اطته العلي وجان مكسر ومفكك ضل علي يگلب بي بيده وساكت
وبعدهه رفع راسه وحجه: خالي هذا التلفون انه اعرف مالمن
هاشم: المن... احجي
علي: تلفون نهوة
ام عباس: اتخسي ..انجب خايب لا اجي اشگ حلگك بالقرآن تردون تذبون بلاكم عله بناتي
هاشم بصوت: كريمة... ماريدن اسمع حسج
تگرب عله علي وحجه: كمل علي.. شلون عرفت التلفون النهوة
علي: عبن البارحة من جنه عدكم سمعتهن هيه ونشوة يسولفن.. وجانت گاضبته بيدهه.. نهوه تگلهه هسه وين اودي ونشوه تگلهه مثل ما گتلج ذبي براسهه وطلعي منهه سالمة.. بوكتهه سكتت لان ماعرفت يگصدن ياهي وهم ما ردت ادخل وتصير السالفة بوجهي بس من سولفت امي وگالت لاگين التلفون عد ذهب ما گدرت اسكت
جان واكف مدنج وحاط اديه بجيوبه ويسمع العلي
رفع راسه واندار عله ام عباس: صيحيلي بناتج
ام عباس: شيخ جا نصدگ الفرخ الجاهل هاذ ونجذب عيونه.. يردون يتهمون بنياتي عبن يتيمات ومالهن احد
هاشم: گتلج روحي جيبي بناتج
صعدت ام عباس و گعد هوه ع الكرويته مدنج ويهز برجله
شويه ونزلت ام عباس ووراهه بناتهه
رفع راسه وحجه: تعالن
اجن مدنجات ووگفن كدامه
گام وراح يم علي اخذ التلفون منه ورجع وگف گبالهن
مد ايده وحجه: هذا المن
مدنجات وساكتات ومحد منهن حجت
صاح بيهن صوت خلاهن وحدة تطگ بالثانية
هاشم: راح اعيد لحجاية مرة وحدة وان ما سمعت جواب يصير شي ما يعجب احد... هذا المن
نشوة: مو النه عمي ما ندري بي
هاشم: هاا ..خوش.. وانتي نهوة هم مو الج
نهوة: مادري بي عمي مادري
ام عباس: جا شني شيخ گوه تردون تذبونه عله بناتي مو گاللك ما يدرن بي
هاشم: اكرمينه بسكوتج انتي.. هسه انه اعرف السالفة شني
عافنه ودخل بغرفة الحجية وطلع وره شويه بيده قرآن الحجية
جابة حطه ع الطاولة والتفتلي: تعاي ليجاي
التفتت عله نعمة واشرتلي اروح
رحت ووكفت يمة
رفع راسه باوعلي وحجه: نظيفة
دنجت وهزيت راسي
التفت عله بنات ام عباس ونتر بصوت: وانتن
ضلت وحدة تباوع للثانية وساكتات
صاح بصوت: ما تحجن
هزن روسهن بخوف
هاشم: روحن توضن وتعالن
رحت انه امشي اول وحدة واجن هنه وراي
توضيت وانه اهيس گلبي يخفگ بسرعة
توكلت عليك ربي وانته عالم بيه ماعدي شي اريدنك اطلع حوبتي بكل واحد اذاني
سديت الماي وطلعت لگيتهن واگفات اباب الحمام
عفتهن ومشيت رجعت للهول يمهم
شويه واجن وراي
باوعلي الشيخ وحجه: گربي
رحت ووگفت يمه
مد ايده لزم ايدي وعينه بعيني وانه احسن گلبي يريد يطلع من بين ضلوعي
لزم ايدي وخلاهه ع القرأن: احلفي بكلام الله ان هذا التلفون مو الج ولا لج شغل بي
غمضت عيوني بلعت ريگي وحجيت: وداعة هذا القرأن البين ايدي مو الي هالتلفون
وخر ايدي من القرأن ورفع راسه غمض وجر نفس
ورجع التفت لبنات ام عباس: گربن
وجان تطفر ام عباس: دخيلك شيخ لا تحلف بنياتي كلام الله مو شوية مالي غيرهن
