علاقات زائفة

البارت الاول🤍

بنان :اهوووو وين اللفكس مالتي صدك جذب هنا خليته ..

ماما يوووم وين اللفكس مالتي فدوة لعينج ...

الام: اذا السهر عامي عينج شنو ذنبي اني تعاي هياته جوة..

نزلت اركض اخذته وبستها وطلعت ؛ وصلت للطرمه سمعتها تكول.

الام: مرة ثانيه لمي غراضج لا تايهات وتضلين تفترين عليهن الصبح ومهيجه البيت كله.

بنان: صار ماما حبيبتي ، طلعت واشوف ابو الخط هههه

بنان :هلوو حسن

حسن: موتيني ليش هالتأخير يوميه نص ساعه واكفلج والبنات أتأخر عليهن ليش هيج .

بنان: يلا يلا هسه شنو يعني شسويت قابل عادي عادي مشيها حباب.

لزمت وعلكت المسجل مال السياره وعليته ، جانت سيارة خصوصي؛ واني اكعد ليكدام يم السايق لان محد تقبل تكعد وهو اصلا ابن عمي .يعني مو غريب...

حسن: ليش متكعدين من وكت.

بنان: والله كاعده من الخمسه .

حسن: هاي شتسون عود هلكد شو اني اكعد البس البنطرون واجيج ركض لا مغسل وجهي لا متريك حتى نفس تيشيرت البارحه نايم بيه .

بنان :ويييع صدك بعد فلا اكعد يمك ؛ اكول بيك ريحه نوم ...

حسن: انجبي انجبي لتكعدين اخلص منج ومن اغاني ساجده عبيد؛ الناس من الصبح تعلك قران انتي دك وركص .

عيبتله ودرت وجهي وكفنه يم بيت حور ..

حسن: سويلها مسكول حتى تطلع

بنان: اتصلت ورفضته هسه تجي ...

طلعت حور وضايجه تنافخ بضجر ...

حور: صباح الخير ، ليش حسن هالتأخير صدك جذب تدري من السبعه مبدله وكاعده انتضر ...

حسن: هاج استلمي ست بنان ، وفوكاها من احجي تضوجين ، يلا انذبت براسي ...

بنان: اني شعليه اصلا انت تأخرت عليه ربع ساعه ..

التفتلي عصبي.

حسن: لتخليني الزكج بالجامه والله اضيع ملامح وجهج ، منيه نص ساعه تلبخ جص بوجها...

بنان: ياااااا هاي عليمن ...

حور: كافي والله اذا تتأخرون بعد انزل من الخط ..

بنان: حوري والله اخذتني نومه بس هلمرة ..

حور: كل يوم انتي هيج ، هاي الدوام صارله شهر وانتي على نفس الحال...

وكفنه يم بيت رونق ..
اجتي تضحك ههههه ...

رونق: هاييي يا حلوين كيفكم ..

حسن: كيفهن يعني ملاخ راسي سطرنه ..

رونق: هههه عركه حبايب ، هسه يتصالحن ..

حسن: الله يعني ماخذ شله مخابيل كل وحده شكل ..

بنان: الله يعينك ، وياك جوزائيه ، والحمل ، والعقرب..

حسن: واني الاسد ، اشوف منو يفك حلكه وياي حتى ابلعه ..

ههههههه ضحكنه . كلنا ....وكفنه صار ازدحام ....

ننتضر هسه ينفتح الطريق ماكو شلون شوكت نوصل ، اول محاضره عدنه استاذ نبيل المعقد ...

انتضرنه تقريبا ربع ساعه ، ليش ما حسن توه فتح الجامه واجاه مخبل كفخه حيل على راسه وانهزم ..

حسن: اخ يا ابن الكلب ، اوكفلي .

فتح باب السيارة ونزل يركض وراه ، احنه شنو نريد نسكت منكدر متنه ضحك ..لهناك واجه صعد ...

حسن: الله لا يوفقه ، عوجلي حلكي وفوكاها مخبل ضربته تأذي ...

حور: هههههه حل هاي شورت بيك لان تأخرت عليه ..

حسن: كلنه علويه عمي بس موهيج تشورين راسي طار ...

