🌙حسناء القايد🌙
👑oumaima mega 👑
⚡50⚡
ايوا ثورية طلقت سمها و لاحت الوقيد في الفاخر باش يزند ...و خلات حسناء مخلوعة باغا غاترجع لجناحها اش بينها و بين شي عكوزة و لا ولدها ... دارت بلاما تدوي بلاما تكلم غادا لايحة عينيها في لرض و شافية دارت تابعها
شافية : لالة لالة فيين ماشيا ؟
حسناء وقفت و دارت عندها : م م معرفتش بغيت نرجع لبيت نعاسي
شافية : و ليني ا لالة راه خاصكي تشوفي ولاد سيدي
حسناء كمشت وجهها : ولاد سيدك ؟؟ (حركت ليها راسها بلا ) مبغيت نشوف حد غا خليني نرجع
شافية دافعة عليها الجبهة : واا لالة راه قالت ليا دادة عرشية دي لالاك تشوف الولاد راه غيكونو تيتسناوك ...حسناء هزت عينيها تشوف في الحيوط بقلة حيلة و هادشي لي لاحوها فيه فحال الغيس ... ملقات ما تعمل توكلت على مولاها و وافقت تمشي معاها ...ايوا شافية قدامها غادا و حسناء من وراها تمشا ... دخلتها بين لقواس و سطاون و البيبان هاكا مسدودين ....تاخرجو في مراح خر ...ديال القصر ...فيه ضاية كبييرة و مرمي فيه الزهر و الورد ....و وسطها جلسة ديال السدادر زااهية و عالية ....و عاد الطبلة ...و واقفين ربعة ديال العبدات جدعات و كبيرات ...وحدة فيهم هازا تربية في قماط (مومو صغير ) و ثلاتة الباقيات واقفين على راس ثلاتة الوليدات .... كانو منهم جوج بنيات صغارات جالسات مأدبات و رجليهم مواصلينش لرض و لابسين قفيطنات و شعرهم مجموع .... و جالس حداهم دري كبيبر شوية شعرو ممشوط و زينو من زين بااه ...لابس كاندورة و تبسيمة على فمو ... هما كاملين كيشوفو في شافية و من وراها لالة حسناء ...لي جاية عاد تكتاشف بلي عندو ولاد ...دوزت عينها عليهم بثلاتة ...نطقت وحدة من العبدات : تفضلي ا لالة حسناء ...تهيا مشات و تفضلت وجلست قبالتهم ضامة يدها و تتشوف فيهم ...الولد البكر ناض و تمشا لعندها متبسم يكون في ديك 11 عام هوكاك : السلام انا معاد ....و ناضو لبنيتات بجوج نزلو من دوك سدادر ...و تمشاو لعندها هازين جليلاتهم ...وحدة في 5 سنين ووحدة في 7 سنين
مولات سبع سنين : انا فردوس
مولات 5 سنين نطق باقي ثقيل عندها : انا فاطمة الزهراء
حسناء : ءءءء ؟ امم انا حسناء
معاد : مرحبا بيك ا مرت با جديدة ...حسناء سكتت هادشي لي على طرف لسانها
فاطمة الزهراء : شحال غاتبقاي معانا
حسناء دارت هزت حجبانها تمن الدراري الصغار عارفين هادشي : م م معرفتش ....و هي دير العبدة لي مسيراهم بعينيها لهاديك لي هازا التربية باش تعتق لا بقا مايتعتق ...و مشات دات لحسناء التربية : هاكي ا لالة هادا سيدي سفيان ...حسناء هزت فيها العين كتشوف تربية باقي غا لحيمة صغيورة معرفت تاكيف تشدو ...خداتو من عندها بشوية ...كتشوفو باقي صغير في القماط تاعينو مغمضين و يدو مجموعين و بدا ييتكييبع في يديها
حسناء قلبها ضرها عليه : هاويليي دريري صغييور بزااف فين هي مووو ؟ (و هزت راسها مخنزرة فيهم ) هادااا خاااصووو مووو ....العبدات كلهم شهقو و مشات دغيا خطفاتو من عندها
العبدة 1 : اش تتقوليي ا لالة بغيتيي يتقطع ليك اللسان ديو الدراري لجناحهم دابا ....معاودوش معاها الكلام و داوهم ...و بقات حسناء مستغربة من بعدما تخطف ليها التربية شنو قالت هي كاع لي غايقطعو ليها لسانها ما قالت غير للحق ولي خبرها بيه قلبها
🌙حسناء القايد🌙
👑oumaima mega 👑
⚡51⚡
مشاو الدراري داووهم باش ميسمعوش لكلامها ...تمن شافية دهشت من هضرتها
