🌙حسناء القايد🌙
👑oumaima mega 👑
⚡28⚡
حلت هنية غا الباب بشوية ...كتبان ليها مرة كبيرة جدعة ديكوردية (مرة و قادة ) لابسة جلابة بالكحل من الطرز العالي وحتى هي باينة فيها من الدار العالية و فوق راسها قب و لثام على فمها و نيفها ...و هازا طيفوور كبيير و من وراها شلاا عبييد و خدم هازيين الطيافر و الجيران يطالوو و يتخااابروو
هنية : لالة عويتقة اش هادشي ؟
عويتقة : حلي خلينا ندخلو و ندخلو معانا هاد البركة ...القاسمية كطل غا سمعت الرجال غيدخلو طارت عند خواتتها الحاجبات باش تعلمهم يتحجبو ... كلهم تلاحو على السبنيات فوق راسهم حتى من حسناء هي لولة دارتها ...و ناضو كيطالو و حسناء وسط منهم ...لالة هنية دخلت و عويتقة دخلت من وراها هازا طيافر ...و الخدامة و العبيد تابعينها و بداو يحطو في طيافر و يعمرو وسط الدار .. حتى وصلو طيافر عند الباب فيهم شلا حويج و حناني و جوالق(مجوهرات) من الدهب و الفضة و الفاكية لوز و الكركاع مرشوشين باللويز من الفوق و صنادق فيهم دهاز العروس ...عاد خرجو العبيد ...و بقاو جوج خدامات واقفات و يشوفو في الدار غا من تحت العين مولفين على الكبر و التواسع ... ماشي على خربة مقشرة كيف عيشة الفيران
هنية تشوف في طيافر : لالة عويتقة اش هادشي ....ايوا جات عندها لالة عويتقة دخلت و جلست بين البنااات لي واقفات و جلست معاها هنية
لالة عويتقة هزت عينيها في البنات واقفات حتى قشعت حسناء من وسط منهم واقفة مبهوضة تبشرت : اجي ابنتي حسناء اجي جلسي حدايا (حسناء شافت في مها هي لولة دارت ليها بعينيها سيري عاد مشات جلست مربعة رجليها و دموع لاصقين عند عينيها ) ايوا ا لالة هنية هاد الطيافر و الخير من عند سيد القايد مصيفطو لعروسو حسناء (تقرست حسناء غا قرسة كيف تصرفيقة )
هنية شهقت : واش هادشي من عند سيد القايد
عويتقة ضحكت بثقالة و نزلت لثام على فمها : هه وعلاه يحسابليك انا لي جيباهم ههه راه جاو هديات تال دريات بناتك سيرو شوفوهم ...البنات كانو واقفات تاسمعو هاد البشارة شافو في بعضهم و خرجو يتجاراو يشوفو الهديات ...اما حسناء فنزلت راسها و يديها بدات تخبش فيهم و مقدتش تحبس بكاها صافي هبطتهم
عويتقة دارت عندها بانت ليها تبكي : مالك تتغبني (هنية هنا عضت شلقومتها و نزلت حنكها ) يكما على فراق الوالدين ايوا ابنتي هادي هي سنة الحياة راه دوام الحال من المحال كنتي صغيرة و لا كبيرة غيجي نهار لي تفرقي فيه معاهم و تمشي عند ناسك (بدات تمسح ليها شعرها ) و نتي تبركالله مرضية و مسقية و سعدك زوين طاح في سيد القايد (حسناء هزت عينيها فيها كيف الجمر هاد سيرة سيدهم القايد لي لصقت فيها و كل ساعة تسمعها ) بلحق سمعي ابنتي و حلي ودنيك نوصيك طبع سيد القايد صعيييييب و ما كتطولش معاه العشرة وصيتي ليك ولدي معاه لولاد باش تبثي لوتاد واخا راه المرا في دارو لا طولت توصل لربع شهر و لا حبلت معاه كتزيد حتى لتسع شهر و تخلي لولد و تزيد و نتي لازمك تولدي معاه ولد كرشك حيت واخا يطلقك غاتبقا يدو سخية معاك و يخلصك على داك الوليد طول حياتك وحاجة خرى فاش دخلي لدار سيد لقايد كوني عايقة وفايقة لا تسرجي حتى تلجمي و عقدي عقدة صحيحة ولا تكلمي حتى تخممي لا تعود عليك فضيحة...حسناء فاتحة عينيها على وسعهم لي غارقين بالدموع اش هاد جهنم الكحلة فين غيلوحوها والديها باقا حتى متزوجت كيدويو ليها على طلاقها واش هادي هي العيشة لي غتحلم بيها اي بنت واش هادا هو زواج لي كتحلم بيه كل عزبة ...حست براسها غادا مسخرة تجيب ليه لولاد و يخلصها عليهم و ترجع فحالها
