#سايمون
#الحلقة١٥
محمد يلبس في كندرته مستعجل : راقبه بس توا ، أسأل بعدين ، ، وحقا هو بعد ساعة يمشي لِشغله يعني عندك ساعة تشوف روحك ،نبيك تراقبه في كل مكان ، هيا بالسلامة
مشي محمد وخالد وقعد تامر مستغرب طلب محمد ، لكن حيراقب ويشوف شن نهايتها معاه
كانوا ماشيين في الطريق كل واحد ساكت ويذكر في عيلته ومساتحشها وفااقدها هلباا
كان خالد يذكر في عيلته واصحابه
رجعت بيه الذاكرة ^^
"""خالد مستعجل ويوتي في روحه لجامعة
نزل بسرعة اتأخر على الجامعة
ام خالد : اسستنى افطر كل يوم ماشي من غير فطور
خالد يلبس في كندرته بسررعة : لالا ماعنديش وقت
اخته رنيم ( هي نفسها صاحبة زهور ^^) : ديما وانت متأخر خاطري نشوفك تفطر معانا
شافلها خالد وضحك عليها : غدوا نفطر معاكم
رنيم ع اساس تضحك : هيهي نفس النكتة ديما ، غدواا جمعة يا زريف
خالد يضحك بصوت مبحوح ويلبس في شاله : ايي نعرف هدا ليش بنفطر معاكم اصلا
ام خالد : ربي يهديك يا وليدي وتبدا زي الناس يلي نشوف فيها صغارهم يقعمزوا معاهم ويفطرو ويهدرزو مش زيك
خالد يكمل عليها وبنفس طريقة كلام امه وبصوت على اساس زيها : مش زيك النهار كله برا مع شلتك يلي بضيعك ، ااااه وخلاااااص تعبت ياااربي تعببببت ، اني شن درت في عمري بش ولدي مش زي الناس
رنيم طاحت من الضحك معش قادرة توقف الضحك ، خالد قلد امه وقال نفس الكلام يلي تقول فيه كل يوم وبنفس الطريقة : هههههههههههههه وااااااككككك معش نقدرررر ، يااا مااامااا شفتي خالد كيف يدير ههههه
ام خالد ضحكت : برا لجامعتك برا ،انت كان حليت فمك معش بتسكت
مشي خالد طلع وخلى اخته رنيم وراه قاعدة تضحك ، ركب طيارته ومشي لجامعته بكل سرعة """"
خالد اتأثر لما اذكر امه واخته ، كان مش حاس بقيمة الايام معاهم ، فلتت منه دمعة مسحها على طول قبل ما يلاحظها محمد
.............بقلم وصال الحمحوم
لينا مرة تبكي مرة تسكت مرة تعيط وطبعا مافي حد مدورها تحاول تهرب لكن مافيش كيف مسكرة عليها من كل جهة ، تشوف لجثة يلي قدامها وفي عقلها تقول استنيني شوية وبنبدوا جثتين
كل مرة مرة يخش عليها حد يجيبلها حاجة تاكلها ، لكن لينا مانعة روحها حتى من الماكلة ، هي تبي تموت بس توا ماتبيش ماكلتهم
كرهت عصام وكرهت اليوم يلي عرفاته فيه ،كرهت اعجابها بيه كرهت كل شيي كل شيي
في مكان كان مش بعيد من لينا
الرئيس : ويين بااقي المجوهراات يااا عصااام
عصام : قتلك مانعرفش يعني لأمتى بنقعد نقولها ماااانعرفش مااانعرفش ، يلي نعرفه وطلعتهولك ،وبعدين شن الطمع هذا يلي عندك مش سادك هدا كله ؟؟
الرئيس بإستفزاز : ايي مش سادني ، وتعرف حاجة كان ماطلعليش باقي المجوهرات، الكلبة لينا اعتبرها الجثة رقم اثنين
عصام تكنطى : راهو نفختهم انت نفختهم ، كل شوية تهدد فيا ، يلي عندي و وريتهولك ، تبيني نعلم بالغيب ولا شن قصتك بزبط
الرئيس : حني هذا اتفاقنا من الاول اطلعلي جمييع المجوهرات متع سايمون
عصام ويلي زااد اتكنطي : وااااااك لا إله الا الله ، يا بني ادم قولي كيف نتفاهم معاك كيييف نتصرف معاك قووولي
