رجعت جانت الدنيا ظهر وهوا بارد بداية الشتا جبت خواتي من المدرسه ووصلت البيت جان هووسه مليان اطب وشكلي بالباب؟؟؟
اويلي الله
لكيت بيبي ممدديها بالكاع ولافينها بوصله بيضه بسرعه بلا وعي مني رحت يمها وحضنتها
قدر: لا بيبي لاااااا األا انتي لتروحين وتتركيني لاااا عفيه رجعيلي بيبي ماكدر بدووونج لييييش هيييج الدنياااا ويااااي ليش كلمن احببه واتعلق بي تجي تاخذه منيييي بيبي عفيييه لخاطري كووومي لتروحييين وين تاركتني لوحديييي
ابجي واعيد بكل قوتي تهسترت لاول مره انقهر وانغث وابجي على احد
صح بابا هم مات بس جنت صغيره ومو هواي اوعي بس هسه لا اختلف هسه اني جبيره واعرف شنو موتت وبالاخص انو بيبي جانت كل حياتي تعلقت بيها اكثر مما تعلقت ببابا
اجوي يسحبوني بس اني ماكو حاضنه بيبي بكل قوتي وابجي حييل جان موقف كلش صعب
ماريدها تروح وتعوفني عبالك انو حضني راح يرجعها الي بس هذا قدرها!
اجت عمتي سحبتني بس ماكو اني منتهيه ولازمه بيبي قوي ماريدهم يفكوني عنها
لحد ماحسيت احد جرني حيييل من ايدي وشالني ومدري وين راح بيه لان حسيت فقدت الوعي
.
.
.
فتحت عيوني بالكوه احس راسي متبنج لكيت روحي بالمستشفى واباوع يمي هند وعلي وعمه طيبه راسا فزو من شافوني
طيبه: ها يمه شون صرتي بشنو جايه تحسين
قدر: اني وين شجابني لهنا
طيبه: يمه انتي تخربطي واغمه عليج ونزل ضغطج من هيج نقلناج للمستشفى
قدر: صدك بيبي توفت
علي: هسه شلج بهالحجي المهم طلعي منا
قدر: حبابين جاوبوني
هند: قدرر كافي هسه
قدر: عمه طيبه الله يخليج ريحيني وكولي جذب ماتوفت
طيبه: يمه هذا قدرها
قدرها!!! مرتين اسمع هالكلمه على اعز ثنين راحو منو
ماكافيك ياقدر؟ ماكافي تاخذ عزاز كلبي.. بعد شبقيتلي
صرت اكره اسمي بسبب القدر هذا
وتالي؟ بعد شضامتلي الدنيا؟ شراح تشوفني بعد
طلعوني من المستشفى ورحت للبيت وهم رجع الكئابه بس هسه بالازيد
البيت معتم واسود والكل عيونهم مورمين ووجهم شاحب من الحزن
اول مطبيت البيت حسيت انمسك كلبي وروحي انعصرت واحس شي بعيوني مديخليني ابجي
.
.
.
مرت ايام الفاتحه واحنا ملتهيين بالناس التجي والي يجون يعزون
لاول مره اشوف جدي مكسور!
طلع هواااي يحبها لبيبي يعني على موت بابا ماهيج حسيته بس هلمره لا
حسيته مكسور الف كسره بغيابها
صح مابجه ولا نزل دمعه كدامنا لكن مبين عليه
من صدك اخذت البيت وياها وراحت...
البيت يخنك من دونها....
اصعد لغرفتها اختنك...
لمن اجي انام بلا وعاتي اروح لغرفتها حتى اروح ابوسها واطب والكيها مموجوده...
صعبه هيح تروح وتتركني
عرفنه اثر موتها هو جلطه قلبيه
هيا من زمان جان عدها ضغط وسكر... بس مجنت متوقعه فد يوم تروح وتعوفني
مكدر اتخيل حياتي وهيا ماكو.... ماكو ضحكتها... ماكو دعائها الي... ماكو عصبيتها عليه
صعبه والله العظيم صعبه
رجعت اكمل دوامي بس فاقده كلشي
فاقده الضحكه وفاقده الابتسامه على وجهي والكل اجا ياخذ من خاطري
يعني بالسادس بابا وبالثالث بيبي الله يستر من السادس الاعدادي منو يروح بعد
بس خلص بعد ما اتعلق بأحد
هالدنيا ميدوملك احد بيها
يجي القدر بلحظه وياخذ كلشي منك
ابتعدت عن الكل...
