🌙حسناء القايد🌙
👑oumaima mega 👑
⚡44⚡
تدلات في يدووو كيف لحمامة ....و شعرها مطلووق وولات كيف الجثة الهارية في يدو ... فخر الدين زاد كمش على تغوبيشتو وهو كيشوفها دابلة في يدو و شادها شدة صحيحة ...بانت ليه مغمضة عينيها و وجهها مرجعاه على دراعو...الخميسة و الموس لي كانو في يدها طلقتهم ....فخر الدين طلعها من ساسها لراسها كيف همدت و تطفات في يدو وهو يحيد يدو الثانية من ورا ضهرو و دارها تحت ركابيها ....هازها بجلايلها ...يشوف في وجهها و هو رافع الغوباشة شنو بيها معرفش ...تمشا بيها بشوية فحالا هاز ريشة بين يدو محاسش بثقلها ....و حطها فوق السرير و رجليها يخرشو بالخلاخل ...كيف الحورية ...و راسها تحط فوق الوسادة و شعرها كلو تدلاا على وجهها ....سي فخر الدين من بعدما حطها ... طلع لعندها و حط يد في ليمن و اليد لخرا في شمال وهي وسطهم و نزل لعندها .... و حاجب داخل في حاجب ...هز يدو و رفع الشعر عليها و دا صبعو تحت نيفها كيتحسس نفسها سخونة تنهج ...يعني باقا حياا و غير سخفانة طيحة ...حمر فيها الشوفة و في وجهها البلق كيف قالب السكار بالبيوضة ... باقي عينيه ماشبعوش من النظر ... ناض من مكانو معاجبو حاال و دار عطاها بضهرو ...و مشا لباب و فتحووو و خرج و خلاه مفتوح ....و خرج كيزرب في خطاوييه و مطلع شوكتو ...تافات داك السطوان و مشا لحيط لي كيطل على القاع تاع القصر ...و حط يدو تما كيف السلطان و غوت تا عرقووو خرجوو : عرشيااااااا ....زعزع بصوتو قواس القصر و بيبانو .... سمعت هادشي لالة سلطانة من جناحها ...و ناضت من فراشها ...و حيدت الخامية من على شرجمها كطل غير من المشبك ....كيبان ليها ولدها الفوق و باين من تخنزيرة و الوقفة اعصابو حامية .... و عاد غواتوو لي كااسر دنياا
فخر الديين : عرشيااااااااا .... تاكتبان ليها عرشية جايا تجرييي و وقفت في المراح و طلعت عينيها في سيظ القايد
عرشية : نعام سيديي
فخر الدين رجع يدو من وراه و عندو شوفة غا من الفوق : طلعييي شوفيي هادي ماالهااااا ؟ ... و دار عطا بضهرو كيف عوايدوو و زاد خلفة لجناحوو ...محامل يشوف حد محامل يتكلم مع حد وعروقو خارجين من عنقو ....عرشية غا سمعااتو ...معاودتش كلاموو طلعت تجارا لجناح لالها حسناء تخاف يكون وقع ليها شي حاجة في الدخلة ...كانت البنية باينة صغيرة و زينها يعطش وحووش عليها ...سلطانة هزت الحاجب غاطل من تما معندهاش حق تدخل بين ولدها و نسااه قدامو بعداا ....
