🌙حسناء القايد🌙
👑oumaima mega 👑
⚡124⚡
ايوا يا لالة غربو المغارب و شمش بدات تتغبر ....في جناح الطاووس ....حسناء مرمية في مكانها لي طاحت فيه فحال المغبية ...و تناخد فحال داك الفليليس لي تيقرب يموت ...و عينيها مغمضين و شفرانها كوحل فازكين ...و دموعها تاكرميين ...و حنيكاتها حمريين و ضربة في راسها منفوخة ... و فاقدة روحها ...شافية على برا جاية تسلت و دور في جنابها ...تخاف لا يشوفها شي حد ...مشات لدفة تاع جناح الطاووس لي مسدودة بساقطة ...و خايفة تترعد لا تحصل ...و مالت للدفة و تغوت بالهمس : لالة ؟ لالة لالة ....ملقات جواب على نداها معرفت لالاها حسناء اشنو حالها دابا بين الحيطان مسورتين عليها ....الحاجة لي عملتها بعدت شوية و تطرفت و بقات واقفة تما خديدمتها هي مغتحركش تاطمن على حالها
لتحت في القصر ...كانت دنيا تصفر و الصقيييل يسمك الودنين ...كانو غير صواات الضرب و الغواات في الجردة ....و يتسمعو في الحيطان تاع القصر ....كان في الجردة واقف سيد القايد بالكاندورة الكحلة ...و داير يدو من وراه و زين وعالي و هاز شوكة ...و حدا رجليه عبد الصمد مرمي في لرض و رجالو يركلو فييه و كولو عامر دمايات ...و فخر الدين معمي السيد حرش و اعصابو حامية ...بقاو يركلو فيه وهو يتلوى بين سبابطهم القاصحة ...تارفع فخر الدين يدو باش يتوقفو ...و عبد الصمد بدا يكحب الدم من فمو.... هو ينزل لعندو و شنق عليه من جبادور لي عمرت دم
فخر الدين كيدوي بين سنييه : توقعتك تعمل كلشي الااا تخرج ليا مرتي من دارييي
عبد الصمد غير تيكحب : راه راه راه هي لي جات عندي و طلبتني نعاونها
فخر الدين غوت في وجهو غاينهشوو حي و تتاكلو الغيرة : تعاااااونهااااا تخرجهاااا من قصريييي لي مجلسك فييه نتا و عائلتك ضيااااف هاديييي لاخرة ليييك لامشيت لقيتك تدور غير بساحتهااا غاتدفن حي و قدام عينييي ....و لاحو حدا رجلو يتلواا و ناض نافخ ريشو ...ثورية كانت خارجة الطل من الدفة على شنو واقع ...تاتيبان ليها ولدها ولا مشروط بالدمايات بين رجلين سيد القايد ....كبدتها تشواات و مشات تلاحت على رجلين فخر الدين تطلب و ترغب و ترمي العار ..فخر الدين حاشا ولي الله يخلي مرا كبيرة فحال مو عند رجليه .... نوضهااا من كتافها وقفها
تورية : شنو دار ا سيدي فخر الدين
فخر الدين : هو عارف راسو اش دار دييه من هنا ....و طلق منها و دار بالنفخة عالي يدخل لقصرو ...و ثورية من تحت رجليهم هزات ولدها و داتو دخلاتو لجناحو ...هو مبغا حد حداه ...جرا على كلشي تامن ميمتو ...و جلس يتشحن و يتعمر بالحقد ضد سيد القايد ...و مو على برا تاهيا تدعي و تزيد تكره هادو لي ديرنهم تحت رجليهم يعفسو عليهم في الوقت لي بغاو
~~~~~~~~في جناح الطاووس ...بقا حسناء على حالها مرمية في لرض ...لا حنين لا كريم فيها و شكون هادا لي عندو القدار يكسر كلمة سيد القايد فخر الدين و يفتح عليها و يشوف من حالها ...حتى تحل الزكروم و تفتحت الدفة ... و دخل عبد الصمد لجناح حريم القايد ووجهو كولو عامر دمايات و كيدور من وراه
عبد الصمد
🌙حسناء القايد🌙
👑oumaima mega 👑
⚡125⚡
