علاقات زائفة

البارت الثامن 💓

رونق

خلص السابع مال جدي ، كلت اروح هم اجيب موبايلي وهم اخذ باقي راتبي خابرت البنات ، حوري كالت ابوها موجود متكدر تطلع ، بس بنونه قبلت ، اصلا متكول لا
فدوة لكلبها ...

بدلت العصر ، دكتلي مسكول طلعت الهم ...

رونق : هلو شلونكم ..

بنان : هلو حبيبتي شلون صرتي ..

رونق : احسن ..

حسن : بقيه بحياتج اخر الاحزان ان شاءالله ..

رونق : حياتك الباقيه حسوني تسلم ..

وصلنه للمول ...قبل لا ننزل بنان حجت ويه حسن ..

بنان : تنتظرنه لو تروح وترجع..

حسن : شكد تتأخرون ..

بنان : بس رونق تجيب راتبها والموبايل .

رجعت التفتت عليه ..

بنان : لو عندج شي بعد .

رونق : لا ماعندي علواه نرجع من وقت لان بابا تعبان وبالي يمه ...

حسن : لعد منتضركم هنا ...

رونق : تعبتك حسن ..

حسن : تعبج راحه عيني ...

مشينه ودخلنه للمول ...رحت على مكان عملي ...

رونق : هلو ابو درة ...

ابو درة : اهلا رونق بقيه بحياتج ..

تفاجأت هذا شلون عرف جوز لان لابسه اسود ...

رونق : حياتك الباقيه تسلم ..ابو درة اني اريد ابطل من الشغل تعبت ..

ابو درة : اي عندي خبر ..

رونق : منو كلك ؟؟؟ جاوبت بأستغراب ...

ابو درة : اقاربج اجه قبل كم يوم وكال البنيه عدها حاله وفاه وبطلت ..

رونق : اقاربي منو هذا وشسمه ؟؟

ابو درة : والله ما اعرف اسمه ، بس اني شايفه هواي يمكن عنده محل هنا ....

رونق : ها عرفته شكرآ ...

ابو درة : اني عبالي ترجعين بس من كلي بطلت ،وضفت وحده بمكانج ، وهذا راتب مال ٣ اسابيع...

رونق : خليها ...

ابو درة : تعبج هذا مو من جيبي..

رونق : تسلم رحم الله والديك ..

ابو درة : لولديج الرحمه ...

اخذت الفلوس وافور من الاعصاب هو شعليه بأي حق يحجي بلساني ويبطلني ...

بنان : على كيفج جوز ماخذلج اجازة وهو افتهمها بطلتي ...

رونق : اجازتيش ، متشوفين يكلي جان موضفت وحده ابدالج لو ما اقاربج يجي يكلي بطلت ...

بنان : ميخالف حقج بس هم نحجي بهدوء مو تتعاركين حور الثانيه ...

رونق : اخ اخ لو جايه حور ، حرامات جان فرجت عليه المول كله ..

بنان : واني هسه كاعد اشكر الله حور ماكو، امشي اخذي موبايلج بهدوء حلكج متفتحيه ويه الولد كافي نقذج من مجموعه مسربتين جان هسه انتي حالج غير حال ..

رونق : مو نقذني معناها يتصرف بحياتي ويقرر عني اشتغل لو لا ، فرضي اني مردت ابطل واحنه عيشتنه على هذا الراتب شلون ..

بنان : والله حبيته لهذا الولد مبين خوش انسان ، واني من البدايه مقبلت على شغلج هنا ،بس انتي اصريتي ...

رونق : كافي بنان تره راسي راح ينفجر من الاعصاب ..

امشي هذا محله ...

بنان : بداعه ابوج لتتصالفين وياه والله عيب ...

رونق : موبايلي وين ؟؟؟

سنان : وعليكم السلام ، البقاء بحياتج ..

رونق : شمدريك عندي فاتحه ..

سنان : جيت جبت موبايلج ، ادك بالباب محد يفتح ، تالي اجيت وره اربع ايام شفتكم معلكين قطعه بابكم وعرفت ...

رونق : لهنا شكرآ لكلشي سويته ورحم الله والديك..بس البعدها اريد اعاتبك عليه ...

سنان : خير ان شاءالله ..

رونق : تعرف ابو الشغل مبطلني ومشغل وحده ابدالي ..

سنان : اي الحمد لله ...

رونق : نعم شكلت ..

سنان : سبحان الله والحمدلله ، شبيج كاعد اسبح دنيا غروب...

رونق : تسبح من اليسا العالكها ...

سنان : لا صدك ليش بطلج معرفتي السبب ...

رونق : بسببك انت

سنان : اني شعليه ..

رونق : انت رايحله وكايله عدها فاتحه وتريد تبطل ..

سنان : لا اني رحت اخذلج اجازه واشرحله سبب غيابج حتى ميبطلج .وهو افتهمني غلط .صوجه هو ..

