⚠️اول حاجة سمحوليا بزااف كنت في وعكة صحية مقدرتش نهز فيها تليفون مغاديش ندير ليكم تعويض اينما غنكتب احداث بزاف بينما ساليتها ....و لا عييت غنوقف تال غد ليه ⚠️
🌙حسناء القايد🌙
👑oumaima mega 👑
⚡118⚡
فخر الدين خرجو عينو و حجبانو تقرمو ...هو تيشوف في هاد العبدة المخفية من ورا لثامها ...عينيها المكحلين الكبار حافظهم كيف حافظ خطاوي رجليه ... كيفاش يقدر ينساهم وهما لي حركو ليه قلبو ...تمن دابا وهو تيشوف فيهم عرش قلبو تزعزع قبالتهم ...حسناء غاتسرق الشوفة و تنزل العين و غارقة في حويجها بالخلعة و الخوف ...عبد الصمد كيشوفو بنص عين و زنكر على سنييه عرفو غيعرفها حتى نطق و تكلم : فخر الدين خليت ليك الراحة دابا (فخر الدين دور فيه الشوفة و حواجبو مقرومة باقي شاك في دوك العينين المخفيين من ورا لثامها و عبد الصمد دار غا نص دورة لعندها ) زيديييي ....و تمشا عبد الصمد قبالتها و هي تمشت من وراه خطوة بخطوة مامفارقاهش و مخبية و قلبها غيخرج بكثرة الدقان و الخبيط حتى من يديها كيترعدو... تاتجاوزو فخر الدين و الرجالة لي معاه و هي غا لايحة عينيها لجنب و شادة رزمتها تا مزنكرة عليها ....و غاتلوح في رجلها و تقول دابا غينده عليها ... مافيهااااش كتحس برجيلاتها مهازينهاش
فخر الدين تبعهم بعينو حاريين و يدو دايرها من وراه
هو ينطق مصطفى : سيد القايد واش كين شي اشكال ؟
فخر الدين رجع فيه الشوفة : لا تفضلو دخلوو ...و دار بسلهامو و دارو معاه رجالووو ...غا هو بالو مرفوع مع لالهم الملثمة ...شي حاجة حيرت ليه البال بدوك العينين ...و ليني ميمكنش شي حد يتيق بليي حريمو غتخرج فلباس عبدة مخفية مطاحتش تا على بالو ....حسناء غا خرجت لجردة و وقفت كتحس بقلبها منصول بكثرة الخووف ... و تادوخة شدتها ...عبد الصمد كيف النمس تيدوي : بقاي هنا ...و مشا قبالت عينيها لوحد الطموبيل مبعوزة و بدا يتكلم مع سواقها في الخفا ...و هي غاتشوف و خايفة تدور من وراها و تلقاه كيف ملاك الموت راجع لعندها....عبد الصمد جبد رزمة عامرة بالمال و عطاها لسواق ...و دار و علا صوتو قدام العساسة و كلشي : زييدييي لهنااا ....حسناء معاودتش كلامو جات تجارا كيف الفريخة ...و طلعت في الطموبيل من لوور ....و شادة رزمتها و باقا ممامناش على راسها ....سد عليها السواق الباب و طلع و ساق غادي بيها مخرجها ...و عبد الصمد مشا لطموبيلتو طلع فيها ...و حضا الطموبيل تاخرجت من الباب الكبير الدهبي ....و رفع تبسيمة جنب خبيثة من ورا شلا حويج مشرارة ....حسناء غا خرجت من تما و حست بلي وطات رجليها برا هاد القصر ...رفعت النفس و خرجتها ... و دور في عويناتها ممثيقاش بلي خرجت و غاتمشي دابا فحالاتها
في القصر لداخل ...في الصالون العريض تاع الضياااف الكبااار ...ضياف سيد القايد ...جالسين الرجال بجلالبهم كيبانو سياااد معليين الشان و كلامهم رجاليي مسمووع صوتو و ضحكهم عالي رجاليي ....و العبيد الرجال غاديين جايين يحطوو في برارد تاع الفضة تاع اتاي و الحلاوي بالشكايل و النويع ...قبالتهم ...كان جالس وسطهم سيدهم القايد ...حاط دراعو على يد الفوطوي و داير رجل على رجل ...و صبعان يدو تحت دقنو ...و فحالا جالس معاهم غير بالجسدة ....رافع الغوباشة و يتفكر و يخمم ....هي ؟...لا ماشي هي؟ ....هي؟ ....لا ماشي هي؟ ....عويناتها هادوك عارفهم نفس الشوفة نفس الخوف لي فيهم فيما كتطلعهم فيه تتزعزعو ....علا راسو و نفخ مناخرو ...الى كانت عينو غتكدبو ...قلبو مغاديش يخطأ ....هو ينوض نوضة منفووضة ...تا سكتو الرجال و علاو فيه الشوفة مستغربين ....خلاهم في موضعهم من وراه و زاد خلفة خارج من الصالون🌙حسناء القايد🌙