ام ناظم: خاف الله يم ام عباس جا بس حلفو بت العالم حالهن حالهه
هاشم: الماعده شي ما يخاف يم عباس
جر نهوة وجاب ايدهه وگبل لا توصل يم القرأن صرخت: لا عمي فدوة لا اي الي ولله الي
رفع راسه باوعلهه ونكت ايدهه من ايده حيل
اندار عليهه وعيونه تجدح وعروك رگبته نطت
رفع ايده وما سمعنه غير صوت الراشدي ونهوه متكوده يم رجلينه
وبعدهه اندار عله نشوة
ضلت ترجع ليوره وتصرخ: عمي ولله مالي شغل مو انه ولله
صاح بصوت جفلهه: وبعدج تجذبين ولج
گضبهه من ثنين اديهه ودفعهه حيل وكودهه بصف اختهه
دفرهن وهنه بالگاع وگمزت ام عباس فوكاهن: يمة بنياتي.. الله لا يطيج عبنج شيشتي عمهن عليهن يالحية يالسعلوة من شفناج ما شفنه الخير الله لا يهنيج انشالله
هاشم: بسسسس... اخذي بناتج وصعدي لا بالعباس اكفر بيجن
جرت بناتهه من الكاع كوه وهنه يتبجبجن وصعدن فوگ
گعد ع الكرويته جر نفس وفتح دگم دشداشته الفوگ
ام ناظم: عله كيفك ويه روحك يبعد امك يولن عساهن بالحرگ هنه وامهن لا تكدر روحك علمودهن
صفگ بيده حيل وحجه: الكاسر ظهري و مجتفني عنهن المرحوم ناظم مالي عين أذيهن
خديجة: الله يرحمه انشالله.. ذني بنات كريمة يخوية بري منهن ناظم.. جا ماخذن منه شي لا شكل ولا طبع كلهن لامهن
حيدر: بنات زغار وغلطن محد معصوم من الغلط
تگرب عله الشيخ دگ عله جتفة وكمل: لا تضوج خوية سهلة انشالله.. من رخصتكم
رفع راسه وحجه: وين
حيدر: اروح اخذلي فرة شويه اشوف الشغل
هاشم: اخذني وياك
گام جر غترته من ع الكرويته وطلع وهوه يلف بيهه عله راسه
التفتتلي نعمة وحجت: هاا يذهبه ارتاحيتي
ذهب: الحمدلله
ام ناظم: تعاي ليه يمة احبنج يبت الاصول يسنعة
رحت يمهه باستني وبستهه براسهه وانه احس روحي مالكة الدنيا
الحمدلله ربي ماضيع حگي وانكشفن وطلعن عله حقيقتهن
راحت خديجة وام عباس وبناتهه بعد ما نزلن ولا شفناهن
گعدت ثاني يوم الصبح بس مالي خلگ اگوم
ضليت متمددة وصافنة بفراشي
افكر بالصارلي
افكر بي هوه.. ليش ما حاقدة عليه ولا شايلة بگلبي عليه شي بعد كل السواه بيه
ما كرهته ابد ولا ضجت منه بالعكس يوم عن يوم احسه يتربع بگلبي اكثر
اجت عله بالي امي ..يا ربي شگد مشتاگتلهه.. احسن گلبي طاگ عليهه
ما يصير هيج اضلن ساكته لزوم اگلن لاي واحد يساعدني حته اشوفنهه لو بس حته اخابر واطمن عليهه هم راضية
احاجي نعمة اي نعمة احسن شي وهي تگل لاخوهه
فتحت نعمة الباب ودخلت وجهه يضحك: هاا يذهبه اصباح الخير اشوفنج گاعدة لوحيدتج اخافنج ضجتي مني
ذهب: اصباح العافية... يااا هوه انتي ينمل منج غير العشگ انتي
نعمة: ههههههه فلك طر السانج.. اذا انه العشك جا اخوي شيطلع
ذهب: اخوج ملتهي يذبح ويصلخ
نعمة: خايبة وعلي اخوي ماكو منه بس جا غير انتي تتحركين وتفتحين مخج شويه