في بيت ثورية كانت جالسة شروق تمسد في رجل مهااا تاسمعت شي لغااا وقفت و سرحت ودنيها : ميي واش تسلغيتي لهاد اللغا يمكن سيدي فخر الدين كيغوت
ثورية كانت متكية على الوسادة و مغمضة العين حلاتها غا شوية : و اش عندك ماديري ليه نتي رجعي مسدي ليا رجليا نتي خاصك غا السبة باش تمشي تجاراي لعندو علاه فين عمر السي فخر الدين مكانش تيغوت ...شروق رجعت لمسيدها و بردت القمعة في قلبها و طالقة ودنيها على برا باش لعاود غوت تمشي عندو كيف الدميمة
🌙حسناء القايد🌙
👑oumaima mega 👑
⚡45⚡
عرشية طلعت لجناح الطاووس تجري .... لقات للباب مفتووح دخلت و دخلو من وراها جوج عبدات فاخيتة و العالية ...عرشية دورت عينها في الجناح بانت ليها حسناء مشبحة فوق السرير ...و ماتحرك ما تململ ...قصدتها و هي مخرجة عينها ...كتبان ليها مكمدة و باقا بحويجها و بمضمتها و تاحاجة مامخسرة فييها ....هي القايد مامسها ما قاسها ...قربت ليها و حطت صبعها تحت من نيفها تحس بنفسها ...و فاخيتة و لعالية غايطلو عليها معرفو هادي مالها و لا اشنو مسبتها
عرشية كانت مكفية عليها دارت غا جنب : عطيني الخابية دالمااا .... العالية مشات تجارا هزت خابية النحاس لي محطوطة فوق وحد الصينية فوق الطبلة ...و رجعت جابتها لعرشية ....عرشية غاخداتها و خوات الما في يدها و دوزاتو على وجه حسناء ...بدات حسناء تكمش جبهتها و تعيب سيفتها ...كتفيق من سخفتها ...و عاودت ليها عرشية المسحة بيدها في وجهها ...تاحلات عينيها بشوية ترمشها .. تاوسعتها و هي تنوض شاهقة و حاطة يدها على صدرها و تناخد و مخرجة عينها
عرشية : بسم الله علييك ا لالة برا و البااس علييك
حسناء دور عينيها و كتحس بقلبها مزال كيضرب بالخلعة : فففف فين هوو ؟ فففين هو ؟
عرشية : باسم الله عليك ا لالة كينين غا حنا لا كنتي كتسولي على سيدي فراه مشا لجناحو ....حسناء كلها تناخد و تفتف ...فاخيتة هزت فيها حاجب تتفرج في هاد الخنات لي فيها (الفشوش )
حسناء تشوف في عرشية و ترجع نفسها وقلبها وهي دور عينها جيهة فين كانت هازة الموس و هي تفزع فاش تفكرت عينو لي كانو كيخلعو .... و تفكرت معاها حتى خميستها ...قلبت عنقها بيدها
حسناء دارت عند عرشية : خميستييي خميستييي خميستيي كانت في يدييي طاحت ليا طاحت ليا
عرشية : هانا ا لالة فين طاحت ليك نبقشو عليها
حسناء نعتت بصبعها في جيهة الحيط : كانت لهييه طاحت ليا لهيه
عرشية : فاخيتة سيري شوفي للالاك خميستها ...مشات فاخيتة بتعواج ....تقلب عليها بعينها ...حتى لقاتها و هزتها و جابتها ليها ....خطفتها حسناء من يدها و حطاتها على صدرها و تنهد و تشهق و تحمد ربي و تشكرو ...عاد تكاتها عرشية بالكشايف و هبطت على سريرها الخوامي تيبينو ...و خرجو و خلاوها ترعد و معنقة خميستها و موسدة وسادتها ... هاد ليلة لي فزعتها كتحس بركابيها تحشوو ...ناري على شوفات خايبة عمل فيها ...و لا الشدة لي كانت غتكرد ليها دراعها باقي منصول ليها و مفدوع ...بدات تنزل دموع و تكتم الصوت و ماتطلع النفس ...هادشي غا لبدية اش جا مايصبرها ويعيشها هنايا ...زيرت على خميستها و خرجت تنهيدة بشهقة
