تا هزت بيديها لي تيترعدو ...الكاس تاع اتاي و قريب طيحو و مداتو ليه ...خداه من عندها بيدو الثانية ...و باقي شاد بلولة سالفها ...و حسناء هزت كاسها بين يديها و كرزت عليه ...و ريح يدي و يجيب في شعرها ... فخر الدين تنخوى على داك الكاس ...هز بعدا سالفها و شم ريحتو كيف الزهر عاطية ...و عاد الكاس يشرب منو رشفة ...حسناء غير تقرق في عويناتها كتلقي كاسها بين يديها لفمها و شعرها راه بين يدو معندها متعمل
نرجعو لمراح لقصر ...وسط الجلسة الزاهية لي ديرين بيها جنان النواار ...جالسة لالة سلطانة و مربعة ركابيها و حاطة يديها فوق فخاضها ....و قبالتها طابلة نحاس خالية ...او باركة تمشي و تجي براسهاا ...و عينيها مكحلة مشرارة طالقها على الدروج ...تسنا في ولدها يبان و يبان عليه لأمان .... عمرها وقعت ليها ...من ديما صور قصرها عاليي متقد بنت المرا ...تخطاه ...تولت بنت الهجيج و قلة الشي ...تمرح و تفضل ..و يعطيها الخاطر و يجلسها معاه في الفطور ...و هادي مكانتش ليها على لبال ...وحلت ليها فحالقها كي دفلة الحارة لي متقد تسرطها ... تغددت و نزلت عينيها لرض ... تا جات عندها عبدة كحلة تتدير خطيوات منها جرية منها مشية توقفت عند لالة سلطانة حادرة الراس
العبدة : لالة لالة
سلطانة مدورتش فيها الشوفة و نهضت فيها : اش كااين ؟
العبدة : لالة راه ولدين لالة حسناء جاو ...سلطانة هزت فيها شوفة حارة و هي عاقدة الحجبان و دورتها في راسها ...ولدين حسناء ...صغرت شوفة وباينة ناوية على الغدر و هي تنطق و تكلم : سيري ديري ليهم ضيافة ميخصهم تاخير و عيطي لعالية تطلع عند حسناء تكلمها و تنزلها لعندهم تقابل والديها
العبدة : واخا الالة ....و رجعت سلطانة تتشوف قبالتها و شوفتها كحلة مشرارة
~~~~~~~~~~~ في جناح ثورية ....لي كانت جالسة و تهوني و تهلل على ولدها لي مات في شبابو ...و بناتها حدا رجليها يبكيو معاها منعسو مداقوه هاد ليلة ...راه كبدتهم مغتنساش في ليلة و صباحهها
ثورية تبكي و تكلم : فينك اولدي ؟ فينك ا تاج راسي ؟ فينك ا عمارة عيني ؟ ...من حدها تنهلل و هما يتباكو معاها
بنات لي بغا يقرا قصص اخرين لكاتبات اخرين يتفضلو ها ليان
https://my.w.tt/tdzUOUyM38
https://my.w.tt/tdzUOUyM38