ماصرت اتقرب من احد...
ولا اتعلق بأحد...
صرت وحيده...
حتى صديقاتي بالمدرسه ماصرت اجتمع وياهم ولا اختلط ولا اتعلق بأحد بيهم...
واهلي نفس الشي من بعيد لبعيد.....
ماريد بعد اتعلق بأحد واخلي كل حياتي وبعدين يررح ويتركني فجأة...
بعد ماستحمل صدمه الخ...
كافيني تعلقت ببابا وتركني... وتعلقت ببيبي وهم تركتني
خليني بعيدا عن الكل
بس المشكله لمن ماما توفت بابا صبرني ولمن بابا توفه الي صبرني هو بيبي..
زين هسه من بيبي راحت منو حيصبرني؟؟
طولت هواي حتى اكدر اتعود على غيابها...
بس ماصدك انو راحت...
مرات اكعد افكر ويا روحي اكول صدك راحت بيبي؟
ماصدك راحت وتركتني بس بعدين اقتنعت انو هذا قدرها... قدرها تروح ويا ماما وبابا
الشي الوحيد الي اتمناه هو انو يجي قدري عاد واموت واروح ويا اعز ثلاثه عندي
مشتاقه لبابا... مشتاقه لماما مشفتها غير بالصور بس...
من صدك اول مره اتمنى الموت لنفسي
اريد اروحلهم تمنيت الله ياخذ روحي
كلما جنت اروح للنوم ادعي اني وانام... يارب نيمني واخذ روحي ولتخليني اكعد... من كل عقلي جنت ادعي هالدعاء واكرر بي
لكن اكعد الصبح والله مياخذ روحي بعد كاتبلي عمر جديد
ودروس بعد الدنيا معلمتني
صح جنت جبيره بس هم اعتبر طفله
مراهقه جنت واحتاج حنان...
محتاجه حضن يلمني وكت تعبي...
ومحد انطاني هالحنان غير بيبي.. هيا الوحيده الي جنت اشمر روحي عليها اذا واجهت شي يتعبني
هيا الوحيده الي تخاف عليه وتحبني وتعرف تتعامل معاي ومع سني الي يحتاجله هواي نصائح وتعليم
تركت بروحي هواي جروح وكسر
من صدك راحت الفرحه من عندي
اختفت الابتسامه من حلكي
صعب تتعلق بشخص هوااااي ويتركك
داومت بس مالي خلك نفسي
بس جنت رايده اكمل دراسه حتى اكمل وصية بابا الي انو اخذ شهادتي
حمزه ومرت عمي فردوس احسهم مجارعيني ابد وكاعديلي على كلمة
جنت ابتعد عن الكل حتى هند وعلي وعمه حنان
ولو جانو هواي يريدون يغيرون جو الي بس اني قافله...
.
.
.
مرت الايام عادي ملتهيه بالدوام وبالدراسه وهالسنه وزاري اني وكل المواد صعبه عليه اروح على ولد عمي كلهم يتحججون انو ميكدرون
هند مبطله من الدوام
علي ملتهي بدراسته هو هم جان بصف خامس اعدادي وهاي ثاني سنه اله دائما يرسب شكد ممقضيها طربكه
وحمزه هم بالكليه قانون اخر سنه وملتهي هم ماكدر اروح عليه واصلا اني ماجرعه مو النوب اروح عليه يدرسني اوي
بقيت اعصر على روحي حتى افتهم المواد
.
.
.
اجت الامتحانات وامتحنت واجت النتائج وطلعت ناجحه الحمدلله بس كلها بالحافه بس اهم شي نجحت
اجت العطله واني قضيتها كلها تنظيف
وكأنو زوجات عمامي دينتقمون من عندي
كله تنظيف وشغل....
