علاقات زائفة

البارت الثالث

مشهد مستقبلي 💫

_ اكلج اتصلتي عليها...

_ اتصلت كله مغلق ...

_ شو هاي بس تزوجت غلقته ليش عود..

_ احتمال عيالها او زوجها يمها وتخجل منهم....

_ قابل اربعة وعشرين ساعة يمها وتخجل منهم هيه خمس دقايق تدز رساله تطمنه وتروح .هاي صارلها شهر لا خابرت ولا دزت ...

_ اكلج هيه حاضرتنه بالفيس بس الخط مغلق..

_ خاف الخط هم حاضرتنه منه ..

_ لا لو حاضرتنه يطلع مشغول ، بس هيه غالقتة ...

_ الغايب عذرة وياه ننتظر منها تفسير على غيابها ونحكم ...

_ واذا تفسيرها مو منطقي ما ارجع وياها خاف انتي كلبج يرف اني ابد ...

_ هسه خلي تبين عود بعدين احجي هذا حجيج...
.
.
.
..............

حور

نزلت من الخط عيوني وارمه من البجي كلبي احسه صاير الف قطعة ، ابويه دمرنه ، اني اللي اعرفه الاب خيمه وسند لبنته ، عكاز الها ، احنه لا ابونه ، خلانه نسند نفسنه بنفسنه ، لو نسند نفسنه بالغريب ...

الاب خيمه وهو عامودها ، بس اذا جان هذا العامود اعوج ، شلون الخيمة تكعد عدل . ....

فتت للبيت ماما بالمطبخ تسوي كبه ... سلمت وفتت حتى منتضرت ترد السلام .

رحت لغرفتي ، شمرت نفسي على السرير ونمت بهدومي كعدت على صوت الموبايل ، مسجات تركع وحده ورة الخ ، فتحته مؤيد ..

💬
هلو حياتي باجر اجيج للكلية عندي حجي وياج هواي وابيتكم ماجاي اخذ راحتي ...

مسحت الرساله وفتت على الفايبر رونق كومه داكه عليه ودازه مسجات تريد تعرف شبيه ، كعدنه نكتب وحجيتلها على بابا شسوه بيه اليوم لهناك واجتي بنان دزت صوتيه عاد تخابرنه مكالمه جماعيه ..

حور : هذا الطرن يريد يجيني للدوام ، حتى يخزيني ..

بنان : وشكتيله انتي ؟؟

حور : مجاوبته ؟؟

رونق : شنو رأيج نغيب وهو يروح وضربيه بوري معدل ..

حور : والله بيج بله اول مرة تفكرين صح ..

رونق : يا عوبه مو صوجج ...

بنان : اي صدك خلي يفتر ويرجع وحده لتكليله ماداوم ..

حور : يعني هيج انسان لزكة بحياتي مشايفه ، لج ارزل بيه ويضحك ، عبالك حاجيه نكته ، تخيلو ذاك الاسبوع جابلي ملابس وكدامه ذبيتهن بالحاويه ، ضحك وفات. اني كلت راح يقاطعني يزعل شو هذا اختفى يوم واحد ، ورجع ...

رونق : صدكيني هذا مسويله عمليه شايلين منه الاحساس...

بنان : ههههههه لا شايلين دماغه وخالين بداله قندرة ..

حور : ههههه والله لو ما انتن اني ضايعه ...

رونق : حبيبتي شعدنه غيرج احنه ...

حور : الله ليحرمني منكم ان شاءالله ...

بنان : يعني انام ما اقره شي وباجر ماكو دوام يسسس
يحيا العدل ...

حور : اذني طرشتيها يمعوده ....

رونق : يلا اني اروح الحمد لله تطمنت عليج حوري ...

حور : فدوة لكلبج حياتي انتي....

وهيج نهينه المكالمه ...

كمت نضفت غرفتي ونزلت جوة غرفه الولد كل ثنين بغرفه اربعه ممتزوجين وثنين متزوجين بس طالعين بيوت وحد ، ومناطق توب بعد ارقى من منطقتنة ...

بلشت اعزل بزعابيلهم الهدوم مشمرة نفاضات الجكاير

الكتب منا ومنا متطشرات ملازم ،

عندي ثنين بعدهم يدرسون جامعات وثنين متخرجين ...

