NAPANGIWI si Alice nang ipaparada pa lamang niya ang kotse niya sa tapat ng gusali kung nasaan ang talent agency ni Tita Bebs ay nakita na niya ang mga nagkalat na media sa labas. Kanina ay tumawag na sa kaniya ang manager niya para sabihin na naroon na si Coleen. Sana lang maisip ni Larry at Aki na mag-ingat sa pagpasok sa gusali para hindi mapansin ng mga reporter.
Pagkaparada niya sa kotse niya ay napansin na siya agad ng media. Naglapitan sa kaniya. Pero hindi lumabas si Alice hanggang dumating ang assistant niyang si Nikki na may kasamang mga security guard.
Really, bakit ba ginagawa nila itong malaking isyu? Pabuntong hininga na naisip ni Alice bago naka-dark shades na lumabas ng sasakyan. Agad na binato siya ng maraming katanungan mula sa iba't ibang reporter. Kung hindi siya inalalayan ng security at ni Nikki ay baka naiduldol na sa mukha niya ang mga recorder at mikropono. Ngumiti lang siya pero hindi kumikibo. Maglalakad pa lamang sana siya patungo sa entrada ng gusali nang mapasulyap siya sa kararating lamang na kotse. Nanlaki ang mga mata niya at nawala ang ngiti dahil sasakyan iyon ni Aki. Pumarada iyon sa kabilang panig ng parking lot pero abot tanaw pa rin ng mga reporter.
Nataranta si Alice nang umibis mula sa kotse si Aki at mapatingin ang binata sa direksyon niya. Binawi niya ang tingin at muling ngumiti sa mga reporter para hindi mawala sa kaniya ang atensiyon ng mga ito. "Walang ibang malalim na kahulugan ang larawan na iyon. I assure all of you na magbibigay kami ng statement tungkol doon soon," sabi ni Alice.
"Ah, ayun ang isa sa mga lalaki sa larawan!" bulalas ng isang reporter na nakalingon na kay Aki na himbis na mag-isang pumasok sa gusali ay naglakad pa palapit sa kanila. Nahati ang atensiyon ng mga reporter kina Alice at Aki. Katulad niya ay inulin din ng mga katanungan ang binata pero seryoso lamang ang ekspresyon sa mukha nito at deretso ang tingin sa kaniya. Hindi nito pinapansin ang mga reporter. Na para bang sanay itong hindi namamansin ng reporters.
Napasinghap si Alice nang hawakan ni Aki ang kamay niya pagkalapit nito sa kaniya. Kasabay niyon ang kislapan ng mga camera. Subalit ni hindi kumurap ang binata. "Let's go," tipid na sabi nito bago siya hinatak palapit sa katawan nito at inakay papasok ng gusali. Sumunod sa kanila ang security at si Nikki.
"Pamilyar ang mukha mo, are you also an artist?" sigaw ng isang reporter mula sa likuran nila.
"Oo nga 'no? Parang nakita ko na siya dati," bulalas ng iba pa.
Nagtaka si Alice kung bakit pamilyar daw ang mukha ni Aki. Pero malabo namang lumingon siya at tanungin ang mga reporter tungkol doon kaya binalewala na lang niya. Tumahimik lang nang makapasok sila sa gusali. Napabuga siya ng hangin at napalingon sa binata na hawak pa rin ang kamay niya.
"Bakit mo iyon ginawa? Dapat dumeretso ka na lang ng pasok habang nasa akin ang atensiyon nila. Nakuhaan ka tuloy nila ng picture," bulalas ni Alice.
Kumunot ang noo ni Aki. "Hindi kita kayang pabayaan mag-isa. May kasalanan din ako kung bakit ka nila ginugulo."
Napabuga siya ng hangin at napailing. "Pwede bang hayaan mo na lang akong protektahan ka?"
Tumigas ang anyo ng binata. "Gusto ko na ako ang po-protekta sa iyo," pagdidiin nito. Nagkatitigan silang dalawa, walang gustong sumuko.
"Anong ginagawa ninyong dalawa diyan? Huwag kayong gumawa ng eksena sa harap ng mga empleyado dito," malakas na bulalas ni Tita Bebs mula sa kung saan.
Sabay pa silang napalingon ni Aki. Nang makita ang manager ay bumitaw si Alice sa kamay ng binata. Mukhang mainit na kasi ang uli ng matandang babae at iiwasan muna niyang dagdagan ang galit nito.
"Miss Alice, tara na," bulong ni Nikki sa kaniya.
Napabuntong hininga siya at napasulyap kay Aki. Nakatingin sa kaniya ang binata at may kakaibang kislap sa mga mata nito na nagdulot ng kirot sa puso niya. Sa kung anong dahilan ay mukhang nasaktan ang binata.
"Aki?" untag niya rito.
Nag-iwas ng tingin ang binata at nagsimula na maglakad upang sumunod kay Nikki na nauuna sa kanila. "Tara."
Nagtataka man ay naglakad na rin si Alice. Napansin kasi niya na sa kanila nga nakatingin ang mga empleyado doon.
SA opisina ni Tita Bebs ay naabutan na nila si Coleen na nakahalukipkip habang nakaupo sa isang couch. Mabuti na lang at may tumawag na empleyado sa manager nila kaya napagsolo silang tatlo sandali roon.
Kabaligtaran ng inaasahan ni Alice ay mukhang maayos naman ang lagay ng babae. Katunayan ay may kakaibang kislap ng determinasyon ang mga mata nito ngayon kumpara noong huli nila itong makita.