و دور عينو و بانت ليه طايحة لرض مشا ليها نيشان و بدا كيململها و ينده ليها و يدور من وراه ...حتى بدات تفيق ...فاقت بشهقتها و بدات ترجع بللور و تبكيي مع الضو خافت عند بالها فخر الدين جاي يكمل عليها : هيء هيء صافي صافي الله يرحم بيها الولدين باركا هيء هيء
عبد الصمد : حسناء انا عبد الصمد
حسناء بدات تهدن بشوية و تميزو بين الظلام عاد بدات تبكي و تهرنن : هيء هيء شفتي ا خويا شنو عمل فيا هيء
عبد الصمد : تانا كان غيقتلني و دابا غاهربت من يدو قبل مايسفح دميي
حسناء تتشوف الدم مشرشر منو : تنتا تعدا عليك
عبد الصمد : ااه و هادشي كولو حيت بغيتي تمشي عند والديك و تا انا لي عونتك بغا يصفيها ليا
حسناء تتبكي : هيء هيء شنو غنعملوو دابا شنوو
عبد الصمد : ششش راه قلتها ليك بلي كلشي تيخاف منو و تيجري بشوارو داكشي لاش خاصنا نهنيو راسنا و الناس منو ا حسناء و نتي لي تقدري تعمليها ....حسناء وسعت فيه عينيها ...و عبد الصمد استغل لفرصة و جبد من جيبو القريعة و عطاها ليها : هادي لي غتهنينا من شيطانو حيت لاما تهنيناش منو حنا غيقتلنا هو انا موتي محتوم يا ليوم يا غدا و نتي لي غيخليك هنا يعدبك و يضربك تتعياي يا تقتلي روحك يا يدفنك حية فاش يسالي منك خاصك تهني روحك و تهنينا معاك...حسناء غير تتشوف في القريعة و تسمع في كلامو ...هي متقدش تقتل روح و ليني هاداك شنو عمل فيها من نهار حطت رجلها في هاد الدار يستاهل القتلة الف مرة ..كرهاتو حقدات عليه بغات تهرب منو ومن بطشو وليني عاوتاني رجعها و جرها من حزت مها تا قالت تفكات و تهنات منو ...هزت يدها بلا هواها و داتها القريعة ...تبسم عبد الصمد جنب و تسناها تا خداتها من يدو ...و هي تترعد و الخوف راكبها
عبد الصمد : مزيان دابا غنوريك كيف تنفدي هادشي بالحرف حلي معايا ودنيك ا حسناء ...و بدا تيهدر و يتكلم و يشرح ليها اش غدير و يزين ليها عمالها و فعالها ...وهي تتسمع في كلامو و هو تيوسوس ليها كيف الشيطان ...حتى عمرها و شارجاها و خلا عروقها محرشة تامن عيونها تبدلو ....وهو ناض معول عليها غتعمل بكلامو ليوم قبل غدا و ثايق فيها و خلاها و خرج فحالاتو من تما و سد الدفة بزكروم .... شافية داز كلشي على عويناتها و صدمة راكباها و هي تتشوف عبد الصمد خارج داخل عند لالها الحاجة لي عملت هي بقات واقفة و حاضية ...حتى مشا عبد الصمد عاد مشات تسلت و تحضي جنابها باش طل على لالها تا لا بغات شي ميكلة تسربها ليها من تحت الدفة ....حسناء ناضت جلست فوق السرير و تشوف في القريعة في يدها و كلام عبد الصمد يدور في دماغها و تفكر كيف غاتعملها تااسمعت الزكروم تيتحل و قفزت من مكانها تشوف في الباب ...تابانت ليها شافية داخلة لعندها تتشهد ...و هي طير عليها بتعنيقة و زيرت عليها و حيدت منها
حسناء عينها مبدلة و مشكلة بالحقد : جابك ربي مولانا ا شافية تعاونيني
شافية : اش غانعونك ا لالة منقدش نكسر كلمة سيدي
حسناء : لا لا بغيتك تمشي تكلمي ليا دادة عرشية دابا
شافية : هاويلي ا لالة دادة عرشية مغتدوزهاش ليا لا عرفتني حطيت رجلي عندك وكسرت كلمة سيدي
حسناء : عافاك ا شافية عملي فيا هاد المزية ....شافية شافت تاعيات فيها معند الميت مايعمل قبالت غسالو : واخا الالة انا غنخرج و نسد عليك الدفة حاشاك
