شكرااا هلباا للي علقولي 😍😍
ديما خلوكم هكي بش نتشجع 🥺❤
#الحلقة_٣٤
نزلوا الشباب من السيارة ، وخشوا للحوش بهدووء ، وطوول كل واحد فيهم غير ملابسه ورقد من غير اي ازعاجات على غير العادة
_______________________
قاعدين في حيرة مش لاقيين اي تاكسي يرفعهم لمصراتة لتواا ، مشوا لكل محل قدامهم وكل شخص يحاولوا يسألوا على التاكسيات يلي ترفع لمصراتة ، كان جوابهم نفسه دوروا كويس ، في خاطرهم كان على التدوير دورناا شن الحاجة الجديدة يلي قلتوها
قعمزت فرح على الرصيف متجاهلة نظرات الناس ليها ، شااردة تفكر بينها وبين نفسها توا وين بنلقااه التاكسي تواا، مشكلتي مش في التاكسي مشكلتي كيف بيستقبلونا بعد خمسة سنين زعما تغيرووا هلبااا ، ههه اكيد تغيروا لكن ياخوفي التغير يجي بالعكس عليناا ويرفضوا يرجعوا معانااا
سرحت وهي تشوف للأجواء الحلوة يلي مسيطرة على العصر هدا ، تتفرج على ملابس الناس وتسريحات شعرهم الغريبة نوعا ما ، تتفرج على السيارات الثلاثينية يلي مختلفة تمااامااا على عصرهاا ، تشوف للمحلات المختلفة منها محلات الملابس ومحلات الغذائية وغيييرهااا ، تتفرج على الأناقة والجماال المحيط بيها في كل مكاان ، هو صح العصر قديم لكن راااقي بكل ماتعنيه الكلمة من معنى
ماافيش هواتف محمولة ماافيش حاجة تلهيهم على بعض ، التكنلوجيا يلي قاعدة تبعد فينا على بعض هما ماعندهمش ، محلاها الحياة هكي بسيييطة كل واحد يهدرز مع التاني ويضحك معاه بدوون اي شي يلهيه عليه
خطموا قدامها بنتين في عمر الشباب ، قايمات خصلات فوق والباقي منزلينه لابسين فساتين لونهم فاتح ، مع ربطة الخصر وكندرة ارضية باللون الفاتح ، في ايديهم اكياس من القماش ، يتمشوا مع بعض ويهدرزوا والانسجام واضح بينهم
من جهة تانية ، شافت اب شاد بنته فوق كتفه ويمشي بيها وواضحة السعادة في وجوهم من ضحك بنته الصغيرة المتوااصل ، كان الاب لابس سروال واسع شوي لونه زيتي مدخل فيها سورية بيضاا ،قايم اكمامة شويي وفي ايده ساعة فضية ، اما البنت الصغيرونة فا كانت لابسة جمسوت امريكي وطالقة شعرها القصير
لاحظت ان البنت تأشرله على مكان متجمعين فيه مجموعة من الصغار على مكينة بيع غزل البنات ( حلوى الصوف ^^) ، مشي بيها بوها على طول للمكان يلي اشرتله بنته عليه ، خدالها اتنين كباار ، ضحكت فرح على ردة فعل البنت لما بوها اعطاها غزل البنات ، كانت تصفق وتعيط من الفرحة ، قعد بوها يضحك عليها كيف فرحت بيها ، وكمل طريقه هو وياها
شافت فرح جنبها لقت لينا وزهور ياكلوا في عزل البنات انخلعت هاادوو امتى لحقووا يشرووه
فرح مستغربة: هدااا امتى شريتووه ؟
زهور تعبي في فمها بالحلوى : مبكري شوية شريناه
لينا شافت لزهور وهي تاكل : مصح وجهك شريتي لروحك زوز واني وحدة بس
زهور تاكل : كمليها ونمشوا نشروا تااني
فرح قامت حواجبها : بيجيكم السكر وانتوا النهار كله تاكلوا في الحلو
زهور تخنب في الحلوى من لينا : لالا السكر مايجيش لسكر
