رفع راسه باوعلي وحجه: يلله ذهب حظري روحج اردنج للبيت
خديجة: يااا خوية جيتيش هاي اگعد خل اصبلكم غده تغده وي ابو علي والولد عليك الله
يفر بسبحته ويحجي: واصله ام علي عساج سالمة مستعجل اريد اردن عدي شغل يلله بوية استعجلي
كمت عدلت شيلتي ولبست عباتي وگلبي يخفگ بسرعة وخايفة
شكله مو طبيعي ابد مبين ضايج
سلمت عله خديجة والبنات وطلعنه ركبت ويا بالسيارة وهوه ساكت وما حجه ابد
وصلنه للبيت بسرعة لان بيت خديجة جان قريب
انداريت اريد افتح الباب ووگفني صوته
هاشم: الصار اليوم ماريدنه يتكرر مره ثانية ..طلعه بليه علمي ماكو.. لا تجبريني اعيدن السويته وياج.. اسمعي الحجي يذهب ولا تعاندين ..تراني عدوي ليعاندني
بقيت ساكته واباوعله
اندارلي وحجه: مفهوم
هزيت راسي وانه ساكته
هاشم: نزلي هسه.. الله وياج
نزلت ودخلت للبيت وشفته حرك سيارته وراح
ورجعت لسجني مرة ثانية
هاشم
من اول ما دشت البيتنه وانه متأكد شايفهه
بس وين مادري
لحد ما اجه ذاك اليوم لاجانه بي زلمة غريب بنصاص الليالي
يدگ ابابنه ويطوطح ويصيح بأسمهه
ساعته فگدت اعصابي وطحتله دگ كتل جنزته تجنز لحد ما حيدر گدر يجره من جواي
احنه بيت الشيخ الي العالم كلهه تحلف بسمعتنه تجي بت جاهلة تخلي الوادم يحجون باعراضنه
دخلت وانه مااشوفن گدامي من الاعصاب
بس استغفرت ربي وصحتلهه حته اعرف السالفة شني
اجت خايفة وخاتله وره نعمة رحت جريتهه ونشدتهه ع الزلمة
جانت ساكته ومدنجة وبس دموعهه تحجي
وبهاي الساعه جن رجعلي عگلي واذكرت
من شفت صفنتهه بوجهي
نفس النظرة نفس البت الشفتهه بالبستان وصاحت بوجهي
ذكرتهه واحس الدم صعد الراسي وما دريت بروحي غير راگعهه راشدي خليتهه ترد ليوره
جان الكل ملتم صحت بيهم وطش كلمن الحجرته وصعدت انه الحجرتي وانه راسي دايخ بعده
ياهو هاذ اكيد هي تعرفه
شلون اجه هنا وشلون يعرف اسمهه
هسه انه شبيه دايخ بيهه بت مالي وياهه شغل
فترة و اردنهه منين ما اجت وينتهي كلشي
كعدت ثاني يوم مشه اليوم عادي مابين شغل وطلايب العالم وتعمدت مااگعد بالبيت حته لا اشوفنهه
رديت المغرب وانجبرت ادخل لامي اشوفنهه
ولگيتهه متمددة ومغطية راسهه واسمعهه تون
سويت روحي مااسمع وما ردت انشد شبيهه بس نعمة حجت وگالت مصخنه
سويت روحي مامهتم وماقبلت اخذنهه انه وكتلهم ينطرون حيدر يرد
طلعت منهم وبس صعدت بحجرتي خابرن حيدر وكتله يرد للبيت وياخذهه هي ونعمة للمستوصف يشوفون شبيهه
راحو وخابرني حيدر وره ماردو وكال مابيهه شي بس صاير عدهه ضعف عبن ما ماكلة ومصخنه
ثاني يوم هم طلعت من الصبح والتهيت بالشغل ورجعت بوكت الغدة
دخلت عله امي ونعمة سلمت واستغربت من ما شفتهه يمهن
جا وين راحت
