_ عنفوان أمرأة _
( بقلم بسمة البياتي)
_البارت التاسع عشر _
الخاطر خالتي صعدت واني دكات گلبي صوتهن يوصل السابع جار
وكفت يم باب الغرفة تنفست بعمق قويت نفسي وشجعتها فتحت الباب صار احمد كبالي واكف ينزع ملابسة
بقيت واكفة يم الباب كتلة خالة كالت احمد يريد يحجي وياج
نتر بعصبية دخلي وسدي الباب
اللهم طولج ياروح دخلت وطبكتة
نعم احجي شرايد
تقدم عليه
لزمت يدت الباب أريد انهزم اجة بسرعة جرني من ايدي قفل الباب واخذ المفتاح
حجيت برتباك لويش قفلتة انطيني المفتاح إريد اطلع
....شمسوية بروحج شهالبس والشعر والمكياج
... ترى عادي هي حفلة اكيد هيجي البس واتمكيج
... فرررررضاً احد صورج
... محد يصور بيبي وخالة من البداية كالن ممنوع التصوير
... وشششعرج شهالون هذا تخلين الأعمى ينبه عليج
.. عجبني وصبغتة لازم بقاموسك حتى الصبغ ممنوع
فرك وجهة بيده يريد يهدي نفسه كال متنزلين جوا اذا متغيرين ملابسج
... انت لويش مجاي تعوفني بحالي ششششتريد مني ما اغير شي يلا انطيني المفتاح اريد اطلع
اجة لزم فكي بيده وعصره كال الحد هاي اللحظة داتعامل وياج بهدوء ليش تخليني اسكطج
... تأذيت منه وخرررررر ايدك اذيتني عاف وجهي كمت افرك مكان الألم بيدي
جر ايدي لزمها وعصر اصابيعي كال بعصبية وين حلقتج؟
... اوووف ربي شلون ورطة اني شصعدني
كتلة ما ادري يمكن واكعة مني
... وااااكعة منج لو ميعجبببببج تلبسسسسيها حتى اليشوفج ميكول مزوجة
... طكت روحي كتلة ومنو يكولك اني مزوجة انت انتهيت من حياتي
جنت محظرة نفسي اكيد حنكفخ اشو هذا عافني وراح كعد على الجرباية
كال حلووو يعني اني مو بعينج خوووش
... انطيني المفتاح اريد اطلع
فتح ايده ومدليها تقدمت عليه وصلت يمه اريد اخذ المفتاح شمرة بالكاع وجرني من ايدي وكعت بحضنة وكصتي انضربت براسة
قبل لا احجي شي لكيت نفسي بوسط الجرباية وهو مثبتني بيده ورجلة ظليت ارفس بس اريد افلت منه
عووووفني شرايد مني
... اني انتهيت من حياتج وممعتبرتني زوجج مووو
... خفت منه كتلة جنت متعصبة وهيجي عوفني فدوة
... تحلمين اعوفج محد كالج اغريني
... فتحت عيني ششغري منك ترى لابسة ومتمكيجة علمود الحفلة مو علمودك
مجاوبني هجم عليه اريد افلت منه ما أكدر كرهت نفسي وكرهتة اضعاف اريد اصرخ واستنجد باحد يخلصني منه مكدرت البيت هوسة جيران وخطار، اذا صرخت تصير سيرتي على كل لسان
اخذ اليريده همس يم اذني أرجعي الغرفتج وبطلي عناد
ابتعد مني كعد يدخن تحركت من مكاني لبست الفستان
كمت ادور المفتاح
كال متنزلين هيجي غيري ملابسج
لكيت المفتاح شلتة كتلة وربك ما اغيرة ولا عبالك بالسويتة حنجبر ارجعلك انت غلطان