👑oumaima mega 👑
⚡119⚡
ايوا سيد القايد ....مشا تال وسط القصر ووقف بمقامو عاليي ....و علااا صوتووو على جهدوووو تازعزع الحيوووط : عرشياااااا عرشياااااا ....كيف السبع تيغوت ...مكينش لي ماطلتش غا من شرجم ديال جناحها ....من شروق و مها ثورية تال لالة سلطانة ...لي غايشوفو من ورا الخوامي ...ماينزلو ما يبينو وجههم قبالتو ....تاينده عليهم واخا باينة مطلع الشوكة ....العبدات لي كانو تما كاع لي في يدها حاجة حطاتها ...اما وحد شافية بحرا مسحت دموعها على لالها ....تاغوت سيد القايد ... تزعزت تاكانت غاطلقها في سروالها تخاف لايكون عرف بهربة لالها
عرشية جااات تجارا مسيكينة و حادرة راسها : نعاام اسيديي
فخر الدين كيدوي و يتغزز بين سنييه : فين حسنااء
عرشية تمتتم و تفتف : ل ل لالة حسناء غتكون في جناحها ا سيدي
فخر الدين : سيري شوفي واش كينة ....عرشية معودتش الكلام ...دارت و مشات تتجارا طالعة لجناح الطاووس ....و فخر الدين بقا تما يسوط و يتحلف الى مكانتش ليوم ميطلعش نهارها ....رجعت عرشية في ساعتها و وقفت قبالتوو : م م مكيناااش اسيدي
فخر الدين تما زادت في صوتو جعرااا مبغاش يسبق الظن فيها يخاف الله و ليني دمو سخون و صوتو كيعلا : كيفااااااش مكيناااش قلبوووو عليها القصر كامل يلاااااااه
عرشية : و و ووواخا اسيدي (و دارت من وراها للعبدات ) واااش سمعتوووو سيديي اش قااال سيرو قلبو على لالة
ايوا الطموبيل لي مركبة حسناء ...وصلات لدريبة المضيقة لي فيها دار باها ووقفت تما ...حسناء غاشافت باب الدار سبقت لبكية تحت من لثامها ...و تبكي و تهرنن ممثيقاش داك حبس الدهب خرجت منو سالمة غانمة و هي قبالت دار باها دابا ...السواق خرج فتح ليها الباب حيت هي متتعرفش كيف تفتحو ...خرجت هازا رزيمتها تشوف في الباب و تبكي عليه ....شحال دخلت و خرجت منو ...و شحال من دكرى عندها معاه ...خلات سواق لي طلع و مشا فحالتو و هي مشات للباب ...و باقا غاتوحش فيه و تفرغ فيه وحشها ....وقفت قبالتو و دقت دقتها لولة ...ملقات جواب و زادت الدقة ثانية ...و هي تسمع صوت القاسمية تتنده بشكون ...قلبها فرفر بالفرح ... و هي تتسمع القاسمية تاتسول شكون
حسناء نطقت و صوتها غالبة عليه البكية : هادي يانا ...القاسمية بدات تفتح الباب بشوية بشوية و هي كطل من ورا الباب ...تاحلاتو و حلات معاه عويناتها بالصدمة ...و حسناء دارت دخلة و تعنيقة ...للقاسمية و تعنق فيها وحيدت لثام باش تبوس ...القاسمية تعجبت و فرحت و عنقتها و تغوت : واااا ميييي وااامييي و حسناء جاااات جاااات ....هنية غا سمعت هاد الخبارات خرجت هي وبناتها يتجاراو ....هما فرحانات معارفينش مسيكنات و هنية متعجبة و مستغربة اش جاب حسناء لعندهم و هي يلاه راحت لراجلها ...حسناء غاشافت ميمتها بكثرت الوحش تقاست عليها مطلقتهاش غير تعنق فيها ...تاهنية عنقتها و فرحت بيها غا هو طاح عليها كي العجب و دريات تهما فرحانين و كينة لي تتزغرت كاع بمجيتها🌙حسناء القايد🌙
