هاشم: ذهب
انداريت واشوفنه واگف وراي
تگرب عليه وحجه: شلون صرتي
هزيت راسي اله وانه مدنجة وجان نسمع الحجية هلهلت بصوت عالي من الغرفة
باوعلي وعافني وطلع من المطبخ
طلعت ورا ودخلنه بغرفة الحجية وبس شافتنه طگتهه هلهولة ثانية
ام ناظم: بالخير والعافية يمة عليكم عساهه زواجة الدهر واترسولنه البيت فروخ روح يهاشم يبن بطني كونن اشوفن ذريتك گبل ما اموتن
هاشم: طولة العمر الج ام ناظم
الكل جان واگف وما مفتهم شني السالفة ورشا ضاله صافنة علينه
ام عباس سمعت الحجي والهلاهل وطفرت بعد ماشفناهه
وهوه اشوف الفرحة بعيونه بفرحة امه
طلع وعافنه ونعمة خذت رشا وطلعت من الغرفة وصاحتلي الحجية
ام ناظم: تعاي يمة گعدي حذاي
گعدت يمهه ع الجرباية گضبتني من راسي وباستني
ام ناظم: بالمبارك عليج يمة
هزيت راسي الهه ودنجت
ام ناظم: اسمعي حبيبة عدي الج حجاية اريدنج تخلينهه ترجية بإذنج ..الوحدة منه يبنيتي مالهه غير زلمتهه.. لا اهل ادوم ولا عمام ادوم ولا خوال… التطلع من بيت اهلهه رجلهه يصير كلشي الهه… المرة اذا زلمتهه حباهه وحطالهه گدر وعز شانهه تلگين الوادم كلهه تهابهه واذا رجلهه استحگرهه لا ولله تلگين الوادم كلهه ادمغ عليهه.. وانتي ييمة الله اطاج مو اي زلمة اطاج شيخ الزلم ..صوني ييمة وحافظي عليه وانچانه غلط وياج بيوم ماكو بشر معصوم من الغلط والمرة المترباية وبت الاصول تتحمل كلشي حبيبة يامه شفنه ضيم وضلايم وتحملنه وسكتنه الخاطر جهالنه لا يتهجولون ..وانتي سباعية وبت اوادم واعرفنج هاويه الشيخ لا تخلين غيرج ياخذه منج
ضليت صافنة ومحتارة افكر بحجيهه
احس روحي ضايعة وماعارفة افكر
ساعة اگولن ليش سوه بيه هيج ليحب مايطي گلبه يأذي ليحبه وساعة اكولن انه الغلطانه وضغطت عليه بالحجي
اهيس راسي يريد ينفجر
كاعدين انه والحجيه ودخلت علينه خديجة
خديجة: صبحچن الله بالخير
باست راس الحجية وكعدت
ام ناظم: لا هلا ولا مرحبا… جا من ذبيتي البنيات ومانشدتي عليهن شني معناتهه بلله
خديجة: شسوي يمة جا هوه بيدي ابوهن مايرضه يردن للبيت يگول البنات لايدهن طويله ماريدنهن
ام ناظم: تصخم اي ولله.. وهوه مايعرف بنياته فقيرات ومالهن بهاي السوالف
خديجة: جا شسوي يمة گليلي
ام ناظم: خايبة انتي شمالج غمة انشدي عله بنياتج شوفيهن جا صدگ هنه گاعدات ابيت خالهن وبحسبة ابوهن بس هم يردنكم جا شني غير اهلهن
خديجة: شلونج يمة ذهبه خذتنه السوالف ونسيت اسلم عليج
ذهب: الحمدلله
خديجة: يااا جا شماله وجهج غادي اصفر ليگول كركم
ام ناظم: ابشرنج… اخوج خذه مريته
خديجة: ياااا فدوة اروحلك ربي عله هالبشارة الحلوة گللللووووووش تعاي ليه احبنج خايبة
جرتني عليهه وبوستني فرحانه
خديجة: جا يمة ليش هيج وجهج وغادية عبالك نومية وهاي صباحيتج
ام ناظم: خايبة عله كيفج ويه البت خذتيهه حاصل فاصل
خديجة: جا شلون يايمة.. انه اگولن خل تذب الاسود كافي جا مايصلح بعد لابسته وهيه عروس
ذهب
رفعت راسي عليهن وحجيت بسرعه: لا ليش ماريد اذبن الاسود
ام ناظم: صادگة خديجة ييمة بسج من الاسود يجيب الفگر وتراه الحزن بالگلب وانتي مرة صاحبة رجل ليش تخلينه يباوع الغيرج
