علاقات زائفة

البارت الثالث عشر💘

مشهد مستقبلي 💫

_ اريد اتطلك ..

_ شنووووو ليش شنو السبب ..

_ هواي اسباب ..

_ انطينه سبب مقنع توج متزوجه مصارلج ست اشهر ..

_ شكاك ، هذا كافي ..

_ يشك بيج ؟؟؟

_ اي

_ وهاي من شوكت هيج ؟؟؟

_ اول متزوجت ..

_ ليش معفتيه لعد ليش استمريتي ..

_ معفته لان بالبدايه عبالي غيرة ، يغار عليه لان يحبني ، بس من شك بيه اني واخوه ، تخبلت وعفته واجيت ...

_ شكد كتلج لتتسرعين مسمعتيني على العموم الحجي ميفيد بعد الصار صار ..

_ لج امي شنو تطلكين هو لعب جهال زوجوني طلكوني .

_ لا لعد انتضره لحد ميموتني بالشك ذاك الوكت تعضون اصابعكم ندم ...
___________

بنان : شنو هاي المفاجئة الحلوة فكرة منو ...

اسماء: هذا رجلج ركضنه من الصبح ..

التفتت على البنات

بنان : وانتو هم تدرون ..

حور : من البارحه كللنه صميم ..

بنان : هااا ، زين الله يثخن لبنكم ...

حجيتها والكل ضحك ...

بنان : اول تالي حور وصميم يتفقون على شي ...

حور : علمودج غير ، شفت شي يفرحج ليش ما اسويه ..

بنان : فدوة رحتلج ، رحت بوستهااا

وافتريتهم كلهم بوستهم ، وصلت لصميم ...

صميم : وانه لعد مالي بوسه ، تراني المحضر هاي الهوسه كلها ...

بنان : صميم كاعدين كلهم والله استحي ..

صميم : انه ابوسج ولا يهمج ...

باسني براسي ورجع خربط شعري بيده ...

بنان : لا ليش كوة سويت الكذله القاتله هههه.

صميم : اويلي يابه  ..

كعدنه ، وكامت حور تكصكص كيك ، واجه سيف يساعدها، اول تالي سيوفي يساعد هههه والله جنه خال عينه على حور ، هنا بديت اراقب حركاته ههه.

صميم : عجبتج ..

بنان : كلش ، اكول ليش طلعت من وقت ، هاي الشغله الضروريه ...

صميم : اي اجيت لعمتي اخذتها هيه اشترت هاي السوالف شعرفني انه ...

بنان : اي ماما بهاي الشغلات تعجبك كلش ذواقه ، مو داكول شلون ولد يعرف بهيج سوالف ..

صميم : فد انه اختاريت شغله على ذوقي ، لو اكلج شغلتين ..

بنان : شنو وشنو ..

صميم : الكيكه انه اختاريتها ، وهاي الهديه ...

اخذ علبه جانت ورة ضهره وخلاها بحضني ...

صميم : تستعمليه بالعافيه ۔۔

بنان : شنو هذا ..

صميم : فتحيه ...

فتحت الجلاد ، طلعت كارتونه مال موبايل ...

ضحكت .

بنان : عندي ليش كلفت نفسك .

صميم : اعرف عندج فد هذا احدث منو ..

بنان : شكرا

صميم : انه وين تمشي عندي الشكرآ هاي

بنان : لعد شنو اللي يمشي يمك ..

اشرلي على حلكه وضحك ..

بنان : اويلي متشبع انت هههه.

صميم : ول بنان ، انتي هم ينشبع منج ..

حور : هاكم عيني اكلو ، مو كافي غزل ..

صميم : وانتي بالج يمنه ..

حور : شلون لعد ، عيوني مفتوحه عليك ، خاف تغلط ويه صديقتي تلكاني فوك راسك ..

التفتلي وعقج حواجبه

صميم : انتي ما تكليلي منين تجيبين هالصديقات ..

