اشر ع نفسه برفعة حواجب...
امنه وهي مغمضه عيونها بعصبيه:اطلع اطلع ..
كلهم يراقبو بصدمه شن اللي خلاها تنفعل هكي..
"مش طالع"
شبحتله بتفنيصه وقالت:شن هي؟
عبدالقادر بإبتسامه : مش طالع...مط شواربه بتساؤل وهو يوزع في نظره حواليه..ماعندي علاش طالع؟!شبحلها..
آمنه شبحتله شويه وقالت؛ماعندك علاش طالع ؟!! اشرتله بسبابتها وقالت..انت بالذات عندك ميه سبب وسبب..قعدت تعد ع صوابعها...مش جايب اللاب..يعني مش جايب البحث..مستهتر... نزلت ايديها وكملت تقول..وقتك كله رايح في الضحك والتسهويك والدوة الفاضيه..انت ببساطه جاي تلعب مش جاي تقرا ونماذجك انت مانبيهمش يحضرولي..اني لو كنت منك احترمت نفسي وسيبت القرايه ومشيت دورت ع صنعه نفعت بيها نفسي..بدل ماقاعد هكي قيمتك من قيمة الصفر...
الصمت عم القاعه كامله ...الكلام كان واعر هلبه وهو معروف عنه انه انسان بارد ومايهتمش مهما انقاله...
بس هالمرة شوي صعب الموقف..مهما كانت تقعد بنت اللي قالتله هالكلام..وفمجمع...
مستحيل يكون الكلام مر عليه عادي وماوجعاش أو اثر فيه..
هي قعدت تشوفله بحده وتراجي في رده...
والطلبه يشوفوله ويراجو فردة فعله كذلك...
تبدلت ملامح الصدمه المرسومه ع وجهه لإبتسامه..قال: صح عندك حق...
ملامح وجهها ارتخوا..
عبدالقادر بإبتسامه:بس اني هالمرة ناوي نتخرج خلاص ناويها بكل معنى الكلمه..وانتي..استاذة..تبي توقفي في وجهي وتزيدي تفشليني بدال ماديري العكس...
هي وجهها ولا احمر وزعت نظرها ع الطلبه ..
عبدالقادر: باهي صح اني ماجبت شي اليوم لكن نقدر نقعد نحضر ونشوف شن دار غيري..ضحك وقال ..بالك نستفيد..خير مانطلع برا ونقعد ندور بلافايده!!
هي شبحت للاب بإحراج شويه..بعدين قامت عيونها وشبحتله وقالت:تمام...اقعد...لكن لو شفت اي تصرف فيه استهتار ولاتسهويك والله العظيم ماك قاعدها..وتوا برا قعمز غادي...اشرت بسبابتها ع اخر كرسي...
هو التفت وشاف وين اشرت بعدين رجع شافلها..ابتسم وقال: حاضر💓
رمشت عيونها وغيرتهم عنه..
هوضحك ضحكه خفيفه وطلع من الكرسي ومشي طول للكرسي اللي قالت عليه...
والطلبه يشوفوله وهي معاهم..
وصل في الكرسي وقعمز وهو يشبحلها..
هي طول غيرت عيونها عنه ووجهها الوان وقالت:احمم..هيا خليكم جاهزين بنبدا نادي بالإسم ع حسب الأبجديه..
آلاء خليفه..
ناضت الطالبه اللي نادتها..
بعد تكلمت هيا وياها...مشت قعمزت ع كرسي الطالبه والطالبه باديه تشرح عن بحثها..
وهو مركز بنظره ع آمنه..كيف مركزة مع البنت كيف تسأل فيها وتتناقش معاها..
وكيف تناقش في باقي الطلبه..
جمان:حسيتك تأثرت..
عبدالقادر بإبتسامه:بشني؟
جمان :بيها...بكلامها..
عبدالقادر :احمم..مش عارف اول مرة حد يكلمني هكي ونحس بكلامه مدايرلي زي الوجع..
جمان :يقولوا الشخص يتأثر بكلام الإنسان اللي يعنيله حاجه..
قعد يفكر في كلامي بعدين رجع شافلها وابتسم وقال:ممكن💓
💕وتمر المحاضره..
وكل مرة يطلع طالب يشرح بحثه..
هو لما كان يتأمل فيها ركز ع كم المعلومات اللي عندها..
كانت تقول في معلومات زياده عن المنهج كانت توصل في المعلومه بسلاسه..كان الكل مركز معاها حتى صحابه اللي كانوا يشبهوله شويه في لامبالاته..
اثرت فيه ...تاثيرها عليه كان واضح من البدايه..
