رفع راسه عليه وحجه: البگة براسج ذهب
احس اختضت الگاع من جواي وجدامي عجزت تشيلني
اريدن الحجاية تطلع مني ماكو
اريد انشده ياهو
ياهو المات ..بس اهيس گلبي يريد يطلع من مكانه
خايفة انشده وخايفة من الجواب
تگربت عليه وصرت گباله ..عيوني لايجة بيهن الدمعة وشفافي ترجف
بلعت ريگي وحجيت بصوت مبحوح: ياهوو
دنج راسه وغمض عيونه: امج
احس هنا والدنيا وگفت وجن واحد سطرني عله راسي
اذاناتي شوشن ماسمع عدل لو هوه صدگ كالهه
كال امي اي امي انه سمعته يكول امي
امي ماتت ..ماتت وشوفتهه حسرة بگلبي.. ماتت وانه اتمنه اتوسد حظنهه واشتم عطرهه
امي راحت وخلتني بهالدنيا الوحدي
اهتزت الگاع وبادن رجليه واهيس الدنيا افترت بيه وطحت بالگاع
ركضت عليه نعمة وگضبتني وجسمي كله يرجف ماگدر اسيطر عله روحي
اسمعهم يحجون يمي ويصيحون باسمي بس ما اميز شيگولون
امي عافتني وراحت... ليش يمة ليش.. ياهو الي غيرج بعد.. شعدي عايشة بهاي الدنيا بعد.. يمة رديلي ..فدوة اروحلج يمة اريدن اكحل عيني بشوفتج ..لاتعوفيني يمة.. يمة وجودج جان مصبرني ع الدنيا
ما حسيت بروحي غير نايمة عله جرباية الحجية ونعمة تذب عله وجهي ماي
عيوني مغوشة وماشوف عدل
نعمة كاعدة بصفي والحجية يم راسي
غمضت ورجعت فتحت عيوني هاشم واكف فوك راسي
نعمة: ذهب... ذهبة تسمعيني.. حبيبة خيه احجي
ام ناظم: نعلي الشيطان يمة وكولي الله يرحمهه انشالله
حسيت عله روحي وكمت بسرعة لكيته واكف فوك راسي
ذهب: وديني... وديني اريدن اروحن اشوفنهه
باوع النعمة وحجه:گومي نعمة لبسيهه ولبسي عباتج خل اوديجن
نعمة: اخافنهه ماتگدر خوية ماتشوف حالتهه
هاشم: جا شلون نخليهه هنا اول وتالي لازم تروح يلله همن اديجن بسرعة
عافنه وطلع ولبستني نعمة وانه بغير عالم والهسة مامصدگة امي راحت
ماريدن ابجي بعدني عدي امل يجذبون الخبر
بعدني متخيلة اوصل والكاهه مابيهه شي
طلعنه انه ونعمة وهوه مشغل السيارة وكاعد بيهه متانينة
ركبنه وخذانه البيت عمي ابو سند
وصلنه البيت الهوسة ..بابهم مفتوح والعالم ترس الباب ومخبوصين
نزل ونزلنه انه ونعمة وهي گاضبتني من ايدي
راح هوه يم الزلم واشرلنه ندخل جوه
وصلنه الباب بيت عمي واسمع صارت هوسة والجهال تركض ويصيحون اجو اجو
انداريت واشوفن السيارة وفوگاهه تابوت
هنا بعد فقدت وماحسيت بروحي
احسن هسه صدگت ..يعني امي صدگ ماتت صدگ راحت وعافتني
جريت ايدي من ايد نعمة وركضت وعبرت من بين الزلم اريدن اوصل لامي
اشوفنهم نزلو من السيارة وراحو ع التابوت يردون ينزلونه
وجدامي بعد ماتعيني خطوتين بيني وبين السيارة بس احسهن خدن مني عمر
تعديت العالم كلهه وانه اصرخ يمه.. اجيتج يمه.. وعيوني غوشن من دموعي
وصلت يم التابوت اريدن اذب روحي عليه واحس واحد گضبني من ايدي
انداريت عليه واشوفنه گاضبني ويتلفت وانه اجر بيدي منه اريده يهدني