بنان : هههههه فدوة لكلبهن عسل ..

صميم : هاي عسل ، هاي النحله مالتو ، تكرص وتضم راسها ..

حور : اي عفيه النحله كرصتها تأذي دير بالك مني هههه.

صميم : الله يستر منج ..

حور : امشي مستقيم كلنا وياك ،عوجت لا والله اعذرنه ساعتها نضطر نعدلك ...

صميم : حور تونه متصالحين لا تخربينه ...

حور : لا لتخاف منخرب ان شاءالله بس انت امشي عدل..

صميم : ول شايفتي ،لا تخليني الوص بالحجي خلينه متونسين شلج بضجيه الخلك ..

حور : سمعتك سابقتك شسوي ما ارتاحلك...

بنان : حور كافي خليني فرحانه بصلحكم ، ليش تتخاربون ادري توم وجيري انتو ..

ضحكت وراحت كعدت ...

صميم: هاي ليش ما بالعتني شمسويلها انه ..

بنان : هاي حور من اول موقف تقفل على الواحد ، ولو شتسوي متصدك بيك بعد...

صميم : بالطكاك ان صدكت او لا بحالها انه ..

بنان : حباب لتضوج والله تتشاقه ..

صميم : هاي مسمومه تذب السم وتروح بحجه شقه..

بنان : هههههه حوري مسمومه ، بالعكس لعد انت بعدك متعرفها..

صميم : ولا رايد اعرفها اساسآ ،انه نوبتين حاجي وياها اكلتو لراسي ، ترعد جنها عجوز النار ..

بنان : هههههههههههه اخ يمه ، لج حور تعاي ..

صميم : خاف تردين تحجيلها ولج ..

بنان : اي

صميم : ول ياب لا تبلشيني وياها ، هساع تجي وترطن براسي لين تمللني عيشتي ...

بنان : والله يرادلك وحده مثل حور مو مثلي فقيره تقشمرها بدب ونفاختين ...

صميم : مجنون انه حت ازت نفسي بالنار  ، انه اختاريت الجنه قبل اوانها حت انام وراسي بارد .
لا تحفر وراي ولا تفين حضي ...

بنان : اني الجنه ..

صميم : اي بالله لو هيج النسوان لو بلا ...

سالم : ها بنونه ماكو بوسه لابوج ...

كمت رحت يمه ..بسته وكعدت ..

بنان : بستك اول واحد ..

سالم : بس هاي متنحسب سريعه ..

رجعت بسته ونطاني هديته ، عيوني دمعت ..

بنان : ليش كلفت نفسك حبيبي ..

سالم : اذا بنتي حبيبتي ماجيبلها المن اجيب ..

وهنا الكل نطاني هديته الجايبها حتى رفل ورفاه خواتي هم جايبات ...

بنان : خجلتوني والله ، بجيت ...

سيف : ام دمعه ، لترخصين دمعتج على كلشي منزلتها ..

رونق : كلبها حنين بنونه ..

اجتي وحضنتني ...

وبالسوالف والضحك خلصت الللمه الحلوة ...

البنات رادو يرحون بابا كال اني اوصلكم ...

كمز سيف ،

سيف : لا يابه اني طالع وبطريقي اخذهم ...

سالم : اذا هيج زين لعد وصلهم وارجع من وكت لتتأخر يابه ..

سيف : ماشي ..

سلمو عليه البنات وراحوو...

ضلينه اني وصميم ساعه وراح ...

كمت نضفت الهوسه اني وخواتي كملنه..

وصعدت اقره ...

_________

حور

جنت كاعده نهايه دوام وبنان راحت للحمامات ...

اجاني صميم ..

صميم : كواج الله ..

حور : هلو شلونك..

صميم : بخير ،رايدج بشغيله ..

حور : هههه شغيله لو شغله ...

صميم : براحتج اللي تحبين ...

حور : كول ، اذا شي اكدر عليه بعيني..