ضحكنه ، جان رونق الفطيرة تكول

رونق: بث خطيه شلون نطرب ضربه ( عود تكول بس خطيه شلون نضرب ضربه ) .

شنو احنه تطشرنه كلمن بمكان من الضحك ،ندور على حسن ماكو فايت جوة الستيرن انتهى بس يضحك ، وذوله السيارات ورانه تدك هورنات وهو منتهي ....

اله نزله واحد دك على البنيد حيل ، يلا مشينه ...

وصلنه لباب المعظم نزلنه يم معهد الادارة والاقتصاد ..

ونكمل باقي الطريق مشي ...

بنان: بنات ، تعالو نشتري عطر ، حبابات ، عطري خلص..

حور: لا والله، اكلج اساسا احنه متأخرين ، وتردين توكفينه ، خو منداوم مو احسن شتكولين ..

بنان: روحي وحدج شصار هيه دقيقه ..

رونق: اني اجي وياج بنونه..

بنان: لك فديت الحنين اني فديييت ..

حور: والله مخبلات وماعدجن عقل اجي وامري لله ..

فتنه لمحل صغير يبيع عطور ، اووف عطر اطيب من الثاني ، اني عندي عطور هوواي بس هوس عندي منين ما امشي واشوف محل عطور اوكف اشتري ...

المهم اختاريت واحد وطلعنه....

مشينه وكفتني رونق ...

رونق: اخ كلبي ، شوفي بنان ...

بنان: شنو .

باوعت على مكان اللي تأشر عليه ، شفت جنطه ..ضحكت

بنان: رونق هم جنط مو كافي عندج كل الالوان وكل لون عندج منه صغيره وجبيرة...

رونق : معليج مني انتي مو عندج كومه عطور واشتريتي هسه ...

بنان: حوري وين صافنه ..

حور: عليجن داشوف وين توصل ، ساعه تسعه راحت اول محاضره منو يفوتنه ، استاذ نبيل صعب وميتحجه  ...

بنان: هاي انتي كلتيها صعب شعدنه فايتين محاضرته..

رونق: وهاي يا استاذ ميعجبكم متحضروله درس..

حور: امشوا عبالك رايحات لسوك مو جامعه من نطلع عود اشترن وين تحيرن بالعلاليك ....

....

احلا شي، يم المجمع مال باب المعظم ، محلات كلشي بيها ملابس احذيه جنط مكياج، شنو يعجبكم موجود ، واني اضعف اذا اشوف محلات ملابس وما افوتلها ...

من المعهد لحد الجامعه شارع عبارة عن محلات ومطاعم ، بحيث بالدوام نستغنى عن الطلعات لان متونسين ، ملابس اكو ، مطاعم اكو، حدايق المجمع مليان كعدات تجنن ، البنيه شتريد مثلا من تطلع غير هاي الاشياء...

وصلنه للمجمع ، بوابه كبيرة بالوسط ، ومن الجهتين اكو بوب صغار على اليمين ، باب دخول الشباب ، وعلى اليسار باب دخول البنات، لغرض التفتيش ، بس نعبر البابين، نفوت للمجمع ، دخلنه من الباب المخصص للدخول ، صاحت المفتشه ...

_ يلا بنات فتحو الجنط وطلعو هوياتكم ...

فتحنة الجنط وطلعنه الهويات .

شافتهن وتفتشنه ودخلنه ، الله منظر يشرح القلب ...

شارع سايدين عريض كلش، وعلى الجهتين كليات ..

على اليمين واول كليه هيه التربيه ابن الرشد من بعدها كليه الصيدله ومن بعدها كليه الشريعه ...

على اليسار ، اول كليه هيه الاداب ومن بعدها كليه اللغات اللي هيه كليتنه ، وبعد اكو كليه اعتقد علوم سياسية لو حقوق ممتأكدة .....

بدايه التربيه اكو نافورة، ويمها ميز مال المصورين ومطشرة فوكاهن الصور مال طلاب اللي ماخذيها قبل بيوم .