رونق : لا افتهمك صح ، لان انت كايله بطلت وجاب وحده بدالي ...

سنان : اذا تجين للصدك انسب الج تبطلين ،هو هذا هم مكان تشتغلين بيه ، شفتي ذاك اليوم شنو سوو بيج لو ما اني موجود بعدني جان الله ستر ...

رونق : وانت اخويه ابن عمي وتقرر عني ..

سنان : اعتبريني اخوج وخايف عليج ...

بنان : والله السويته متتجازه عليه ، اني اشكرك نيابه عن رونق وعن اهلها ، وصدكني لو ابوها عنده علم بالصار يجي بنفسه يشكرك ويبوس راسك هم ، واحسن خطوة سويتها من كلت لابو العمل بطلت ، واحنه اسفين اذا تجاوزنه حدودنه وياك ...

ردت احجي كرصتني بنان من ايدي ...

بنان : واذا متصير زحمه عليك اريد موبايلها لان اخويه ينتظرنه ..

سنان : الله يكملج بعقلج ان شاءالله انتي اختها ..

بنان : لا صديقتها ..

سنان : انيالج على هيج صديقه وعلى العقل الشايلته امشي وراها مراح تخسرين ...

بنان : رحم الله والديك هذا من ذوقك ...

سنان : والله صدك داخل الانسان مينعرف اله من تحجي وياه لو تعاشره اني من شفتج سفور ولبس كلت اكيد عندج كلشي عادي الشغل هنا والحياه الفري ، بس طلعت غلطان واسف على ضني بيج ...

بنان : ماكو داعي للأسف ، كلنا نفس الشي نحكم على المضاهر بدون منشوف الجوهر ....

سنان : والله على الداشوفه كدامي واللي اسمعه مالي ثقه بعد بالبنات حشاكم ..

بنان : مو كل اصابعك سوه وين متروح اكو الزين واكو الموزين .. والشك اذا انزرع ابداخلك راح يأذيك ويدمرك امشي صح ربك يدزلك وحده على نيتك ومثل اطباعك ..

سنان : ماكول شي غير الله يكملج بعقلج ورحم الله البطن النكلتج ...

بنان : رحم الله والديك ...

سنان : هذا التلفون تفضلي وقبل لتتعاركين صلحته الج ، عندي صديق ثقه سوالج الشاشه وكلفني ٥٠ الف ..

رونق

طلعت فلوس من الجنطه وخليتهن بيده حتى متشكرته ...

بنان : تسلم تعبانك اخويه ...

سنان : تعبكم راحه ...

بنان : مع السلامه ..

سنان : الله وياكم واهلا وسهلا وهذا محلكم اي شي يعجبكم تعالو..

بنان : ان شاءالله ...

طلعنه ردت احجي سكتتني بنان ...

بنان : كافي سدي الموضوع انتي اساسآ ردتي تبطلين تتعاركين ويه الولد ليش ..

رونق : شحجي انتي خليتي حجي ...

بنان : السويته هو الصح مو كلشي بالعرك والهوسه معليج بحور ، صح هيه طيبه وحبابه بس مندفعه مو كل تصرفاتها صح ، هيه صديقتنه ونحبها على عيني وراسي بس مو معناها نتلبس بشخصيتها ونقلد تصرفاتها حتى لو جانت خطأ ...

رونق : لتنسين حوري هيج صارت بسبب اهلها ...

بنان : اني مكاعد اذمها ولا احجي عليها بس عدها تصرفات مو صحيحه ، الولد ولد والبنيه بنيه ، ميصير واحد يخلي راسه براس الولد وياخذ وينطي وياه بالحجي والله شنو شخصيتي قويه لا حبيبتي المقابل ياخذ عنج نضره انتي صلفه وممتربايه واني حور كم مره مكعدتها وحاجيه وياها بس ميفيد ...

رونق : دمها حامي ...

بنان : بس غلط ...

وصلنه لحسن صعدنه ورجعنه للبيت ...

مشت الايام والحمد لله بفضل الله والبنات كدرت اتجاوز مرحله حزني على جدو واتناسه الموقف الصارلي واضافه لهذا حفلات التخرج هواي غيرت من نفسيتي...

______________________

حور

كاعده بغرفتي واجتي ماما

لمياء : حور عرس اخوج اسبوع الجاي يادوب نلحك نعزل البيت .راح تجي اسراء من الصبح تساعدج ..

حور : ومتعرفون اسراء اله بوكت الشغل والكراب ...

لمياء : طبج مرض لعد اشتغلي وحدج ..

حور : عادي اشتغل وحدي متعلمه قابل راح اموت ، بس غير لو المقابل يستاهل اتعبله ..

لمياء : سواء زين او موزين يضل اخوج وعمر الدم مصار مي ...

