دراويش

دراويش ٤٥

#دراويش
بقلم #روز_الفياض
ح٤٥
.
.
.

انا لست منصفة معهم
انا افكر بك حين يكون الجميع بجانبي
واشتاق لك حين يشتاقون لي
انا لست جيدة الا معك❤️
.
.
.
بعد مخلصوا البنات ركص او بالاحرى تعبوا جنان اجت كعدت يمي تسولف وتضحك ..
بعدين جابوا العشا ..
فجأة كعدت يمي طليقة فؤاد ظلت تحجي بمواضيع مالها معنى ..
حسيتها تريد تفتح موضوع بس متعرف شلون فبقيت ساكتة ..
عذراء :
انت شتعوديلهم ؟

التفتت عليها :
ليش السؤال ؟ انتِ شتعوديلهم ؟
عذراء :
اني مرت فؤاد .. هاي حماتي العروس والجانت كاعده يمج حماتي الثانية ..

مجاوبتها فكالت :
مشايفتج عدهم ؟ ولاحتى اختي اختي تصير مرت اخوهم الثاني فراس ..
آمنة :
اهلا وسهلا ..
عذراء :
يعني متريدين تكولين اسمج ؟
آمنة :
شتسوين بأسمي ؟ معقولة كمتي من مكانج واجيتي وانتِ متعرفيني ولا تعرفين اسمي ؟ مو غريبة شوية ؟
عذراء :
مو شفتج تحجين ويه حماتي فشكيت بيج ..
آمنة :
واذا حجيت ويه حماتج يعني ؟ وليش تشكين ؟
عذراء :
عبالي فد وحده قديمة ...
آمنة :
وشلكيتي ؟ قديمة لو جديدة ؟
عذراء :
ملكيت شي .. الظاهر طلعت غلطانة ذيج يكولون حلوه .

ابتسمتلها جذب ردت اغيضها شوية لان محبيتها وكتلها :
شكراً ..
عذراء :
يعني انت هي ؟
آمنة :
منو هي غير اعرف شتقصدين ؟

صارت عصبية شوية كالت :
انت فاهمه قصدي وتعرفين منو هي ..
آمنة :
لافاهمة قصدج ولا يهمني افهم .. عندج حجي كولي بصورة مباشرة يمكن اكدر اساعدج .

سكتت وكامت ماادري وين راحت شوية ورجعت كالت :
انت تعرفين فؤاد ؟
آمنة :
ممكن تحجين شعندج لان مااحب التلميحات .
عذراء :
خوش راح احجي ونشوف ...اني وفؤاد صارت بينه مشكلة .. وهسه اني زعلانه عد اهلي واريد احد يصالحنه ..

التفتت عليها وضحكت كلت هاي تجذب عيني عينك مبينه ( بگحة ) على كولت المصريين ..
عذراء :
اني غلطت بحقه واعتذرت بس هو ميقبل يسامحني ويحجي وياي اريد واحد يحاجيه ينصحه يكله رجع مرتك ..
آمنة :
شلون يعني غلطتي بحقه ؟
عذراء :
موضوع تافه بصراحة بس احنه مصخناها اني وياه وهو يكابر واني اكابر لحد مكبر الموضوع ..
آمنة :
وليش طلبتي مني بالذات ؟ ليش مو وحده من خواته او اختج او اي احد ثاني ..
عذراء :
لان هو يحبني .. اني اعرفه يحبني وهالايام هو مشغول وياج واعرف الج تأثير عليه وعليهم كلهم فكلت بلكي تحجين وياه تحجين ويه عمي والبنات لان همه يحبوني ..

ظليت متعجبه من جرأتها ماادري هي وقاحة بس اللي فهمته انه هي عدها معلومات عني وتعرف فؤاد مشغول وياي بامور المحكمة يعني اكو احد يوصللها الاخبار !!
اكيد اختها ..
بس طلعت مو هينة تريد تبينلي انه فؤاد يحبها ورايدها وتريد تكسر عيني وتخليني اني اساعدها على اساس ماافكر اخذ فؤاد منها ..
هاي البنية خطيرة ..
شلون فؤاد اتورط وياها ؟!!