._ عنفوان أمرأة _
( بقلم بسمة البياتي)
_البارت الثاني والثلاثون والأخيرر _
عاط بيه جاوبييييي هاي من مهند موووو.
اليوم اجرم بيج لج احجي شششنو بينج وبينه
.. جاوبتة واني أرجف والله العظيم ماكو شي بينا
...بنت الكلب طلعتي انتي الجان يحبج ويكعد يبجي عليج كداميييي
.. لزمني من شعري وسحلني بالكاع اريد احجي وادافع عن نفسي منطاني فرصة جنزني تجنيز
.. بنت القندرة اني تضحكون عليه اليوم انعل والديكم من البداية جنت شاك بيكم
بس اجذب على روحي واكول دانية متسويها
ومهند السكط اكول هذا اخوية وضلعي ممعقولة تطلع منه هالسالفة
اااخ ربي طلع الساقط عينه على عرضي واني
غافل
سنين متعذب بحب مرتي واني مقهوررررر عليه
.. راسي كام يوجعني من الكفخات والراشديات
لزمت ايده اتوسل بي وابجي احمد بسس أسمعني قبل لاتحكم عليه
بروح ابوية معندي شي ويا وداعت ابني ماكو شي بينا
كمز عليه لزم فكي وعصرة بكل قوتة
كال اياج تحلفين بحياة ادم وتجيبين اسمه على لسانج القذر
لج ساقطة ليششش ما اخذتي ليشش خليتني اتورط بيج
جلبت برجلة عطت اسسسمعني وبعدها شتريد تسوي سوي
احمد اذانة مسدودة ميسمع اي كلمة مني
من كثر ماضربني دخت حسيت حفقد الوعي
هو هم تعب يتنفس بسرعة ويلهث
دفرني برجلة راح للكنتور طلع مسدسة خلة بحزام البنطرون ليورا
بالكوة كمت وكفت وجلبت ببده
ابجي بقهر واتوسل لا احمد الله عليك لاتسوي شي الخاطر أدم لاتضيع نفسك وتضيعنا وياك
دفعني تكعورت ووكعت بالكاع
عافني وطلع كمت الطم عزززززا بعيني هذا شراح يسووي
نسيت وجع جسمي نزلت اركض دخلت الغرفة بيبي
بيبي متمددة وجدو ديصلي
من شافتني تعدلت وكعدت
اريد احجي انلزم لساني اخاف جدو يسمع
حليمة... ششكو شبيج تبجين وليش وجهج احمر
..عيني عليها وعين على جدو الي كمل صلاتة واندار عليه
صادق... شبيج ولج احمد ضاربج؟
.. حرت شجاوب
احمد من يضربني كتمت صوتي ومصرخت مردتهم يسمعون هذا الموضوع مو سهل بي هجمان بيوت
همست واني اناشغ بيبي اريد احجي وياج
صادق.. دانييييية احجي ششبيج وبطلي بجي
مكدرت ابقة ساكتة حجت كدامه
همست واني اشهك احمد عرف مهند جان رايدني و
اخذ سلاحة وراحلة
بيبي كامت وكفت كالت عززا العزاج حليمة صخام بوجهج راح يذابحون ولج يالمعزاية شلون عرف
صادق... فهموني لا اهجم البيت عليكم شنو مهند رايدها شنو احمد عرف
.. خابر على احمد قبل لايسويلة مصيبة وبعدين اني احجيلك هسه مو وكتها
دانية... مظل بيه حيل كعدت على الجرباية جدو شال موبايلة اتصل على احمد
بيبي تدعي الله يعديها على خيرر
صادق... ابن الكلب ميجاوب
حليمة.. سودة بوجهي الكي حل اطلع دورلة هذا مخبل بساعة غضب يروح يكتل ابن عمة
دانية.. يابة اتصل على مهند شوفة وين اذا بالبيت لو بالمحل خلي يطلع الحد مايهدء احمد
... هسه غير افهم شكو
حليمة. مو كتلك بعدين افهمك هسه اتصل بي
.. جدو دك على مهند
جاوبه سألة انت وين كالة بالمحل
بيبي جرت تلفون من ايد جدو كالتلة يالمصخم عوف المحل وطلع آحمد جايك وناوي على شر عرف بيك جنت رايد دانية
مهند ما اعرف شكال البيبي وسده