عويتقة
🌙حسناء القايد🌙
👑oumaima mega 👑
⚡29⚡
سكتت وحدرت الراس حيت مها كتحلف عليها من ورا عويتقة ... كتفرك يديها و تخمم اش غتعمل يا سيدي ربي راه مابقا بيديها والو هاهيا غاجبدت الهدرة مع ميمتها شيرت عليها ببلغة اش غاتزيد معاهم الهدرة ...و عويتقة دارت نوضت هنية يمشيو لطيافر يشوفوهم راه سيد القايد فخر الدين ما نسا حد من جودو كسا في الدار من الصغير تال لكبير ... خرجت هنية و بناتها فرحانين بداك الخير ...و حسناء تكت على الحيط تشوف فيهم و دمعوعها مزينين خدودها الموردين كيف الجوهر و تحس بقلبها فيه نغصة تاع جنوي
طاح ليل ...و مشات عويتقة و الخدم من بعدما قادو داك الخير و خزنووه ...و البنات على ختهم مجموعات ماكلات ماداقتو غير تهرنن و تطلبهم يعتقوها و هما غا حادرات راسهم لا حول و لا قوة ليهم ....حتى جا السي عبد السلام لي بان فيه خير سيد القايد الجلابة بيضة و شربيل صفر و العمامة زينة هاز صندوق تاع اللويز و الصينية تاع الدهب ....دخل لخربتو و مشا جيهة بيتو كانت جالسة هنية و تخزن في داكشي لبنيتها لي غتعرس تادخل عليها عبد السلام ...يدور على راسو فرحان
عبد السلام : هنية كي عجيتك
هنية : هاي هاي هاي على سي عبد السلام ههه و واتاتك النسويبية تاع سيد القايد (البناات في البيت لاخر غا يسمعو و حسناء غير على كتف ختها القاسمية حاطة راسها وتبكي وتغبن ) شفتي الخيورات لي جاب سيد القايد
عبد السلام جلس تربع حداها و حط الصندوق تما هو وصينية : راه مشيت عدو ليوم في الصبحية قريت على بنتي الفاتحة معاه و عطاني صداقها في هاد الصندوقة (هنية هزت الصندوقة دغيا وحلتها وهي تلقا فيها اللويز و هي تشهق غا شهقة ) و غدا غيعقد سيد القايد مع بنتنا القران في الصباح و ماتجي لعشية فين تعاشا حتى غتكون في دار راجلها معززة مكرمة ...حسناء غا سمعتها فحالا تعلمت بموتها شهقت شهقة كبيرة تاع الموت كتبكي ...و هي تسكتها القاسمة .... و عنقتها خشاتها في صدرها ...و حسناء زيرت عليها تبكيي و تنحط ...و خواتتها غا سكتات يشوفو قطعت ليهم من قلبهم
عبد السلام : واااش سمعتووو ا البنااااات غدااا غاتمشيي ختكم لبيت راجلها
هنية : وزغرتووو ا البنيات هههه ...و طلقووو البنات تزغرييتة عااالية ماشي على فرح ختهم و ليني على بكاها .. . باش حتى لي ماسمعش من الجيران يسمع ... و حسناء تطلب ربي تكون هادي غا حلمة و تزنكر على القاسمية و تزير
في قصر السي القايد فخر الدين لي تطفااا فيه الضو و شعلوو فيه القنادل ...القصر صااقل تقوول مافيه فرح ماغتجيي ليه عروسة موالفيين بعريسات سيد القايد يمشيو و يجيو ....كان سيدهم القايد كيتمشى بين القواس تاع القصر و داير يدوو من وراه و غادي كيتمشى و الغوباشة طالقها ....حتى خرجت من الضلمة شروق من وراه منزلة راسها و فاتلة شعرها ... و تبسيمة على فمها
شروق : سيدي فخر الدين ...تغنننت بسميتو في لسانها
فخر الدين وقف و دار غا نص دورة واقف جدع بلاما يدور عندها : شروق ؟ اش كين ؟
شروق تهز فيه الشوفة من تحت العين كيبان ليها غا ضهرو : والو اسيدي غير نعست الدراري لي مبغا يجيهم نعاس حتى من حجياتي منفعوش بغاو يشوفوك
