علاقات زائفة

البارت الرابع💓

وحق الي خلق سبعه ورضه
دوه للصحبه ادگ روحي ورضه
صحبتي نخل شامخ ورضه
حري ومايمر الملح بية💓

.........

حور ...

من بعد ما راحت بنان ، مشيت كدامه وهو يمشي ورايه لان سوك مزدحم خلاني كدامه ...

وصلنه للسيارات صعدنه كية .كعدنه بدون حجي اني اغلي وهو ضايج ....

وصلت الكية لمكان المفروض ننزل هاهيه وناخذ سيارة ثانية ، ولان احنه كاعدين بمنطقة متفوت بيها نفرات اخذنه تكسي لبيتنه ....

وصلنه نزلت قبله وهو حاسب التكسي واجه ورايه ...

فتت سلمت على ماما وصعدت فوك ...

اسمعه يكلها خاله صيحي حور اريد احجي وياها ...

صاحتني ماما من جوة ، نزلت ...

كتفت ايدي بملل...

حور : ها مؤيد كول ..

مؤيد : تعالي نكعد ونحجي ..

حور : تعبانة من الطريق، بس اريد افهم ليش عندت اله ارجع وياك واتبهذل بالنفرات مو عندي خط ...

مؤيد : تعيريني بفقري حور لان حالتي متسمح اخذلج تكسي تعيريني ...

حور : مكاعد اعيرك ، لتشوف حالتنه زينه عبالك اني متنعمه بخيرهم ، ترة حالي حالك ويمكن انت حالتك احسن مني بعد ...

مؤيد : تعالي احجي وياج ياعيني ...

حور : امشي نروح للاستقبال ...

رحنة كعدت وهو كعد بصفي بس بينه مسافه ..

حور : احجي اسمعك ...

مؤيد : ليش مطايقتني شنو البدر مني وضوجج..

حور : انجبرت عليك ، محد اخذ رأيي وكال ترديه لا ، كبل وافقو ، واني كتلك بوقتها مؤيد ترة اني مهاويتك ، ليش استمريت وغلست عن مشاعري ...

مؤيد : بس اني رايدج من احنه وصغار مو هسه ، واني احبج حوريه ...

حور : تحبني او لا متفرق عندي ..احساسي اتجاهك واحد...

مؤيد : يعني ميتغير ...

حور : للأسف لا..

مؤيد : خلي ابالج لعد انتي الي وما اعوفج..

حور : براحتك ضل متمسك بخيط امل ضعيف ونهايته اني اكطعه وكول كالت حور مو اني اللي انجبر اعيش حياة متشبهني...

مؤيد : يعني اعلنتي الحرب..

حور : شتسميها سميها ، اخذ راحتك رايحه انام ورايه دراسة .....

رحت نمت ، ومرت الايام......

...............

بنان

من بعد موقف الصار بيوم اللي لعبنه مر شهر كامل واني اشوفه صدفه ، يبتسملي لو يأشر براسه يسلم ..لو مرات يرفع ايده ،  واني اخجل لهذا اردله السلام ...

ومره جنت امشي اني ورونق بالسنتر ونسولف مندمجين ، اجه وكف كدامنه وصديقة ليغاد منه ، باوعلي صفن ، التفت لصديقة كله..

صميم : ول عمر انه السامعوا الحوريات بالجنة هاي شنزلها بالأرض...

ضحك عمر واخذه من ايده ، سحله سحل يلا قبل يروح ، والسنتر كله يمشي وركبته مكسورة علية..

ومرة جان عدنه امتحان ثالث محاضرة واني مقريت زين بسبب روند كابلتني وكعدت ، واستحي اكللها روحي اريد اقره لهذا مقريت غير ربع الماده المقررة للأمتحان ...فكلت لحور اني مراح احضر اول محاضرتين اريد اقره للأمتحان .فهي صعدت للقسم
واني رحت اكو حديقة كبال كليتنة ..

فرشت ملازمي وكعدت بالكاع اكو كارتونه خاليها الطلاب يكعدون عليها ، كعدت وبديت اقره ...

مشت ربع ساعه مندمجة واقرة وماشوف اله صينيه تتخله كدامي بيها ٢ جايات وفطائر ...

رفعت راسي صميم ابتسم وكعد ...

