#صفحات من الماضي
الكاتبة فاطمة عادل
مهند : حبيبتي كومي عمري اني يمج لتخافين ياروحي
ماجدة : مهند رجعني للبيت
مهند : كومي حبيبتي ارجعج
ماجدة : سندني مهند ومشاني للسيارة واني لحد الان ممستوعبة اللي صار
بقيت راسي ع الجامة وغمضت عيوني ومر شريط حياتي كدامي كلة تعب بشقاء بمرار اريد ارتاح اريد اعيش الدنيا متنطيني اي نفس حياتي عبارة عن مصيبة ورة مصيبة وبيوم اللي كلت الدنيا رح تصير حلوة عندي قررت الدنيا تنهي حياتي نزلت دموعي حسيت مهند لزم ايدي ويحجي بهمس
مهند : حياتي لتخافين اني يمج رح اوديج عند احسن الاطباء وحتى اسفرج برة اسويلج العملية شنو تريدين اني يمج ومااعوفج واللي اريدة منج تصيرين قوية وتتقوين ع المرض اذا تحبيني مجودة عمري
ماجدة : هزيت راسي وباوعت بعيونة عيونة حمر وبيها دموع كتلة وكف السيارة مهند
مهند : ليش حبيبتي
ماجدة : صرخت بعلو صوتي وووووككككفففف السيارة
وكفها رأسا جريتة وحظنتة ودفنت راسي بركبتة وبجيت بكد القهر اللي بكلبي هوة حاضني وميعرف يسكتني لو يسكت نفسة
مهند : حبيبتي انتي مجودة لتبجين ياعمري انقهر من اشوف دموعج اريدج دائما تضحكين والضحكة متفارك وجهج
ماجدة : يحجي وياية مهند واخذ كلينس ويمسح بوجهي وبعيوني اني مغمضة عيوني جرني بقوتة وباسني بكل قوتة ووخر عني ينهت ويحجي بهمس
مهند : دمرتيني ماجدة دمرتيني اموت ع التراب اللي تمشين علية اعشقج
ماجدة : اباوع بعيونة ويحجي دار وجهة وشغل السيارة ومشة وصلني للبيت مبين بعيوني البجي والقهر اول مطبيت شافني علاوي
علي : هاا ماما خيرج شنو باجية
ماجدة : علاوي جيب اخوك وتعال للغرفة
علي : ليش ماما صاير شي
ماجدة : تعالو واسمعو
راح علاوي شوية وأجة جايب حسين وياه
حسين : هلو ماما شلونج حبيبتي علاوي كالي رايدتنة خير
ماجدة : هلو حبيبي تعالو اكعدو احجي وياكم
اليوم جنت عند الطبيب
علي : ليش ماما تشكين من شي
ماجدة : اي ماما سويت تحاليل ومفراس وطلع المرض معاود علية ولازم اسوي عملية رفع ثدي
وانتو لان كبار وفاهمين كلت الكم ع اللي رح اسوي
اباوع بعيونهم دمعت خفت عليهم كتلهم اريدكم تصيرون اقوى مني حتى اتعالج مستعدين
علي : بصوت خافت اي ماما ان شاء الله
ماجدة : وانت حسوني متساعدني