انت بهذا تصرفك خليتني اكرهك اكثر من قبل
فتحت الباب وطلعت دخلت للحمام سدت الباب الغصة ابلاعيمي بس اريد ابجي
وفعلاً نزلن دموعي
وكفت كدام المرآيا باوعت ركبتي كلها اثار
حمرتي مباقية وشعري مخربط
مسحت دموعي هيهات اخليك تمشي كلامك عليه
رجعت للغرفة عدلت شعري ومكياجي
خفيت الاثار من ركبتي وزندي
نزلت جوا خالتي وعماتي بالمطبخ عمة زهراء شافتني اشرتلي اروحلها
عفتها ودخلت للأستقبال هه صارلي نص ساعة فوك ولا وحدة بيهن فكرت تجي تشوف لويش هلكد تاخرت
رحت يم ديما مهند ملبسها الذهب وطالع
ديما... وين جنتي اشكد دورتلج وشبيج لويش ضايجة
.. ابتسمتلها مبية شي تعرفين بسوالف اخوج لازم يغثني
...احمد اجة؟
.. اي
عيني اجت بعين خالة رسل شلون تباوع عليه
لزمت ايد ديما كومي نركص شغلوا اغنية حلوة كمنا ركصنا اريد بس التهي وانسى حقارة احمد وياي
جنت حالفة ما اخلي يلمسني بس اااااخ كدر يستقوي عليه
خلصت الحفلة اقاربنا راحوا بقن عماتي
صعدنا فوك البنات التهن يساعدن ديما تنزع الفستان وتفتح التسريحة
أخذت ملابس رحت اسبح نفسي تلعب من جسمي مشمئزة من لمسات أحمد
كملت لفيت المنشفة على راسي وطلعت
ديما هم اخذت ملابس راحت تسبح
زهراء.. ولج دانية اشو مكتيلنة احمد شراد منج خوما سولج شي طولتي يما خفنا عليج
... كعدت انشف شعري جاوبتها بجمود هه اي واضح هواي خفتوا عليه والدليل اكثر من نص ساعة بالغرفة بالجذب ما اجتي وحدة بيكم تسال عني
... والله العظيم دزينا بتول نزلت كالت ديحجون عادي ماكو صوت صياح
.. اوك
بتول... هههههه عمه باعي ركبتها
زهراء... ههههههه والله حميد طلع ابو درب دز عليها حتى يستفرد بيها واحنا عبالنة يريد يرزلها هههههه
دانية... مجاوبتهن تمددت وغمضت
باليل ديما يمي كالت مهند احسه مفرحان يتعامل وياي برود
... بعدكم بالبداية اكيد خلال الأيام تتعودون على بعض وتقوى علاقتكم
انتي ويا من قبل الكلام بينكم قليل لهذا يخجل منج
... مممم اي صح اني هم استحي منه وارتبك من اشوفة
اليوم يبات يمنا هو ومؤمل مراحوا البيتهم
... ششعجب؟
.. خوات خالة رسل باقين يمهم والبيت صاير هوسة
.. اهااا سكتت حاولت انام ما اكدر مقهورة من سواية احمد
الصبح صوت ديما وبنات عماتي يم اذني خليت المخدة على راسي مزعوجة من صوتهن
ديما.. دانية كعدي امشي ننزل نتريك
.. نعسسانة شكو كاعدات من الصبح
... يا صبح ساعة تسعة
... اهوووو عووفوني انام
نمت حسيت احد حضني عبالي ديما
... همست واني مغمضة وتالي وياج يعني شلون ما انطمر
حسيت بخشونة يم ركبتي هذا عطر احمد فتحت عيني صار بوجهي كال ديما شعدها تحضنج
دفعتة وكمت مفزوعة اشششششجابك اهنا شنو مكفاك السويتة البارحة