ذهب: عوفني ..عوفني خليني اشوفنهه.. حرمتوني منهه وهي عايشة لا تحرموني من شوفتهه وهي ميته
هاشم بهمس: دشي جوه ذهب دشي لا تطلعين حسج جدام الوادم
صرخت بصوت وانه اشهگ: يا وادم.. الوادم الضلموني.. الضلمو امي وخلوهه تموت بحسرتهه ..ليش همه عدهم مخافة الله يعرفون حگوگ الله وهمه ماكلين حگ بنادم.. هدني الله يخليك هدني خل اشبع من امي
جر حسرة واستغفر ربه وحجه: دشي بويه دشي انه اجيبنهه الج جوة
ذهب: لا ..تجذبون عليه تردون تاخذونهه وترحون ماتردوني اشوفنهه
هاشم: وداعتج اجيبنهه الج بس تعاي وياي
خذاني من ايدي وانه عيني عله امي وصلني يم الباب وتلگتني نعمة دخلتني جوه
كلهن كاعدات مرت عمي ام سند وام غازي وبناتهن وجناينهن
التمن عليه البنات يسلمن عليه وانه بالي مو يمهن ضليت واكفة بالباب متانية هاشم يجيبلي امي
اخافن ادخل وياخذونهه بليه ماشوفهه
شويه وشفته وگف يم الباب الخارجي واشرلي ادخل
دخلت وعيوني معلگة بالباب وسمعت صارت الهوسه
دخلو التابوت للبيت
ركضت عليه وشمرت روحي وضليت اصرخ بكل صوتي
اصرخ عله امي الماتت بحسرتهه عله ابوي المات واحنه بحاجته عله عمري الضاع بظلم اهلي واگرب الناس الي
شلت راسي وانه اصرخ ورگعته حيل بالتابوت ماحسيت غير ع الدم نزل عله عيوني وجرني النسوان واجو شالو التابوت وانه اصرخ: لا تاخذونهه.. امي لا تاخذونهه.. ولكم وين مودينهه تستاحش ابحدهه ..تعالو جيبوهه لا تاخذونهه
شبگتني نعمة تهدي بيه وتبجي عله بجيتي وجابن ماي يغسللي ويمسحن الدم مني وانه فاقدة وما حاسة بروحي
بقيت عله هالحالة وصافنة ودموعي ما وگفت وحته صوت بعد ماعدي وصرخ صوتي راح وانهد حيلي وراسي يون عليه من الطگة
نعمة ماعافتني ابد گاعدة يمي وتقره عليه ايات قرانية وادعية
شفت عمامي دخلو ووگفو عله راسي
ابو سند: البگة براسج عمي
ابو غازي: گوي گلبج الله يرحمهه انشالله
هزيت راسي وانه مدنجة
ابو سند: ولله يعمي ادري السالفة الجايج بيهه موش وكتهه بس الله يشهد علينه لو عدنه مانقصر وما نوگف هالوگفة جدامج.. بس اجيت انشدنج امج ماضامة جم فلس جوه ايدهه حگ دفنتهه وعزاهه عبن انتي ادره بالحال انه وعمج ابو غازي يالله معيشين كوم اللحم العدنه
رفعت راسي عليه وانه متفاجئة
وين وصلت النذالة بيهم.. شكد يطغون بعد
الهالدرجة اكو ناس ضلام وما يخافون الله
مسحت دموعي وگمت من يم نعمة ووگفت گبالهم
حجيت وانه سادة سنوني
ذهب: انتو شني من بشر گلولي شني.. ماتحسون ماعدگم گلوب
دگيت عله صدري وحجيت بحرگة: هاذ الهنا ميت مايحس.. بسكم ملينه من ظلمكم شوكت ترحمونه
ابو سند: گضبي لسانج يبنية ولا تخليني اسوي شي مايعجب احد
ابو غازي: اعذرهه يبو سند امصابهه جبير واكيدن ماتگصد
صرخت بوجهم حيل: لا اگصد.. كل جلمة كلتهه انه گاصدتهه واعرف معناهه شني.. انتو ظلام ولله مايقبل بالظلم.. وانه يتيمة وطحت بديكم واريدنه ياخذ حگي منكم
خنزر عليه عمي ابو سند ونطط عيوني