كعدت يمهن وبقيت ساكت ماسألت بس نعمة عبالك عرفتني من عيوني عليمن انشد وكالت راحت ويه خديجة البيتهه
رغم خديجة اختي ورجلهه ابن عمي واعرفه كلش زين ماعده عين وصخه وطول الوكت بالشغل هوه وولده بس ضجت مادري ليش
وكمت طلعت ورحتلهم حته بليه غده ولاگاني ابو علي وولده يم الباب راجعين
جلب بيه ادخل بس ماقبلت كتله سويلي درب اول مره
شويه وطلعتلي خديجة دخلتني
لكيتهه كاعدة ومبين وجهه احسن من البارحة
شافتني واصفر وجهه
خزرتهه وكتلهه امشي اردنج للبيت لا ناقشت ولا عارضت كامت لبست بسرعة وطلعت وكوه فكينه روحنه من خديجة وطلعنه
وصلتهه للبيت ورحت عله شغلي وانه مستغرب من روحي ومن تصرفاتي
ساعة انشد روحي ليش هيج جاي اسوي ليش مهتم الامرهه
وساعة اردن واكولن عبن هي ابيتي وامانه عدي وكلشي يصيرلهه اتعاتب انه
ذهب
صار وكت العشة وتجمع الكل ع العشة وانه ماقبلت اكعد وياهم
حاسة روحي مالي عين اگابل احد بعد السوا سند
وماريدن اشوفن نظرات الشماته بعيون ام عباس وبناتهه
توسلت بيه نعمة اطلع يمهم رادت ماقبلت
عاد گلتلي راح اجيبلج العشة هنا
هاشم
صبو عشه وجان الكل مجتمع بس هي ماكو
كلت يمكن تجي ويه نعمة بس اجت نعمة وكعدت الوحدهه
هاشم: نعمة
نعمة: آمر خوية
هاشم: جا هذيج البت وين
نعمة: گصدك ذهب
هاشم: اي ما تتعشه
ام عباس: جا يمكن ماتعجبهه كعدتنه بت الفگر
هاشم: ام عباس... من احاجيج ردي
نعمة: ماتقبل خويه تجي هنا وصيت تينة توديلهه عشاهه بحجرة امي
هاشم
عليت صوتي وصحت عله تينه بالمطبخ واجت تركض: آمرني شيخ
هاشم: اتركي البيدج وروحي ندهي الذهب گليلهه الشيخ يريدج
تينة :انشالله
ذهب
كاعدة بغرفة الحجية اجت تينة گالتلي الشيخ رايدج كتلهه شرايد كالت مادري
طلعت وكمت وراهه لبست شيلتي وطلعت
لكيتهم كلهم ملتمين ع السفرة
دنجت وانه واكفة وحجيت: آمر شيخ صحتني
رفع راسه وخزرني: اليگعد بهالبيت لزوم يحترم عاداته واحنه عاداتنه بوكت الوجبة الكل يلتم حته لو ما يشتهي المهم يكعد ويشاركنه اللمة
تعلمي عله هالشي من اليوم وجاي واكل بالحجر بعد مااريد
دنجت وهزيت راسي اله وانه الدمعه لايجة بعيني مادري صدك جان حجية وياي قاسي مادري انه صايرة ماتحمل شي
التفتتلي نعمة وحجت: تعاي حبيبة تعاي كعدي حذاي
رحت وكعدت يمهه ونعمة الله يجيبهه ويكعدهه گباله
اكل واحسن اللگمة گوه تنبلع احاول ادنج وما اعاينله بس هي عيوني تروح عليه غصبا عليه
گوه اكلتلي جم لگمة وگمت شردت بغرفة الحجية
وجان تجي وراي سارة بت الشيخ
سارة: خاله امي تريدج
ذهب
اوووف من هالليلة الگشرة الماراضية تخلص: شتريد
سارة: مادري هي كلتلي اصيحلج
ذهب: جاية
كمت طلعت باوعت بالهول ما لكيتهه
دخلت للمطبخ والكاهه هي وبناتهه وتينه
