علاقات زائفة

البارت الثاني💖

مشهد مستقبلي🤷‍♀️

_ياااااا ولج عززة بعيني ،،،،

_شكو  خرعتيني يمعودة متجوزين ، تفززيني دائما....

_ ولج زوجج جاب مشاية

_هذا الطبيعي يعني غير راح اعقد اليوم وراح يصير زوجي وين الاشكال.؟

_ ولج لا مو خطيبج زوجج جاب مشاية واجة ،يريد يرجعج ،وعلكت بينهم.......
_________________

الصداقة الحقيقة ك صحة الأنسان

لا يشعر بقيمتها الأ من فقدها ❣
❣❣

صعدو واني رحت اشتريت كابتشينو وطلعت دك

موبايلي طلعته مدنكة راسي واريد ارد وانصدم

بواحد ، واندار الكابتشينو على قميصه ....

رفعت ايدي وشهكت..

بنان: اسفه اسفه مو قصدي ...

_ ول يابه ثوله ما تشوفين ، دمرتي ملابسي ...

بنان: مو بالقصد عفوا ،

فتحت جنطتي وطلعت كلينس مرطب ..

بنان: هاك امسحه هسه يروح ..

_ ماريد ...

هو عنده كلينس وبده يمسح بالقميص وضايج طاكه روحه ...

اجه صديقه صاح عليه ..

_ ها صميم تأخرت ...

صميم: هاي الثوله ،شوف شسوت ...

بنان: ليش تتجاوز قابل متقصده وبعدين اني اعتذرت منك ...

صميم : زيحي ( وخري) من وجهي ...

وعافني وفات ، ضليت باهته شبيه هذا شكد ماعنده ذوق .....
حجيتها بصوت واضح وردت اطلع من النادي جان انجر من عكسي ....التفتت واشوفه نفسه الولد مخنزر وصاير اعصاب ...

باوعتله ورجعت باوعت لايدي ..رفعت راسي وخزرته ...

بنان: ايدي انت شلون تسمح لنفسك تلزمني ...

صميم: عيدي شحجيتي من ساعه ...

بنان: محجيت شي كتلك هد ايدي منا الطلاب راح ينتبهون وتجيبلي حجايه..

صميم: من هذا الماعنده ذوق ...

بنان: اني ماعندي ذوق واسفه مرة عاشرة بس هد ايدي مو فضحتني والطلاب عينهم علينه..

هد ايدي حيل ، جره صديقه وراح ، والطلاب كلها صافنه ، لان هوسه النادي واقل حركه ينتبهون، خصوصا الولد ، هاي اذا مصورونه وارجع الكه روحي بالفيس مشهورة...

وكاتبين عنوان كبير يتصدر الصفحه مال فد بيج تاف مثل صاحبه ... و من الحب ما قتل ...

وينزلون استفسار وتصويت شتكولون سبب المشكله خانها ولكفته ، لو هيه خانته ، لو وعدها بخطوبه وخلف الوعد ....

هاي امشي واحجي ويه نفسي الى ان وصلت للقاعه مسدود الباب و هدووء.. يبووو يا بنان فايته الاستاذه ...وبادي الامتحان ...

وكفت وجريت نفس ومديت ايدي حتى ادك الباب ...

دكيتها وفتحت الباب ، الطلاب كلها رفعت راسها ، هاي بينه طبيعه او عاده ، اي واحد يفتح الباب كلنا عينه عليه تصير ...

بنان: احم ، صباح الخير، ست تسمحيلي ادخل ...

جان صوتي ناصي كوة حجيت.. وهيه مدنكه جانت على سجل الحضور ولابسه النظارة ، يبووو ...

فتت وصلت لنص القاعه جان ييجيني صوتها وكفت بمكاني والتافيت عليها ...

_ منو سمحلج تدخلين ...

بنان : منو اني ..حجيت وأأشر على نفسي .

_ اي منو غيرج ...

بنان: بس استأذنت من حضرتج وفتت..

_ واني مكتلج فوتي، تفضلي طلعي برة ...

بنان: بس ست ...

قاطعتني ، بحركه بيدها يعني طلعي بدون نقاش ..

