أنتَِ نورى (تم التعديل)

الفصل الرابع عشر

سيف بعدم إستيعاب:"إنتى بتقولى إيه؟!!"

رقيه:" كفايه لحد كده."

سيف:"ماينفعش ، مبقاش ينفع."

رقيه:"ينفع ولا ماينفعش الفكره إنه خلاص كده كفايه، كفايه عليا وكفايه عليك."

سيف بحزن وهو بيقرب منها:"رقيه أنا........."

رقيه بدموع وهى بتقاطعه وبتبعد عنه:"أرجوك إبعد عنى ، كل أما بتقرب كل أما بغرق وبضيع أكتر ، وجودك هو إللى مدخلنى فى دوامه ، ياريتنى ماكنت قابلتك ولا عرفتك ، ياريتنى ماشوفت الإعلان بتاع الشغل ده، ياريت كل ده ماحصلش."

كانت لسه هتطلع على السلم مسكها من دراعها...

سيف بعصبيه:"قولتلك مابقاش ينفع خلاص ، مبقاش ينفع تبعدى."

رقيه بدموع:"ليه؟ ليه مبقاش ينفع؟ هو أنا إيه أصلا؟ ها؟ أنا إيه؟"

كان لسه هيتكلم هى كملت كلامها...

رقية بصوت عالي وهي بتبعد دراعها عنه:"أنا حتة مُربيه لا راحت ولا جت ، بتحاول تفرح أهل البيت بأى طريقه ، من أول يوم جيت فيه هنا وإنت بتتهمنى بحاجات مالهاش أى شئ من الصحه، بتبهدلنى قدام الكل وعادى مافيش مشكله ولا كإن حصل حاجه، بس أنا ليا كرامه زى ماحضرتك ليك كرامه...."

سيف:"يارقيه صدقينى أنا........"

رقيه وهى بتقاطعه:"عموما إنت إعتذرت، بس المشكله مش فيك، المشكله فيا أنا د، قولتلك مبقاش ينفع لو أنا فضلت هنا هتكسر أكتر، فأرجوك كفايه، سيبنى أمشى."

سيف بحزن وهو بيبص فى عيونها:"هتسيبينى يا رقيه؟"

سكتت ومعرفتش ترد بإيه كل إللى كانت بتعمله إنها بتعيط وبس...

سيف:"ردى عليا ، هتسيبينى وتسيبى مليكه وتمشى؟ إحنا بقينا محتاجينك أكتر حد فى القصر ده، وجودك هو إللى مفرحنا ومالى علينا حياتنا، معقوله هتسيبينا وتمشى وتاخدى الفرحه إللى زرعتيها جوانا معاكى وإنتى ماشيه، طب إنتى كده هتكونى عملتى إيه؟ إنتى بالمنظر ده عشمتينا بحاجه وفى الآخر إختفيتى، مسألتيش نفسك لو مشيتى مليكه هيحصلها إيه؟ أنا هيحصلى إيه؟"

رقيه:"أنا آسفه بس ده إللى كان لازم يحصل من الأول."

سيف بإبتسامة حزينة:"بس أنا يارقية مش هسمحلك تمشى ، إستقالتك مرفوضه."

كانت لسه هتتكلم فجأه سمعت صوت خلاها محرجه جدا ألا وهو صوت زقزقة معدتها الخاليه من الطعام...

سيف بدهشة:"إيه ده!!"

رقيه بإحراج:"هاه ، لا مافيش."

سيف:"إنتى جعانه يا رقيه؟!!"

رقيه:"لا مش جعانه."

سمعت صوت زقزقة معدتها تانى...

سيف بضحك:"كذابة."

مسكها من دراعها وسحبها وراه، وراحوا نحية باب القصر...

رقيه:"إنت بتعمل إيه؟ إحنا رايحين فين؟ وساحبني وراك زي الجاموسة كده ليه؟"

سيف بضحك:"ألفاظك يابنتي، هنروح ناكل بره ، أنا كمان جعان جدا."

رقيه:"بس إحنا........"

سيف:"وقت الكلام خلص ، يلا نروح ناكل."

خرجوا من القصر...