سالتها بخوف شكالج مهند
.. كال لاتخافين هسه اطلع وبعدين اني افهمه
لج فهميني احمد شلون عرف
.. قبل لا ازوج مهند جابلي حلويات من فتحت العلاكة جان اكو ويا الحلويات بطاقة كاتب بيها شعر واسمه وحرف من اسمي وبيها وردة
بوكتها خليتها ويا غراضي ودفاتر ذكرياتي وياصديقاتي وهداية هواي
اليوم من نزلت اشتغل ادم لعب بالاغراض ومطشرن واحمد شايفها
... عمة بعييييينج شكو مبقبتها لهسه وييين عقلج مخفتي رجلج يشوفها
... بجيت بقهر بالعباس ناسيتها ولا اذكرها وداعت ادم ناسسسيتها حتى من بدلنا الغرفة هم ما اجت على بالي بيبي فدوة احجي ويا احمد عبالة عندي علاقة ويا مهند
جدو صافن علينا
كال هسه راح تفهموني لو شنو؟
بيبي كعدت تحجيلة وهو صار بركان رزل بيبي يكولها شلون اضمين عليه مثل هيجي سالفة
لو من البداية داري مهند عينه عليها مجان انطيتها الاي واحد بيهم
حليمة... والله سكتت حتى لاتصير عداوات بينهم ويتخاربون
... لزمت ايد جدو ابجي بقهر يابة وروح ابوية معندي شي ويا صح جنت متعلقة بي لان هو الوحيد يهتم بيه ومتركني باصعب اوقاتي
ومن كالي اريد اخطبج معترضت لان شفتة الزوج المناسب
ومن صارت سالفة خالة رسل نسيتة وعشت عادي لان متاكدة مشاعري اتجاهة مجانت حب
صادق.. كافي لاتبررين اني مصدكج بس هذا الخبل شراح يقنعة
سمعنا صرخة أدم رجت البيت كمزت من مكاني طلعت اركض سويت الدرج شبختين عزززا بعيني نسيت ادم جان نايم على الجرباية بس لا واكع
وصدوك من دخلت للغرفة لكيتة واكع على وجهة
شلتة من الكاع غاص بالبجي حتى صوتة ميطلع خالتي وبيبي وبتول اجن للغرفة
اني حيل مبقة عندي من الهبطات رخت ايدي هم زين خالتي تلحكتني واخذتة مني
كعدت بالكاع جسمي يرجف عبالي صار بي شي من طلع صوتة يلا روحي ردتلي
حليمة... بتول امشي جيبيلها مي كومي ولج هياتة كلشي مبي
... حجيت بغصة كصتة مجروحة واكع على حافة الشسوار
وفاء... ادري هالغراض ليش هيجي مطشرة
حليمة... غير هو الجني مطشرهن
.. راح انزلة يمي جوا واسويلة حليب انتي ارتاحي
... هزيت راسي خالتي طلعت بتول جابتلي مي شربت كومتني تمددت
وهي ظلت ترتب بالغرفة
كملت عافتني وراحت اكثر من نص ساعة اني على نفس نومتي سمعت صوت احمد ديصيح جوا
فزيت وكرفصت دخل عليه وطبك الباب بكل قوتة
شكلة يخوف من العصبية
اتقدم عليه اريد اكوم ما اكدر رجع سحلني من الجرباية للكاع واستلمني ضرب ومسبة
كال لج لوووو ميت ولا جاي هذا اليوم انطعنت من اقرب اثنين الي
لج فهميييييني شششسويلج حتى ارتاح اريد اششرب من دمج بسس ادم واكف بعيني
. دخلت خالة تركض لزمتة
وفاء... لك ششششبيك تخبلت قابل هي وكعدتة البنية مكسور ظهرها بالشغل من الظهر للمغرب العتب عليك انت شلون تنومة على الجرباية وتعوفة
... هم زين خالة عبالها ديضربني علمود وكعت ادم
احمد كال اخذوها من كدامي ترى ومحمد ابتلي بيها اليوم
كمت ويا خالة كالتلي انزلي جوا
مقبلت عفتها ودخلت الغرفتي القديمة
اشكد ضربني واشكال الغلط غلط عليه بس ما اكدر الومة اي واحد بمكانة يسوي نفس السوى واكثر