ذهب: يااا شترديني اروح اكله تعال اخذني
نعمة: جا انتي يا طخه يا اطلع مخه ..گومي گومي مادام اليوم الجو صافي والبيت يخبل بليه وجه الغاكة ما لفت من امس لا هيه ولا بناتهه امشي انظف ونطبخ خلي الشيخ يضوگ طبخج اليوم
ذهب: ههههه يلله گومي
گمت ويه نعمة وطحنه للبيت غسل وجلف من فوگ ليجوه انه وياهه وتينه
وصار يلمع وهدوء ويخبل بليه الثور الهايج وبناتهه
لا نزلن ولا بينن من البارحة
دخلنه بعدهه للمطبخ وبدينة نحظر الغدة
طلعت نعمة دجاج وگتلهه انه اطبخ اليوم
بس علمتني قياساتهم وضلت واگفة يمي هيه وتينة يسولفن ونضحك
خلصنه الغدة بسرعة وما حسينة بالوكت وراحت تينه صعدت فوك ونعمة راحت تشوف الحجية
جنت واكفة ع الكاونتر اسوي زلاطة
لابسة دشداشة نص ردن بنفسجية ومو كلش طويلة لان ادري الشيخ وحيدر مو هسه يرجعون وانه ماعرف اشتغل بدشداشة طويلة احسنهه تخنگني
وضافرة شعري گصيبة
واجت ابالي اغنية جانت امي دوم ادندن بيهه من تشتغل لو من تطلع للگاع مالتهه تشتغل بيهه
وما لگيت روحي غير اغني بيهه وانه اشتغل
ويااا عشگنا... فرحة الطير اليرد لعشوشه عصاري
يااا عشگنا... من سوابيط العنب ونحوشة عصاري
گاعنا فضة وذهب واحنه شذرها
وشحلاة العمر لو ضاع بعمرها
ويا عشگنا ..يا عشگنا.. يا عشگنا
جنت اغني بصوت عالي ومنطلقة ذبيت السجين وانداريت ومااحس غير انطگيت بشي قوي
رفعت راسي واهيس گلبي طاح بين رجليه
واگف وعيونه مركزهن عليه وعاگد حواجبة
جا من يمته هوه اهنا وانه مادري
ضلينه ثنينه واگفين وبس عيونه تحجي
حجيت وشفافي يرجفن بالكوه طلعت لحجاية: شيخ
اتحرك فجأة واندار فرك راسه بيده وحجه: غداكم مخلص
ذهب: هااا... اي اي
التفتلي باوع عله دشداشتي وحجه بهدوء: روحي بدلي هاي هدومج حيدر جاي وراي
دنجت اباوع عله روحي شلابسه
يا عزه العزاني شلون واگفة كدامه هيج
ركضت اريدن اطلع من المطبخ وصلت للباب وصوته وگفني
هاشم: ذهب
التفتت واشوفنه تگرب عليه
وگف يمي حاط ايده بجيوب دشداشته: انه اسف
ذهب
ابتسمت ودنجت راسي: لا تعتذر شيخ ما صار شي يستاهل تعتذرلي
ضحك وبينت سنونه وانه رحت بغير عالم
اول مره يضحكلي ..يمااااي راح اموت
هاشم: يلله روحي بدلي
هزيت راسي ورحت ركض دخلت بغرفة الحجية وانه ايدي عله گلبي اهيسنه راح يطيح مني
جانت الحجية گاعدة عله كرسي الصلاة وتسبح
رفعت راسهه وشافتني: جا تسودنتي مكشرة ابحدج
ذهب: هاااا
ام ناظم: يااا وسطر كون
دخلت نعمة وضحكت من شافتني: اعذريهه يمه جا غير الشيخ راضاهه
ذهب
باوعتلهه وحجيت: وانتي وين دريتي
نعمة: هههههه شفتكم حبيبة جا غير جنكم بلابل الله يديمهه انشالله وما يدخل البومة بينكم
ام ناظم: جا هي ما بينت اليوم
نعمة: كللللش... خلي روسنه فايخة منهه
عفتهن يسولفن خذتلي دشداشة ودخلت للحمام بدلت وطلعت