صميم : يابه الكوة ...

بنان : نعم ..

جاوبته بخزرة ...

صميم : صبحج الله بالخير ...

بنان : شتريد ..

صميم : ماريد دحجتج تقرين كلت بيني وبين نفسي اكيد ما ماكله جبتلج اكل وجيت...

بنان : بصفتك منو وتجيبلي اكل وتكعد يمي ..

صميم : زلمتج ...

بنان : شنو مفهمت شتحجي انت ؟

صميم : انه زلمتج وانتي حرمتي ...

بنان : والله هم مفهمت ...

صميم : انتي مريتي ، هاي هم مافاهمتها ول ياب فكي عكلج وياي ....

بنان : شنو مريتي انتي شكاعد تخربط اعرفك تعرفني..

صميم : جايز انتي ماتعرفيني لكن انه اعرفج ...

بنان : ومنين تعرفني ؟؟

صميم : تحريت وعرفتج ...

بنان : المطلوب مني شنو ..

صميم : فكي ريجج ..

بنان : شنوو ، يمعود احجي مثلنه مكاعد افهم عليك ...

ضحك ...
صميم : تريكي بويه ...

بنان : استغفر الله ربي ترة انت كلش قبيح ، اخذ اكلك وكوم لو اني الم ملازمي واكوم ...

صميم : يواشج بويه عليش معصبه وضايك خلكج ..
شربي جايج ، مبين طيب ريحتو فايحه ...

ويضحك ..

بنان : شربه انت بالعافيه عليك وهلمرة تجرأت وكعدت بدون متستأذن وسكتتلك ، مرة ثانيه لا تشوف شي مني ما اعتقد تحبه...

صميم : اكفي ( اوكفي)  شبلاج جاعد احاجيج ما جاي اكاونج ...

بنان : وداعت امي مفاهمه عليك شي ، اروح اني اخذ راحتك ...

كمت وعفته كاعد وصلت للكليه مالتي وانداريت شفت صديقه عمر كعد يمه وبدو ياكلون ، مدري شنو كله صميم وذاك ضحك ....

كلش ضجت يعني متفقين عليه لو شنو ....

رحت صعدت جانت الاستاذه بعدها ....

انتضرت برة حتى مقريت شي ، كله طار من راسي ...

طلعت الاستاذة وفتت ....

حور : ها قريتي ..

بنان : شويه وهسه كله طار ..

حور : ليش شنو صار ..

بنان : صميم ..

حور : شبيه هذا ...

بنان : اجه جايب ريوك وكابلني وكعد ، وتعاي اكلي وحجي ماصخ مثله حجاه وخلاني اكوم ...

حور : شنو كلج ...

بنان : نص الحجي مفهمته ، بس يكلي انتي حرمتي واني زلمتج ...

حور : صدك يحجي هذا ..

بنان : والله شبيج ...

حور : كله صوجج ...

بنان : اني ليش ؟؟

حور : كم مرة كتلج لترديله السلام، ومن يبتسم لبسي..

بنان : خجلت منه والله كلت عيب ما اسلم..

حور : بس هو اخذها بغير نضره ..

بنان : شلون يعني ..

حور : فكر انتي ناطيته مجال ومن ابتسمتيله هاي اشارة اله ، انتي ناطيته مجال...

بنان : حور شكاعد تحجين صدك عود هيج فسرتيها ...

حور : كاعد احجي واقع وحجيي جدآ منطقي ، بس تصرفاتج مو منطقية ..

بنان : شسويت اني لتخبليني ...

حور : من تسلمين على واحد لا بقسمج ولا تعرفيه ولا يعرفج ، شتتوقعين ، يبقى على كد سلام وبس لو يتجرأ اكثر ..؟؟؟

بنان : محسبتها هيج ابد ...

حور : حسبي منا وجاي ، لا كلشي تاخذيه بفطاريه كلب ، هنا يراد تفتحين عيونج وعقلج يلا تعيشين ...

بنان : شنو السالفه قابل غابة ..

حور : اتعس بعد ، بابه انتي حلوة وعليج العين ، مجرد ابتسمتي لطشولج . ۔۔

بنان : شطلعت هاي ، هسه ولد قسمنه مو اتشاقه وياهم عادي شو مسوو مثله..

