دائي و دوائي 🥀🖤 ( مكتملة )

الجمرة الثامنة عشر

الخطوة الاولى لنجاح اي امرأة
أن تتجاوز فكرة الفارس الذي سيفعل لها ماتريد
وتفعل ذلك بنفسها، فالحياة ليست رجل ..🥀🖤

...................

دخلن للبيت ووصلن لباب المطبخ ، هستوهن دخلن ، ام وليد شايلة علاكة المواعين بايدهه ،

وكعن المواعين من ايدهه من الصدمة وهي تشوف بتهه فرح كاعدة على الطاولة وتشرب جاي ،،،،،،

اريج رفعت راسها على الصوت الي سمعته ،شافت مرية مو كلش جبيرة بالعمر يعني متوسط عمرهه وحتى ممبين عمرهه لان مبينه مهتمة بنفسها حيل ومرتبة ، وكفت بسرعة وهي تشوف هاي المرية تباوعلها بصدمة ،، بقققت تباوع عليههه بخوووف عبالها شكلها بي شي غلط ،،

زهراء من شافت صدمة امها باوعت للبنية الي واكفة كدامهم ولاحضت الشبه الواضح بينها وبين اختها المرحومة ، و كالت ان يخلق من الشبه اربعين ، لكن الي صدمها ردة فعل امها الي فسرتها انو انصدمت لانو تشبه فرح ،، بقت واكفة بمكانها وتباوعلهن وحتى دخلت حجيه خاجية ووكفت تباوع باستغراب على ام وليد الي دموعها ملن وجهه ،،

زهراء بخووف على امهه : يمه شبيج ليش تبجين ؟؟

حجية خاجية : يا خيه ام وليد اسم الله ليش تبجين ؟؟ باوعت للمكان الي تباوعلها ام وليد شافت اريج واكفة عرفت انو تبجي لان تذكرت بتها راحت لام وليد وسحبتها على صفحة كالتلها : ادري خيه تبجين لان تشبه بنيتج الله يرحمهه بس لا نلح عليها هواي خطية كلها كالتلها تشبهينهه ،،

ام وليد وهي اصلا تبجي على شي ثاني لكنها ما تكدر تبوح بي لان هذا سر محد يدري بي بس هي والمرحوم ابو وليد مسحت دموعهه وهي تتماسك نفسهه : اي انشالله ما الح عليها ، اخذت نفس ، يلا خل اروح اسلم عليهه ،

التفت على اريج وهو كوة متماسكة نفسها راحت وكفت يمها وكالتلهه : هلا بيج يمه شلونج ،،

اريج حجت بتوتر : الحمدلله خالة تسلمين، ،

ام وليد وكوة متماسكة نفسهه : البيت بيتج يمه ، عين غطى وعين فراش ، وما كدرت تتماسك نفسهه شبگتهه كبل ودموعها كامن ينزل بصمت ،

اريج تفاجأت من تصرفهه وبقت بس واكفة حتى ما رفعت ايدهه وبادلها الشبكة ، لكن حست بشي غريب من شبكتها حست بحنان ،

ام وليد بسرعة مسحت دموعها ووخرت عنها وكالتلها : هاي بتي زهراء منا وهيج هي مثل اختج واني اعتبريني مثل امج ،

اريج اكتفت بابتسامة ، راحت زهراء سلمت عليهه وباستها وبعدين كعدت زهراء تسأل بأريج ،، وام وليد وحجية خاجية يباوعن عليهن ،

زهراء : شكد عمرج ؟؟

اريج وبعدهه تحس بخجل منهن لان متعرفهن : 21 سنة ،

زهراء : ياااا يعني انتي اكبر مني بسنه اني عمري 20 سنه ،،

اريج : العمر كله انشالله ،،

زهراء: تسلمين حبيبتي،، اي انتي شكم اخت واخو عندج وشأسمائهم وشكد عمرهم ،، وامج وابوج هم ؟

حجية خاجية: يااا فلللك فلكج انشالله اكلتي البت اكل ليكول راديون ( ههههههه على فكرة العجايز يسمن الرايدو راديوون ) دعوفي البت هريتيهه من الصبح ،،

زهراء : هاي شبيج عمه سؤال وجواب نكضي وكت ،،

اريج : عادي خالة ماكو مشكلة ، وباوعت على زهراء ، عندي اختي بنين عمرهه 19 سنه وهسه هي نايمه ، بلعت ريكها وكالت ، واختي ريماس الصغيرة توفت وي ماما وبابا ،،