طلعت والحرارة صعدت لراسي كمت افور....

سديت الباب ورايه وكمت ابجي تفشلت لو ادري مفايته ...

طلعت وكمت اروح وارجع بالممر الفوك ...الى ان خلصت المحاضره وطلعت الاستاذه وبيدها الاوراق مال طلاب ...

كلش انهضمت صح هو امتحان يومي بس ينحسب ...

رحت فتت للقاعه ، شافتني حور وضحكت ...

بنان: شفتي شلون تفشلت ...

حور: كله علمود بطنج ، كتلج نصعد وبعدين ، ركضتي للنادي...

بنان: لو مرايحه ابرك ، لو تدرين شصار بيه من موقف ..

حور: شصار؟؟؟

عقجت وجها حور كلش جديه صح تضحك، بس كلشي واله حد ...

بعدني احجي فاتت رونق ...

رونق: هلو شلونكم، قبل متجاوبوني ، مبين موزينين شصاير وجوهكم متبشر بخير...

حور: سكتي هسه ، خلي نشوف بنان شمصخمه ..

التفتن عليه وكابلني ...

بنان: شوووفو ..................حجيلتهم...
وهذا كل الصار ...

حور: تعرفين شكله ؟؟

بنان: اي اعرفه ليش؟؟؟

حور: كومي وياي ...

بنان: وين يمعوده ...

حور: امشي كتلج ..

بنان: لتخليني اتوب ما احجيلج ..

حور: اذا ما اجيتي ويايه والله ما احجي وياج بعد

رونق: حور ترة احنه بجامعه مو بشارع وتتعاركين كل عقلج..

حور: لعد هو محسب حساب همه بجامعه ، ليش يرزلها ويفشلها ، ترضيها انتي ، لو صاير بيج هيج موقف ، تسكتين، وفرضي حجايه بنان صحيحه واحد صورهم، هواي حقراء ، شلون ، لازم أأدبه والله فلا اسكت ...

طلعت تفور وطلعنه وراها نركض ...

نزلنه وفاتت للنادي ...

حور: وينه ...

بنان: لج حور عوفيه ساعه السوده الحجيتلج بيها امشي ....

رونق : انتي تشوفين الوقت والمكان مناسب مال عركه ، وبعدين منو يكول راح يسكتلج اذا حجيتي ، هيه بنان بدون قصد ورزلها ...

حور: بنان وحد واني وحد ، رونق الفاهيه معليج ...

رونق : يعني لان اريد احافظ على سمعتنه ، وماريد مشاكل طلعت فاهيه مو صوجج ...

عافتنه وراحت زعلت من حور ....
رحت وراها...

بنان : رونق تزعلين من حور اول تالي ..

رونق : مشفتيها شحجت ...

بنان : حتى لو شتحجي مفروض متزعلين .

رونق : عندي محاضره عود بعدين نحجي ..

بنان : مزعلانه اكيد.

رونق : اكيد ...

راحت ورجعت على حور لكيتها كاعده وتهز برجلها ...

بنان : كومي بدت المحاضره ..

حور : ما افوت اله ارزله ، كلبي يفور ...

بنان : اني مضجت بكدج شبيج انتي ..

حور : يا مضجتي ، مو بجاج مو تفشلتي من وراه ، مو راح امتحانج بسببه ....

بنان : امشي نطلع نتمشى هنا خنكه ...

جريتها من ايدها وطلعنه ، افترينه بالسنتر ، وصلنه قريب كليه الاداب وجان اشوفه هو وصديقه الثاني ..

اني ارتبكت وجريت حور حتى نغير طريقنه ...

بنان : امشي مناك ...

حور : ليش عود ..

بنان : امشي كتلج ..

عيني عليها وعليهم ، هيه انتبهت وين اباوع جان تكلي ..

حور : ذوله مو ؟؟؟ هاا عرفته هذا قميصه متدمر ..

عافتني وراحت عليهم واني امشي وراها ..

بنان : يمعوده تعاي ، ...

