دراويش

دراويش ٣٩

#دراويش
بقلم #روز_الفياض
ح٣٩
.
.
.

منذ عرفتك تاب كل شيء ألا قلبي بقِي عاشقاً  للذنوب 💙
.
.
بقيت انتظر سيف يجي بس اتأخر اتصل عليه يكطع الخط وميجاوب صارت الساعة ب ( ١١ ) وهو ماكو ..
ضجت ..
رحت لغرفتي طلعت صور الكلية اباوعلها واتمعن بيها وكل شوية اباوع لصورة فؤاد وابتسم ..
بعدين اتذكرت اني متزوجة دمعت عيوني ..
يعني الشي اللي جنت احسبه مستحيل يصير صار فؤاد اللي جنت اتصوره ميت طلع عايش واجه وشفته بس طلاكي ماكو امل بي ..طلاكي شي مستحيل .
معقولة ماكو امل اخلص من كريم وارتاح ..
بجيت واني ادعي ربي يخلصني منه ويكفيني شره ..
متأكدة هو هسه يحاول يوصلي والله يستر اذا وصل ..

سمعت صوت باب الشقة انفتح .. معناها رجع سيف الحمدلله ..
ردت اروح اشوفه بس كلت مااريد اضايقه يجوز بعده ضايج خلي يرتاح ..
بعدني افكر ودخل علي :
السلام عليكم ؟
مسحت عيوني وكتله :
وعليكم السلام ..
سيف :
ليش تبجين ؟

اتدنه يمي .. من شاف الصور اتغيرت نبرة صوته كلي :
هاا .. حنيتي للماضي ؟
آمنة :
شتقصد ؟ شهالاسلوب هذا ؟ احجي ويايه عدل سيف ... اني امك لتنسى هالشي ..
سيف :
اني مناسي اي شي .. بس انتِ نسيتي  ..

عافني وراح لغرفته .. صرت عصبية رحت وراه كتله :
شنسيت ؟

بقى ساكت ..
آمنة :
احجي وياك جاوبني ؟ شنسيت ؟
سيف :
نسيتي انتِ متزوجة ابوي ..

كلامه صدمني لدرجة فكرت اضرب بس مطاوعني كلبي .. رأساً طفرت دموعي على خدي كتله :
انعم الله عليك يمه .. انعم الله عليك .. هاي تاليت التربية ؟ مع الاسف طلعت مثل ابوك ...

عفته ورجعت لغرفتي وقفلت الباب علي وخلصت الليل كله ابجي ..
حتى ابني هم مغزر بي تربيتي اله ..
تعبت من البجي كلت خل اكوم اصلي صلاة الليل وادعي الله يهدي ابني ويساعدني ..
طلعت من غرفتي شفته كاعد بالصالة يبجي ..
حسيت كلبي يتگطع عليه بس عفته يبجي ورحت اتوضيت ..
رجعت صليت ودعيت وحاولت انام لكن مكدرت بقيت كاعده مره ابجي ومره اراقب سيف من فتحت الباب اخاف يسوي بنفسه شي ..
الى ان شفته غفى بمكانه ..
اخذت البطانية ورحت غطيته وكعدت يمه ابجي ..
الصبح خليته نايم مكعدته للمدرسة ..
سمعته هو كعد متأخر يركض للحمام وللملابس وللمطبخ ..
حتى ريوك مسويتله ..
دك باب غرفتي مفتحته ولاجاوبته ..
بقيت كاعده بفراشي اسمعه يتحرك بالبيت وكلبي ماكلني عليه طلع بدون ريوك .. شلون طاوعج كلبج آمنة ؟؟

كمت سويت الغدا من وكت وكملت شغلي ورجعت لغرفتي نمت لان الليل كله سهرانه..
الظهر هم دك باب غرفتي مجاوبته جنت نعسانه بس كعدت بعدين اتذكرت الحجي الحجاه عفته يدك بالباب مفتحته اله ومجاوبته ..