الرئيس بجدية: جيبلي باقي المجوهرات
عصام خبط يديه في بعض وقعمز على التراب ، هدا كيف بيتصرف معاه ، يلي يبيه كله اعطاهوله وتوا قاعد يطلب منه في حاجات هو اصلا مايعرفهاش
عصام مستغرب في طمع والجشع يلي عنده ، كان كهف كااامل معبي بالمجوهرات يلي مجمعهم سايمون على كم عصر وحاطهم في هدا الكهف ،سايمون كان يخنب ويحط في الكهف هدا ، منظر الكهف خراااافي هادي اقل كلمة ممكن تنقال في حقه معبي جمييع انواع المجوهراات من كلل مكان ومن كل عصر ، كان الكهف هدا سر اكتشفوه عصام وتامر وماقالوش لِحد عليه ، كانوا ياخدوا ويحطوا في الالة على قد مايقدروا لانهم عارفين حيجي يوم وبيسافرو بيها وحيلقوا المجوهرات هادو زيي الرحمة
عصام يفكر كيف بيدير لرئيس ولطمع الزايد يلي عنده
..............بقلم وصال الحمحوم
مراد قاعد مصدوم حاس نفسه يحلم ولا يتخيل : انتي بجديات هناء
هناء بتبكي وبروحها مش مصدقة انها شافاته مرة تانية ، هي ماتوقعتش انها تشوفه في الحالة هادي ، مصدوومة من كل شي مصدومة من القدر يلي حطها في الموقف هذا : ايي اني هناء
هناء معش قدرت تتحمل وبدت تبكي بعبرتها ، مراد مستك لتوا يحس في روحه يحلم ، متأثر ومعش حس بِروحه لقي نفسه لا إراديا دموعه نزلوا ، بدي يمشي بخطوات هاادية وثقيلة ، مايبيش ينوض من الحلم ، هي هي نفسها هناء بشحمها ولحمها نفس اخر مرة شفتها قاعدة شابة صغيرة ، مراد من غير ما يحس على روحه لقي روحه واقف قدامها ،يبي ايي شي يثبتله انه مش في حلم
مراد بعبرته وبتأثر واضح : يعني انتي هناء
هناء هزت راسها وهي تبكي بِمعنى اي اني هناء
مراد من غير مايحس على روحه طاح عليهم من هول الصدمة !!!
..............بقلم وصال الحمحوم
زهور وفرح رجعو للألة خلاص ملو من الدوران ، شرو كل شي ناقصهم ، وشرو مواد تنظيف يبو ينظفوا الألة ويلمعوها مدامه ماعندهم مايديروا
وصلوا للألة و قسموا كل وحدة شن بتنظف وبدوو ينظفوا فيها
................
بعد ماطاح عليهم مراد خدوه بسرعة ورفعوه للمستشفى
هناء تشوف فيه محطوط على السرير ، قاعدة تشوفله ومتحسرة على مراد يلي تعرفه ، وجهه تااعب هلبااا كل شئ فيه تغير كل شي ، وجعها حاله ماتوقعتش في يوم انها تشوفه بالحالة هادي في حياتها ، بِحكم تغير الزمن هو توا في ٢٠٢٠ يعني توا هي تشوف في مراد نسخة الاكبر بعشرة سنين ، لكن يلي تشوف فيه اكبر بثلاثين سنة مش عشرة
احمد بصوت هادي : هذا هو حاله من لما اختفيتي من حياتنا
هناء تلفتتله بعد ماحست بِوجوده وبتأثر كان واضح عليها : بس حاساته صحته معش زيي قبل صح توا هو اكبر في السن شوية ،لكن مع هدا مفروض صحته ماتوصلش لِهكي
احمد متأثر على خوه : خوي تغير هلبااااا تغير في كل شي ، تعرفي من كثرة حرقته عليك وحرق اعصاابه يلي كان كل يووم ،جاه السكر وهو في عز شبابه
هناء شافت لأحمد :سكرررر ؟؟؟
احمد هز راسه بالخفيف وبوجع واضح على خوه : ايي سكر
هناء مادارت شي غير انها طلعت من المكان ،بِملامح وجهه جااامدة
هند قابلت هناء يلي طلعت ،مشتلها تجري لكن هناء بعدت هند ومشت طلعت من المستشفى !
................