العبدة حنات الراس : سمحيليا ا لالة و ليني لا سمعت لالة ام سيدي هاد الكلام مغيعجبهاش لحال وحنا موصيانا على لولاد ما يسمعو هضرة لي تهوسهم.... حسناء غا تتشوف هادشي لي ميبغيه لا ربي لا عبدو ...هاد لحيمة راه خاصو موو تربيه و ترضعو من بزولها وحليبها ...هادو طلعو سوء من الفرانسيس لي يفرقو تربية على موو ...و دوك للوليدات صغار بزاف ...بدات كتحس بالخنقة هنا و الضييق ... شنو هاد القصر هادا راه جهنام كحلة مزوقة من لداخل ... و هي دور عينيها و وسعتهم على جهدهم ...تا قلبها وقف في مكااانووو ....شافت واحد بعييد دايز بعينوو حوومر كيف الجمر منيش عليها نيشااان ... كيخلع شي شوفات ديال القتالة ...حسناء زاد كمل عليها هادااا بهاد شوفات ....كان عبد الصمد دايز و كيشوف في عروس سيد القايد الجديدة كيف عوايدو...مكيحملش اي حاجة ديال فخر الديين ....و دور عينو و مشااا ....حسناء ناضت وقفت من بلاصتها و شادة من قلبها ...كتحس بلي مقادراااش تهز النفس ممعتاداش على هادشي كولوو .... بزاااف عليها
شافية شدت منها : لالة اش بييك ؟
حسناء خدات نفسها و شدت منها : بغيت نشم الهواااا و منبقاش هنا
شافية : واخا اجي ا لالة نطلعك لجناحك و نفتح لييك الدفة
حسناء : لالا بغييت نخرج على برا
شافية شهقت : لااا ا لالة ممنوع على النسا تاع الدار يعتبو الباب الا بشوار سيديي
حسناء هادشي لي بقا ليها كملت تاشوفة فيه عاد تشاور معاه : اخلينيي
شافية : ا لالة راه كينة العسا برا الخارج و الداخل على عينيهم
حسناء صافي قطعت ياسها : صافي ديني غا لبيت لي كنت فيه ....شافية هنا حناات الراس و طلقت منها و دارت غادا بيها و حسناء كتمشى من وراها و سهات في لرض ... شوف كيف كفنوها بالحرير و شنقوها بالدهب ...و حبسوها في قصر ....طلعت لفوق و داتها لجناح الطاووس ....حسناء غا دخلت حلات ليها شافية الخامية تشوف الجردة لي على برا ... طلت يضربها الريح و سرحت عينيها في الخضورة كتشوف العسة مشتتة هازين البارود عليهم ...و دارت رجعت و جلست في مكانها مهمومة و حزنانة ....بقات شافية واقفة
حسناء : واش ديما غتضلي معايا و جالسة حدايا واش غتباتي معايا ؟
شافية تبسمت : لا ا لالة ههه انا باقية هنا حتى تقولي ليا سيري
حسناء : ااه واخا تخليني وحدي
شافية : هي لي متعاودش ا لالة انا برا لي حتاجيتها عيطي ليا ...ردت عليها ا براسها و شافية خرجات و حسناء تنهدت تنهيد المووت و طلقت دموعها يجرييو و هي تشوف في جنابها و في هاد البييت ...اش هاد الحبس و الخنقة لي حطوها فيه مقدراش تطلع حتى النفس هنايا بغات ترجع فحالاتها و ترجع عند ميمتها ... وهي تهز عينيها في صقف لبيت و شكات لربي لي خلقها العالم الله شحال من مرا بكاات هنا و شكات و تحبسات و على هاد السرير نعسات و على هاد الوسادة تكات و دمعات ... و من هاد القايد تخلعات (ميغا : هادشي لي كتقول فيه راه مكينش كانو تيموتو عليه ) .... بقات في جناحها كيف الطير المحبوس حتى وصلت العشية و تدق بابها
🌙حسناء القايد🌙
👑oumaima mega 👑
⚡52⚡
دارت لجيهة الباب تتحل و دخلت عرشية حادرة الراس و ضامة يدها : لالة واش تبغي تغداي مع لالة سلطانة ...حسناء ناضت بفزعة دير براسها لا : لا لا لا مابغيييتش نتغدا مع لالهم سلطانة