دنجت ونزلت دموعي عله امي شلون يردوني اذبن حزني عليهه وانساهه
خديجة: لا تبجين يا بعد امج هذا حال الدنيا والحي ابگه من الميت جا تضلين طول عمرج بالاسود
ام ناظم; كومي خايبة نعلي الشيطان وگومي جا وينهن امهاتنه ابهاتنه وين كلهم صارو حدر التراب عمت عيني.. لبسنه لاسود لحد ماجزعنه ماشوفن واحد منهم رد
ذهب: جا ليش بعدكم لابسين اسود عله عباس
ام ناظم: عبن ماعدي رجل جا لو عدي رجل ثلث تيام الفاتحة مالبس
خديجة: ههههههه يااا تسودنت الحجية تريدلهه رجل.. خايبه يمة احنه عتگنه موش مثلج
اندارت عله امهه وكملت; جا يمة ماتذكرين نعمة من مات ناظم سودة عليه جانت توهه معرسه وماخليناهه تحزن ويانه عبن عروس ومايصلح
دخلت علينه نعمة وحجت: شمالهه نعمة تسولفن بطاريهه
خديجة: كل خير انشالله.. اگلن الذهب ذبي الاسود بسج عبن هسه صرتي مره ام رجل
نعمة: ولله هالسالفة ابالي بس ماكو فرغة اگللهه بيهه
خديجة: جا خير البر عاجله گومي يمه طبي سبحي وتعاي احفنلج وجهج وشوفي اذا ماطلعتي گمر يلالي
نعمة: خايبه خيه وياج هاي البت تينة فدوة اروحلج جا هي وعباس شني والهسه حزنانه حالهه حالنه عدليهه بلجن تفك ياخه من هاي المرة لاسمهه رشا جا يا ساعه تخنگهه وتفطس بيدهه
خديجة: جا صدگ ويني هاي الضيفة شو نسمع بيهه ولا شفناهه
نعمة: عفتهه كاعدة بالحديقة جا غير تريد…..اندري خايبة مدري شگالت فلك طرهه تكتفش مدري تشتكف الطبيعة مدري شني
ذهب: ههههههههههه تكتشف نعمة تكتشف
نعمة: خايبة اندري بدوالغ البغداديات دگومي بدلي خلقتج جا انه من يمي لعبت روحي منجن من شفت البغدادية الله يساعد اخواني
گومني گوه دخلني للحمام سبحني وطلعت وبعدهه جرن تينه من المطبخ ودخلنهه تسبح
گعدت خديجة تحفلي ورشا ماشفناهه گاعدة بالحديقة مادخلت
خلصت واطتني نعمة لمراية اباوع لروحي عبالك مو انه غير وحدة
وجهي جان مغيم وهسه فتح وطلع لوني الحقيقي
خديجة: خايبة فدوة مهنه خوية هاشم غير صرتي تخبلين
نعمة: اي ولله صدگ ذهبه
انداريت واشوفن نعمة فتحت الكنتور وتطلع بهدومي
ذهب: يااا يااا شسوين
نعمة: جا شني اخذيهن صعديهن فوگ حاطتهن يمي وقف
شالتهن وذبتهن بحظني
ضليت المن بيهن وجبتلي علاگه لميتهن كلهن حته اصعدهن فوگ
طلعت تينه من الحمام لابسة دشداشة ورديه فاتح وكعدت يم خديجة تحفلهه
وهم طلعت تخبل خاصة تينة ماحافة ولا مرة مو مثلي حفيت گبل لا اجيهم
ضلت گاضبة لمراية وتباوع الروحهه مامصدگة
خديجة: اللهم صلي على محمد وآل محمد طگطگيلهن حرمل نعمة خيه اخافن يصيبونهن بعين
دفعت الباب ام عباس ودخلت
ام عباس: هلا جا شني ملتمات الحبايب.. وهاي شني شمسويات برواحجن
خديجة: جا غير عروس واليوم صباحيتهه ومن حگهه
خزرتني وحجت: جا بسيطة يالراس الجبير هم الج عين وتدشين للبيت بعد وبناتج الحرامية بواگات الذهب
خديجة: خايبة گضبي السانج لا بالعباس اگومن امسح بيج الگاع
ام ناظم: بسج يم عباس شلج بهالحجي
ام عباس: جا حجي الصدگ صار ما يعجب جا الذهبات وين لگوهن حجية
خديجة: هذا ليدور عله خراب بيته.. شلون اگومن امرعدهه تمرعد