👑oumaima mega 👑
⚡120⚡
~~~~~~~~~في القصر تاع سيد القايد ....في جناح شروق ....هاكا مفخم و مهاويي و كولوو خواميي ....باركا شروق تمشي و تجيي بتكشيطتها و شعرها مخلياه مطلوووق و يديها تفرك فيهم هما و صبعانها ...تا تدقت عليها الدفة ....توقفت شروق في مكانها و علات الحاجب : شكوون ؟ ...سمعت صوت من ورا الدفة : هانا ا لالة
شروق علات راسها : دخلي ...تفتح الباب و دخلت عبدة كحلااا غرية سيفتها خايبة يا العيدو بالله ... و هازا بين يديها خنشة ملوية ثقيلة شوية ...سدت الباب ووقفت في موضعها
شروق شافت في يدها و حمرت فيها شوفة : جبتي داكشي باش وصيتك
العبدة : اه ا لالة هانا ...فتحت الخنشة و خشات يدها بشوية و جبدت راس لفعة صغيرة مخرجة لسانها و طالقة سمها فحالهم شروق تساخرت بلوور فاش شافتها
شروق : واش متيقنة من سمها و لي ضرباتو يمسي ما يعشي (يبات ما يصبح )
العبدة : ااه ا لالة لي كتضربو مكيعاودش يطلع النفس من وراها
شروق تبسمت : هادشي لي بغيت نسمع دابا حلي معايا ودنيك بغيتك هاد ليلة تحطي هاد اللفعة المسمومة في فراش حسناء مبغيت حد يعيق و لا يسيق خبارها حتى تتقبل و يدي مول الامانة امانتو
العبدة حدرت الراس : لي بغيتيها ا لالة هي لي غتكون ليوم غنحط اللفعة في فراش لالة حسناء ...و رجعت خشات لفعة و سدت عليها و علقت الخنشة في حزامها
شروق : يلاه سيري دابا ...العبدة دارت و خرجت و خلاتها تدور في عينها المشرارة كثر من لفعة ليوم غاتصفيها لحسناء و يصبحو في جنازتها
~~~~~~~~~ في دار السي عبد السلام ....هنية دخلت حسناء و جلسو في الصالة الصغيرة لي ولات صالة زينة بالمدارب و المخاد و تمن الضو داخل عندهم ...و خواتت حسناء غاديرين بيها فرحانين بيها
هنية : والله يا بنيتي تا فرحت بشوفتك (و هي تنزل عينيها للرزمة ) غير هو علاش جيتي ابنيتي و جايبة رزيمتك معاك
حسناء كانت ضاحكة فرحانة توصلو لهاد الماصل هنا جمعت راسها : ج جيت نجلس معاكم ا مي
هنية هجرت الضحكة : تجلسي معانا ؟
حسناء : اا ا ااه جبت رزمتي و جيت لعندكم ....و هي تهز هنية يدها تال السمااا و خبطتها مع فخاضها : هاااويليييي هااااويليييي على بنت الكلبة يكما رما عليك الطلاق و بهاااااد الزربااااا ....خواتتها تاهما تصدمو و لزمو السكات
حسناء : لا لا لا امي انا جييت وحديي صافي صبري تقادة و تحد مقديتش نزيد معاهم الضربة نفسي داقت عليا تماكينات (تما)
هنا هنية ندبااات و نزلت حنكهاا : هااويليييي على بنت كرشيييي الكلبة و فخبار سيد القايد هادشي
حسناء نزلت عوينتها كيرمشو : لا مفخبارو حاجة هربت و جيت لدار باا اللحم لا خنز كيهزوه غير ماليه
هنية تال هادي و قالت حبس و ناضت ببلغتها شادها في يديها و طاحت فوق منها تضرب و ترعد و حسناء تغوت على جهدها و خواتتها يفكو في يماهم : هااويلييييي على الملعووووقة هااويليي على اللحم الخااانز هاااوليي على ضفري الصغيير هاربة من دار راجلها باغااا تحط وجه باااها في تراااب قبالت سيد القايد ....و تضرب و تغوت و كلها عرقت و يدها يتفتفو
دار سي عبد السلام