رفع ايده وصفعني راشدي عله وجهي
ابو سند: ماعتب عليج.. ترباة مرة.. هي العافت اهلهه وشردت بليلة ظلمة ويه واحد تعشگة تعرف تربي
صرخت بكل صوتي واحسن الصرخة طلعت من گلبي: اتخسي..امي اشرف منكم كلكم ..عساكم تشوفونهه بذريتكم ظلام
گمز عليه يريد يكمل وجرتني نعمة خلتني وراهه وصاحت: خافوا الله بهاليتيمة بيا وجه تگابلون ربكم لو نشدكم عليهه
ابو سند; ميلي انتي مره غريبة لا تدخلين بيناتنه
نعمة: جا بالعباس ماعوفنهه بينكم الله اليعلم لو ماجانت بحمة الشيخ شتسوون بيهه
ابو غازي: امش خوية ابو سند امش مالنه حيل الطلايب
جرا اخو وطلعو بره وطلعت نعمة تلفونهه من صدرهه تخابر
نعمة; ها خوية هاشم وين انته... تعالي خويه دش شويه رايدتك... خوش خوش طالعتلك
عافتني وراحت تشوفه وگمت انه وراهه اطلع احسن بعد ماتحمل الگعدة بهالبيت
وصلت الباب المطبخ واسمع ام سند تحاجي بعمي
ام سند; جا انته مسودن هيج تسوي غير صارت مرت الشيخ هسه ماتعرف تتلوگلهه شويه بلجن نحصل شي من الخير العايشة بي هالمفلوكة
ابو سند: جا ماسمعتيهه يامرة شلون تحاجيني ترديني اسكت
ام سند: جا وسكت تنگص منك ايد يا رجل هسه اخذهه شوف الشيخ شراح يسوي بيكم
عافهه وطلع وهوه يدردم عليهه وانه بقيت صافنة يم الباب وجاني الصوت من وره: البقية بحياتج ذهب
التفتت واشوفن سند واگف وراي
هزيتله راسي وانداريت اريدن امشي وگضب ايدي
باوعتله دنج وحجه: انه اسف يذهب ع السالفة السويتهه الج بس جنت مجبور وداعتج
ذهب: ليش ..شجابرك.. ضميرك صحه وانبك عبن عفتني وانه بحاجتك
سند: هالحجي مايفيد هسه يذهب عبن انه خطبت
ذهب: هه صدگت الحجي مايفيد يبن عمي
نكتت ايده من ايدي حيل وعبرت وصلت الباب البيت واشوفن نعمة واكفة بالباب الخارجي وتباوع شويه واجاهه هاشم
نعمة: ها خوية
هاشم: هاا شمالجن شصار
نعمة: امشنه خوية ناخذهه ونرد البيتنه ان ضلت هنا ياكلونهه نية وعلي
هاشم: شبيهه
نعمة: المايخافون الله عاركوهه عله فلوس الدفنة والعزة من نصبنه عزاهم انشالله بيوم واحد
باوعلي وحجه: روحي جيبيهه وتحظرن علما اروح احاجي عمامهه واجيجن
هاشم
عمامهه من اول ماشفتهم مارتاحيتلهم
ناس مصلحجية وملعبين
وشكوكي جانت بمحلهه توقعت راح يحجون عله سالفة الدفن والفاتحة وگبل لا تگلي نعمة جنت متحظر لهالشي
طلعت من يمهن ورحت عله عمامهه وجانو واكفين وواحد يذبهه ع الثاني
هاشم: الله يساعدهم
ابو سند: هلا هلا بالشيخ ياهلا ومرحبا
هاشم: اسمعني ابو سند.. بحسبتي المسؤول عن ذهب هسه دفنة امهه وعزاهه من مسؤوليتي وولا زغراً بيكم ادريكم ماتگصرون وتكفون وتوفون بس خلو السالفة يمي
باوعو واحد للثاني وضحكو
ابو غازي: اااا... جا بعد شنگول شيخ ماكو گول عگب گولك
ابو سند: شورتك وهداية الله جا نگدر نگلك لا احنه
سلمت عليهم وخابرت حيدر يجيب خديجة ويجيني
ذهب
رجع علينه وانه ونعمة واگفات برة