رجع دك الباب هم مجاوبته كال :
ماما بس جاوبيني بيج شي ؟

مجاوبته ..
وره شوية سمعت صوت شي انكسر وكع كلبي برجليه فتحت الباب وطلعت اركض رحت كبل للمطبخ شفته يصب لنفسه اكل على اساس وواكع منه الصحن ..
الحمدلله عبالي شي ثاني ..
خفت عليه ينجرح رحت جبت المكناسه وكنست الگزاز المكسور وذبيته ..
هو واكف ساكت ومدنك ..
طلعت صحن ثاني صبيتله اكل وخليته على ميز الطعام ..
سيف :
متتغدين وياي ؟

عفته ورجعت لغرفتي وقفلت الباب وكعدت ابجي ..
كعد بالصالة يدرس بعد الغدا بقيت اراقبه لحد مخلص دراسة وراح لغرفته ..
اتصل على تليفوني خليته صامت ..
بدل ملابسه وطلع ..
رجعت نمت حتى للعيادة مرحت ..
غفيت كعدت الساعة سبعة ..
اتذكرت فؤاد وموضوع المحامي والخط ..
اوووف والله مالي خلك اطلع ولا الي نفس اشوف احد ..
بس عيب وزحمة من فؤاد ..
كمت بدلت واخذت الشريحة المصريه وركبت سيارتي واتوجهت لفؤاد ..
وصلت للفندق ونزلت للاستعلامات سألت الموظف عنه وطلبت منه يبلغه انه اني انتظره جوه ..

كعدت انتظره بالبهو لحد منزل مبتسم :
السلام عليكم .
دكتورة شلونج ؟
آمنة :
وعليكم السلام .. الحمدلله انت شلونك ؟

جاوبني وهو يكعد عالكرسي المقابل الي ويباوعلي :
بخير اذا انتِ بخير ..

ابتسمت جذب كلي :
شبيج ؟ عيونج مورمة ؟ انتِ باجية ؟

دمعت عيوني كتله :
مابيه شي .. جنت ضايجة شوية ..
فؤاد :
اكو شي صار ؟ كريم وصللكم ؟
آمنة :
لا لا ماكو شي بس شوية ضجت وانقهرت من شغلة مو اكثر ..
فؤاد :
تعاركتي ويه سيف ؟

من كلي هيج بسرعة بجيت ..
فؤاد :
اشش .. امنة شبيج صدك جذب .. احجيلي شصار ؟

هزيت راسي ماكو شي مااكدر احجيله شحجيله استحي ..
فؤاد :
زين جبتيلي الخط ؟

مسحت دموعي وطلعتله الخط وانطيتهيا .. فرحت لان غير الموضوع وكتله :
بي رصيد وبي رقمي الشخصي ورقم العيادة ورقم سيف اذا تحتاج شي اتصل ..
فؤاد :
اممم .. يعني متردين تحجيلي ؟ يمكن اكدر اساعدج ؟
آمنة :
محد يكدر يساعدني .. بس رب العالمين ..
فؤاد :
ونعم بالله ...

بقينه ساكتين .. حاولت اتجنب نظراته بس هو كان مصر .. حسيت بالاحراج فكمت وكتله :
يالله اني اترخص ..
فؤاد :
بعد وكت ..
آمنة :
لا هم يالله .. الوقت متأخر واني تعبانه جنت بالعيادة .. هم يالله ارجع اسوي عشا لسيف ..
فؤاد :
زين اعزمكم انتِ وسيف على عشا ؟ اليوم كله منتظر وهسه تردين ترحين ..

صفنت بوجهه استحيت من كلامه وكتله :
غير مره ان شاءالله اعذرني صدك تعبانه وراسي يأذيني .. باجر نلتقي ونحجي ان شاءالله .. ماشي ؟
فؤاد :
سلامتج .. الف سلامة .. تردين اخذج للمستشفى ؟
آمنة :
لا لا مو لهدرجة .. حبة اسبرين واصير تمام .. قلة النوم هم الها تأثير سلبي .. يالله مع السلامة ..
فؤاد :
لا خل اوصلج للسيارة ..

وصلني للسيارة وكلي :
لو ترحين بتكسي افضل هيج راح اظل بقلق ..
آمنة :
مابيه شي والله .. مجرد صداع البارحة مكدرت انام وهسه بس ارجع انام وارتاح ليظل بالك .. من اوصل راح ادزلك مسج اطمنك ..
فؤاد :
راح اكون بالانتظار  ..

بطريق الرجعة اتصل بيه سيف مجاوبته ..

رجعت للشقة لكيت سيف موجود دخلت شفته كاعد بالصالة من شافني اجه علي :
وين جنتي ماما خوفتيني عليج ؟
آمنة :
وليش تخاف ؟ مااروح للعيادة يعني ؟ خاف تشك بعد بيه من اروح للعيادة يمكن اروح لغير مكان من وراك ؟ تريد اخذ موافقتك من اطلع منا وهيج ؟

بقى ساكت شوية بسبب عصبيتي بعدين كلي :
رحتلج للعيادة كلولي اليوم مرحتي ..

