نهاية الجزء الاول
# راهب ابو غضب
اني مامحتاج تبجي
اگبالي لوتعتذر مني
ماتفرحني دموعك
لوبجيت يزيد حزني
بالعكس خليك انته
اليحبني والجرحني
گلبي ماينطي اجرحك
رغم كل الصار بيه
عيش واتونس بيومك
عوفني بدونك ضحيه
انته حساس واعرفك
ابد ماتحمل اذيه 💔
،،،،،،،،
راهب ابو غضب
بقلم زهراء الحسناوي
،،،،،،،،
لارا،،طلعنه اني وفاطمه مفزوعين
الصوت جاي من غرفة غزل فاطمه دخلت واني واكفه بالباب اباوع الراهب دفعها وجر ايهم من جواها خشمه بي دم
عمتي لطمت علئ وجها وغزل تبجي بهستيريا اتريد اتجرة من ايد راهب دفعها واخذة منها حل گماطه والحضينه مالته الطفل عبالك متخشب
رفع ثوبه وصار يسويله تنفس ويضغط علئ صدرة وكل شويه ينفخ بحلگه
غزل عيونها جاحضه علئ ابنها من شافت مابي استجابه بيد راهب ماانحس غير لطمت علئ وجها بثنين اديها
راهب اخذة شايله يركض بي واكماطه يسحل بالگاع
الحجيه عباتها بيدها صعدت وياه حطت الطفل بحضنها
بمجرد ماصعدت شخط السيارة
رجعنه الغزل الجانت فاقدة تلطم علئ وجها بثنين اديها ملخت روحها اتصيح
غزل، ،انيييي كتلته اااني موتت ابني بيدددي
فاطمه. ركضت لزمتها انريد نفهم الطفل اشبي
غزل،،والله رض رضعته و وحطيته بكاروكه
مااذكر. اشلون ج جبته ورضعته واني نايمه
ولجن گعدت اريد ارضعه لگيتته جواااااي خانگته ماادري بي
لارا،،جسمي ارتعد نايمه علئ ابنها ماتدري بروحها مخليه صدرها بحلگة وغافيه ماخذتها النومه ومگلوبه فوگه بحيث ساعتين هو جواها ماتدري بي لمن نزف خشمه
بقت تفتر واحنه وياها نبجي كل شويه واتصلت براهب مايجاوب وهي منهارة اني ماعندي غير دموعي ودعائي ادعي الله يرجعه لحضن امه كون يطلع كلشي مابي
ورة ساعه اتصل راهب جاوبته ملهوفه الابتسامه شاكة حلگها كل ضنها تسمع خبر يفرحها
تالي ذبت الموبايل بحضنها وعاطت بصوت دوة بالمنطقه
غزل،، يبوووووووو
ماااات ولجن ااابني ماااات
كتلته كتلته كتلللللته
لارا،،فاطمه لازمتها وهي تمعش براسها واتكوم الشعر بحضنها
الناس فزعت علئ صوت العياط الجيران كل واحد صعد سيارته ولحگ راهب للمستشفئ ونسوانهم ضلن يهدن بغزل الكتلت روحها
للساعه 6الصبح ياالله رجعو انفتح الباب ودخل راهب ضهرة محني وعيونه دم والحجيه تسحل بروحها وراه اتگود بيها ام قاسم عبايتها كلها اتراب
گمزت غزل ركضت علئ راهب شمرت روحها جوة رجلي منضرها كسر خاطري
غزل،،وووينه رااهب ابني ويين وديته ?
راهب،،دفننننته واجيت
لارا،،نامت غزل نيوم بالگاع تتگلب مثل الطير المذبوح
تلطم واتصيح صدري يدر ولللك يمممه
الحجيه،،ايهممم اليوم خطار يمك يضياااااء
لارا،،كزبر جلدي كلها ضجت تبجي نسوان وزلم اكثر الناس ماتدري راهب متزوج وعندة طفل عبالهم بس اني
للساعه 8راحت العالم وبقينه بس احنه وام قاسم وسارة
غزل ماگعدت تلطخ راسها بالحيطان فاقدة فد مرة وتهذي بحجي مامفهوم
غزل،،ال الله ع عاقبني كتلت ابنها اخذ ابني
كتلت ابن لارا اخذ بمكانه ايهم
لارا،،تحجي بصوت ناصي وتشهگ راهب رفع راسه باوعلها اجه يمها جرها من زندها
راهب،،عيدي شنو حجيتي?