صميم : تكدريله ان شاءالله..

حور : اسمعك ..

صميم : انه رايد اسوي مفاجئة ل بنان فد ماعرف بهاي السوالف ..

حور : والمطلوب مني شنو؟؟

صميم : تساعديني ..

حور : والله لو اكدر بعيني بس اهلي صعبين يعني ما اكدر اطلع وياك ..

صميم : لا مو هيج انه اصلا متفق وي عمتي نروح سوة فد اريد انتي والبنات ترتبون الحفله ..

حور : ها فهمت ميخالف اذا هيج سهله شوكت ناوي تسويها ..

صميم : باجر العصر ..

حور : هذا هو باجر باجر ..

صميم : لاتحجيلها ...

حور : ههه لا ما احجي ، بس خوفي وره هاي السالفه مصيبه ..

صميم : ول حور طلعيني من راسج تراج زهكتيني ..

حور : ههههه والله كلبي ممرتاحلك ..

صميم : عساه ما ارتاح ، شسويله ، عوفيني واليرحم والديج.

حور : خايف ..

صميم : من منو؟؟؟  حجاها وعقج وجها ..

حور : لا اخرب مخططاتك ..

صميم : فد فهميني شغله وحده حت ارتاح ، انه شمسوي ، وبالاخص الج شمسويلج ...

حور : والله يا صميم ، سواياتك هواي ومكاعد ابلعهن، خاف عبرتهن على بنان واعتبرته حب اني متعبرهن عليه ..

صميم : ول انتي راضعه وي ابليس ..

حور : هههههه انت ابليس ، اله شعرفك بيه .

صميم : لسان لو رشاش ، تصلين صلي .اكدرلج انه ..

حور : عدا الشقه خاف الله بيها ..

صميم : يولوو لا تكفريني ، شمسوي شمسوي ...

اجتي بنان تباوعلنه وتضحك من شافت صميم عصبي اختفت ابتسامتها ...

بنان : ها هم عركه ..

حور : عتب حبايب ليضل ابالج ، اخذو راحتكم اني رايحه للخط حسن دكلي ..

بنان : الله وياج ..

صميم مجاوبني ..

طلعت امشي للخط وصلت لكيت البنات واكفات منتظرات حسن ..

حور : ها وينه شو ماكو ..

رونق : ماعرف دكلنه واجينه وهو بعده ..

حور : اني هم دكلي ، خلي ارجع اتصل بيه ..

اتصلت دك وفصله ورجع اتصل ..

حور : هلو حسن

حسن : هلو حور شلونج ، عيوني اني ما اكدر اجيكم وكاعد اتصل ويفصل الخط ، ماحصلتكم ..

حور : خير خوماكو شي ..

حسن : لا بس خابروني جماعتي الصبح كالو اسمك طالع بالتعين ، ورحت اراجع عليه ...

حور : ياالله على الخير والله فرحتلك تستاهل ..

حسن : خير اليصيبج يوم الكم ..

حور : حيل ورانه كومه بعد ..

حسن : غمضي فتحي تلكيها خلصانه ..

حور : والله صح ، يلا عيني اخذ راحتك ..

حسن : الله وياج وسلميلي على البنات ...

حور : الله يسلمك يوصل ....
التفتت على البنات وكتلهم حسن ميجي ..

رونق : يا روند الفكر بعد مجيتي وشتتينه ، هاج اول شي ضيعتي الخط ، خرب وين نلكه خط هسه ..

روند : ليش مو انتو الفكر واني وجهي خير على اخويه من اول شهر تعين والله وفقه ..

حور : يا جلبه ..

روند : اخابر على بنان نرجع وياهم ...

رونق : يلا علواه ..

خابرناها كالت انتضرونه جايين ..

اجوي وصعدنه وياهم ...

صميم : هله بصديقات مرتي ..

حور : شكد ملطلط خرب هههه

رونق : اش ليسمعج عيب ..