لگيت حيدر جاي وكاعدين هوه والشيخ بالهول يسولفون
عفتهم ودخلت للمطبخ لگيت تينه تصب غده
ذهب: هاا صبيتي
تينه: اي عبن حيدر سودة عليه جوعان... اشوفن وجهج منور اليوم
ذهب: هههههه سكتي.. جا غير ضحكلي ..ولج احسن گلبي طاير
تينة: الله يدومهه عليج حبيبة
ذهب: ويهديلج حيدر انشالله
دخلت علينه نعمة وحجت: جا واكفات تسولفن والوادم متانين الغدة
صبينه وكملنه ومدينه السفرة
التمينه كلنه من عدا ام عباس وبناتهه
شكد حلو البيت وهنه ماكو
نعمة: شيخ تراه هاذ طبخ ذهبه اليوم
مدنج وياكل: عاشت ايدهه
رفع راسه حيدر :عاشت ايدج مرت اخوي
رفع راسه الشيخ باوعله ورد دنج ياكل
ذهب :بالعافية
جاي اكل وندستني نعمة بخاصرتي التفتت واشوفن ام عباس نازله ووراهه بناتهه
وگفت گبال الشيخ وحجت: شيخ انه جبت لبنيات يعتذرن لك ويحبن عله راسك
رفع راسه وخزرهه: ماريدن احد يعتذرلي رديهن منين ما جبتيهن
ركضت عليه كعدت يمه وحجت: فدوه اروحلك شيخ هاشم اعذرهن جهال وغلطن.. يتيمات ومالهن غيرك لا تكسر بخاطرهن
نكت ايده من الاكل بعصبية وكام وصاح: والكاضني منهن عبنهن بنات اخوي جا الا زينت روسهن عله عملتهن
مشه شويه والتفت عليهن: اريدن اردن ماشوفجن هنا
ام عباس; شيخ....
هاشم بصوت: وانتي هم وياهن.. عبنج انتي ساس البله
التفتت عليه خزرتني وخذت بناتهه وصعدت وهي تكفخ بيهن
تينة
تغدينه وغسلنه اماعين انه وذهب
شفته صعد فوگ نشفت ايدي وصعدت وراه
دشيت للغرفة لكيت هدومه بالكاع وتلفونه ع الشحن وهوه ماكو
دنجت اشيل هدومه واسمع تلفونه يدك
كمت رحت ع التلفون باوعت ولن اشوفن طلعت صورة مرة بالشاشة
ياا هاي ياهي عود
ضليت واكفة يم التلفون وخايفه خاف ارد ويجي ويشوفني
انكطع الخط ودرت اريدن اروح ورجع يدك مرة ثانية
جا الا اعرف ياهي هاي
شلت التلفون ودست الخضرة وحطيته عله اذني وجان اسمع وحدة تصيح: شلونك حيدوري
انه سمعتهه لو شبت النار البيه ونسيت روحي
تينة بصياح: يا حيدوري هاذ اسمه شيخ حيدر جا ماتحجين عدل
حيدر: ويامن تحجين تينه
التفتت واشوفنه گاضب المنشفه بيده وخازرني وعاكد حواجبه
ضليت امتمت وماعرف شحجي والتلفون بيدي
وهذيج تصيح الو الو
تگرب اخذ التلفون مني وجاوب: الو.. هلا بالست اهلا وسهلا
يحجي وعيونه عليه
حيدر: هاا هههه.. لا لا هاي بت اخوي الزغيرة تلعب بالتلفون ارجو المعذرة
تينة
سد التلفون وانه ابدي اكله جا ليش ما گلهه مرتي عود شني يستنكف مني
سدا واجه يمي: منو گلج تردين
تينة: وانته ليش ما كتلهه هاي مرتي عود هاا ليش جا عبنك تستنكف مني المن ماخذني المن مخليني عدك جا شني شناگصني عنهه انه ايد لو رجل هيه مره وانه مره لو هي تعرف تتنعوص وانه ماعرف
حيدر: خلصتي
تينة: هاا
ضحك بصوت عالي وهز ايده واندار مني
