علاقات زائفة

البارت السادس عشر

حسن يكول

لـغـز حـبـك بـكلـبـي مـا تـحـلـه.

مــن بـعـدك ريـجـي حـنـظـل مـاتـحـلـه.

أنـعـكـد كـلـبـي وي كـلبـك مـا تـحـلـه
.
يـظـل مـعـكـود لاَخـــرنـفـس بـيـه..
💕

عمر يكول

هموم هواك ما خلــــــــن .. علي حال

فريضة وحبك مـــــــــن الله .. علي حال

يالتنشد على حالــــــــي .. علي حال

شيفيد النشد عالصار بيـه.

💕

صميم يكول

الك ياما دليلي ارتجل ونشد

وحبلي وياك حيل انعكد ونشد

اهيم ابذكر طرواك ونشد

واحس اعضاي كلهن مو اليه .
💕

روند تكول

بالك تكول الاه ياخويا بـــالك

كل التكوله ايصير روحي ابدالك.

💕

حوريه تكول

جا شلي بالخوان والماينفعـــــون

عود أمن اموت أيجون ويا اليشيعون

💕
بنونه تكول

علمني عالنسيان ارد انسى ضيمـــــك

وي غيري كمره اتصير بس حصتي ضيمك.

💕

رونق

عبالي طيب زاد واعطيتك اعيون

تالي توج النار وي اليكرهـــون

_________________ 💘

شفته توجه علينه اني كمت انزل بنفسي ليجوه اريد اختفي ...

التفتلي حسن وكال

حسن : شبيج متنزلين ...

بنان : عفيه اخاف والله ..

روند : اذا تخافين شكو طلعتي ههههه ثول ..

حسن : هههههههه والله شكلج يضحك اول تالي ام لسان تخاف ..

بنان : ولك اني بس يمكم لسان حباب كله بنان ماكو ضاعت ...

روند : هههههه ادري سوك وضعيناج بيه ، لو طفله عمرج خمس سنين ..

اريد احجي انفتح باب السيارة ..

وكف وخله ايده على الباب ...

يبووو هذا وجها يدخن شلون قهر ...

صميم : لو عابره ال١٢ بويه عليش جيتي هسا جان دارت السنه وجيتي ..

بنان : يااا واكول اليوم احتفالات طلع واحد واحد ..

روند : شوف الفطيره ..

همس حسن بصوت ناصي ..

حسن : ثوله مو بس فطيره ههههه.

باوعتلهم اريد ابجي ..

صميم : متنزليييين ...

حجاها ويكز على سنونه ومخنزر ...

نزلت لزم ايدي حيل ومشينه ..

نزل حسن ..

حسن : على كيفك ترة مجانت وحدها اني وياها ..

يبو شحجاك يمعود خرب بحضج بنان ...

التفتله صميم ..

صميم : الحبيب لا تتدخل بين العوائل ، ماشي بويه .
مو حلوة بحكك لو جاستك جلمه مني مالايقة ...

حسن : ياعوائل نسيت اني ابن عمها..

صميم : لا ما ناسي فد انت ناسي انه زوجها ...

مشينه ودخلنه لبيت اهلي سد الباب وكتله ..

بنان : صميم والله اسفه ومتتكرر..

صميم : تعرفين وين مشكلتج انه احترمتج جثير وانتي مو من هالنوع ، انتي مال اكضب حزام و وين ما يوجعج...

بنان : حقك شتكول حقك بس اسمعني ..

صميم :من يمتى طالعه ؟؟؟

بنان : مصار هواي قبل ساعتين

صميم : يواش انه خابرت عمتي جانت سبعه ونص كالت انتي طالعه شلون الج ساعتين ، يولو عليش الجذب ..

توني احجي طلع بابا ، ياالله اجاني المنقذ ...

سالم : هله صميم تعال يابه فوت ليش واكف بره ..

صميم : لا تسلم عمي رايح انه ...