حور : كلتيها ولد قسمج ، من الطبيعي يصير بينكم سلام وكلام وحتى شقة ، بحكم تربطكم علاقه زماله ودراسه ، بس صميم شنو غريب لا من قسمنه ولا من شعبتنه واصلا منعرف وين يداوم .ومبين مو راحه لا هو ولا صاحبه ...

بنان : خوفتيني ...

حور : حتى توبين مرة لخ تتصرفين بعواطفج ، تصرفي بعقل ..

بنان : يمه حوري انطيني ربع عقلج كلشي ماريد ...

حور : عوفيلي عقلي عيني عندي امتحان اريد اركز ..

بنان : كومي نكعد يم الحايط حتى اكعد وراج..

حور : ههههه امشي فد يوم نلكف من وراج ..

بنان : هاي شنو ترة اول مرة اغش منج بالكلية..

حور : وياربي مننكشف وتكون اخر مرة ..

بنان : اني هم قاريه بس السؤال اللي ما اعرفه اكلج عليه..

حور: اوك .

رحنه كعدنه يم الحايط ، واشوف الستول مليان غش ههههه مكتوب بالقلم الحبر على المكان اللي نخلي عليه الورقه ...

بنان : حور شوفي هههه

حور : شنو ،
اشرتلها باوعت على مكان الغش ..

حور : يا عزة بعينهم هذا يمكن احمد ..

بنان : شلون عرفتي ..

حور : ولج هذا مكانه كومي نغير الاماكن هسه يكوم يبجي ...

كاعد نحجي فات الاستاذ والطلاب يتراكضون وراه كلمن كعد بمكانه وصدك اجه الولد اللي اسمه احمد. و واحد ثاني راح على حور لان مكانه ...

احمد: هاي شنو بنان كاعده بمكاني ..

بنان : حباب مقاريه شي خليني ...

احمد : واني هم مقاري ولج وكتبت الملزمه كلها هنا ..

بنان : اكعد بالسرة البنص واغششك وعد ..

احمد : شلون ؟؟

بنان : معليك انت اكعد ويجيك الصافي ..

صاح الاستاذ : كلمن بمكانه ليش اكو حجي ، مو بده الامتحان ....

كعدنه  ، توزعت الاسئلة  شهكت يا يمه ملضومه لضم منين ابدي منين انتهي ...

اباوع على حور لزمت القلم وبدت تحل ، خرب بيومها سجاجة اصليه ...

قريت الاسئلة من كل سؤال اعرف لو فرع لو ما اعرف ، يعني ارسب لا محال ...

كلبت الورقه وطلعت الغش اللي كاتبه الولد ، وبديت انقل ، لهناك حور سوتلي حركه متفقين عليها يعني راح تفتح الورقه ...

فتحت الورقه على اول سؤال كحيت يعني ماريده ..
كلبته على ثاني ورقه هم كحيت ، الى ان وصلت سؤال الاخير سكتت وفتحت الورقه وبديت اكتب خلصت ...

خليت ورقتي على صفحه ، وطلعت ورقه جديدة ، واحمد يلوب ينتظر انطيه غش ...

لزمت الورقه وشكو شي بورقتي نقلته بالورقه الخ ...

اشرت لاحمد يكوم حتى يسلم ورقته ، كام وكف قريب مني نطيته الورقه وشمر ورقته الفارغه بسرعه عقجتها وشمرتها بجنطتي ...

كتبت اسمي ورحت سلمت ورقتي وطلعت ، لكيت احمد واكف منتضرني ... شافني وضحك ..

احمد: لو هيج الزميله لو متنراد بعد على طول كعدي بمكاني ههههه..

بنان : بالعافيه بس ترة اني لان كعدت بمكانك غششتك .ترة مرة ثانيه ماسويها..

احمد : يلا عمي خلف الله عليج خلي انجح بهذا اهم شي وادبر روحي بالباقي ...

طلعت حور واجتني ..

حور : ها شلونج جاوبتي ...

بنان : اي هههه عاشت ايدج ..

احمد : من رخصتكم رايح ..

ردينه ب الله وياك ....

نزلنه اني وحور وخابرنه على رونق فصلته يمكن بعدهة محاضرة دزينالها رساله انو احنه منتضريها بحديقه التربيه ....