الخاصين بكليه التربيه حصرآ ، واحد اسمه علي علاوي ههه والثاني اركان ، احنه نحب صور علي ، لان يخليلنه فلاتر وعدسات واحنة البنات نخرب على هاي السوالف ، اركان لا عجوزي يطخمج الصورة وينطينياها ....

نرجع على هذا الشارع اسمه سنتر المجمع ، ...

هذا الشارع ابو الغيبه هههههه يعني اذا نكعد بيه نكوم شايلين كونيه غيبه واثم على ضهورنه الرايح والراجع نكص بيه ....

على السايدين مكان كعده وبالوسط رصيف وبيه مصطبات واشجار يكعدون الطلاب جوة الفي مال الاشجار ...

هذا السنتر ، الصبح قليل طلاب بيه لان كلها لو بالنوادي تتريك لو بالقاعات ...

بس تعالو ساعه ١٢ و ورة ، ماكو محط رجل ....طلاب وطالبات ، وشنو المنظر اللي يجنن عباره عن بياض ..

ملابسنه والزي مالتنه يدل على انتمائنة لهذا المكان ...

مشينه احنه وضحكاتنه وسوالفنه ، وصلنه لكليتنه

كليه اللغات ....

اني وحور ، قسم انكليزي ....

رونق ، فرنسي ..

اول مفتنه بوجهي رحت للنادي ، لان لازم اتريك ، ابجي اذا متريكت اهم وجبه عندي هيه الريوك ...

اول منفوت باب بالوسط ، ونفوت كراسي على مد البصر وكلها طلاب ، وياهو العنده بخت يحصله مكان ..

لان مو بس طلابنه يتواجدون بالنادي لا باقي الكليات هم يجون يمنه ضيافه يعني ، مرة سمعت بنات يكولون ، شوف الاكل والمقبلات شكد طيبه ونضيفه عكس النادي مالتنه . بعد نجي هنا ....

اخذتني رجلي على ابو الجاي ، خال مثل الكتلي او ترمز جبير مدري شنو اسمه بس بيه جاي ، وعلى الفحم ، يا بويه الريحه ، حتى اللي ميحب الجاي هم يشتري ...

خله ٣ جاي بصينيه ونطاها الي اخذتها وخليتها بيد رونق كتلها شوفيلنه مكان على ما اجي ....

راحو هيه وحور اللي معاجبها الوضع لان تريد تفوت محاضره ، بس تخاف على زعلنه وتبقه مجبورة ويانه ههههه هيه هاي الصداقه بكلشي لازم سوة ، وبالاتحاد قوه هذا شعارنا من تعرفنه على بعض ....

وكفت يم عمو ابو الكاهي ..عرف اسمي لان يوميه اخذ كاهي منه ...

_ هاي بنونه ، نفس الطلب ..

بنان: اي عمو نفسه، بس الشيرة لا هواي ، وخلي بواحد كيمر وثنين بدون.

البنات ميحبون بيه كيمر، يعني بس الي .

_ صار بنونه تدللي ...

كمل الطلب ، نطيته فلوس ورحت ادور على البنات دخت وينهن هوسه وكومه طلاب وصوت الاغاني عالي..بس الحلو ب ابو النادي مالتنه اغانيه راقيه يعني اليسا مرات تامر حسني ميعلك دك وركص مثلي ههههه...

من بعد ما افتر راسي سبع فرات شفتهن ، ورحت طايره ، خليت الصينيه وكعدت ...

حور: تأخرتي ..

بنان: اذا انتو كاعدين بالزاويه وين اشوفكم، شكالولج عني زرقاء اليمامة ...

حور: اي بس بالغش زرقاء تعرفين شلون تغشين ،،هسه متشوفين انعميتي ...

رونق: هههههه والله قصفه ، اكلكم وين بنان شو ماشوفها ..

كامت تدور جوة الميز ههه تقلد عليه ،
عود من فشلتي اختفيت...

بنان: حبيباتي الامتحان، وحد ربج ينزل كل التركيز بساعتها، والنظر يصير سته على سته ، شلون ماعرف ..

رونق: وانتي ليوين تضلين معتمده على حور، هاي جبتيها اعداديه غش بغش ، وهسه هم متقرين ..