لينا ضربت ايد زهور : هييييي معششش تاااخدي مبردددككك
فرح شافتلهم وبينها وبين نفسها ربي يشفيهم
:لالاااا هههههه مششش مصدقة المفجوعة مرة تاانية
زهور شافتلها وحطت يدها على وجهها : ان لله وان إليه راجعون ، انتتي امتى بتخليني في حااالي فوتيني ترااا
البنت تضحك وتكلم في صاحبتها : ههههههه تعرررفي يا بسمة افجع من المخلوقة هاادي مش حتشووفي هههه
صاحبتها بسمة والواضح ان شخصيتها ضعيفة : هههه اي فعلا
لينا شافتلها : شن هو فعلا ؟؟
بسمة تلكمست في روحها : ق قصدي ققصدي هي فعلا كويسة
زهور شافت ل لينا وهي تاكل : ههههه خيرها هيااا
البنت تحشمت من صاحبتها : ههههه بسومتي تعاالي نمشووا توا المفجوعة تاكلك
زهور ضحكت: ههههههه المفجوعة تاكلك حتى انتي
البنت شدت يد صاحبتها وجاية بتمشي : تااكلي عينك
لينا قامت اكمامها : شكلك نسيتي عيشة راااجل ؟؟
فرح ادخلت على طول لما حست الموضوع مش بصارة : استهدوا بالله خيركممم
بسمة فكت يدها من يد صاحبتها : ان انني ماا ما دخلييش
ومشت جرررري من الخوف ، طاحت شنطتها رجعت خدتها وكملت جريها
البنت عيطت على صاحبتها بسمة : طيييح سعدددك وااااني يلي مدايراتك صاااحبة طوول بعتيني
لينا غمضت عيونها وبدت تغني بإحساس : غرييبة النااس غرييبة الدنيااا ديااا اعززز النااس بيتغير علياااا
جت زهور بسرعة وعبتلها الحلوى في فمها : اكرمينااا بسكوتك بالله علييك
لينا تاكل في الحلوى : خيرررك قاعدة نركب في الاغنية مع الموقف
فرح شافت للبنت : تقدري تتفضلي وخيتي مانبوش مشاكل
البنت شافت لفرح وقامت حاجبها : تلزي فياا قصدك ؟؟
زهور : ومزاال تسألي ؟؟ ، ايي تلز فيك امشي لصاحبتك هههههه
لينا شافت لزهور : اسمعيي في محل جيلاتي هني شكله مششش عااادي
زهور شافتلها : تي لالا شفت محل شااورما افففف شكله خطييير
البنت كتفت يديها : صدقت فيكم لما قلت مفجوعات
زهور شافتلها وبهزوة : قاعدة هني انتي ، مش قلنالك وجهك درقيه
لينا شدت يد زهور : خليها واقفة بروحها تعاالي ناخدوا شاورماا
مشوا زهور ولينا وخلوا البنت واقفة بروحها ، مانحكيلكمششش على وجهها كييف بددي لما خلوها واقفة ومشووا ، منظر وحدة مهزبة هدا اقل كلمة تنقال
اما فرح شافت للبنت كيف واقفة ووجهها مهزب ، ضحكت بينها وبين نفسها ، تستاهل مايجيها
فرح مشت وراا البنات : استنوووني
لينا تلفتتلها : نعمم
فرح ضحكت : هههه حتى اني جعت
زهور صفقت : ههههههه ايوااا فرووح بتبدي زينااا
فرح : ههههه خلي نمشي معاكم مدامه الشباب مش معانا توا
طبعا الشباب احمد ومراد مشوا يدوروا في تاكسي ، وخلوا البنات بروحهم لما يكملوا يجوهم
زهور خشت للمطعم : ههههههه هديكا المهزبة قعدت واقفة بروحها
لينا ادف في زهور : فيكينا من سيرتها اطلبينا اي شي جعاانة
بعد عشرة دقايق
فرح شافت لزهور وعيونها بيطلعوا : قلت جعاانة لكن مش بنمووت
زهور مبتسمة : فرح كولي وانتي ساكتة
لينا شافت لفرح : شفتيها الطاولة هاادي كلهااا ، توا تقولي من بياكلها بت..