احمد.. اششش اشتعلوا اهلج
لامكفاني بعدني عطشان
مو كتلج رجعي الغرفتج
.. ما ارجع وما اريدك عوفني بحالي
تمدد على ظهرة وخلى ايده جوا راسة كال ما اعوفج انتي مرتي حلالي
... لا مو مرتك كتلك انت ما الك اي حقوق عندي
... مو كيفج بعدج على ذمتي وشوكت ما اريد اخذج اني عايفج بمزاجي
.. احمد كوووم اطلع لايجن الينات
... خلي يجن قابل شمسوين لاتخافين قفلت الباب
... اوك ابقة اني كايمة
لزمني من ايدي رجعت كعدت
هسه انت شرايد مني
.. اريد ترجعيلي لاظلين ميبسة راسج وبطلي عناد
... باوعت عليه كتلة تريدني ارجع ماشي بس بشرط
رفع حاجبة كال صار بيها شروط اي خاتون وشنو هو؟
... تخليني هالسنة ارجع للدوام
... واذا كتلج لا ماكو شسوين
.. غمضت عيني معناهه انساني ولاتفكر بيه
.. ششوفي لج دوام انسسسي تحلمين اخليج اداومين دانية لاتجبربني استخدم القوة وياج وارجعج بالغصب
... انت لويش هلكد اناني ضيعت عليه سنة وهالسنة هم تريدها تروح مني احمد هاي فرصتي الاخيرة اذا ضاعت بعد متتعوض على الأقل خليني بس اخذ شهادة السادس مطالبة منك شي صعب ومستحيل
... قبل جنت مخليج اداومين على اعصابي مو عاد هسه بهذا شكلج
.. شبي شكلي اذا علمود شعري اني محجبة وحواجبي الاطراف من يطلعن ما اشيلهن
فز مد ايده على حواجبي فركهن
عاط هاي شششمسسسوية واني عبالي بوجهج مكياج
... خررررب حظي هسه اني شحجاني همست حواجبي جانن محلوات وسويتهن
... يالكعبة كولييييييييلي هسسسسسسة شسوي بيج من البارحة محتركين اهل اهلي بسبب شعرج وطلعتي مصخمة حواجبج وفوكاها ادورين دوام
من غير جسمج سمنانة الملابس صايرة تلطش عليج انتيييي ليششش كاتلة روحج على الدوام
... ششششنو لويشش هذا مسسسستقبلي شهادتي سلاحي لهذا الزمن الاغبر اذا دارت بيه الدنيا محد يفيدني غيرها
اني معندي اهل ينشد بيهم الظهر
حتى انت مووووو سند اذا صار شي اول واحد يتخلى عني هو انت
... الهدرجة اني نذل بنظرج واتخلى عن عرضي وشششرفي
دانية اخر كلام ترجعين لو لا
... اذا مقبلت اداوم اكيد لا
... يطبج طوب محد خسسسران غيرج
عافني وكام متعصب طلع من الغرفة
دفنت وجهي بالمخدة حجيت ويا نفسي هاهيه لازم اتقبل وضعي وما اخلي شي يكسرني احمد هو الخسرني مو اني الخسرتة رغم حقارتة والسوا بيه انطيتة فرصة وهو رفضها بعد ما اله حجة عليه
كمت غسلت باوعت تراكي جان مستور والبدي طويل بقيت بي سويت شعري كعكة خليت الحجاب على كتفي ونزلت
كاعدين بالهول يتريكون
علي ياسر مهند مؤمل والبنات وعماتي
صبحت عليهم مهند باوع عليه بحسرة بسرعة وخرت من كدامة وكعدت يم مؤمل
نزل هتلر ميتحاجة من شاف حجابي مو على راسي غمض عينة وقبض ايده كعد واشرلي البس الحجاب