بنان: لا ياحقيرة، ولج منو قرة بالسادس وطلع معدل امي...

حور: الله ينطي اللغه، هو انتي لان زينه بالانكليزي طلعلج هيج معدل واله انتي سحك ...

بنان: والله زعلت ، ومادام هيج تحجون ، الكاهي اكله وحدي ...

رونق: ههههه ام بطن، لو بس ادري الاكل وين يروح تاكل وتسحك ...

بنان: صلي على نبيج، لتحسديني ، هاي عينج على لكمتي ...

حور: يمعوده سكتي خليها تكمل، بلكت نلحك على المحاضرتين البقت ...

بنان: كومو اصلا ما اشتهي...

وحده باوعت بوجه الخ وطكنها بضحكه...

رونق: هاي متشتهين وطيرتي ماعونج لو تشتهين شتاكلين...

شلنه الجنط والملازم وكمنه مشينه ورديت رجعت للميز

صاحن هااا ..

بنان: لحظه ، رجعت شربت الباقي مال الجاي مالتي ، ورحت وراهن ، هههه اتقصد هيج اسوي حتى اضحكهن ...

صعدنه للقسم جانت ٩ ونص هههه اول محاضره طايره

تبدي ٨ ونص تخلص ٩ وربع ، وربع ساعه استراحه ، وتبدي محاضره ثانيه ....

دخلنه للقاعه وكعدنه اني وحور اخر شي ، حتى ناخذ راحتنه ، نسولف شي ، مو مثل اول استولات ( كراسي) نتقيد بوجود الاستاذ ولازم نركز وابتسامه كاذبه ، وغفله ننسأل، يعني المحاضره نشيلها احنه ، اختصرنه الوضع وكعدنه اخر شي ...

لهناك وفات استاذ نبيل ...

بنان: هاي شنو مو خلصت محاضرته ..

حور: هاي شبيج اليوم عدنه طبك محاظرتين..

بنان: يبووو يعني منخلص .

حور: هسه خوش نترزل لان محاضرين اول محاضرة ...

فات الاستاذ وكفنه ، وكعدنه . بدون ميحجي لان هو بس اول محاضره يسلم ...

بدة يشرح ، واني احوص ، الملل يبو شيخلص المحاضره ...

خلصت بطلاع الروح صارت عشرة وربع طلع الاستاذ والطلاب طلعوا وراه ...

حور: بنان ما انزل ترة ..

بنان: اني هم مابيه حيل ، بس رونق شلون ..

حور: هسه تخلص محاضره وتجينه ..

وصدك ورة خمس دقايق فاتت تضحك ...

رونق: شعجب لكيتكم هنا ...

حور: يمعوده بين مننزل باديه المحاضره ..

رونق: اي صدك ...

اني وحور لغات قسم انكليزي الاختصاص ، اني دبلوم فرنسي وحور دبلوم اسباني ...

ورونق ، اختصاص فرنسي ، دبلوم انكليزي .....

هاي طبيعه دراستنه ، ندرس الاختصاص بلغه معينه وناخذ دبلوم لغه ثانيه ..

كعدنه نسولف وصارت وقت المحاضره راحت رونق .

واجه الاستاذ الثاني ...

وهيج كمل اليوم ...

خلص الدوام وطلعنه ، نزلنه جوة ، ...

حور: يااا هاي شنو مطر شلون راح نروح ..

(جان شهر ال ١٢)

بنان: ننتظر بالنادي على ما يخف ونطلع ..

حور: ولج كاعد تزخ ، امشي نروح منو يكول تكطع ...

بنان: والله ما امشي منا لهنا ، هدومي تتبلل ، واليوم على حضي لابسه قصير ....

اني ورونق سفور ، حور محجبه ...

رحنه كعدنه بالنادي .. اتصل حسن ...

حسن: ها وينكم ..

بنان: مطر شلون نجي.

حسن: يعني متكدرون توصلون ..

بنان: لا والله وين الطلاب كلها محبوسه بالنادي ...

حسن: يلا متانيكم بس لتتأخرون، عندي شغل ..

بنان: لا منتأخر..

رونق: والله خطيه حسن شكد يصبر علينه ، هذا لو ابو خط ثاني جان عافنه وراح ..