زهور قطعت عليها وهي فخورة بنفسها : بنااكلهاا اني
فرح بهزوة : توا علاش فخورة بروحك ها الانجاز يلي بديريه
زهور بدت تاكل : اي انجااز بنسبة ليا ، الله ليناا شوووفي البيتزا شكلهاا يشهييي
لينا : حييي خلي بنااكلهاا
وبدوا لينا وزهور ياكلوا في كل شي
اما فرح تشوف ومصدووومة شن هداا ، المااكلة هادي كلها ويين تمشيي ، مشش باين عليهم بككل ،والله صدقت فيهم هديكا لما قالتلهم مفجوعات
شافتلهم وهما يبدلوا في صحون بعض ، وكل وحدة توكل في التانية : مافيش فااايدة ، زي بعض
قعدوا ياكلوا ومدورهاش
لينا شافت لزهور وبهمس : درهتلي كبدي ، نحس في روحي مع مديرة مدرستنا
زهور بهمس : كان نديرولها حظر ونفتكوا منها ههههههه
لينا تاكل وتضحك : ههههه واككك ياااريت اول وحدة هي
فرح تاخد في المية بتشرب : توا بديروا روحكم تتكلموا بشوية ، سمعتكم
زهور : اسمعي من شدك ههههههه شن رايك فيها لينا
لينا شافتلها : لا باسلة كيف قلتيها
زهور وقفت ماكلتها : بااهي علااش اطيحي فيا قدام اليابسة هاادي ، جاامليني
فرح فتحت عيونها على كبرهم : وفيي وجهيي تقوليلي ياابسة
لينا شافت لفرح : مرة تانية توا نقولولها في ضهرك ههههههههه واككك شن رااييك زهوور والله مليحة كيف قلتها هههههههه
زهور شافت ل لينا : لالا باسلة كيف قلتيها
لينا حدفتها ب شيشة المية : بااهي جااملتيني شوية قدام المتعقدة هيااا
فرح تكنطت : هييي انتتي ويااها احترمووني شوية
زهور ضحكت وشافت ل لينا : هههههه المديرة ولعت
لينا تضحك : ههههههه توا بتعطينا ملفاتنااا واككك هههههههه
فرح ناضت من الطاولة : اني الغالطة يلي جاية معاكم
زهور تاكل : هييي يا مديرة قعمزي كولي قدامنا طريق طويلة رااه
فرح طالعة : معش نببي نسدت نيتي
مشت فرح وخلتهم
لينا شافت لزهور : توا شن قلنالها حني
زهور تاكل : فوتيها مديرة حساسة شوية
رجعت فرح بسرعة : والله ماتتحشموا هييي
لينا انخلعت : مشش قلتي بتمشي شن رجعك
فرح رجعت لكرسيها : توقعتكم بتجوا وراي وتقولولي تعالي كولي
زهور شافت ل لينا : ههههههه مششي حني معطينهاش وجهه
فرح تاكل وتشوفلهم بهزوة : مش طبيعيات
لينا : لا صناعيات واككك هههههههههه
زهور تصفق : هههه مشش عاادية لينااا هيااا هههههههه
فرح بدت تاكل ومعش دورتهم هما وبرادتهم ، لانها لو عطتهم وجهه اكتر معش بتحز
......................................بقلم وصال الحمحوم
ساكتات ويشوفوا لبعض مش عارفين كيف يكملوا كذبتهم يلي بدوها
عمر يحاول مايتعصبش : نتكلم اننني !!!