وده على خديجة وحيدر ياخذون لجنازة ووياهم حسان وابنه ومرته وماخله ولا واحد من عمامي يروح
جلبت وياهم اريدن اروح ادفن امي بس ماخلاني وما قبل
وردني للبيت وانه گلبي وخاطري مكسور
امي راحت وضليت وحيدة بهالدنيا ومادري بعد شضامتلي اكثر
تلگتني تينة وباوستني وام عباس وبناتهه يباوعن ويدورن وجهن ولا جنه اكو شي صاير
دخلت بغرفة الحجية وگابلتني الحجية تنعه وانه ابجي
احس گلبي خلص وبعد ماگدر
دخلت نعمة وشافت امهه تنعه
نعمة: يااا يمة عود صدگ بسج موتي البت
اجت يمي حظنتني وحجت: كافي خيه كافي البجي مايرد الراح گومي غسلي وندعيلهه وصليلهه الليلة هيه بوحشة وصلاتج تفيدهه اكثر من البواجي
حجت وياي نعمة رادت مافاد احس روحي ابحدي وما اسمع احد
والشيخ بعد ماشفته وصلنه وطلع مادري وين راح
صارت الساعة ب9 بليل ودخل علينه
شافني گاعدة وايدي عله راسي واون مالي حيل بعد وابجي
ام ناظم: ها يمة هاشم تعال دش
هاشم: خابرني حيدر دفنو وراجعين هسه
احس من گال هيج تهيجت كل المواجع بيه صرخت حيل ومن كل گلبي: ولج يمممممة ...سودة عليه يمة صرتي بالتراب كون انه بمكانج اتمدد يمة
نعمة: انعلي الشيطان خيه بسج راح تموتين
ذهب: خل اموت الله يحبني اذا خذه روحي وموتني هسه دنيا مابيهه امي ماريدنهه
هاشم: بسسسج بوية ..كافي ارحمي روحج.. هالحجي هذا حرام.. امج عد الارحم مني ومنج هذا يومهه وكلنه عله هالطريج گومي يلله گومي ماريدن اشوفنج تبجين بعد كومي صليلهه الوحشة
ام ناظم:امج شسمهه يمه خل اصليلهه
رفعت راسي وحجيت: نسيمة
هاشم: يلله نعمة كوميهه خل تغسل لا تخلينهه هيج
جرتني نعمة گوه للحمام وغسلتلي توضيت ورجعت لكيت الحجية تصلي
فرشت سجادتي وگعدت بالكاع بس توجهت ودموعي صبن اريدن اسمهه يطلع مني ماكو احجي وي ربي ودموعي تجري وشهگاتي علت ونعمة هم اجت تصلي
سجدت وبللت التربة بدموعي وانه ادعيلهه وكملت الصلاة بالف ياعلي
كملنه ودك تلفون نعمة حجت شويه وسدت التلفون وباوعتلي
نعمة: ذهب الشيخ يريدج بحجرته
باوعتلهه وهزيت راسي بمعنه ماروح
تگربت يمي وحجت: ذهب.. اسمعي مني هالحجي وانجان مو وكته بس اسمعي عبني انه اخيتج واريدن مصلحتج.. مابگالج يذهبه بهالدنيا غير الشيخ لا تخسرينه وانه اشوفنج دشيتي گلبه وانچان هوه مايحجي بس السالفة مبينه بعيونه ان كسبتي گلب الشيخ كسبتي الدنيا كلهه.. لا تضيعينه من ايدج يذهب لوذي بسدة وبحماه وانتي شفتي اليوم شلون عمامج تبرو من كلشي ولا جنهم يعرفونج لا تعاندين يذهب المثلج محتاجة الواحد مثل هاشم عبن هاشم يغنيج عن اهلج كلهم
دنجت ودموعي تصب
نعمة: كومي خيه كومي شوفي رجلج شيريد كومي
هزيت راسي وكمت من يمهه طلعت من غرفة الحجية وصعدت فوك لاگتني ام عباس خزرتني ودخلت الحجرتهه
دگيت الباب واجاني صوته: تفضل
دخلت واشوفنه كاعد عله سجادة الصلاة ويسبح شافني ورفع ايده اشرلي تعاي
وصلت يمة وگعدت عله حيلي بالگاع