غزل،،اااي ااني اني اني كتلت ابنها ماردت غير ابني يشيل اسمك ماردتها بحياتك ردت اخلص منها
لارا،،واكفه بمكاني مصدومه من كلامها
خرطت الاول والتالي بدون وعي فاقدة
غزل،،ااني بيوم ال الرحت اجهز. للطفل
م مريت ب بالعطار ج جبت اعشاب
ح حطيتهن ا الها بالعصير
لارا،،وبلحضه راهب جرها من شعرها يعت بيها مقربها من وجها
راهب،،شنوو انتي ولج شنوو انتي شيطااااانه?
كتلتي طفل الخاااطر ترضين نفسج شوووفي اشلون الله بالمرصاد اخذ ابنج بمكااانه
لارا ماشاافته ولاشمته ولاحطته بحضنهاا مثلج
رادج اتشوفي وتشمين ريحته حتئ يحرررگ گلبج بيييي يااحقيرة
لارا،،دموعي نزلن لازمه ايد سارة حيل گوة خلصتها ام قاسم من ايدة كل شويه يريد يرجع يضربها
ماانحس غير وگع بنصنه خشمه يجري دم
ضغطه مرتفع دخل قاسم بسرعه سندة يريد ياخذة للمستشفئ بس رفض ماقبل
تالي راح البيتهم يركض جاب جهاز الضغط واجه قاسه الراهب طلع صاعد فد مرة
انطا حبايه مدرر جابتله فاطمه طشت وماي غسل وجها
فاطمه سالت عمتي ع الصار بالمستشفئ
الحجيه،ييمه ياايهم يايمه يالزغيروني
لارا،،المرة منتهيه اتعلقت بي كلش النهار كله بحضنها تناغي بي
بدة تحجينله اشلون الاطباء رادو يشرحو بس راهب ماخلاهم كالهم امه منيمته يمها ترضعه ونسته ونامت اختنگ جواها
الحجيه، ،اخذنا وطلعنه الوادي السلام دخلت ويه الوادم للمغيسل ولجن حطا ع الصخرة يگلب بي المغيسلجي
ع الصخرة واني فاتحه شيلتي انخي الله يردة ليه
كل شويه واگله حبوبه فتح عويناتك الحلوة
ولجن ع الصخرة ويبتسم ماميييت ماااميت اليشوفه يگول يضحك ماميت بعدة
لارا،،تحجي وتبجي بجتنه وياها فاجعه رحيل ايهم كسر الكل يوميه صوت صريخه تارس البيت من يجوع ع الممه يضل فحطان حتئ غزل انتبهلها ترتبك من البجي مالته تصير ماتندل دربها كلساع وتوگع الممه من ايدها
اباوع الراهب ادي علئ عيونه وقاسم كاعد يمه علئ اركبه
يفرك بكصته نهض راد يوگع سندة قاسم
راهب،،ماااالج مكااان اهنااا اطلعي برررة بررررة
لارا،،جرها من ايدها يسحول بيها وقاسم مجلب بي يريدة يعوفها وهي فاقدة تبجي بصوت عالي گوة بعدة قاسم عنها
للضهر صارت تجي العالم تاخذ مابخاطر عمتي والمرة علاج السكر والضغط يمها كل شويه واگول راح تنجلط
بليل اجو جماعة راهب من سمعو بالخبر
ماراح الخطار غير ل 10بليل
غزل دخلت الغرفتها كوة. تمشي رغم السوته بيه بس ماتمنيتلها يصير بيها هيج بالعكس صرت ابجي وياها بنادم من يغوي الشيطان يخلي يسوي المصايب بدون تفكير
ل 12يالله صعدت الغرفتي راهب نام بالاستقبال
ادري مايگدر ينام اليوم مرتين باوعتله من الباب اشوفه نايم ع القنفه منطي ضهرة للباب اشوف بس متونه تهتز يبجي بخنيگ بدون محد يسمعه
مااعرف بذاك اليوم انقهر علئ منو ?