تصير هلبه..يمر علينا في الحياة انسان يأثر فينا ويوصل تأثيره علينا في العمق
وممكن يغير حياتنا بالكامل 💓
ناضت وقعدت تمشي للطاوله
وهو مركز معاها..ممكن اكثر شي اثر فيه ميزتها هادي..كانت تبان واثقه من نفسها هلبه وهالشي مش مأثر عليها ولامبين انها حاسه بالنقص بسببه..
وصلت ورا الطاوله وقالت:المجموعه الجايه بإذن الله الخميس القادم..اللي مادارش يلحق يدير..
شبحوله زملائه..
هو ابتسم وهو مركز عليها كيف تحط في لابها في الشنطه..
بعد كملت شدت شنطتها وقالت:السلام عليكم..
سرقتله نظرة لقاته يشوفلها غيرت عيونها طول وكملت طريقها وطلعت من القاعه.. والطلبه وراها..
جوه صحابه يجروا..
فاروق بضحكه:والله ماعرفتك بكري..
جلال:هههههه..حتى اني..
هو ماكانش لاهي بيهم كان يشبح للطاوله متاعها...
بعدين ناض فجأة ..
ومشي طول للطاوله قعد يشوف فيها من فوق من لوطا..من جنابها...دور بعيونه في القاعه..
بعدين ..
هههههههههههههههه..
فاروق وجلال😞😞
عبدالقادر هدا ضحك وقال:عازمكم ..
فاروق برفعة حواجب:كيف صار!!
طلع قدامهم وهو يقول:هيا بسرعه قبل تزحم ع ******
عيونهم ولوا قلوب لما سما اسم المطعم...😍😍
وطول طلعوا في جرته..
هو لبس نظاراته بإبتسامه...
ومشي طول بطريقه للواجهه بش بيطلع..
وصل غادي..شافها..
كانت تقص في الطريق ..ركز بنظره ع الشنطه لقي الورده باينه منها ..
ابتسم وقلبه دق بقوة💓
⚡عبدالقادر
صح هالمرة دق بقوة ياما قريتها فرواياتك وهدا وين حسيت بيها 💓بس المشكله ان بعد الدقه القويه هادي تمرميد وايام حرف..
جمان :بس صدقني كل شي حيكون حلو بعد هالدقه حتى لو كان صعب ..
تنهد وسكت وهو يشوفلها كيف تتحرك بسيارتها ..طلعت برا الساحه..وطلعت ع الكياس وكملت طريقها وهو معاها بعيونه لين اختفت..
استاقض ع ضربة يد صاحبه ع كتفه وهو يقول:شن تراجي ياصاح الساعه 4:15..
عبدالقادر :تحركوا قدامي ياهامه انت وياه وانتم ماصدقتوا😒
ضحكوا صحابه..
ومشوا مع بعضهم لسياراتهم..
🌟🌟🌟🌟🌟🌟🌟🌟🌟
وباهي شن غير رايك توا؟
الهاديه وهي تشرب في القهوة: مم..خوي مصر ووجعلي راسي من كلامه عليها...ماعندي مانديرله كان شاد فيها هلبه هكي..انت كلمها وشوفها..
عمران هز راسه بإيجاب وقال:الحق مافي حد طلبها مني قبل المشكله حتى فلوسي ماطمعوا حد فيها.. خل يطمعوا راضي والله راضي المهم تتزوج ونطمن عليها..يعني..مش عارف كيف في اللي معيوبات اكثر منها وماشي حالهم!!
الهاديه:منحوسه بنتك هادي ..وفوق هكي ديما مكزمة ولبسها ومنظرها وكل شي فيها غلط في غلط..هدا كله وتبي يجيك حد يطق بابها!!
ملامح وجه عمران كان باين فيها الضيق الشديد..
الهاديه:ماتزعلش مني ياعمران ماقلت كان الحق..والله نكلم فيك عليها لخوي من فوق نفسي..
عمران:مش لهالدرجه ياهاديه..
الهاديه :مش لهالدرجه!!من بكري انت بلسانك كنت تقول ماحد كلمك عليها وحتى فلوسك ورزقك ماطمع حد فيها!!
عمران تنهد بضيق وسكت..
الهاديه :اسمع لو ماتبيش قول مانبيش ماتماطلش..
عمران شبحلها وقال:خليني نقلبها فراسي هاليومين ونشوف وبعدهانرد عليك..
هزت راسها بإيجاب وهي رافعة حاجبها ورجعت تشرب في القهوة..
🍂🍂🍂🍂🍂🍂🍂🍂
الساعه 5:30عصرا..
مقعمزين في الجنان..
شن جابنا ع بالك ...