جسمي ظل يون عليه من الوجع يمكن حتى صخنت
بتول جابتلي ادم اريد اشيلة مابية حيل
وهو يبجي يريد يرضع كتلها اخذي الخالة تسويلة حليب يمكن تمرضت ما اكدر ارضعة
فعلاً تمرضت نمت بالفراش مجنت حاسة على روحي
ادم ما ادري وينه باليل بيبي وخالة غصبوني اشرب عصير حتى اخذ علاج
بالكوة شربت شوية اخذت العلاج ورجعت نمت
ثاني يوم كعدت شوية احسن
ادم يبجي اخذتة لحضني
بيبي اجت يمي سألتها شصار
حليمة... المخبل رايح المهند للمحل وما أخذة وطالع المكان بعيد من الناس منزلة ومشبعة كتل وهذاك ممدافع عن نفسه
كايلة شسوي بي اني استاهل
بس ثق بالله معندي شي وياها
ولافديوم انطتني مجال اذا تريد تحاسب وتلوم حاسبني اني
احمد راجع ضاربة ومدمي حتى سلاح ساحب عليه وباللحظة الأخيرة منزل ايده
... انتي منو حجالج
.. خابرت مهند وهو كالي
البارحة باليل اني وصادق حجينا ويا احمد وفهمنا الموضوع كله
لاتخافين بعد ميسويلج شي
... كمت ابجي وشنو الفايدة اني خسرته
متاكدة احمد بعد ميريدني
... بنتي صبري الموضوع بعده جديد وحقة احمد يزعل ويضوج
بمرور الأيام ان شاء الله ينسى وترجعون احسن من قبل
... فرضاً منسى وقرر يتركني
... لا ميعوفج احمد روحة بيج متاكدة يرجعلج بس انتي صبري
... بقيت اني وادم بهاي الغرفة احمد ما اشوفة اذا شافني بمكان يعوف المكان ويكوم
علاقتة ويا مهند خربت وهذاك حتى بيت جدو بعد مدخلة
احمد من ينزل من الدوام اكثر وقتة يقضي برا ومن يرجع للبيت ياخذ ادم يمه
العصر احمد بدل وطلع دخلت للغرفة ارتبها واخذ ملابسة الوسخة اغسلهن شلت قميصة والبطرون
شميت عطر مو نفس عطر احمد
شميت القميص عطره ويا عطر ثاني نسائي
جيت اموت من الصدمة مجرد التفكير باحمد ديخوني وجان ويا غيري الفكرة شلتني
كعدت افتش بالقميص اريد الكي اي دليل ثاني
دورت بكل مكان شفت حمرة وردية خفيفة على ردن القميص
الشك صار يقين جمدت حتى النفس كمت بالكوة اسحبة
لزمت فوني اتصلت عليه دكيت اكثر من مرة مجاوب انطاني رفض
ايدي ترجف بالكوة طلعت الرسائل وكتبتلة اذا مترجع للبيت هسه منا الساعة اكتلها الروحي
اقل من ساعة دخل احمد للغرفة يباوعلي بستغراب
شمر السويج ونتر شرايدة
كمت وكفت وخليت عيني بعينة رفعت القميص وشمرتة على وجها
كتلة انت دتخوني مووو
.. جايبتني مناك لهنا حتى تساليني هالسؤال
... جاوووووبني
... وكف ينزع الساعة ويحجي ابرود شلج دخل اصاحب ازوج هذا شي يخصني
... من اطلع من حياتك هذاك الوقت تكدر تسوي اليعجبك
.. ههه ومنو يكلج انتي مطالعة من حياتي ترى اني مبقيج على ذمتي الخاطر ادم مو لسواد عيونج
... اهاا ماشي واني راح اريحك من هذا الحمل الثكيل من باجر انروح نطلك
ادم شكو عليه لاتخاف ميصير عليه شي
... اجة عليه بعصبية لزمني من كتفي وعصره كال طالعلج صوت وصايرة تحاسبين لج زين مني مبقيج عايشة لهسه
... ههههههه والله ضحكتني لك اني اشرف من الشرف واشرف منك ومن امثالك شحده اليجيب طاريي بكلمة
اذا عبالك انت لازم عليه زلة ودتذلني بيها احب اكولك انت غلطان
اني مسويت شي غلط حتى اتحاسب عليه
وهسه ححجيها كدامك واني مخايفه منك