علئ حالي الدمروني راهب وغزل
لو علئ راهب الفقد ابنه لو علئ ايهم الي ماعاش بالدنيه غير ايام معدودات ردت اغمض صورته ابالي ملمس خدة وعطرة من بسته
بقيت للصبح ابجي بفراشي
اتخيله تتغير ملامحه جوة التراب تروح خدودة المدنفشات وملمس جسمه الرطب
دموعي ماسكتن امسح وحدة ينزلن عشرة
نزلت ب السبعه واني ماشفت النوم ابد
صار بوجهي راهب گاعد بالصاله مرجع راسه ع الحايط يباوع للفراغ
انقهرت علئ منضرة تركته ورحت للحجيه لگيتها شادة راسها بالبيرغ الاخضر ودموعها بعينها وجها تعبان كلش
كل شويه وبللت شفتها ادري سكرها مرتفع
سويتلها جاي وخبزة شعير جبتلها
اكلت لگمه علمود العلاج ودفعت الصينيه
كعدت فاطمه والحجيه كالتلها فوتي علئ امه شوفيها شو مالها حس
شويه واجت فاطمه گالت امه موبالغرفه
الحجيه گامت حطت اديها بالگاع ونهضت روحها
راهب يباوع للباب بعيونه صفح مامهتم لختفائها
دورناها بكل البيت مالها اثر ملابسها علئ حطتهن
بس موبايلها ماخذته
دگ عليها راهب بعد ملحة عمتي جاوبته تبجي
گالتله اني بالمقبرة ولاتنتضرون جيتي ايهم وراح الله عاقبني بي ونلت جزائي
لهنا هذا حدنه ردتك بالحيلة والمكر
ونسيت قول الله سبحانه وتعالئ
بسم الله الرحمن الرحيم
واذا يمكر بك الذين كفروا ليثبتوك او يقتلوك او يخرجونك ويمكرون ومكر الله والله خير الماكرين )
صدق الله العضيم
بيومها مارجعت غزل عمتي شگد لحت علئ راهب حتئ يالحگها بس رفض گالها خل تعيش ويه الذنب كتلت طفلين بشهر واحد
يوم ورة يوم يمرن والحزن مخيم ع البيت لاكو نفس للاكل ولاللحجي ولا الكلشي
الكل ساكت ماكو صوت
ماينسمع بالبيت غير صوت القران وكت المغرب
طلعت غزل من حياة راهب نهائيا ماينجاب طاريها
بس بقه ذكر ايهم غصه بگلوب الكل ياهو اليذكرة تدمع عيونه مع العلم هو بعدة طفل انفاس بس گدر يكسر الكل برحيله
تعبت من الحزن والقهر ورغم كل الصار مانسيت سالفة راهب وزعلي وياه
ردت اعوف كلشي وراي وارجع لهلي
اسبوعين ورة موت الطفل فاتحت عمتي بالموضوع گتلها عمه اني هذا حدي ويه التعب اريد ارتاح وراحتي بطلاگي
الحجيه،،يمه اذا الي معزة عندج اتركي الموضوع هلفترة راهب توة دفن اوليدة وانوب يخسرج ماراح يتحمل ويموت بقهرة
لارا،،الكلييات صار شهرين من بدة الدوام بس بعد الصار قررت اترك السنه لان نفسيتي حيل تعبانه
بعد كلامي ويه عمتي قررت اسكت فترة بين ماينسئ راهب
طلع اربعين الطفل وراهب اسبوع ينزل مجاز واسبوع يلتحق وجودة وعدمه واحد من ينزل للبيت مايبقئ يضل بره هو وقاسم مايرجع غير نص الليل وسارة اتگول قاسم مايگدر يترك صاحبه يخاف علي
رجعت فتحت الموضوع ويه عمتي گتلها اريد اروح لهلهي صار اربع اشهر ماشايفه ابوي ومن تركته جان حيل وضعه تعبان اريد اروح اشوفه