سكتت وغلست ورحت لغرفتي ..
دك الباب مجاوبته ..

كعد يدرس بالصالة مثل كل مره من ازعل عليه ..
جعت رحت للمطبخ سويتله عشا بسيط وسويتلي سندويشه ورجعت لغرفتي وقفلت الباب ..
اتذكرت فؤاد ..
طلعت التليفون ودزيتله مسج كتبتله :
( مساء الخير دكتور .. تره اني وصلت للبيت قبل شوية  ) ..

رأساً جاوبني :
( الحمدلله عالسلامة .. اخذتي علاج ؟
آمنة :
اخذت ..
فؤاد :
راح تنامين ؟
آمنة :
ليش ؟
فؤاد :
ماكو شي بس ردت احجي وياج علمود المحامي ..
آمنة :
هاا .. اي صح والله نسيت .. اني دايخة صار يومين ماعندي تركيز ..
فؤاد :
الله يساعدج .. بس على كيفج ويه نفسج .. ابنج بعد صغير ميعرف يحكم عالاشياء اتحمليه شوية شوية يكبر ويفتهم ..
آمنة :
اني شفت بحياتي تعب مينحجي ... وهسه صرت مااتحمل بعد تعب ولاكلمة تغث .. صار صبري قليل مو مثل الاول ..
فؤاد :
الله يساعدج ويعينج .. محد مرتاح صدكي .. وكل واحد يتصور نفسه هو اكثر واحد عنده هموم واكثر واحد مبتلى بس بالنهاية نكول الحمدلله على كل حال ..
آمنة :
الحمد لله ..
حصلت محامي ؟؟
.
.

ابد منطآني گلبي هناك أخليها ،
رجعت اركض واطلع صورتة من النار ،
و أبوس شمحترگ بيها.❤️
.
.
.
( فؤاد )

ثاني يوم اتصلت على استاذ محمد وسألته على محامي :
كون محامي زين ؟
استاذ محمد :
علشان ايه المحامي ؟
فؤاد :
آمنة طلبت مني اسأللها على محامي زين .. تريد تطلك من زوجها ..
استاذ محمد :
إيه ؟ انت عملت ايه للوليه ؟ ازاي خليتها تطلب الطلاء بسرعه كده اول مشافتك ؟

ضحكت حيل :
هههههههههههههههه ههههههههههههههه بريء والله بريء اصلا مااعرف شي عنها بس كالت تعبانه .
استاذ محمد :
ايوووه ... حادر يسيدي .. اشوفلك محامي ..
فؤاد :
اكون ممنون ..

وره ساعتين اتصل بيه استاذ محمد كلي :
استعنت بصديقي استاز گامعي بردو وهو رشحلي محامي شاطر واداني رقمو وعنوانو .. وهو حيتصل بيه علشان يوصيه ..
فؤاد :
ماشي ... ماشي ...
استاذ محمد :
اكتب العنوان عندك ..
.
.

بقيت انتظرآمنه تجي ..
بس من اجت جان مبين عليها مالها خلك وباجية وبس سألتها عن سيف بجت لان نفت انو يكون كريم السبب ..
معرفت شنو سبب الخلاف بينها وبين ابنها بس صدك خفت عليها ..
ياترى ياآمنة شنو شفتي بحياتج خلاج هيجي حساسة ؟؟
متتحملين ابنج وتبجين ؟
المفروض اذا بينهم مشكلة هو يبجي بس اللي صار العكس ..
حاولت اساعدها بس مجان عدها استعداد تحجي ..
مردت اضايقها والح عليها ..
راحت بدون متاخذ عنوان المحامي ..
خوفتني عليها ..

من وصلت لبيتها دزتلي مسج اتطمني عليها وذكرتها بموضوع المحامي فسألتني :
حصلت محامي ؟
فؤاد :
بلي حصلت .. هسه ادزلج عنوانه ورقمه .. تكدرين ترحين بأي وقت وتتفاهمين وياه ..
آمنة :
شلون اروحله وحدي ؟؟ اخاف ؟
فؤاد :
من شنو تخافين ؟
آمنة :
ماادري بس كتلك اخاف يطلع نصاب او يحاول يستغلني من يعرف اني عراقية ودكتورة .. هنا ماخذين نظره عن العراقيين انه عدهم فلوس ويصرفون بدون حساب .
فؤاد :
تحبين اروح وياج ؟
آمنة :
مااريد اتعبك وياي انت جاي تتونس مو تخلصها تركض وره مشاكلي ..
فؤاد :
ماكو تعب .. تعبج راحة شتحتاجين اني موجود لتترددين ابد .. احنه مو اصدقاء ؟
آمنة :
اكيد طبعاً انت أخ وصديق واحس احد من اهلي موجود وياي من رجعت .. حتى اكون صادقة احس بالامان هاليومين لان انت موجود ..

