قدر: حمزززززه هدي الله يخليييك....حمزه امشي بطيئ...... حمزه هدييييييي لنسوي حادث..... حمزه بروووح بيبي هدي امشي مثل البشر حمزززززززززه
حمزه:صوووووتج مااااسمعه
قدر: بس هدي بالسياقه حمزززززه حنسوي حاااادث ولك اووووكف
ماكو فقد نفعل هواي
كلبي احسه حيوكف من السرعه
صح من اني وصغيره اريد الموت
لكن اخاف منا
يجي وكت الجد اخاف من الموت
وجنت خايفه لنسوي حادث ومنموت
منو يكول اذا سوينا حادث متنا
اكيد حنتكسر
حنتسكط
اريد اوكفه بعد ماكدر
فقررت اسوي روحي مريضه او شي حتى بس يوكف
لان خلص عيوني غوشت راح نسوي حادث
سيارات كومه اكو كدامنا واحنا جايين نطيير
لزمت بطني وخليت ايدي الخ على حلكي وكمت اصيح واسوي روحي راح اتقيئ
قدر: اووووكف حمزه حمزه بطنييييييي وكف السياره ااااااخ بطنييييييي حموووت
حمزه: شكو شبيييج
قدر: حمزه وكف حمووووووت وكف حمرززززززه الله يخليييك وكف راح امووووووت بطنييييي
عالسريع فجأة وكف السياره
ما احس الا انضرب راسي ضربه قويه من كد ماجنا دانمشي سريع ووكف فجأة
عليت راسي
خليت ايدي على جبيني باوعت لكيت دم
احس روحي داتفر بيه
راسي هزه صايره بي
حمزه يحجي وياي مادافتهم شديكول
اباوع عليه اشوفه سباطعش واحد
بده شويه شويه يصير مغووش
لحد ماصارت سوده الدنيا بيه.....
....
فتحت عيوني بغرفه بيضه
حاولت شويه شويه ارجع تركيزي
احس راسي مبنج
ديمووتني
توضحت الدنيا بعيوني
لكيت روحي بالمستشفى
وحمزه كاعد يمي
تعدلت خليت ايدي على راسي
لكيت مشدود جبيني
رفعت راسي انتبه عليه حمزه بسرعه اجا لزم ايدي
دفعتها حيل
قدر: وخر لتقرب عليه
حمزه: قدر اني اسف
قدر: رجعني للبيت
حمزه: يلا كومي تكدرين تمشين لو اجيبلج عربانه
قدر: اكدر امشي
مديلي ايده حتى اكوم
لزمتها وكمت
كلت مو وكت عناد هسه اريد اطلع منا
كلبي يحتصر بس اطب المستشفيات
كمت على طولي
عدل هدومي وحجابي
احس الدنيا تفتر بيه
طلعنا من الغرفه
لزم ايدي ومشينا
اجر نفسي بالكوه مدري شجاني
طلعنا ووصلني للسياره
فتحلي الباب راسا سديته
قدر: اطلبلي تكسي ماصعد وياك
حمزه: شداتحجين قدر
قدر: اي ماصعد وياك انت متخلف
حمزه: ساعة عصبيه يمعوده صعدي يلا
قدر: ساعة عصبيه زين بسبب شنو تعصبت حضرتك
حمزه: متعرفين يعني
قدر: حمزه اطلبلي تكسي او اني اطلب ماااصعد وياك روحي عزيزه ماصعد ويا واحد مخبل مثلك
حمزه: صعدي هسه قدر
قدر: تمام
عفته ومشيت للشارع اريدلي تكسي
بسرعه اجا ركض عليه وسحبني من ايدي