وهي قاعدة تنظف قابلتها ورقة ، وكانت الورقة محطوطة في ظرف رسايل لونه اصفر ، جاها فضول تفتحه خلت كل شي في يدها وقعمزت على الارضية بش تفتحه وتقراه ، فتحت الورقة وبدت تقرا ، قربت حواجبها من بعض بإستغراب في الاول من بداية محتوى الرسالة ، بعدها جتها الصدمة يلي لخبطت دماغها كلللله
فرح بصوت عااالي وفييييه توترر كبييير : يااااا زهوووورررر تعااالييي فيييسع
جت زهور مخلوعة : خيييرك شن فيي
فررح بتبكي : شوووفيييي
زهور خدت الورقة ويديها يرجفو وبدت تقرا في محتوى الرسالة ، زهور صارلها زي ماصار لفرح استغربت وانصدمت في نفس الوقت
زهوور بدت تبكي : كيف بنديرو توا
فرح اذكرت شي وبتوتر : حقا مكتوب انه الساعة مع الرسالة ، الساااعة ويين
ناضوا البنات مفزوعات وبدو يدورو في الساعة
................بقلم وصال الحمحوم
قعمزت في مكااان بعيييد عليهم ، بدون ماتحس على روحها بدت تبكي وتبكي وبشوية بشوية بدي صوتها يعلى ويعلى ، تشهق من البكي ، كرهت رووحها كرهت كل شي وصلها للمرحلة هاادي ، كررهت روحها اكتر لما عرفت مراد جاه السكر والسبب هي ، سبب جديد ينظم لقائمة انتقامها من سايمون ، نكرررهك ياا ساايمون نكررهك
مشت تجري وراها لكن ضاعت منها ، تسمع في صوتها تبكي وبصوت عاالي ، مشتلها هند تجري
هند خافت على هناء يلي ملامح وجهها ماتبشرش بالخيير : هناااء حبيبتي هنااء هدي روحكك
هناء تبكي و بوجه احمر : خليني برووحي
هند جت بتحضن هناء وبتخفف عليها لكن هناء منعتها : هند قتلك خليني بروحيي
هند ماكانش في ايدها الا انها تخليها بروحها ورجعت للمستشفى
شافها احمد وهي جاية من بعيد : هند يااهند
كانت هند مش منتبهة لانها تفكر في هناء وشن بيصير فيها
احمد : نكللم فييك
هند حست بروحها : هااا نعم
احمد شافلها : وين هناء
هند زعلانة على هناء : قالت تبي تقعمز شوية بروحها
احمد : تعالي ناخدوا قهوة بعد الأسترس يلي صار
هند ابتسمت : قاعد انت قهوة
احمد ابتسم على ملاحظة هند : اييااه قاعدة تتفكري
هند : مالا كييف اكييد ، تعالى خلي ناخدو قهوة راسي بدي يوجع فيا
مشو احمد وهند مشو بياخدو قهوة بعد الاحداث
يلي صارلهم
................بقلم وصال الحمحوم
: يارئيس قالت عندها موضوع مهم بِخصوص ساايمون
قالها طارق لرئيس وهو يحكيله شن قالتله رهف
الرئيس بجدية: شن قالت بالزبط
طارق : قالت موضوع حساس بخصوص سايمون ولازم توصلني بالرئيس
الرئيس بجدية : غدوا رهف تكون عندي ولا نقولك توا جيبهالي
طارق : يا رئيس انت عارف الساعة هادي حنى يلي صانعينها يعني مرات في اي لحظة تخرب ، بديت كل مرة نخاف تصيرلي حاجة واني مسافر لعندك
رئيس متكنطي : سااعة ساايمون كانت عندنا من بدلها بوحدة تانية مش هي الاصلية مشش عااارف ، واننني متأكد عندي حد خااين وتيي والله لما نكشفه ، ولما نكررهه في ليوم يلي جباته فيه امه
عصام يسمع ويبلع في ريقه وخلااااص
طاارق : ياا رئيس ساامحني لكن اني معش نقدر نخاطر بِحياتي اكتر من هكي
الرئيس : سلامتك ، عندنا غيرك هلبا لكن قبل كل شي يطلع حررف بسسس حرررف منككك رقبتك هاادي معش تحلم بيها وانت عاارف اني لما نقول حاجة انفذهااا ، وهيا توا ارجع من وين جيت وتوا عصاام ياخد مكانك
عصام فز من مكانه : نعمممممم
الرئيس شافله وبطريقة مستفزززة : زيي ماسمعت
...................