صدمتني كلمة أخ ...
لمت نفسي لان عندي احلام رفعتني فوق السحاب ..
وكلمتها خلتني اصحى وانزل لسابع ارض ..

محجيت وياها اكثر ضجت ..

ثاني يوم الصبح اتصلت بيه اني جنت نايم .
باوعت للتليفون شفتها تتصل كعدت بسرعة :
الوو ؟
آمنة :
صباح الخير دكتور .
فؤاد :
صباح النور هلو ..
آمنة :
مبين بعدك نايم ؟ كعدتك مو ؟

اني فعلاً جنت نايم لان خلصت الليل افكر بيها بس كتلها :
لا لا منايم بس متمدد شوية ..
آمنة :
اكيد ؟
فؤاد :
اكيد .. اكيد ..

اني بأجمل احلامي ممتخيل اكعد على صوتج شلون اكول جنت نايم ..
آمنة :
وين تريد تروح اليوم ؟
فؤاد :
ماعندي جدول مرحت لاي مكان من اجيت ومااعرف وين اروح .
آمنة :
انت هيج تصعب علي الكلام والطلب .
فؤاد :
عيوني الج .. كولي ..

سكتت شوية يمكن استحت بعدين كالت :
ردتك تروح وياي للمحامي اليوم .
فؤاد :
واني حاضر .. شوكت تردين ترحين ؟
آمنة :
هسه ؟
فؤاد :
هسه ؟؟

باوعت للساعة بالتسعة كتلها :
ماشي .. هسه ..
آمنة :
اذن مسافة السكة على كولت المصريين واكون عندك .
فؤاد :
ماشي انتظرج ..

كمت عالسريع غسلت وبدلت ونزلت كلت اكل اي شي عالسريع قبل متجي بس اتفاجأت اول منزلت شفتها دخلت للبهو ..
فؤاد :
صباح الخير ؟ شنو اجيتي بطيارة خاصة ؟
آمنة :
هههه صباح النور لا مو جنت بالطريق من اتصلت بيك .
فؤاد :
نتريك ؟
آمنة :
لا .. الله يخليك خل نروح للمحامي بالاول وبعدين اخذك لمكان هاديء نتريك حتى اني مماكله شي ..
فؤاد :
مستعجلة ؟
آمنة :
جداً .. اريد اجرب شعور الحرية حتى لو ليوم واحد بعمري حتى لو ثاني يوم الله ياخذ عمري .. المهم ارتاح .
فؤاد :
ممكن اسأل سؤال ؟
آمنة :
أجل كل الاسئلة بعدين هسه ماعندي استعداد اجاوب على اي شي .
فؤاد :
معناها اتفضلي ..

اتوجهنه للمحامي واستقبلنه ورحب بينه وهنا كانت المفاجأة من طلب من آمنة تحجيله ليش تريد تطلك ..
.
.
.

أُترك لي شيئاً يشعرني أنك مازلت مهتماً لأمري إشارة أغيض بها الأيام التي تحاول إقناعي بعكس ذلك.❤️
.
.
.
( آمنة )

من كعدنه ويه المحامي وكتله اني اريد انفصل عن زوجي كلي :
ممكن اعرف الاسباب ؟
آمنة :
اسباب هوايه .. اني متزوجة صار ( ١٤ ) سنة معشت بيها يوم حلو .. كلها جانت ضرب واهانه ..
المحامي :
ممكن تُزكُريلي بعد المواقف ؟

بديت احجي للمحامي عن جزء من معاناتي مع كريم وجنت حاسة بالخجل انه احجي هالكلام بوجود فؤاد لكن مجبورة احجي ..
احجي ودموعي كل شوية تنزل ..
اتذكرت مواقف هواي منها مره جان شتا واجيت اشغل الهيتر لكن طك البلك ( القابس ) انفجر على ايدي وحركها ماادري ليش .. انرعبت وبعد مشغلته وانتظرت لحد ماجه كريم كتله يشوفه ..
فتح البلك كلي :
هذا الوايرات طابكه .. همزين مااحتركنه ..
آمنة :
هاي ايدي احتركت ..