يوم يجر يوم واسبوع يجر اسبوع
لحد ما اجت السنه الدراسيه الجديده
نزلت للسوك واشتريت مستلزمات المدرسه بما انو طبيت اعداديه وصرت جبيره
طبعا جانو بالورث مالبابا جانو عمامي مشغلين فلوسه وكل شهر يجي ينطينا عمي احمد نص الي ونص لمرت ابويه
وجنت اخلي فلوسي يم عمتي اصمدها لان مجنت اصرف هواي
بس بأيام المدرسه
فا نزلت للسوك واشتريتلي المستلزمات
اذكر جان وكتها نزلت لوحدي اني وخواتي بس وجان اختي لينا توها داطب مدرسه
رجعت للبيت اول مطبيت لكيت حمزه واكف بالمطبخ وجان دياكل تفاحه وشكله توه راجع من المضيف
باوع عليه وخزرني سلمت عليهم وصعدت للغرفه حسيته اجا خلفي دك الباب
قدر: تفضل
حمزه: وين جنتي
قدر: بالسوك
حمزه: وشووون تروحييين لوحدج هااا
قدر: تره مو جاهله اني
حمزه: بله جااهله عمرج كله 16 سنه
قدر: اي وهسه شتريد يعني
حمزه: اكسر راسج اذا طلعتي بعد لوحدج
قدر: ماعندك سلطه عليه رجائا لاتدخل
حمزه: لججج غصبا عنج
قدر: لا مو غصبا عني صح معندي لا اب ولا ام يحكموني بس عندي علي وعمو احمد عما هذول بس الهم سلطه عليه
حمزه: هااا يعني علي احسن مني
قدر: مكلت هيج وشون متفهمها افهمها رجائا راجعه من السوك وتعبانه اطلع اريد ارتاح شويه
حمزه: وان شاء الله تريدين تكملين بعد وتطبين كليات
قدر: ليش شكو بيها
حمزه: ايييي هاهيه اطبيين كليه وتصيرين مثل هذول البنات
قدر: ليش شبيهم بنات الكليه
حمزه: كعزي بكاعج ماكو تكمله
قدر: والله هذا شي ميخصك حمزه افندي وبعدين كلمن يرى الناس بعين طبعه
حمزه: شقصدج لج
قدر: ماقصدي شي ورجائا اطلع اريد ابدل هدومي
اجا تقرب عليه واني ارجع لي ورا واجر نفس بنفاذ صبر وسهكانه روحي منا
لزمني من ضفيرتي بس مو قوي
حمزه: ليش صايره ماتحترمين
قدر: من شوكت اني احترم؟ توك عرفت ماحترم
حمزه: اتبسزز شنو هالغرور والخشم المرفوع هااا يجي يوم واكسره الج
قدر: تخسسه الي يكسر خشمي
حمزه: اييي ميخالف بنت عذراء بسيطه
قدر: ايي يا ابن قمر بسيطااات
حمزه: اتبسززززز ابن قمر شنووو
قدر: مو اسم امك قمر شنو تستعر منه مثلا وانت مو دكلي بنت عذراء
حمزه: احترمي روحج حيوانه
قدر: دوووخر ايييدك لك
حمزه: لك شنوووو
يحجي ويكمخ بيه على راسي واني ادفع بي وارجع لي خلف
لحد مانلزكت بالحايط وهو بعده لازم ضفيرتي بأيد وايد الخ يكمخ بيه
صار مقابيلي رفعت راسي عليه جان طويل هواي باوعت عليه جانت عيونه عصبيه بسرعه تحولت
مدري شون صارت وحسيته عرك من صار وجها قريب من وجهي
بقى صافن بيه لحد ماسمعنا محمود يناديله من جوا فز فرك وجها وخزرني وطلع تفلت وراه.... عووذه مكرووه ربي يلعنك شكد تددددخل
.
.
.
بدت الدوامات جانت صعبه عليه الاعداديه اول مطبيتلها شي جديد.. عليه بنات جداد... ومدرسه جديده... وشغلات هواي جديده...
حتى شغلات بيه حسيتها تجددت... احس روحي كبرت مو عدت قدر الطفله...
ونفس الروتين ينعاد كل يوم من بدت المدرسه كل واحد ملتهي بشي
اني لو كلمتين احجي باليوم لو ماحجي
حتى ويا بيت عمي وويا صديقاتي
احس نفسي خايفه انو اتقرب بعد من احد... اخاف بعد احب احد.... اخاف اتعلق بعد باحد وهم يروح ويتركني... شكد مكبرت يبقى هالخوف بداخلي يعيش
.
.
.