حور : ياريته صار مي واشيله واجبه ....

لمياء : ليش هيج كلبج حاقد مجنتي هيج..

حور : راح اجاوبج على سؤالج ، منرجع للقديم وافتحلج دفاتر عتيكه نجي للجديد واحنه ولد اليوم ، ابنج شكد صرف على تجهيز غرفته وعروسته ..

لمياء : كومه خير من الله ..

حور : رحم الله والديج ، من هذا خير الله الناطياه ، مكدر يطلعلي ٥٠ الف ماريد اكثر ، ويكلي هاج اختي اشتري ملابس لعرسي وافرحي بيهن ، يعني هم مثل عرس اخوتي البس من اسراء ونبأ ....

لمياء : يكلج عدها اب هو مسؤول عليهة اني شكو.

حور : هو وينه الاب شو ماشوفه ، تدرين هلكد ما كارهته مرات افكر اذا مات يمكن افرح وما اذبلي دمعه عليه..

لمياء : اسم الله عابت لهل حلك شلون هيج تدعين على ابوج ..

حور : مو ادعي بس كاعد اشرحلج مشاعري ...
وشنو احس تجاه ابويه .

لمياء : هاي علمود جم فلس هيج كارهته ...

حور : لا مو على الفلوس وتعرفين كلش زين اخر همي وشكد قنوعه اني ، بس ما اتذكر فد يوم باسني لو حضني ، لو كتله الله يساعدك وجاوبني بوجه يضحك ، دومه عصبي ويرزل يايوم كعدت يمه اذا مسبني وغلط عليه ، يايوم اجاني كلي منين هذا لبسج واني مناطيج الالف دينار ، مكاعد يشوف البس ، من بنان ،
مفكر اني منين اجيب هيج ملابس غاليه ، لو يغلس ...

لمياء : رجعنه نعيد ونزيد بالحجي اولي جوة احسنلي ، انتي وجه واحد يكابلج ....

حور : كابلي ولدج احسن ، اني بيش كيلو ..

لمياء : الله يهديج ...

حور : ادعي لرجلج و لأولادج بالهدايه همه افرض مني ...

معجبها الحجي سدت الباب وراحت ، ثاني يوم اجتي اختي اسراء وبلشنه نشتغل من فوك ليجوه واخر شي رحنه لغرفه ضافر العريس حتى انظفها ...

كملناها وطلعنه ، اجه موعد العرس عكب باجر الحنه ، كالت ماما العروس راح تجي تجيب ملابسها ...

اجتي العروس قبل بيوم من الحنه ...

شنو جنط مليانه غراض شنو نيشان مشتريلها يجنن اول مره اشوف هيج شي رغم احنه زناكين ..

واللي كتلني اكثر من نزلنه جوة وكاعد نسوي بالعشا امي مخبوصه عبالك مدري منو جاي ، تصخر بيه روحي وتعاي ، الى ان اجه بابا باسها لمرت ضافر من راسها ولبسها كلاده ، واني خواتي اربعه تزوجن ولا وحده بارك زواجها مو عاد يشتريلها ذهب ويلبسها ، اني من انقهرت مو حسد لا والله بس شغله تحز بالنفس ، خير ابونه غيرنه متنعم بيه ،

حالنه مثل العراق ، هو ابو الخير وخيره فايض للجوارين ....وعياله جواعه ....

راحو العروس وامها وصعدت فوك خابرت البنات
افرغ اللي بكلبي لان اطك اذا محجيت ...

بنان : والله قاهره روحج هيج ، شنو جديد عمو عليج لو متعرفيه هو نفسه من يوم يومه لئيم وأناني على شنو تبجين ..

رونق : اي والله ليش البجي، انتي اصلا غاسله ايدج منهم ، ابجي من شخص يحبج يخاف عليج ...

حور : انتو مكاعد تفهموني ، ولكم خواتي طلعن من بيتنه بغصه وقهر ، مفرحانات ، ليش مرت ضافر غريبه وبعدها مجايتنه وهيج مريحيها..

بنان : طز بيها وبيهم تعاي كليلي شراح تلبسين ..

حور: كلشي مشتريت وتعرفين ليش ماله داعي اشرح ..

بنان : يلا انتي شنو تلبسين حلوة ...

رونق : اي صدك تخبل حوري لو تلبس كونيه تجنن ..

بنان : يرحون فدوة لسواد عيونها عيون الغزال ...

حور : هاي شنو الغزل ترة استحي ..

رونق : واني بديت اغار عيني ..

بنان : تخبلن ثنينجن ...

وهيج نهينه المكالمه طيبو خاطري وشالو همي ويايه وشاركوني حزني ، صديقاتي شنو اوصفهم قليل بحقهم ..

ثاني يوم الصبح جانت ساعه عشره واليوم حنه ضافر ..

صاحتني ماما عبالي تريد شغل لو شي ...