باوع لايدي المحترگة وضحك على كيف ..
شال البلك وكص الواير وركب واير وبدا يطلع اسلاك جديدة وقسمها قسمين حتى يشكلها للهيتر  ..
ركب جهة وحده عالكهرباء وصاحي :
تعاي هنا بالله .
اتدنيت عبالي يريد درنفيس ( مفك ) او فد شي ..
محسيت الا الكهرباء شالتني وشمرتني ..
خله الجهة الثانية مال الواير على ايدي من جهة الزند ..
حسيت شفت الموت بعيني ..
جسم انشال وانضرب ..
وهو واكف يضحك ماادري شنو اليضحكه وهو يشوفني لازمتني الكهرباء وجان يبست بمكاني لوما الله سبحانه وتعالى لطف بيه وطفت الكهرباء كلها..
وبعدين اكتشفنه بيتنه بس طفت بي الكهرباء بالمنطقة ..
يمكن هاي من رحمة الله خله كهرباء البيت تعطل ..

مسحت دموعي واني اشوف فؤاد يباوعلي ومخلي ايده على خده وصافن بوجهي ..
المحامي :
دا انسان مختل ..
آمنة :
ماعندي استعداد اتحمل اكثر ابني بعد ميريده ميريد ابوه .. شايفين ابن ميحب ابوه ؟
المحامي :
لاحول ولاقوة الا بالله ..
آمنة :
سيف ميحبه لان جان يضربه .. ومابي حنيه عليه .. مره من المرات اتأخرت بالدوام ورجعت جان كريم موجود وسيف يبجي ..

سكتت اختنكت من البجي ...
فؤاد :
اهدي .. اهدي .. ارتاحي لتحجين بعد ..

هزيت راسي لا .. اريد احجي :
لكيت سيف يبجي كتله شبيك ماما راواني ايده .. مجويه بالجكاره بجف ايده ... لان درجته جانت عشره بالعربي بالشهر الاول وبالشهر الثاني جان ماخذ تسعة ...

رجعت بجيت حيل وفؤاد صفك ايديه اثنينهم من الصدمة ..
المحامي :
يعني بيدخن وبيسكر وبيدرب وبيغلط كمان ..
آمنة :
لا .. مجان يدخن وماادري منين جاب الجكارة ومااتجرأت اسأله ولا احجي بالموضوع خفت يرجع يضرب سيف .. سيف كلش ميحبه ويحس بالضياع بسببه ..
المحامي :
طب انت أُلتي ان هو بيأربلك وخطبك ابل كده وانتِ رفدتي ... ممكن اعرف وافئتي عليه ليه بعدين ؟
آمنة :
وافقت لان اني ودكتور فؤاد جنه تحت رحمته .. وافقت مقابل انه والدي يتوسط لفؤاد ويساعده يطلع ... ولان كريم كان بأمكانه انه يورط اخواني بتهمة جبيرة في حال رفضت ..
مجان اكو طريقة ثانية .. شي مقابل شي ..

ملامح فؤاد اتغيرت .. حسيته اتفاجأ .. راد يكول شي بس المحامي قاطعة وكلي :
يعني اتگوزتيه بالاكراه ؟ مُش كده ؟

هزيت راسي واني اشوف فؤاد وكف ..
فؤاد :
اني راح انتظر بره .. من رخصتكم ..

بدون مينتظر جواب طلع ..
كملت مقابلتي مع المحامي وطلعت اشوف فؤاد وين ..
ملكيته بره ..
نزلت جوه لكيته منتجي عالسيارة مجتف ايديه على صدره ومدنك ..
حسيت بارتباكه نتيجة اللي سمعه وفهمت احساسه فحاولت اغير جو النكد والحزن ..
وصلت يمه رفع راسه ابتسمت وكتله :
نروح نتريك هسه ؟

محجه شي بس هز راسه ..
اخذته لمطعم قريب يم الشقة اللي اني وسيف ساكنين بيها ..
كعدنه نختار شنو ناكل هو ساكت محجه ولاكلمة ..
آمنة :
شرايك تجرب الفول .. انت بمصر هسه ..