ماكو انطلقت ....وصلنه يمهم جانو يسولفون ماخذيلهم ركن ، شافونه وسكتو ، صديقه الثاني جان يشرب جكاره ذبها بالكاع وداس عليها من شافنه ...

حور : انت صميم؟

تحجي بصوت يرجف هههه من تعصب اني صديقتها ما اعرفها بعد..تختلف ...

جاوبها مستهزء ..

صميم : يولي عليش ملكوفة ...

التفتت عليه حور .مستغربه

حور: لج هذا بس لا سبني شكاعد يحجي ...

اني ضحكت على شكلها ....

بنان : هههههه

حور : انت شو متستحي شنو ملكوفة مو عيب وبعدين ليش تتجاوز على بنان ، واذا وكع عليك الكابتشينو ، قابل متقصده ، وفرجت عليها الطلاب ...

صميم : يواشج ( على كيفج) لسان لو برنو شكثر رطنتني صرعتيني يول...

بنان : ههههههه هذا شيكول ...

حور : سدي سنونج يالفطيرة مو حتى هيبتنه راحت من ورة الضحك مالج ...تحجي على كيف ومن بين سنونها ...

كرصتني حيل من ايدي ورجعت حجت وياه ....

حور : شوف عيني السويته عيب وجان لازم تسكت من اعتذرت منك مو هيج تصيح عليها وتفشلها ، وخليت دمعتها تنزل ...

راد يحجي اللي اسمه صميم بس صديقه اشرله يسكت وتقدم على حور وكف كبالها ، اسمه عمر بعدين عرفت من خلال كلامهم ...

عمر : يواش يواش ، بويه عليمن هلكثر صوتج معليته وتزمخين ( تعيطين ) لا انه جاهل ولا صميم ، احترمي نفسج وجري منا ( امشي منا ) ...

اباوع هذا مخنزر واعصاب وحور نفس الخزرة واعصاب واني وصميم اهل المشكله واكفين نباوعلهم ....

حور : انت شكاعد تحجي تزمخين وتخرمشين ، كاعد افهم صاحبك السواه غلط انت شدخلك بالنص هااا شدخلك ...

اباوع على هذا الاسمه عمر كام يدخن التاف على صديقه وكله ...

عمر : شكثر شايف برعات فد مثل هاي برعه ما شايف ولا اشوف...
( البرعات والبرعه ، صلفات ، صلفه) ..

صميم : خلها ترطن لين تجزع ، عليش حارك كلبك ...

عمر : افين حضها ومحمد لو حجت ...( افين ، اطيح)

همه يحجون واني وحور وحده صافنه بوجه الخ كلشي منفتهم كاعد يسبونه لو يحجون علينه ....اني اريد اضحك بس اخاف من حور ..

حور : شلون ناس متستحي امشي بنان امشي ..

درنه وجهنا نروح ، جان يجي الاسمه عمر وكف كبالنه وسد الطريق علينه ...

عمر : انه كاضب نفسي لاني بجامعة ، يولو لو كاضبج بمجان ثاني اله لا اطر راسج طر وامدج ب الطرفيسة ..

( الطرفيسة ،شارع وصخ وبيه طين ،من اثر المطر ، احنه نكول هاي شنو الشارع صاير خيسه، همه يكولون هاي شنو الشارع صاير طرفيسة )😊

اني هنا متحملت ضحكت ضحكه عيوني كامت تدمع اريد اسكت ما اكدر ، وهاي حور تخزر وتتوعدلي ...

حور : بيك خير الزم شعره مني وشوف شسوي اني بنيه وافين حضك على كولتك صح ما فهمتها بس مبين حجايه طايح حضها ...

عمر : جسارتج وحيونتج ، انه اعلمج عليها ...

اجاه صميم يجر بيه يريد ابد جلب لحور ، وحور هم .
ثنينهم صلفين

صميم : عمر يزي مكاون ،عليتو لكلبي ( شلعت كلبي) انه ابو المشكله مو انت .اركد بويه ..

اركد ( اكعد او استهدى)

عمر : خلها تحدر هين نوبة الخ لا ما زتيتها من البنايه ما اتسمه عمر ...

تحدر( تجي او تقترب) زتيتها ( شمرتها) ..