حور : يربي مابلعه ..

رونق : لتبلعيه بس مو ضروري كل متشوفيه ومحسسته بهالشي ..

حور : محسسته شنو فدوة اني انطيها بوجها ...

رونق : خرب ليش حور والله عيب ..

حور : دشوفيه ، هاي تصرفات شنو صديقات مرتي وهاي بنان الثوله فرحانه ..

رونق : ترة مكال شي شبيج وياه..

حور : المفروض من نصعد يثكل احنه نسلم ويجاوب بثكل مو فاك حلكه يضحك..

رونق : امداج هو انتي كرهتيه بعد ، لو شيسوي متحبيه ...

حور : اي والله المحبه من الله مو غصب ...

مشينه ، وجان يوكف يم مطعم وكال انزلو ...

نزل هو وبنان واني التفتت لرونق ..

حور : ديلا بله هذا شحجي وياه هسه..

روند : شبيج حور هاي فوكاها جوز سوه هيج لخاطر بنان ، لان اول مره نصعد وياه حب يعزمنه ..

حور : مش متفائله ..

رونق : انتي يايوم تفائلتي والله اذا انخطبت وسويتي هيج بخطيبي العب بيج لعب...

حور : حسب اشوف اول واحكم ..

روند : والله شايفه روحج انتي ..

حور : وليش يمه ماشوف روحي ..

دكت علينه الجامه بنان يعني نزلو ...

نزلنه، فاتو قبلنه وفتنه وراهم ..

كعدنه  ..

صميم : شتتغدون ..

بنان : وين المنيو ...

اشر للعامل اجه ..

صميم : حبيب فد المنيو بلا زحمه ..

_ لا تدلل ، راح واجه جايب بيده كم واحد وزعهن علينه...

حور : شورطك ، راح تنقط ..

صميم : تدللو يابه ، طلبو اليعجبكم والمشتهينو..

حور : لتنطينه عين ترة تخسر هواي ..

صميم : انتي فد ارضي عليه ، انه يوميه جايبكم هنا ومغديكم على حسابي ...

بنان : لعد راح اصير مثل حور واخليك تتمنى رضاي ...

صميم : ول ياب انه عليش هيج اسوي غير علمودج ولان هاي صاحبتج ...

بنان : ها علمودي ..

ضحكنه بوكتها لان تناكرو صميم وبنان ...

تغدينه وطلعنه، رجعنه كل وحده لبيتها ...

___________

بنان

وصلنه البنات ورجعنه لبيت اهلي وكفنه بالباب والتفتت لصميم ...

بنان : صميم .

صميم : عيونو

بنان : راح تروح كبل للشقه ..

صميم : امبلا ( اي ) عجل وين اروح ..

بنان: صميم الله عليك ماعندك سوالف بنات بالشقه وهيج شي ...

صميم ، عليش اجاوبج امشي اخذج كبل ...

شو هذا حرك وطلع بينه  ، الشقه جانت بمنطقة راقيه كلش بعدين عرفت  هاي زيونه ...

بنان : حبيبي والله ماله داعي مجرد سألتك ، مو شك ..

صميم : نزلي بنان ...

باوعت وكفنه جوة عماره تخبل ، فتحت باب السيارة ونزلت ...

فات قبلي وفتت وراه ، اكو مصعد واكو درج ، انتضرنه المصعد تأخر ، رحنه على الدرج ..

صعدنه جانت طابق ثاني ...

فتح الباب وفتت ، بارده ثلج

بنان : شنو ماكو احد بيها...عفيه اعلك صوبه

علك الضوه وكال ، فد عمر وطالع ..

بنان : ليش جبتني لعد ..

صميم : دليتج حت من كلبج يلعب تجيني غفل مثل الافلام .

بنان : ههههه واني شتعرفني من هيج نوع ..

صميم :  شسوي بعد ، وتأمنين بيه ..