روبين بضحكه:تو انتي ياحنينه ديما تلومي وتقولي خيركم لاتجوا ولاتسألوا واهو جيت ومش عاجبك..
تبرة:اني اللومان مبطلاته من زمان لانفع معاكم ولا دار ثمرة والناس ماتلوم كان ع اللي يعزهم ويقدرهم ويأثر فيه لومهم..
روبين طارتلها وقالت بوقاحه:ايه ياحناي من الأخير اني جايه لآمنه..
ضحكت تبره وهي تقول :جايه لآمنه؟!ماأغرب من هديكا الاهادي..هههههههه..
روبين شقلبت عيونها وقالت:وينها هي..
ع طلعة امنه قالت بتهكم:جيتي فوقتك غريبه..
روبين :تلاقيتي عليا انتي وحناك..
فنصت فيها آمنه..
ناضت تبره وهي تقول:ماثمرت الربايه في امكم كيف بتطلعوا انتم...وخشت وخلتهم..
آمنه بحده:انسي انها حناك..قدري انك تكلمي في عزوز كبيرة ع الأقل..
روبين :اسمعي والله ماوقت محاضراتك..دسيهم للكليه متاعك..المهم توا الفلوس وين..
شبحتلها من فوق للوطا وهي طلع في ظرف الفلوس من جيب التوته وحدفاته قدامها...
شبحت روبين للظرف اللي طاح لوطا ..مطت شواربها لداخل بغضب..وطبست وخداته..
امنه وهي خاشه للحوش:سكري الباب وراك..
وخشت داخل..
وقفت ع حيلها وهي تشوفلها بحقد..
بعدين لفت ومشت بغضب وطلعت من الحوش..
🌟🌟🌟🌟🌟🌟🌟🌟🌟
الساعه 7:30مساءا..
واقف في جنان الحوش يفكر بسرحان
ع وجهه ملامح الضيق
حاس روحه معاش زي قبل في شي تغير فيه بقوة
⚡عبدالقادر
ههههههههه تي غير هدي بالله عليك..مدردمه اليوم هلبه "قصده دراما"
الحكايه مش هكي بكل
ايه اني واقف سرحان ..اشر بيده ع النخله وقال:واحل فيها ومش عارفه هادوا عراجين اللي طلعات؟
جمان: ايه عراجين
عبدالقادر :متأكده!!
جمان بحزن:ايه كانت عندنا نخله في حوشنا لينا سنين زارعينها طلعت عراجين وحتى بلح لكن مالحقناش نفرحوا بيها...حسبنا الله ونعم الوكيل💔
عبدالقادر :فكينا من الدوة فالسياسه ايواااه..اشبحيلي ..متأكده انهم عراجين..
جمان :ايه عراجين ياعديم الإحساس😒..وبعدين قولي شن جد عليك غير لقسم النبات بعد هزايب التيتشر😁
عبدالقادر: ياحااانطه😑...حناي ليها مده تراجي فيها امتى اطلع عرجون ..خل نمشي نفرحها..
وخش طول داخل طول بش يحكيلها بس وقف لما سمع..
"مش دايميله ياتجديده"
تجديده تنهدت وقالت:باهي شن بدير معاه هو هكي الله غالب مانافع في شي.
فرج:الدلع خربه ..خربناه بربايتنا في قولة يتيم وحرام ديروله هكي وماتخلوا شي فخاطره وهادي النتيجه..
نخاف بعد ربي ياخد امانه حقه في الورث يريح في الدوة الفاضيه ويقعد هكي..والله ولا واحد من عمامه حيشبحله بنفص عين
تجديده: كلامك يخوف ..شنو مخليك تقول هكي توا؟
تنهد فرج وقال:خوفي عليه..واني نشوف فيه مش مدور ولامعدل ع شي وواخد كل شي بالضحك واللعب قعدت كل عام نقول تو يكبر ويعقل وهو وين يكبر يزيد هباله.
تجديده تنهدت بألم وسكتت..
هو وخر خطوة ولف بيمشي.
⚡عبدالقادر
انتي شكلك منكده وتبيني نتنكد معاك ..
جمان :ابدا بالعكس نبي نغير جوي بس مع الأسف صار العكس..بس قادر حق كلامهم..
عبدالقادر تنهد ووقف بعدين قال:بجد اليوم اول مرة نحس روحي عالة ع المجتمع وبلا فايده..ع قولت الصادق..
"قدورة"..
التفت بعد رسم ع وجهه ابتسامه مصطنعه:نعم ..
تجديده: تعال وليدي ذوق البسيسه اللي درتها جابها جدك اليوم من الطاحونه..
ابتسم مجامله وقال:ماعنديش نيه..
ولف ومشي طلع من الحوش..
طول مشي لسيارته وركب...