صميم : عوفها ول راح تموت ..

عمر : رايدها من الله حلجها تفكوا لا ما افين حضها ..

صميم : لا يتكدر خاطرك ول ياب امشينه انعل الماتولها...

راحو ، وعمر يتوعد لحور بنضراته ....

بنان : هسه زين من هيج سويتي مو كتلج عوفيهم ، اني ماعندي السان واردهم ، بابه ذوله ولد ، وين يقبلون وحده تنطيهم لسان ويسكتولها ، هسه زين من راح ويتوعدلج..

حور : لا نسكت الهم دشوفيهم شلون شكولات حجايتين على بعض ميعرفون يرتبوها . حرام اذا فهمت منهم شي ...

لزمتها من عكس ايدها ومشينه ...

بنان : اكلج مبين شكلهم من الغربية ...

حور : وشبيج فرحانه وجاكة الحلك متر..

بنان : ولج هيبه شفتيهم ، اخ الله شكد حلوين ...

عتت ايدي حيل واندارت عليه..

حور : لا يا جلبه اني ساعه اعاركهم علمودج وانتي كاعد توزعين نضرات اعجاب ، مو صوجج ،والله صوجي اني ...

بنان : ههههه والله مكتلج تعاركي لحالج تعاركتي وحركتي دمج ...

حور : امشي بلكت نلحك على اخر محاضره ...

مشينه وصلنه القسم جان هوسه صوت الطلاب ، واضح ماعدنه استاذ ....

فتنه وشفنه على الستيج مال استاذ طالب واكف وبيده ورقه وقلم ،...

الستيج ( ميز خاص بالاستاذ يصير بدايه القاعه مكانه يم السبورة ) ...

هو يسأل والطلاب يجاوبون و يضحكون..

حور : هاي شكو ...

بنان : رفعتلها حاجبي بمعنى علمي علمج ...

فتنه وكعدنه بمكانه ...

اللي فهمناه مسوين حفله تعارف بينهم .

هاي كل طلاب مرحله الاولى يسوون حفله تعارف ، هو احنه صارلنه شهر مداومين بعد عليمن هالحفله ، بس هاي ناس تقلد ناس ، لازم يسسوون مثل باقي الاقسام ...

حور : امشي ننزل ..

بنان : هاي شبيج خلي نتعرف على طلابنه ..

حور : تعرفي عيني اني نازله ...

جريتها حيل وكعدت ...

بنان : عليج الله بطلي نحوسيه شبيج متكليلي ...

حور : مو نحوسيه بس متعجبني هاي السوالف ...

بنان: يلا امشي ننزل كلشي ولا تضوجين ....

طلعنه من القاعه ، ونزلنه جوة اكو مقابيل كليتنه متحف .

اسمه المتحف الطبيعي ، بيه كل الحيوانات بس محنطة ...

صارلنه شهر نسمع بيه بس مفايتيله ...

بنان : حوري ، حبي ممكن طلب..

حور : دامج دكيتي ناعم وحوري يعني جوعانه ، امشي ناكل ...

بنان : لا والله بس اريد افوت للمتحف عاجبني ...

حور : خو احجي من البدايه ليش تبجين ...

مشينه اكو بدايه المتحف منا ومنا حدايق وبكل حديقه تمثال مال دينصور واحد كبير كلش والثاني صغير ...

حديقه الدينصور هاي خاصه بالكبلات ، بيها ختلات ، مرات نكعد بيها بس نشوف شغلات محلوة نكوم رأسن ، فصارت هاي الحديقتين ممنوعه علينه، لا اني ولا البنات نقبل نكعد بيها ....

فتنه للمتحف سلمنه الموبايلات ، ودفعت الي ولحور الف .. لان ٥٠٠ النفر ...

حاجيناهم علمود ندخل الموبايلات مقبلو ، كالو ممنوع ...

بنان : عود كلت اخذ صور حتى اشوفهن لخواتي خطيه ...

حور: عود جيبيهن فد يوم عليمن ماخذتلهن صور..

بنان : هم صدك ، بيوم ماعدنه محاضرات واجيبهن .