شافتني وتخوصرت وبناتهه وراهه: جا العروس شوكت تخلص السبعة مالتهه وتدش للمطبخ تشتغل حالهه حالنه
ذهب: حرام عليج خاله جا صارلي بس يومين ما شاركتكم عبن جنت مريضة
ام عباس: وخلخاله التخلخل عظامج جا هازة كاروكج انه وتصيحيلي خاله.. شمري جمومج يلله واشتغلي حالج حال البنيات ولا تخليني اروايج وجهي الآخر
هاشم: جا عبن عدج وجه ثاني طلعي خل نشوفه كلنه علويش ضامته
التفتنه كلنه عله الصوت
جان واگف اباب المطبخ وينشف اديه بالخاولي
ام عباس; هااا... اااا... شيخ... انته هنا
هاشم: حسج عليان يم عباس ولسانج طولان وانته تعرفيني عدل شيطاني المرة ام حس عالي
عوفي عنج هاي السوالف ولتهي بشغلج عبن انتي الجبيرة بيناتهن وعيب الواحد يعلمج بعد هالعمر
عافهه واندارلي وحجه: دشي بغرفة الحجية ولا طلعين لا تتخربطين مرة ثانية مالنه حيل مراكض المستشفيات
اندار وطلع وانه طلعت ورا واحسن لعيون تريد تاكلني
صار الليل وفرشتلنه نعمة وجابت صينية جاي وحب شمسي وكعدت يمي
ذهب: ياا هاي شني
نعمة: وصيت عله حب من العصر جا شني نكعد هيج فاهين غير نريد نسولف
رفعت راسهه علينه الحجية فاتحة تك عين: جا بالعباس موش صاحيات... ولج نعيمة خايبة انتي مسودنه من گاعج انوب اجتج وحدة عله اخبالج
نعمة: الا كولي ردت عليه وحشة الليل يمة وطايرة بيهه.. مادري يذهبه مرات اندعيلج الله يحنن گلب الشيخ عليج انوب اردن واگولن جا هم تروح وتردين وحيده ينعمة
ذهب: ياا جا ولا اعوفنج وعلي
نعمة: ههههههههه يااا فلك.. گرة عينك خوية هاشم مريتك تريد تبقه مگابلتني وگاعدة
ذهب: جا فدوة اروحلج نعمة جاوبيني شعجب لهسة ما مزوجة
نعمة: جا ترديني افتح جروحي گوة يذهبه
ذهب: فدوة سولفيلي وراج سالفة انه متأكدة وسالفة جبيرة هم
نعمة: اووووف اوووف يذهبة... مزوجة انه
ذهب; يااا مزوجة جا وينه رجلج
نعمة: ههه رجلي ..رجلي حجاية تاخذة وحجاية تجيبة ضال يتلولح بالهوى
ذهب: هااا... شني يعني
نعمة: جنت زغيرة يذهبة وصبية وجان هوه كلشي بدنيتي ..اشوفن الدنيا بعيونه.. احبنه حب بس الله يدري بي وهوه هم حباني
جان عمري بذاك الوكت 14 سنة وهوه 20 سنة
ابن عمي يذهبه ابن عمي
جان يصير اخو ام عباس
ذهب: عود صدگ اخو ام عباس.. بس لا يشبهه
نعمة: ههههههه جا خايبة ماتوبين من سوالفج انتي.. مايشبهه لا تخافين
ذهب; كملي
نعمة: حاجة عمي ابوي وخطبني منه وجانت الدنيا ما سايعتني.. كلت هاي هيه الدنيا ضحكتلي و محد يگدر ياذيني وانه بسد ابن عمي شحده اليكربلي
تزوجنه و عشت عد بيت عمي
كريمة جانت مزوجة ناظم بذاك الوكت وهي جبيرة عمي
وعدهه بعد اثنين خوات مامعرسات
اكبر من رجلي
انوب يجي رجلي واخو ازغر منه ما معرس بذاك الوكت