حور: اي مو لسواد عيونه صابر ، وتغمزلي ..

بنان: شنو قصدج حور..

حور: مبين يحبج ، عيونه فاضحته وين مترحين عينه وراج ، وشنو تريدين يكلج صار ..

بنان: حبيبتي بحكم الاخوه وربينه سوه تشوفيه هيج ، اله هو حتى ويه خواتي نفس التصرفات ، ليروح بالج بعيد..

حور: نشوف ، الايام تبين اني صح لو انتي ...

رونق: هسه يحبها ميحبها مشكلته ، اهم شي هيه بنان ماعدها مشاعر تجاها ، شلون تقبل بيه...

حور: والله هو خوش حسن ، ميتفوت شاب حلو وخريج شتريد بعد .وفوك هذا ابن عمها وحايط على حايط وتعرف اخلاقه شنو وبيت عمهة يموتون عليها..

بنان: لعد اذا تعرفين هيج متنصحين نفسج ، مو ابن عمتج قاري فاتحته عليج ليش مترضين بيه وتحاولين تحبيه وتمشين حياتج ليش يوميه عركه ومشكله وجايه تبجين..

حور: اني اختلف اني انجبرت وتعرفين وضعي كلش زين ماله داعي اذكرج...

بنان: خلص اللي جرى عليج، ماريده يجرى عليه ، اني اذا ما احب ما اتزوج ...

رونق: والله صح حلات الزواج ، اذا بده بعلاقه وتوج ، بحب وزواج ...

حور: شو سكتن عفيه امهات الحب ، ابويه وين يمشي عنده هذا الحجي..

بنان: عمو زيدون مينجرع هههههه .

حور: اوووف هالزيدون موتني ...

استمرينه نسولف الى ان وكف المطر وطلعنه رحنه للخط ...

وصلنه البنات واني اخر وحده ..نزلت وفتت للبيت

ماكو احد هدوء الكل نايم ، لان شته ودنيا الضهر ...

بس الاكل على الجوله محطوط ، ماما معتزه بيهن من زمن بيبي ام بابا ، لحد الان تستعملهن ....

غسلت ايدي ، صبيت غده تغديت وصعدت بدلت ونمت والنومه نووومه ،للسبعه المغرب ، كعدت اخذت موبايلي ولبست روب شتوي فوك التراك مالتي وبوجهي لبيت عمي ...

احنه عدنه بس هذا العم ،اخو بابا، وعلاقتهم شنو اكول عنها شلون اوصفها قليل ، بحيث هلكد ما ناس تحب ناس ، من توفه جدي وقسمنه البيت فتحنه باب بيناتنه من الطرمه ، عبالك بيت واحد نروح عليهم ويجون علينه ...

فتت للهول ماما تصلي المغرب شافتني وكامت تكبر

الله اكبر ، الله اكبر وتأشر ..

بنان: ناسيه شي على النار ..

الله اكبر وتأشر براسها لا ...

اعلك الضوه مال الطرمه ، هم لا

اطفي الماطور ، هم لا ...

اطلع لحم مثروم حتى يحل هم لا...

وتخنزر ، من شفتها خنزرت كعدت ، يعني موضوع جاد

عفيه الامهات ، كل السوالف تجيهن بالصلاه ، وهااا لازم نفهم ، ال الله اكبر شنو تعني ،

واذا مفهمت ، اكل طن رزاله ...

الام: شبيج غبيه متفهمين مو اكلج اوكفي لترحين اريد احجي وياج...

بنان: شمدريني يا امي والله مفهمت عليج عبالي ناسيه شي على النار ...

الام: لا مناسيه ، وين رايحه ...

بنان: يم روند ...

الام: وليش متجي يمج هيه، ليش انتي ترحين ..

بنان: شنو ليش ، شنو الفرق اذا اني رحت لو هيه اجتني ..

الام: لا اكو فرق هيه ممهتمه للدراسه، وانتي ، صارلج شهر مشفت بيدج ملزمه لو كتاب ، شنو ميدرسوكم ، شعندج مداومه لعد...