مهند وكف ويا بالوقت الي الكل عافوني مجان عندي احد يوكف وياي غيره
ابوية صار جوا التراب
امي عاشت حياتها اخوية حاير بنفسه وناسيني جدو بيبيه كل همهم يفرضون سيطرتهم
ومن غير مثنى وضربة الي
... كافييييييي سكتي اياج اجيبين طاري هذاك الكلب عل لسانج
... هالمرررررة ححجي وانت غصب عنك تسمعني
مهند معافني مثل ما الكل عافوني تعلقت بي وحسيتة الانسان الوحيد الخايف عليه
ومن طلبني رضيييت اي رضيت حتى اخلص من عيشتي العايشتها
لزم حلكي فركة
وعاط لج كاااافيييي لاتخليني ادخل بخطيتج واقضيييييي عليج
دفعت ايده وصحت لا مووووو كافي وما اسكت
ومن كالوا اخوج تقبلت الموضوع لان البگلبي اله مووو حب
اذا هو حبني هاي مشكلتة مو مشكلتي
اني لا وعدتة بشي ولا عندي علاقة ويا
هسه مؤمل هم قريب مني شنو يعني هم احبه
للاسف هذا گلبي الحقير يوم الوكع بالحب
حبك انت رغم كل اغلاطك
بس من هالحظة انت انتهيت روووح للساقطة الجنت بحضنها البارحة كمت اضرب بي واصرخ يا كلب ياحقير انت بحياتك مراح تنعدل تهسترت ملختة لزم ايدي
كمت ارفس واصرخ وخرررررر الله يلعنك ويلعن گلبي
دفعتة مني كمت الطم ملخت نفسي اجة قيدني بحضنة يريد بس يهديني
.. لج كافي ششششبيج راح تموتين بس سكتي وخلي احجي وياج
... ياريييييت امووووت ولا هالعيشة العايشتها على الاقل اخلص منك ومن حقارتك
دخلن بيبي وخالة للغرفة
حليمة... الله يسود وجهك بس لا رجعت ضربتها وحق الحق اذا مسويلها شي اسوي بيك سواية مصايرة
. ششمسويلها هي الله جالبها ومخبلها على راسي
... اجت بيييي حضنتني كمت اصرخ هذا الكلب خانيييييي ما اريده بعد
اخذوني الغرفتي كالوا بس فهمينا شبيج وشنو خانج
.. روحوا سالوا البارحة وين جان وويامن سهران
مااريده بعد ما ارييييييده
وفاء... بس اهدي واني اروح افهم منه اكيد انتي غلطانة
.... مجاوبتها هي امه أكيد حتبررله
هالمرة اني كرهت احمد وحقدت عليه
حاول اكثر من مرة يراضيني طردتة وتعاركت ويا كتلة بعد انساني اني اليجمعني بيك هو ادم
وبس يكبر شوية غصب عنك اخليك اطلگني
احمد...لو تموتين ماكو طلاك
اني قبل ما طلكتج وصبرت عليج سنين تريدين هسه اطلكج وانتي ام ابني
.. مهتميت الكلامة عفتة وكمت
ورا العشة كاعدين بالهول ادم بحضن خالتي
اجتي سنو يمي شلتها العب وياها
ادم من شافها بحضني زحف من حضن خالتي اجة عليه دخل بحضني وكام يدفر سنو برجلة
وفاء... هههههههه فدوة حبيبي يغار منها
حليمة... طالع على ابو بكلشي
احمد..وشبي ابو
... الله ميجرعك مدري هالمسكينة شلون راح تخلص عمرها وياك
... احمد ابتسم كال ليش متكولين انت الله يساعدك عليها
... درت راسي ما اريد اسمعة ولا اشوفة صاح سنو راحت عليه
ادم من شافها يم ابو طفر من حضني راح يم احمد
خررب لزم راسها خنكها بالكوة احمد فكها من ايده
احمد... حظروا نفسكم بعد يومين اسويلة طهور
... فزيت انداريت على احمد
بدون وعي حجيت ويا لا شنو من هسه اطهره عوفة بعد صغير
احمد... هو لان بعد صغير اريد اطهره من هسه
صادق... لاتخافين عليه يومين ويطيب اذا كبر يتاذى اكثر