امي جانت ماراضية عله عرسي عبن تدري بمرت عمي وبناتهه شني
بس انه دگيت رجل ما ريدن غيره وابوي جان راضي واخوي ناظم هم
بعد امي ما گدرت تحجي
واول ما دشيت البيت عمي يذهبه كرهت اليوم الجابتني امي بي واليوم العشگت بي ابن عمي
امه جانت گوية وما تنجرع و حجايتهه ماشية ع البيت كله
شفتي ام عباس هسه شگد گوية يم امهه تطلع ما تسوه شي
وهاي غير خواتهه الازغر منهه
شفت الويل يذهبه شوفني نجوم الظهر كرهت روحي وكرهت رجلي العاجز گدام اهله وضعيف كدام امه وخواته ومايگدر ياخذ حگي
يشوفني انطگ وانهان واتأذه وما يفك حلگة بحجاية يدنج ويعبر وجنه ما يشوف
واستگون عليه اكثر من مات اخوي ناظم جان راعبهم ومخوفهم
وبعد موته حته رجلي گلبنه عليه
والزاد الطين بله ما صار عدي جهال
وبقن يگومني بحجاية ويگعدني بحجاية
چلمة العاجر ما تطيح من حلوگهن يصبحني بيهه ويمسني بيهه
وكل هذا يذهبه وانا صابرة ومتحمله وحته اهلي ما يدرون باللي يسوونه بيه
رفعت راسهه علينه الحجية وحجت: جا من عبنج ثولة والله ساطرج ما تحجين
ذبت حجايتهه وردت نامت
وكملت نعمة
لحد ما اجه ذاك اليوم الگضبن بي رجلي وحطن براسه بت خاله
بت زغيرة وحلوة ومن صفحتهن واجاني بكل عين صلفة
يكلي اريدن اعرس عبن انتي ما بيج خلفة
لهنا وبعد ما گدرت اسكت اكثر تعاركت ويا وصيحت وگضبني نهاني عله ايده
وبعدهه جابني لاهلي
طلعت من بيتهم واشوفن نظرات الشماته بعيونهن
واكفات بالدرب وطلعني من يمهن ساحلني من شعري ولا وحدة جرته مني ولا وحدة فكتني ولا وحدة كلتله بت عمك عيب
بالعكس جانت متشفيات وهنه يشوفني مكسورة وذليلة بيده
وبوكتهه جان الشيخ هاشم عاقد عله ام عباس
هوه شافني دشيت هيج وهوه تسودن لحگ رجلي البيتهم وجنزه تجنز
ورجع للبيت كمل عله ام عباس
وكل هذا يذهبه ومانكسرت ولا رفلهه جفن
مشت لايام وبقيت معلگة لا انه المطلگة ولا انه لمعرسه ماخلنه يطلگني عبن جنت زغيرة ويدرن بس اتطلگ ترد الوادم تتخطبني
رادن يخلني معلگة ويخربن حياتي
تزوج وهم مرته ما خلفت
ووره ما مات ابوي رحت لاخوي وهاشم وگتله اريدن اطلگ
وراح وخلا يطلگني غصبن عله خشمة
وهاي انه جدامج يذهبه گعدت اخدم امي ابركلي من العرس
الشفته من بيت عمي كرهني بالعرس وبالرجل وسوه بيه عقده منهن
ذهب: اووووف ينعمة كل هذا شايلته بگلبج
نعمة: الشكوة الغير مذلة خيه خلي البالگلب بالگلب
ذهب: جا بس انه مستغربه من سالفة
نعمة: شنهي
ذهب: جا كل السوته بيج ام عباس ولاجاج من وراهه ومن وره اهلهه وبعدج تعاينين بوجهه وتحجين وياهه ..انه لو منج احط طابوگه براسهه واموتهه
گعدت الحجية عله حيلهه تلف بشيلتهه وتحجي: جا الهن رب يحاسبهن لا تضنين ربج غافل تراه يتصنط للحلوگ