طلبنه الاكل وكعدنه نتتظر ..
فؤاد :
ليش سويتي هيج ؟
آمنة :
شسويت ؟
فؤاد :
وافقتي عليه ؟

سكتت ..
فؤاد :
جاوبي ..
آمنة :
شجاوب بعد .. انت سمعت القصة كلها ..
فؤاد :
تدرين اني كل هالسنين جنت اتمنى الموت ؟

جابوا الاكل وسكت .. مديت ايدي عالخبز اخذت قطعة وكتله بدون مااباوعله :
واني هم .. لدرجة مره من المرات ردت احرگ نفسي ...

بديت اكل بهدوء مااريد اصير عصبية واعرف فؤاد شنو ميكون جوابي مراح يقنعه ..
فؤاد :
اذن ليش سويتي هيجي ؟ ليش وافقتي عليه ؟ ليش خليتي نفسج بسجن والسجان يومية يعذبج ؟

بدا صوته يعلى كتله بصوت ناصي :
لو انت بمكاني شراح تسوي ؟

بقى ساكت ..
آمنة :
ليش متاكل ؟

بقى صافن بوجهي بعدين كلي :
لتحاولين تتصرفين كأنه اللي صار عادي وانت قابله وراضيه قانعه .. ماكو بشر طبيعي يقنع بهيج حياة ..
آمنة :
جرب الفول بالاول راح يعجبك دكتور ..

كام وكف كلي :
اني رايح ..

آمنة :
وين ؟ ليش ؟
فؤاد :
من ترجعين لوعيج اتصلي ..

انقهرت كتله :
اني واعية .. جدا واعية ومقتنعه بكل شي سويته وضميري مرتاح آخر راحة .. مضريت احد .. بالعكس ساعدتك وساعدت اخواني وساعدت سيف .. ضحيت بنفسي نعم .. لكن النتيجة مندمانه عليها ابد .. ولو انت بمكاني جان سويت مثلي ..
فؤاد :
ليش محجيتلي ؟ ليش مكلتي هذا اللي صار ؟
آمنة :
واذا كتلك يعني ؟ شراح يصير ؟ راح الزمن يرجع مثلاً لو شنو؟ كل شي قسمة ونصيب وهذا نصيبي وقسمتي هيج عوجه شسوي يعني ؟ انتحر واعوف ابني ؟

بقى ساكت محتار عنده حجي ميعرف يكوله فكتله :
اني هسه فرحانه ونفسيتي مرتاحة ممكن تكعد شويه لان ماكو شي يستوجب هالعصبية .. اني مزعلانه من اللي صار .. كل انسان اله دور بالحياة .. ويمكن جان هذا دوري ..

رجع سحب الكرسي وكعد بدون كلام ..
خله ايده عالطاولة وخله راسه بين اديه ..
آمنة :
فؤاد ؟

مجاوبني ..
خله ايديه على وجهه ..
عرفته بجى ..

اني هم بجيت ..
.
.
.
يأتي احدهم فينير في روحك ماكان مظلماً .. ❤️
.
.
( فؤاد )
احساس بالذنب يتآكلني ..
كنتُ اظنكِ خائنة .. ياليتك بقيتي خائنةً في نظري على ان اعيش هذا الشعور المؤلم .. احساسي بالذنب والتقصير تجاهك يجعلني افكر انك لم تسببلي لي اي مشكلة بل على العكس .
انا هو من تسبب بالمشاكل لكِ .. فبسببي انتهت حياتك ..
وعشتي تلعنين كل يوم في حياتك .
حبيبتي ..
هل للمذنبين مثلي من امل في السماح ؟
ام ان الذنب اعظم من ان تصفحي وتسامحي ؟
.
.
كلام آمنة كدام المحامي خلاني افقد اعصابي .. انهار ..
تحجي بقمة الهدوء لكن دموع عيونها متجذب .. دموع عيونها حجت كل الالم والمعاناة ..
جنت الومها لان قبلت بكريم .. ماادري قبلت بي حتى تنقذني وتنقذ نفسها وتنقذ اخوانها ..
كل كلمة وكل تلميح منها هسه صار واضح ..
ليش بقيتي ساكته واني اهينج ليش ؟
آآه يا آمنة آآه .. شكد اتعذبتي بحياتج شكد عشتي مآسي شكد شفتي ظلم ..
وبعدج تبتسمين وتضحكين ؟؟؟
انت شنو؟؟
منين جبتي كل هالقوة !!!

حاولت تغير الوضوع لكن اني مكدرت ..
نزلت دموعي ونزلت دموعها بنهاية المطاف .