دخلنه لاول قاعه بروده كفخت بوجهنه هو اساسا الجو بارد وبالمتحف بعد ابرد يمكن يعلكون مكيفات ، لان اكو ريحه مطيبه ...

حور : بربج جايبتنه ودافعين فلوس علمود اشوف حيوانات ميته ، خو نروح للزوراء واشوفج الاسود على اصولها بلكت تاكلج واخلص منج...

بنان : هسه قحط دفعت الملايين هيه الف ، وبعدين عاجبني افوت اشوفه شنو يعني شصار عليج ، دشوفي وراج هذا مو نياندرتال ( الانسان القديم يشبه القرد) .

حور: استغفر الله ربي يكول مشوفتني توم كروز ..

بنان : مو يشبه مؤيد ...

حور : يامؤيد

بنان: خطيبج ثول ...

حور : هم كالت خطيبج بابه كل عقلج اتزوج هذا الطرن ..

بنان: ولج سيد ليشور بيج ..

حور : سيد سكتي عفيه ، ابو النسوان ، وشكو شغله عوجه يركض وراها ...

بنان : لعد شلون يكولون الساده ، ماعدهم سوالف نسوان ويحبون مريه وحده بحياتهم ويوفون الها ..

حور : اي حبيبتي هاي منو كلج بهذا الجذب ، هاي مو امي ابويه حب فوكاها عشرات النسوان، وتزوج مرتين مو سل كلبها سل ...

بنان: عمو زيدون وين اكو منه غير هو حلوو وكيوت والنسوان كتل عليه...

حور : تسكتين لا احنطج بصف نياندرتال واخلي بس عيونج تفتر ...

بنان : ههههه لا عمي سكتت ما احجي ...

حور : امشي نطلع انقرفت من الريحه..

بنان : يلا امشي ونروح على رونق نصالحها زعلت منج..

حور : تزعل غير اطيح حضها والله ..

بنان : شبيج انتي اليوم ، ليش احس صاير وياج شي قوي وكاعد تطلعين حركه كلبج بالرايح والجاي ...

باوعتلي وصفنت طولت صفنتها لهناك وخلت ايدها على وجها وبجت ..جريتها وكعدنه على صفحه ...

بنان : عرفت والله صاير وياج شي احجي شكو
..

حور : شحجي شحجي ضيم كلبي لوحجيته منا لسنه ما اخلص ...

بنان: احجي اسمعج .....

حور ...

اعرفكم على نفسي
اسمي حور من مواليد ١٩٩١ .

علويه ، كبرت وترعرعت بوسط عائلة ، كل همها العادات والتقاليد كدام العالم ، لكن بيناتهم اي عاده من هاي العادات ممطبقيها ....

ابويه سيد من عشيرة ال ......... بدون ذكر اسم العشيرة تحفضآ ...

عندي ست اخوان ما ادوخكم با اسماءهم ، بعدين اعرفكم عليهم ، بس اخوانه اي حنيه ماعدهم علينه ، يحبون نفسهم وبس وراثين هذي الصفات من الوالد ...

عندي اربع خوات ويايه نصير خمسه ....

اني وخواتي وماما كلش مضلومات ابويه حيل ضالمنه ...

هسه تكلولي شلون ...

اني اكللكم ، ابويه كلش زنكين عنده معارض سيارات ،بس علينه البنات وعلى امي ابخل من البخيل ...

فلووسه تروح للونسه والكيف ، وعلى النسوان ..
واخوتي طبعا متنعمين بخير ابويه ...

بس يأشرون على الشي صاح تم ...

اني وخواتي وامي نتراوس باللبس ناس تلبس من ناس ...

اني لان اجيت بجيل يختلف عن جيل خواتي الكبار اضوج البس شي قديم ، استصغر نفسي ..

لهذا جنت بالمدرسه على طول كئيبه وضايجه ...

ضليت على هذا الحال الى ان تعرفت على بنان ، صف ثالث متوسط ، بنان شنو اللي خلاني اصادقها ..

طيبه كلبها ، وفطاريتها ، كلش حبيتها ، واضافه لهذا انيقه بشكل ، وخلوقه ...