فخر الدين هز غا راسو بااه كلامو زييزوار قاطع و مانع : غدا ندوز لعندهم و نشوف اش خاصهم ... و دور راسو كمل طريقو ...شروق هزت فيه غا العين و تبسمية وصلت لودن حاضياه حتى يغبر
🌙حسناء القايد🌙
👑oumaima mega 👑
⚡30⚡
في الكوزينة تاع القصر الكبيرة ...لي مقسمة لثلاتة الطبقات ...لي لفوق فيها الخزاين تاع الزرع و الخضاري و الدويسرات ...الخيير و الخمييير و الطبقة الثانية لي فيها الماعووون و اللوانييي ...و طبقة لي لتحت هما لي فيها خير الله خدااامااات و عبدااات مشريات ....يضلو كيطيبو و يغسلوو و يحكوو ....كانو شي ربعة الخدامات جالسين في لرض و يعجنو و يكرصو لخبز الرطب لهشيش لغدا ...و جوجات واقفات يغسلو في الماعون و يكرضو الخضرا هما لي شادات ليل
لي كتكرص الخبز تنهدت و دوات و تزنكيرة على سنانها : ايوا هادشي لي بقا غير بنت حداد الوسخ و العفن تجيي تولي من لسياد
لي كتغسل دارت عندها : حشومة عليك ا فاخيتة تهيا راه بنادم و رزقها جابو ليها الله واخا راه سعدها مغاير على السعود شفتي القصر كيف بالو هاني و صقيرو يصمك الودنين تقول كاعما غتجي ليه عروس
الخدامة الثانية : كتعاود السالمية و نزهة فاش مشاو لخربتهم ديرا كيف قفص الفراخ صغيرة و موسخة
فاخيتة : و منين سيدي بغا وحدة من بنات الدراوش يشوف فينا غا حنا بعدا علاش مشا لبنات الهجيج
و هي تطلقها وحدة بالضحك كانت تتنقي الخضاري : ههههه هااااويلي ا فاخيتة ياكما كنتي تسناي سيدي يدور و يشوفيك
فاخيتة هزت يديها من العجينة و دارت عندها : ايوا انا بعدا كبرت هنا في الدار الكبيرة ماشي فحال هادي لي جايا لعالم ربي لخنز و الدبان لي غيكون مجموع فيها و غيزيدونا نغسلو عفنها و وسخها كيف خلاوها جدودنا الله يرحمهم خدم يا تاعس في سعد الناعس ....و هي دخل عرشية رايسة ديال الخدامات و لعبيد : اش هاد الكلام الخاوييي (كلهم حدرو الراااس ) طلقووو يديكم قبل الفجر يكون واجد كلشي ...و مشات للخضرة تقلب فيها واش هي هاديك و لا ماهياش
وحدة من الخدامات هزت عينيها : واش بصح ا دادة عرشية سيدي غيتزوج ببنت حداد كيف كيقولو لبنات
عرشية دارت جدعة خرجت فيها عينيها : و اش حرق شطاتك نتي بزواج سيديي هبطي لعين و كملي شغاالك ...معاودوش معاها اللغا و رجعو يخدموو حادرات الراس
ايوا صبح الصباااح و فتح .... الخبار ضربت فحال الزواكة ديل رمضان في المدينة كلها ...قال قال سيد القايد فخر الديين خلا على بنات الديور الكبار و اختار بنت الحداد لي ميكساب ميعلام ...و لات السيرة على كل لسان هاد الصبحية ....
قدام دار الحداد ...واقفين الطبالة و الغياطة بسلاهم الكبار و يطبلو و يغيطو يعلنو على الفرح ...و الجارات كلهم بحايكهم يطالو من شراجم ...و الدراري الصغار يطالو و يتجراو قدام باب الحداد المفتووح ....كانو جالسين الحباب و الصحاب و شي جارات في قلب الدار و يهللو تهلال ديال الفرح ...و العبيد يتسخرو جايبيين الماكل و الشاراب من دار سيد القايد و يوكلو الناس و يضايفوهم ...الفوق في السطح مفرشين الزرابيي ...و عويتقة و هنية و شي عيالات يهللو ...و مجلسين وسطهم حسناء ....ملبسينها ثوب خفيف و يطليو ليها لحمها البيض الملق بالحناني و الورد و الزيوت ...و هي غا جالسة متسمع ماتشوف من لبارح منعست ماداقتو و هي معنقة لقاسمية ...فحال شي دريرية صغيرة غايفطموها من ولديها ... كتسمع التهلال و فحال الدايخة تهلال عندها فحالا تيقراو عليها و تيغسلوها باش يلبسوها كفنها ... كيقتلو فيها و هي حية