معبرتة اوكفلي اذا ما حركتك حرك فلا اتسمى دانية
مؤمل...يالتركية لبسي حجابج قبل لا يركع صينية الريوك براسج واني قريب منج يمكن تجي براسي هم
... طز بي مهيهمني
انت شبيك شكلك ضايج ومعبس
... من الغضب النازل على راسي
.. ياغضب؟
....نور
... يبوووو هم تعاركتوا
... تعاوفنا
... يااا عزززا صدوك تحجي
.. اي والله نعلت ابو ابوية بغيرتها
البارحة طول الليل اراضيها وهي قافلة طكت روحي كتلها اني ما افيدج الله وياج
... لا حرام عليك البنية تحبك خطية بس هي لويش زعلانة
... لان عدنا حفلة وبيها بنات اتكلي لاتبقة بالبيت
... ههههههههههه خرب غير خطوبة اخوك شلون تعوف البيت ومتحظر
... مو اكلج مخبلة قررت اعنس ولا اخذها
... طيح الله حظك شنو مرة وتعنس
... شمعرفني ملكيت كلمة مناسبة يمكن بالمؤنث عانس والمذكر معنوس
.. اخاف معدنوس ههههههههههه ضحكنا اني ويا وضربنا كف بكف طيح الله حظج البايو الملفيك
الموبايل يمي وصلني مسج عرفتة من هتلر كاتب اذا متلبسين حجابج وتبطلين ضحك وشقة بالعباس اكوم احرك الكائنات فوك راسكم
خليت الحجاب على راسي
مؤمل... رجلج حيفترسني كافي خلي نكعد عاقل
كعدنا نتريك
احمد من عصبيتة كل شوية يرزل واحد
ماهر اجة من برا يركض وكف يمي كال ننو هاج مدلي ايده
فتح ايدي وياريتني مفاتحتها خلة جرادة صغيرة بيدي عطت بعلوا صوتي عااااااااااااا شمرتها اشو هاي وكفت على كتفي كمت اكمز واعيط اروح منا واجي منا
البنات كلهن كامن انهزمن يخافن اطير عليهن
اني لوبيدي انزع ملابسي مؤمل واكف يريد يوخرها وهو ميت ضحك
مؤمل... ههههههههه خرب غيرتج بس ثبتي بمكان
احمد لزمني من ايدي وشالها من كتفي الجهال يكركرون عاجبهم منظري
رحت غسلت ايدي افركها واحسها مو نظيفة
حتى معدتي نسدت من الريوك
رجعت لكيتهم بعدهم يضحكون بس احمد ساكت
بتول اخذت ماهر غسلت ايده
اجة وكف كبالي كتلة روح بعد ولا احبك
ركض عليه حضني ويبوسني
بوساتة كلها من الحلك هههههه
احمد... شهالتربية الزفرة اخذوا ابنكم لا ابتلي بي
علي... عمتة ويحب يشاقة و ياها ويبوسها انت شكو غيران ههههههه
... اذا انت ابو اكيد يطلغ سكط عليك
.... ديلا عود اشوف ابنك بالمستقبل شيطلع اكيد تلكي من ملهلى الملهى
... ايا سكط لازم شايفني يومية بملهى
فاطمة... دانية قنعت جويسم اسوي حواجبي تجين وياي
...قبل لا اجاوبها احمد كال اخذي غير وحدة دانية متطلع
.. يول مو اريد نفس حواجبها اخاف يسوولي غير موديل
... اعذريني ام رضا مال اخليها تطلع انسي
... متكولي انت على منو هيجي طالع البنية حتتعقد بسببك
... لاتخافين عليها كلشي ميصير بيها
ضجت منه عفتهم كمت