حور : ها ماما ..

لمياء : تعاي صديقتج بالباب .

حور : منو ؟؟

لمياء : بنان ..

نزلت اركض طلعت للطرمه والكاها واكفه مبتسمه ...

رحت حضنتها وتباوسنه ...

حور : شجابج ..

بنان : رجليه جابتني ..

حور : لج مو وكت تحشيش شذكرج بيه من الصبح مخروعه حلمانه ..

بنان : ليش اني نمت حتى احلم بيج الليل كله اتذكر شهكاتج وكلبي ينزرف ...

حور : مو قصدي اقهركم بس لو محاجيه جان طكيت..

بنان : لو محاجيه جان كسرت راسج لعد ليش احنه صديقات ، قابل بس وكت الضحك ...

حور : لو ما انتي ورونق جان ضعت اني بشنو اجازيكم ماعرف ..

بنان : بالنسبه الي تكدرين تجازيني بكلمه منج بس ...

حور: كولي عيوني الج ..

بنان : تاخذين هاي العلاكه ومتحجين شي.

حور : بنان رجعنه لنفس السالفه ..

بنان : لخاطري اذا تحبيني وترديني ارتاح وما ابجي اخذيها ..

حور : بس كاعد تفشليني والله .وتخليني اكره اهلي بالزايد ...

بنان : كرهيهم لان يستاهلون الكره بس مال فشلتج لا ما اقبل تحجيها احنه صديقات وروح وحده ...

حور : شكرا ، حجيتها وبجيت وهيه حضنتني ...وبجت على بجيتي ...

بنان : هذا حسن كاعد يدك هورن عنده شغل يلا لتبجين وافرحي وانعل ابوهم لابو يومهم ...

حور : ان شاءالله حبيبتي شكرا مره ثانيه وسلميلي على خاله وعلى حسن ..

بنان : يوصل مع السلامه ...

حور : الله وياج حبيبتي ...

راحت واني دخلت جوه ..

لمياء : شنو رادت بنان ..

حور : سلامتج ..

لمياء : شنو هاي بيدج ...

حور : جابتلي ملابس ..

لمياء : خطيه عاشت ايدها ...

باوعتلها هزيت ايدي وصعدت ...

ساعه ٣ كمت ،
رتبت نفسي وسبحت وسويت شعري وخليت مكياج خفيف . فتحت العلاكه اشوف شنو جايبه بنان ..

واتفاجأ فستان نيلي كيبور يجنن والبطانه بيضه ، قصير من كدام ومن ورة طويل ، موديله كلش حلو ، وجايبه تنوره وقميص للزفه ، حتى حذاء جايبتلي ، بله هاي شلون اجازيها شلون اردلها الجمايل اللي كسرت ضهري بيهن ...

بدلت واسمع الهوسه اجوي الكرايب ، اشتغل الديجي ...

لهناك خواتي اقتحمن غرفتي هنه وجهالهن همزين كملت قبل لا يجون ، لان كل وحده استلمت شغله من غراضي ، الشسوار والمكياج والمرايه تسطرن كدامها صار مدافع ، ههههه ..

حور : هذا الانقلاب السويتنه منو ينضفه اذا رحتن ...

جاوبن بصوت واحد ... انتي

حور : هو اني شمستفاده منجن غير بس الكراب ..

نبأ : ولج هذا فستانج يجنن منيلج ..

اسراء : بدون متسألين من بنان متشوفيه راقي مبين غالي ..

نبأ : جان استحه ابوج من يخليج تلبسين من الناس ..

حور : كملو اني نازله قبلكم ..

كلش انقهرت من حجيهن هنه خواتي اصلا مذكرني بشي رغم يشترن الهن ولجهالهن ، ومن يشوفن عندي شي جديد منيلج وليش تاخذين ، اني كمت ما اناقش اسمع وبس ....

بدت الحنه والكل تركص اله اني عازله روحي واريد بس تخلص على اعصابي كاعده ...

لمياء : تعاي حور لبسي شي فوك هدومج وساعديني ...

حور : جيت ..

كمت لبست صايه وخليت شال فوك راسي ورحت للمطبخ ، شفت ماما تخلي فلينه بعلاكه وتخلي وياها قوطيه وصمونتين وتسدهن ..

اني هم كمت اسوي مثلها ، جايبين عشا جاهز . كباب وبورك وكبه وطرشي بالفلينه خاليه ...

كملنه كلشي وماما صاحت على زيد حتى ينقلون الاكل ..

اجوي الولد ومن ضمنهم اجه مؤيد ، صارلي شكد مشايفته اخر يوم شفته بيوم اللي انكتل من عمر ههههه.بعد لا اجه ولا اتصل ...

مؤيد : شلونج حور ..

حور : الحمدلله وانت ..

مؤيد : هسه يلا صرت زين ، هاي شطالعه ...