سالم : شنو جيتك وشنو روحتك تعال فوت الولد جوه ..

لح عليه بابا وفوته ، خرب هسه خليه يروح يابابا ...

كعدو جوه بالاستقبال واسمع بابا يكله ليش ضايج شبيك ..

صميم : عمي بنتك علتو لكلبي ذبحتني باالاهمال مالها ،

الف نوبه كايل الهة من اتصل ردي تلفونج بيدج يابت

الناس لا تخليني انجن واتصل واتصل ماكو ما ترد لين خابرت عمتي يابه وينها ، تكلي طلعت ..

شنهو طلعت انه مخابرها من ساعه شلون تطلع وماعندي خبر .

وفوك هذا تطلع وي ابن عمها وانه مانعها منو ، ترضاها

بويه ، اذا ترضه اني ساكت وانعل شيب اهلي لو فكيت

حلجي بجلمه وياها .واذا تكول ماراضي جدامك اكوم

واطر راسها الف وصله وافين حضها ...

سالم : حجيك علي راسي وحقك بالكلته ، بس مادامها

بيتي اني احاسبها واخذلك حقك منها من تجي ابيتك

ذاك الوكت ايدك الك ، صح غلطت اني ما اكلك مغلطت

بس اول مره تسويها علمها يا ابني مو من اول غلطه

تضربها لو يصير بينكم تجاوز محلو هالشي ، انت عقلك

جبير ومعتبرك ابني الرابع الله شاهد عليه...

رحت لماما جانت بغرفتها ..شافتني وكالت ..

اسماء : ها ترزلتي ..

بنان : بابا لحكني باخر لحضه.

اسماء : غير اني كتله بالسالفه ودزيته ، شفتج راح تنعلسين ههههه بس حل بيج ..

بنان : ماما ليش احسج فرحانه.

اسماء : لا مفرحانه بس اضحك على غبائج فوك ما طالعه ومكايلتله فوكاها متردين عليه من يتصل ، حجاله لابوج لو سكت ..

بنان : لتخافين اخذ بابا بلسانه ، شلون قابليه عنده والله راح اتخبل ..

اسماء : من يوم يومه رجلج هيج متعودتي عليه ...

بنان : ماما ولا مبين عليه هيج عصبي مجنت اتخيله هيج ..

اسماء : كل الرياجيل هيج هذا ابوج من الناس خلي

اطلع لاي مكان حتى لو قريب وما اكله يحير شيسوي ،

الغلط غلط وكل الرياجيل مترضى عليه مو بس صميم ..

بنان : بعد صارت غلطت وعرفت غلطي وان شاءالله متتكرر...

اسماء : ان شاءالله اشتريتي شي ..

بنان : اي بس عفتهن بسياره حسن ..

اسماء : يلا باجر جيبيهن عود .

بنان : اي تصبحين على خير ..

اسماء: وانتي من اهله طفي الضوه وراج ..

بنان : صار ...

طفيت الضوه وطلعت صعدت فوك ..

بدلت وكعدت...

وره شويه اجه بابا دك الباب وفات ...

سالم : ها بنونه عبالي نمتي ...

بنان : لا بابا كاعده تعال ...

سالم : ليكون ضوجج صميم ..

بنان : اني غلطانه هلمرة حقه يضوج مني ..

سالم : شنو تكلفج الدقيقة لو متصله عليه وكايلتله اني رايحه ، هم تجي على خاطرة حلوة وهم تكبرين بعينه يا بنتي ...

بنان : بابا صميم صعب عبالك راح يقبل بسرعه ، اكيد راح يكلي لا مترحين ..

سالم : اذا تعرفيه صعب المفروض منج تفكرين بالشغله اكثر من مره يلا تخطين خطوة الها ، مو تضربيه عرض الحايط وتسوين البراسج ...

