#صفحات من الماضي
الكاتبة فاطمة عادل
صارت سنة ٢٠١٢ الفاجعة
ماجدة : اخ راسي مااكدر ارفع راسي من الصخونة تعبت منها ابلع بالحبوب ومتروح
خلص رصيد الاجازة مالتي وباجر لازم اداوم اخذت خافض حرارة ورحت للدوام
بشرى : صباح الخير ماجدة
ماجدة : هلو بشرى صباح النور
بشرى : شبيج ماجدة خدودج حمر تريد تطك
ماجدة : ماادري بس الصخونة مدتفكني
بشرى : روحي للطبيب شوفي شنو السبب
ماجدة : لا ميستوجب هسة تطلع افلونزا
بشرى : ماعندج غير العافية
ماجدة : الله يعافيج حبيبتي
بشرى فدوة انتي كملي الشغل مااكدر افتح عيني
بشرى : تدللين حياتي اخذي راحتج
ماجدة : خليت راسي ع المكتب مكدرت اشيلة وبشرى كملت كل الشغل اجتي بشرى تكعدني خلص الدوام وكفت دااخذ جنطتي دارت الدنيا بية و اغمى علية محسيت اله ع بشرى كاعدة يمي بالكع وتذب مي علية
بشرى : ماجدة اسم الله شبيج
ماجدة : ماادري دخت ووكعت
بشرى : كومي باعي شنو صار بهدومج خلي انضفلج هدومج
ماجدة : عدلت هدومي ورتبت نفسي وكمت اخذت جنطتي وطلعت وياية بشرى اخذتلي تكسي ورحت للبيت دخلت بتثاقل
صلاح : هاا خير اليوم تطوطحين
ماجدة : صلاح اجوي الولد
صلاح : لا بعدهم مكلتيلي شبيج
ماجدة : مااعرف شبية مصخنة واليوم اغمى علية بالدوام
صلاح : هااا والزلم شالوج
ماجدة : صلاح يا زلم صديقتي بشرى كعدتني
صلاح : دكومي حضريلي سم اريد اكل متواعد وية جماعة
ماجدة : واحنة شخرب حياتنة غير الجماعة صلاح بدة يصيح ويغلط رحت صبيت الاكل وخليتة ع الميز وكتلة روح اكل واني دخلت للغرفة الصخونة كسرتني دخل حسوني من المدرسة
حسين : هلوو ماما شلونج
ماجدة : هلو ماما تعال انطيني بوسة
حسين : شبيج ماما وجهج احمر
ماجدة : مابية شي ماما اكلك حسوني شلون جاوبت بلامتحان
حسين : مثل متريدين ههههههه
ماجدة : فرحان وجاوبني ومسويلي علامة الاوكي يعني زين واني واثقة من اولادي كلش شطار والاوائل الحمد لله
وعلاوي دخل اعدادية تمريض حتى وراها يريد معهد التمريض وهاي السنة هوة سادس
و حتى يختصر الطريق بالرغم هوة كلش شاطر جنت اتخيلة طبيب او مهندس بس اختار هذا الطريق حتى يساعدني بالعيشة كلش حنيين علية ربي يحفظهم