ام وليد بسرعة : امج وابوج توفوا يمممته وشلووون ؟؟

اريج مستغربة من ردة فعلها : قبل خمس اشهر بحادث سيارة ،، ليش ؟؟

ام وليد حست الهواا انكطع حواليها كامت بسرعة طلعت برة تريد بس تتنفس ماكو الهوا اختفى ، طلعت وراها حجية خاجية : اسم الله دادة شبيج شجاج ،،

ام وليد بسرعة مسحت دموعها وكالتلها : لا ما بيه شي بس اختنكت فجأة ،، هسه اصير زينة ،،

حجية خاجية: يا دادة اخليهن يدكن على وليد ياخذج للمستشفي ،،

ام وليد : لا ما يحتاج هسه اصير زينة بس خل ادخل للحمام واغسل وجهي واني اصير زينة ،،

حجية خاجية: خوش دادة ما عدج غير العافية ، ودخلت جوة

ام وليد راحت بسرعة للحمام وسدتة عليها وكعدت تبجي بصمت ،،

اريج وزهراء مستغربات من تصرفات ام وليد ، دخلت حجية خاجية،

زهراء: عمه شبيها امي؟؟

حجية خاجية: مابيها شي تكول اختنكت شوية ،،

زهراء بخوف : ادك على وليد يجي ياخذها للدكتور ،،

حجية خاجية: لا يمه تكول عليمن هسه اصير زينة ،،

زهراء : خير انشالله ،؟؟

دخلن اساور وبنين كالن : صباح الخير ،،

زهراء واريج : صباح النور ،،

حجية خاجية: صباح الورد يمه فدوة لهلوجوه ، تعالن تريكن ،

راحت زهراء سلمت على اساور وبنين ورجعت كعدت وكعدن يتريكن ويسولفن بنين انطلقت وياهن بالحجي اما اريج دائما مكتفية بالابتسامة بس،

اساااور : اوكي اليوم اكل لفيصل حتى نروح للبستان نبقى يومين تلاثة ونرجع ،،

زهراء : اي عفية والله ضايجين ،،

دخل حسن : صباح الخير ،،

الكل : صباح النور ،،

زهراء كلبهه دكاتة وصلت الللف ياللللللله شكد مشتاقتله موووت ،، : صباح الانوار شلونك حسن ،،

حسن : هلاو زهوو شلونج شخبارج موشتاقون ،،

زهراء كلبهه طار من الفرح من كال مشتاقون : الحمدلله تمام احنا الاشوق ،،

حسن : منو بيجن خيرة تكوم تسويلي باكلة بدهن ،،

اسااور : يااا هنيالك بيه حيل والله ما بيه حيل ،،

حسن : خفه هالوجه جنج ططوة هو انتي ياهو الحاجي وياج ،، اني كلت خيرة انت منيلج الخيورية ،،

زهراء طفرت بسرعة : اني اسويلك ،،

حسن بابتسامه الها : هاي البنات المعدلة مو انتي عاب هالوجه ،، التفت على بنين الي لابسه كلابية ابتسم على شكلها الحلو بالكلابية : كالله شلون صرتي بنين ،،؟

زهراء باوعت عليهم بغيرة ليش يعني يسأل عليهه ،،

بنين بابتسامه: الحمدلله احسن ،،

حسن كعد يمهن وكاللهن : ايي عليمن جنتن تحجن ؟؟

اسااور : وانت شعليك ليش بكلشي مدخل نفسك ،،

حسن : انتي عود ليش من نجي للبصرة تنجلبين عليه ، شو ببغداد شولانتج، تجين هنا تنجلبين ،،

بنين كالتله : تريد تكول للشيخ حتى تروح للبستان تبقى هناك كم يوم ، ندستهه اريج وخزرتهه لانو تدخلت وحجت ،،

حسن بابتسامه : شوفي شلون تحجي حجي حلو وبادب مو مثلج ، بيكول بومة عاب هالوجه ،،

دخلت حجية خاجية : هلا يمه كعدت ،، لعد روح كعد اخيوتك سجاد وفهد خل يجوون يتريكون فرد نوب مو كلساع واحد جاي ،،

حسن : انشالله يمه رايح ،

حجية خاجية: وانتي يمه زهورة ودي الكركم لامج برة يم الطباخ واكفة ،،

زهراء : اي عمه هسه ،،

طلع حسن من المطبخ ولاكته نور هستوهه كاعدة باوع عليهه بطرف عينه ومشة ( يكرههه) 😂 ،