بنان : اني متعلمه على حريه وكلشي بكيفي

واجه صميم غفل اخذها مني وحساب وكتاب،

وكلشي ميخالف وساكته حجاب وحجبني
مو ب ارادتي وكلت يلا لاجل عينه كلشي يهون ، طلعات ويه صديقاتي منعها ميقبل ، وهسه طلعه ويه اقاربي هم ميقبل ..

سالم : الحب تضحيه ما دامج تحبيه تضحيله ، اللي يريد شي يا بنتي يعوف اشياء علموده صح لو كلامي غلطان بيه ..

بنان : حشاك بابا من الغلط ، كلامك كله صح وعين العقل ، بس المشكله بيه ، بديت اختنك ، واني ممتعلمه على هيج خنكه ..

سالم : جنتي عندي مدللج وبكيفج ، بزودي وزود اخوتج ، هسه بعد عندج رجال تعودي كلمته هيه التمشي ، تصير سيف عليج ، كلمته فوك كلمتي وكلمة اخوانج ...

بنان : ان شاءالله ..

سالم : عفيه بنونه العاقله السباعيه ..

بنان : شكرا بابا لان تفهمتني واسفه خاف احرجتك ..

سالم : بالنسبه الي ممسويه الغلط ، بس عد زوجج غلطتي تأسفي منه مو مني ...

كمت حضنته وبوسته ، هاي اني وين جان عقلي من عفتكم وقبلت انخطب واتزوج ، اووووف ....

طلع بابا ، لزمت موبايلي ودزيت مسج لصميم ..

💬

حبيبي اسفه غلطت سامحني ...

وصلت مقراها ...

عفته كلت احتمال مشغول ...

نمت كعدت ثاني يوم وبوجهي للموبايل فتحته
فتت على الرسائل ، هم مقاريها ، كلت خاف نايم ومشافها ..

رجعت دزيت ..

💬

حبيبي بعدك ضايج مني ، والله اخر مره ومتتكرر..

....

دزيتها ونزلت جوة يم ماما ، تريكت و بلشنه شغل والغده صارت ال ١٢ سبحت ، اذن الضهر صليت ودعيت ربي اذا صميم
يشلع كلبي كون ميصير من قسمتي وكلمن يروح بطريقه ...

بنان : ماما راح اروح يم روند اختنكت ..

اسماء : روحي .

اخذت موبايلي ورحت ، لكيت عمه جنان بالمطبخ ..

بنان : هلو عمه شلونج ، بوستها ..

جنان : هلو حبيبتي هلو بنونه فوتي فوتي عصابتج بالهول ...

ضحكت وفتت جوع لكيتهم كاعدين ..

بنان : هااااا خونه تلعبون بلي من ورايه ...

حسن : شعندج جايه تلعبين ، كافي عليج صميم لعب بيج لعب ...

بنان : اعتبرها شماته هاي لو شنو ..

روند : والله من البارحه لليوم نضحك عليج اني وحسن ، شكلج يخرب ضحك ...

بنان : دووم الضحكه عيني همزين ضحكتكم ..

حسن : وخري روند خلي اخسرها كم كيم ، حتى اضحك عليها ...

بنان : جيب جيب اليده وانت وخر اني وروند نلعب..

حسن : و روح صميم اله ويايه تلعبين ..

ماعرف ليش من كال هيج كلبي انقبض وابتسامتي اختفت ...

بنان : اسم الله عليه ليش هيج تحجي ..

حسن: على كيفج الرحمه تجوز للطيب وللميت ..

بنان : بس انت مترحمت حلفت بروحه ..

حسن : هسه انتي ماعندج روح ، شنو بداخلج شبح يمشيج لو يترسوج بانزين وتمشين ..

روند : هههههههههههههه لا تشتغل على الباتري ..

بنان : عمه تعاي شوفيهم اتفقو عليه ..

مدت راسها من المطبخ ..

جنان : شوكت تكبرون متكلولي ، تضلون هيج ..

حسن : غير هيه تكبر عود مخطوبه وكذا جايه تلعب بلي ..