خلصت العطلة بدا دوام ديما قبل الدوام بايام راحت ويا خالة اشترت ملابس للكلية
تحاول متظهر فرحتها كدامي جنت اضوج من هذا الشي ما احب احد يشفق عليه
اني واحمد منلتقي هواي لان من يشوفني لازم يسممني بكلامة يحاسبني على الصغيرة والجبيرة وصل مرحلة من يشوفني احضن وابوس ماهر يتعصب
ساعات اطخ براسي اعوف البيت واهج اختنكت لاطلعة لاطبة
خو امي ومثنى رجعوا وياي مثل قبل صياح وغلط
اذا اني كاعدة بمكان وبنتها موجودة من تكوم تبجي تجي تركض تهد عليه اتكولي شسويتلها اكيد انتي بجيتها
تبقة تفحص بجسمها ادور اثر ضرب
بيبي وخالة ميسكتنلها اشكد يرزلنها وهي ولاتهتم
بيوم خالاتي يمنا ماما كاعدة ومخلية شمس بحضنها صار كلام على الجمال
كالتلهن شموسة الوحيدة طالعة عليه تخبل
خالتي جاوبتها لا بالعكس تشبه ابوها
حليمة.. علي ودانية احلى منها
زينب... ياااا عمة شلج بهالحجي دشوفيها شلون حلوة
... منيلها حلوة هالزريكة بس شعر دانية وخفت دمها بالف مرة
خالاتي اكدن على كلام بيبي
ماما شاطت اتكولهن لاغلطانات شمس احلى
اني صافنة عليها من راحن خالاتي سآلت بيبي
اكولج بروح بابا كوليلي اني بنت زينب لو لا؟
... عزززززا بعينج على هالسالفة اذا مو بنتها لعد بنت منو انجبي عيب تحجين هالشكل
... ما ادري داشك اني مو بنتها متشوفيها شلون تكرهني
... دخلي تولي هالمكموعة هي ليش كل وحدة حملت وجابت صارت ام اكو نسوان مثل البزازين يخلفن ويشمرن وامج وحدة منهن الله مطيح حظها ماكو بگلبها حنيه
... اكولج حلومة مدامج صايرة طيوبة وحبابة وياي احجي ويا صادق خلي يطلكني من حميد ترى والنبي حيصير بيه توحد من الحبسة
... اكوم اولي انتي مينطالج وجه ادور طلاك العوبة بنت العوبة
جيات رفل صديقة بتول كثرت ودائماً تجي من يكون احمد موجود
ولازم تكعد بالهول مقابيل الدرج وهو ينزل كاشخ على اربعة وعشرين حباية يلمع من فوك ليجوة
عينها تظل عليه ولاتنزلها وهو هم يباوع
من اكعد وياهن تظل تمدح بنفسها تتقصد تبين نفسها هي احسن من الكل تتباها بروحها وباهلها وشهادتها
انزعجت منها كامت من تجي ولا انزل جوا
باليل متمددة سمعت صوت بجي ديما جوا البطانية
كشفت راسها شكو ولج شبيج
ديما تشهك وتبجي بقهر
لج بابا جاوبي خوفتيني
حجت وهي تناشغ مم هند ميحبني
...ترى مفهمت شي اكعدي واحجي عدل لويش ميحبج وشلون عرفتي
... هو من انخطبنة مدايرلي بال وميهتم بيه لايحجي وياي بالفون ولايطلعني
... امده حظي عبالي شوف شصاير
على هاي اموتة نفسج وتكولين ميحبني
الولد مو هو بنفسه يوديج ويرجع من الكلية
لج اني من ازوجت اخوج لليوم ممطلعني ويا هي مرة وحدة اخذني للمطعم من عقدنا
واتصالات شبه مقطوعة بينا .