وصدك من حجت ويه راهب رفض گالها بعدين موهسه
بعدها عرفنه راهب طلگ غزل عمتي گالت لگاها تشتغل بالامام الكاضم بقسم التنضيف
بداخلي كلت سبحانك يارب موت ابنها دلاها طريق الهدايه كان السبب بتغير امه وابتعادها عن حياة الليل واللهو
اسبوع وهم حجت وياه عمتي وهم رجع رفض
لمن سويت اضراب عن الاكل وخلصتها بجي ياالله اقتنع كال للحجيه من التحق اخذها وياي
وبيوم مستحيل احداثه تنمحي من ذاكرتي
لبست واني فرحانه واخيرا راح اشوف ابوي مشتاقتله
الفجر حضرت نفسي
لبست واخذت جنطتي وطلعت لگيته يشرب جاي ترك الاستكان ع الميز وطلع للسيارة كدامي لابس الزي العسكري فتحت باب الكشن الورة وگعدت
حرك السيارة وطول الطريق ماحجه شي اثنينه ساكتين
حتئ ماوگف بالطريق جان يمشي سريع
ب التسعه الصبح دخلنه بغداد احس ردتلي روحي من شميت ريحة ولايتي
جله صوته بعد سكوت طويل
راهب،،شوكت اجيج?
لارا،،منو گال راح ارجع?
راهب،،لارا ترة تعبان واهدومي احسهن اثگال علئ جسمي راح احجي واسمعي حجايتي زين
من انزل مجاز امر عليج اخذج
لارا،،درت وجهي للجامه ابتسمت ب استهزاء واثق من نفسه
مد ايدة بيها جهاز موبايل جديد
گتله شنو هذا?
راهب،،بمكان جهازج ذاك وحطيت خطج نفسه بي
حتئ من اريد اجي اتصل عليج
لارا،،اخذته من ايدة حطيته بالجنطه مابيه اتناقش وياه وتالي هو اليربح
وصلنه الشارعنه انخمش گلبي واني من بعيد اشوف هوسه اباب اهلي
اتمنيت اطير واوصل يمهم ولاجنها دقيقه واوصللهم عبالك بعيدة عنهم بمسافه ساعه
ماصدكت شوكت توگف السيارة ابابهم
فتحت الباب ونزلت اركض مرعوبه دفعت النسوان وفتت علئ صوت صريخ امي
وهي تصيح بااسم ابوي
رفعت راسها شافتني جامدة بمكاني مابيه امشي واوصل يمها مامصدكه الجاي اسمعه
ابوي مات?
فتحت اديها تريدني اروحلها مااتحملت گعدت بالگاع
رجع صدري احس بي نار تحرگني وهلمرة اقوه بهووواي من كل مرة
وگعت بالگاع راسي ع الكاشي مفتحه عيوني اسمع صريخهن
ومن ضمن الاصوات صوته اي هذا صوته صوت راهب
بعدها غمضت ماادري شصار وراها
احس روحي بعالم ثاني عيوني اثگال مااگدر افتحهن صوت ناس تحجي يمي بس اسمعهم مااشوفهم
اريد افتح مااگدر عيوني اثگال
اكو شخص فوگ راسي يحجي فجاة صار بعيوني ضوة قوي سديتهم حيل ضايجه من مصدر الضوة عماني
رجع فتح عيوني حيل كدرت افتحهن شفته رجال لابس صدريه عرفته دكتور
بقيت احرك بعيوني داير مدايري شفت بس سجئ مرت رافد فوگ راسي لابسه اسود
دنكت باست راسي
سجئ،،الحمدالله علئ سلامتج حبيبتي
لارا،،عرفت روحي بالمستشفئ بس منو جابني ومن شوكت اهنا ماادري
سالتها ووريگي ناشف بللت شفايفي وحجيت
اشگد صارلي اهنا?