عرشية هزت فيها غا العين البنت ماشرباش عقلها و لي جا على بالها تاطلقو على لسانها : واخا ا لالة على خاطرك هي نجيب ليك غداك هنا ؟ ....دارت ليها براسها ايه ...اللهما تاكل مع حيوطها و لا ديك المرا توحل ليها اللقمة في حلقها .... داكشي لي بغات هو لي كان جابو ليها كلات لي قسم الله داكشي بنين و لديد و الخير كثير ...تاشبعت كرشها و جاو جمعو عليها داكشي و جلست في موضعها تخمم و تبكي و تخمم تانشفو دميعاتها ....تا طاح ليل و شعلو للضواو ....و اللغا قلال و السكوت كثار ...ناضت حسناء من سريرها و مشات تعاود تشم لهوا من الشرجم ديالها المشبك بزواااقة الطوووس ...وقفت و حطت يديها كتشم لهوى و تشوف في الجردة ...قوست عينيها تتشوف العسا مكيناش و الدنيا خالية ...طرطقت عويناتها هادي هي الوجيبة فين تخرج و تحرر جنيحاتها ....دارت و لبست شربيلها ...و مشات فتحت الباب و دورت عينيها ليسر و ليمن ...تمن شافية لي غتوقفها و تحلل و تحرم عليها مكيناش ...خرجت و سدات الباب من وراها بشوية و قلبها بدا يتزادح و يضرب ... بانت ليها الطريق خالية ...مشات فيها توصلت لدروج ...و نزلت تتسلت مبان ليها حد ....مشات على صبعانها تخشا بين القواس و تقلب على الباب الكبير ...حيت هادشي داخل في بعضو معرفت راسها من رجليها ...و فينما تسمع الغاشي تخبا من ورا لحيط و تجلس قفازية و تززم فمها بيديها ...تايتقطع الغاشي من ودنيها و تنوض تاني ... بدات تزرب في خطاويها و دور ليمن و ليسر و قوس يلوحها في قوس ...و كتنهج و تدور و معرفت هاد القصر منين تخرج منو و خلاخلها زاهيين يتخلخلو في رجليها ...حتى بان ليها وحد القوس كبير جا في الدورة ...على ربي يكون من وراه الباب .... غادا و تلفت من وراها و تزرب و هازا جلايلها من لرض ...حتى سمعت فحال شي غاشي من وراها ... زادت في الزربة و هي تتشوف وراها ...تا ضربت مع حيط قاصح ... قبالتها و رجعت بلور شادة من راسها و مغمضة عينيها تقصحت تقصيحة خايبة ...عاد حلات عويناتها و توسعووو و هي كتطلعهم مع الحيط لي قدامها ....قلبها وقف في بلاصتوو كان سيد القايد فخر الدين ...واقف و نافخ ريشو كيف عوايدو و يدو من وراه ... و تخنزيرتو تطيح الزرزور من فووق الصوور ...رجعت جوج خطوات للور و هي كتشوف عيونو مقوسين كيف البارود القتال
فخر الدين كيشوفها قبالتو زينة في قصرو كتزرب ... مع دورتها خرجت فيه هو ينطق بنهضة و ردو عليه حيوط قصرو : اش كديري هناا ؟ ...و كل كلمة خارجة على حقها و طريقها ..حسناء تعقد ليها اللسان والكلام قدامو بالخلعة قلبها ولا كيترعد دارت يمين و شمال بعويناتها و سالفها فينما دارت تابعها كيتجارا تقلب فين تهرب مالقات لاين رجليها تحشو عليها غير ترجع فيه عويناتها و الخلعة ساكناها ...هو صغر فيها العين و كمش فيها الجبهة كيتسنا جوابها و شدات ليه شوفاتو بزينها و هي كتلعب بسالفها بين عينو هو يقفزها تاني : واش صمكة ؟ و لا بكمة ؟ اش كديري هنااا ؟
حسناء : و و وووالو ...تفتف عليه و بدات تخبش بيدها و هي تتشوف عينو تتخنزر فيها كيف المنجل
🌙حسناء القايد🌙
👑oumaima mega 👑
⚡53⚡
عيون القايد محيدوش عليها باقي غا في وجهها ماشبعاتوش الشوفة و لسانو كيأمر فيها : سيري لجناحك دابا انا جاي لعندك ....حسناء جبدت عيونها فيه ...و دارت بزربة معاودتش من وراه الكلام و هزت جلايلها غادا تتجري كيف الفرخة و قلبها يضرب يضرب فحال الطبل ... فخر الدين حاضيها تتجري في مقامو هربانة منو ...و يدو من وراه و بدا كيتمشى بالنخوة كيف عوااايدوو ...مايزرب في مشية ما يقلل منها كل حاجة و عاطيها حقها .... حسناء اغاادة تمشي هربانة معارفة لامنين تدخل لا منين تخرج ....توصلت لدروج دارت من وراها مكين حد ...و كملتها بالجراا تال لفووق ...مشات لجنااحها نيشان ...دخلت و سدت الباب و صدرها طالع ناازل ... و مشات لسريرها طلعت فيه و تركنت و تجمعت على راسها تسرط في ريقها...