حور : عساك دوم بخير ، اخذ راحتك اني رايحه يم البنات ..

عفته وفتت جوه شلون عيون نكسه كصني كص ...

خلصت الحفله وكمنه اني وخواتي تنظيف هلكنه ، صعدنه فوك بغرفتي ضحك وسوالف للفجر ونمنه ...

كعدنه ثاني يوم هم نشتغل وكفينه الغده وبدلنه .

اجتي السيارات حتى نروح نجيب العروس ..ومناك نروح للقاعه ...

ضافر مخبوص يلا وخاف ناسين شي ويمشي ويرزل بينه المفروض عريس يصير أليف شويه هو لا بالعكس ...

طلعنه اخذنه البنيه وبوجهنا للقاعه ...

بدت مراسيم العرسان ...اني اخذت ركن على صفحه وكعدت اباوع ...

اجتي عمه زكيه كعدت يمي ، وراها اجه مؤيد ...

همسلي بصوت ناصي بس اني اسمع ..

مؤيد : يوم النه صح مراح اكدر اسويلج هيج عرس ضخم بس اللي اكدر عليه ما اقصر ...

حور : لتكلف نفسك ولتفكر لان زواج ماكو انسه ..

مؤيد : بعدج مصره على قرارج ...

حور : بعدني وما اغيره ..

مؤيد: تركتج كل هاي الفتره كلت بلكت تفكر ويرجع عقلها براسها .بس الضاهر طلعت غلطان..

حور : اني مافيدك ومادام من عائله بابا اكرهك على كرهي اله..

مؤيد : واني شعليه ب أبوج وتكرهيني ..

حور : العرك دساس ، لابد ماخذلك خصله من خالك ، لهذا ما اريد كرايب لا من جهة ابويه ولا من جهة امي ، ماريد مأسات ابويه تنعاد بزوجي ....

مؤيد : تردين عمر مو ...

حور : ياعمر ؟؟؟

مؤيد: الوياج بالدوام..

حور: وشعرفك بأسمه ...

مؤيد : معليج شلون عرفت ، بس خلي ابالج لو تطلع نخله براسج ماخليج تتزوجيه...

حور : ارتاح لا اتزوجك الك ولا غيرك ..

مؤيد : بسيطه حور ، هينه ...

عافني وكام ، خفت لهذا الوجه ...

وهيج خلصت الحفله ...

_____________

بنان

اخر يوم شفت صميم هو بيوم حفله قسم الفرنسي

بعد مشفته ابد ، لان التهينه امتحانات ومن بعدها عطلنه اسبوعين حتى نقرة لاخر السنه ...

كعدت قريت بس كلاوات هههه بنان تقره اذا ما انحصر قبل الامتحان بيوم والرجيف الزين هيج يلا تفوت المعلومه وتستقر بالمخ ...

بدت الامتحانات واليوم اول يوم

وصلنه من وقت ٨ اله ربع ....

بنان : حور نجيب جاي ونروح نراجع ، منايمه وراسي بده يوجعني ..

حور : يلا امشي ..

رحنه اخذنه جاي ورجعنه للحديقه مال توفل ، الطلاب كلها بيها ، عباره عن مجاميع كاعدين سوه والكاع مفروشه بالملازم ...

احنه هم اخذنه زاويه وكعدنه بيها فرشنه ملازمنه وبلشنه ..نقره

رفعت راسي ردت اشرب جاي واشوف صميم هم كاعد ليغاد هو وجماعته يقرون ، يمكن مشافني لان هواي طلاب ...

كعدت اقره وكلساع ارفع راسي اسرق نضره وابتسم وارجع اقره..

والله وكعتي وكعه بنان ومحد سمه عليج ..

صار موعد الامتحان ، توجهنا للقاعات وبلشنه ..

وهيج مرت الامتحانات ...

اخر يوم من كملنه جنه كاعدين خمس بنات بالنادي ..

سوالف وضحك فرحانين خلصت الامتحانات ...

حور : هذا صميم جاي علينه ..

رفعت راسي صدك هذا جاي بأتجاهنه شيريد..

صميم : مرحبا ..

ردينه با اهلا ...

صميم : بنان رايدج ..

بنان : نعم

ذني البنات كلهن التفتن عليه والنضرات والغمزات مال اي واي هههههه

صميم : احاجيج دقايق ورجعي ..

بنان : اوك ، كمت ونضرات حوري تتوعد يعني ليش قبلتي ۔۔۔۔

مشى ومشيت وراه ..

جان حاجز مكان بالنادي بس بعيد عن الهوسه ...

صميم : اكعدي بويه ..

كعدت وهو هم كعد ابتسم وخله ايده على الميز...

بنان : احجي بسرعه لان كعدتنه وحدنه محلوة ...

صميم : منا وغاد راح تتكرر هواي وفنه اليفك حلجو ..