صوت بجيها اذاني اكثر ..
مسحت دموعي وحاولت اصير قوي مثلها وامثل دور الممهتم والمتقبل للوضع والقنوع وكتلها :
كافي آمنة .. قدر الله وماشاء فعل .. الحمدلله على كل حال ..
آمنة :
جان من يسكر يعيرني بيك ..
فؤاد :
بيه اني ؟
آمنة :
جان يكلي لو بيج خير محبيتي ذاك ..
فؤاد :
ذاك الشنو ؟

مجاوبتني ..
آمنة :
جانت امه تترس راسه بهالحجي .. جان يكلي شسويتي وياه ... امي تكول البنات من تحب تستهتر وكل شي تسوي ..
فؤاد :
طايح الحظ .. همه هاي اخلاقهم جماعة الامن بس اللي بعبه صخل .. يجوز هو يعرف هيج نماذج مستهتره لذلك يتصور كل البنات هيج ..
آمنة :
واكثر واكثر واكثر .. لو احجي منا لباجر متخلص سوالف كريم .. حياتي وياه جانت جحيم .
فؤاد :
وهي هاي هم حياة ...
يالله .. كافي خل نجرب الفول المدمس ونشوف نصيحتج بالله ..

ضحكت شويه واني ضحكت جذب لان كلبي اشتعل نار عليها ..

وصلتني للفندق وراحت ..
باوعت للساعة كلت بعد وكت خل اتصل على استاذ محمد يشوفلنه مكان ونطلع ..
بس بعدين باوعت للساعة كلت مادام بعد وكت خل اتصل بسيف ابن آمنة افهم منه الخلاف اللي صاير بينه وبينها شنو .. صح هي اليوم جانت تضحك وتسولف بس اعرفها من تحاول تخفي شي ..
اتصلت بيه وجاوبني ورحب بيه عادي فكتله :
سيوفي اني مااعرف شصاير بيك وبين امك .. بس امك لو تشعللها اصابعك العشرة شمع متجازي يوم واحد من تعبها وعذابها علمودك ..
سيف :
انت متعرف شي ..
فؤاد :
كل شي اعرف .. كل شي .. لتتصور بس ابوك يكدر يراقب ويعرف اخبار الناس .. انت شفت الناس اللي اعرفهم بالعراق شسووا وياك اول موصلت عرفوا بيك ولزموك مو صح ؟
سيف :
صح
فؤاد :
اعتبرني مااكول ابوك خاف متقبل بس اعتبرني اخوك الجبير او عمك صديقك .. كيفك بس المهم انتبه على كلامي زين .. اني قبل من اعتقلوني الامن ساعدني جدك وخالك غيث الله يرحمهم وامك وطلعوني .. ومن طلعوني الامن متركوني بحالي ظلوا يجون يفتشون البيت كل يوم يدورون علي .. لدرجة اهلي حفرولي غرفة جوه البيت .. غرفة على كد المنام بس .. ومكدرت ابقى بيها للابد فقررت اطلع من العراق والحمدلله الله سخرلي ناس طيبه وساعدوني وطلعت .. رحت لامريكا .. بقت امي وراي تبجي ليل ونهار لحد مماتت بقهرها علي .. واني حي وعايش ومابيه شي بس هي متحملت فراكي .. من اتذكرها اكول ياريت لو عادميني من زماان ولا مخليها تبجي وراي ومحرومه مني ..
ماكو شي يعادل دمعة من عين امي ..
كرهت الحياة كرهت الدنيا من بعدها ..
وانت امك سوت اكثر من امي بالف مره .. امي اني ابنها ضناها بس انت آمنة ربتك مثل ابنها واكثر .. ولو غير وحده والله تشمرك بالشارع ومتقبل تربيك .. بس امك ماكو مثلها ام .. حصلت بدل الفرصة فرص حتى تخلص من ابوك بس لان انت ابنها وتحبك اكثر من نفسها بقت وياك واتحملت كل هالسنين ...
ماادري شنو اللي خلاها تزعل لهدرجة بس مهما كان السبب دير بالك تخليها تبجي .. دور رضاها حتى الله يرضى عليك .. اذا مترضى عليك الله ميوفقك .. امك لو تسويلها تمثال متجازيها ..
فهمتني ؟؟

سمعت صوته يبجي وبعدين من سكت كلي :
كلامك صحيح .
فؤاد :
معناها لتضيع الوقت وروح صالحها .. ادري بيك انت متكدر على زعلها ومتتحمل بجيها ..