حمزه: قدررر داكلج امشي
قدر؛ وخررر كتلك ماريد اصعد وياااك انت مخبل
حمزه: ماعيدها بعد والله بس امشي خلنرجع للبيت
قدر: ماصعد وياااااك لتلح وخررر
اني ادفعه حضني بنص الشارع
وباسني من راسي
جسمي من فوك لجوا احسه انتل
حمزه: والله اعتذر بعد ماعيدها وداعتج
قدر: وخر حباب
حمزه: يالعمر والله ضجت من نظرات هذاك الحقير الج يلا كاافي عاد امشي خلنرجع
حضني ومشينا
راحت عيني لباب المستشفى
وكعت عيني على شخص ديصفن بينا
احس روحي راحت
ركزت بي زين
اي والله اعرفه لهذا
من دكة كلبي السريعه عرفته هو ايهم
واكف ويباوعلنا
قطرة دم مابقى بيه
بسرعه طب
اريد ارجع عليه اشوفه
مشتاقتله
احس روحي صارلي سنين مشايفته
كلبي زادت دكاته
صعدني بالسياره حمزه واني عيوني عالباب المستشفى
كلت بلكت يطلع مره الخ
بلكت اشوفه
اريد بعد امعن نظري بي
مشينا ووصلنا البيت
كبل ما انزل
لزم ايدي حمزه وباسها
حمزه: قدر
قدر: بلي
حمزه: اعتذر يالروح والله مجان قصدي ساعة عصبيه
مارديت عليه وخرت ايدي وعفته وطلعت
دكيت الباب
صار بوجهي بيت ام ايهم
بقيت اصفن بي
شون ذكريات عندي بي
شكد احبه لهذا البيت هو واصحابه القديمين
بس حسافة الدنيا
تركوني اصحابه ومشو
بحياتي مجنت متوقعه هاليوم هذا
ولا جان ببالي اني فد يوم اباوع عليه وما اتجرأ اطبلهم لان مموجودين بي
زين وين راحو؟.....وين تحولو؟
فزيت على علي ديحجي وياي
علي: وين ضاربه دالغه يولي
انداريت عليه باوعلي وانتبه على جبيني
علي: هاي شبيج
قدر: انطخيت
علي: بشنو
حمزه: بالجام مالسياره
علي: وهاي شون
حمزه: داخت ونركع راسها بالجام
عفتهم وطبيت تلكوني بالبيت كلهم نفس السؤال
وكل واحد حلل بكيفه واكتشف شي بكيفه
ليش وجهج اصفر
ليش عيونج وارمه
شنو هاي الي بجبينج
شصار وياكم
وكل واحد لازم يجي يصفن بوجهي حتى يشوف شنو هاي
عبالك مادري شنو
من بعد هالحادثه هاي
زاد كرهي وخوفي من حمزه
تصورت انو اذا تزوجنا وصار عدنا جهال
ملازم ابد نطلع وياه بمكان
مجرد يتعصب هو وديسوق هاهيه
هاي اول مره طلعه النا وهيج
بعد وييين ويين ياقدر
بعد شراح تشوفين من هالهمجي والمتخلف
صعدت للغرفه كارها كلشي
اريد بس انااام ارتااح
يمكن احتاج نوم لمدة شهر واكثر
اريد اطب بغيبوبه ماكعد منها
لهالدرجه محتاجه الراحه
بقيت اذكر ملامح ايهم اخر مره
شحجه بداخله هسه عني
بعده يحبني؟
بعده يريدني؟.... يشتاقلي؟... يذكرني؟....
بعده كلبي يرجف عليه
احبه والله....
.
.
.