سجئ، ،اليوم رابع يعمري
لارا،،اتذكرت ابوي انهضمت وبجيت بصوت عالي
صرخت بعلو صوتي
باااابااا حبيبييييي
سجئ دنكت ضمت راسي بصدرها لازمتها ادفع بيها اريد اگوم اجه نفسه الدكتور ضربني ابرة بعدها رجع نمت ماادري بروحي
صحيت بعد فترة وهلمرة محمد ورافد موجودين
سمعت الدكتور يوصيهم لازم ابقئ بمكان وحدي مااحزن ولاانقهر ويرادلي راحه
انصدمت من گال متعرضه الذبحه صدريه واذا بقت حالتها هيج احتمال يتازم وضعها ويصير عدها جلطه
خمس ايام اني داخله بعدها طلعوني اخوتي للبيت
العصر نزلت اباب بيتنه اختنگت اتمنيت اشوفه قبل مايموت حتئ ماحضرت فاتحته
رافد باس راسي مادخل للبيت ضل برة ومحمد سندني دخلني جوة عرفت رافد سامع احجاية من امي ومايفوت للبيت
اووف ياامي حتئ بهذا وضعنه بعدج علئ نفس طبعج
صعدوني الغرفتي امي ومحمد نيمتني بفراشي دمعتي بعيني محمد كل شويه ويبوسني يگلي شگال الطبيب موگلنه كافي بجي
حقدت علئ راهب فوگ حقدي قاطات كرهته وحملته السبب بموت ابوي والسبب بمرضي والذبحه الاتعرضتلها
حملته سبب كلشي صار بحياتي لو ماهو جان ماصار ولاشي من المصايب المريت بيهن بسبب حقدة
ايام مرت واني متقوقعه علئ نفسي
تعبت من العلاجات
احس روحي بهاي السنه خلصتها خاتله مااطلع من جنت يمه وحتئ ابيت اهلي بغرفتي نادرا انزل لان حمامي فوگ
بعدين عرفت من محمد راهب الي داخل شايلني بنص النسوان وماخذني للمستشفئ خمس ايام وهو گاعد اباب المستشفئ يتعاركون وياه اخوتي بس يهددهم بالفيديو مال محمد اعرف يسوي هيج حتئ يضل مايحجون وياه
بس اخر يوم متضارب هو ورافد وبعدها تارك المستشفئ،
يوميه واني اشوفه يتصل الف مرة باليوم وكل دقيقه يدز رساله شكل يريد بس يطمن علئ صحتي
احس گلبي صخر خلص ماتت لارا الضعيفه تركتها ابيت راهب دفنتها اهناك
اليوم اني وحدة ثانيه انولدت من الحقد والكره والقوة
جنت اتلذذ من اشوفه يتعذب يشوفني اقرة رسائله ومااجاوبه
احس روحي اصير قويه اكثر من اشوفه يتوسل وتعبان بدوني
طلع اربعين ابوي اتعشت العالم وباجر الصبح نروح للنجف للمقبرة
صعدنه اني وامي. وخالي سعد ويه محمد ورافد طالع گدامنه بسيارته هو ومرته
وصلنه للنجف ب 8الصبح دخلنه للمقبرة نزلن دموعي
صعبه عزيز جان عايش وياك ويجي يوم تجي للمقبرة اتشوفه لان هذا مكانه النهائي خلص واراه التراب وصار بيته الجديد الگبر
بيت ماياخذ بي غير اعماله بحياة الدنيه
اتفجائت من شفتة دافني يم قبر عمي ضياء بس قبر ايهم بنصهم
والعرفته من محمد هاي وصيته يندفن يم اخو
بجيت وفرفحت وسجئ اتجر بيه اگلهم عوفني راح وماشفته ولاودعته ادري مات بحسرته علئ شوفتي
شالوني اخوتي شيول حطوني بالسيارة
حتئ الرجال اليقرة ع القبر صار يبجي علئ بواجيي ودموعي
بعدها رحنه زرنه الامام علي فدوة ل اسمه اتذكرت من اجينه بعيد رمضان سوة كرهت كل ذكرة الي وياه
مرة ايام وشهور يحاول يوصلني واني رافضه مرتين اجه للباب اتعارك وهوس وفضحنه بالمنطقه يتعاركون وياه اخوتي توصل واحد يضرب الثاني
مااستسلم وگتلهم مستحيل ارجعله خل يطلگني وكل شخص يروح بحال سبيله كافي دمرني شيريد ياخذ مني بعد?