واحد من الحرس:"خير ياسيف بيه ، فى إيه؟"

سيف:"لا مافيش إتطمنوا إنتوا أنا هاخد الآنسه رقيه وهناكل بره."

؟؟:"نيجى مع حضرتك؟"

سيف:"لا حابب نبقى لوحدنا."

مسكها من إيدها وراحوا لعربيته..

سيف:"يلا إركبى."

كانت لسه هتتكلم....

سيف:"بقولك إركبى."

ركبت وهو ركب وبدأ يتحرك...بمرور الوقت..

سيف وهو مركز فى السواقه:"قولى بقا نفسك تاكلى إيه؟"

رقيه وهى مركزه فى الطريق:"أى حاجه."

سيف:"أى حاجه دى بتتعمل فين أو بتتباع فين؟"

رقيه بضيق وهى بتبصله:"إنت بتهزر؟"

سيف:"شوفى إنتى بتقولى إيه ، وبعدين أنا عازمك قولى بقا هناكل فين."

رقيه:"معرفش قولت أى حاجه."

سيف:"طيب إيه رأيك أقترحلك؟"

رقيه:"قول."

سيف:"شاورما؟"

رقيه:"مممممممممم ، لا."

سيف:"بيتزا طيب؟"

رقيه:"ممممممم ، برده لا."

سيف بتفكير:"لازانيا طيب؟"

رقيه بتفكير:"مممممممممممم ، لا برده."

سيف بإستفسار:"تاكلى برجر طيب؟"

رقيه:"مممممممممممم، برده لا."

سيف بتأفف:"يابنتي إنجزى إرحمينى قولى عايزه تاكلى إيه؟"

رقيه:"ٌقولت أى حاجه."

سيف:"يووووووووه ، مانا إقترحتلك وإنتى مش عاجبك."

رقيه:"مش عارفة، شوف إنت حابب تاكل إيه؟"

سيف وهو بيجز على أسنانه:"أنا حابب آكل بيتزا مثلا."

رقية برفض:"لا لا لا مش حلوه خالص."

سيف بعصبيه مكتومه:"إنجزى قولى عايزه تاكلى إيه؟"

رقيه:"ماتهدى شويه."

سيف بزهق:"الصراحه إللى يعرفك مايبقاش هادى، قولى هتاكلى إيه؟"

رقيه بتنهيده صعبه:"فراخ مشويه."

سيف:"نعم؟"

رقيه:"فراخ مشويه."

سيف:"وده نروحله فين؟"

رقيه:"فى واحد فى رمسيس كده بيعمل فراخ مشويه إنما إيه مقولكش ، هى الوجبه ب 30 جنيه ربع فرخه كده وكذا رغيف بلدى و....."

سيف وهو بيقاطعها:"إحنا فين ورمسيس فين؟ ، إختارى مكان قريب."

رقيه:"ده الوحيد إللى باكل عنده ، طب فى واحد كمان هناك بيعمل سندوتشات كبده الواحد ب 3 ج و......."

سيف وهو بيقاطعها:"رقيه ، إحنا عايزين أكل."

رقيه:"ماهو ده أكل."

سيف:"إللى بتتكلمى عنه ده بتسميه أكل؟ إنتي فاهمة هما بيجيبوا الحاجة دي منين؟؟ إفرضى إتسممنا؟"

رقيه بسخريه وهى رافعه حاجبها:"شوفت حد قبل كده جاله تسممم من المطاعم إللى زى دى ولا إنتوا يهمكوا الغالى فعشان كده بتحبوا تتسمموا على الغالى؟" *هبده بقلم ساره بركات😂😂😂*

سيف بضيق:"بقولك إيه إسكتى أحسن ،أنا عارف أنا هوديكى فين."

رقيه:"كان من أولها ، كان لازم يعنى تخلينى أفكر."

سيف:"أستغفر الله العظيم."

بمرور الوقت..دخلوا مطعم مشويات كبير جدا....

رقيه بذهول:"إيه ده؟"

سيف:"عجبك؟"

هزت راسها ب"اه" وده لإنها مش واثقه فى صوتها...مسكها من إيدها وقعدوا على ترابيزه...

رقيه بهمس لسيف:"معقوله فى مكان زى ده بيفتح فى الوقت ده؟"

سيف وهو بيبص فى الوقت:"الساعه 1 يعنى مش متأخر أوى بالنسبه للقاهره."