مر اسبوع كامل
وعلى نفس الروتين
حددو بعد اسبوع الزواج
انقبضت روحي
حسيت خلص انكتب موتي
الكل فرحان وبده يحضر
بس اني صاعدة بالغرفه وغالقتها على روحي
ولا عبالك عرسي بعد اسبوع
ماريد اشوف احد ولا التقي باحد
الليل كله اون على ايهم
هو يجي الليل اني احتاجه
محتاجه احد يفهمني
حتى عمتي ابتعدت عنها
كلهم صرت اكرهم
كلهم فرحانين على تعساتي
يعجبهم حزني وقهري
مكدرت احجي واعارض
لان ادري كلامي ممسموع
وجدي مقرر كلشي
حمزه مالتقي بي اهواي
كلما التقي يتقربلي يحاول يلزم ايدي يحاول يحجيني
يغازلني يتشاقه وياي
لاكن اني مثل الجثه وياه
مااحس بشي
لان روحي كارهتاااا
يانااس والله اكرها
ماكو فد شي يسعدني الا وسواه
بس اني فقدت السعاده ويا ايهم
راح كلشي حلو وياه
ماجنت اريد شي من الدنيا غيره
بعدني احبه
وصعب نسيانه
الكل فرحان حيصير عرس وهوسه وزفه وزواج ودك وركص وووو....
والكل فرحان على فرحة حمزه
اكثر واحد مكيف هو وامه
الضحكه مداتفارك وجهم
اول مره اشوف حمزه فرحان
يمكن يحبني!!!
بس مجنت اريد أكد هالفكره براسي
لان اني اكرها
بي كل صفات الزلمه العدل والينحب
بس اني ماحبه
ارجع واكول كرهني بي من اني وصغيره
من اني وصغيره زرع كرها بكلبي
وبدا هالكره يكبر يوم بعد يوم
كامل ومكمل
ضابط وشخصيه وحلو
بس يبقى همجي ومتخلف!.....
.
.
.
جانت بالليل ساعه سبعه هيج شي
كاعده بغرفتي مثل عادتي
وساده باب الغرفه وحتى ممشغله الضو
اسمع صوتهم جوا متونسين ومبلشين بتحضير العرس
وكل وحده تجي عليه تراويني فستانها وتسال حلو هذا؟
اني شكو تاخذون رائي!
كاعده واكتب مذكراتي
معندي شي اسوي
حتى المبايل متجاهلته معندي شي بي
صايره دنيتي ممله هواي وكئيبه
رجعت ضميت الدفتر وتصطحت عالسرير واصفن بالسكف
اندك باب الغرفه
كل ظني هند الي اجت
اشو باوعت لكيت حمزه بسرعه تعدلت وعدلت هدومي
حمزه: خومو كعدج جنتي نايمه شي
قدر: لا بس شكو رايد شي
اجا كعد مقابيلي ويباوعلي ومبتسم
حمزه: اشتاقيتلك ميصير
بسرعه كمت لزمني من ايدي
حمزه: قدر بس فهميني شبيج وياي
قدر: ماكو شي اريد اطب اسبح
رحت للكنتور حتى اطلع هدومي
حسيته اجا خلفي
حضني من خلف وهمس بأذني
حمزه: قدر والله العظيم احبج يولو ويا النفس تمشين ريحيني عاد يولو
كزبر جسمي من قربه وكلامه وانفاسه الي داتضرب بركبتي
حسيت داخون ايهم مانو اني على ذمة حمزه هسه
بسرعه دفعته من عليه
وخرت وعيطت عليه بعد ماتحمل
خلص صبري
عيطت وكلت
قدر: ولك كاااافي ارحمنييي
حمزه: قدر شبيج
وكعت بالكاع انهديت
كمت ابجي اجا ركض ادنى يمي
حمزه: ليش داتبجين سويتلج شي يأذيج الله يلعني بس احجي شبيج احد مضوجج والقران امحيه هسه
قدر: حمزه انت كلك مأذيني انت المضوجني
حمزه: اني؟ الله يشيلني اذا افكر اضوجج ولج انتي روحي من الدنيا
قدر: كااااافي حمزه كااافي ماريد اسمع هيج حجي منك كااافي
حمزه: ليش هيج فهميني كلشي كاعد اسوي حتى بس اسعدج لان احبج وانتي عندي بالدنيا كلها
قدر: انغصبت علييييك اني ماااحبك كلبي مو الك كلبي يم غيير شخص مايهوااااك افهم
تحولت نظراته
جانت كلها حنيه وخوف عليه
صارت عصبيه وتموت
حجا بصوت هامس
حمزه: المن لعد كلبج المن يحب احد اعرفه كرايب لو غريب وين عرفتي احجييي لج
حسيت انو لوصت
بدون وعاتي طلعت مني
كلت اكمل اللوصه مادام جفصت بعد شيخلصني
قدر: اني احب ايهم
انصدم وفتح عيونه حييل عليه
الله يعلم شجانو كايليله يمكن تارسين بعقله انو احبه او شي
وخر من يمي وعلامات الصدمه مبينه عليه
كام وكف عالمرايه ويباوع على روحه ولحد هسه محجه شي ثاني
اني باقيه بمكاني انتظر الاعصار الي حيصير....
