Halos kakapasok pa lang niya mula sa labas at ngayon naman ginugulo niya ang pagkakaayos ng maliit na sala ng tita Jackie niya.
"Seryoso ka ba sa naisip mo na yan ha? " tanong ng tiya niya na kunot ang noo.
"Opo naman tiyang. Aayusin ko naman po mamaya ulit huwag kayong mag-alala. " sabi niya bago ipasok sa kwarto na tintutulugan nila ni Bebang ang lumang electric fan na nasa sala.
"Nayyyyyy!!!" dining niyang sigaw ni Bebang na kakapasok lang. Nagulat pa ito ng makita siya.
"Ano bang trip mong bata ka ha?! Sa liit ng bahay natin dinig na dinig naman kita kahit hindi ka humiyaw!"
"Eh kasi naman Nay! Basang-basa sa labas! Hindi naman umulan maghapon! Putik putik tuloy ang paborito kong sapatos! Ano bang meron? At bakit nasa labas pa ang mga sinampay? Pag-alis ko kanina tuyo na ang mga yun eh! Para na naman tayong nag-uukay-ukay eh! Pati ba naman itong mga butas-butas ko na medyas sinampay sa harapan ng bahay? Di ba sa likod bahay to sinasampay kasi nakakahiya?!" maktol nito habang ipinakita sa kanila ang kumpon na medyas na kinuha nito sa sampayan.
Naikot niya ang mga mata bago naglakad palapit dito. "Ako ang naglabas ng mga damit! Akina nga yan! Isasampay ko ulit! ! " sabi niya bago niya inagaw ang hawak ng pinsan na siyempre umangal.
"Ateeeeee! Akin na! Ilalagay ko na sa kabinet!"
Sinamaan niya ito ng tingin at lalong inilayo ang kamay na may hawak ng medyas. "Props ko to! Padating si Jordan! Gusto kong isampal sa mukha niya kung gaano kalaki ang agwat ng estado namin sa buhay at bakasakaling mabasag ang trip niya na maging kami!" inis na sabi niya bago lampasan ang pinsan para lumabas sa maliit na bakuran sa harapan ng bahay. Isinampay niya ulit ang mga medyas.
"Hayun! Kaya pala andito ka ulit ate dahil may shooting ka? Dito ka ba matutulog?" tanong ni Bebang.
"OO! Dito muna ako ng ilang araw. " sagot niya.
"Teka ngang Mary Mar ka ha?! Ako naguguluhan na talaga ako sayo eh! Hindi ko na tuloy alam kung tumalino ka ba o balik ka na naman sa pagka-tanga mo! Hindi ba nga yan ang gustong-gusto mo?! Maging kayo ni Jordan?" tanong ng tita Jackie niya.
Tulad ng inaasahan, sumabat na naman si Bebang. " Oo nga ate! Yan ang pinangarap mo ang makapangasawa ng mayaman at guwapo kagaya ni kuya Jordan.."
"Maka-kuya ka naman parang close kayo?" taas ang isang kilay na sabi niya pero inikutan lang siya ng mata nito.
"... tapos ngayon gusto mong ma-turn off sayo?! Magulo ka pa sa buhok ko sa umaga eh! Ano ba ate?! "
"Ayus-ayusin mo nga yang utak mong Mary Mar ka ha?! Kung kelan malinaw pa sa sikat ng araw ang pagkakagusto din sayo ng lalaking yun, dun ka naman nag-iinarte! " sabi ng tiyahin niya.
"Hindi po ako nag-iinarte tiyang. Gusto ko lang pong malaman kung seryoso talaga siya at totoong tanggap niya ako at ang pinanggalingan ko. Hindi naman porke may nagbago sa akin, mabubura lahat yun. Ngayon ko nga ho masusubukan ang lalaking yun. Isa pa ho, matagal ko ng inalis sa isip ko ang mababaw na pangarap na yun. Hindi ko kailangan ng mayaman na lalake para maayos ko ang buhay ko. Kung sino po ang ipagkaloob ng Diyos sa akin, tatanggapin ko ng maluwag sa dibdib at mamahalin ko ng lubos kahit ano pa siya. Yun nga po ang taimtim na ipinagdadasal ko ngayon. " sabi niya.