احنه كلنه اعمارنه متقاربه بيناتنه سنه بالزايد سنتين ...

امي من النوع تحب تبزر على الاربعين وحبلت عبالها بهاي الطريقه راح تثبت الرجال وتكسر ضهره متدري هيه كسرت ضهرها وضيعت شبابها وذاك بابا من مرة لمرة ولا هامه ، هيه تداري وتكبر وتوصل ، وخطط وجها بتجاعيد الزمن ، وابويه كل مجاله يحلو ويصغر ...

سفر ونسوان وفلوس وراحه يجي للبيت يأمر وينهي ويلف راسه وينام ويطلع يسهر ، كل يوم عنده خميس ...

كملت تنظيف صارت ساعه عشره ونص ، بدو يجون الولد ...

عصام : شمسوين عشا جوعان ...

حور : شفت ماما لفت كبه ، اكليلك ...

عصام : كلي بسرعه وحسبي حساب جماعتي وياي ثنين ..

حور : تدلل ...

طبعا يحجي معلك ، ويايه ، والله اتمنى يحجون ويايه بطيب شكد اخدمهم واركض كبلهم على الشغله ، واغسل ملابسهم واكوي واحير شسوي والكلمه الطيبه ممحصلتها ...مرة سمعت امي تعاتبهم ..

الام : يمه هاي اختكم ليش تجافوها ، بس هيه ضلت الكم ، دللوها ، لا مثل خواتها نضلمن ضليمه ، شيصير لو كل واحد يشيللها خمسه من مصروفه وينطيها وانتو الله مفضل عليكم ، هاي منو الها ....

ضافر : اي عيني تريدين تطلع عينها ، خليها هيج تخاف منه وتحسب حساب ، بس ننطيها عين ، تفلت وتسود وجهنا ...

الام : لك يمه اني مربيه خواتك ، سنين صار النه كاعدين بالمنطقة محد جاب سيرتهن الكل تتمنى تناسبنه ادب واخلاق وشريفات وحلوات ، بس يخافون يتقربون من ورة ابوك ذايع صيتكم بالمنطقة ما تنطون اله لسيد ...

عصام : يمه حجي ضافر صحيح من ننطيها عين تفلت شلون ما اختها فلتت ولو ما الله ستر جان جابت النه العار ...

الام : ياعار هو ولد شاف اخلاقها زينه واجه على سمعتها خطبها ابتله خوما ابتله ، لزموه اخوتك و ولد عمامك كسروه تعال اعترف شعندك ويه اختنه ...

ضافر : لو ما هيه ناطيته عين ما يتجرأ يجي يخطب وبعدين شلون اندل البيت لو ما هيه جايه وياه ، كل ما اتذكر نار بصدري تشب عليهة سكتي يمه لخاطر نبيج ...

الام: بريء منكم النبي وتذكروه على لسانكم منين تعرفونه ..
ضلمتوهن ضليمه ، لاحضرتولهن بكعده لا وكفتولهن بزفه وسلمتوهن لازواجهن ، خليتو عيونهن بالكاع فشله من عيالهن وازواجهن ، ولليوم يتعيرن اخوتجن ليش ما وكفولجن ، ومكفخه صارن للعيال. وعيالتهم كرابتنه مو غرب ....

عصام : بناتج صلفات لو زينات ليش ينهانن ويصيرن مكفخه ...

الام : اذا انت اخوهن وهيج تحجي ليش اعتب على الغريب وشي الثاني لو يعرفون بيكم على كلوبهن ما جان داسولهن على طرف ، بس يعرفوكم شايلين ايدكم منهن ... الهن الله الهن الله ....

ضافر : اذا الهن الله ليش الج ساعه تبجين بحالهن ..

عصام : ههههه والله زايدات جني للدنيا ،حتى ابويه مطايقهن ....

ضلو يحجون هيج واني كلبي ورم من القهر والبجي كل ما اتذكر سوالفهم اشوط ....
حتى من جمعه خواتي محرومه ابويه شارط عليهن يجن وحده وحده ممنوع يلتمن سوه يضوج من الهوسه ...

اتذكر بالحجي وانقهر الى ان خلصت العشا ورحت صحته ...

حور : عصام خلص العشا ..

عصام : صوتج ماسمعه ولي لغرفتج ولتنزلين ...