كانوا يشتغلوا في اول يوم عمل ليهم
خالد بدي يمل من الشغل هدا كانوا زبااين نفااخيين
بِحكم انه قارسون ف مشي لوحدة من الطاولات
كانت مقعمزة وحدة سميييينة ووجهها معبي حب ، وشعرها قصييير ومش مرتب ، ولبستها مش مرتبة تكلمت بصوت ومن خشمهااا : يااقرسووون
جاها خالد وبإبتسامة : تفضلي يا مدام
ابتسمت إبتسامة زيي وجهها وبسنون صُفر تقزز منهم خالد : تقدر تقولي يا انسة رورو
خالد متقرف منها ، هاادي خيرها ، طبعا ابتسم غصبا عنه : تفضلي يا انسة رورو
ضحكت رورو ضحكة زي الراجل : هعهعههعع محلاها منك رورو
خالد درهتله كبده ، لكن مسكين ماعنده مايدير لازم يجامل : ههه شكرا لكن شن طلبك بزبط
رورو ع اساس كيوت وطبعا ماعندهاش علاقة بأي كيووت : على ذوقك ياا حلو ، بنشوفو ذوقك ههعهههععع
خالد خلاص يبي يرجع : هههه حاضر
مشي خالد وخش لمحمد في المطبخ متع المطعم: ياا محمد شوفلي اي حاجة واتية نرفعها
محمد ضحك عليه : خيرك والع
خالد كتف ايديه واتكى على الحيط : لالا مش والع
محمد : مالا خيرك
خالد : اني بنطربق مش وااالع بس ، بالله عليك اطلع وشوف الاشكالات يلي برا تجيبلك قداد عشرة سنين قدام
محمد عطاه صحن البيتزا : ارفع ارفع مش وقت جووك هدا توا
طلع خالد واتصنع ابتسامته مرة تانية : تفضلي انسة رورو
رورو ابتسمت : ذوقك حلو ، اممم ذويقك
خالد : صحة
وجي بيمشي
وقفاته الانسة رورو : استنننى
خالد وقف وغمض عيونه ، اللهم طولك يا روح ، اتلفتله وهو ع اساس مبتسم ومن بين سنونه : تفضلي اختي
رورو شكلها تكنطت : شن اختي هاادي لالا اني زعلت
خالد في داخله ان شاء تولعي اني شن دخلي فيك يا خرا : ههه لالا علاش زعلتي
رورو : معش نبي نسمعها اختي ، قولي انسسة انيي انسة
خالد : حاضر انسة
رورو رضت : شن اسمك
خالد بدت ترقاله : خالد
رورو بصوت عالي وهي تتكلم من وسط خشمها : يحليييلللي محلااااه اسسسمك زيييك
خالد تحشم من صوتها العالي يلي الناس تلفتتله وبدت تضحك : ههه شكرا
ومشي خالد بيكمل شغله وقفه صوت رورو المزعجججج : يااا خلووودة
خااالد خلاااص يبي ينتتحر شنن خللودة هااادي مسرع ماطيحتها معااه مصح وجهها وخلااص : تفضلي
رورو مبتسمة : بنبدا نجي كل يوم هني على خاطرك
خالد هو مش متحملها توا بس ، وهي بتجيييه كل يوم لااااااعععع ماااتجيييش بدرهيلي كبدي اكتر ماهي دارهة : تتفضلي في اي وقت
ومشي يكمل في شغله وكل مرة طالعتله وحدة مدرهتله كبده من نماذج الانسة رورو
.................بقلم وصال الحمحوم
تامر لبس وسّكر شقته ونزل ،بيدير زيي ما قاله محمد بِيراقب الراجل يلي قاله عليه ، طلع الراجل من شقته وبدي يمشي في طريقه ، قعد تامر يتبع فيه لِكل مكان يمشيله ، وهو يراقب فيه ماحسش بِحاجة غريبة من ناحية الراجل بالعكس حسه راجل عادي وعلى حاله ، لكن بِيكمل مراقبته ليه وبعدين توا يفهم من محمد علاش يراقب
................
وهي ترجف ومتوترة وخايفة : خايفة يقتلوني
علي يهدي فيها : بشوية بشوية ،ماتخافيش ديري زيي ما أتفقنا وكل شي حيمشي صح ، لكن ردي بالك بِخوفك هدا بضيعينا !
رهف هزت راسها بمعنى اوكيي توا نهدي روحي ، لكن هي زايد خوفها ،تخاف المافيا يعرفوا انها تكذب وقتها حيقتلوها بلا رحمة واصلا من بيجيبوها الرحمة ؟؟
"علي" متوتر وخايف ان الخطة يلي داروها يصير فيها خلل او رهف تفسدها بخوفها الكبير
يتبع........
عصام كيف بيتصرف مع المافيا وطمعهم الزايد ؟ 🤔
وكيف بيدير عصام من بعد ماالرئيس حطه في وجهه الخطر ، وبيخليه هو يلي يسافر بساعة ؟؟ 🤔
شن هو الشي يلي مكتوب في الورقة وخلى فرح وزهور ينصدموا ويتلخبطوا ، وشن دخل السااعة ، وسااعة وينهاا ؟؟ 🤔
شن بيصير مع هناء وهي بالحالة هادي ؟ 🤔
شن بيصير مع رهف و"علي " شن بيصير في خطتهم يلي رسموها ؟؟ 🤔
كل هدا حتعرفوه في الحلقات الجاية ♥️، توقعاتكم للحلقة الجاية ♥️♥️
ان شاء الله تكون عجبتكم الحلقة اعطوني رايكم ،رايكم يهمني بجد 😻♥️، ديروا تاقات لصحابكم بش يشوفوا الرواية 💕
بِقلم وصال الحمحوم 💕
تفاعلوا واعطوني رايكم بليز 😢😢