Umirap ang tiyahin niya. "Ewan ko sayong babae ka! Kung ganyan din lang ang gusto mo ikaw nang bahala! Nakakahiya lang sa tao kasi ang bait ng pamilya niya sa atin tapos gaganyanin mo? Ang ganda mo din talaga ano? Tulad ngayon, aakyat pala ng ligaw ang init-init pinasok mo ang bentilador sa kwarto! Tsaka makalat na nga ang bahay lalo mo pang ginulo? Baka naman sabihin niya ang burara nating masyado! Idadamay po pa talaga kami eh!" galit na sabi ng tiya niya.
"Oo nga ate! Tsaka baka madulas pa yan sa ginawa mo sa bakuran natin ano pang mangyari dun! Tapos magagalit si mam Jho sayo at ang mama nila eh di bad shot ka?!" gatong naman ni Bebang.
Sasagot sana siya nang nag -ring ang cp niya. Si Ruffa ang tumatawag. Pinaloadan niya ito at binigyan ng pang-miryenda para abangan sa kanto si Jordan ng palihim. Gusto niyang makasiguro na hindi ito naka-kotse gaya ng usapan nila. Sabi niya mag-jeep ito.
"Bakla! Natanaw ko na si papa Jordan! Bumaba sa sasakyan pero hindi naka-jeep! Mukhang nag-Grab eh!" sumbong nito na ikinasingkit ng mga mata niya.
***
Inabangan niya talaga ang pagdating nito. Pumwesto siya sa may pintuan nila. Tumaas ang isang kilay niya ng makitang natigilan ito ng makita ang nagpuputik na bakuran nila. Ang kintab pa naman ng suot nitong sapatos. Pero mabilis naman na naka-recover ito. Ngumiti ito ng matamis sa kanya bago maingat na pumasok ito habang may bitbit na apat na malalaking paper bag sa isang kamay at isang kahon na mukhang bulaklak ang laman sa kabila. Tinapunan lang nito ng tingin ang mga nakasampay sa dadaanan nito. In fairness naman talaga sa lalaking it, super pogi at ang ganda ng porma. Naka-long-sleeves na light gray at pantalon na mas dark naman ang kulay. Kundi lang siya bwisit na bwisit dito mas maaapreciate niya ito talaga kahit walang dalang mga regalo. Kumbaga, ang presensiya nito daig na ang xmas gift, birthday gift , graduation gift at ano-ano pang gift.
"Hi Mary." bati nito na nagpataas pa lalo ng kilay niya. Ngayon lang siya ulit nito tinawag sa pangalan niya.
Para namang nabasa nito ang iniisip niya dahil nagpatuloy ito sa pagsasalita.
"I dropped the babe for now because I am your suitor. And even if I know that we are definitely going to be a couple, I want to show you that I am willing to do what you want. "sabi nito na matamis pa sa bukayo ang ngiti.
Hinarang niya talaga ang katawan niya sa may pintuan. Wala pa siyang balak na papasukin ito. Magtutuos muna sila nito. Pinagkrus niya ang mga braso sa dibdib niya.
"Talaga? You will do what I want? Di ba sabi ko mag-jeep ka? Bakit nag-Grab ka ha? So paanong you will do what I want?!" inis na tanong niya.
Kumunot ng bahagya ang noo nito.
"Akala mo hindi ko malalaman? Kung ikaw nagbayad ka ng malaki para pabantayan ako ng ilang taon, dito sa lugar namin madami akong papakiusapan para abangan ka at isumbong kung hindi ka tumutupad sa usapan!"
Naningkit ang mga mata nito matapos mawala ang ngiti sa labi.
"And what do they want in return?! I just hope that you are not talking about dickhe*ds! I won't have second thoughts of beating them up!" may tigas sa boses na sabi nito.
Natutukso siyang sabihin na lalaking may gusto nga sa kanya ang inutusan niya at date lang ang kapalit. Pero nagbago ang isip niya dahil kawawa naman ang mabubugbog nito. Magmumukha naman siyang katawa-tawa kung wala siyang maituro kung sakali. Si Jordan pa naman ang tipong gagawin lahat malaman lang ang totoo lalo at sa usaping lalaki na tipo siya.
"Teka nga! Iniiba mo ang usapan! Bakit hindi ka nag-jeep? Sumira ka na sa usapan kaya umuwi ka na! " galit na sabi niya.
"I had a meeting. Rush hour na nang matapos. Wala akong masakyang jeep. You can ask Jho. Kasama siya sa meeting and she knows I am coming here. I don't want to be late because I reserved a table for us. " pagdedepensa nito sa sarili na mukha namang totoo.