حجا بنبره تمووت بهدووء وصوت خفيف
حمزه: شيفرق عني هالدكتور ايهم المغرور اني هم حلو وكافي اني ضابط
جان يحجي بهدوووء يموت ويباوع على روحه بالمرايه
شويه وما احس الا انشمرو عليه شكو غراض عالميز المرايه
وانفتح حمزه
حمزه: شيفررررق عنييييي هااااا لييييش شمعنى هو حبيتييييه وفضلتيييه علييييه لابو خشم المرفووع
قدر: كافي انه مو عصبي وهمجي مثلك
مادري شون طلعت مني هالحجايه بس ياريتني ماحاجيتها وباقيه منلصمه
تقرب عليه ومبينا النار من عيونه
تقرب حسيته انو حيضربني
جنت مكرفصه بالزاويه
بسرعه غطيت وجهي بايديه
حمزه: لهالدرجه تخافين مني؟
قدر: من اني وصغيره زرعت بيه الخوف منك دائما جنت تحصرني بالغرفه وتضربني لحد ماتجي عمه حنان تخلصني منك ومن همجيتك
جنت احجي وابجي
انفعل هواي وتعصب
كام يكسر بالغرفه ويعيط عليه
اني خايفه لاتجيني كفخه تعميني
حمزه: شنوووو ذنبي اذا عصبتتتتت لمن اشوووفج واكفه ويا احد شنو ذنبيي اذا اصييير همجي بحبج لان ارييدج الي لوحدييي شنو ذنبي اني حبيتتج وردج مريتي وام بيتي ولج حسي عااااااد
يعيط ويكسر بالغراض
وحجيه خناجر تطب بكلبي
بالاخص اخر كلمة لمن كال ردج مريتي
اخر شي تعب ووكع بالكاع
غطه عيونه بايديه
صارت دقيقه صمت بينا.... شويه وحجه بصوت ناصي ورايح صوته من العياط
حمزه: من واني صغير احلم بام شامه تحبني واحبها ونكبر سويه بعمري مجنت اكرهج لمن جنت اضربج من حركة كلبي اذا اشوفج واكفه ويا علي او واحد من ولد عمي.... جاهل وتسودن بحب طفله ويغار عليها من الهوا ويريدها اله وحده شتتوقعين حيسوي لمن يعصب... حبيتج والله شاهد على الي بكلبي... احبج من وانتي عمرج 12 سنه لمن شفتج تبجين بفاتحة عمو محمد.... من يومها واني الليل ما انامه اذا ما احلم بيج وبشامتج الي مره من المرات جنتي صغيره بستج بيها وضربتيني جف وخبرتي عمه عليه.... اتصوري عااد ثمن سنين واكثر وانتي ساكنه بداخلي وكل يوم ابني حلم واماني عليج ووياج... كلت ممكن مراهق وفترة مراهقة وحبيتج لكن هسه هم اعتبر مراهق؟ عمري 26 سنه وبعدني احبج.... ااااخ ياقدري ااخ
جان يحجي ومبين عليه ديبجي
لمن كال اخ حسيت الاخ بيه
اني الي جنت متوجعه
كل حجايه كالها طالعه من كلبه وطب سيوف وخناحر بكلبي
لهالدرجه يحبني؟ لهالدرجه مجنت احس عليه؟...