وفعلا بيومها اختنگت واتخربطت ورجع صدري يحرگني شفته يتصل جريت الموبايل جاوبته واعصابي ترجف
راهب،،لارا بس اسمعيني
لارا،،اذاااا عندك ذررة رجوله طلگني
يااخي مااريد اكرهك هي گوة خو موگوووة
دراااسه وخسرتها بسببك
اابوي وخسررته بسببك
حياتي وخسرتها بسببك
صحتي وعافيتي وهم الفضل الك بخسارتهن
مااابقئ شي اخسرة مااابقئ شي غير روحي اخذهااا وريحني
سمعت صوت شهگته يبجي وياي جر نفس وگال هذا هو بت عمي يجرالج التردي
وفعلا ثاني يوم انطانه خبر نلتقي يم سيد معمم
حتئ يطلگنه
لبست جبه سودة لفيت حجابي وطلعت ويه محمد يبوس بيه ويضحك عباله ضايجه لان راح اطلگ مايدري ضايجه علئ السنه الراحت من عمري بسبب انتقامه
رافد اتصل گال مرو بيه مرينه بي لگيناه ينتضرنه اباب بيته
بعد فترة وصلنه البيت السيد جنت احس روحي قويه
احس براهب مرض سرطان وراح انتزعه مني لان اريد اعيش اذا بقيت وياه معناتها اموت
دخلت للبيت بكامل قوتي ماعندي اي مشاعر اتجاها غير الكره
دخلت شفته گاعد يم السيد مدنگ رفع راسه باوعلي بتعب جسمه ضعفان ومتغير
دنگ بيدة السبحه گعدت يم اخوتي
بدة السيد يوصي وينصح وايگول ابغض الحلال عند الله الطلاق ومن هلحجي بداخلي اريد بس يرمي اليمين حتئ ارتاح
كمل السيد وسالنه اذا بعدنه مصرين ع الطلاگ جاوبت اني موافقه ع الانفصال ومااريدة
رفع عيونه بعيوني بقه ساكت وهو يتمعنئ بوجهي
دقايق السكوت عم المكان
غمض عيونه بتعب
راهب، ،انتي طالگ
،،،، ،،،،،،،،،،،،،
الئ هنا ينتهي الجزء الاول من رواية راهب ابو غضب
شهر ونص عشنه ويه الابطال بفرحهم وحزنهم
اتعلمنه انو الانتقام والحقد مايورث غير التعب والخسارة
خسارة ناس نحبهم ونعزهم خسرناهم بسبب سواد كلوبنه وحقدنه التارس ارواحنه ترس
اتخيلو اذا جانت الدنيه بدون نفاق بدون كرة بدون حقد وبدون ثار شراح يصير/?
اكيد حياه ماكو احلئ منها
جان ماشفنه الاخو يحقد علئ اخو ولاشفنه الابن يشمر ابو ولا شفنه صلة الرحم منقطعه
اهل وگرايب وناس يجمعنه دم واحد بس كل واحد بينه داير وجها عن الثاني نسينه قول الله والرسول عن صلة الرحم ونسينه الجنه نكسبها بصلة الرحم
عمانه الحقد دسنه علئ اشخاص مالهم ذنب
نسينه قول الله تعاله
(ولاتزر وازرة وزر اخرئ)صدق الله العضيم
اتمنئ اكون سردت خاتمة الرواية بصورة جيدة واتمنئ وصلتلكم الرساله بالشكل المطلوب
انتضروني بالجزء الثاني
مااگدر انشرة حاليا اذا مااخذ الاحداث كامله من صاحبة الرواية
بااذن الله
راح يكون اول يوم انشر البارت1/8/2020
دمتم في امان الله وحفضه ورعايته
الي يحب استاذ علي يصوت 😍
خل يشوف متابعي رفعو روايته 🤗
ولتنسون صوتو للمقدمه حتئ ترفع نسبة المشاهدات
مااگول صوج الغيمه
طاح المطر من ضيمه
عاصفه ومرت بينه
وگطعت احبال الخيمه 😥
يُتبع...