رحنه علمود ناكل لبلبي يموت مالتهم ، همه الوحيدين بالمجمع اللي يسووون لبلبي ...

دخلنه للتربيه قريب من النادي اكو حديقه بيها كراسي وميوزه وبيهن قمريات فوك كل ميز قمريه كلش حلوة الكعده كعدنه ورة عشر دقايق  اتصلت رونق..

رونق : انتو وين ...

بنان : جايتج ...

رحتلها جانت توها فايته للتربيه ...

شافتني ابتسمت ...

رونق : شعدكم اليوم بالتربيه ..

بنان : شو عجبنه ناكل لبلبي ...

رونق : هاا شكو بيها ...

رحنه اني ورونق اشترينه لبلبي وجبنه لحوري ..

حور : وين صرتو ..

بنان : اشترينه واجينه خوما كل شويه كايمين ..

حور : عاشت ايدكم ...

بعدنه تونه نريد ناكل اجه علاوي المصور ..

_ ها حلوات هاي شلون كعده يرادلها صورة ..

بنان : اي عفيه صار كومه مماخذين صور ...

طكلنه صوره وكمنه اني وحور نشوفها حلوة لو يعيدها..

بنان : شو اني منخزرة نعيدها..

حور : لا حلوة طبيعيه ...

بنان : يلا هذا هو...

_ كم نسخه تردون ...

التفتت على رونق دايسه للبلبي ...

بنان : تردين صورة ...

رونق : طبعا ...

بنان :  اطبع ٣ ...

طلعت ٣ الاف ونطيته ...

اخذها وراح ...

كعدت وخلن الفين بحضني ...

بنان : شنو هاي مو عيب ..

حور : وشنو تصرفين علينه مو كافي جبتي لبلبي على حسابج ..

بنان : ديلا هسه قحط جايبه القوزي ...

رونق : هاهيه فلوس لو مو فلوس ، اكلكم شو هذا خال فلفل اسود اني مكتله خلي ...

بنان : وين خله ولج مو اني واكفه ..

حور : كمت اكلب باللبلبي وعطت، عيييع ...

باوعلي رونق وبنان وصاحن شكو..

حور : ولج هذا بيه سلابيح سود وانتي عبالج فلفل اسود ...

يابه اني تمددت من الضحك اريد اسكت ما اكدر بس خطيه رونق ركضت للحمامات تقيئت معدتها كلها ....
رحنه وياها غسلت وارتاحت ورجعنه لمكانه ، عفت حور يمها ورحت جبت مي وكلينس ...

بنان : هاج شربي ...

فتحت البطل وشربت وضلت ضايجه ولعبانه نفسها ، حرت شلون انسيها ....

بنان : سمعو اكو فد يوم واحد الله رزقه ب ٣ توم واحد اسمه مصطفى والثاني عبد الله والثالث احمد يكول مرات من اضوج اخبطهم واصيح زوجتي اكللها طلعيلي احمد .... احجي واني فاحطه ضحك وذني صافنات عليه ..

حور : اي وبعدين شصار..

بنان : ولج نكته هاي وخلصت ..

رونق : شكد تافها ..

بنان : لا سمعو هاي والله تضحك ..

حور : يلا نسمع شعدنه

بنان : وحده سألت زوجها كلتله حبيبي تشوفني بأحلامك ، كللها لا ، كلتله ليش ، كللها اقره معوذات قبل لا انام ...ههههههه

رونق : صدك تحجين نكاتج وغفت على معدتي ...

بنان : اصلا يضحكن بس انتي عقده ...

حور : سمعو اكو فد يوم عراقي سألوه تحب مرتبط  كللهم لا وهو متزوج وعنده دسته جهال طلعت مرته سامعته انقهرت منه و كلتله
اريدلي عراقي
يكول اسف مرتبط ما ينطقها حتى لو متزوج اربعه.

بعدني اريد اكمل جان نسمع صوت من ورانه واحد يحجي ...

__عمي اذا هنه حلوات شلون نكدر نكول لا ...

التفتنه ونشوف عمر وصميم كاعدين على الميز الورانه...

بنان : ذوله شجابهم ..

حور : لا وفوكاها كاعد يتسمعون لحجينه ...

بنان : فعلا ناس متستحي .

كومو بنات ....