يبي يطلع من الحوش..
لأول مرة ينخنق هكي...ويفكر يهرب من اكثر مكان يحب يقعد فيه...
🌟🌟🌟🌟🌟🌟🌟🌟🌟🌟
في احد مدن الملاهي ..
في العاصمه طرابلس...
كانت موجوده مع مجموعه اطفال هي ووحده تانيه معاها..
كانت تلعب فيهم ع الزلحيبه.
وتضحك بفرح معاهم...
الأطفال كانوا ايتام....تابعين لأحد دور الرعايه..
كانت المشرفه تشوفلهم بإبتسامه..
بعد مالعبت الصغار ع اغلب الألعاب ولعبت معاهم..
وخدوا الصور...رفعتهم لوحده من المطاعم كانت حاجزة فيه ليهم..
تماضر "المشرفه": بجد مش عارفه كيف نشكرك...
امنه بأبتسامه:واجبي..
تماضر :احمم ..خاطري نسألك سؤال بس خايفه يضايقك..
امنه ابتسمت وقالت:لا عادي اسألي اللي يخطر ع بالك..
تماضر:احمم..انتي يتيمه؟
امنه ابتسمت بتهكم وشافت للصغار وهما ياكلوا وقالت:علاش سألتيني هالسؤال..
تماضر: حسيتك زيي...فاقدة شي وتبي تعطيه..
امنه شبحتلها وابتسمت بألم:صح..
ابتسمت تماضر نفس الأبتسامه وسكتت..
وقعدوا الزوز يشبحوا للصغار...
💫نمشوا سريع سريع...لباب المطعم...
انفتح ...
وخش...
كان يدور بعيونه في المكان ع طاوله فاضيه..
انصدم وين جت عينه عليهم...
ضحك ...ولقي رجليه واخدينه لطاولتهم...
"يامساء الورد"
فنصت عيونها والتفتت وشبحتله بصدمه..
عبدالقادر بضحكه:يامحاسن الصدف..ورب ضارة نافعه ..ومصائب قوم عند قوم فوائد
تماضر😕
امنه :تلحق فيا ولاكيف؟!!
عبدالقادر بضحكه :لاوالله صدفه وحق ايات الله صدفه..التفت ع تماضر ومد يده وقال..اهلا وسهلا...
امنه تلقائيا مدت يدها وضربت يده وقالت بعصبيه:برا في حالك خيرلك راهو والله وصلتلي منك لهني..واشرت ع انفها..
الصغار قعدوا يشوفولها بريبه...
تماضر:امنه...واشرتلها بعيونها ع الصغار..
امنه تلخبطت وشبحتلهم :مافي شي حبايبي..
عبدالقادر بضحكه:حييي صغار اختك..وهادي اختك..اهلا وسهلا اني عبدالقادر الأمين طالب عند اختك ومن اهم طلابها الحق..واختك ماشاء الله عليها اسلوبها مليح وشرحها مش عادي..نهنيكم ع التربيه..
تماضر شدت ضحكتها..
امنه بغضب : بابني آدم انت كان مامشيتش توا لما نقربع المطعم ع راسك..
شبح لتماضر وقال:ديما هكي هيا اعصاب وتتحلف فيكم ودايره الرعب في الحوش...
حطت امنه يدها ع جبهتها وهي مغمضه عيونها..
تماضر بضحكه:امنه مش اختي تقدر تقول صديقه..اني مشرفه في دار ايتام والصغار هادوا من الدار امنه متكفله بيهم..
امنه بتفنيصه:تماضر!!!
هو شبح لآمنه بنظرة حلوة وقال: بجديات!!
امنه وجهها ولا احمر قالت:لوسمحت برا في حالك الناس تتفرج..
هو تلفت وقعد يشوف حواليه...بعدين شبحلها وابتسم وقال: حاضر💓
شبحلها شويه بعدين تلفت ومشي لطاوله وقعمز...
تماضر بإبتسامه:يهبل الحق ودمه خفيف..
امنه شبحتله لقاته يشوفلها..غيرت عيونها وقالت:هيا تعشوا بسرعه معاش في وقت لازم تروحوا بكري زي ماوعدت المدير ..
تماضر ضحكت وقالت:تمام...
امنه رجعت شافت للصغار...بعدين عيونها قعدوا يهربوا غصب عنها جيهته..شبحتله..
غمزلها...
رمشت عيونها ورجعت شافت للصغار..
وهو ضحك عليها..وقلبه دق بالقوة..
⚡عبدالقادر..
وهادي دقه قويه تانيه ...
ع قولت هداكا الراجل...
إن شاء الله خير💓
جمان:ههههههههههه
...يتبع....