بنان : والتنخطب شنو تموت روحها والله شنو انخطبت..حجيتها وعطست ...

حسن : ديري بالج تعطسين ، المخطوبه ميصير تعطس .

روند : ههههههههههههه ، لا لج لترفعين ايدج لتوكع الحلقه ...

حسن : لا تكعدين رجل على رجل انتي مخطوبه ..

بنان : راح اروح زعلت والله ..

روند : لج المخطوبه ميصير تزعل فال محلو ..

حسن : وين طالعه ، هسه شمس بره خاف تموع الحلقه..

بنان : امداكم وامده اللي يجي يمكم ..

كمت اريد اروح واجوي حسن وكف كبالي وروند لزمتني ..

روند : والله نتشاقه شفناج معلوسه ونريد نضحكج ..

حسن : ديري بالج تزعلين المخطوبه ميصير تزعل ..

بنان : خرب واذا زر****** مخطوبه لتخبلوني ...
شنو من الفضاء جايه ..

روند : تعاي نلعب وانسي صميم وعشيرته ..

حسن : يلا اختاري فريق ، زين يليق بوحده مخطوبه ..

روند : كافي حسن تره لحينه هواي ..

حسن : مو غير انصحها بكيفكم بعد ما انصح ..

بنان : اني الك مراح تخطب والله اله العب بيك جوله ..

حسن : ههههه يلا لعبي ،

بدينه نلعب ورجعنه مثل قبل شكد ضحكنه ، صدك تونست ، طلعوني من الاني بيه ، تغديت يم بيت عمو .

ورجعت لبيتنه العصر ...

جانو ماما وبابا بالمطبخ يشربون جاي ، اجيت وكعدت يمهم بالكاع يم الصوبه ...

سالم : شلونهم بيت عمج ..

بنان : زينين ..

اسماء : ليش هلكد تأخرتي ..

سالم : عوفيها تتونس ،بس تتزوج بيت عمهة يصير حسره عليها ، تكوم تجينه ركض ركض وتروح لو تشبع منه شوف لو متشبع ...

من حجه هيج بابا عيوني دمعت ..

بنان : بابا ماريد اعوفكم شلون ..

سالم : اذا تزوجتو بحيل الله اخليه يأجر نفس الفرع مالنه ميروح بعيد..

بنان : اي عفيه بابا اشرط عليه هيج شرط..

سالم : ما اشرط اني ، بس اكله هنا يمنه قريبين تحتاجون شي ، يصير عدكم شغله احنه يمكم ..

اسماء : حجيك عين العقل ..
كومي جيبي استكان جاي شربي ويانه ..

بنان : ماريد شربت الصبح ...

اسماء: لعد كومي فتحيلج كتاب اقريلج شويه ..

بنان : اي والله عندي امتحان باجر ومقريت غير ورقه منه ..

اسماء: دكومي ولتلتهين ..

بنان : يلا رايحه ، كمت شربت مي وصعدت بلشت اقره شويه ورجعت للموبايل طلعت الرسائل ، هم مقاريهن ..

عرفت ميريد يحجي ويايه عفته ...

ضليت اقره لليل ، كملت وكمت اريد انام كلت ادز بس هلمرة واشوف ...

💬

تصبح على خير حبيبي الزعلان ..

دزيتها ولفيت راسي ونمت ..

..

كعدت على صوت المنبه ، كمت غسلت وبدلت ، لفيت حجابي ، توني اطلع بالمحاضرات ، دكلي صميم..

فصلته ونزلت ، لكيته واكف بره ، صعدت سلمت مجاوب ، والطريق كله ساكت ، بس اعصاب ، بحيث دمرات ايده بارزه من خالها على الستيرن ، لعد شكد لازمه قوي ...

وصلنه خلينه السياره بالكراج وميشنه دخلنه للمجمع ..

هو راح للتفتيش واني هم ...

طلعت لكيته واكف بس ناطيني ضهره..