رقيه:"المكان شكله غالى أوى يا سيف ، إحنا كده هنكع."

سيف:"هن..هن...هن إيه؟!!"

رقية بتوضيح:"هنكُع ، هنصرف فلوس كتير يعنى."

سيف:"ياستى أنا عازمك، إطلبى إللى تطلبيه ماتشيليش هم الفلوس."

رقيه بتحذير:"برحتك إنت إللى إخترت."

سيف بضحكه مكتومه:"طيب."

بدأت تبص فى ال Menu وبتدور على أقل سعر فيه... بلعت ريقها بإرتباك لما شافت الأسعار فوق ال 200 جنيه...ضيقت عينيها إللي جات فى عيون سيف إللى مركز معاها جدا...

سيف بإستفسار:"إختارتى إيه؟"

رقيه:"هاه؟ مش عارفه ، بقولك إيه هاتلى كوبايه مايه أنا شبعت أصلا ، كفايه شكل الأكل إعتبرنى أكلت."

سيف:"يا رقيه إطلبى إللى إنتى عايزاه."

رمت ال Menu قدامها...

رقيه:"بقولك إيه ، الأكل هنا شكله مش حلو أصلا ، تعالى نروح ناكل كشرى من عند أبو طارق أحسن الطبق الكبير جدا جدا جدا بأقل من كده وهيشبعنا."

سيف بنفاذ صبر:"رقيه."

رقيه:"نعم؟"

سيف بضحكه خفيفه:"أنا إللى هطلب."

رقية بلامبالاة:"برحتك إنت إللى حابب تصرف."

حاول يكتم ضحكته وبدأ يطلب....بمرور الوقت..كان قاعد بيتفرج عليها بهيام وهى بتاكل بشراهه...

رقيه:"الله الأكل طعمه حلو أوى."

سيف بضحك:"ماتتكلميش وإنتى بتاكلى."

رقيه:"طيب."

كملت أكلها..ولاحظت إن سيف قاعد بيتفرج عليها ومش بياكل...

رقيه بإستفسار:"إنت مش بتاكل ليه؟"

سيف بإبتسامة جميلة:"أنا أكلت وشبعت خلاص."

رقيه بإستفسار وهى بتشاور على أكله:"عايز الأكل ده طيب؟"

سيف بضحكه مكتومه وهو بيديلها الأكل بتاعه:"إتفضلى."

كملت أكلها فى صمت وهو كان متابعها بهيام...

سيف بهيام بينه وبين نفسه:"أوعدك يارقيه إنك هتبقى أسعد واحده وإنتى معايا."

خلصت الأكل إللى معاها ودخلت على أكل سيف...وهو طول الوقت بيضحك عليها...

بمرور الوقت...كانوا فى طريقهم للقصر...

رقيه وهى حاطه إيدها على معدتها المنتفخه:"أنا أكلت كتير أوى."

سيف وهو مركز فى السواقه:"بالهنا والشفا."

رقيه وهى بتبصله:"شكرا يا سيف على العزومه بتاعة النهارده."

سيف:"العفو ، إعتبريها أسف منى ليكى على إللى حصل بسببى ، انا فعلا ماكنتش أقصد أنا مش عارف انا قولت كده إزاى."

فى اللحظه دى عيونه جات فى عيونها...

رقيه بهيام وبدون قصد:"حصل خير."

إرتبك للحظه من نظرتها بس فاق ورجع ركز فى السواقه....بعد مرور وقت قصير ... دخلوا القصر ولسه كانت هتطلع على السلم...

سيف:"أتمنى أكون فرحتك حتى لو بنسبه 1%."

رقيه بإبتسامه وهى بتبصله:"أنا فرحت بنسبة 100% ، شكرا يا سيف مره تانيه."

سيف بهيام:"أنا تحت أمرك دايما."

رقيه بإرتباك:"طيب ، أنا هطلع أنام ، هو أنت مش هتنام؟"

سيف:"هنام ، بس ورايا شوية شغل هعمله الأول."

رقيه:"ماشى تصبح على خير."

سيف:"وإنتى من أهله."

تابعها بعيونه بهيام وهى بتطلع لأوضتها.