بنان: والله مشاكه مجرد سؤال ...

كام من مكانه واجه تقرب عليه نزعني الشال ..

صميم : انتي حيل حلوة ..

بنان : ادري ..

صميم : وترفه ..

بنان : اممم

صميم : وصاحبه خصر يموت ..

بنان : هههه

صميم : احبج .

بنان : لتتوكح صميم امشي رجعني ..

بس وين يسمعني .......

بنان : كافي صميم ..

صميم : يلا نرجع، لان اذا ضليت دقيقه بعد ما اضمن نفسي ...

لفيت الشال ونزلنه رجعني للبيت وراح ....

_____ هذا الحجي كله قبل يوم المفاجئة السواها الي .

وبيوم المفاجئة من راحو وصعدت اقره ..
عجبني اشكر صميم بطريقه تختلف ....

نشرت بالفيس صوره من اللي اخذتهن حور للميز والكيكه ..

وكتبت ليفوك ...

( الله يديمك الي حب وحياه وعمر )

سويتله اشاره يعني ينزل المنشور بصفحته هم ...

خليت الموبايل على صفحه ورجعت اقره ..

هيه ثواني وبدت الاشعارات تركع ، وحدة وره الخ ...

فتحت الفيس اريد الحك اقره ما اكدر

اغلبها جماعته قليل اللي مهنيه ، والبقيه نازلين نصبه عليه ...

وناس تسوي تاكات لناس ، كلش ضجت اجيت امسح المنشور هو اتصل ..

بنان : الوو

صميم : يعني انتي شوكت تفهمين التصرف التسوينه صح لو غلط .

بنان : قصدك على المنشور ..

صميم : اي على الخ___ ليش مسويتلي تاك على صفحتي متدرين عندي الف كوا____ يقره وانه ذول مبزعهم جنت هساع دارو علي ، وانه مو هنا مشكلتي ، المشكله الكل عرف فيسج ...

بنان : واذا عرفو قابل بايكه لو مخليه صورتي ، واصلا منشوراتي قليله كلش ومابيهن شي ، هسه ردت امسحه وانت اتصلت ميستوجب هاي الاعصاب كلها اني حبيت اشكرك بطريقه مختلفه ماعرف راح تضوج..

صميم : جنت يمج وشكرتيني وهذا هو ماله داعي الناس تعرف عنه كلشي ، اذا بيج هيج طبع بطلي منو ، اكره ما اكره ، التفاخر وهاي السوالف ..

بنان : اني مو قصدي اتفاخر ، لو شي بس هيج عجبني وراح امسحه لتضوج نفسك .

صميم : يلا رايح ..

بنان : الله وياك ...

مسحته وكعدت ، بس ارتاح اكيد لا ...

وره ساعه اجاني طلب مراسله على الماسنجر ..

فتحته ، فيس وهمي دازلي ..

( شورطج بيه ، مبينه انتي جديده متعرفيه ، نفذي بريشاتج احسن ، قبل لتضيعين )

مجاوبت كبل سويت بلوك ..

واستمرت المراسلات ، يوميه تجيني رساله شكل ..

وحده منهن كاتبه

( الله ليهنيج اخذتيه مني ، واني احبه  ، وعافني بسببج )

اخر شي عطلت الفيس ومسحته ..

وابد مجبت طاري لاحد حتى لصميم ..

بس شنو اني اكبت بداخلي ، صرت مثل بلاع الموس لابيه ابلعه يجرحني ولا بيه اطلعه لان ما اكدر ...

ومرت الايام ....

وبيوم كاعدين اني وصميم بالنادي اجتي وحده

شنو من جمال تصفن بيضه ثلج والشعر مصبوغ اصفر بس من هذا الحلو مو مال معدان والجسم مبروم برم والنزاكه تقره الف ...

صميم ، جان يدخن ويكلب بتليفونه ، اجتي وكفت يمه ..

_ صميم اريد احجي وياك ..