نعمة: ها يمة اشوفنج گعدتي
ام ناظم: جا ليتصخم وينام يمجن يگدر ايغفي دصبيلي جاي صبيلي
ذهب
جريت لصينيه عليه وانه اضحك: تدللين يمه انه اصبنلج
ام ناظم: جا شحلاتهه اليمة من حلگج يبعد امج
استحيت ودنجت احسن هالحجاية طلعت من گلبي ولا ارادية مادري ليش گتلهه يمة يمكن لان شفت حنيتهه عله ولدهه
لو يمكن اشتاگيت لامي واشتاگيت الچلمة يمة
تينة
گعدت الصبح باوعت ع الكرويته مالگيت حيدر
گايم يمكن
گمت عله حيلي سمعت صوت جاي من الحمام عرفته جاي يسبح
لگيته مطلع بنطرون وقميص ومحظر الاوتي يريد يكوي
باوعت ع الهدوم وضليت صافنة
ينقبض گلبي من اشوفنه لابس قميص وبنطرون اكيد يريد يسافر
كعدت انه شغلت الاوتي وكعدت اكوي بهدومه واشتمن بريحتهن
افييييش يهالريحة التسوه عمامي كلهم
طلع من الحمام لابس فانيلته ولاف المنشفة عله خصره
من عرسنه الهسه ولا يوم شفته ما لابس شي
ولا يوم نازع يمي
حيدر: صباح الخير
تينة: اصباحك عافية
حيدر: ليش تعبتي روحج انه اكويهن
تينة: يااا شالقضية جا غير انه مرتك اذا ماتعبلك ياهو اليتعبلك
رفع راسه باوعلي وعبالك كايله شي عيب لو غالطة عليه
عافني واندار ع المراية يمشط
تينة: وين تريد تروح
حيدر: ليش السؤال
تينة: لا بس اشوفنك مطلع قميص وبنطرون اكيدن عدك سفرة
حيدر: مو سفرة ..هيج عدي روحة سريعة البغداد شغل بليل راجع
تينة: عله خير انشالله
بقيت اكوي من كل گلبي وانه مقهورة
مادري ليش اضوجن من يگلي يريد يروح البغداد ما ابدي يروح كلش
عبن ادري هناك شني اخافن بروحه من روحاته وحدة ماتخاف الله تلبيله ويشوفهه احسن مني ويعوفني
دگومي يتينة گومي علساس هوه مگلبج هسه
گمت شلت الاوتي واطيته هدومه
دخل للحمام بدل وطلع ووگف ع المراية يلبس بساعته
اعاينله من وره واعاين الطوله من اروحن فدوة الهالطول
جا يمته تحن عليه ماتگلي خايب ولله تعبت
لابس قميص ماروني وبنطرون كابوي والماروني ياكل ويشرب عليه
خلص اخذ سويجة ومحفظته ونظارته وگبل لا يطلع اندار عليه: رايدة شي
تينة: تروح وتردلي سالم انشالله
حيدر: الله يسلمج
طلع وانه لو عليه ما خلي يروح وعلي گلبي معلگ بي مو بيدي ولله
ذهب
گعدت الصبح باوعت بالغرفة محد يمي
الساعة بالعشرة گمزت وكمت لميت فراشي بسرعة جا هسه ام عباس بس تشوفني تعرس عليه بالعباس
طلعت للحمام غسلت ورجعت للغرفة لميت شعري جا هيه عركة عركة بعد خل اتأخر براحتي
جان شباج غرفة الحجية مفتوح شويه
انداريت واشوفن الشيخ گاعد بالحديقة وگاضب بيده فرس ابيض يخبل
ويمة واحد يسولف ويا ويضحك
اول مره اشوفنه يضحك.. جا غير الضحكة خذت گلبي
اوووف شيصير لو دومك هيج وجهك يضحك
بقيت واگفة وصافنه عليه ونسيت ام عباس واهلهه وطوايفهه