وانه توني اوعى عله روحي شحجيت
فلك طرني كون
من الفشلة ركضت طلعت من الغرفة وسديت الباب واسمعنه طگهه ضحكه بصوت عالي وراي
ذهب
جنت واگفة ع الطباخ اسوي عشة
حطيت قوري الجاي ع النار وانداريت اطلع غراض من المجمدة
نزلت ام عباس ودخلت للمطبخ يمي
دفعتني وعبرت فتحت الثلاجة
باوعتلهه وهزيت ايدي وانداريت
طلعت بتيته من الثلاجة وكعدت اكشرهه وكصصتهه اصابع واشوفنهه تحوم يمي بالمطبخ ساعة تفتح الثلاجة ساعة المجمدة ساعة تشرب ماي ومحتارة شسوي
حطيت الطاوة ع النار واجيت اريد اگلي اجت يمي وكفت ع الطباخ
اندارت حيل وطگت قوري الجاي وطاح بالكاع وطفر عليه وعله رجلي
احس شاغت روحي وفرفحت من الوجع
صرخت بكل صوتي وهي صاحت :يااا عزه غير تباوعين
اجت نعمة تركض للمطبخ وشافتني كاعدة بالكاع وگاضبه رجلي وابجي والجاي متبدي بالكاع
نعمة: يااا ولج شمالج شصار بيج
دخل الشيخ جاي من بره وشافني گاعدة ونعمة تكوم بيه
ركض عليه وگعد عله ركبته: خير خير شبيهه
نعمة: مادري خويه احتركت لبنيه ساعدني اشيلنهه
شافت ام عباس الشيخ وشردت بعد ما شفتهه
هاشم: ميلي خلي اشيلنهه
شالني عله جتفة وخذاني الغرفة الحجية
گعدني عله جربايتهه واندار عله نعمة: تعاي نعمة نزعيهه ثوبهه اخافن لايح جسمهه شي
جنت موجوعه وابجي واشهگ وحته من شالني من وجعي مانتبهت
بس من حجه هيج جن واحد وطگني على راسي وصحاني
وكملتهه نعمة اجت تريد تجر دشداشتي وتنزعني
جريت دشداشتي منهه حيل وحجيت: انتي شسوين شلون انزع
عاد هوه انتبه واندار اطانه ظهره وحجه: نزعيهه وبدلي دشداشتهه بسرعة
راحت نعمة طلعتلي دشداشة واجت نزعتني وانه احسن روحي رايحة منا وجع رجلي لنصلخت بالجاي ومنا هاذا فوكاي
لبستني نعمة واندار هوه
وحسيت بي جان يباوع جا شلون دره بينه خلصنه ودار وجهه
هاشم: هاا بيهه شي
نعمة: لا بس رجلهه خطيه.. اروحن اجيبلهه عصاره من الثلاجة واجي
راحت نعمة جابت عصارة وگعدت تدهن برجلي واحس گلبي ضل يوجعني من وجع رجلي
هيه تحط ايدهه عله رجلي وانه اصرخ
والحجية گاضبتني من اديه حته لا اتحرك والجم روحي
وهوه واكف عله روسنه يعاين
خلصت نعمة وكامت ومددتني الحجية عله رجلهه ورفعت نعمة رجليه وانه ما بطلت بجي
نعمة: خلي رجلج هيج لا تتحركين خلي يطگهه الهوه
هاشم; ياهو السوه بيج هيج
احس هالكلمة اجتني من الله حته اذب حملي وارتاح
صرخت بصوت عالي وبجيت: ام عباس
نعمة: ياا عود صدگ... تسودنت هاي المرة شمالهه
ام ناظم: يا مال الجيرة اي ولله والخفت
اندار وفتح الباب حيل نرگع بالحايط وطلع
وكف يم الدرج ويصيح بكل صوته: ام عباااااس... ام عبااااااس
طلعن نعمة والحجية وضليت ابحدي وما اطاني گلبي اضلن گاعدة
كمت گوه امشي عله تك رجل وصلت يم باب غرفة الحجية
ونزلت هيه
ام عباس : هاا هااا آمر شيخ آمر
يتبع......