... مدري شبيه اخاف عليه موبيدي
وبيوم الطهور احمد وجدو سسوو عزيمة اجني عماتي وعمامي
خالة لبست ادم دشداشة بيضة فدوة طلع يخبل
حاطتة بحضني وكاعدة لوبيدي اضمة بگلبي وما انطيهميا خايفة عليه
عماتي والبنات يضحكن عليه
بيت عمو حاتم كلهم اجوي ماعدا مهند من يوم العركة انكطعت رجلة من بيتنا
مثنى ونسوانة هم اجوي ههههه مرتة الجديدة مبينة ماكلة عقلة وزينب مذلولة ومكسورة
جابوا المضمد احمد اجة يريد ياخذة
حضنت ادم وابجي ما أريد انطي
احمد.. يمعودة عوفي الرجال دينتظر لاتخافين ميصيرلة شي
.. مااه عوفة والله بعده صغير وين يتحمل الألم
احمد بالكوة اخذه مني عماتي يضحكن عليه واني دموعي تنزل عشرة عشرة
مدخلت وياهم جوا بيبي وخالة جانن يمه
من سمعت صرختة وبجية سديت اذني وكمت اشهك يمكن لوما شوية اوكع من طولي فرفحت
خلصوا اجتي خالة عيونها حمر هي هم متتحمل تسمعة يبجي كالت تعالي رضعي بالكي يسكت
رحت وياها من شفتة يناشغ من البجي تخبلت انوب اريد اخذه الحضني اخاف لايتأذى
بيبي كالت اخذي الغرفتي رضعي
رحت الغرفة بيبي احمد جابة الي خليتة بحضني يبجي ميقبل يرضع الحد ماتعب من البجي يلا اقبل يرضع
شهكاتة وهو يبجي كطعن گلبي
احمد كاعد بصفي
سحب راسي يريد يحضه ابتعدت عنه ودرت وجهي
تحسر عافني وطلع
بهاليومين ادم لعب بينا لعب متنحس ليل ونهار يبجي اني وخالة هلكنة من التعب
أحمد هواي حاول يراضيني منطيتة مجال نفسي جازة منه
ادومي طاب ورجع الوضعة الطبيعي
كاعدة ويا بيبي كالت راح نخطب المؤمل
.. فرحت من كل گلبي كتلها وأخيراً مؤمل راح يزوج اي ومنو العروس اكيد وحدة من بنات خالاتة
... عوع عششتو والله لخليها حسرة بگلب رسل تاخذ وحدة من بنات خواتها
... هههههههه خرب ولاينكدرلج حلومة لعد منو العروس
. تذكرين صديق احمد وعلي سيف راح نخطب اختة
... عوجت حلكي وشلون انساهم منو العروس اية لو الثانية
... اية مزوجة نخطبلة الثانية
... بيها الخير ان شاء الله البنية حلوة ومؤدبة وهما ناس محترمين
... اي والله ناس ذهب الله يحفظهم
النسوان راحن طلبنها وتمت الموافقة وحددو يوم المشية والخطوبة
احمد عاند ميقبل اروح للخطوبة
تعاركت ويا كتلة مؤمل اخوية شلون تمنعني احظر خطوبتة وهي الخطوبة بس نسوان ومو حفلة ضخمة
بيبي وجدو حجوا ويا بالكوة وافق
بيوم المشية لبست فستان برونزي طويل ومقبط ومكياج بلون الفستان لبست فوكا الصاية والشال ونزلت
احمد كاعد على اعصابة ادري بي ميريد يلتقي ويا مهند بس مجبور يروح
من شافني عاط بيه شهالمكياج خففي لا ومحمد ما اخليج تطلعين باب البيت
... اللهم طولج ياروح ترى مكياجي خفيف شبيك دتتحجج
.. دانيييييية كتلج روحي مسسسسحي
صادق.. اشكد طايح حظ ومتستحي شنو هالصياح
حليمة... احميد اجفة الشر وخلي اليوم يعدي على خير لاتخرب فرحة الولد
... ضجت وبنفس الوقت محبيت اعكر مزاجي واسوي مشاكل لزمت الكلينكس خففت الحمرة
رحنا للحفلة العروسة فدوة تخبل اية كل شوية تصفن بوجهي ههههههه
الحمد لله تمت الخطوبة على خير كملنا ورجعنا
باليل حاضنة ادم ونايمة