... لا دانية مو بس هذا السبب مهند بعده يحب حبيبتة القديمة
... انمعط گلبي هذا شجاي يصخم كتلها شلون عرفتي
... من تصرفاتة واضح هالشي دوم ضايج ويدخن ويسمع اغاني حزينة ولج والله من اصعد ويا اروح للدوام ادورلي اغنية مبيها فراك وحزن ماكو
.. هذا مو دليل على انو بعده يحبها
... دانية داكولج بعده اني سالتة وهو منكر
.. شسألتي؟
.. كتلة انت بعدك تفكر بحبيبتك وهاي الاغاني عليها
.. كال ما اريد اكذب عليج واكولج لا اني گلبي بعده لهسه مطايب ساعديني انساها واشفى من حبها لان حبها لعنة ومرض بالنسبة الي
.. سكتت ما اعرف شجاوبها هي رجعت تبجي بحركة كطعت گلبي دخيلك ربي ما اريد يصير مصيرها مثل مصيري ديما رقيقة بسرعة تتأثر
حضنتها اهديها
بهذا اليوم كرهت مهند اني مواعدتة بشي ولا جانت عندي علاقة ويا على شنو هلكد متأثر ومدمر نفسه ومدمر ديما ويا
ثاني ديما مداومت اباوع عليها شلون ذبلانة ومقهورة
ساعة تسعة اتصلت على مؤمل كتلة اذا موجود تعال للحديقة اريد احجي وياك
مؤمل.. اسف اختي اني مرتبط ما اتواعد نص الليل بالحدايق ويا البنات اني اهلي مربيني
... مؤؤؤؤؤؤؤمل مجاي اشاقة يلا تعال
الجو بارد لبست قمصلة فرو بيها كبوس خليتة على رإسي وطلعت
كعدت بالمرجوحة
مؤمل... الدب القطبي شبي متعصب
... متعصبة من هالدنيا السودة
... مبين الموضوع جبير خلي اكعد وحجيلي شبيج
... حجتلة على كلام مهند ويا ديما كتلة بالعباس بديت اخاف يروح يجفص بكلمة ويورطني
كاااافي خلي يطلعني من راسة اني بنت عمة عرضه وعرض ولد عمامة
شلون نفسه تتقبل يفكر بيه واني على ذمة رجال
ترى اني محبيتة ولا راح احبببببه خلي ينساني الخاطر محمد
ديما اعز من روحي ما اريد اخسرها بسببة وصلت مرحلة اذا ظل هذا الضغط عليه احرك نفسي واخلص من هالعيشة
مؤمل.. اهدي اني احجي ويا الظاهر هذا تخبل دانية انتي مو بس بنت عمي انتي اختي وتاج راسي اليمسج يمسني لج اني گلبي طاك عليج من اشوف وضعج مو انوب يجي مهند يكملها بالعباس احرك الامة عليه اذا تأذيتي بسببه
دخلوا من برا احمد ومهند
احمد خلقتة انگلبت من شافنة اجه علينا مؤمل ضايج ترخص اخذ مهند وراح
احمد.. شعندج كاعدة ويا وحدكم بهل ليل
... ترى كاعدين بالحديقة مو بغرفة
... اجة جرني من الكبوس كال اني مو مانعج منه انت دتسسسسسسوين عناد لو شنو
... كافي تعبت منك ومن تحكمك عووووووفني بحالي
من عطت بي كفخني على راسي بكل قوتة
هو ضربني لو اني انجنيت اشكد اكو قهر بگلبي كله طلعتة بهذيج اللحظة
الله ياخذك الله لايوفقك يا عاررررر
استلمتة ضرب هو بس يريد يسد حلكي يخاف الجيران يسمعون
حتى قميصة ملختة كطعت كل الدكم شالني فوتني جوا
التموا على صوتنا
خالة وعمو اخذوني من يمه
عامر... ولكم صوتكم خزيتونا شبيكم
... ابنننننننك النذل جاي سسسسسسكران وضربني
احمد كمز جرني من شعري لزمو يجرون بي
... ما اريدك اكرررررررهك
الله لاينطي كلمن ورطني بيك
البنات سدن حلكي وصعدني فوك جسمي يرجف من العصبيه
اسمع صوت غلط احمد وصياحة
لوين يلا صار هدوء علاقتي ويا احمد خربت بالزايد حتى كلام مبقة بينا
وضع ديما ومهند شوية صار احسن من قبل
كاعدة ويا البنات بتول تحوص
ديما.. اكولج دنوشة دتلاحظين بتول متوترة ومو على بعضها
.. اي من كعدت لهسه تصفن احسها تريد تحجي شي بس مستحيه
كتلها بتول شبيج مو على بعضج ولج اخاف حامل ومستحية تكولين هههه
بتول.... دانية مو كافي زعل انتي واحمد لشوكت حتبقين هيجي
... اهووووو لو محاجية احسن
... لا اهووو ولاصخام لج اصحي وفكري بعقلج العناد والكبرياء ح يدمروج
رجلج حيروح منج
... بتول بدون لف ودوران دخلي بالموضوع
... دانييية احمد مصاحب وعنده علاقة..........
يتبع