جان يوم ثلاثاء خلص الدوام جنت رايده ارجع للبيت داطلع وسحبتني صديقتي سراي
سراي: هاي وين
قدر: حرجع للبيت شكو
سراي: دبقي هسه تبدي لعبة طوبه ويا البنات
قدر: لا يمعوده باعي الساحه شونها كلها طين شون حتلعبون
سراي: يمعوده هيج بعد اطيب
قدر: لا ماكدر
سراي: هسه دتعاااي كافي هيج تصيرين كئيبه
قدر: بس
سراي: اشششش
سحبتني من ايدي وودتني للساحه
بقيت كاعده وياهم واسجع البنات محسيت بالوكت اندمجت ويا البنات وضحك وقشمره اول مره اندمج هيج
تذكرت خواتي بالمدرسه بسرعه كمت
قدر: صخاااااام نسيت خواتي بالمدررسسسه
سراي: ليش معدهم سايق يجيهم
قدر: لا ولج هسه كاعزين ينتظروني بس ساعه شكد
سراي: ساعه وحده ونص
قدر: خررررررب انه
رحت ركض خفت لا يروحون يضيعون ادري بيهم فضوليين وهسه يفتلون وترزل
مدرستي شويه بعيده عن مدرستهم بيها ربع ساعه مشي واعبر شوارع يلا اصللهم
كضيته للشارع كله ركض والشوارع طيانات وفيضانات جانت بداية الكورس الثاني يعني تقريبا بنص شهر الثاني هيج
جنت اوكض واللهث بس اريد اوصللهم خفت اهوااي
كلت خلي اطلع طريق مختصر احسن
طلعت جان اعبر من يم محل غسل وتشحين السيارات
وجان اعبر من كدامه وتطلع سياره بوجهي والا شعرايه وتدعمني شحطت يمي وشكو طين بالكاع ينذب عليه
اني منا متعصبه لان تأخرت وخايفه على خواتي وعلى نفسي جنت حندعم ومنا جاني هذا وصخني كمت اشيل من الكاع طين واشمر عالسياره وشون سياره جانت من هاي العاليه وبيضه ثللج توهم غاسليها جانو
نزل منها واحد ضخم عيطت بوجها
ايهم: هييييي يابنيه شكاااعده تصوييين لج
قدر: هيدييييي متشوووف اعمى
ايهم: اني اعمى انتي هم عميا قابل
قدر: اني مستعجلللله الف شغله ببالي انتبببه هسه شوون بااوع شون وصختنييي ووصخت صدريتي
ايهم: تره اني هم مشغووول وزواج صاااحبي وباعي توني غاسل السيارع ووصختيلي اياهااا بله ابتلي بيييج هسه اكفرر بييج
قدر: والله هاي مشكلتك محد كلك سوق مثل المخبل
ايهم: تره انتي الي اجيتي خلف سيارتي
قدر: اني دامشي بشاارع مووو ببيتك هااا وبعدين بلكت دعمتني
ايهم: هياتج مصارلج شي احنا اسفين
قدر: وين اصرفها لهاي اسفيين بللله لو صايرلي شييي
ايهم: هييييي لج لتعلين صوتج واحترمي الاكبر منج واعرفي ويامن كاعده تحجين
قدر: على كيييفك سيادة الرئيس ماعرفنااااك عيوني اسفييييين
ايهم: لججج شهل وقاحه الي عندج
قدر: يا وقح ماسمحلك تغلط هيج احترم روح على شنو شايف روحك هااا تره اسحك خشمك بيدي هسه
ايهم: اللهم صبرج يارووح والله لو ما جنتي حرمه جان راويتج شنو اني ومنو اصير يلا بابا روحي منا
قدر: يممممه خففففت لا بربك اعتبرني ماحرمه شو شراح تسوي
بقى يباوع يمين ويسار ويتأفأف جان ضخم هواي بس مركزت بوجها
اجا تقرب عليه ولزمني من ضفيرتي مدري شجاهم كلهم شايلين كر ضفيرتي
وجهرها حيل وقرب وجها من يمي وحجا بهمس
ايهم: شكلج زعطوطه وداتمسلتين بالحجي ماريد اوكع نفسي بمشاكل وياج مو خوف منج لا لكن ماريد اخذ من وكتي ويا وحده مثلج جاهله
تعصبت هوااي من حركته هاي ونظرة عيونه بسرعه دفعته من صدره ومدري شون تقويت وصلخته هذاك الجف المرتب
عيونه تحولت احمرررر دم متتت خرف بسرعه شردت ركض كمت ارجف شكله مجان يطمن ابد وبقيت اركض واركض....
!!! ....
للحكايه بقيه...
....................................................................................
مرحبا💙
اعتذر داسرع هواي بالقصه ومداكتب بالتفاصيل بس هاي بنائا على طلب البطل هيج الي وصلي هالروايه ماكدر اكتب شغلات هواي من عندي حبيت اخليها حقيقيه مثل ماهيه من هيج هواي داتصير بيها تسريع بالاحداث بس هاي بدايتها فقط جايتكم بالتفاصيل اكثر
واعتذر عالسحك ولتنسون التصويت💙
#منة الله_الايوبي ✨