فزيت من النوم حسيت احد حاضني من ظهري انداريت هذا احمد
رغم النعاس نترت بي توخرر لا اصرخ والم عليك البيت
.... عادي صرخي مرتي وبحضني شحده اليحجي
... اني مو مرتك دانتظر الوقت المماسب واطلك منك
.... ههههه قبل هم هواي كلتيها وخبصتي الدنيا اريد اطلك واريد اطلك وتالي رجعتي الحضني
... جنت غبيه وصدكتك والشاطر يتعلم من اخطائة واني بعد ما اكرر نفس الخطأ
... جذابة ادري هذا الكلام من ورا گلبج انتي تموتين عليه
... هه اشكد واثق من نفسك
اي صح جنت اموت عليك قبل مو هسه
وبيوم الي لمست غيري وخنتني طلعت من گلبي
... ههههه وداعتج مسويتها شلون تتوقعين نفسي تدني على هيجي نماذج
... اي صدكتك العب غيرها يا شاطر
يلا كوم منا ادم حيكعد من الصوت
... دانية تدرين بيه ما اجذب داكولج مخنتج ولاتقربت الوحدة غيرج ثقي بالله ممسويها
... لك شفت حمرتها على قميصك وعطرها تارس القميص
... صح ما انكر طلعت سهرة ويا جماعتي وبيها نسوان
وحدة منهن لطشتلي بحجت تركص كل شوية تشمر روحها عليه
متحملت عفتهم ورجعت للبيت
... اسسسسكت جمالة يكولها بكل فخر تركص وشمرت روحها وخطية احمد الفقير عافها وطلع
... بداعت أدم هذا كل الصار كتلج مستحيل نفسي تدني على هيجي نماذج
... هم ما اكدر اسامحك نسيت شلون ضربتني حتى منطيتني فرصة ادافع عن نفسي
... رحمه الابوج سدي الموضوع ولاذكريني بي
والخلقج الحد هسه نار مشتعلة بصدري من هذا النذل مهند
.. واني ششنو ذنبي والله مسويت شي غلط
... واثق منج حبيبي بس الغيرة عمتني
.. وانت بعد كلما تتعصب وتغار تجي تضربني
.. دانية الموضوع جبير وماكو رجال بالدنيا يكدر يتقبلة بسهولة
... كمت ابجي
مسح دموعي وباسني همس مشتاقلج ولج
كتلة ماااه وخررر اكرهك
... باعي بعيني وكولي اكرهك
... ما اباوع وبكيفي
اخذني الحضنه وبدا يوزع بوساتة على وجهي
مكدرت اقامة احبه موبيدي روحي مرنبطة بروحة
بادلتة الحضن بالهفة وشوق
...احمد اووف لوتدرين اشكد احبج
... مممم ادري واني امووت عليك
اخذ شفايفي بين شفايفة سهرت ويا احلى سهرة كدر احمد ينسيني الصار
خلاني بدقايق انسى كل الزعل
حياتي ويا الحمدلله مستقرة صح مرات نزعل لكن زعلنة ميطول اكثر من ساعة
تعذبت هواي بحياتي بس الله عوضني بي وبأبني ونور عيوني ادم
مهند اجة على احمد اتوسل بي حتى يرجع يحجي ويا وجدو صار واسطة بينهم صح تراضوا بس بقت علاقتهم متوترة وماكو بينهم غير السلام
امي طلعت من حياتي بشكل نهائي
اخوية فدوة العمرة بهواي مواقف ثبتلي هو فعلاً سندي ربي يحفظة الي
جدو وبيبي هذولة امي وابوية رغم تحكمهم بيه بس يبقون احن الناس عليه الله يطول بعمرهم ويحفظهم
بالنهاية حابة اشكر الجميع على كلامهم الحلو وتشجيعهم الي
حتى الانتقدوني احترمهم وكلامهم على راسي لان اني بشر واكيد عندي هواي اخطاء تحياتي الكم وربي يوفق الجميع ان شاء الله وميحرمكم من وجود اهلكم بحياتكم
_____________
هاي نهاية قصة دانية واحمد يارب اتكونوا استمتعتوا بيها واستفادتوا منها
واهم شششششي تكون النهايه عجبتكم هههههه
تحياتي الكم بسمة البياتي