باوعتله بآسى وفتت صعدت لغرفتي حتى متعشيت ونمت نومه للصبح ....كعدت مداومت ومر اليوم بين الشغل وبين الدراسه ...

.....
......
.....

بنان اليوم كلش تونست غيرت جو ، هواي ضحكنه ...

نمت براحه ، ماعندي هم بالدنيا غير شنو البس باجر هذا اكبر همي ....

كعدت على صوت المنبه ، غسلت وبدلت عجبني اخلي حمرة اليوم ، كل مرة اخلي فاتح بناتي ، اليوم عجبني اطوخ ، ادري راح اترزل بس اجازف .

لزمت وخليت لون ماروني ، طفره من الوردي الفاتح للماروني ،

لبست قميص مربعات ابيض وبيجي دخلته بالبنطرون لونه اسود ولبست لفاف ،وقمصله وسط لا طويله ولا قصيره ، علكت الشسوار مشيته على شعري بس هوى بدون فرجة لان كصته حلوه متعب ....

نزلت وطلعت اركض شلون البايك بوكه ، يعني اعرف هالشي غلط بس سويته ... واخاف من ماما ، بس المفروض اخاف من ربي ، اول ، بس هذا عقلي هيج جنت ... اخاف من ماما اكثر ....

صعدت للخط حسن فتح حلكه ...

بنان : سده يمعود وكع يبووو ...

حسن : شنو هذا حلكج ...

بنان : شبيه..

حسن : جنج مطي ماكل رمان...

بنان : لا ياحقير ، ضربته بالملزمه على راسه ...

حسن: شنو حقير ، دشوفي حلكج شكبره بابه محلو ملايكلج ...

بنان : منو ماخذ رأييك ، انت معاجبك اني عاجبني ..

جر كلينس خلاه بيدي ..

بنان : شنو هذا

حسن: ماحرك اذا ممسحتيه ..

بنان : هاي ثابته متروح اله مزيل مكياج ..

حسن : مالي شغل نزلي غسلي مي وصابون يلا لتباوعين....

بنان : حسن اذا نزلت ما اداوم ...

حسن : لتداومين بعد احسن ...

نزلت وفتت للبيت ، هو راح ، طلعت لا ياالله هذا صدك يحجي عبالي راح ينقهر عليه ..جريت الموبايل واتصلت على حور ...

بنان : صباح الخير حوري اليوم ماداوم ..

حور : ليش ولج مو البارحه غايبين ...

بنان : تعاركت ويه حسن وعافني ..

حور : ليش على شنو من الصبح تعاركتو..

بنان : تعاندنه على الحمره هو يريد امسحهة واني مقبلت نزلني من الخط ...

حور : معليج انتضري جاييج هسه بكيفه هوو...

بنان: فديتج بس انتي تكدريله ...

حور : يلا باي اجه كاعد يتصل ...

سديته وعيني على باب المطبخ لا تطلع ماما ترزلني ...

ورة شويه دكت حور طلعت فتحت الباب الورة وصعدت ...خزرني بالمرايا ومشينه وصلنه لرونق اخذناها وانطلقنه ، الطريق كله نسولف اني والبنات وحسن بس ينافخ ضاج طكت روحه ....

وصلنه نزلنه وتمشينه للمجمع ...

وصلنه للتفتيش ، فتحت الجنطة كلبتها كلاب هويتي ماكو تخبلت ..وين راحت ...

لزمت الموبايل دكيت على حسن حتى يشوفها خاف واكعه يمه اتصل وميرد عرفته زعلان ..

بنان : حوري خابري حسن ..

حور : ليش .

بنان : هويتي ماكو وكاعد اتصل ميرد زعل ...

حور : لحضه ...

طلعت موبايلها اتصلت حجت وياه وسدته ...

حور : يكول صرت بعيد خلي تدبر نفسها حتى لو موجوده ما ارجعلها ...

بنان : هاي قفل عليه بعد...

رحت يم المفتشه ...

_ هويتج ..

بنان: ناسيتها ..

_ وين تداومين وياقسم ...

بنان: كليه اللغات قسم انكليزي..

_ روحي جيبي ورقه من قسمج يلا تفوتين.

بنان: يمعودة ورقتيش اني طالبه هنا صدك كذب ..