وكفت يمه وكتله يلا ..

تونه مشينه واجه واحد صاح بنان ..التفتنه ثنينه..

من اندار اشوف سنان هذا شجابه .

سنان : شلونج بنان ..

ارتبكت كلش هسه صميم شيكول منين تعرفه ، باوعتله شفته عاجق الوجه ومنتضرني اجاوب رجعت باوعت لسنان..

بنان : هلو سنان الحمدلله شنو تداوم هنا ..

سنان : لا جيت لصديق اعرفه ، شفتج وحبيت اسلم ..

ردت اجاوبه ، صميم خلاني وراه ..

صميم : وصل سلامك توكل ..

ضاج سنان ..

سنان : اني اسف ، بس حبيت اسلم وهذا هو ..

صميم : كتلك وصل اخذ راحتك ..

راح سنان ولزمني تحقيق ..

صميم : منو هذا لج ..

بنان : واحد ..

صميم : ادري واحد منين يعرف اسمج وليش سلم عليج ..

بنان : صوتك منا الطلاب شبيك انت ...

صميم : اذا ما تحجين هساع من وين تعرفينو ، اخلي الجامعه كلها تتفرج عليج ...

جرني حيل ومشه ، مشيت وراه وصلنه لحديقه قبل الاداب على طول فارغه ..وكفنه وصار كبالي ..

صميم : احجي منو هذا ومنين يعرفج ..

بنان : اذا انت هيج عصبي اني كلشي ما اكدر احجي..

صميم : احجي لا افين حضج هساع وامدج هنا ومحمد ..

بنان : هذا يشتغل بالمول يبيع ملابس ورونق اشتغلت فتره وتعرفت عليه ، ساعدها ، ومره جنه رايحين اني والبنات واشترينه منه وهذا هو ..

صميم : وهذا ياهو اللي تشترين منو تعرفين عن نفسج وتكليلو اسمج..

بنان : انت ممصدك بيه ، امشي اسأل البنات ..

صميم : سوالفج العوج زادت وانه حوصلتي صغيره ، اذا طكت عندي اخبلج .جري عدل احسلج..

هزيت راسي ومشه كدامي واني ضليت واكفه التفت وعاط ..

صميم : متمشيييييين ...

مشيت وراه

صميم : كبل لقسمج واذا نزلتي منو رجلج اكسرها ..

صعدت كدامه وفتت للقسم ، وهو راح لقسمه

دكتلي حور..

بنان : الو .

حور : تأخرتو وينكم الجاي برد ..

بنان : اكلو بالعافيه اني بالقسم ...

حور : اول تالي نزلت عليج الشطاره، هههه بنان متتريك مستحيل .

بنان : يمعوده تعاركت كملي وتعالي تره طكت روحي..

حور : جايتج ...

سديته ورة خمس دقايق جتي ...

حور : خير معلوسه .

بنان : اول شي شلون صرتي شو شوفيني ..

حور : ميبين خالتله لزكه، بس اكو شخط ..

بنان : يعني يضل اثر ..

حور : واذا شنو يعني ، حتى يزيد الحسن ههههه ..

بنان : هههه ثول ..

حور : عوفج مني واحجيلي ..

بنان : يوم الجمعة اجتني روند _________حجيتلها لحد مشفت سنان ..

حور : نجي وحده وحده ، اول شي انتي غلطانه

المفروض تكولين لصميم قبل لتطلعين ، الشي الثاني

من تعرفين بحسن يحبج شلون تطلعين وياه ، اصلا

حتى حرام ، لو صميم يدري حسن معترفلج وهيج

ميت عليج ، والله يخلي طلقه براسج ، فبعدي عن الشر وغنيلو مثل ميكولون ..