بنان: فدوة رحتلج يوميه هاي القوانه تنعاد، ادري ياماما اني قابل مدرسه ولازم اقره يوميه ، احنه بالجامعه نختلف نقره بس باالامتحان...

الام: عمت عين الجامعه اللي تلفي هيج شكولات ، كومي ، اذا صار براسج خير اكص ايدي..

كمت بستها من راسها ..

بنان: فديت العصبي اني والله...

الام: باعي اليوم اخوج حجه عليج وضايج منج حيل..

بنان: منو غسان

الام: اي

بنان: ليش ؟؟؟

الام: يكول شنو سهرانه الليل كله وسوالف وضحك ..

بنان: قابل ويه صديقي ، غير البنات خابروني واخذتنه السوالف ..

الام: ليش متشبعن سوالف ولغوة بالدوام ، تكملنها بلبيت ...

بنان: اي والله ماما منشبع ، ومرات نتذكر موقف ونتخابر نسولف بيه ...

الام: عود من يجي اخوج هيج كليله .معليه اني

بنان: فدوة لكلبه غسان، وين اكو مثله اصلا تلكيه سألج سؤال وانتي كبرتي السالفه ههههه..

الام: كومي بنان من وجهي احسلج ..

بنان: يلا رايحه ...

ضحكت وطلعت ....

اعرفكم على عائلتي ...

بابا اسمه سالم يشتغل بالشورجه ، عنده محلات ٣ يبيع جمله هو واخوتي لازميهن ...

بابا من النوع ، هادئ ومتفهم لابعد الحدود ، بس يم الغلط لا تلكوه يلبس وجه ثاني ...

فتارك القياده لماما ...

ماما حبيبتي ، صح ناطيتنه الحريه الكامله الي ولخواتي ، من ناحيه نلبس براحتنه ، نطلع ويه صديقاتنه ، يجونه للبيت نروحلهم، بس بحدود ...

وتراقب دائما ، تاخذ موبايلي تفتشه . مرات اول ما افوت للبيت تاخذ جنطتي تفتيش. اني وخواتي ..

تكول كلشي يصير ، اني عندي ثقه بيجن بس ماعندي ثقه بلبنات ، خاف وحده تقشمركم شي.

وتحب حور ورونق ، لان تعرفت على امهاتهن واجتي ويايه اكثر من مرة من اروحلهن ، المهم ناس تعرف اهل ناس .لهذا مأمنه بيهم ....

اخوتي ٣ غسان الكبير وسيف وكرم

اني اجيت من بعد سيف يعني كرم اصغر مني بسنه ..

وخواتي ، ٢ اصغر مني .رفل ورفاه

.....

رحت لبيت عمي ...شفت مرت عمي بالمطبخ بوستها ..

بنان: هلو عمه حبيبتي ..

مرت العم: هلو بنونه شو تأخرتي اليوم يلا جيتي ..

بنان: متعرفين ب اسماء من تلزمني محاضرات ..

ماما اسمها اسماء ..

مرت عمو اسمها ، جنان ...

جنان: والله حقها هسه الوكت مو امان ، اني هم لو روند كليه هم اخاف عليها اضعاف امج ..

بنان: هاي ماما من احنه وصغار هيج مو جديده ..

جنان: امي انتو بنات وتخاف عليكم ، زمنه اغبر خوما مثل قبل ، تأمنين بسابع جار ، هسه الاخ يغدر ب اخوه..

بنان: والله صحيح ، لعد روند ماكو وينها ...

جنان: راحت ويه حسن تجيب ملازم ، بس بيها تشتري ومتقره ، عاد بس تطلع السادس وتخلصني هاي ثاني سنه تعيد...

بنان: تخلص وتصير سوالف ..

جنان: الله يسمع منج ...

كعدنه نسولف اني وعمه ، كلش احبها وهيه تحبنه ..

بيت عمو احمد عائله خفيفه ماعدهم بس حسن الكبير
وروند ، وبعد مصار عدهم ابد ، شكد راجعوا اطباء
رادو ماكو مصار ، تالي كعدو وسكتو كالو هاي رحمه عدنه تمن ومركه شنريد بعد هههه الولد تمن والبنيه مركه...
....