هناء شادة صوابعها بتوتر : ي يا عمي ، حني انخطفنا على ايد ناس ماشفنهمش بككل
عمر بدت ترقاله : يا بنتي اني مش عييل صغير تضحكي عليه بكليمتين ، قريب عشرة سنين ومااشفتوش من خااطفكممم هاادي كيف جتتت هاا كييييف ؟؟؟؟
هند متوترة : ما ماهوو ياا بووي ، مش حني بس كنا مخطوفين
هناء متوترة : اي اي مش حني بس في معاناا هلبااا بناات في نفس المكاان
عمر شد شعره بالقوة ووجهه احمر : بااهي فهمووني كييف خودوني على قددد عقلللي !!
هند شادة يديها بتوتر وهما يرجفوا : ك كناا محطوطين في مكان مش عارفة وين موجود بزبط ، يخشولنا ناس ملثمين
عمر شاد يديه على بعض وهو في اي لحظة ينفجر : اي شن يديروا ؟؟
هناء تكلمت قبل ما هند تتكلم : ك كانوا يجيبولنا ف في
ماقدرتش تكمل كلامها ، لانه يلي بتقوله ح يكون طااامة
عمر وااااااالع : اااااايييي تكككلمييي
هنااء شادة يديها بالقوة تكلمت بسرعةوهي مش حاسبة قيمة الكلام يلي بتقوله : كانوا يجيبولنا حني ومجموعة كبيرة من البنات ممنوعات ، بش نخدموهملهم وبعدها يجو ياخدوهم واتيات
هند شافت لهناء بصدمة ، هااادي شننن قاااعدة تخررررف شننن قاااعدة تخرررط ماالقتش الا السبلة هااادي
عمر حط يديه على راسه : ياااا فضيحتك يااا عممر ياااا فضيييحتككك
ام هند ناضت بسرعة جابت المية : لا إله الا الله، وحد الله ياا عمر بشوية عليك
عمر معش يشوف شي قدامه ، طاح عليهم من قوة صدمته
ام هند تعيط : يااااا عمممر
قعدت تبخ عليه في المية ، تضرب في وجهه تبيه
ينوض
اما هند شافت لهناء وفنصت فيها ، متع هداا كلااام تواا ؟؟؟
قعدوا يحاولوا يمرحوا عليه وينوضوه
بعد دقايق كانت العيلة كلها متجمعة عليه ، استاقض عمر ، لكن اثر الصدمة قاااعد
هناء وهند قعدوا ساااكتين وبسس ، مشش عاارفين شن مزال يستنى فيهم ، كييف بيكملوا الكارثة يلي بدوا فيهااا
...............................
شاف للمطعم الكبير يلي قدامه ، ماليشي هلبا واخد الادارة متع المطعم هدا ، قعد يتفرج على المطعم من برا ، وفي داخله ابتسامة نصر ، واخيييرا اثبتت ذااتي ، بش في خمسة سنين بس نستلم ادارة مطعم هدا مش شي ساهل ، اني لتوا مش مصدق ، قااعد مش مستوعب ان اني مدير المطعم الضخم هداا، قبل خمسة سنين كنت لااا شئ حتى ابسط الاشياء ماعنديش ، بس توااا ، شوفووني تووا مديير واحد من فروع مطاعم مشهورة
شاف انعكاسه على باب المطعم ، اييي ياا تااامر انتت اثبتت نفسكك اثبتت انك تستحق تكون مدير المكان هداا ، ابتسم زي كل يوم ، وخش برجله الايمين لمطعمه وهو يسلم على موضفينه يلي كانوا يحترموه هلباا ومقدرينه هلبااا كا شخص
خش لمكتبه ، وابتسم ابتسامة عريضة ، هدا يلي كنت نطمحله من لما خشيت للمكان هدا
رجوع بالذاكرة ^^
""""""""""""""""""""""""
وصلوا تامر وخالد لطرابلس ، بعد ما محمد اصر على قراره انه يقعد في مصراتة ، كانوا الطريق كله ساكتين كل واحد يفكر في المستقبل يلي قاعد يستنى فيه