تمنيت الله ياخذني
كرهت روحي... كرهت ايهم
بسببه كسرت كلب حمزه
يارييت ممتعرفه ولا ملتقيه بايهم
تمنيت انو بمكان ايهم حمزه بكلبي ولا جان هيج كسرت كلبه
بس والله مو ذنبي عمايله هيا الي كرهتني بي
صار صمت بينه
الغرفه ظلمه
كمت رحت وادنيت يما
خليت ايدي على جتفه
فز ووكع بحضني بسرعه
جان ديبجي... شي بداخلي خلاني ابقيه بحضني
هو يبجي واني ابجي
ثنينا محتاجين احد يريحنا....
هو انكسر كلبه بسببي... واني مكسور كلبي من ايهم
قدر: والله تستاهل احسن مني انت تستاهل وحده تحبك اني والله مافيدك حتى جمال معندي
حمزه: منهو التحلى بعيني غيرج
قدر: حمزه من احنا وصغار يسمونا الاعداء احنا ممتراهمين لبعض لا انت تفهمني ولا اني افهمك
حمزه: بس والله احبج
قدر: الف وحده تتمناك حمزه لتسوي بروحك هيج صدكني ما استاهل دمعه منك
بقى واكع بحضني
سحب تنهيده يمكن روحي انسحبت وياها
تنهيدته مليانه وجع وحزن
مليانه تعب...
وخر من يمي من غير ميباوع بوجهي
كام وصل الباب
كبل ليطلع كال
حمزه: حنفسخ واني اخبرهم بهالقرار وتكللهم ممتفاهمين واني ماريدج
قدر: شون متريدني والكل يدري بيك تحبني
اندار عليه وكال
حمزه: لعد اكللهم والله قدر تحب الدكتور ايهم ومتريدني؟
قدر: لا مو هيج بس قصدي ماعتقد حيصدكونه
حمزه: معليج بيهم المهم نفسخ وهاهيه ولتخافين الي يكول كلمة عليج امحيه من الكون وحق الله
حجا هيج وطلع
بس طلع رجعت اكمل نوحي والبجي
اااخ يروحي شكد متوجعه
كمت شغلت ضو الغرفه
اباوع عليها كلها هوسه
قايمه قيامتها
نص الغراض متكسره
حتى المرايه مكسوره
متفلشه نص غراض الغرفه
مبين انو جنا بمناقشه تخبل
كمت اعزل بيها
مادري شكد طولت
شويه وطبت عليه هند
هند: قدر
قدر: ها
هند: شنو هاي سمعت حمزه يكول لجدو وعمو كريم يكللهم اني وقدر نريد ننفصل صح هالحجي حتنفصلون؟
قدر: اي ممتفاهمين وقرارنا ثنينا هذا
هند: لاا هذا قرارج انتي وفرضتي عليه
قدر: اي قراري شنو تريدين اعيش ويا شخص ما احبه
هند: ولوييييش كل هذا بس علمود الدكتور ابن بغداد
قدر: لا وبعدين هذا شي ميخصج
هند: وسفه عليج تفضلين الغريب الي مشايلج من كاعج على ابن عمج الي متربايين سوا والي يشتريج باغلى ثمن
قدر: هند كلت شي ميخصج بعدين انتي متحبين حمزه هياته تركته لويش ضايجه لتحسبيني ما اعرف عيونج فاضحتج اتهني بي يلا