فتح حسن باب غرفة سجاد بدون ما يدك الباب شاف سجاد غاط بالنوم ويشخر ضحك ،، وراد يخبث بس شلون ما يدري دوور على مي بالغرفة بس ما لكة بس دولكة فارغة على الميز ضحك على خطته وتخيل شكل سجاد ،، راح على كيف اخذ الدولكة وطلع ترسهه مي من الحنفيه ورجع للغرفة وعلى كيف وصل يمه ، وي ما راد يذب المي على وجهه سجاد كلب على الصفحه الثانية ووكع المي على الفرش مو على وجه سجاد بس وكع شوية على اذنة وشعرة فز سجاد ،، شاف حسن خرباان ضحك باااوع علي بغضب وطفر ،

حسن شافة شلون عصب ركض للمطبخ سجااد ركض وراااه دخل للمطبخ وما انتبه لاحد شافه لابد وراه امه كاله وهو يصيح بصوت عالي : وعلي اليوم امووتك يا حقير يا سافل ، هو انت بشر حتى يودونك تكعد احد يااا حيوووان كالك انت تكعدني ،،،

كلهن بالكوة لزمن ضحكتهن من كال يا حيوان وداك تكعدني لان حجية خاجية ودتة ،، الا نور اخذت كوب الجاي مالتهه وطلعت مالهه خلكهم او بالاحرى ما كدرت تتحمل اريج وبنين خلت وطلعت ،،

حجية خاجية : اني الحيوانة يمه انعمالله عليك ،،

سجااد بلع ريكة وراح لامة : العفووو يمه والله مو قصدي ، وباس ايدهه ، بس الله عليج يمه يعني هذا بشر تودينه يكعدني كلب علية دولكة مي نكعني تنكع ،،

حسن : يمممممممممه ولللك والله تجذب ما طاح عليك بس شوية الباقي وكع على الفرشة ، صدك يمه شري الفرشة لا تعفن ،،

البنات ماتن ضحك ،، حجية خاجية دنكت على نعالهه ( وانتو بكرامه ) ورادت تضرب بي حسن ،

حسن ركض لبد ورااا سجاد ( نسى روحة ) ،، شمرت النعال عليهم بس دنكوا اجه بفهد الي كعد من صياحهم ، اجه بكصته عدل ،

البنات مااااتن ضحك خووو اسااور كامت تكمز من الضحك ،، وبنين دموعهه ترسن وجهه لان هي من تضحك هواي عيونهه تدمع ( اني مثل بنين منو مثلي )

فهد : انعمالله عليج يمه هي هاي المرجيه منج من الصبح ،،

سجااد وحسسن خربوا ضحك على فهد شلون انزعج ،،

حجية خاجية : يا يمه عمت عيني وعلي عود شمرته على ذولة ،،

فهد راح لغرفته وهو مزعوج كلش ،،

حجية خاجية بعصبيه: كله من وراكم ،، وطلعت برا يم ام وليد ،،

سجاد التفت على حسن ولزمة من ياخة فالينته : لزمتتك ،،

حسن جان يضحك وفجاة ششهك راد يحجي بس قاطعة كلام صوت زهراء وهي تكله : حسن تعال اكل قبل لا يبرد الاكل ،،

سجاد من سمع صوت زهراء ارتبك وعاف ياخت حسن وعدل ملابسه وحتى ما باوعلهه ( لانو من يوم الي خطبها ورفضته ما بينهم بس السلام )

راح كعد يم اساور وكاللهه : كومي اسوو سويلي ريوووك ،

زهراء ( تحبه كأبن عمتهه حييل وعلاقتهم جانت حيل قوية لكن من خطبها ورفضت وهو ميحجي وياها بس على كد السلام وهي تريد ترجع علاقتهم مثل قبل لان صددك تعتبرة صديقها الوحيد ) : اني اسويلك ريووك ؛

سجاد : لا مشكورة اساور تسوويلي ،،

اسااور وتدري بي ماخذ منها موقف من رفضته كالتله : خل هي تسويلك ما بيه حيل اكوم ،،

سجاد عصب من اساور عباله تعاجزت من ريوكة ومتريد تسويلة : ماا اريد ،، ودفع الكرسي مالته وطلع ،،

صعد لغرفته سبح وبدل ملابسه وركب سيارتة وطلع ،،

اساور : هاي شبي بس لا زعل ،،

بنين : اعتقد عبالة تعاجزتي من ريوكة ،،

اساووور ضااجت لان فهمهه غلط ، تأفأفت ،،

حسسن كاعد مقابيل اساور يأكل : وجع انشالله ما تشوفيني جاي اكل تتأفأفين كدام اكلي بلة طفر شي عل الاكل ،،

اساور مالهه خلك ترد علي ،،

زهراااء حييل ضاجت من سجااد لان مايحجي ويااهه ،،

....................