بنان : شنو قصدك يعني مفهمت ..

صميم : انه افهمج يا كلب صميم وحلالو ...

ضحكت هذا شيحجي ...

صميم : ول ياب دحجي ، انه لا رايد العب ولا اسوي علاقات انه رايدج على سنه الله ورسولو .. وردت اعرف رأييج قبل لا اجي لأهلج ، اذا كلبج هاوي اتقدم ، مارايدني وماهاويني ، حت لا اجي ولا افشل روحي..

بنان: فاجأتني وبعدين اني كلشي ما اعرف عنك غير شي واحد انت تداوم هنا ...

صميم : مو مشكله سأليني اللي يعجبج وانه اجاوب ..

بنان : انت احجيلي عنك كلشي ...

صميم : ماكو اسهل منها ..

انه صميم موسى قحطان ..

دليمي من اهل الرمادي ... البو_____

مواليد ١٩٨٤ عندي اخ واحد اسمو جراح واكبر مني متزوج وماعندو اطفال..

وخوات ٣ حنى و عسجد و زها ...

صغار اكبرهن زها بكدج ومتزوجه وعدها بنوته وحده ...

وعسجد صف رابع اعدادي

وحنى ثالث وكعدت تضوج من الدراسه ...

بنان : اسمائكم غريبه شنو معنى عسجد ...

صميم : عسجد معناتو ( الذهب ، الجوهر الثمين ، مثل الدر ، الياقوت )

بنان : وزها شنو بله حنى اعرفها يعني الحنه مو صح ...

ضحك

صميم : لا خطأ ..

حنى معناتو ( فتاه رقيقة صاحبه قلب عطوف )

وزها ( يطلق على الاناث صاحبه النور والاشراق )

بنان : حلو حبيت هههه

صميم : حبيتي صميم لو خواتو ...

بنان : هههه وين راح بالك حبيت الاسماء ...

صميم : هاا زين ، حابه تعرفين بعد ..سألي وانه اجاوب..

بنان : ياقسم انت ...

صميم : فرنسي نفس قسم صاحبتج رونق ..

بنان : حتى رونق تعرفها هههه..

صميم : اللي يحب من صحيح يسأل عن حبيبو وعن احبابو ...

بنان : لهجتكم تخبل ...

صميم : الله حيوو هههه مريتي تحب لهجتنه ، انه اعلمج عليها ، فد صيري الي ...

بنان : بس بابا مستحيل يقبل يزوجني اذا ما اخلص جامعه...

صميم : ماكو مستحيل يم صميم ، ريحي نفسج يجيج الصافي ...

بنان : ما اعرف شكلك ..

صميم : الفهمتو كلبج هاوي ...

بنان : لتخجلني صميم كافي ..

صميم : هذا هو اخذت جوابي ارتاحي يابه ....

راح واني ضليت كاعده بمكاني ، هذا المكان بكبره ميسعني من فرحتي ..

صميم ، عرف شلون يدخل لكلبي ويتربع بيه ..

ضليت على صفنتي الى ان اجتي حور ..

وحجيتلها ، اكيد عارضت ومقبلت وحجت على صميم ..

بس اني بالي ابد مو يمها ، بالي يم الحجي مالته ، ما اريد يروح من بالي ....

رجعت للبيت والحماس يقره الف ..

شغلت اغاني ، انظف واشتغل ، اكلت البيت اكل ههه كمت اطلع شغل من جوه الكاع..

كميه طاقه عندي مو طبيعيه...

ماما تضحك عليه عبالها فرحانه لان عطله عندي ...

مشت الايام واني الضحكه شاكه حلكي انام واني مبتسمه ، رجع سيف يعلمني على السياقه ضبطتها نوعآ ما ...

وره اسبوعين من بدت العطله ..

كثرت جيات صميم على غسان ، قوت علاقته بيه

تطورت علاقته و وصلت لسيف ، صارو اصدقاء كلش ..

صميم ؛ صاحب لسان ، ياخذ الكدامه بلسانه يعني غصب عن المقابل يحبه ...

مر شهر كامل وهو بالاسبوع يجي مرتين ، يكعدون بالحديقه نراكيل وسوالف ، واخوتي كيفو عليه ،
وهو اجاهم من باب اني هنا غريب وماعندي اصدقاء وبس انتو اعرفكم ..

بيومها ضحكت عليه ، شكد جذاب عنده اصدقاء قيامه ويكول ماعندي ...

اللي فهمته من اخوتي هو عنده شقه هنا بغداد وكاعد بيها هو وعمر وبعد ولد وياهم ...

وبيوم ، ردت اروح لحور ، وحسن ماكو كلت مادام بابا نايم اخذ سيارته واطلع شيرادلها اني مو اعرف بعد شكو ..