سديت التليفون من سيف ودعيت الله يهديه آمنة طيبة متستاهل يزعلها ويضوجها ...
.
.

اليحـرك بابــكُم مو ريــح ..

روحــي متآنيـه اتشووفك❤️
.
.
( آمنة )

وصلت فؤاد للفندق ورجعت بسرعة للبيت اسوي الغدا قبل ميرجع سيف ..
كملت الغدا ورحت اصلي سمعت الباب انفتح ..
وره شويه دك باب غرفتني بس اني اصلي ..
فتح الباب شافني اصلي .. بقى واكف شوية يباوعلي ..
خلصت صلاتي سجدت سجدة  الشكر .. بس رفعت راسي اجه حضني قبل مااكوم ..
ذب نفسه بحضني وظل يبجي ..
محاجيته ولاحضنته ..
كلبي شايل عليه حجايته اذتني حيل ..
سيف :
سامحيني ماما .. سامحيني .. مو قصدي والله ..

بقيت ساكته رجع خله راسه بحضني يجبي .. حاولت احجي بدون ماابجي بس مكدرت بس حجيت طاحت دموعي :
ولك اني اتحملت علمودك المر .. المر تعرف شنو يعني ؟؟ تحملت علمودك اللي امك الله يرحمها متحملته ..
اهلك كلهم محد بيهم يعرفك .. محد بيهم بيوم شال التليفون وسأل عنك .. محد اجه شافك .. ليش ؟ ليش يمه ليش ؟ شقصرت وياك ؟ تتذكر من ردت اتطلك من ابوك قبل من جنت بعدك زغير ؟ تتذكر؟ جان يدري انت ابني .. ابني واحبك اكثر من روحي لذلك ساومني بيك .. لو اتطلك واخلص منه واعيش حياتي لو ياخذك مني ...
ورجعت واتحملت الميتحمله بشر علمودك .. مااكدر اتركك اله .. مااكدر اعوفك انت ابني مو ابنه .. ابني ..
ابوك اني اتزوجته غصباً عني .. محبيته بيوم .. لان ماانطاني مجال احبه كله اهانه وضرب ..
الرجال هذا جان خاطبني قبل ابوك بس ابوك اعتقله .. اعتقله وعذبه وجان يريد يعدمه بس جدك انقذه مقابل اقبل بابوك ..
مااكلك باعوني لا .. اهلي جانوا بين نارين .. لو اقبل واخلصهم واخلص نفسي واخلص هالرجال الماله ذنب بس ذنبه خطبني .. لو ارفض واعم عالكل .. واولهم نفسي ..

ظل يبوس بأدية ..
سيف :
اعرف والله اعرف .. سامحيني ماما .. اذا متسامحيني اموت ..
آمنة :
وحده غيري جان اتطلكت وعاشت حياتها خصوصاً بعدما جدك الله يرحمه اترقى .. جنت اكدر اتطلك .. واخليك عنده وانتظرك لحد متكبر وترجعلي .. بس اني مااكدر ... مااكدر بدونك انت ابني ربيتك بدموع عيوني .. كبرتك من راحتي وصحتي وشبابي ...
راسي انترس شيب من قهر ابوك واتحملت علمودك ..
تالي تجي تعلي صوتك علي سيف ؟؟ تالي تجي تشكك بيه .. تحجي مثل حجي ابوك ؟؟ ليش ؟ شنو االشي الغلط الشفتني سويته ؟ حتى الرجال من عزمته عالعشا اتصلت بيك حتى تكون موجود .. حتى متكول امي كعدت وياه من وراي ..

ظل يبجي ويتوسل ويبوس بأديه لحدما تعب واني تعبت من البجي ..
.
.
.

- ‏عندما أخبرتُك عن وحدتي كُنت أخبرُك عن مدى حاجتي لك ، وحين قلت لك أن الحياة ضدي ، كُنت أنتظر أن تقول أنا معك .❤️
.
.
.

😭😭😭 خطية آمنة حتى سيف عليها
فؤاد شكد محترم يالله .. مايصير يسوون استنساخ منه يحسنون الجينات العراقية 😑
شراح يصير ؟
توقعاتكم وارائكم ؟
لايك وتعليق وعشر ملصقات والماعنده ملصقااااات يخلي بمكانها حروف 😒 مالكم عذر 🤓
علقوا شكد متكدرون لان القصة تستحق وكلش ظالمتها التعليقات
سمعوا القصيدة فوك عالام 😭😭😭