وبعدين سنان شجابه للمجمع ، وشنو هالميانه الزفره

يوكفج ويسلم عليج وفوكاها شاف رجال يمج، شكد

قبيح لو اني من صميم اله افلش وجها ، والله طلع

صميم عاقل ورزن ، من كاعد تحجيلي تخيلته مده

بالطرفيسه بما انو الصبح ماطره والشارع كله مي ..

بنان : هههه ثول ، كون اني امده بالطرفيسه وافين حضو ..

حور : هههه شر البليه مايضحك ، وليش مخلاج تجين للنادي ..

بنان : كليي اذا شفتج بره القسم افين حضج ، اكلج شلون يفين حضي ههههه..

حور : هههه يطيح حضج غير ...

بنان : هو طايح من كاعه..

حور : كعدي راجعي مضل شي للامتحان ...

بنان : كله طار من راسي ..

حور : شنو هو شرب ويطير من راسج هههه.

بنان : وشعرفج بالشرب لج ..

حور : ليش زيدون وعصام شيسوون كل خميس ، غير ينصب الميز بنص الصاله والشرب عليه وذيج السهره التعجبج..

بنان : عفيه اهلج شكد مقرفين ...

حور : وامي بعد اقرف منهم ، تخيلي ابويه يشرب ويجي يمها ، لا تضوج ولا تمل ، عدها عادي اهم شي يرضه عليها ..

بنان : لعبتي نفسي عوع ، راح اتقيء

حور : اوي عيني تتقيئ، انتي سألتي عن رجلج يشرب لا .

بنان : مسألت المن أسال ..

حور : ثوله من اكلج تضوجين .

بنان : وانتي هالسبب متقبلين بمؤيد ..

حور : هذا سبب من ضمن هواي اسباب..

بنان : حقج تكرهيه لعد ..

بدو الطلاب يدخلون للقاعه واجتي الاستاذه وبلشنه الامتحان ...

الي يخلص يطلع خلصت وطلعت ، لكيت رونق توها تريد تنزل ..

بنان : رونق اوكفي ..

رونق : هلو بنونه مشفتج الصبح ..

بنان: عندي امتحان وصعدت اراجع ، الله هاي شنو ..

رونق : شنو ..

بنان : هذا اللفاف مالتج يجنن منين اخذتيه كلش عاجبني ..

رونق : من كبال الكليه ، هاج اخذيه واشتري غيره..

بنان : لا تلبسيه بالف عافيه من ترحين جيبيلي واحد.

رونق : متجين ويايه اريد اجيب كم شغله لخواتي وصوني عليها ..

بنان : ممنوعه من الطلعه حدي للقسم ..

رونق : من صميم هههه

بنان : اي ..

رونق : هاج اللفاف مالتي واني راح اخذ غير لون..

بنان : عليج الله تردين غير لون لو لان اني عجبني ..

رونق : لا اريد الاحمر ..

بنان : ها زين لعد ، طلعت فلوس من جنطتي اريد انطيها ..

رونق : شكاعد تسوين والله ازعل ..

بنان : منيلج انتي ...

رونق : عندي معليج ..

خلته بيدي وراحت لبسته كلش حلووو ..

جان يشبه اليشماغ . لونه ابيض واسود

ضليت واكفه اباب القسم انتضر حوري اليوم تأخرت ...

شويه وطلعت ..

حور : هاا شلونج بالامتحان جاوبتي ..

بنان : نص ونص ..

حور : شعجب مغشيتي مني هلمره تعجبت من طلعتي ..

بنان : مالي واهس ردت بس اكمل واطلع ..

حور : هاي شنو انتي هم اشتريتي من هذا اللفاف راح تطلعن سيت انتي ورونق ..

بنان : لا هذا مال رونق اخذته منها هههه ..

حور : بالعافيه، امشي ننزل ..

بنان : ولج خاف اترزل ..

حور : يعني لو ترحين للكراده بدون علمه لو متنزلين للنادي ،وهو هياته ، امشي بابا وين تضلين هنا ..

بنان : امشي وامري لله ..

...نزلنه ، دخلنه للنادي ، شفنه روند وصديقتها قمر ..