انفتح الباب ودخلت رشا وسكتن
رشا: مساء الخير
ام عباس: كملت… طبت السلعة
نعمة: جا موتي بغيضج عبن حته هاي لملزگة احله منج لو تموتين بعد الشيخ ما يرفع راسه بوجهج.. فلفل فلفل
عافتنه وطلعت وركعت الباب حيل ورشا صافنة ماتدري شني السالفة
ندستني نعمة وگمت لميت هدومي وخذتهن وصعدت فوگ
دخلت للغرفة فتحت الكنتور وبديت ارتب هدومي
كملتهن كلهن وسديت الكنتور واجيت اطلع احسن هالغرفة صارت تخنگني بس ادخلهه اذكر الصار بيه واسلوبه الوحشي وياي
فتحت الباب اريد اطلع وجان انرگع بصدرة
لاگاني يريد يدخل للغرفة
شافني وضل لازم يدة الباب وواگف
هاشم: تعورتي
ذهب: هاا.. لا لا.. مابيه شي
ليشوفه اليوم ويشوف هدوءة والحنية لمبينه بعيونه مايصدگ هوه نفسة الجان امس وياي بالفراش
گطع صفنتي صوته: شبيج صافنة
ذهب: مابيه شي
گضبني من زندي دخلني للغرفة ودخل هوه وسد الباب
انتجه بضهره ع الباب وگضبني بثنين اديه ودناني عليه
شميت عطره واحسن راسي ضل يوجعني كل الذكريات رجعتلي
دنجت وغمضت عيوني حيل وجسمي كله يرجف ماريدن اذكر شي
رفع راسه بيدي وحسيت بأنفاسه قريبه مني
فتحت عيني عله كيف لگيته مركز عيونه عليه ووجهه مبتسم
هاشم بهمس: خايفة
خنگتني عبرتي من گال هيج وماگدرت اسيطر عله دموعي
جان اكو حجي هواي بگلبي اريدن اگوله اله اريدن اعاتبه ع السوا بيه بس احس كله ضاع وتطشر من بالي من شفته وحسيت بي گريب مني
رفع ايده مسح دموعي وحط ايده عله خدي وهمس: صايرة حلوة
دنجت وضليت ابلعم ماعرف شگول
رفع راسي مره ثانية وحجه: ادري كلمة اسف ماتكفي ولا اي شي بالدنيا يغطي الي سويته بيج
بعدني منه وحط ايده بجيبه وطلع ورقه مطبوگه
هاشم: هاج
باوعتله مستغربة: هاي شني
هاشم: فتحيهه وشوفيهه
اخذتهه منه وفتحتهه ورقة بيت مدري ارض ومكتوب اسمه بيهه
رفعت راسي وباوعلته: ماعرفت شني
حط اديه بجيوبه ورجع انتجه ع الحايط: بيتكم
ذهب: يا بيت
هاشم: بيت امج وابوج
احس گلبي فز من جاب طاري بيتنه حجيت وشفافي يرجفن: شبي
هاشم: صار الي هوه والگاع الجدامة ومن باجر راح يتحول بأسمج
اباوعله ومامصدگه الجاي يگوله
معقولة
شلون وليش وشلون عمامي تنازلو عنه
صبن دموعي وحجيت: شلون
تگرب مسح دموعي: مو گتلج لا تخلين دموعج رخيصه عله كلشي يطيحن.. خليج عله علم ماكو شي يصعب عله شيخ هاشم
طگ راسه براسي عله كيف وهمس: زيييين
ضحكت ودموعي بعيني وحوطت رگبته بأديه وشبگته حيل
حوطني بأديه وهوه يضحك
ابتعدت عنه وحجه: يلله ننزل
هزيت راسي اله وخذني من ايدي ونزلنه انه ويا لكيناهم صابين غده وكلهم ملتمين بالهول وخديجة بعدهه عدنه وگاضبه رشا وتحقق وياهه
شافتنه نعمة وهوه گاضب ايدي وطگتهه هلهولة
نعمة: يمة الله يخليكم ياخوية كون وعين الما تصلي ع النبي عساهه بالفگس انشالله
طلعت ام عباس من المطبخ وشافتنه خزرتنه وردت دخلت للمطبخ
دخل للهول سلم وتلگتنه الحجية صاحتلي كعدت يمهه
جرت شيلتهه جانت عاگدتهه فتحت العگدة وطلعت فلوسهه تحسب بيهن
طبگت خمسة وعشرينات اثنين وحطتهن بيدي
ام ناظم: هذا بياضج يمة
دنجت مستحية ونطت رشا من يمهه: شنو يعني بياض