بدلت واخذت السويج وطلعت رحت لحور ، سوالف وضحك اني وياها مرت ساعه ورجعت بطريق الرجعه فتت بفرع جان مسدود بيه عرس ناصبين كراسي ، شلون بلوه اني ما اعرف ارجع بك مو كلش ضابطتها ومنا ومنا سيارات ، لزمت الموبايل وخابرت على سيف ...

بنان : سيوفي الحك اختك بورطه..

سيف : شكو ولج احجي ...

بنان : طلعت بسياره بابا ..

سيف : ودعمتيها صلوات...

بنان : لا والله بس طبيت بفرع وبيه عرس وما اعرف ارجع ...

سيف : هههههه ثول الثولج كون صدك ثوله ..

بنان : تجي لو ارجع بك وافلشها وافلش سيارات العالم وعليكم الخساير..

سيف : لا يابه جاي انتضري بس دليني انتي وين بالضبط ...

وصفتله المكان وره ربع ساعه وصل جاي بتكسي ...

نزلت وهو صعد ...رحت صعدت من الجهة الخ ..

سيف : ههههه والله الطريق كله اضحك عليج والسايق صافن عليه عباله مخبل لو عقلي ضارب ..

بنان : هو احنه كلنا بيت سالم عدنه خيط ..

سيف : اذا ما ارجع واكله لسالم اطلع مو ابنه ...

بنان : هههه كله عادي اهم شي تونست ...

رجعنه طبك سيف بالباب ونزلت

فتت جوه .

صحت هلووو ولكم ردت اضرب سيارة سالم لو ما ربكم ستر ...

واسمع الضحك ورايه اندار غسان وصميم .. يبوووو.

من الفشله فتت اركض حتى ردت اوكع على وجهي ...

صدك ثوله ...

مرت اربع ايام

جنت انضف بالطرمه لابسه برموده كابوي وبدي احمر وشعري طاير بالهوه هههه اني بيه حاله ، من اغسل الطرمه ابلل روحي اسبح بره ههههه....

بهذا اليوم جنت ارش بالحديقه واغني ....

فات غسان ..

غسان : بنان ، راح ييجي صديقي فد شويه كملي بسرعه بين ما اجيب كم شغله من ابو الاسواق واجي ..

بنان : تمام ..

غسان : راح اعوف الباب مفتوح ، بس ارده ..

اشرتله براسي اي وراح ...

ورجعت ام كلثوم للطرب الاصيل هههه ، وره عشر دقايق ...

انحضنت من وره وايد انخلت على حلكي ...

اني عبالي غسان ، دائما لو يشيلني لو يحضني ...

وخرت ايده ، وكتله ..

بنان : شبسرعه جيت...

جان يبوسني من ركبتي ..

من اندار اشوفه صميم ...

شمرت الصونده من ايدي ، وخزرته ..

بنان : انت شكد ادبسز ومتستحي ، مو صوجك صوج اللي مأمن بيك ومدخلك بيته والله اله اكول لاخوتي ...شلت الصونده ونكعته بالمي وهو يضحك ...عفته وفتت ...

عزة شكد جريء هذا ،، لو فايتين اخواني ، اني اعلمه اذا مكلت الهم بسيطه ..

زين شلون اكول خاف تصير مشكله ويتضاربون ...

صعدت فوك اغلي وارجف من الموقف الصار ...

دكات كلبي صارت الف ...

صار الليل وتذكرت رقمه هو كاتبه بدفتر طلعته وسجلته بتلفوني ،رحت على الفايبر لكيته خال صورته دخلت وكتبتله ..

💬
حرامات أمنت بيك انت مو كد الثقه وخاف جان عندي قبول الك واحد بالميه هسه ماكو انت محيته ..

طلعلي مرئي قراها...

مجاوبني وره ساعه دزلي ...

💬
علمني حبك سيدتي .. أسوأ عادات
علمني أفتح فنجاني في الليلة الآف المرات
واجرب طب العطارين .. وأطرق بابا العرافات
علمني أخرج من بيتي .. لأمشط أرصفة الطرقات
وأطارد وجهك في الأمطار وفي أضواء السيارات
وألملم من عينيك ملايين النجمات
يا امرأة دوخت الدنيا يا وجعي...

💬

علمني حبكِ أن أتصرف كالصبيان
أن أرسم وجهك بالطبشور على الحيطان
يا امرأة قلبت تاريخي
إني مذبوح فيكِ .. من الشريان إلى الشريان
علمني حبك كيف الحب يغير خارطة الأزمان
علمني أني حين أحب .. تكف الأرض عن الدوران
علمني حبكِ أشياء ما كانت أبداً في الحسبان
فقرأت أقاصيص الأطفال .. دخلت قصور ملوك الجان
وحلمت بأن تتزوجني بنت السلطان
تلك العيناها أصفى من ماء الخلجان
تلك الشفتاها أشهى من زهر الرمان
وحلمت بأني أخطفها مثل الفرسان
وحلمت بأني أهديها أطواق اللؤلؤ والمرجان
علمني حبك يا سيدتي ما الهذيان
علمني كيف يمر العمر ولا تأتي بنت السلطان

💬
اسف بس منضرج ذبحني ولحد الان انه دايخ..
احبج ..