اخذنه غراضنه ورحنه للقسم بس كلش ضجنه شجابهم شنو مراقبينه ، لزكه خوما لزكه...

رونق : منو ذوله ..

حور : نفسهم الي حجينالج عنهم ذاك اليوم ..

رونق : همه ذوله ..

بنان : اي همه ...

وصلنه للقسم جان بنيه تجي على حور ...

_ حور اجه واحد سأل عليج ، كلناله نزلت وكال راح ادور عليها ومن تجي كليلها مؤيد منتضرج جوة وليش متردين عليه من يخابر ...

حور : عاشت ايدج حبيبتي هسه اروح اشوفه ...

طلعت ويايه بنان ، بس شنو افور من الاعصاب وصلت بيه الجرأة يوصل لقسمي ويسأل عليه شنو من لزكه هذا ....

رحت ادور ولكيته كبال كليتنه كاعد على المصطبه جوة شجره ...

حور : شنو معنى جيتك هنا ، شتريد انت مني مكافي لاطشلي بالبيت هنا هم ما اخلص منك ...

مؤيد: وليش مترديني اجي عندج شي انتي وخايفه اشوفه ..

حور : لا ماعندي لتخاف بس ما احب جيتك هنا ...

مؤيد: تليفونج وين الي ساعه ادك ليش متردين ...

حور : خالته صامت لان جان عندي امتحان ونسيته شمدريني انت راح تجي وتتصل ...

مؤيد: وشبيج اعصاب وترجفين ...

حور : جيتك معاجبتني شيكولون الطلاب عليه وانت تدور بشعبتي ونازل جوة ، شنو ضايعه بكوم قش وجاي تدورني ...

مؤيد : لج انتي شنو من لسان دلاله خوما دلاله ...

حور : اي دلاله ومو خوش ادميه ، و وحده طايح حضها حل عني جلبت خوما جلبت ...

احجي وارجف جرتني بنان ...

بنان : حور ترة صوتج عالي والطلاب انتبهت عليج ...

حور : متشوفيه شيحجي ما اخلص اني والله ورطه ...

لهناك واجه عمر ،

حور : تفضلي كملت خاف هيه ناقصه ...

عمر : عليش تزمخ بالبت وشرايد منها ...

مؤيد: وانت منو حضرتك وتحاجيني ..

عمر : انه طالب هنا انت منو؟؟

مؤيد : ميخصك اني منو التهي بدروسك حباب ...

باوعت على عمر دار وجها لجماعته وابتسم ورجع باوع لمؤيد ...

عمر : انه عايل بيك حاجي جلمه زايده وياك ليش الاستهزاء بويه ...

مؤيد: ولي من وجهي لا ادفنك هنا ..

عمر : مزال غلطت وتجاوزت حدك انه اربيك ....

ولزمه دك بوكسات مؤيد بس مغطي وجها لا يضرب ولا يدافع عن نفسه ، بس هوبزة نافخ روحه على الفارغ ...

بنان : امشي شوفي الطلاب كلها التمت علينه ، انفضحنه ....

حور : وليش ننفضح شمسوين قابل ...

بنان : حور امشي الكل تباوع علينه متشوفين..

حور : هو احنه صوفتنه حمرة ...

بنان : لا والله كولي حياتج عبارة عن مغناطيس تجذب بس المشاكل ...

حور : اي والله صدك ، بس هذا عمر شبيه شكو يتدخل...

بنان : مشفتي روحج شلون تتعاركين وياه وترجفين شدعوه احجي بهدوء ويدير وجها ويروح ...

حور : منو يروح مؤيد هههه هذا اذا انطي وجه يلزك فد لزكه هو هيج ومخلصانه ..

بنان : امشي نروح للخط ...

حور : خابري رونق خلي تجي ..

بنان : اي ..

لزمت واتصلت على رونق ، كالت جايه ...

انتضرناها يم الباب الخارجي مال مجمع اجتي ..

رونق : هذا مؤيد شفته قميصه كله دم ، وهوسه شكو ..

حور : تعارك هو وعمر ..

رونق : وعمر شجابه ...

حور : اني ادري منين طلعلي هذا...

بنان : الله يستر شراح يسوي من يرجع وشتكولين الهم اذا سألوج ليش ضربه ..