_ تعليمات حبيبتي شنو يثبتلي انتي مو ضيفه جايتنه من غير كليه حتى تتونسين ...

حور : امشي جيبي وتعالي بسرعه منتضرتج هنا ...

بنان : استغفر الله ،

مشيت واحجي على حسن ، كله من وراه
هاي العرضه مالته من الصبح . اتخبل واحد يعرضلي يومي كله يزفت ....

وصلت للقسم مالتي وصعدت لغرفه المقرر مال القسم ..
مقرر القسم نفسه استاذ نبيل ....

دكيت الباب اجاني صوته ، تفضل .. فتت

بنان: صباح الخير استاذ ..

رفع عينه باوعلي وابتسم ...

نبيل : اهلا بنان ، كولي ..

بنان: استاذ ناسيه هويتي ومقبلو ادخل اله ورقه مختومه من حضرتك تأيد اني طالبه يمكم ....

نبيل : سهله. وهاي ورقه وختمتها تدللي ...

بنان : تسلم شكرا جزيلا ..

نبيل : اهلا وسهلا ...

اخذتها ونزلت ضليت امشي انكطع كلبي يلا وصلت للباب مسافه بعيده ، رحت للمفتشه ..

بنان : تفضلي ...

شافتها وكالت فوتي ، اخذت كتبي لان خلتهن يمها ، حتى تضمن ارجعلها ...

مشيت لكيت البنات كاعدات على مصطبه بحديقه التربيه كبال التفتيش ...

شافوني اجوي ...

رونق : ها واخيرا .

بنان : سكتي نفسي انكطع ...

حور : يلا امشو بعد خمس دقايق ومحاضره تبدي ...

ميشنه والجو اليجنن ، حلو الشته ، خصوصا بالدوام ، لا حارة ولا تراب ..عدا الشمس تسوينه على زراك خاف احنه بيض هههه.

وصلنه للقسم واخذنه محاضرات وحده ورة الثانيه اليوم حالفين علينه ولا ريست نطونه ، كله اخذوه ...

بنان : حور هلكت ، ولج ساعه عشره ونص وكلشي مماكله ..
حور: تخلص هاي المحاضره ونطلع..

بنان : نضرب الخ ..

حور : اي اني هم تعبت ...

سمعنه الاستاذه رادت بحث من كل طالب ...

بنان : وهاي منين نجيب مصادر ..

حور : اكيد اكو بالمكتبه مال كليتنه ...

خلصت المحاضره والطلاب كلها توجهت للمكتبه ..

دورنه كتب لكينه مصدرين والثالث ماكو .

ولد ويانه سمعناه يحجي ويه صديقه يكله اذا متلكى مصدر نروح لشارع المكتبات اكو هناك هواي كتب نجيب ونجي ...

بنان : حوري نروح شتكولين ...

حور : يلا نروح بس ناكل شي دخت نايمه بدون عشا ..

بنان : اني هم جوعانه ..

نزلنه وبيدنه المصادر ، اول شي حجزنه ميز وخلينه كتبنه عليه، اشارة للي يجي انو هذا محجوز ...

توجهنا لمطعم النادي ، اكو بدايته واحد يسوي لحم بعجين اويلي الريحه تصيحنه من بعيد وتهلي بينه...

واني وحور نمشي مغمضين هههه وبطنه توصوص ...

وصينه كل وحده قطعتين ، لان صغار حجمهن ...

اخذنه الطلب ، ورحنه اشترينه عصاير وكعدنه ناكل ...

حور : هم راح ارجع للبيت ونفس الروتين ، والله لو يصير ابات هنا...

بنان : انتي تخلصين بحاله وحده ، اله اذا تزوجتي..

حور: عيع نار هلي ولا جنة مؤيد . بس جبتي سيرته نسدت نفسي عن الاكل ..

بنان : حور انتي لحد الان ممستوعبه الوضع اللي انتي بيه ، انتي عندج ست اخوان وابوج سابعهم ، وخطيبج الثامن ، يعني هاي الزواجه براسج براسج ، كل عقلج تفلتين منها ....

حور : جريت حسرة ، هذا الكاتلني شر لابد منه واني ومؤيد منتراهم ابد ..

بنان : هو اسمه ثكيل ، ويع شلون اهله حامليه ما ادري..