رفع راسه باوعلها ..

صميم : احجي شعندج ..

_ وحدنه ..

صميم : ماكو احد غريب ، فد انه وهاي خطيبتي  ماضم شي عليها  .

_ صميم امشي كتلك ..

حجتها وبجت..

اني كلش انقهرت عليها مبينه تحبه

عفتهم وكمت لان اني هم اختنكت ، لو مهما ابين روحي قويه واتحمل ، بس الموقف اكبر مني واكبر من انو اتحمله ...

طلعت من النادي بعدني مواصله الباب ، شفته بصفي ولزم ايدي ..

مشينه سوه بس شنو اني ارجف ..

صميم : ليش ترجفين يولوو ، والله علاقه قديمه هاي وانتهت ..

بنان : مسألتك اني ليش تبرر .

صميم : لانج تستاهلين ابررلج وانه كلهن ذن مو بعيني وداعت امي ..

بنان : هاهيه غير الموضوع ولتحجي بيه بعد ..

صميم : مزعلانه ..

بنان : لا ..

رحنه كعدنه وضل يشاقيني ويضحكني حتى انسى ، بس وين اكدر ، لازم اتحمل اني البديت بهذا الشي ونويت اكمله ، وبالنهايه اتحمل مسؤوليه قراري سواء جان صح او خطأ...

_____

حور

كثرت الضغوطات عليه ، عصام كلش اذاني يوميه هوسه واله تبطلين غصب عنج وحجايه منه حجايه مني يشتعل البيت ...

واجاني بيوم وكلي .

عصام : حضري نفسج على عطله نصف السنه زواجج انتي ومؤيد ..

اني شنو كطعت روحي شنو لطمت شنو ملخت نفسي ..واعيط ماريده ماريده محد يسمعلي ..

كمت ودزيت مسج لمؤيد .

💬

اذا انت رجال وعندك ذرة كرامه تنسحب مني ، لان اذا تزوجتك غصب اشوفك نجوم الضهر واخزيك ...

ماكو ساعه اقل وانكلب البيت بالصياح ..

بابا وضافر وعصام وزيد كلها تصيح وين حور

نزلت وكفت بوجهم ، كتلهم شكو ..

ضافر : ادبسز شلون تدزين هيج رساله لمؤيد .

حور : لان ماريده والي سنه اصيح واستريح ومحد يسمعني ..

زيد : والمن رايده لعد ..

حور : مرايده احد وما اتزوج احد اني باقيه هنا بس لتزوجوني مؤيد..

اجه عصام لوه ايدي ..

عصام : اذا اسمع عندج واحد منا لو منا اله ادفنج وكولي كال عصام ..

حور : لتخاف ماعندي ..

عصام : نشوف ...

ومنا بدت المشاكل يوميه مؤيد الكلب يحرضهم ويجوون عليه ...

بالدوام اغلب اوقات الاستراحه اعوف رونق وبنان واروح افتر وحدي اكعد بمكان هادئ ، وصلت مرحله ما اتحمل اي واحد يحجي ويايه ...

بس الغريب وين ..

كل ما اكعد بمكان المح عمر ، بس لا يجي يمي ولا يحجي ...

هاي سوالفهم هو وصميم عباله اني ثوله وهم تعبر عليه ..

عفته ماطول مجاي يمي شعليه بيه ، هسه بس احجي يكول لعد شكد خاله بالج ويايه...

الى ان اجه يوم وجنت منهاره لان الصارلي ميسولف بجيت بجي يمكن حتى حياطين الجامعه بجت على بجيتي ..

قبل بيوم انكتلت من عصام ومن صافر هم بسبب رفضي لمؤيد ...

عيوني متروسه دموع واشهك بصوت ، جنت مدنكه وماشوف اله بطل مي وكلينس يتخله بصفي ، رفعت راسي عمر خلاهن وراح حتى ملحكت احاجيه ..