هند: لااان احبه ماريد اشوفه متأذي ماررريد اشوف كلبه مكسوور اعرفه يحبج ويموت عليج وراحته يمج بس وبعدج عنه يعني موت اله ما احب اشوفه مقهوور حتى لو على تعاستي..... لان احبه مارريد اشوفه متوجع اريده دووم فرحااان.... تصدكين يوم خطوبتكم لمن لبسج الحلقه اباوع على عيونه مليانه حب الج شلت شكو غيره بكلبي بس لان شفته متونس وفرحان... حسبي الله عليج لان داتقهري ومداتريحي
حجت هيج هيا وداتبجي
عافتني وطلعت من صدك كرهت روحي
حسيت شكد اني ظالمه وحقيرا
ربي اخذني وريحنيي ماريد اعيييش بعد بهيج دنياا
كملت تعزيل الغرفه
اريد انزل جوا اخاف مادري ليش
كلشويه اجي يم الباب اريد انزل واتراجع
شي بداخلي ديمنعني انزل
اخر شي فتحت الباب ونزلت
اشوف الوجوه كلها تخزر بيه وهدوووء البيت
طبيت للمطبخ جانت عمه قمر كاعده والنسوان كلهم حوليها
انتبهت عليه بسرعه اجت ركض ولزمتني من ايدي
قمر: انتيي السبب انتييي شدعي عليييج ولج شدعييي شكد ظالمه وحقيرا
طيبه: قمر شجاج هيا شدخلها مو كلج ممتفاهمين ثنينكم
فردوس: وهم تصدكون هيج جذبه بربكم يولي قدر لايكون مسويتلج شي مكسوره وعرفها
فتحت عيوني عليها حيل
مكسوره؟
هاي شقصدها
دمعت عيوني
طيبه: خيه ام نور شهل حجي
فردوس: شكو شكلت الا لعد ليش هيج بيوم وليله يقررون ينفسخون شو جانو مثل العسل
قمر: ولج قدررر شمسويه
قدر: شمسويه
فردوس: اعترفي شمسويه من مكسوره هاا ولج
قدر: عمه شهل حجي
فردوس: يداده كلنا نعرف انو حمزه يموت عليج وممعقوله يتركج وبعدين نور دكول سمعت صوت صياحات طالعه من الغرفه الي جنتو بيها ثنينكم يعني شتفهمين من هيج سالفه
قمر: ولج عااار اعترفيييي شمسووويه
قدر: يابه شهل حجيي
طيبه: يمعودييين صفو النيه ليش تروح بالكم للشغلات المو زينا
فردوس: بس انتظرو جم يوم وتبين وتنفضحين بنت عذراء افندي
قمر: حسبي الله همزين ماتورط وياج المسكين
فردوس: اني الحمدلله معندي جاهل جان هم وكعتي ويحبج يبوووو
نور: جان بتلينا بيج ههههههه
فردوس: والله اذا ممسويه مكسوره وتركج ميطلع اسمي فردوس
طيبه: عيييب ام نوور عيب هيج حجي لتحجين هيج حجي عندج بناات
فردوس: عيني بناتي متربايات احسن تربيه مو مثل غير ناس انشمرت من واحد لواحد تربيتها
طيبه: شنو ذنبها يعني اهلها توفو
فردوس: اوووي حتفتحيلنا موضوع بالاخلاق هسه
طيبه: عيني ام حمزه لتسمعين منها قابل مانعرف قدر شنو لتحجون هيج حجي والله عيب
على غفلا رجع حمزه من برا
وبقي صافن بينا
سكتو كلهم
بسرعه رجعت طبيت
شون بعد اباوع بوجها
شون بعد يكون الي عين احجي وياه
طبيت كعدت احتصرت هوااي
وكلامهم بكلبي يدك
شمسويه من مكسوره؟!!