هاشم: صليتي
دنجت وهزيت راسي
هاشم; لا تشيلين هم الكلشي جهزت كل سوالف العزة ومن باجر انشالله ينحسب اول يوم فاتحة
رفعت راسي وانه حايرة شگله.. صدگ حسيت الله ودا الي هدية من عده ..احن عليه حته من اهلي
ضليت ساكته وبس دموعي تحجي عله الي بگلبي
مد ايده مسح دموعي وهمس: لا تبجين
ذهب: تعبت
لزم وجهي بثنين اديه وحجه: ماعاش ليتعبج وانه موجود
ضليت ساكته ودموعي تجري
تگرب عليه وضم راسي بحظنه
دفنت راسي بحظنه اكثر وعلت شهگاتي احس دشداشته تبللت بدموعي وانفاسه صارت عاليه وصدرة يصعد وينزل
حوطني بأديه وضمني اكثر وهوه يهمس يم اذني: كافي.. لا تبجين.. لا تبجين يرويحتي بسج.. فرفحتي گلبج وگلبي وياج كافي
كلما يحجي كلما ازيد بجي احس حجيه مثل الملح اليلجم بجرحي
رفع راسي من حظنه مسح دموعي وباس راسي
هاشم: اششششش بس بجي گومي
گومني ولم السجادة خلاهه عله صفحه وخذاني من ايدي
مددني ع الجرباية وتمدد هوه بصفي
وحطاني عله ايده
ضل يسولف يم راسي بصوت ناصي ويمسح عله شعري واسمعه يقره ايات قرأنية ونمت وانه مادري بروحي
فزيت عله صوته يحجي بالتلفون جانت الساعة ب2 بليل
جان يحجي ويه حيدر وحيدر يكله احنه وصلنه وخديجة راحت البيتهه
كمل منه وسد التلفون اندارلي لكاني كاعدة
ابتسم وحجه; گعدتج
دنجت وانه ساكته
تگرب عليه مددني وتمدد وياي حط راسي عله حظنه ومد ايده عله الميز جر باكيت الجكاير وورثله جكارة
هاشم: من مات ناظم تخيلت الحياة وگفت والدنيا بعد مالهه طعم وماكو داعي اضلن عايش عبن جنت متعلگ بي كلش اكثر من ابوي نفسه بس الايام كفيله تنسي يذهب.. يبقون بگلوبنه صحيح ونذكرهم بكل لحظة حلوة وبكل لحظة حزن ونحتاجهم مرات يكونون يمنه بس هاذا حال الدنيا والمؤمن بالله يحمد ربه ويشكره عله كل حال ويصير عده يقين ان الدنيا ابتلاء ورب العالمين يبتلي عباده حته يشوف صبرهم وشگد ماطالت الليالي السود لابد تجي ليلة بيضة تنسينه كلشي فات
رفعت راسي وحجيت: تحجي هيج حته تصبرني
هاشم; لا ولله حالي مو احسن من حالج حته اواسيج بس سامعه ليكول ليشوف مصايب العالم تهون عليه مصيبته وانه هيج من كد ماكمت احلن بطلايب الوادم نسيت سالفتي وصارت عدي سهله
سكتنه ثنينه ورجعنه غفينه
كعدت الصبح ومالگيته يمي باوعت للساعة 8 الصبح
رديت حطيت راسي ع المخدة وذكرت امي وابوي وايامنه ابيتنه ايامنه الما ترد
اووووف يا يمة وينج
اندفع عليه الباب وكمزت شفت ام عباس دخلت وعيونهه كلهه شر
اجت عليه وجرتني من شعري كومتني من الجرباية
ام عباس: وين خامدة ولج ..خايبة اليوم اخلي ليلتج سودة بالعباس
تغلط وتحجي واطگ بيه وانه حيلي مهدود حته مالي حيل احامي الروحي صرت بيدهه مثل الميته توديني منا وتجيبني منا
ام عباس; عبالج تمشي عليه كلاواتج يمدهورة مسوية روحج فقيرة وحزنانة عله امج وتالي الليل تتلبدين حدر الزلم
هاشم: ام عباااااس
يتبع....