كعدنه يمهم ، سوالف وضحك بعد جمعه بنات ، اله اني بالي يم صميم خاف يشوفني ويسويلي مشكله ..

ورة شويه دكتلي رونق كالت انتو وين ، دليتها مكانه اجتي ...

حور : شنو متاكلون تره جعت كلش ، متريكت ..

بنان : امشي نجيب ونجي ..

كمنه ، اخذنه مقبلات وفطائر ولفات وفنكر لان احنه هواي

بنان : جيبي ببسي حور ..

حور : ماشي ..

كملنه ورجعنه يم البنات توني اريد اكل اجتني رساله فتحتها من صميم ..

💬

يعني كسرتي كلامي ونزلتي مووو

وهاي شنو لافه على ركبتج ، شنو انتي مسترجله ، وهيج لابسه..
نزعيه بسرعه ...
___

رفعت راسي ادور هذا وينه، اكيد كاعد بالنادي وشافني من كمت ...

رجعت دزيتله

💬

مو قصدي اكسر كلامك بس جعت وردت اكل ..

..

شافها ومدز بعد

حور : متاكلين شبيج ..

بنان : خبلني والله يعني شنو سويتله ، اعتذرت منه مكافي ..

حور : تعاي احاجيج تقربي..

تقربت منها جان تكلي.

حور : لا كلشي تحجين ، دتشوفين مو وحدنه كاعدات شويه انتبهي ...

بنان : نسيت والله هو خله عقل براسي..

حور : مرة لخ انتبهي ...

بنان : زين ..

كملنه ورجعنه للمحاضرات ، خلص الدوام ، دكيت لصميم مجاوبني ، يمكن ٣٠ مكالمه وهو ميرد ...

هذا وين راح ليش ميرد هنا اني كمت اغلي من الاعصاب ..

صارت ساعه وحده ونص ، وبده دوام المسائي واني كاعده انتضره ، كمت كلت اروح تكسي شسويله ..

مشيت طلعت باب المجمع اريد اخذ تكسي طبك هو ..

باوعتله شسويله هسه ، صعدت وركعت الباب حيل ..

بنان : ليش متجاوبني من اتصل ، حجيتها وبجيت ..

صميم : حت تحسين بيه من اتصل ومتردين، لو اضل انتضرج ومتجين ..

بنان : يعني راح تضل هيج تسوي ..

صميم : امشي عدل وانعل شيب اهله اللي يغثج ...

بنان : غلطت وعرفت غلطي مو كافي ..

صميم : لا مو كافي يرادلج تربيه بعد..

عفته ودرت وجهي على الجامه متت قهر..

رجعني للبيت فتحت الباب اريد انزل ..

بنان : باي ..

دار وجها مجاوب ..عفته ونزلت ...

وهيج ضل صميم محاربني مده شهر ...

وبهاي المده ، شكد توسلت راسلت ، خابرت ، اريد يلين

ماكو ، عرفت زعل صميم ثكيل واذا غلطت ،

ميسامحني بسهوله ، وانتبهت على شي هم ، اذا صار

بينه زعل ، اني اللي اصالح واني ابادر بالصلح ، هو لا

يعتذر ولا يبادر ، واذا جان غلطان بحقي يكتفي

بالسلام وبس ، واني لازم امشي الامور عادي

وطبيعي ،عرفت خانه الاعتذار مموجوده بقاموسه...

____________

حور ..

مشت الايام واني مرتاحه نوعآ ما شويه خلصانه من الكال والكلت ..

وبيوم جنت توني اريد انام بين النايمه والكاعده ..

يعني بدايه نومتي ، بعدها خفيفه ..

وجان احس ايد تنمد عليه ، تتحسس جسمي ، بالبدايه

عبالي احلم بس من تكررت الحاله واللزمه صارت اقوى فزيت وعلكت لايت الموبايل وانصدم ب.........

يتبع ......