دنج هاشم وضحك
الحجية: جا الا تعرفين يم طفگة
رشا: هاااا
الحجية: ويعة يدي
جان هاشم توه حاط اللكمة بحلگة هي حجت هيج وهوه شرگ من الضحك ودار يضحك
تغدينه وكملنه وتينه ضايجة لان حيدر ما اجه ع الغدة وماشاف التغيير لمسويته علموده
هاشم
بعد الشغلة الصارت بيناتنه جنت افكر ومحتار شلون اراضيهه واردلهه اعتبارهه واحسسهه انه احبنهه
اجت ابالي فكرة ان اروح العمامهه واردلهه الگاع الجانت لامهه وخذوهه منهه عبن هي مسولفه النعمة عليهه ونعمة حجتلي من فترة
گعدت ثاني يوم من الصبح ورحتلهم گبل ومثل ماتوقعت مجلبين بالگاع وطلبو بيهه سعر عالي وهي زغيرة ماتسوه
بس الما جنت متوقعة نكروا حگ ذهب حته بالبيت وگالو هالبيت من حگنه عبن المرحوم ماعده ولد يارثه غير ذهب والمرة مالهه حگ بالورث
ماردت اطول السالفة وياهم واعرضهه وجبتلهم من الاخير وگتلهم شگد طالبين بالبيت والكاع سوه
طلبو سعر عالي كلش ووافقت عبن جنت مصمم اخذهن بأي طريقة
وفعلا خدتهن وصارن باسمي
رديت للبيت ادور بعيوني عليهه وما لگيتهه
صعدت فوگ الحجرتي ولاكيتهه طالعة
بس ذابه الاسود وشكلهه متغير كله صايرة احله من گبل
راضيتهه وشوفتهه ورقة البيت وارتاح كلبي وانه اشوفن الفرحة بعيونهه
حيدر
من اجت رشا للقرية وانه مامرتاح
احسن هالمرة وراهه شي وجيتهه مو خالية
كل تصرفاتهه مو راحة وتحاول تذب ميانه وياي وتدحچ بيه
طلبت مني اخذهه اوريهه القرية واخذتهه لان ضيفة عدنه وعيب اردهه
بس طول ما چنه الوحدنه هي تحاول تتقربلي وتتمويع كدامي حته تلفت انتباهي
جنت منتبه الكل حركاتهه واعرف هي وين تريد توصل
بس سويت روحي مامنتبه ابد
صرت اكره حته البيت واتعمد ما اتواجد بي لان ادري بتينه حاسه اكو شي مو طبيعي وتغار
تعرفت عله هالمرة بروحتي الاخيرة البغداد جنت رايح علمود عمارة وصفوهه النه ووداني الشيخ اتفق ويه راعيهه ونشتريهه
وجان راعيهه لازم بسعر واحد ومايقبل ينزل ورشا جانت تشتغل بمكتب عقاري وساعدتني حته اخذهه بالسعر لنريده احنه
اطيتهه تلفوني حته تبلغني لاخبار ومن يومهه چلبت وضلت يومية تخابر وتحجيلي قصة حياتهه وتشكيلي وحدتهه بعد مارجلهه طلگهه واخذ ابنه منهه
جنت مااطيهه مجال ابد وبسرعة اخصمهه وياهه لحد مايوم دكت عليه وفاجئتني هيه جاية للقرية
ومن كلت الشيخ هاشم ماعارض ورحب بيهه عباله مرة ادميه
لكن من اجت وشافهه رجع نفسه وحذرني منهه
تينة
صار الليل وحيدر ماكو مارد واهيس گلبي ماكلني عليه
كلما يخابرة الشيخ يگله عدي شغل اخلص وارد
وهاي المسمومه كلساع ونشدت عليه جا انه مانشدت عليه بكدهه
خايفة منهه وكاضبه كلبي بيدي اخافن تغوي حيدر
ساعة اكولن حيدر عاگل ومو مال هاي السوالف
وساعة اگولن يبقه هوه رجال وهي مرة والشيطان ما مات
ذهب
تعشينه والشيخ ماجه ع العشه
كفينه المطبخ ع السريع انه وتينه وكلمن صعدت الغرفتهه
جنت ناويه اتحظر للشيخ والبس احله ماعندي
فتحت باب الغرفة ودخلت وضليت صافنة ع المنظر
الغرفة مگلوبه گلاب عبالك طاگ بيهه مدفع والكنتور مفتوح وهدومي مطشره بالگاع