حسناء : غاسيري ا شافية دغيا....خرجت شافية و سدت الباب و مشات طيير نزلت من درج و مشات لكوزينة ...تما العبدات جلسات يعجنو و فاخيتة منين سمعات بلي حسناء حابسها السي فخر الدين بلا ماكلة بلا شراب ...قلبها برد من جيهتها ... و بغاتها فيها ...تا خلطت عليهم شافية كانت عرشية واقفة تما : دادة عرشية
🌙حسناء القايد🌙
👑oumaima mega 👑
⚡126⚡
عرشية : اش كاين ا شافية
شافية : لالة حسناء بغاتك ...العبدات كلشي شهق حيت تكسرت كلمة سيدهم في هاد المقام
عرشية : و اش قربك نتي لالة حسناء ياك سيدي نها كل واحد يقرب من جيهتها
شافية : راه ا دادة كنت غير دايزة و كلمتني من ورا الدفة
عرشية ولات غاتقرق في عينيها : كتعملي غا المصايب زيدي قبالتي ... تمشات عرشية و من وراها مشات شافية
~~~~~~~~~~حسناء غا مزنكرة على القريعة و قلبها تيترعد بالخوف و تمشي و تجي وخدودها حومر و جبهتها متورمة ... تاسمعت دقان و كلام عرشية و هي تروم للباب
عرشية : هانا ا لالة قالو ليا ندهتي عليا
حسناء : ااه ا دادة عرشية محتاجاك
عرشية : سمحي ليا ا لالة مابيدي حاجة انا غير عبدة مؤمورة
حسناء تتشوف في القريعة : لا ا دادة بغيتك تمشي عند سيد القايد و تقولي ليه بغيتو
عرشية : غادي يعاتبني ا لالة على كلامي معاك
حسناء : غا قوليلو بغيت نتعشا معاه الراس في الراس و نكلمو....عرشية صدمها كلامها هي و شافية
عرشية سكتت عاد نطقت : واخا ا لالة انا غنشوف جوابو و نرد عليك (و دارت عند شافية ) تبعيني نتيا ....و دارت مشات تجارا و شافية من وراها نزلت من الدروج و خلات شافية واقفة و هي مشات لجناح سلطانة لي كانت جالسة هانية مهنية و فرحانة مقادها فرحة
سلطانة : اش كين ا عرشية
عرشية وقفت قبالتها و حدرت الراس : لالة راه لالة حسناء بغات تعشا مع سيدي الراس في الراس و تكلمو ...سلطانة علات فيها الحاجب : تعشا معاه ؟ (و هي تفركع بالضحك ) هههههههههههههههه هاد بنت الهجيج بانت ليا متتعرفش ولدي فخر الدين و فاش تيكفر و يسد بابو على شي حد مكيبقا يفتحو مشي عندو قوليها ليه ووصلي ليها غواتو و لغاه ....و علات راسها تتضحك تاتيبانو سنيها ...عرشية من بعدما خدات وصاية تاع سلطانة عاد خرجت و جرات من وراها شافية ...و طلعو لفوق و تمشاو لجناح الكتوبة
~~~~~~~~~كان سيدي فخر الديين جالس و غوباشتو مقرومة ماشاد كتاب مشاد حبر دير رجل على رجل و حاط صبعانو على ناضرو ...لي فيهم عرق تيضرب ...باقي معصب مكرازي من داكشي لي وقع غا يتفركع مرتو هو تمشي عند وحد من الرجال و تطلب منو يهربها من قصرو ... فينما يتفكرها يشعلو فيه للعوافي يكويو في قلبو حالف بيمانو ميخرجها من تما تا تهرس الراس و تولي تسمع الكلام و حتى لاما بغاتش تقاد يزيدها يامات خرى يحبسها حتى عقلها يرطاب و يلين في يدو و يولي كيف العجينة ... تاسمع الدقان و عطا كلمتو باش لي تيطرق يدخل ...و علا وجهو و تخنزيرة مبصومة عليه و هدر بالنهضة : شنو تما ا عرشيااا ؟
عرشيا قفزت : سيدي راه راه غير مسخرة للالة حسناء
فخر الدين علا الحاجب و كلامو مسوس و قاصيي : و نتوما اش قربكم لحسنااااء ياك قلت الغاشي ميدوز حداها