Aangal pa sana siya pero humirit ulit ito. "Sorry na. Mag-jeep tayo papunta sa restaurant ngayon at pati mamayang paghatid ko sayo kung gusto mo.. "
Umirap siya dito at nagbuntunghininga . "Sige! Pero sa susunod pag sinabi kong mag -jeep ka papunta dito gawin mo ha?" utos niya dito pero ngumiti lang ito ng malapad.
"You're the boss. These are for you . Ito sa tita mo at sa pinsan ...".
Kumunot ulit ang noo niya ng marinig ang mala-sirena ng bumberong tili ni Bebang.
"Elowwww kuya Jordan! Narinig ko na sabi mo para sa pinsan ni ate Mary. And that is only me so thank you very much! " tuwang-tuwang sabi ni Bebang na basta na lang sumulpot sa likod niya at kasunod pa nito ang tita Jackie niya na hanggang tenga ang ngiti.
***
Hindi niya alam kung ano ang dapat isipin dahil hindi man lang nagreklamo si Jordan kanina kahit ang init-init sa sala nila. Naka-long sleeves na polo pa naman ito. Bandang huli, siya ang hindi nakatiis at inilabas niya ulit sa sala ang bentilador. Ayaw naman niyang mag-lawa na ang kili-kili niya lalo at aalis pa sila. Hindi din ito mukhang nandiri sa parang binagyong sala nila at palagay na palagay ang loob nito sa tita Jackie niya at kay Bebang. Ramdam niya na walang bahid na kaplastikan ang mga ginagawa nito. In short, hindi ito na-turn off. Tapos kaninang pumara at sumakay sila ng jeep, alalay to death ito sa kanya. Babaeng-babae talaga ang feeling niya na may kasamang saksakan ng pogi na prince charming.
Magkaharap sila sa loob ng jeep. Dahil wala pang masyadong sakay kanina, sa likod ng driver ang pwesto nito, siya naman sa tapat nito. Sabi niya kasi ayaw niyang magtabi sila. Sa tangkad nito, hindi ito pwedeng dumiretso ng upo dahil tatama ang ulo nito sa kisame ng sasakyan. Sa madaling sakita, hindi bagay talaga dito ang nakasakay sa ganitong klase ng pampublikong tranportasyon pero in fairness, he is trying to blend in. Hindi naaalis ang ngiti nito sa labi na talaga namang lalong nagpasarap sa hitsura nito. Ilang beses na ito ang nag-aabot ng bayad ng ibang pasahero na mukha namang walang kaso dito.
Pero naiinis siya!
Ang haharot kasi ng ibang babae sa mga pasahero na kasabay nila. Yung dalawa, mga estudyante sa kolehiyo base sa suot na uniporme ng mga ito. Ang isa mukhang nurse at ang isa naka-sexy na damit na luwa na ang dibdib. Halata naman na nagpapacute ang mga ito kay Jordan. Isa o dalawang beses, lumingon ito sa mga babae na halos naman mamilipit sa kilig na tila naman ikinakatuwa pa ng lintik na lalake. Halos magtagis na ang mga bagang niya at wala ng makita ang mga mata niya sa pagkakasingkit ng may mga bumaba. Dahil ang babaeng mas makati pa sa hadhad at nagmumura ang mga dibdib sa suot na pang-itaas, umusod sa tabi ni Jordan. Halos mawarak ang mukha nito sa pagkakangiti at isiniksik ang kaliwang dibdib sa braso ni Jordan. Napansin niya na hindi naman komportable si Jordan sa ginagawa ng babae pero wala namang magawa ito dahil wala namang uusugan . Puno na ulit ang jeep dahil may sumakay pang tatlo. Balak pa naman sana niya na palipatin ito sa tabi niya pero may umupo na sa kaliwa niya. Para maiwasang makita nito ang asim ng mukha niya, lumingon na lang siya sa kanan para tumingin sa harapan ng sasakyan. Halos magka-stiff neck na siya dahil ayaw niyang masaksihan ang kalandian ng babae sa tabi nito at baka masabunutan niya. Ilang minuto din na parang tuod lang siya.
Pero bigla na lang siyang napalingon ulit sa kaliwa ng may sumigaw .
"HOLDAP TO!"
Napasinghap siya ng may maradaman siya sa tagiliran niya.