#صفحات من الماضي
الكاتبة فاطمة عادل
سمعتنة بالمنطقة تشوهت ومن وراه لان كلهم جيران وقدامى وواحد يعرف الثاني وخوش ناس بس احنة غريبين ويومية يجي صلاح سكران للبيت صارت اذا اكو تهمة بالمنطقة يكولون من هذا البيت
معلمة وياية بالروضة تحجيلي دكلي ماجدة سمعتي اكو ولد شاب يفتر بالمنطقة سرسري والناس بدت تنتبه متعرفي
ماجدة : لا مااعرفة وين يفتر مشايفتة
المعلمة : ماادري الولد مسويلة كمين ويريدون يلزموه الظاهر شايفلة شوفة بالمنطقة
ماجدة : الله اليستر ع الجميع
ماجدة رجع صلاح من برة بعد غياب يومين اول مطب اجة علية سحلني من شعري ويضرب بية دماني ويصيح ويغلط
صلاح : ولج بنت السكط منوة هذا اللي يجيج ويطب للبيت يومية
بس غبت عن البيت يومين صادقتي وصرتي طببين شباب للبيت وج اني اربيج ياساقطة
ماجدة : ابجي واصيح صلاح شبيك مداافتهم شدكول كعد ع القنفة وكوة ياخذ النفس
صلاح : منوة هذا اللي يويمة يجي للبيت
ماجدة : ماكو احد والله
صلاح : لتكذبييييين
ماجدة : مااكذب والله
صلاح : لعد المنطقة كلها تحجي بيج واليوم لزمني مختار المنطقة ويكلي شيلو من الفرع
ماجدة : كمت ادك والطم وين نروح ويومية بيت وتحويلة واحنة ماعدنة يادوب ع كد العيشة
طلع صلاح وماأجة اله للعصر عيونة تجدح نار
ماجدة : شبيك صلاح شجايب بعد مصيبة
صلاح : المصايب متطلع اله من راسج اليوم يلتمون كبارية المنطقة ويجيبون الولد ويحلفوكم ع القران
ماجدة : صلاح صدك تحجي ياولد هذا وشلون تقبل مرتك تحلف كدام الكل ع هيج شغلة
صلاح : اني اصلا مواثق بيج وادري بيج كل شي تسويين وهاي الفلوس المادري منين تجيبيها وتشترين للجهال شنو
ماجدة : صلاح صدك تحجي غير تعبي وشغلي اشتري للجهال واذا انت مواثق بية بعد شنو اكول واحجي رح احلف بس هاي احسبها عليك نقطة دخلت للغرفة بجيت هواية واتذكرت بابا اتمنى لو موجود وقريب علية جان وكف بعين اكبر واحد بس مع الاسف الدنيا بعدتني عنة
العصر التمو اهل المنطقة واجة مختار المنطقة وجابو وياهم ولد شاب ابد مشايفتة ولا اعرفة بس هوة يتردد بالمنطقة وماكو غيرنة احنة السمعتنة بالمنطقة طالعة
وحلفو الولد كدامي وكال مشايفها ولا اعرفها واني هم حلفت ع القران كلت مااعرفة وطلعو الناس واجة صلاح كالي لازم نشيل من المنطقة كتلة روح شيل انتة بحدك وطلكني وخلي ارتاح
صلاح : حتى تلعبين براحتج محد اله سلطة عليج مووو لو تموتين مااطلكج
ماجدة : عافني وطلع ومشت الايام وصلاح يوم يبات بالبيت وعشرة برة البيت مبقة سكر صداقات كل شي غلط سواه تعبني كلش علي دخلتة مدرسة وحسوني بالروضة وكلش اذكياء والحمد لله دائما اوائل وافتخر بيهم واني مبطلت من الشغل ومااخليهم يعتازون شي وأجرت محل صغير وفتحت صالون وبدة شوية شوية الشغل يقوة
وصار السقوط بسنة ٢٠٠٣ علاوي ثالث ابتدائي الحمد لله متأثرنة بالحرب بس ورة الحرب بدت الناس تعزل محلاتها يخافون من اللي يصير وكتلو ام صالون بنفس منطقتنة اني اكذب ع روحي واكول لااا اكيد هية غلطانة بشي وعدها عداوة ومرة كاعدة بالمحل واني اقفل الباب علية اخاف اندكت الباب شفت من ورة الجامة لكيت رجال ملثم كتلة تفضل اخوية كلي اني فاعل خير سدي محلج لان ناوين هل يومين يطكوج اني تخبلت مااعرف شلون اتصرف سديت المحل ورجعت للبيت من خوفي اخذت جهالي بحظني ونمت
صلاح : ماجدة شنو اليوم متفتحين المحل
ماجدة : صلاح اليوم اجة علية واحد ملثم وكالي رح يكتلوج
صلاح : وانتي صدكتي امشي روحي للمحل محتاجين كم فلس
ماجدة : واذا كتلوني منو يبقة لولدي مااطلع للمحل لو تموتني هنا افتهمت
صلاح : لعد دبريلي فلوس محتاج
ماجدة : اني وداامشي للغرفة صحت ماعندي فلوس سمعت صوت طبكة الباب طلع همزين ويوم يجر يوم ومااكدر افتح المحل وفكرت نشيل لغير مكان لان هاي المنطقة كلش صارت خطرة ثاني يوم اجة صلاح