هسه اجه الدور اعرفكم على نفسي ..

اني اسمي بنان ، معنى اسمي ،اطراف الاصابع
وتعرف صاحبه هذا الاسم دومآ بالصفات الجميلة...

من كبرت وسألت ماما ليش سموني بهذا الاسم ..

كالت هلكد ما ايدج حلوة ولونها وردي ، ابوج كال اسميها بنان ....

ولو اني مقتنعت بالجواب، لان ابن نفاس وين يبين وجها من كفاه ، جنه كتكوت مهلس ...بس مشيتها ...

اني مواليد ، ٨٩ تاخرت بالدراسه ، سنتين

رسبت بالثالث المتوسط لان ما ادخل بكلوريا ..

تأخرت عن اقراني بسنتين ...

بسبب احب اللبس والمودة والطلعات والضحك ،
ابد ما احب الشي الجدي بالحياه..
لهذا بالي مو يم الدراسه ابد

كلشي اخذه بضحك وعلى نياتي ..

عدوي اللي اعرف بيه يكرهني ، اضل احاول وياه الى ان اخليه يحبني واكسب وده ، احب اكون صداقات .

واحب اتوسع بعالمي ، ابد ما احب اتقيد بعلاقات بسيطه ، بس بسبب حور متقبل تدخل بيناتنه بنات ، لهذا اني ممصادقه غيرهم هيه ورونق ...

صعدن لمرحله الثالث سويه وجانن صديقات من الابتدائية واني انضميت الهن ...

المهم اني طولي ١٦٤ وزني ٥٩ بشرتي لا بيضه ولا سمرة

شعري اسود ، وعلى طول اكصه قصات قصيره

ما احب الشعر الطويل ...

شكلي بدون مبالغه اشبه الممثله السوريه دانا جبر

نسختها حسب ما الكل يكلي حتى بالجامعه هم كلولي

كملنه العشا اني وعمه جنان ورة شويه اجوي حسن وروند ..

روند: هاا ولج تأخرتي مريت عليج عبالي تجين ويانه نفتر شويه ، تالي عمه كالت نايمه ...

بنان: اي والله نمت نعسانه كلش واليوم جان متعب بشكل..

تباوسنه وكعدنه نسولف ...

اني وروند صداقتنه من عمرنه خمس سنوات بدت ولحد الان ...

اني وياها نفس المواليد ..يعني جانت روند صديقتنه الرابعه .
جنه فريق اني وروند وحور ورونق ...

بس السادس هيه تأخرت بيه هم متقره مثلي بس الفرق اني شمرت نفسي على الدراسه وطلعت معدل ٧٥ ،بس بالانكليزي ، ٩٥ ، لان جنت شاطرة بيه واسمع اغاني اجنبيه هووواي واشوف افلام بدون ترجمه لهذا لغتي قوت كلش ....

اني والبنات اتفقنه شكد ما نطلع معدل نقدم نفس الكليه حتى متضيع لمتنه وفعلا معدلاتنه متقاربه وطلع النه نفس القبول ، كلش فرحنه بوقتها....

صارت الساعه تسعه ، من بعد سوالف وضحك ، وتعشيت بيت عمي ...

حسن: بنان ، عمه تريدج تكول مو كافي ههههه...

بنان: والله عمتك خبلتني ، هسه ماكو غير بنان تطارد وراها ، مو عدها رفل ورفاه ...

حسن: امشي عوبه نامي من وكت ، موباجر تشتليني نص ساعه اعوفج والله ...

بنان: لا بله يعوفني سويها وشوف شسوي ...

حسن: امشي لج شتسوين يعني ..

بنان: ابسط شي مي بارد واسبحك بيه بهالبرد ...

حسن: عيديها يا بنان والله اموتج عبالج ناسيها الج ، اطلعها بيج بس صبري...

بنان: ههههه يلا تصبح على خير وباجر نلتقي ان شاء الله ...

حسن: واصبح بهالوجه عوع ...

بنان: يا فدوه وانت تطول ...

حسن: امشي مغروره على شنو شايفه نفسج ...

طبعا نحجي شقه وبالضحك ...