حور : احجي الصدك ليش اخاف ، اني لا اعرف عمر ولا دازة عليه ، والمفروض مؤيد هو اللي يخاف لان معاقد عليه لا سيد ولا محكمه بس حجي شعنده جاييني وتعاي فرفري وياي...

بنان : هم صدك هسه ياكل الكتله ويبلعها ويسكت ..

رونق : هههههه والله عمر مسويه دوشك مال كتل ..

حور : بلكت يصيرله درس ويتوب يوصل لهنا ....

وصلنه للخط صعدنه ....

حسن : تأخرتو خوانم ..

رونق : اني صوجي محاضرتي تأخرت اعذرني ...

حسن : لا مصار شي بس عزمينه ...

رونق : شنو تريدون تدللو ..

حسن : اي شي اهم شي اخسرج ..

بنان : ليش مو انت التعزمنه ترة صار فتره ميبسها علينه ..

حسن : وليش اصرف عليكم خلفتكم ونسيت ...

بنان : اي خلفتنه يلا عيوني ودينه للفقمه ...

حسن : مخبله كل عقلج اخذج من باب المعظم للمنصور دتاكلين موطا ...

بنان : والله ازعل وتعرف زعلي ثكيل ..

حسن : يطبج طوب وزعلتهم ...

رونق : واذا اني ازعل هم يطبني طوب ..

حسن : اي انتي هم ..

حور : واذا كتلك اني ضايجه ومخنوكه واريد اغير جو هم متاخذنه ...

حسن : يمه من لساناتجن يمه ، امشن عمي اوديجن واخلص ..

اخذنه والطريق كله اغاني وضحك وشقه تونسنه كلش وصلنه يم الفقمه ، محل مرطبات بس كلش كبير اصلا هو مطعم مو محل ، طبك السياره بالكراج ونزلنه ...

كعدنه وكل وحده اختارت شي وراح حسن جابلنه واجه ..

بنان : ليش دفعت انت ..

حسن : اضرب الموطا بوجهج ، يايوم انتي دافعه حتى اخليج تدفعين هسه ...

حور : والله لو هيج ابن العم لو ميراد..

حسن : سمعتي صاحبتج شتكول ، بس انتي شايله الاحساس ..

رونق : هههه يعني مثل مؤيد ..

حسن : هم زر*** لتلعبين نفسنه ...

بنان : شبيك حتى انت كارهة..

حسن : ثكيل يوغف على المعده ...

حور : اويلي على معدتي خلصت شكو فوار بالصيدليه ومكاعد ينهضم ...

حسن : حقج شيهضمه هذا الدثو ..

رونق : تخيلو من بعد هذا الحجي كله وحور تتزوج مؤيد ..

حور : شلون تريد امددها هنا سدي حلكج ...

بنان : شو غيرو سيرة خلينه متونسين ..

ضلينه نسولف ونتشاقه الى ان رجعنه ونزلت اول وحده رونق .....

_______________

رونق ..

اجه الدور اعرفكم على نفسي

اسمي رونق مواليد ١٩٩١ ...

بيضه صاحبه ملامح ناعمه وهادئة بنفس الوقت ...

من اني وصغيرة هادئه يعني اللي يحجي ويايه اجاوبه ميحجي اضل ساكته عسما سنين ما احجي عندي عادي.

وهاي الصفة ورثتها من ماما حبيبتي ..

عندي خوات ٢ اصغر مني وحده رابع اعدادي والثانيه اول متوسط ...

وبابا جان موضف بالتجارة وطلع تقاعد وحاليآ يشتغل تكسي ...

بيتنه اجار وميكفي المصرف لهذا كعدت ويه بابا واتفقت اشتغل من بعد الدوام رفض وعاند بس اني اصريت على رأيي حتى اساعده لان تعب وحملنه ثكل ...

قبل يومين جنت اكلب بالفيس وشفت اعلان ممول مكتوب محتاجين عاملات بمول المنصور ، ولازم تملك شهاده اقل شي اعداديه ...

خليت الفكره ابالي وفاتحت البنات حور وبنان ، بالبدايه رفضو الفكره خوفآ عليه بس من شافو اصراري سكتو   ..

اتفقنه نروح يوم الجمعه ...وفعلا اجانه حسن واخذنه ...

وصلنه للمول وراح ...