صلاح اريد اكلك ع موضوع مهم
صلاح : احجي شرايدة
ماجدة : صلاح شنو رأيك لو نشيل لغير منطقة هذي المنطقة صارت متنسكن ولا اكدر افتح بيها محل واشتغل
صلاح : واذا قبلت وتحولنة لغير منطقة ترجعين تشتغلين
ماجدة : اي اكيد
صلاح : خوش باجر اردلج خبر
ماجدة : ثاني يوم طلع صلاح يسأل يامنطقة بتكريت احسن من هاي هنا خطرة وكتل نطو اسامي منطقتين اجة صلاح وكلي عليهم كتلة باجر نطلع ونشوف المنطقة ياهو احسن من ناحية السعر والمكان
ثاني يوم طلعنة ورحنة منطقة بتكريت اسمها حماد شهاب عجبني بيها بيت واسع وسعرة حلو والمحلات قريبة علية وأجرناه وثاني يوم حولنة الغراض ومدارس الجهال من تبدي المدارس انقلهم
وكعدت رتبت البيت واستقريت ورتبت الاثاث واحنة ماعدنة اثاث هواية شي بسيط والجهال فرحو لان بهذا البيت اكو حديقة وطلعو يلعبون واني ارتب وانظف كملت تنظيف دخلت الجهال وغسلتلهم وبدلتلهم واخذتهم وطلعت ادور ع محل وفتحت صالون مرة ثانية وجهزت المحل عندي كم فلس ضامتها ميدري بيهم صلاح وبدة الرزق يجي الحمد لله وبدت المدارس اطلع الصبح اودي الجهال للمدرسة وارجع افتح المحل ومن يصير وقت حلة المدارس اروح اجيب جهالي وارجع للبيت اغيديهم وانيمهم وارجع للمحل
صارت سنة ٢٠٠٤
كاعدة جنت بالمحل ودخلتلي زبونة مرأة متوسطة العمر وكعدت تسولفلي شلون الوظائف مفتوحة والرواتب خير من الله
ماجدة : زين اني يقبلوني اذا اقدم
- وانتي شنو مكملة
ماجدة : اني بالثانوية وبطلت
- روحي قدمي وشوفي
ماجدة : خليتها ببالي ثاني يوم الصبح وديت ولدي للمدرسة ورحت سألت وفعلا قدمت وحطيت عنوان المحل ورجعت كملت شغلي مثل كل يوم ورجعت بالليل
صلاح : اليوم تأخرتي اليوم
ماجدة : جان عندي شغل انت شلونة شغلك
صلاح : زين شغلي بس دااتعب ابو المحل يخليني من الصبح لليل واكف ع رجلي
ماجدة : كلنة هيج نتعب
صلاح باجر اجتماع اولياء الامور تروح تسأل ع ولدك مااكدر اسد المحل
صلاح : باجر تجي بضاعة من وكت لازم اروح للمحل لان ابو المحل وصاني اوكف بمكانة مااكدر اروح
ماجدة : اني اروح ميحتاج تطلع اعذار
واتذكرت من بابا جان يجيني للأجتماع شلون اقتخر بي والزم ايدة واجرة ع المعلمات اكلة بابا هاي درسنة المادة ويسأل علية وافرح وية كل كلمة مدح تكولها المعلمة وبابا يطبطب ع كتفي يكللها هاي حبيبة ابوها اللقب لايمكن انساه او انام بالليل ومااذكرة ربي يطل بعمرك بابا اتمنى لو اشوفك او اشم عطرك اكيد انت دتحاول تلكة عنواني بس احنة ممستقرين وصلاح ميقبل اتراسل لا وية اهلي ولا اهلة
ثاني يوم رحت وللاجتماع ومثل كل مرة يمدحون بااولادي وشطارتهم وهذا الشي يسعدني كلش وراها رحت فتحت الصالون.وكاعدة انتظر يجي الرزق والحمد لله صار عندي مبلغ زين ضميتة بالمجر بالمحل واخذ للبيت كلش قليل لان صلاح ياخذ كل شي
عدت كم يوم ورحت للدائرة وشفت ماكو اسمي بالمقبلوين بالوظائف ضليت واكفة وابجي دخلت ع الموظف كتلة اريد اقابل المدير مقبل تالي اني سألت وشفت غرفة المدير وتوسلت بالشخص اللي بالباب يلا قبل يدخلني كتلة اريد اتعين واني ظروفي صعبة كلي مو يمي يم المحافظ رجعت واني مأيسة من الموضوع وابجي ثاني يوم رحت صدك للمحافظ و اخذت موعد مقابلة وبيوم المقابلة رحت وحجيت اله وكتلة رجلي جان اسير وانطرد من الجيش وقعلي ع ورقة كلي هاهية تتعينين ان شاء الله طلعت بس ابد مواثقة بكلامة حسيتة يريد ينهي المقابلة وبس
رجعت للبيت ويوم يجر يوم واسبوع يجر اسبوع ومرة كاعدة بالمحل اندكت الباب كلت منووو طلع رجال كالي اني
الج بريد وقعيلي بلاستلام وقت واستلمت الظرف ودخلت فتحت الظرف وفرحت فرحة حياتي ....
الى اللقاء في البارت الاخر
الكاتبة فاطمة عادل