فتحت المي جنت صدك محتاجه اشرب ،
شربته كله ، وطلعت كلينس مسحت وجهي ...

دك موبايلي بنان ..

حور : الو

بنان : وينج حوريه والله بالنه يمج ..

حور : بالحديقه كبال كليتنه كاعده ..

بنان : جيتج ...

شويه واجتي ...
سألتني شبيج مابيج سولفتلها ...

بنان : شلون قهر ادري لزكه خوما لزكه هذا ماعنده كرامه واخوتج العار شبيهم عرباين واقل حجايه يندفعون ...

هيه تحجي واني ساكته شجاوب ...

لهناك واذن دعيت بحركه كلب على اهلي والله يخلصني منهم...

بنان : شوفي حور

حور : شنو

بنان : عمر

حور: شبيه

بنان : هاي صار اكثر من مره اشوفه يفوت يصلي بالمسجد

حور : وين الغريب يعني واذا يصلي كلنا نصلي ..

بنان : شكد حلو لو صميم هم يصلي مثله ..

حور : ليش انتي تصلين حتى تردين الله يدزلج واحد يصلي ، دزلج واحد مثلج مسربت...

بنان : ههههه يا حقيره اني مسربته ..

حور : اللي تقبل بواحد مثل صميم شنو لعد ..

بنان : ما جاوبج لان انتي ضايجه هسه بعدين نتناقش ..

حور : متجاوبيني مو لان اني ضايجه لا لان تعرفين حجيي صحيح وماعندج جواب..

بنان : صح اني ما اصلي دائما بس اصلي واترك ، بس مو معناته اني موزينه ورب العالمين يعابيني بشي موزين رب العالمين رحمته اكبر من انو يحاسبني ويعاقبني علمود اكطع صلاتي ..

حور : وشلون ترديه يذكرج اذا انتي مذاكرته ، هسه صميم من يريد يجيج مو تتحضرين ، احلا لبس ومكياج واخر حبه ، ليش من رب العالمين يصيحج وكت الصلاه تتعاجزين لو تكومين بملل الاذان من يأذن معناته رب العالمين رايدنه نوكف بين ايديه  ...

هذا حبيبج الحقيقي مو صميم ..جربي مرة صلي بخشوع وشوفي شلون يجيج احساس عبالك واحد حضنج...

قال تعالى

بسم الله الرحمن الرحيم

(  فاذكروني أذكركم واشكروا لي ولا تكفرون )

صدق الله العظيم ..

صدك بجيت بجي من كل كلبي على حجي حور ..

هو حجي بس شكد أثر بيه ، وشكد حسستني بتقصيري اتجاه ربي ، ومن يومها قررت اصلي فرض بفرضه وما اترك ابد ، واول ميصيح الله اكبر ، اعوف كلشي بيدي واروح اصلي ...

________

بنان

وبيوم اجه سيف للدوام استغربت

دكلي طلعت حتى ادخله للجامعه  لان الضيف ميدخلوه اله يجي واحد من داخل الجامعه ، وهم مو دائما مرات يعاندون الامنيه ...

بنان : شعجب جيت ..

سيف : بنان اجيت احاجي حور ، حيل عاجبتني وفاتت بعقلي ...

بنان : سيف ابتعد عن حور الف متر ...

عقج وجها وباوعلي مستغرب وكال .

سيف : ليش بيها شي ..

بنان : لا بس اهلها صعبين ومينطون اله لساده ..

سيف : لا عيني شلي بدوخه الراس همزين كلتيلي ..

بنان : ليش متشوف رونق ، هم حبابه وحلوه ،واعرف اخلاقها من زمان ..

سيف : لا رونق فاهيه متعجبني هيج وحده ..

بنان : مممم تعجبك مثل حور ..

سيف : اييييييه ، ولج تخبل شنو من شخصيه شايله بنت الكلب واذا فتحت حلكها وحجت ، تركعج بحكمه ، حجيها كله موزون ..