"Coleen," bati ni Alice.
Ngumiti si Coleen at gumanti ng bati. Pagkatapos ay tumayo at bineso siya. "Alice. Nakita ko ang balita sa internet. Dahil sa amin ni Larry nadamay ka sa gulong ito. I'm sorry."
Napamaang siya sa babae. "Hindi ka nagtataka kung bakit kami nagkita na dalawa?"
Napabuntong hininga si Coleen. "May pakiramdam ako na kinausap ka niya para kausapin ako hindi ba? Iniiwasan ko kasi siya lately dahil gusto kong mag-isip." Sumulyap ang babae kay Aki at apologetic na ngumiti. "Pati tuloy kayo nadamay. Sorry, Aki."
Sandaling napatitig lamang si Alice sa babae bago nagawang magsalita. "So, ano ang napag-isip-isip mo?"
Ibinalik ni Coleen ang tingin sa kaniya at lalong bumakas ang determinasyon sa mukha. "Na haharapin ko ang eskandalong ito na nakataas ang noo. Wala akong ginagawang masama. Nahulog lang ang loob ko sa isang lalaki na mas matanda sa akin. Hindi rin ako nanira ng marriage dahil matagal naman na silang magkahiwalay. At..."
"At?"
Napalingon sina Alice, Coleen at Aki sa pinto nang may marinig na tinig ng isang lalaki. Naroon na pala si Larry na mukhang hinatid din ni Nikki sa opisina. Seryoso ang ekspresyon nito at deretso ang tingin kay Coleen na gulat na gulat naman na makita roon ang lalaki.
Tumikhim si Alice at pasimpleng umatras palayo sa babae at palapit kay Aki na tahimik lamang na nagmamasid. Naglakad palapit si Larry kay Coleen. "At ano pa? Tell me."
Sumulyap sa kaniya ang nakababatang babae na para bang humihingi ng tulong. Tinanguan niya ito para sabihing sabihin nito kung ano ang gusto nitong sabihin. Kapag dumating si Tita Bebs hindi ka na magkakaroon ng pagkakataong masabi ang gusto mo, Coleen.
Huminga ng malalim ang babae at muling tumingin kay Larry. "At... pinag-isipan kong mabuti ang nararamdaman ko para sa iyo. Mahal ba talaga kita o katulad ng ibang mga lalaking dumaan sa buhay ko ginamit lang kita dahil malungkot ako at hindi ko kaya na mag-isa? Ilang araw ko na iyong iniisip kaya hindi ko sinasagot ang mga tawag mo at hindi kita pinagbubuksan ng pinto."
Mukhang nagulat si Larry sa rebelasyong iyon ni Coleen pero nahamig din ang sarili. "At ano ang naging sagot sa mga tanong mo?"
Lumambot ang ekspresyon sa mukha ni Coleen. "Na iba ka talaga sa lahat ng mga nakilala ko na. Na talagang mahal kita hindi lang dahil kailangan ko ng taong mag-aalaga at magmamahal sa akin. Kapag kasama kita, kumportable at masaya ako. Kaya hindi na ako tatakas. Babalik na ako sa trabaho at haharapin ko kahit ano pa ang sabihin nila tungkol sa akin kasi nagmamahal lang naman ako at walang mali doon."
Ngumiti si Larry at tila walang pakielam kahit naroon sina Alice at Aki na niyakap at hinalikan si Coleen. "Good. Dahil mahal din kita. Kaya para sa iyo, handa na akong humarap sa media para sabihin sa kanila ang totoong sitwasyon ng relasyon natin. And I already filed an annulment you know. Dahil gusto kitang makasama."
Napangiti na si Alice. Masaya siya para sa dalawa. Natigilan lang siya at tumabingi ang ngiti nang biglang bumukas ang pinto ng opisina at pumasok si Tita Bebs kasunod si Nikki. Nanlaki ang mga mata ng matandang babae nang makitang magkayakap sina Larry at Coleen. "Anong ginagawa ninyo?" pasigaw na bulalas ni Tita Bebs.
Hindi kumalas sa pagkakayakap ang dalawa. Si Coleen ay matatag na tumingin sa manager nila. "Tita Bebs, mahal ko talaga siya. Please, makinig ka sa amin at huwag mo kami paghiwalayin."
Sandali pa ay nagpapaliwanag na ang dalawa kay Tita Bebs na nakahalukipkip lang at lukot ang mukha. Tahimik lamang sa isang tabi sina Alice at Aki dahil wala pa sa kanila ang atensiyon ng manager niya.
"So gusto niyo magpa-press conference para aminin ang tungkol sa inyong dalawa. Gusto ko lang malaman mo Coleen, na pagkatapos nito ay hindi na tayo sigurado kung makakapagpatuloy ka pa sa showbiz. Either magagamit natin ito bilang good publicity para sa iyo o magdudulot ito para wala nang project ang dumating sa iyo. Handa ka bang itaya ang career mo para sa lalaking iyan?" seryosong tanong ni Tita Bebs.
"I am not risking anything Tita," determinadong sabi ni Coleen.
Mahabang katahimikan ang namagitan bago sa wakas ay bumuntong hininga si Tita Bebs. "Very well." Pagkatapos ay ipinaliwanag nito kina Coleen kung ano ang magiging takbo ng press conference.
Napaigtad si Alice nang yumuko si Aki hanggang nasa tainga na niya ang bibig nito. "Mas honest siya kaysa sa iyo. Dapat matuto ka sa kaniya."