بنان: امشي عيني رشدي اباضه اللي يشوفك يشبع ...

حسن: يروحلي فدوة هذا شنو وتشبهيني بيه .

بنان: وين مشبهتك انت لو تشبها جان هسه كتلت روحي عليك ..

حسن: امشي ولي لج ،يلا اروح انام تعبان ورايه كعده من الصبح ..

بنان: هههه يلا تصبح على خير ..

حسن: وانتي من اهله ...

رجعت للبيت بابا جاي والولد ، كلهم ملتمين سلمت وكعدت سوالف وضحك صارت العشره صعدت ...

فتحت الكنتور شلبس باجر ، المعاناه يوميه تتجدد ...

كومه هدوم واصيح ماعندي واكعد مطنكره ...

طلعت بلوز وبنطرون وكوت قصير ..

مسحت البوت مالتي ، وحضرت الجدول وحولت غراض جنطتي لجنطه ثانيه ، ولزمت الموبايل ، ويه البنات سوالف ومراجعه للصار اليوم ، طبعا هنه يقرن يوم بيومه مو مثلي بس بالامتحان اقره ، وشكد يحجن ويايه واني ما اتغير ، يعني بين قوسين الحجي يفوت منا يطلع منا ....

كملنه سوالف ونمت ، كعدت على صوت المنبه ..

طفيته وكمت كوه ، غسلت وجهي وفرجت اسناني وبدلت ..

لازم ما اتأخر لان البارحه متأخره لازم اكسر واجبر ...

طلعت حسن واكف ويتثاوب مبين نعسان ...

بنان: صباحووو

حسن: شعجب لازم اليوم عيد ...

بنان: اهوو ، صوجي لو متأخره مو احسن ...

حسن: شيخلصج من حور والله تموتج ...

بنان: هههه صدك اني بسببها كعدت وبدلت سريع ..

اخذنه البنات وانطلقنه للجامعه ...

علكت المسجل ، طلعت اغنيه مال محمد السالم ...

حسن: غير ذوق هذا ديريه يمعوده ، شبيه هذا يغني لو يعيط ..

بنان: يا فدوة تغار من صوته حمودي يجنن ..

حسن: هو هذا جيلكم يسمعلي محمد السالم ، وين ايامج ام كرثوم ( عود ام كلثوم )

بنان: كرثوم لو كرفس ...هههههه

حور: هههه يمكن مشتهي خضورات وباله يم الكراث ههههههه

رونق: ادري قابل طلي هو هههه

حسن: ها مخبلات استلمتني بسيطه ...

بنان: اسكت اسكت ابو كرثوم ....

وهيج نخلص الطريق ضحك وسوالف ، الخط ونسه من العمر ، خصوصا اذا صديقات وابو الخط عرف ...

وصلنه للجامعه ....

حور: اليوم متتريكين بنان، عدنه كوز اول محاضره ( امتحان يومي )

بنان: لا والله بس اجيب كابتشينو. راسي يكوم يأذيني ...

حور: صاعده قبلج ...

بنان: ماشي ،

صعدو واني رحت اشتريت كابتشينو وطلعت دك موبايلي طلعته مدنكة راسي واريد ارد وانصدم بواحد ، واندار الكابتشينو على قميصه ....

رفعت ايدي وشهكت

بنان: اسفه اسفه مو قصدي ...

_ ول يابه ثوله ما تشوفين ، دمرتي ملابسي ...

بنان: مو بالقصد عفوا ،

فتحت جنطتي وطلعت كلينس مرطب ..

بنان: هاك امسحه هسه يروح ..

_ ماريد ...

هو عنده كلينس وبده يمسح بالقميص وضايج طاكه روحه ...

اجه صديقه صاح عليه ..

_ ها صميم تأخرت ...

صميم: هاي الثوله ،شوف شسوت ...

بنان: ليش تتجاوز قابل متقصده وبعدين اني اعتذرت منك ...

صميم : زيحي ( وخري) من وجهي ...

وعافني وفات ، ضليت باهته شبيه هذا شكد ماعنده ذوق .....

يتبع ....

مساء الحب والعافيه على عيونكم

اليوم نشرت الكم البارت الاول .