حور : بعدج مصرة على رأييج ...

رونق : بعدني ..

بنان : ولج شلون تشتغلين هنا وشمدريج شنو من شكول تصادفج ...

رونق: شسوي لعد بابا تعب وماما مريضه وعلاجها غالي هم ضغط وهم سكر وبيتنه اجار خواتي كبرن اني مصرف يرادلي بابا منين يجيب ...

بنان : لو تقبلين اساعدج شكو بيها ..

رونق: بنان لتعيديها رجائا تعرفيني ما اقبل ليش تقهريني...

بنان : ولا تنقهرين سحبت كلامي واعتبريني محاجيه، كلشي ولا تضوجين ...

مشينه دخلنه للمول نسأل ، وين وشنو الشغل كالو توكف على العارضه مال مكياج ، ويابنيه التجي ، تشرحلها على الماركات وتنصحها وهاهيه ، يعني تساعدها بالاختيار ..

رونق : ماشي سهله ، بس الوقت شلون ..

_ تجين لو بالشفت الصباحي لو المسائي ..

رونق : الصباحي ما اكدر عندي دوام  ، المسائي من اي ساعه يبدي ...

_ يبدي من ٣ للتسعه ...

رونق : ميصير بالاربعه لان دوام عندي وبعيد...

_ انتضري احجي ويه الولد واجيج ،
راح ورجع كال عادي بس متتأخرين دقيقه ورة ساعه اربعه .ودوامج ينتهي ساعه عشرة

رونق : شوكت ابلش ..

_ من باجر اذا تحبين ...

رونق: هذا هو باجر باجر ...

بنان : مو قليل ٢٥٠ على هالتعب اللي تتعبيه والوقت هواي ....

رونق: لا مو قليل هاي ال ٢٥٠ تفرينه فري اني وخواتي ...

حور : خليها تتعب ولا تمد ايدها لاحد بس كون تصيرين سباعيه...

رونق : ان شاء الله ...

وصلنه للدرج  نزلت قبل حور وبنان ،هنه ورايه كلش اخاف من الدرج الكهربائي ودائما اتخيل اوكع منه وفعلا صدق التخيل وجان اوكع من نص الدرج للكاع ...

وجهي صار يم حذاء رجالي رفعت راسي ولد مدنك ويصيح الله الله ...

اجني حور وبنان يركضن عليه كومني ، بس المشكله تنورتي انرعطت ،

رونق : خرب هاي شلون راح امشي بيها ..

حجه الولد ...

_ خيتي اوكفي هنا وانتو غطوها ، هسه اجيبلها تنورة واجي ...

وصدك راح ورة شويه اجه جايب تنورة اخذتها منه نفس قياسي هذا شلون عرف ...

جان اكو محل كبال الدرج يبيع فساتين سهره اخذوني البنات ودخلنه استأذنه من ابو المحل حتى ابدل بالمنزع مالته ، خطيه مكال شي عافنه وطلع برة ...

بدلت واخذت تنورتي اللي انشكت وطلعت للبنات ...

رونق: الولد وينه خلي انطيه الفلوس مال تنورة.

حور: كتله هسه مقبل ياخذ ..

رونق : شنو بكيفه مياخذ ارجعها عليه هسه ...

بنان : وشتلبسين ...

رونق: اشتري من اي محل وارجعها اله ...

طلعنه شفناه واكف واجه علينه مبتسم ...

_ حمد لله على سلامتج يمعوده بالهدوم ولا بيج ..

رونق : الله يسلمك ، وشكرا تعبتك ، بس كمل جميلك وكلي شكد سعرها..

_ ترة عيب والله قحط ..

رونق: ما اتحرك منا اذا متاخذ ..

_ تمام انتضري بس اسأل واجي ...

راح والروحه روحه اختفى لا ساعه ولا ساعتين ..

تالي اتصل حسن على بنان وطلعنه ...

رونق : شفتوه شلون انهزم ...

حور: عرفت اني بس مع ذلك كلت ننتظره ...

بنان : بس شلون ولد درة مال الله...

رونق : الله يحفظه لشبابه ..

حور : امين ...

طلعنه لحسن صعدنه ورجعنه للبيت ...

يتبع ......

متابعة ممتعة

لتنسون التصويت احبكم كومااات 💓