اسيل كاعدة يم ام مرتضى ،، سمعت مرتضى يصيبح عليهه باوعت على ام مرتضى بخوووف

ام مرتضى بقلة حيلة: روحي شوفي شيريد ؟؟

اسييل بخووف : بس خااا.....

ام مرتضى قاطعتهه : كومي كومي روحيله ،، ( ام مرتضى كل ما تتذكر ابنهه تحس كلبهه يقسى شوية على اسييل وانو ما لازم تتدللهه مهما كان اخوهه كتل ابنهه )

كامت اسيل بخوووف ،، طلعت من الغرفة شافت مرتضى واكف ويباوع بغضب ،، خافت منه لكن هي وعدت نفسهه ما تخاف منهم ،،

راحت وكفت كدامه وهي رافعة راسهه وتباوعله ،،

مرتضى وهو اصلا كلشي ما يريد منهه لكن ما يريدهه تبقى كاعدة وهو بس يريدله شي حتى يضربهه شافهه شلوون تباوعله تنرفز منهه لان ما خايفة منه ،

ضربههه راشدي قووووي و جرهه من حجابهه وكاللهه: شنهالصلافة هاي تباوع بعيني ولا كأنما مسوين شي ،،،

اسيل وهي ميته خوف لكن قوت نفسهه و كالتله : فعلا احنا ممسوين شي ،،

مرتضى جر حجابهه وشمرة ولزمهه قوي من شعرهه الي لامته ومسويته كعكايه كاللهه : وحدة مثلج تسكت وما تفتح حلكهه عرفتي لو لا ، يلا هسه ترحينتكعد يم رجلين اختي و تغسلينهن الهه وتفرجينهن يعني تصيرين خدامة عدهه ،،

ذبهه بالكاع ورفسهه ببطنهه وكاللهه بعصبيه: شوية وراجع اذا ما لكيتج يم رجليههه تعرفين شسوي بيج ،، عافهه وطلع

اسيل خلت اديهه على بطنهه من الالم وكامت تبجي ،،
...............

ابو اسيل وابو فاطمة وصلواا لبيت ابو اسيل ،، ابو اسيل بالكوة يكدر يمشي على رجليه من الم كلبة ، ابو فاطمة وهو حاس علي مو على بعضة وبي شي لكن فسرة انو حزن على بنته ، دخلوا للبيت لكوا فاطمة كاعدة بالهول وتبجي ،

ابو فاطمة بخوف : فطومة بوية شبيج تبجين ؟؟

فاطمة : بوية يعني مشت اسيل بدون ما تسلم عليه ،،

ابو اسيل وكلبة راح يوكف من الالم كاللهه بصعوبة : اي بوية راااح..... وما كمل كلامة وكع بالكاع ،،

ابو فاطمة ركضله بقى يضرب على خدة بس ما كعد ،، كومة ومشاااه بصعوبة ووصلة للسيارة والتفت على فاطمة كاللهه : دكي على امج خل تجيج وروحن للبيت ، وخل اخوج يلحكني للمستشفى، ، وركب سيارتة ومشى ،

................
وليد وسجاد وفيصل كلهم رجعوا لبيت ابو فيصل علمود يتغدون ،،

دخلوا لكوا البنات وحسن وفهد ( ههههه خو ذولكاعدات برة بالحديقة الداخلية ،، فيصل تحاشة النضر لاريج وحتى هي اريج خايفة منه بعد ما ضربته راشدي ،،

ووليد ضايج من اساور هم يتحاشا يباوعلهه لان هو كل مرة يريد يصالحها وينسيها الصار وهي ما تقبل وضاج زيادة من شافهه كاعدة يم حسن وهو منتجي عليهه ، واساور كذلك ما اهتمتله ،،

سجاد بس شاف زهراء كاعدة راد يدخل للبيت بس كال هسه عبالهه اني مهتم وضايج لان رفضتني ( سجاد اتأذة من كلمة رفضتني ، ترة صعبة على الرجال انو ينرفض خاصة احنا اهل الجنوب دمهم يغلي وصعبه عليهم مرة تكللهم لا ) فكعد حتى لا تفكر انو هو مهتم ، وزهراء هم حايرة شلون تلكالهه طريقة وتراضي ،،