عرشية غا خرجت من الجناح و غلقت الباب ...و هي تدوي فاخيتة تقولي حارقاها الحريقة في لسانها : ويلي هادي اش جرا ليها تا سخفت و ناضت فزعانة
عرشية هزت حاجبها و دارت و شافت فيها : سمعو نتي وياها هادشي بغيتو ما يسيق ليه حد للخبار (و نعتت في فاخيتة ) بالخصوص نتي و لا غيتقطع ليك اللسان (فاخيتة خافت و حدرت الراس ) يلاه سيرو شوفو شغالكم ...ماعودوش معاها الكلام
🌙حسناء القايد🌙
👑oumaima mega 👑
⚡46⚡
لالة سلطانة حالة بابها و خارجة بكاندورة زيينة و سالفها مطلوق على كتافها و عينيها مطوعين لسما ...مانساتش شوفتها لولدها غادي و شوكتو مرفوعة ... تابانت ليها عرشية هبطت من الدروج و جاية قاصداها ...خلات ليها الدفة محلولة و دخلت كتمشى و عطاتها بالضهر ...و عرشية دخلت لجناحها و حادرة راسها
لالة سلطانة كتشوف في وحد الساعة ثقيلة دهبية لاصقة في الحيط : اش كين اش واقع ؟
عرشية : غير لالة حسناء سخفت بين يدين سيدي
لالة سلطانة كمشت وجهها و دارت عندها : كيفااش سخفات ؟
عرشية : دخلنا و لقيناها بحيشها بريشها فوق السرير سخفانة
لالة سلطانة هنا معجبها حال : و اشنو جات دير في هاد الدار تسخف واقيلة ماعرفاش مقامها و علاش جات لهنا غدا غير تحل عينيها و تلمح الضو هبطيها لعندي
عرشية : لي تحبي ا لالة
سلطانة : يلاه غبري عليا ....و دارت معصبة هادشي لي بقا نيت هي تسمع خبار بنت الحداد تفشش و تدلل في دخلة على سيدها بنات الدار لكبيرة و ماداروهاش
في جناح سيد القايد ...كانو شاعلين ا القنادل خفاف مضويين على الجناح من جنابو ...و سيهم فخر الدين جالس على كرسي كبير و عريض تاع الملووك و متكيي عليه ...و رجل فوق رجل .... قارم حجبانوو و عينو كيف للبارود غيتفركع ...لغاها مزال في ودنو تتقوليه بعد عليا و لا تقربش لياا .... مكيهموش هو ري و لا شوار النسا ...كيعرف اتخير و ياخد لي تشهات خاطرو و لي كتجي لقصرو ...كتدوب في يدو قبل حتى ماتشوفو ...هادي هزات عليه موس كااااع ...زير على قبضة يدو كيتسمع منها تزنكير ...كيحس بداتو شعلات و حمات مرضاااش ... قيمتو و شانو حطااتهم الارض و زيد على هادشي كلووو فتناتوو ... و زينت ليه عينييه ...هو كيزيد يتعصب كثر و كثر
حسناء بقات تحاجي على خميستها في قلبها و تبكي فوق وسادة سيد القايد و فراش سيد القايد على زهرها و على زلالها لي مشا المقاومة و هي جات مزينة عروس لعند واحد خر من غيرو ....بكات بكات حتى طابو عينيها و نعسات
ايوا صباح الصباح و فتح الفتاح ....في الصالون الكبير تاع القصر .. الطبلة زاهية و عامرة حلاويي بالشكيل و النويع و مسمن و اتاي مشحر محطوط و منعنع ...جالسة سلطانة مربعة رجليها و شادة بيدها كاسها ماتدوي ماتكلم زامة لسانها (سادة لسانها ) و غير بنص شوفة و نص عين تشوف في ولدها السي فخر الدين ...لي متكي ا على دراع و عاقد الغوباشة على الصباح و خاطرو مخسرة ...تسمع فيه غير يسوط و هاز كاس يشرب فيه ...و عينو متجيش في عينها
لالة سلطانة زعمات و وسط اعصابو تكلمات : ولدي فخر الدين ( دور عندها غا عينو حارة كيف الحمرية يا لاطيف تبسمات ) كيف ديرا عروسك جديدة ؟ لبارح ماشفتهاش حيت كانت جاية عيانة مسيكينة خليتها تمشي و ترتاح في جناحها و تلقا راحتها