حبيتها كلش ، صرنه صديقات اني وياها ورونق ...

اني كلش شاطره عكسها هيه جانت راسبه سنتين ، لان متقره .. من تعرفت عليها كامت تجيني للبيت طبعآ بالوقت اللي والدي ممتواجد لان ماعنده سوالف صديقه تجيني واروحلها ، لو اني اروح بالبوكه ،امي تكله راحت يم اسراء ، اسراء اختي الجبيرة متزوجه ابن عمي ..

المهم كمت اقريها هوواي وامتحنها ، وكامت تنجح .

هيه منتبها على ملابسي يوميه البسهن نفسهن ..

بس متسألني ليش انتو حالتكم زينه وهيج لبسج ..

كامت شتسوي كل ما تنجح بمادة تجيبلي ملابس ، لو مال مدرسه لو مال بيت لو جنط ، طبعآ اني ما اقبل اخذ ابد بس هيه تزعل ومرات حتى تبجي وتكول ما اجي اقره يمج بعد اذا متاخذيهن ، لهذا اخذ منها ..

ومرات اجوع بالمدرسه كلهم البنات يشترون من الحانوت اله اني ما اشتري لان محد ينطيني مصروف ...

ولا واحد يسأل منين كاعد تلبسين جديد حتى امي متسأل حايره شلون ترضي ابويه عليها ، وشلون متخلي يتزوج بعد ....

فجانت بنان ، تشتري الي والها اكل ، واذا ما اخذ تروح تذب الاكل مالتي ومالتها بالزبل وتكررت هاي الحاله بالعشر مرات الى ان طك كلبي وحجيت لبنان كلشي ومن يومها تشاركني ب اكلها وبهدومها ...

شكد ما اوصف بنان قليل بحقها لهذا احترك دمي من موقف اليوم وردت ارجع حقها....

نرجع على عائلتي الموقره ، ابويه ، لا يناسب شيعي ولا سني ، اله سيد حصرآ ، اتذكر مرة اختي خطبها واحد بالمعهد ، موتوها كتل اخوتي و ولد عمامي ، الى ان بطلوها وجبروها تاخذ ابن خال ماما ...

ماما هم علويه واقارب بابا ...

خواتي كلهن الاصغر منها بعد سالفه اختي نبأ بطلهن بابا من الدوام اني جنت ابتدائيه الوحيده المابطلني ..وكملت

من كملت السادس وفرحت راح اروح للكليه ، بس الفرحه شلون تدوملي ، كوم ابن عمتي واخطبني من بابا ، ابويه وافق بدون ميسألني شنو رأيي اريده لا ، انقرت فاتحتي غصب عني ، لهذا اني ومؤيد يوميه عراك ..

هو يريد يخابر ويسأل واني ما انطي وجه ...

نرجع على اخوتي ، يتزوجون اللي تعجبهم ، كرايب غريبه ، بس البنات لا اجباري ...

اخوتي الانانيه العدهم مشايفتها عد احد ...

اضافه لهذا اني عندي اخوان وخوات ثانين من زوجات ابويه الثنين ، بس اي شي ما اعرف عنهم ...

لا يجونه ولا نروحلهم ، كل وحده بيت كاعدات ....

وسبب البجي مالتي مال اليوم ، ردت فلوس خط من بابا تعارك ويايه ، وذلني يلا نطانياهن ، وشمرهن بوجهي وفات خلاني الم بيهن من الكاع ......

بنان: يلا ياعيني هسه متعلمتي عليهم شكو تبجين يرحولج فدوة ...

حور: يعني شيصر اذا خلاهن بيدي وكلي تدللي ، هو هيج هيج ناطيني فلوس ، ليش يشمرهن عليه خلي يحسبني كح***** من كح**** اللي يكيت عليهن ...

بنان : سكتي ياعيني ولا تنقهرين اني عندج والله لتدفعين خط اني ادفعلج ، لان حسن ماخذني ابلاش ..

حور : وشنو ذنبج انتي تدفعيلي ، قابل يتيمه ، عندي اب وعندي ست اخوان ياكل بيهم السبع سبوع وميخلصون ...