نزلوا الاتنين لشقتهم بعد ماخلصوا التاكسي ، ركبوا الدروج بتثاقل ، كل واحد فيهم يفكر في حياته ، كل واحد ثقلت عليه الدنيا ، يذكروا في حياتهم يذكروا في عيلاتهم ، يذكروا في الرواد يلي مش عارفين وين اراضيهم
فتحوا باب الشقة بهدوء ، وبخطوات هادية خشوا
تامر قطع الهدوء يلي صاير : توا شن بنديروا ؟؟
خالد تنهد وهو يفتح في الروشن متع الشقة : توا بنرجع نحاول نخدم في نفس المطعم ، نبوا فلووس ، مفلسيين
تامر سند روحه على الصالون : وبعدها ؟
خالد اتكى على الصالون : وبعدها بندوروا على رهف كلل يوووم بنشوفوا اخرتها شني
تامر غمض عيونه : تعبنااا
بعد ساعات
مشي خالد للمطعم ، ولقاه مسكر لأغراض تطويرية طبعااا الشي هدا عكر مزاجه ، لأنه مشش وقت يتسكر تواا
رجع وفي طريقه قعد يدور في شغل لعله يلقى اي شي يطلع منه قرشين لكن مااافيييش ، رووح وخيبة الامل في وجهه
فتح الشقة لقي قدامه تامر : هاا شن صار ؟؟
خالد وجوه مش حلو : مش عااارف انني اموورنااا امتى تمشييي كوييسة طووول
تامر فهم ان الشغل مافيش صارتله خيبة بس حاول يهدي خالد يلي بدي يطيرله من الوضع يلي صايرلهم
خالد متكنطي : تواا انني هداا كلله شن جاابني ليييه ، كنت لا بيااا لا علياا بعيلتي بصحاابي ، حياااتي ماشية صح ، لن يخشلي فيها الشيطان سايمون ويلخبطهالي ، تي كااااان نشوووفه بسسسس لمااا نشده من رقبته
سكته تاامر يلي لقي خالد معش قادر يتحكم في اعصابه : بشويية بشووية الاعصاب هاادي ماتجيب شي ، غر الضغط والسكر
خش خالد لدار وسكرها وراه بالقوة معش يبي يسمع شييي ، تعببب تبهددل يبي يرجع لحياااته هدااا كله معش يبيه
............................
بعد مرور اسبوع *
محمد كمل شغله طبيعي جدا عند عيسى، وكل يوم قاعد يزيد اعجابه بشغله ، مايعرفش ان محمد فاهم الشغل هدا اكتر من روحه مايعرفش انه هو نفسه مفهم ومدرس محمد في المجال هدا
اما تامر وخالد قاعدين على نفس الحال يدوروا في شغل لكن كا العادة مالقوش شيي ، مش بسهولة بيلقوا الشغل يعني ، جو خالد قاعد متعكر اما تامر مايقلش عليه حتى هو جوه متغيير
سمعوا صوت الباب يطق ، تامر وخالد شافوا لبعض بإستغراب ، من ليطق عليهم مافي حد يعرفهم هني ، وحتى محمد قاعد في مصراتة ،
ي في بالهم للحضات هو محمد غير رايه وجيي هنيي ؟؟؟
تامر شاف لخالد : هدا اكيد محمد من بيجينا غيره ؟!
خالد واقف قدام الروشن وشاد قهوته في ايده : افتح الباب توا نعرفوا مني
مشي تامر بسرعة فتح الباب يلي من بكري وهو يطق ، اول ما فتح الباب وقف زي الصنم
اما خالد تكلم من داخل : من على الباب يا تاامر ؟؟
خالد اول ما وصل قدام الباب انصدم من الشخص يلي واقف ، هاادي شن جاابها هني
يتبع..................
شن بيصير في فرح والباقي وهل بيقدروا يوصلوا لشباب ؟ 🤔
شن بيصير مع هند وهنااء والكدبة الكبيييرة يلي كملتها هناء ؟؟؟ 🤔
من هو الشخص يلي انصدموا خالد وتامر لما شافوه ؟ 🤔
توقعااااتكم للحلقة الجاية ؟ 🤔❤
تفاااعلواا كومنت وتصويييت 😍❤
بقلم وصال الحمحوم wesal_elhamhoum ❤