حور : والله حجيتي الصدك ، كملتي حتى نلحك نروح..

بنان : يلا كملت امشي ...

طلعنه من النادي ونتمشى بالسنتر ، عباره عن طلاب مجموعات مجموعات..

ضحكاتهم ترن بأذني ، وسوالفهم ، واكو كبلات ، كاعدين ، شكد حلوين فدوه ..

واكو مجموعه واكفين سرة على المصور ..

هذا المصور ابد منلحك ناخذ يمه صور هلكد ما مزدحم ..

طلاب سرة يوكفون ينتضرون ...

صورة حلوة اسمه احمد ، مصور الخاص بكليه الاداب والسنتر ...

بنان : يراد فد يوم ناخذ صور يم احمد ..

حور : اي والله صورة تخبل ، ذاك اليوم رونق شوفتني صور ماخذتهن يمه كلش حلوات ...

بنان : نجي من وقت بلكت نلكاه متفرغ ...

حور : اي اله الصبح كلش يلا نكدر ...

طلعنه المجمع ونمشي طريق كله محلات ومطاعم على مد البصر ، وصلنه لكليه الهندسه عبرناها ، يجي وراها شارع المكتبات ، هذا الشارع من بعد هاي الجيه صار مزار لازم نجي بالاسبوع مرة ، يخبل ، كلشي بيه

قرطاسيه دفاتر ، كتب ، مجلات ، ملابس ، محلات بيها تجهيزات مال حفلات تخرج صف رابع . واكو محلات يبيعون ملابس باله ، اني عشقي الباله ، خصوصا الباله الكبيرة بالكاظميه ...

احنه صح متمكنين بس احب البس منهن ، لبس راقي واكو جديد ، وفصالات غريبه ...

بنان : حور حور شوفي ...

اندارت عليه ،

حور : شنو؟؟

بنان : هاي باله

حور : اوي بنان ، كل عقلج بعدج تلبسين منهن..

بنان : وشبيهن يخبلن امشي الله عليج ...

جريتها مشت ويايه بس بملل ...

حور : هذا وكتج احنه جايين على شي واخذتينه على شي ثاني ..

بنان : امشي شكد نحسه..

فتنه للمحل وبده الولد يطلع بالكوتات والقماصل والله يخبلن نضيفات وجدد ، وحتى العلامه بيهن ، حور من شافتهن هيج هيه هم بدت تكلب ، ومن نسأل على السعر ننصدم القطعه بخمسة ...

حور : والله بلاش ..

بنان : شبيج راقيات اخذيلج قطعتين ، نكعيهن يوم كامل ملح وخل وغسليهن وشريهن بالشمس ماعليهن شي بس تسمين يصيرن طاهرات ..

حور: اني مال محتاجه ملابس محتاجه ، شسوي راح اخذ ..

بنان : شكد توسلت بيج اشتريلج ليش مرضيتي ..

حور : كافي بنان ، ٣ سنوات الاعداديه تصرفين عليه بحجه اقريج ، هسه شنو حجتج ..

بنان : اغش منج هههه

حور : هههه ثول ..

بنان : ضحكي فدوة رحت لهلسنون ...

هاي نكلب بالملابس ونحجي ...

اخذنه كل وحده قطعتين وطلعنه ، ويه طلعتنه نسمع واحد يصيح حور حور ..

بنان : هذا مو اسمج ، كاعد اسمع واحد يصيح ..

حور : لا لج ، هذوله اهل المخضر كاعد يصيحون ..

بنان : جوز بس اني سمعت واحد يصيح حور ...

محل البالات صاير بنهايه شارع المكتبات ، ويمه اكو محلات مال مخضر وقريب على الشارع العام ، والكراج الخاص بالعبريه ، يعني اللي ماعنده خط لو ميريد ياخذ تكسي يجي لهنا يصعد اكو نفرات...

تونه مشينه حتى نرجع للجامعه ، منحس اله واحد وكف كدامنه ..

حور : شجابك ...

مؤيد : وشطلعج ابوج مو مانعج تطلعين بره كليتج ، وين جايه تفرفين بنص السواكه ...

التفتت عليه حور وكالت ...

حور : هاي طلعتي صدك سامعه واحد يصيح باسمي طلع مؤيد ، تحجي وتعوج بحلكها...