ركضت عليهن واشوفنهن كلهن مشگگات ومگصگصات وما باقي منهن شي صاحي
ضليت واكفة وصافنة الهالدرجة وصلت بيهه الحقارة هيج تسوي
فگدت اعصابي واخذتلي ثوب من هدومي بيدي وطلعت من الغرفة ركض
رحت الغرفة ام عباس وبناتهه وفلشت عليهن الباب من الدگ
طلعتلي نشوه بتهه وتخوصرتلي گبال الباب
نشوه: خير خير خير شمالج هاده علينه ليگول ثور هايج
صحت بصوت عليهه: ماكو ثور غيرج انتي وامج واختج
لطمت عله صدرهه حيل وحجت: يااا جا اليوم اله ناويه عله روحج عليمن هاي ولج
طلعن امهه واختهه ودفعتهن ام عباس ووگفت گدامي
ام عباس: خيرج شمالج تنبحين
ذهب: گضبي السانج وخليني محترمة عمرج
ام عباس: يمة گلبي گضبني خايبات كمت ارجف شسوين يعني
ذهب: ياهو مسوي بهدومي هيج
ام عباس: جا وكل مصيبه بهذا البيت تذبنهه بروسنه يمفلوكات
ذهب: جا اذا احنه مفلوكات انتن شطلعن ابليس بعينه لا ولله ابليس يتعلم منجن
انه حجيت هيج وهي گمزت عليه تريد تعتني من شعري وگبل لا توصل جلبت بشيلتهه وجريتهه وضلت تصرخ وبناتهه دارن عليه
طلعت تينه من غرفتهه تركض وصعدت نعمة ووراهه رشا
يردن يفاككنه ماكو
ضليت اطگ بيهن بأديه ورجليه واحسن كلبي بعده مامتشفي بيهن
صارن نعمة بنصنه ودفعتهن
نعمة: بسجن لا بارك الله بيجن شهرتنه… انتن ماتستحن العالم مهودة وحس الليل مسموع شتگول علينه الوادم
والحجية اطگ بعوجيتهه ع الدرج وتصيح من جوه ماتگدر تصعد
ام ناظم: بالعباس اذا اجيجن اگرمع جدامجن بهاي العوجية گليلات الحية ماعدجن ادب اطوچن اچل ماطوچن تربية
نعمة: شبيج يذهب تسودنتي
صرخت بوجهه حيل: تسودنت اي تسودنت ولا عتب ع المسودن جا العده ام عباس يضل براسه عكل شوفي شمسويات بهدومي مامخلياتلي شي
شافت الثوب بيدي ولطمت عله وجهه
نعمة: عزه العزاجن كون يالماتستحن جا يجي الشيخ لو مايجي وعلي الا اخلي يسود عيشتجن
جرتني وخذتني نزلتني جوه ورشا بس صافنة علينه
نزلت الغرفة الحجية وذهب سولفتلهه شمسويات بيه وشافت الثوب وهي انهدت عليهن
ام ناظم: بووويااااااي كونن بحيلب الاولي جا صعدت ملشتهن هسه جا گادرات عله هاليتيمة ..انه امك يهاشم ماشفت راحة بعمرك من وره هالسعلوة العدك جا فدوة اروحلك ربي تاخذ بس الزين ومخلي هاي عله گلوبنه كونن الجفن اللف ناظم لفاج يالعگروگه
تينة
تعاركن ام عباس وبناتهه وذهب ونعمة خذت ذهب ونزلت ورجعت انه الحجرتي مالي خلگ اگابل هالمسمومة
بس بالي كله يمة جا شصار بي اليوم من طلعته مال الصبح مارد بعد
من ناحية مرتاحة من تگمز هالمسمومة فوگ راسه
ومن ناحية بالي يمة
لبست ثوبي الطويل وطلعت نزلت جوه گلت اتاني اخافن هسه عله جيه
حيدر
دخلت للبيت وجانت الساعة ب11
كلت اكيد كلهه نايمة ورشا انحبست يم الحجية ونعمة
دخلت سيارتي بالكراج ونزلت وصلت الباب الهول ووكفني صوتهه
رشا: حيدر
التفتت واشوفنهه واكفة وراي لابسة تراك اسود نص ردن
اجت مجتفة وتمشي باتجاهي
وصلت يمي وحجت: مشتاقتلك
حيدر: نعم
رشا: اي شبيك اليوم كله ماشفتك
ضلت تباوع بعيوني وانه صافن عليهه
شفتهه تكربت يمي وانه مادري شراح تسوي وكبل لا ابتعد ماحسيت غير تكربت وباستني من خدي
يتبع…………