لهالدرجه العالم قذره وتفكيرها وصخ
كاعده لوحدي بالاستقبال جنت وافكر بحجيهم
احتصرررت بعد ماكدر
عيوني غووشت بالدموع
كل انسان واله طاقه
اني هنا خلصت طاقتي
متحملت
شهكت طلعت صوت بالشكها قوي
بالشهكا طب حمزه
بقا يباوع عليه
نزلت راسي سويت روحي ملتهيا
حمزه: قدر
قدر: بلي
حمزه: رفعي راسج شو
قدر: شنو
حمزه: رفعي راااسج شووو
رفعت راسي عليه
بسرعه اجا يمي ولزم وجهي
حمزه: شبيج
بس كال هيج كمت ابجي بعد ماكدر
حمزه: ولج شكووو شبييج
مدري شون سويتها بدون وعاتي وكعت بحضنه وكمت ابجي حييل
وبكلبي دك كلمه شمسويه من مكسوره
كرهت روحي والله
ابجي بحضنه حييل
حمزه: بس فهميني شكو شصاار ليش تبجيين
قدر: بعد ماتحمل والله
حمزه: منهو وياج بس احجي والله اهد عليه هد
قدر: كلكم عليه كلكم تكرهوني شذنبي امي من غير دين
حمزه: ليش شصاار بس فهميني
قدر: تعبت والله تعبت
حمزه: ولج احجييي
وخرت من عليه وباوعت بعيونه
جانت عيونه بيها دمع
بيها قهر وحزن
كمت اضرب على صدره
قدر: انييي لعد يحجون بشرفييي ولك ليييش ليييش
حمزه: ولج شكووو شهل حجيي
قدر: ولك لييييش هييج العالم تفكيرها وصخ
حمزه: شصااار احجي وحق الله اضربج هسه احجي شكووو
قدر: انييي لعد يكولولي مسويه مكسووره حتى تركج حمزه هيييج اني قذرره
حمزه: منو كااال هيج
قدر: كلهمممم كلهمممم
حمزه: منو بالضبط كلهم بس احجي
نزلت راسي رفعه بيده ويباوعلي بقهر
حمزه: منهو كال هيج يولو بس احجي
قدر: عمه فردوس وامك
حمزه: امي؟؟
قدر: يكولن همزين تركج وماتورط بيج المسكين هيج عااله صرت عليكم هييج عااار اني
حمزه: كتيلي امي وعمه فردوس مو
بسرعه كام سحبته من ايده
قدر: لا الله يخليك بدينك لتسوي شي
حمزه: وخري شو
قدر: الله يخليييك اكعد ماريد مشااكل
حمزه: يولو وخررري داكلج
قدر: بداعتي لتسوي شي
حمزه: ماسوي شي بس أدبهم شويه
فلت ايدي وراح
بسرعه صعدت فوك كبل ميكب بيهم
طبيت وسديت الباب وخليت ايديه على اذاني ماريد بس اسمع صوت صياحات
تعبت من العياطات والصراخات
كرهت الصوت العالي من صدك
اتوتر صرت منا
سمعت صوت صراخات حمزه
حمزه: وحق الله وحق من انزل القرآن ان سمعت بعد هيج حجي من اي وحده بيكم والله تشوف مني شي مشايفته وخلي اسمع بعد ولكم احترمووو شوي عيييب طكت شيباتكم وبعدكم كدرتكم على هاليتيمه كااافي عاااد بطلووو شويه بطلوووو
سمعت صوت هبده قويه كمت ارجف
بقيت كاعده ورا الباب الغرفه وابجي
احتصرت على غفلا بو من حجيهم والله مادري
.....
تم فسخ الخطوبه بينا
كام يعصب جدي وضاج منا
بس حمزه كاله ممتفاهمين وماريدها ومن هالحجي
ماكدر يغصبنا لان هو حمزه ميريد
صح بعده يحبني بس كرامته!!
بعدني اشوف بعيونه الحب الي
ويمكن حتى بعده يريدني!
بس اني مصدكت خلصت منا
صح انقهر عليه هواي
بس ارجع وانقهر على روحي
مو قليل الي شفته منا
ماريد ابقى اني المضحيه
كافي عشت حياتي كلها اضحي وانطي للغير على حياتي وسعادتي
مرت الايام
واسترجعت روحي شويه شويه
بعدني مناسيه ايهم ولا فد يوم حنساه
اغلب وقتي بالغرفه كاعده
اخاف جنت كبل اكعد واحجي ويا احد
هسه نهائيا باليوم لو احجيلي كلمة لو ما احجي
زوجات عمي فردوس وقمر يبقون يسمعوني حجي ويضربون بسمامير
بس سكتت
مبيه حيل حجي وعركات
فقدت الشهيه هواي
فقدت من وزني هم بدون ما احس
محتاجه ام ايهم هواااي!