كاللهم فهد : كعدوا امي راح تجيب الغدة هنا لان تكول السمج حلاته ينوكل براا ،،

كعدوا الولد ،، بس كعد فيصل راحت اساور كعدت يم فيصل وهو خلة ايدة على متنهه وسحبهه على صدرة ،،

وليييد الغيرة عندة كامت تقراا اللللف ،، وكام يمسح بوجهه لان عصب حيييل ،، هو اصلا اليوم كلبة يوجعه ومختنك مد ايدة بجيبه حتى يتأكد من العلاج ما لكاه بجيبه ، راد يكوم ياخذ منه لا يتخربط وكلهه تدري بي وهو ما يريد احد يدري ،، اجت الحجية خاجية شايلة السمج ،

حجية خاجية: ها يمه وليد وين رايح صبينه الغدة ،،

وليد : ها يمه بس اروح اجيب تلفوني خاف احد يدك عليه ما ابطي ،،

حجية خاجية: دعوفوهه هالتلفونات هاي عمتكم تعال تعال اكل يمه ،،

فيصل : تعال اكل وبعدين روح جيبه هسه وكت غدة مو يدك ،

وليد خاف يلح اكثر خاف يشكون بي ، راح كعد والم كلبة يزيد ،،

كامن البنات نكلن الاكل وخلنه على السفرة وكعدن ياكلن ، فيصل اجت عينه على اريج لازمة الخاشوكة وتكلب بالتمن ما تاكل ،، كال بينه وبين نفسه " ليش ما تاكل حتى البارحة بالطريق ما اكلت " بعدين عصب من نفسه ليش يفكر بيها طبها طوب لاكلت والما اكلت اني شكو ،،

وليد وما يكدر ياكل من الم كلبه والخنكة الي كل شوية تزيد عندة ،،

جاي ياكلون دك تلفون فيصل ،، رقم غريب ، ما رد علي لكن بقى يلح ،، رد علي

فيصل : الوووو

: الووو السلام عليكم، شيخ فيصل وياي ،

فيصل : وعليكم السلام والرحمة ، اي تفضل الشيخ فيصل وياك ،

: اني دكتور انس ، زميل الدكتورة اساور جنت وياها بالجامعه ، حاب اتقرب منكم واخطب الدكتورة اساور على سنة الله ورسولة ، واسف لان اتصلت بالهوقت لكن مستعجل حتى اذا صارت القسمه نكمل كلشي بسرعة لان اريد اروح اكمل ماجستير بالخارج ،،

فيصل باوع على وليد وكالة : بس الدكتورة اساور محجي بيها لابن عمهه ، بس مع ذلك تتدلل اشوف الدكتورة واسألها وأسأل ابن عمهه وارجعلك خبر ،،

الكل عاف الاكل وباوعوا على فيصل ، ووليد راح يموووت يريد يعرف منو هذا الي يحجي باساور ،،

الدكتور انس : مشكور شيخ ما تقصر واسف على الازعاج ، يلا مع السلامه

فيصل : بالسلامه الله وياك ،، وسد التلفون

وليد بنفاذ صبر : فيصل شني السالفة ،، منو هذا وشيريد ؟؟

فيصل باوع على اساور وكاللهه : هذا واحد اسمه انس يكول جان وياج تعرفينه ،،

اساور باستغراب : اي اعرفه درس وياي من المرحلة الاولى وطبقنا سوية ،، لييش؟؟

وللليييد بغغغيرة : وشدعوة هيج متذكرته كلش ،،

فيصل : هسه دك عليه يريد يجي يخطبج واني كتل......

وليد قاطعة وهو يطفر من السفرة : شننننننو يخطبببههه وحك هو اخو زينب اححححرررك عاليييها وواطيها ، ياكلب ابن كلب يتجرأ ويجي يخطبهه ، كلها تدري اساااور الي واذا مو الي ما تصير لغيييري ،، فقققققد عقلة بس مجرد فكرةة انو اسااور تصير لغيرة تموته ،، الم كلبة صار لا يطااق لكن عصبيته اقوى ،

اساااور : لا واللله وانت منو كالك اني اقبل اتزوجك ، باوعت لفيصل وهي بس تريد تحرگ گلب ولييد ، فيصل اتصل علي كله اني موافقه ،،