ما ادري شصار بيه صميم شلون وياك اني ، شي فوك شي ...

مرت عشر ايام واني صراع بين كلبي و عقلي اريده وماريده اقبل وما اقبل ...

الى ان اجه غسان وفاتح بابا بالموضوع ...

غسان : يابه صاحبي صميم تعرفه ..

سالم : شلون ماعرفه شبيه ..

غسان : اجاني اليوم وراد بنيه من عدنه ..

سالم : واني منيلي بنات للزواج كلهن صغار ..

غسان : حجي صميم خوش صميم رجال والنعم منه وشارينه ، وصارله كم يوم يحاول ويايه واني ما انطي وجه بس اليوم كلش حرجني ...

سالم : وهو وين شايف بنان ..

غسان : يكول كم مره اجيت وشفتها لو راجعه من الدوام لو من تطلع ، ويكول اني على سمعتكم الطيبه جاي ..

سالم : وشلون وين تكعد بنان اهله بالرمادي جايز من بنتي واشمرها هناك ...

غسان : حاجيته كال على لسانكم حتى لو تردون بيت بغداد اكعدها ....

سالم : نسأل اختك نشوف رأيها شنو خاف متقبل تتزوج اله تتخرج ...

غسان : هاي شغلتكم انت وامي ، اني العليه اوصل جوابكم للولد ولتتأخرون عليه ترة مستعجل ..

سالم : حتى لو وافقت بنان ، بس خطوبه ماكو زواج اله تتخرج ...

غسان : وين صايره خطوبه ٣ سنين ، تتزوج وتكعد هنا وتداوم ...

سالم : هذا شرطي قبل اهلا وسهلا مقبل الله وياه ...

اجتي ماما حاجتني اريد اكول لا ، بس ارجع واتذكر سوالفه واصلا اني حبيته ....

ما احس بنفسي اله واكول اي ماما اقبل ...

__

رجعوله خبر لصميم بالموافقه ، طبعا اني حضرته من البرامج كلها وحتى على الخط لهذا معرفت ردت فعله شنو ...

طلعنه اني والبنات للمنصور اخذت فستان زيتوني كلش حلو مفصل على الجسم ونازك ...

ورحت صالون قريب على بيتنه سوتلي شعري ومكياج بسيط ...

لان بس كعده يعني يجون نسوان ورياجيل يطلبوني من بابا ويتفقون وقراءه فاتحه وبعدين المهر ..

كاعدين اني والبنات حور ورونق وروند وماما وبنات خالاتي سوالف وضحك بس اني كلبي يدك ارجف مدري خوف مدري فرح ....

لهناك وصاحو اجوي ...

باوعنه من شباك الهول يطل على الطرمه ..

فاتت زلم معكله الطرمه تغص وتبلع بيهم وبعد ، لهناك وفات حبيبي ، لابس قاط اسود وقميص اسود شطالع يجنن ....

الاستقبال مالتنه شكد كبيرة مكفتهم خلو كراسي بالطرمه وكعدو ، كرم اخويه الصغير فات يسولف لماما يكللها حتى بالشارع كعدو والفرع انترس سيارات مالتهم ....

اجه بابا للهول هو وغسان ...

سالم : غسان على هاي المشيه الضخمه لو تجيبون سيد وتعقدولهم ذوله طريقهم طويل مو مال يرجعون مره لخ ...

غسان : اروح اكله واجي ..

راح ورجع يضحك ..

سالم : ها شكال ..

غسان : خايف عليه محسب حسابه وجايب شيخ وياهم ههههه ..

سالم : هههه الله يسعدهم اني حبيته والله ..

غسان : صميم وردة .ويستاهل الورده مالتنه ..

ابتسمت بخجل ونصيت راسي ...

من بعد حجي هواي كالو خلي البنيه تجي وره الباب حتى تعقد ..

اني ما اعرف بمراسيمهم شنو بس بابا طلب عقد شيخ ومحكمه ...

المهم عقدولي على المذهب الحنفي ، يعني على مذهب صميم ...

احنه ما عدنه تفرقه هيج هيج هو زواج ....

اني كلت نعم وبدت الهلاهل تركع والبنات بوسوني وعيالي هم ام صميم ماتت عليه تروح وترجع تبوس بيه وخواته هم ..

صاحو ، لبسو راح يفوت الولد ...

اجه طب يضحك طول وهيبه يخبل اخذ كلبي ...

كعد يمي باس راسي وكال

صميم : مبروك عليج انه ، ومبروك عليه انتي ..

يتبع ......