بنان : ميخالف اعتبريهم ميتين ، لتفكرين بيهم ..

حور : ميتين ههه وداعتج الموت ميجي على هيج شكول ، يجي على الزين بس يلكطه ...

بنان : كومي غسلي وجهج صار خريطه ...

حور : طز واذا ....

بنان : كومي حبابه ...

بوستها وحضنتها حيل ومشينه رحنه للحمامات غسلت واني هم غسلت .. وطلعنه كبل للخط ، جانت رونق كاعده وكالبه وجها ، من شافت حور باجيه كبل نزلت تركض عليهة ...

رونق : شبيها ليش باجيه ...

بان : ممجاوبه بالامتحان وبجت ...

رونق : عليه بنان ، احجي شصاير حور متبجي بسهوله .

بان : بعدين نحجي خلي نصعد اول...

صعدنه تسالمنه ويه حسن ، الطريق كله هدوء حسن استغرب هدوئنه سأل شكو كلناله ممجاوبين بالامتحان ، سكت ومعلق...

وصلنه البنات لبيوتهم وبعدين اني ...نزلت فتحت الباب من جوة .. وفتت كبل صعدت نزعت هدومي ونمت متغديت انمردت على حور مرد .....

المغرب كعدت على صوت المسجات ، فتحت الموبايل، اشعارات مال كروب ، دخلت كاتبات ب ٣٠٠ رساله ...

دزيت صووتيه الهن ...احجولي مختصر شكاتبين مابيه اقره...

دكت رونق مكالمه جماعيه ...

وبدينه نسولف ، لهناك اتفقنه محد تداوم باجر .....

ثاني يوم العصر اجتني روند....

جنت متمددة وبيدي ملزمه اقره لان عندي امتحان وكلشي مقاريه باليومي ...

روند : هلو بنوش

بنان : هلو كلبي شلونج ..

روند : الحمدلله ، اريدج تجين وياي ..

بنان: وين ؟؟

روند : نروح للرواد ( المنصور) ..

بنان : وشعندج بالرواد ...

روند : اشتري ملابس باجر عدنه حفله بالمدرسه واريد اكشخ ...

بنان : اخذي مني متسوه نطلع علمود حفله مدرسيه ..

روند : هاي منو تحجي ، منيه جانت تشتري حتى الحذاء جديد لو صارت مناسبه بالمدرسه ...

بنان : ولج عندي امتحان شلون ...

روند : غشي من حور ، اول تالي تقرين ..

بنان : خوش سمعه مطلعات عليه ، انتي وياهن..

روند : قابل كذب دكومي فدوة ...

بنان: اوف كايمه وامري لله امشي ...

كمت بدلت وهيه راحت تبدل ، نزلت تلكتني ماما ...

الام : هاي وين عيوني مبدله وطايره ...

بنان : اروح ويه روند تشتري ملابس ..

الام : ومنو كلج روحي ، جيتي سألتيني سألتي ابوج ، نقبل لا حتى تبدلين ...

بنان : ماما شو بالجديد تحاسبيني على الطلعه والروحه لروند ، شنو السالفه ...

الام : اي بالجديد جنتي مدرسه واكول مراهقه وتعقل هسه كبرتي ...

بنان : وشفتيني اركص لو اكمز وتخبلت يا ماما شبيج ..
لتقهريني بالرايحه والجايه لو ما اني تربيه ايدج جان شسويتي...

الام : منو ياخذكم ...

بنان: حسن اكو غيره..

الام : والله ابتلش بيجن هالحسن هذا خطيه مسكين ..

بنان : شعنده عطال بطال فوك ما ماخذي يفتر ويانه ونونسه ..

الام: وهو عايز على فرارتجن ، شو عنده كوم اصدقاء ويطلع وياهم ، بس كولي مجبور اكلج اي ...

بنان : ههههه واني اكدرلج سناء ..

الام: سناء شنو لج ...

بستها من وجها ورحت لبابا كتله راح اروح ، اشرلي براسه اي ، بدون ميحجي خاف تفوته لقطه مال طوبه ...هههههه

طلعو لكيتهم منتضريني بالسياره روند ليكدام صعدت وره ....