مؤيد : لازم غثتج جيتي ست ...

حور : كلشش

مؤيد: ليش البارحه مداومتي مو اتفقت اجيج..

حور : لا حول ولا قوة الا بالله العلي العظيم ...
ادري شعندك جايني، مكان دوامي هذا ..

مؤيد: لعد ليش طالعه تفرفرين اذا جايه دراسه وبس ..

حور : مضطرة اجي عندي بحث واجيت اخذ مصادر..

كام يباوع على العلاليك ويهز بيده ..

مؤيد : لا خوش مصادر جايبه ومنين من سوك المخضر امشي كدامي للبيت واريد اشوف ابوج يرضى بسوالفج هاي ...

حور : بنونه روحي رجعي واني رايحه للبيت ..

بنان : شلون اعوفج وحدج ...

مؤيد : راح اكلها قابل روحي توكلي ...

ردت اجاوبه حور اشرتلي يعني سكتي ..

ضجت كلش ورجعت على حضنه يمكن جاي نفرات وصدفت نزلته ويه طلعتنه من محل الباله ...

رجعت امشي وحدي وصلت للتفتيش .جريت نفس بنفاذ صبر هم راح تسألني على الهويه ، بس بلكت تتذكرني..

بنان : اني الصبح جبتلج ورقه من القسم لان ناسيه هويتي..

_ اي تذكرتج ..

بنان : عادي اخلي يمج هاي العلاكه ومن اطلع اخذها ..

_ شنو بيها ...

بنان : ملابس ..

_ شو شوفيني ، فتحت الها العلاكه شافتها وخلتها ورة الميز ...

بنان : شكرا ..

_ عفوا ..

رحت وصلت للكليه مالتنه شفت الطلاب متجمعين بالحديقة ، اسمها حديقة التوفل ، كاعدين بالكاع على الثيل بشكل دائري ، رحت يمهم عجبني اكعد وياهم ، مادام حور ماكو استغل الفرصه واتعرف عليهم ...

بنان : هلووو ..

ردو بصوت واحد وضحكه مرسومه على وجوهم ..

هلو بنان تعاي على اولها ...

بنان : شدتسوون ...

رنا : كاعد نلعب لعبه الصراحه ..

بنان : رديت بتعجب ! وشنو هاي من لعبه ...

رنا : باعي ، هذا بطل مال مي نخلي بالوسط ونفره حلك البطل وين يصير على يا طالب ، هو اللي ينسأل واللي يسأله ، اللي متوجهة عليه نهايه البطل ...

بنان : فهمت ههههه حلوة خوش لعبه ...

بدينه نفر البطل وكل شويه ولد يسأل بنيه لو بنيه تسأل ولد ..

أسألتهم ..

حبيت بحياتك ؟؟

حبيتي بحياتج؟؟

كم اخ ، كم اخت ، ليش اختاريتو هذا القسم ...

ومن هاالاسئلة ....

الى ان اجة واحد وكف ، والولد نخبصت بيه هلا ما هلا من ارفع راسي هذا صميم ..

مبين يعرفوه لان سلام حار ، سوولة مكان وكعد ..

شافني ابتسم ودار وجها ..

اني ضجت كلش كلت بس لا يفشلني كدامهم..

رجعنه نلعب وصل اله السرة لزم البطل فره وصار اتجاه البطل عليه ، يعني هو يسأل واني اجاوب ...

صميم : عندج حبيب ؟؟؟

صفنت بوجها وارتبكت ، مع العلم نسألت هذا السؤال قبل لا ييجي بس ما اعرف ليش استغربته منه...

بنان : لا ماعندي ....

هسه دوري اللي يجاوب هو يسأل ، فريته صار عليه ، شنو من صدفه هاي هههه..

اباوع عليه مبتسم ومنتضر سؤالي ...

بنان : ضليت اتحمحم شسأله هسه ، اخر شي كتله
شنو اكثر شي تحبه بحياتك؟؟

باوعلي وضحك

صميم : الدليمية والنسوووان ....

وصارت ضجه والضحك بفلس الطلاب والطالبات بس اني كلش ضجت ، استأذنتهم وكمت صعدت للقسم لميت غراضي ونزلت ...رحت للخط .....

يتبع .....