حجية خاجية: يمهه صلوا على محمد عليمن العصبيه ،،،

وليد راد يهد عليهه ولزمة سجاد وفيصل الي كاعدين يمه : شننننني ،، عيدي ما سمعت زين ، موافقة تتزوجينه هذا الكلب الحقير العار واللله ما تاخذينه لو على جثتي افتهمتي لو لا من هسسسسسه اني نااهي عليج عررفتي لو لا وشوفي يا كلب ابن كلب يجي ويخطبج ،، وجههههه صار احممممر حيل لان هو مختنك ويحجي ،،

اسااور خافت علي : فيييصل هاي شبي ليش صار وجهه احمر ،، وراحت تركض يمه

فيصل باوع لوجهه وفعلا وجههه حييييييل احمر ، وليد كام يريد يجر النفس ما يكدر الهوووواااا انكطططع ،،

وكع وليد بالكاع لان كام ما يكدر يتنفس ،

ام وليد واساور وزهراء وحجيه خاجية كامن يعيطن من شافنه وكعع ،، اسااور ركضت يمه وكامت تفرك بصدرة حتى يكدر يتنفس ، بس ماكو فايدة

باوعت لفيصل : فيصل فدوة اخذووا للمستشفى فدوووووة راااح يموووت فيصل فدوةة بسرعة ،،

فيصل وحس هو الي وكع وما يكدر يتنفس مو وليد لان يموووت ولا يصيرلة شي هذا اخوووو الي عندة اغلى من اي شي بالدنيا ،،

ولييد يريد بس يحجي ويكللههم على العلاج لكن ما يكدر ،، شالللواا فيصل وسجاد صعدوا بالسيارة ،، وراحوا هم وراحت وياااهم اسااور وام وليد لان شبعن بجي ،،

دخلوااا للمستشفى ،، ورأسا للطوارئ

.......................

واكف كدااام قبر حسااان وحنااان ، ولازم المسدس بأيدة ،،

سليييم : هااا حسسسان اجيييتك وانت بكبرررك ودفنتك بأيدي ياا خاااين ، انت الوحيد جنت تدري بيه احب حنننااان ورحت واعترفتلهه وخليتهه تحببك انت ليش هيج تغدر بيه مو جنت اعتبرك اخووووي وما عندي غييرك حتى اهلك من طردووك فتحتلك بيتي واهلي طردووني من ورااك لان كلهه جانت تعرفك وتعرف سمعتك بين الناس بس اني كلت ما يهم صديقي هذا واخوي وعفت اهلي وطلعت اشتريت بيت وضليت اشتغل حتى نكدر نعيش اني ويااك وتاليها هيج تخوووني وترووح تاخذ حبيبة عمرري ، حبيبتي الي جنت اكعد من الصبح حتى بس اروحلهه واشوفهه من تدخل للمدرسة وجنت منتضرهه تكبر حتى اروح واخطبهه ، ورحت انت غدرت بيه وخطبتهه ، بس ما عفتهه الك ما خليتك تتهنه ويااها ، لمن موتتكم بأيدي ودبرتلكم ذااك الحادث وجاان عبالي من تموتون ارتاح لكن لا غليلي من انشفى منكم وردت اكتل بناتك الي اوهمتك انو هن بس اريج بتك وخليتك تعذبهن واني استمتع بس شردن واصلا ما حاولت ادور عليهن واكتلهن لان هن مالهن ذنب بالسويتوا انت وحناانن ،،

التفت على قبر حنان وكام يحجي وياهه : وانتي حناان يا وجع كلبي انتي تدرين بيه جنت احبج بس مع ذلك تزوجتي هذا الخاين وما خليتج تعيشين براحة وعبالي من تتعذبين وتموتين ارتاح لكن وجع كلبي ما جاي يطييب ، اني جان حلمي اعيييش ويياج واكضي عمري كله يمج بس هذا الحلم ما صار لذلك على الاقل خل اموووت واني يمج خلى المسدس على راسة وضرب طلقة براسة ووكع يم قبر حنااان ،،،،،،،

.......................

منتضرين بباب الغرفة وخاييفين لا يصير بي شي ، طلع الدكتور

راحولة يركضونن : بششششر دكتوور ،،

الدكتوووور منززل راسة ،: البقييية بحيااتكمم ،،،،،

.................

توقعاتكم 🥀🌺

احبكم 💜

• الكاتبة : اساور الياسري 🖤🥀

زهراء : 👇👇👇