و تقلب بعيونها على شي حل تعتق بيه راسها ...ماكين لا مووس لا دفة لي تنقزها ...والوو اش غتعمل في هاد الوحلة وهو لي قال تابعها ....حتى سمعت تحنحينتو كيف العادة برا ... خرجت عينها في الباب و بدات تكمش و تصبن في جلايلها...القايد حل لباب بجوج يدين ... و دخل لابس جلابية جديدة مكيعاودش في لبسة جوج ... هز فيها طرف العين جالسة في السرير ...و دخل وقفلو من وراه .... و بدا يتمشا لعندها توقف قبالة السرير ...و كيشوفها غادي توفى بالخوف و الخلعة و هي حاضياه كتنهج
القايد علا الراس و نفخ الصدر و عينو منيشة عليها مكينش فين تزهق و خنزر و صوتو تجهد : شنو دوك الفعايل لي عملتي البارح ؟ واش هادشي فيه الملااغة و المزاااااح ...و كيغوت عليها تاكتقفز وقلبها غيتوفى ...غا نفسها و شوفتها لي كيهدرو
فخر الدين بدا كيطلع ليه الخزيت في راسو (يطلع ليه الدم ) : جاااااوبييي ؟ فاااش نتكلم معااااااك جاااوبينيييييي ... كتبان ليه متتدويش غا تتقفز ....معندها ماتقوليه غير تطلب ربي بشنايفها تيترعدو و عينيها طالبين الرحمة ...شطحت ليه القرودة تاع مخو زاد ربط الغوباشة ...و تم جاي داير عندها كيخطوي : راه كندويي معااك ......ماجا فين يوصل عندها تاطلعت ليه بغوتة فوق السرير و تنهج (فخر الدين فتح فيها عينو ) اش كديريي هبطي لرض ...و كمل لمشي عندها و هي تهرب ليه نقزت من جيهة لخرى ...و شادة من قلبها تازعزعهاا : حسنااااااااء شنووو هاد المزاااح ؟ ...و مشا داير ليها من جيهة لخرى و هي تطلع عوتاني فوق السرير و نقزت ليه بجلايلها لطرف لاخر و وقفت غاتبكي و تهرنن .... عصبااتو وهو يهز عليها صبعوو : حسناااااء (و كيدوي بين سنييه و حمر فيها العين ) غاتحركي من موضعك ماغتلوميي غير راسك غتكسري بكلمتي غانكسر ليك داك الراس ...وقفت تما على الحيط معارفة تقدم ولا توخر و عينيها يدورو باغا تبكي و تهرب ...و ليني تشدت فحال شي غزالة و شافتو ماجي لعندها ...نفس مقدتش طلعها بالخلعة وهي تغمض عينييها و دورت وجهها لهيه شنو ماا غيعمل فيها مغتشوفش ...هو جاي لعندها توصل قبالتها و غطا عليها بكسدتو (جسدوو )مبقات كتبان ...و وقف بوجه ماااشي ديال الملاغة مخنزر ومكمش جبهتو فيها ...بغا يحاسبها و يلومها و يأدبها على شنو عملت لبارح ...و ليني شفع ليها زينها .... نور و شمعة ضاوية تنهج و تناخد ...و شعرها هابط على عنقها ووجها ...مالو عينيه و داااه الهوى كيتسحر و يتفتن ... هز يدو يحيد بيها شعرها على وجهها ...يتأمل فيه و يسرح ... حلال عطاها ليه الله و حط يدو على خدهاا كيتحسسها ...حسناء حلات دغيا عينيها فيه حلا وحدة مع قاس ليها خدها و دارت عندو ...و ياريتها مدارتش لي مقدوش عليه الفرانسيس دارتو هي بعينيها ...قتلاتو عينيه تبشرو و دبلو باقي مشبعش منها شوف و شوق و هز يدو الثانية لخدها ثاني خلاها مخرجة فيه عينيها و قلبها طاح في ركابيها ...هو نزل عينو لشفايفها ...و بدا كيجيبها لعندو من خدودها ...هي كتحرك و توسع شوفتها ....يتبع
♥️♥️♥️♥️
ايوا هنا سالينا اجزاء اليوم .... صبروووليي على حسنااء راه هادا اول يوم في زواجها ... و العود لي تحكرو يعمييك ...الى كان القايد خالق الرعب في الفرانسيس و مزعزع دولة .... راه جات لي تجيب ليه تمامو ... و شنو غتكون الحكمة من غير زينها لي غتخليها مختالفة على نسا لخرين .... " الاخت مزال عروسة جديدة حشومة تتقاس و لا تضرب و ليني فاش غتبدا البسالة نتوما عارفين الكمالة "
**********************
حبيباتيييييي كنتمنى يعجبوكم اجزاء اليوم ....