مشتاقتلها.... مشتاقه اطب بحضنها الحنون... عوضتني عن كلشي.... وهسه تروح وتتركني!
اذكر فد مره طبيت على حساب ايهم
وكعدت اكلب بالمنشورات مالته
فد منشور اله جذبني وكسرلي كلبي
جان كاتب بي
" أذا تارس خلايا البال بيَّش انساك چا گلي؟."
ومخلي جان صورته جواها
انمردت من هالشعر
عرفته يقصدني
ونص التعاليق كايليله '' لو بيها خير مجانت تروح.... هيا الخسرانه.... محد يموت من غياب احد..... تنساها تنساها ماتضل هيج ووووو.......''
هواي تعاليق هيج
اقرا ودموعي تنزل
كل ليلة ابقى اصفن بصورته وابجي
ابقى اصفن بي
ماكدرت انساه ولا لحظه
راح يبقى عايش طيفه براسي
تمنيت ولو المحه
شكد اطلع واروح للسوك
ادور بالعالم عليه
بس حسافه اذا شفته
ناس هوايه يمي بس اني احس روحي وحيده لان بدونه!!
مره مرتين وأيست
عرفت هاهيه بعد حتى الصدفه متجمعنا
.
.
.
جنت كاعده بالحديقه العصر لوحدي
رجع علي من برا جان بالنادي الرياضي
شافني اجا عليه
علي: هاا غنمه كاعده لوحدج بالحشيش
قدر: انجب ولك ميصير قابل اكعد لوحدي
شمر عليه سويج سيارته
وكع على ايدي تصورو جرحني!!
انجلخت وكام يطلع دم هواي
قدر: ااااخ عليي
علي: شكوو
قدر: جرحتني ليش هيج
علي: لتجذبين
قدر: والله بااع شون انجلخت
علي: اوووي يالحساسه شو صاير
قدر: شمدريني
رحت اعقمها رفعت ايدي
اباوع كلها كدمات
يربي شنو هاي
شي غريب
مهتميتله للموضوع وعفته
صار الليل طبينا حتي ننام
فزيت بنص الليل
وجهي يصب عرك.....وجهي حار ناار
اريد اكوم ماكدر
صابتني حمى حيل قويه
بقيت الليل كله الوب من الحمى
وجهيي يصب عرك غير مفسر
مدري شجالني
جنت انام لوحدي راحت عمتي من يمي
عبرت هالليله بشلعان الكلب
تكررت هالليله اكثر من مره
اكثر من مره نص الليل اكعد على حمى قويه تصيبني وعرق يصب من وجهي
كدمات هواي كثرت بجسمي
صرت انجرح من اي شي خفيف ويصير نزيف مو طبيعي
اكثر من مره اطب اسبح
الاحظ بجسمي وبالاخص جوا برقبتي اكو فد انتفاخ مو طبيعي
وحتى بطني بيها انتفاخ احس وتجيني حالات تأذيني حيييل تنزعجني
صرت باليوم لو اكل وجبه وحده لو ما اكل
وزني وصل 38 شي ممعقول!!!
صرت شبح.... ضعفت حييل
كلت حروح للدكتور ينطيني مشهي للأكل
.
.
.
بدلت وتحضرت العصر حتى اروح للدكتور
اذكر هاليوم هذا بكل تفاصيله.... اذكر هاليوم الي حول حياتي
اذكره بكل قسوته ومرورته......
للحكايه بقيه....
....................................................................................
اعتذر عالسحكات ولتنسون التصوييت💙
#منة الله_الايوبي ✨