بنان : وصفتها عدل هاي من شوكت انت مراقبها ..

سيف : كل متجي يمج اني اخلي بالي واحب اسمع حجيها ..

بنان : امشي نروح يمهم عفتهم بالنادي ..

سيف : ليش منو ومنو هناك..

بنان : صميم وحور ورونق ..

سيف: ها زين ..

رحنه كعدنه سيف سلم عليهم ..ردوله السلام
ضلينه سوالف وضحك ، ..

كامت حور ، صحنه وين ..

حور : بس اجيب مي واجي..

سيف : كعدي اني اجيب ..

راح سيف جاب واجه كعد  و وزعلنه مي ..

حور ،
توني لزمت البطل اريد افتحه ما احس اله واحد جره مني ونطاني غيره ..

باوعت هذا عمر ..

حور : هاي ليش ..

مجاوبني  ، بس جان ضايج ...

بنان ، كلنا استغربنه تصرف عمر واصلا من يوم داومنه لحد الان هو مكاعد يمنه ولا واصل ، ليش من اجه سيف اجه ..

سيف ضاج من حركه عمر ، وهو ولد اكيد فهم تصرف عمر شنو معناته ، استأذن وكام ، راح وراه صميم واستلمته حور ..

حور: شنو معنى تصرفك ليش هيج سويت وحرجتني ، اللي يشوفك يكول عندي شي وياك ..

محجه شي وكام ...

رونق : هذا مخبل مو صاحي ..

حور: شكو واحد عقله لاكف يجي علينه ، ناقصني عمر ..

________

بنان

مشت الايام وتعرفنه على صديقه روند مبينه حبابه وفقيره كلش ..هلكد ما حبابه كلنا حبيناها ..

بنان : انتي شسمج

قمر : اسمي قمر .

رونق : فدوة اسم على مسمى ..

حور : نفس قسم روند لو غير قسم ..

قمر : لا بالقسم التركي سوه .

بنان : اهلا وسهلا ..

قمر : اهلا بيج حبيبتي ..

وهنا انضمت النه صديقه خامسه بفتره قصيره صارت كلش قريبه وهاي اول مرة نقرب صديقه من عدنه ..
بسهوله وبوقت قصير ..

وبيوم كاعدين اني وصميم واجه عمر كعد ، راد شغله من صميم ...

ضلو يحجون اجتي حور ..

حور : السلام عليكم .

ردينه بعليكم السلام ..

حور : صميم من رخصتك اخذ بنان ويايه .

صميم : وين ترحون

حور : اريد اروح للمكتبه بشارع فلسطين اكو بيها مصادر الاستاذ دلانه عليها  ..

صميم : اله هسه انتضروني اكمل امتحان واجي وياكم ..

حور : لا نتأخر عفيه ومحاضرتين ماعدنه شي بس البعدهن، عدنه استاذ نبيل منكدر نطلع ..

صميم : يلا براحتكم بس بسرعه رجعو لتخلون بالي ..

حور : ماشي ..

طلعنه اني وبنان مشينه وصلنه للكيات صعدنه نفر ب ٥٠٠ وبسرعه وصلنه لان قريب علينه كلش نزلنه مشينه و وصلنه للمكتبه بعدنه نريد ندخل ونسمع صوت قوي  مثل الانفجار ، منحس اله العصف اجانه وطشرنه كل وحده وكعت بمكان ،  موقف اشبه بيوم القيامه ، بحيث من قوه العصف السيارات تلاطمت وحده بالخ ..

العصف اذاني كلش والجام مال مكتبه تكسر علينه..

اني وكعت ومحسيت بشي بعد ..

وبين الوعي واللاوعي

بين الشعور واللاشعور

اسمع صوت واحد يصيح يم اذني  حوريتي كعدي لتعوفيني

رجعيلي رايد اترس ريتج عتب ...

يتبع ...

الفديو لحور