عرشية : لالة لي ندهت علينا من ورا الدفة و بغات نوصلو ليك شي كلام بغاتك ا سيدي تعشا معاها الراس في الراس و عندها ليك شي كلام ....هنا صعقات سيدهم القايد الغوباشة فك رباطها بين حجبانو ...صدمو هاد الكلام شنو زعمة تكون تربات و هرست الراس غير بمسبت هاد الحبس و جغيمة الما لي معاطاهاش ليها ....خمم في هادشي مزيان و هز عينو في عرشية و هز براسو بايه نيت يشوف خبزتها كيف غتخرج : جهزي المايدة في جناح الطاووس شوية غنكون تما ...عرشية تصدمت تا تصدعو ودنيها ....غا دابا كان جبل تايفور منو بركان و قالو موحال يقبل اش بغات ... حدرت الراس و خرجت مصدومة و مدهشرة ...و شافية على برا ...علمتها باش تعلم العبدات يقادو المايدة و يطلعو يزوقو حسناء في مقام سيدهم...تما شافية تهز قلبها بالفرحة و تبسمت و مشات طايرا تجارا لتحت ...تعلمهم بشنو قالت عرشية و حتى لي معرف الخبار تسمعها ليه ...بلي سيدها القايد سامح لالها حسناء و غيتعشا معاها الراس في الراس في جناحها
🌙حسناء القايد🌙
👑oumaima mega 👑
⚡127⚡
الخبار ضربت كي المدفع في القصر ... تامن سلطانة وصلت لودانها و صدمة صرفقتها ....و شروق تاهيا غا وصلتها ناضت بحقدها لي عامي ليها عينيها دغيا سيفطت للعبدة خايبة السيفة باش طلع مع العبدات لي غيقادو لحسناء و تعمل ليها لفعة في فراشها ...حسناء كانت الفوق تاطلعو عندها و حلو عليها الدفة ...فاش قالو ليها بلي لبا طلبها ...تما بدات تدخلها الخلعة و الخوف ديل بصح...كانت مستاعدة في لول مي فاش وصل لوقت لهادشي خافت و ترعدت ....بداو يلبسوها و يجهزوها و هي غا قارمة على ديك القريعة و تناخد تناخد ...و العبدة خايبة السيفة تسلتت من وسطهم و مشات للسرير حسناء ... شافت كلشي ملاهي و زربان و هي تجبد من تحت جلايلها الخنشة ...و حلتها و جبدت لفعة من راسها و خشاتها تحت الغطااا و بعدت يديها ...و قادت الغطا وهي تتشوف هاكا لفعة تتلوى و تمشا فوق سريرها ....و رجعت بلور و بعدت ...عاد دخلو لعبدات لخرين ...يقادو المايدة و المخاد يشتوهم و قادو لجلسة حيت سيد القايد كيبغي الوطاا (الارض ) ....و حطو لي تشهات النفس و تفهاتها فوق ديك المايدة و يشعلو في الشمووع و يستفوهم و صينية ا تاااي كبييرة و زاهية كيفما تيحبها سيد القايد ...حسناء غتشوف في داكشي و قلبها واصل لحلقاها ...تازوقو ليها وجهها واخا ضرب سيد القايد باين وواضح على خدودها و جبتها ....ديك القريعة ماسمحتش فيها ...جلسوها فوق المخاد و خرجو و سدو الباب و خلاوها ....حسناء تتبري في داك الجناح فحال شي عروس و سخفة راكباها شافتهم حتى خرجو من تما و هزت القريعة و يديها تتفتف بيها معرفت شنو تعمل بان ليها غا كاس ملون ...حلت لقريعة و مخلوعة لا شي حد يدخل عليها و كبات شوية تما و خبعاتها في جلايلها ...هادا جهدها لا قاليها تكب ليه غا تكب ليه مقالش ليها هادا جهدها ....جمعت يديها و بقات هاكاك مسمرة و الخوف الخوف راكبها ....تاتفتحت عليها الدفة ...دارت مخدودة ...و وسعت عينها .. كان زمانها سيد للقايد ...فتح الباب و دخل معلي شان و رافع الراس واخد خاطرو منها على داكشي لي عملاتو غوباشتو حاضرة و ليني خاطرو مكسرة ...سد الباب من وراه ...و دور غا العين لقاها جمعت جلايلها زييينة و ضاوية ووقفت ...حادرة عينها
فخر الدين وقف و دار يدو من وراه : درتي عقلك في راسك و لا باقي مقصحاه