شكله حلو وهادي ويخبل من بعيد
ليشوفه ما يگول هذا التخوف نظراته وزعله ما ينحمل
ما حسيت غير عله وحدة كفختني من وره حيل
انداريت لگيتهه نعمة
نعمة: جا ليش تجسسين عله اخوي
ذهب: يمعودة طيحتي گلبي گلت اجتني ام عباس
نعمة: يااا جا الشيخ هنا ام عباس بحالج تلگينهه اتطفر جدامة منا ومنا
حجت هيج وشفنه ام عباس طالعة وكشرتهه واصله لاذانهه
وحدة باوعت للثانية وطگيناهه ضحكة انه ونعمة
ذهب: جا شعجب يمة رجال غريب ومخلي ام عباس تطلع
نعمة: ولج هذا عمي حسان يشتغل عدنه من عمر محسوب من اهل البيت
هزيت براسي ورديت اباوع
جان اليوم جمعه والكل متجمع ع الغدة
وخديجة اليوم عدنه ووياهه بناتهه وحته رجلهه وولدهه
والشيخ نازع عگاله ومنسف رداناته ويشوي سمج بالحديقة
وشكله يخبل من بعيد بالدشداشة والمناظر
والكل ملتم ويضحك ويسولف من عدا تينه الجنهه يتيمة وبس صافنة عله غيبة حيدر
صبن خديجة ونعمة الاكل وفرشنه بالحديقة والشيخ يشوي سمج ويطي لابن خديجة يوزع
جنه كاعدين انه وتينة وبنات خديجة بصفحة ابحدنه
اندار الشيخ علينه وحجه: ذهب تعاي اخذيلكم سمجة
كمت وانه ما مصدگه اول مره يصيحلي وما صايرة مصيبة و اول مره يصخرني عله شي
رحتله اركض وكفت يمه ادنه عليه سوه روحه يگلب بالسمجه ع المنقلة وحجه: شيلتج لبسيهه عدل وگصيبتج ضميهه لا اكصنهه واذبنهه ويه الحطب
رفع راسه اطاني السمجة وخزرني
اخذتهه ورجعت اطيتهه للبنان وكمت دخلت للمطبخ ضميت كصيبتي تحت ثوبي ولفيت شيلتي عدل وطلعت
خلصنه غده وسوو جاي وهم يسولفون ويضحكون
اباوع عليهم وعله لمتهم شكد حلوة وتحسهم كاعدين عله حب الله اله ام عباس التتلزگ بالشيخ
وبناتهه يطافرن منا ومنا ويردلهن واحد يلاشيهن حته يجلبن بي
خلص اليوم وراحت خديجة ورجلهه وجهالهه بعد ماتعشو عدنه هم و راح الشيخ گعد بالديوان
دخلت الغرفة الحجية وذبيت روحي عله فراشي تعبت اليوم كلش بس تونست ويمكن هذا احله يوم مر عليه من يوم الي اجيت بي هنا
دخلت الحجية وتمددت عله جربايتهه
ودخلت وراهه نعمة
شغلنه التلفزيون وتمددنه انه ونعمة وضلينه نباوع
سمعنه الحجية شخرت وضحكنه
لهناك ومانحس غير الباب ندفع علينه ودخل الشيخ وشغل الضوه علينه
كمنه كامزين انه ونعمة والحجية رفعت راسهه: شبلاك يمة شصاير
باوع لامه ورجع باوعلي جان خازرني وعيونه حمر
جنت لابسة دشداشة نص ردن وشيلتي ذابتهه ومن الخوفة حته نسيت شلابسه
تگرب عليه وجراني من فراشي گومني ودفعني حيل وجر لفراش شمره علينه
وبقينه فاكين حلگنه انه ونعمة من الشفنا
دنج وشال التلفون الجان جوه الفراش وبس شاله دگ بيده
فتح خط وفتح سبيكر ونسمع صوت زلمة يصيح :الووو وينج
يتبع......