بنان: اليوم ماخذه مكاني ، ترة ميصير ..

روند : هذا اللي يتأخر يكعد ليوره ..

حسن: اوف اليوم خلصان الصبح منج وهسه هم خلصان ياريت هيج دووم ...

بنان : يا عشتو اني اللي مسويه روح بالخط ، منونستكم اصلا .... اعلك شي شنو فاتحه ..

حسن : هااا هاي تعويض مال الصبح..

روند : حسن شبيك اعلك شي والله ضايجين ...

حسن : شنو رأييكم افحط بالسيارة حتى تتونسن ...

بنان : ياريت والله تعرف بيه احب المغامرات ..

اندارت عليه روند ،

روند : متسكتين توني متغدايه ، هسه يصدك ...

حسن : شايفتني عربانه وبسرعه اندفع ...

بنان : عربانه لبلبي لو باكلا ، خخخخخخ

حسن : ها ها ها ضحكو ضحكو خطيه ...

روند : يبو ما فد يوم طلعنه اذا متناكرتو ...

علكت المسجل وعلته حتى نسكت ، هلمرة حولت عركتنه بالعيون من المرايا ...

يخنزر واني اخنزر لو يسوي بسيطه واني هم اسويله بسيطه ... هههه الي يشوفنه يكول روسيه مو ولد عم ....

وصلنه للمنصور تحديدآ الرواد ،خلينه السيارة بالكراج ونزلنه ....

افترينه الشوارع تجنن والناس منطلقه ، اللي يشوف المنصور يكول ذوله مو بالعراق واصلا ماعدهم هم ، لان الاغلبيه طبقه راقيه ، وانيقين وسيارات بالعافيه عليهم ، منطقتنه متقل عنهم يمكن مثلهم .

احنه كاعدين باحد مناطق بغداد تحديدا الكرخ مع عدم ذكر اسم المنطقه 😊.

افترينه على محلات الملابس ، وروند تطلع قطعه ترجع الثانيه ميعجبها ...

لو تكدر القطعه تطلع موحلوة باللبس ، لو تعجبنه بس ننصدم بالسعر ، ونكذب كذبتنه المشهورة ، نشوف ونرجعلك ، والروحه روحه ..ههههههه

طلعنه من المحل حسن واكف يدخن ، ...

حسن : ها كملتن ترة متت ..

روند : بعد حباب كلشي ممشتريه..

حسن : صدك جذب ساعه ٨ ..

روند : اي غير ماكو شي حلوو.

حسن : كل هالهدوم هاي وماكو ، لو كولي ذوق ماعندج..

بنان : لا اكو بس شويه غاليات ...

حسن : بيش يعني

بنان : عجبها بدي ب ٥٠

حسن : الف

روند : لا دينار طبعآ الف ...

حسن : بهاي الخمسين الف مشتري بنطرون وقميص وحذاء وحزام وتبقالي ربع اشتري لفه ...شدعوه متكللي ..

بنان : هيه هدوم البنات غاليه شنسوي يعني ...

حسن : اوووف بكلشي تختلفن ، اخ منج حواء من يوم الي اكلتي التفاحه احنه طاح حضنه ...

بنان: وانتو شكو تسمعون كلامنه تفاح الجنه كله مكفاكم اله تاكلون اللي منعه رب العالمين عليكم ...

حسن : صارت بعد تعرفين بينه كلبنه رهيف ومنكدر على زعلكم ...

روند : امشي ابو كلب الرهيف ، نروح للمول اخر شي اذا ملكيت عشينه ونرجع ..

حسن : النوب اعشيجن ...

بنان: هم عوزك نرجع ممتعشين هسه اهلنه تعشو وراحو..

حسن: صبرني ربي ، بيش بليتني...

افترينه بالمول واخيرآ اقتنعت روند اشترينه ، وطلعنه اتعشينه بمطعم اسمه صمد كلش مشهور بالمنصور واكله طيب ورجعنه للبيت ......

يتبع ......

الصوره شبيهات البنات ...