حسناء هزت عينها و نطقت بخوفها و رعادتها : س سسمحليا ....هاد الكلمة لي كان تيتسناها طول فيها شوفة و تمشا لعندها وهو بالو مع دوك الطريش لي عطاها و الضربة لي في جبهتها ...وهي تتسرق شوفة و تنزل لعين دغيا ...قبالتو ...توصل قبالتها و وقف ...و هز يدو بجوج كبارات و جمع بيهم خدودها و علا ليها راسها تيشوفها تترعد و هي في يدو عينيها تيدورو ماتيكملوش فيه الشوفة و قلبها وقف بالخلعة حيت ناوية تقتلو و تغدر بيه هاد ليلة
فخر الدين قربها لعندو من خدودها و نطق و هو تيهمس و صوتو كيف ليل قوي و خافت : علاش تديري هاد الفعايل (طرطقت فيه عويناتها ) متنبغيش نحط عليك يدي و ليني فعالك متيتغفروش (بدا يمسح ليها على خدودها و عينو كيف النسر ) لي بغيتيها و طلبتيها و حليتي عليها فمك في هاد الدنيا نجيبها ليك عند رجليك حتى لو كانو ولديك غير حلي فمك و امري بيها و ليني متمشي عند حد واخا يكون باااك لي ولدك جي عندي انا و طلبي من انا ... كلامو كيف السحر دخل مع ودانها و مشا لقلبها تاولا يضرب ماشي بالخوف و ليني بحاجة خرى ... بقات غامجبدة فيه الشوفة و تبورش كلها بين يديه و عينها زينة في عينو ... فخر الدين ديما تيأسروه شوفاتها تولف ياخد السهام منهم و يتقبلهم وساط قلبو ....تبشر كيف ديما و نزل عينو لفمها لي مفتوح شوية ...و ميل غير راسو نازل باش يبصم عليه بوسة الصلح ... وهو نازل و نفسها تتخلط بنفسو و تتناخد في نيفو ....تاهيا مشات و تشدت في قفصو ...تابغات تغمض عينها عاد تفكرت لاش عيطات عليه و شنو خاصها تعمل و هي تنفض و رجعت بلور و بدات تفرك في يديها ...فخر الدين هز عين بحاجبها فيها ...هاهيا غتبدا تاني تعصبو ... قبل مايرجع هاد ليلة جهنام كحلة يبدل ساعة بخرى رجع يدو من وراه : جلسيي .... حسناء عينها في لرض و خدودها حومر حشمانة ...معودتش معاه الكلام و مشات تربعت و تكورت و جلست على ركابيها
و فخر الدين دار مع المايدة و جلس على الوسادات و تكا على دراعو كيف السلطان ....و تقابل معاها جاي يمتع الشوفة فيها ... و لقا داكشي نيت لي بغا ...بين ضو الشمع كتبري و تلمع زينة و عينيها في لرض حاسة بشوفتو لي تدوب الحجر ماشي غا هيا ....لبكها و خلاها غا تترعد لا سولها دابا على اسمها متعقلش عليه
فخر الدين تيهوم في زينها و عينو تيميلو نطق : كبي ليا اتاي و حتى ليك ...هزت فيه راسها و هزت البراد متتشوفش فيه و كلها تترعد و تتكب في الكاس لي عملت فيه شغالها و الخوف راكبها و الندامة بدات تتسلل في قلبها لي تيضرها...تاكباتو ...و هزت الكاس حادرة راسها و مداتو ليه ...تهو مد يدو و جر الكاس بيدها تحسسها رطبة و بيضة و دافية ...تاجمعاتها عندها و ربطتها عندها ... و غا تشوف في جنابها ...شنو تعمل دابا واش تنوض تخطف ليه الكاس من يدو و ترميه و لا تكمل على شنو بدات ...هزت العين غا من التحت مجبداهم و موسعاهم ...كيبان ليها باقي حاضيها و الكاس في يدو لقاه لفمو يدوز بزينها اتاي و بدا كيشرب منو بالنخوى .....يتبع
حسناء
القايد
👣👣👣👣👣 تال هنا عيييت ....غنحط في الايام القادمة انشاءالله شي ربع يام ولا خمس ايام عاد تقدر تسالي قصتكم غنبقا نكتب ليكم ...حتى نعيا .....احداث ماجية شاعلة